Tikki Mate Halak na Tahaholongi

“Tikki toppu mate itokku, hira na so marguna huhilala dirikku ala dang adong na boi huulahon. Marbulan-bulan dukkon i, taringot do muse au tu ibana jala haccit hian do i. Songon na ditikkam piso ma huhilala. Sipata, muruk do au jala didok rohakku boasa ma mate itokki? Gabe manolsoli do au ala dang godang hulehon tikkiku tu ibana saleleng on.”—Si Vanessa, Australia.

MOLO mate halak na tahaholongi, olo do muba-uba pakkilalaatta. Sipata lungun do rohatta, lungun-lungunan, jala mandele. Boi do muse gabe muruk hita, manolsoli, manang gabe mabiar. Bahkan olo do gabe didok rohatta tumagon ma mate.

Dang sala molo marlungun ni roha hita ala mate halak na tahaholongi. On patuduhon na holong do rohamuna tu halak naung marujung ngolu i. Alai boha ma carana asa unang torus hamu marlungun ni roha?

NA BOI DIULAHON HAMU

Molo sai lungun dope rohamuna, coba ma on:

UNANG MA MAILA TANGIS

Dang sarupa cara ni ganup halak marlungun ni roha dohot lelengna nasida marlungun ni roha. Alai molo tangis hamu, boi do gabe lubbang pakkilalaanmuna. Songon on ma na didok si Vanessa na dipaboa nakkin, “Molo tangis au, gabe lubbang do pakkilalaakku.” Si Sofia na toppu mate adekna mandok, “Haccit do huhilala mamikkirhon akka naung masa. Dos do i songon paiasson lukka na so koring dope. Haccit hian do i, alai ikkon songon i do asa boi malum.”

PABOA MA PAKKILALAANMUNA TU NA ASING

Tikki lungun rohatta, olo do dang lomo rohatta didongani manang ise pe. Alai paborattu do lungun ni roha i molo holan sahalakmuna na manaon. Tikki marumur 17 taon si Jared, mate ma bapakna. Didok ibana, “Hupaboa ma tu donganku songon dia pakkilalaakku. Olo do ra asal hupandokkoni hatakki tikki marcerita, alai dukkon i gabe lubbang ma pakkilalaakku.” Si Janice na dipaboa di artikel na parjolo mandok, “Lubbang situtu ma huhilala dung hupaboa pakkilalaakku tu na asing. Adong do hape na boi mangattusi pakkilalaakku. Dang holan sahalakku hape na manaon i.”

OLO MA HAMU DIURUPI NA ASING

Sahalak dokter mandok, “Molo olo halak na marlungun ni roha diurupi dongan manang keluargana, pasti boi do hatop tarapul rohana.” Lomo do roha ni dongan manang keluargamuna mangurupi hamu, alai sipata dang diboto nasida songon dia carana. Jadi tikki marlungun ni roha hamu, paboa ma tu nasida aha na boi diulahon nasida lao mangurupi hamu.—Poda 17:17.

PAJONOK MA TU DEBATA

Si Tina mandok, “Dung mate toppu suamikku alani kanker, dang adong be donganku marcerita. Alani i, hupaboa ma sude na di rohakku tu Debata! Ganup manogot, hupangido do tu Debata asa diurupi Ibana au mangulahon ulaonku di ari i. Dilehon ibana do tu au lobi sian na hupangido.” Marumur 22 taon dope Si Tarsha tikki mate omakna. Didok ibana, “Tarapul do rohakku ala manjaha Bibel ganup ari. Boi do i mangurupi au asa toktong positif pikkiranku.”

BAYAKKON MA DIPAHEHE HALAK NA TAHAHOLONGI

Didok si Tina muse, “Di mulana, huhilala dang porlu di au pakkirimon taringot haheheon, suamikki do na porlu di au dohot di akka anakkokku. Alai opat taon dukkon i, pakkirimon i ma na mambahen au tetap semangat jala na mambahen au togu. Hubayakkon ma pajuppang au haduan dohot ibana, on mambahen dame jala las rohakku!”

Dung piga-piga leleng, olo do ra sai lungun dope pakkilalaanmuna. Alai pos ma rohamuna, pasti boi do hamu tarapul. Songon i ma na dihilala si Vanessa. Didok ibana, “Olo do ra didok rohamuna dang na lao boi be tarapul rohamuna. Alai lam leleng, pasti boi do muse las rohamuna.”

Nang pe torus hamu masihol tu keluargamuna naung mate i, unang ma mandele hamu. Parduli do Debata tu hamu. Boi do Ibana mangurupi hamu asa marlas ni roha rap dohot akka dongan jala asa martujuan ngolumuna. Satokkin nai, paheheon ni Debata do sude halak naung mate. Lomo do rohana asa pajuppang muse hamu tu halak na dihaholongi hamu. Jala dang na lao adong be na mambahen lungun rohamuna!

Ayat ni Bibel na Boi Mangurupi Hamu

Diboto Debata do lungun ni rohamuna.

Sahalak panurat ni Bibel mandok tu Debata, “Disippan Ho do ilu-ilukku tu inganan ni aekmu. Tarsurat do i sude di bukkumi.”—Psalmen 56:8.

Paboa ma tu Debata songon dia pakkilalaanmuna.

“Hupaboa do tu [Debata] holso ni rohakku. . . Ale Jahowa, jou-jou do au tu Ho mangido asa urupanmu au.a”—Psalmen 142:2, 5.

Adong do pakkirimon.

“Na adong do haheheon.”—Ulaon ni Apostel 24:15.

Marjanji do Debata lao pahehehon godang halak naung mate, jala lomo hian do rohana lao mangulahon i.b—Job 14:14, 15.

a Jahowa, i ma goar ni Debata na disurat di Bibel.

b Lao mangida unggodang hatorangan taringot haheheon, ida ma pelajaran 30 bukku Mangolu Saleleng ni Lelengna na dibahen Saksi Jahowa jala rade do muse di www.jw.org/bbc.