1, 2. Sesuai tu Hesekiel 47:1-12, aha do na diida jala na dipaboa tu si Hesekiel? (Ida gambar di mula ni parsiajaran.)

ADONG do muse na luar biasa na diida si Hesekiel di parnidaanna taringot bagas joro i: Adong aek na mardalan sian inganan na badia. Mardalan do si Hesekiel di bagasan aek i. (Jaha Hesekiel 47:1-​12.) Mardalan ma aek i sian toru ni pintu masuk inganan na badia tu arah ni gerbang na di sabola timur. Diboan suru-suruan i ma si Hesekiel kaluar tu luar ni bagas joro lao mangukkur bagas ni aek na mardalan i. Disuru do si Hesekiel piga-piga hali mardalan menyebrangi sunge i!

² Dipaboa do muse tu si Hesekiel molo sunge i mardalan sahat tu Laut Mati. Aekna i mambahen muba aek ni laut i, gabe godang dekke boi mangolu disi. Dang adong hian disi na boi mangolu alani assim ni laut i. Di topi ni sunge i, tubu do marragam hau. Ganup bulan marparbue do hau i jala tabo do diallang parbuena. Bulungna pe boi dibahen gabe ubat. Tikki diida si Hesekiel sudena i, pasti lam pos ma rohana tu janji ni Debata jala marlas ni roha ma ibana. Aha do lapatan ni parnidaan i tu si Hesekiel dohot tu halak Jahudi na ditawan i? Jala aha do lapatan ni parnidaan i tu hita saonari?

Aha do Lapatan ni Parnidaan I tu Halak Jahudi na Ditawan?

3. Boasa boi diboto halak Jahudi molo sunge na di parnidaan i dang sunge na tutu adong di tano on?

³ Diboto halak Jahudi do molo sunge na di parnidaan i dang tutu adong di tano on. Alai tikki dibege nasida on, mungkin gabe diingot nasida do surirang na hea disurat Panurirang Joel. Lobi sian 200 taon sebelumna, disurat ibana do surirang taringot ulaon ni Debata lao padenggatton saluhutna. (Jaha Joel 3:18.) Tikki dijaha halak Jahudi na ditawan i surirang ni si Joel, diboto nasida do dang tutu adong ‘maneteki anggur na manis sian akka dolok’, ‘gok susu di dolok-dolok’, manang ‘kaluar mata mual sian jabu ni Jahowa’. Boi ma tasimpulhon, pasti diboto halak Jahudi do molo sunge na diida si Hesekiel i, dang sunge na tutu adong di tano on.a Attong aha do na lao dipaboa Jahowa sian parnidaan i? Dipakke Debata parholong i do tolu bagian sian parnidaan on lao patoguhon naposona. Tabahas ma lapatanna sian Bibel.

4. (a) Aha do na boi diattusi halak Jahudi sian parnidaan ni si Hesekiel taringot sunge i? (b) Songon dia do hata “sunge” dohot “aek” paposson rohatta na lao dipasu-pasu Jahowa naposona? (Ida kotak “Sunge na Parohon Pasu-Pasu sian Jahowa”.)

⁴ Sunge na parohon pasu-pasu. Di Bibel, jotjot do dipakke hata sunge dohot aek lao manggombarhon pasu-pasu ni Jahowa. Diida si Hesekiel do sunge i mardalan sian bagas joro. Jadi parnidaan on mangurupi naposo ni Debata mangattusi na lao dipasu-pasu Jahowa do nasida molo torus diulahon ibadat na sittong. Aha do pasu-pasu na lao dijalo nasida? Na lao diajari akka malim ma muse nasida. Marhite pelean na dilehon di bagas joro, dipapos ma roha ni halak Jahudi na lao disesa Debata dosa ni nasida. (Hes. 44:15, 23; 45:17) Jadi aek na mardalan sian bagas joro i seolah-olah mambahen nasida ias muse.

5. Songon dia do parnidaan taringot sunge i paposson roha ni halak Jahudi na cukkup pasu-pasu ni Jahowa tu nasida?

⁵ Cukkup do pasu-pasu ni Jahowa tu nasida sude? Dipaboa di parnidaan i, mulana nanget do aek i mardalan alai holan hira-hira dua kilometer daona, nungnga gabe sunge na doras aek i! (Hes. 47:3-5) Jadi nang pe torus martamba godang ni halak Jahudi, cukkup do pasu-pasu ni Jahowa paradehon na porlu di nasida. Sunge i patuduhon massai godang situtu do pasu-pasu na lao dilehon Jahowa tu nasida!

6. (a) Janji aha do na adong di parnidaan i? (b) Aha do sipasingot na adong di parnidaan i? (Ida muse surat na di toru.)

