2 Samuẹl
17 E Jonatan kevbe Ahimaz keghi mudia vbe Enrogẹl, ne emwa ghẹ ya bẹghe iran vbe iran gha la ore ẹvbo. Ọvbokhan okhuo ọkpa ẹre ọ wa ya gha na iyẹn emwi nọ sunu ma iran, iran ghi vbe ya tama e Devid ne ọba. 18 Sokpan, vbe ẹghẹ na nian, ọvbokhan ọkpa keghi bẹghe iran, ọ na ya tama Absalọm; iran keghi rhunmwuda ọni zẹgiẹ gha rrie owa okpia ọkpa vbe Bẹhurim. Uhae ọkpa rre ọkpẹn owa ẹre, iran keghi la uwu ẹre. 19 Amwẹ okpia nii keghi mu ewa, ọ na wa ẹre yan unu ẹnrẹn, ọ na tan ọka yọ, a ma ghi gha bẹghe emwi rhọkpa vbe evba. 20 Eguọmwadia Absalọm kegha die owa nii, iran keghi nọ okhuo nii wẹẹ, “Ahimaz kevbe Jonatan vbo?” Iren keghi wanniẹn wẹẹ, “Iran fian ẹzẹ rra.” Emwa nii keghi gualọ iran, sokpan, ugbẹn vbe iran ma miẹn iran, iran keghi werriegbe gha rrie Jerusalẹm. 21 Ugbẹnvbe iran ghi kpa nẹ, Ahimaz kevbe Jonatan keghi ladian vbe uwu uhae nii, iran na gha khian ya na iyẹn ma e Devid ne ọba. Iran keghi tama rẹn vbene Ahitofẹl te kun emwi nọ gha ru ẹre re hẹ, iran na tama rẹn wẹẹ, “Zẹgiẹ fian ẹzẹ rra.” 22 Rhunmwuda ọni, e Devid kevbe emwa rẹn keghi suẹn gha fian ẹzẹ rra, vbene ẹdẹ ghi te gbe, iran hia fian rẹn rra fo nẹ. 23 Ahitofẹl ghi miẹn wẹẹ, a ma rhie iro ne irẹn zẹẹ, ọ na rhunmwuda ọni gbalọ ekẹtẹkẹtẹ ọghẹe, ọ na gha rrie ẹvbo ẹre. Ọ ghi mwamwa emwi hia ye ihe nẹ, ọ na ya zẹgbẹle. Iran keghi re ẹre ye idin ẹgbẹe ọre. 24 Ẹghẹ ne Absalọm kevbe emwa rẹn ghi na fian ẹzẹ e Jọdan rra, e Devid sẹ ẹvbo na tie ẹre Mahanem nẹ. 25 Absalọm keghi rhie Amasa ye ihe Joab zẹ vbe ọkaokuo. Amasa kegha re ovbi okpia ọkpa na tie ẹre Itra, nọ re ovbi Izrẹl. Irẹn ẹre ọ gu Abigẹl ru emwi ọdọ vbe amwẹ; Abigẹl kegha re ovbi Nahas, ne ọtiẹn Zẹruia nokhuo, nọ re iye Joab. 26 Absalọm kevbe Ivbi Izrẹl keghi bu agọ ye Giliad. 27 Ugbẹnvbe Devid ghi sẹ Mahanem, Siobi ne ovbi e Nahas ne ovbi ẹvbo na tie ẹre Raba vbe Amọn, kevbe Makiẹ ne ovbi Amiẹl ne ovbi ẹvbo na tie ẹre Lodeba, kevbe Bazilai ne ovbi ẹvbo na tie ẹre Rogelim vbe Giliad, keghi bu ẹre rre. 28 Iran na viọ ekpamaku ni vbẹ rre, akhe kevbe emwi na wa ye ukpo na vbiẹ. 29 Iran kevbe viọ evbare gie Devid kevbe emwa rẹn: avbe ọka ẹsin, ọka irhuarhua, evbare na le, ọmọ erhan na tọẹn, ikpakpalọ, ere, amẹ owọn, ewẹn ẹmila nọ zeze, kevbe ewẹn ẹmila nọ kiri kevbe avbe ohuan. Iran rẹnrẹn wẹẹ egbe gha wọọ e Devid kevbe emwa rẹn, ovbamẹ kevbe ohanmwẹ gha vbe gbe iran vbe uwu ẹgbo.