Gẹnẹsis
20 Ẹkpo nii, ẹre e Jehova na kha ma Ebraham wẹẹ, “Emwa wa ta emwi dan ne Sodọm kevbe Gomorra ru, orukhọ ọghe iran vbe kpọlọ. 21 I ra do ya ghee deghẹ ẹmwẹ ne iran ta yọ mwẹ ehọ vbekpa ẹre, deghẹ ẹmwata nọ. I ra ya gualọ otọ ẹre.” 22 Avbe ikpia eva nii keghi kpa, iran keghi mu aro da Sodọm sokpan Jehova keghi mudia ke Ebraham. 23 Ebraham keghi sikẹ Nọyaẹnmwa, ọ nọ rẹn wẹẹ, “Te u ra gele fuẹn nọ ma ru khọọ ba eni rukhọ ra? 24 Adeghẹ a miẹn arhunmwu ekigbesiyeha nọ ma rukhọ vbe evba nii, u gha ye fuẹn ẹvbo ni hia ra? U i sọrae ra ne u miẹn ehe na sinmwi arhunmwu ekigbesiyeha nii? 25 Vbe nai na gbe awawẹ, u i ra gbe ni ma ru khọọ ba eni ru khọọ. Ọni i gia ru, uwẹ i sẹtin ru vberriọ. Ẹghẹ nii, a ghi rri eni ma ru khọọ oya zẹvbe eni ru khọọ. Ọni i gia ru, ẹ i re te enọ bu ohiẹn otọ agbọn hia, gha ru emwi nọ kere ra?” 26 E Jehova keghi wanniẹn wẹẹ, “Adeghẹ I miẹn arhunmwu ekigbesiyeha nii maan vbe Sodọm, I gha rhunmwuda ekigbesiyeha nii sẹ ẹvbo nii rae.” 27 Ebraham keghi vbe dọlegbe guan wẹẹ, “Lahọ, ghẹ gui ye udinmwẹ ne I ye ya guẹ guan na Jehova. Ọmwa kẹkan ọre I khin, I i mwẹ asẹ ne i gha ya ta ẹmwẹ rhọkpa. 28 Sokpan, adeghẹ arhunmwu isẹn yan iyeva ni maan ọre a miẹn vbọ ighẹ i re ekigbesiyeha, u gha ye fuẹn ẹvbo ni rhunmwuda ighẹ isẹn ma gi ẹre gba?” E Nọyaẹnmwa wanniẹn wẹẹ, “Mẹ i khian fuẹn ẹvbo ni ruan, adeghẹ I miẹn arhunmwu isẹn yan iyeva ni maan vbọ.” 29 Ebraham keghi vbe dọlegbe guan, “Ughaghe iyeva ọkpa ẹre ọ rrọọ.” Rẹn keghi wanniẹn wẹẹ, “I i khian fuẹn ọnrẹn a deghẹ a miẹn iyeva vbọ.” 30 Ebraham keghi kha wẹẹ, “Lahọ ghẹ gie ohu muẹn Jehova, I gha ye guan. Adeghẹ ọgban kẹkan nọ vbo?” Rẹn wanniẹn wẹẹ, “I i khian ruẹ adeghẹ I miẹn ọgban vbọ.” 31 Ebraham keghi kha wẹẹ, “Lahọ ghẹ gui ye udinmwẹ ne I ye ya guẹ guan na Jehova. Adeghẹ ugie kẹkan ọre a miẹn vbọ vbọ?” Rẹn keghi kha wẹẹ, “I i khian fuẹn ẹvbo nii ruan adeghẹ I miẹn ugie vbọ.” 32 Ebraham keghi kha wẹẹ, “Lahọ ghẹ mu ohu Jehova, I gha ye guan uhukpa na kẹkan. A deghẹ igbe kẹkan ọre a miẹn vbọ vbo?” Rẹn keghi kha wẹẹ, “I i khian fuẹn ọnrẹn ruan adeghẹ a miẹn igbe vbọ.”