⁶ Aek na parohon hangoluan. Di parnidaan ni si Hesekiel, mardalan do aek ni sunge i sahat tu Laut Mati. Aek ni sunge boi mambahen mangolu godang dekke di laut i, dos songon di Laut na Balga manang Laut Tengah. Bahkan adong do bisnis perikanan na balga di topi ni Laut Mati i, di antara ni dua kota na massai dao jarakna. Didok suru-suruan i do, “Manang tudia pe aek i mardalan, adong do disi hangoluan.” Jadi parnidaan on paposson roha molo ibadat na sittong na dipadenggan i parohon pasu-pasu do tu jolma. Alai sahat do aek na sian jabu ni Jahowa i tu sude bagian ni Laut Mati i? Daong. Suru-suruan i mandok, dang sahat aek i tu bagian na margambo na di laut i. Toktong do ‘dipasombu assim aekna’.b (Hes. 47:8-​11) Jadi sian parnidaan on adong sada sipasingot: Dang sude halak mandapot pasu-pasu sian Jahowa jala dang sude halak olo manginum aek hangoluan i.

7. Akka hau na di parnidaan ni si Hesekiel i paposson roha ni halak Jahudi na ditawan i taringot aha?

⁷ Parbue ni hauna boi diallang jala bulungna boi gabe ubat. Pasti lam bagak do topi ni sunge i alani akka hau i. Alai aha do lapatanna? Pasti las do roha ni si Hesekiel dohot halak na ditawan i tikki dibayakkon nasida adong marragam hau marparbue setiap bulan jala tabo allangon. Parnidaan on paposson roha ni nasida na lao diparade Jahowa do sipanganon na boi patoguhon parale-aleon ni nasida tu Ibana. Na asing muse, bulung ni akka hau i boi do “gabe ubat”. (Hes. 47:12) Cocok do parnidaan on tu nasida ala saleleng on naposo ni Jahowa songon halak na marsahit do. Ai dang marale-ale be nasida tu Debata. Jadi diboto Jahowa do molo na uppetting, i ma mangurupi naposona i mulak muse marale-ale tu Ibana. Jala nungnga marjanji Ibana lao mangulahon i songon surirang na tabahas di Pasal 9.

8. Aha do na patuduhon sude janji ni Jahowa na di parnidaan ni si Hesekiel saut tu godang halak?

⁸ Songon na tabahas di Pasal 9, holan piga-piga do janji na di surirang i na saut diida halak Jahudi na ditawan i. Boasa? Ai dang torus nasida setia tu Debata jala ditinggalhon nasida do ibadat na sittong. Jadi dang mungkin torus pasu-pasuon ni Jahowa halak sisongon i. Alai adong do halak Jahudi na mulak i na torus setia tu Debata. Pasti kecewa do nasida mangida pangalaho ni dongan sabangso ni nasida na jahat jala na mangalo tu Debata. Alai pos do roha ni halak na setia i dang hea Jahowa margabus, torus do ditepati janjina, jala dang adong na boi mangabbati Ibana pasautton lomo ni rohana. (Jaha Josua 23:14.) Pos do roha ni nasida pasauton ni Jahowa sude janjina, dang holan tu halak Israel alai tu godang halak. Andigan?

Mardalan do Sunge I di Tikkinta On!

9. Andigan do parnidaan ni si Hesekiel taringot bagas joro saut tu godang halak?

⁹ Songon na dibahas di Pasal 14 saut do muse parnidaan ni si Hesekiel i tu godang halak “di ari parpudi”. Saut ma i tikki dibahen untimbo ibadat na sittong i sian sude. (Jes. 2:2) Songon dia do bagian na di parnidaan ni si Hesekiel saut di tikkinta on?

10, 11. (a) Aha do pasu-pasu na torus mardalan songon sunge saonari on? (b) Songon dia do pasu-pasu ni Jahowa i mardalan songon aek na doras di ari parpudi on?

¹⁰ Sunge na parohon pasu-pasu. Sunge na mardalan sian jabu ni Jahowa paingotton hita tu sude pasu-pasu na tajalo di tikkinta on na boi mambahen togu parale-aleotta tu Jahowa. Pasu-pasu na umbalga tajalo i ma tobusan ni Kristus. Ai marhite tobusan i do boi disesa dosatta jala gabe ias hita di jolo ni Debata. Asing ni i, hasittongan na adong di Bibel dos do i songon aek na ias na mangalehon hangoluan tu hita. (Eps. 5:25-​27) Songon dia do pasu-pasu sian Jahowa mardalan songon sunge di tikkinta on?

¹¹ Taon 1919, holan marribu do Saksi Jahowa di liat portibi on. Di tikki i, gok do sipanganon dijalo na boi mambahen nasida marale-ale tu Jahowa. Saleleng marpulu taon, torus do tamba godang ni nasida. Saonari, nungnga adong be lobi sian 8 juta halak godangna. Torus dope hasittongan i dilehon songon aek na doras di tikkinta on? Torus. Boi do taida na massai godang situtu sipanganon na diparade lao patoguhon parale-aleotta tu Debata. Umpamana, saleleng 100 taon na parpudi on, nungnga marpulu milliar Bibel, bukku, majalah, brosur, dohot risalah na dilehon tu naposo ni Debata. Dos songon sunge na di parnidaan ni si Hesekiel na lam doras aekna, songon i do nang hasittongan i saonari on. Massai godang do i dilehon, asa boi akka halak na mauas tu hasittongan di liat portibi on marale-ale tu Debata. Nungnga leleng adong publikasitta na tercetak. Jala saonari, nungnga boi dijaha akka publikasitta di situs jw.org lobi sian 1.000 bahasa. Songon dia do on marguna tu akka halak na tulus rohana?

