Tikki Masa Bencana Alam

“Pittor mandele do hami sude. Alana habis do sude artanami alani longsor dohot banjir.” —Si Andrew, Sierra Leone.

“Dung so badai i, mulak ma hami tu jabunami. Alai dang adong be na tinggal, habis do sude. Dang tardoknami be manang aha. Sai tangis ma borukku sappe dang tolap be ibana jongjong.”—Si David, Kepulauan Virginia.

MOLO hea hamu gabe korban bencana alam, diattusi hamu do ra songon dia pakkilalaan ni halak na hona bencana. Olo do gabe trauma, bingung, mabiar mangingot na masa i, manang gabe dang boi modom. Godang do muse na gabe mandele jala dang adong be semangatna lao mangulahon manang aha.

Molo hancur sude artamuna alani bencana, olo do ra gabe mandele hamu. Olo do muse didok rohamuna, dang sanggup be hamu mangolu. Alai takkas do dipaboa di Bibel, adong do tujuan ni ngolutta jala na lao denggan do ngolutta di ari na naeng ro.

JANJI NI DEBATA MANGALEHON HARAPAN

Parjamita 7:8 mandok, “Dumenggan do ujung ni sada parsoalan sian mulana.” Dung salpu bencana, di mulana olo do hira na so adong be semangatmuna. Alai molo sabar hamu padengatton situasimuna, pasti boi do gabe lam denggan ngolumuna.

Dipaboa di Bibel, adong do tikkina ‘dang tarbege be soara ni na tangis dohot na mangangguki’. (Jesaya 65:19) Masa ma on dung mamaretta Harajaon ni Debata tu tano on jala dibahen ma tano on gabe paradeiso. (Psalmen 37:11, 29) Dang na lao masa be bencana alam. Jala dang na lao adong be na mambahen lungun rohatta jala na mambahen hita trauma. Alana nungnga marjanji Debata Pargogo na So Hatudosan i, “Dang ingoton be akka naung salpu i, jala dang tarsunggul be i di bagasan roha.”—Jesaya 65:17.

Pikkirhon ma on: Marsakkap do Debata na manoppa hita lao mambahen ‘denggan ngolutta di ari na naeng ro’, i ma mambahen dame ngolutta dung mamaretta Harajaon ni Debata. (Jeremia 29:11) Pasti gabe tamba do semangatta dung taboto on. Songon i ma na dihilala si Sally na dipaboa di artikel sebelumna. Didok ibana, “Molo taingot akka na denggan na lao dibahen Harajaon ni Debata di ari na naeng ro, boi do i mangurupi hita asa unang sai mamikkirhon akka naung salpu jala sabar mandalani ngolutta saonari on.”

Parsiajari hamu ma akka na lao diulahon Harajaon ni Debata tu tano on. Boi do i mangurupi hamu asa semangat muse, nang pe susa hamu alani bencana alam. Jala boi do pos rohamuna dang na lao adong be bencana alam di ari na naeng ro. Alai saonari pe boi do taihutton akka saran na dipaboa Bibel molo gabe korban bencana alam hita. Taida ma piga-piga contohna.

Ayat ni Bibel na Boi Mangurupi Hamu

Unang ma hurang modom.

“Dumenggan do sanggolom istirahat sian dua golom halojaon, na dos songon mangalele alogo.” —Parjamita 4:6.

Didok akka peneliti molo hurang modom halak na trauma, boi do gabe lam parah traumana i jala gabe maol ma ibana mengendalihon perasaanna. Alani i, cukkup ma hamu modom.

Paboa ma pakkilalaanmuna.

“Gabe metmet do roha molo holsoan. Alai boi do i tarapul alani akka hata na denggan.”—Poda 12:25.

Paboa ma pakkilalaanmuna tu keluarga manang tu dongan na boi dihaporseai. Alana pasti rade do nasida manangihon hamu, patoguhon hamu, jala mangurupi hamu.a

Ingot ma pakkirimon na sian Debata.

“Alai tapaima-ima do langit na imbaru dohot tano na imbaru songon janji ni Debata. Jala akka na mangulahon paretta ni Debata ma na maringanan disi.”—2 Petrus 3:13.

a Molo palelengku sasahalak stres manang mura-mura holso rohana, porlu do ra ibana marubat tu dokter.