2 Samuẹl

24 Ẹre Mẹfibosiẹt ne eyẹ ọghe Sọl na do khian vba ọba. Ọ ma he sa amẹ ya kpe owẹ, ra nọ zẹ ẹtu, ra nọ họ ukpọn rẹn, ke ẹghẹ ne ọba ya kpa vbe Jerusalẹm, do sẹ ẹghẹ nọ na werriegbe rre vbe ọfunmwegbe. 25 Mẹfibosiẹt ghi ke Jerusalẹm rre do khian vba ọba, ọba keghi nọ rẹn wẹẹ, “Mẹfibosiẹt, vbọzẹ ne u ma na lele mwẹ kpa yi?” 26 Irẹn keghi wanniẹn wẹẹ, “Umogun, u rẹnrẹn wẹẹ uke ẹre l khin. I na tama ọguọmwadia mwẹ nọ rro ẹsin ye otọ mẹ, ne l miẹn ehe na leluẹ gha khian, sokpan, ọ na rẹrẹ mwẹ. 27 Ọ keghi do ba mwẹ ohoghe ma ruẹ, sokpan, umogun, te uwẹ yevbe odibosa, rhunmwuda ọni, emwi nọ ghi kei vbe aro ruẹ, ru mwẹ re. 28 Te ọ te khẹke ne u gbele ẹgbẹe ọghe erha mwẹ hia rua, sokpan, u keghi ye ru mwẹ ẹse, u na wẹẹ ne I do gha rri evbare vbe etebul ruẹ. Ọ ma ghi khẹke mwẹ ne I ye vbu emwi vbe obọ ruẹ umogun.” 29 Ọba keghi wanniẹn wẹẹ, “Ghẹ ghi gbe agbanmwẹ, I tae nẹ wẹẹ, uwẹ vbe Ziba gha gba ghae emwi e Sọl.” 30 E Mẹfibosiẹt keghi wanniẹn wẹẹ, “Gi e Ziba kue wa viọ ehia, ẹko ene uwẹ na werriegbe rrie owa vbe ọfumwegbe na vuọn mwẹ umogun.” 31 E Bazilai ne ovbi e Giliad keghi vbe ke Rogelim gha dee nọ do su ọba fian Ezẹ e Jọdan rra. 32 E Bazilai khian ọmaẹn nẹ ẹsẹse. Ukpo iyenẹ ẹre ọ ghaa ye, ọ vbe fe ẹsẹse. Ọ kegha viọ evbare gie ọba ẹghẹ nọ na gha rre Mahanem. 33 Ọba keghi tama rẹn wẹẹ, “Lele mwẹ gha rrie Jerusalẹm, I gha gbaroghe ruẹ.” 34 Sokpan, e Bazilai keghi wanniẹn wẹẹ, “Odẹ ehe ne I rrie ẹre ọ ghi kẹ mwẹ sẹ, vbọzẹ ne l gha na lele ruẹ gha rrie Jerusalẹm, umogun? 35 Ukpo iyenẹ ẹre I ye na, I gha ye sẹtin rẹn alughaẹn nọ rre emwi nọ maan ra nẹi maan ra? Mẹ ne ọguọmwadia ruẹ gha ye sẹtin rẹn vbene emwi ne I re, ra ne I da ye hẹ vbe unu ra? Mẹ gha yẹ sẹtin danmwehọ urhu ikpia kevbe ikhuo ni so ihuan ra? Vbọzẹ ne I gha na khian ihẹ nuẹn umogun? 36 Ẹse na san ọmwa ẹre vberriọ, ma khẹke mwẹ. Rhunmwuda ọni, l gha su ruẹ gberra e Jọdan kherhe. 37 U ghi gu mwẹ dọlegbe gha rrie owa, ne I ya wu vbe ehe nọ diake idin avbe evbibiẹ mwẹ. Ghee ovbi mwẹ ighẹ Kimham rhie ẹre mwẹ obọ gha khian umogun, nọ gha ga a, u ghi ru emwi nọ ghi yẹ ruẹ nẹẹn.” 38 Ọba keghi wanniẹn wẹẹ, “I gha rhie ẹre gha khian, I ghi vbe ru emwi ne uwẹ rhirhi gha hoo nẹẹn. I gha ru emwi ne uwẹ rhirhi nọ nuẹn.” 39 Ẹre Devid vbe emwa rẹn hia na do fian e Jọdan rra. Ọ keghi mu e Bazilai unu hiẹnhiẹn, ọ na na erhunmwu nẹẹn, ẹre Bazilai na dọlegbe gha rrie owa. 40 Ivbi e Juda kevbe obọkpa vbe Ivbi Izrẹl ghi su ọba gberra Ezẹ e Jọdan nẹ, ọ kegha rrie Gilgal, e Kimham keghi lelẹe gha khian. 41 Ẹre Ivbi Izrẹl hia na bu ọba gha khian, iran tama rẹn wẹẹ, “U gha tọ u kpẹre Umogun, vbọzẹ ne etẹn ima ighẹ ivbi e Juda na rhie ruẹ kpa, iran na su uwẹ kevbe ẹgbẹe ruẹ kevbe emwa ruẹ fian e Jọdan rra?” 42 Ivbi e Juda wanniẹn wẹẹ, “Ovbi ima ọ re ọba khin, ọni ẹre ọ si ẹre ne ima na ru vberriọ. De ne uwa ghi mu ohu yi vbọ yi? Ọ ghọ ima yọ ra, ra ọ rhie emwi rhọkpa ne ima?” 43 Ivbi Izrẹl keghi wanniẹn wẹẹ, “Ukhukhu igbe ẹre ọ ya kan ima ighẹ vbene ẹmwẹ e Devid ne ọba ya kan uwa, ọ gha rhe gha re ovbi uwa. Vbe uwa a ghi na kpe amẹ isikan ku ima hẹ? Adeghẹ erriọ nọ khekherriọ, ma ẹre ọ ka zirọ wẹẹ na ya rhie ọba werriegbe rre!” Sokpan Ivbi e Juda ẹre ukpẹ ọre tua sẹ ọghe ivbi Izrẹl, vbe ẹzọ ima ọ yan rẹn ne iran ghaa gui.