Gẹnẹsis

39 Ivbi Ismẹl keghi mu e Josẹf gha rrie Igipt. E Pọtifa, nọ vbe re ọruemwi ọghe Fero zẹvbe ọkaolotu iran ni khẹ odẹ vbe ẹguae, keghi dọe vbe obọ Ivbi Ismẹl ni muẹn gha die Igipt. 2 E Jehova keghi mudia ne Josẹf, ọ na ru ẹre ne emwi hia gha dinnodẹ nẹẹn. Irẹn kegha rre owa arowa ẹre ne Ovbi Igipt nii. 3 Arowa ẹre keghi miẹn wẹẹ, e Jehova mudia ne Josẹf kevbe wẹẹ, e Jehova gi emwi nọ ru hia gha dinnodẹ. 4 Ẹmwẹ Josẹf keghi wa gha yẹẹ Pọtifa, ọ keghi rhunmwuda ọni mu owa ẹre kevbe emwi nọ mwẹ hia nẹẹn gha gbaroghe. 5 Ke ẹghẹ ni kpa, e Jehova keghi fiangbe igiowa e Pọtifa ne Ovbi Igipt, rhunmwuda e Josẹf. E Jehova keghi fiangbe ẹre vbe owa kevbe odẹ. 6 E Pọtifa keghi viọ emwi nọ mwẹ ne Josẹf nọ gha gbaroghe. Ẹi ghi vbe si osi ye emwi rhọkpa gberra evbare nọ re. E Josẹf keghi re ọmọ nọ zọ ẹse, nọ vbe mose. 7 Ọ ma ghi he kpẹẹ, amwẹ arowa e Josẹf kegha ya aro ta ọta vbe egbe ẹre. Okhuo nii keghi tama rẹn wẹẹ, “Do gu mwẹ lovbiẹ.” 8 Irẹn keghi he, ọ tama okhuo nii wẹẹ, “Arowa mwẹ i ghi vbe si osi ye emwi ke emwi ni rre owa na, rhunmwuda ighẹ I rre emwa. Ọ viọ emwi hia mẹ nẹ, ne I gha gbaroghe. 9 Ọmwa nọ kpọlọ sẹ mwẹ vbe owa na i rrọọ, ọ rhie asẹ mẹ ne I gha gbaroghe emwi hia, vbọ gberra uwẹ ne amwẹ ọnrẹn. Vbia khian ghi gu ru emwi dan vberriọ hẹ yi, ne I fidọn ghee Osanobua?” 10 Agharhemiẹn wẹẹ ẹdẹgbegbe ẹre ọ ya tae ma e Josẹf, ọ ma zẹ yọ ọre, nọ gu ẹre ru emwi. 11 Sokpan, ọ ghi sẹ ẹdẹ ọkpa, ugbẹnvbe Josẹf ghi la uwu owa, nọ ya winna iwinna rẹn, eguọmwadia rhọkpa ma vbe sikẹ evba. 12 Okhuo nii keghi sobọ ye ọre ukpọn, ọ wẹẹ, “Gu mwẹ ru emwi.” Sokpan irẹn keghi sinmwi egbe ladian ore, vbene ọ na sẹ ẹwu ẹre rae ne okhuo nii. 14 Ọ keghi tie ikpia ni rre owa ẹre wẹẹ, “Wa ghee o! Ọdafẹn mwẹ ẹre ọ mu ovbi e Hibru na ye owa, sokpan mẹ ẹre ọ ghi khian mu yagha. Ọ bu mwẹ la ughugha, ọ na wẹẹ ne I gie irẹn gu mwẹ lovbie, ẹre I na rhie so zẹvbe ne ẹho mwẹ sẹ. 15 Ugbenvbe ọ ghi miẹn wẹẹ I rhie so, ọ keghi sẹ ẹwu erẹ rae yọ mwẹ ẹvba, ọ keghi lẹẹ ladian.” 20 Ẹre arowa e Josẹf na wẹẹ na muẹn ye eghan, ehe na viọ avbe olẹghan ọghe ọba yi, eghan ẹre ọ ghi gha ye. 21 Sokpan e Jehova keghi mudia ne Josẹf, ọ na vbe tohan rẹn sẹrriọ wẹẹ, ẹmwẹ ọnrẹn kegha yẹ eseghan. 22 Ọ keghi mu e Josẹf ye nọ gbaroghe avbe oleghan nikẹre hia. Irẹn ẹre ọ ghi gha re nọ ta emwi na gha ru vbe uwu eghan. 23 Te eseghan ghi gha fi aro rua vbe avbe emwi ne Josẹf gbaroghẹ, rhunmwuda e Jehova mudia ne Josẹf, ọ na gi emwi nọ ru hia gha dinnodẹ.