12. (a) Boasa didok aek hasittongan i parohon hangoluan tu akka halak? (b) Aha do sipasingot na boi taida sian parnidaan on? (Ida muse surat na di toru.)

¹² Aek na parohon hangoluan. Dipaboa do tu si Hesekiel, “Manang tudia pe aek i mardalan, godang do disi na boi mangolu.” Bayakkon ma massai godang do manfaatna aek hasittongan na dilehon Jahowa i tu godang halak. Marjuta halak boi torus marale-ale tu Debata. Songon na mulak mangolu ma nasida muse dibahen aek hasittongan i, ala nungnga ditanda nasida Jahowa jala porsea tu Ibana. Alai adong do sipasingot na boi taboto sian parnidaan on: Na lao adong do di pudian ni ari, halak na so olo be manjalo hasittongan i jala maninggalhon Jahowa. Dipatudos ma nasida songon inganan na margambo dohot rawa-rawa na adong di Laut Mati.c Sai anggiat ma dang adong sian hita na songon i!​—Jaha 5 Musa 10:16-18.

13. Aha do parsiajaran na boi tadapot sian akka hau na di parnidaan i?

¹³ Parbue ni hauna boi diallang jala bulungna boi gabe ubat. Akka hau na di topi ni sunge na di parnidaan i boi do patoguhon rohatta. Setiap bulan marparbue do hau i jala bulungna boi gabe ubat. (Hes. 47:12) Jadi parsiajaran na tadapot sian on, paradeon ni Jahowa do godang sipanganon asa boi hita torus marale-ale tu Ibana. Ai i do bagian na paling tahaporluhon saonari on. Portibi on dipatudos do songon halak na male jala na marsahit. Ai dang dapot ni nasida hasittongan na boi mambahen nasida marale-ale tu Debata. Jadi pikkirhon ma akka naung diparade Jahowa. Songon dia do perasaanmuna dung manjaha sada artikel di majalahta, mangendehon ende panutup di kebaktian, manang tikki manotton video sian organisasi? Pasti las situtu do rohatta kan, jala puas, ala boi tahilala pasu-pasu na sian Jahowa. (Jes. 65:13, 14) Sudena i mambahen hita lam jonok tu Ibana jala mangulahon lomo ni rohana. Akka poda na di Bibel mangurupi hita pasidikkon dosa na balga songon ulaon seks na so patut, hisap tu arta, manang dang porsea be tu Debata. Molo taulahon pe dosa na balga, dibahen Jahowa do pengaturan asa boi hita muse marale-ale tu Ibana. (Jaha Jakobus 5:14.) Jadi nungnga massai godang pasu-pasu na tajalo sian Debata dos songon akka hau na di parnidaan i.

14, 15. (a) Aha do parsiajaran na boi tadapot sian inganan na margambo na dipasombu toktong assim aekna? (b) Songon dia do hita boi mandapot pasu-pasu sian sunge na di parnidaaan i?

¹⁴ Aha do parsiajaran na tadapot sian inganan na margambo na dipasombu assim? Unang ma hita songon halak na di portibi on na so olo manjalo hasittongan, jala mangabbati pasu-pasu na sian Jahowa. Ai molo taulahon songon i toktong ma hita marsahit, dang marale-ale be tu Debata. (Mat. 13:15) Alai marsitutu ma hita asa boi torus manginum aek sian sunge na parohon pasu-pasu i. Boha carana? Torus ma taparsiajari hasittongan na sian Bibel jala tapaboa ma i tu halak. Tatangihon ma sipasingot dohot tudu-tudu na dilehon akka sintua na dilatik naposo haposan. Tikki taulahon i sude, olo do gabe taingot sunge na di parnidaan i. Sunge i parohon hangoluan tu inganan na dia pe na didalani!

¹⁵ Songon dia do parnidaan taringot sunge on saut di ari na naeng ro? Tabahas ma songon dia surirang on saut tu godang halak di Paradeiso.

Saut ma Parnidaan I di Paradeiso

16, 17. Aha do na patuduhon lam doras sunge na parohon pasu-pasu i di Paradeiso?

¹⁶ Hea do dibayakkon hamu songon dia parngoluonmuna haduan rap dohot keluargamuna di Paradeiso? Pasti las situtu do rohamuna. Boi ma on lam takkas dibayakkon hamu molo dung taparsiajari tolu bagian sian parnidaan ni si Hesekiel.

¹⁷ Sunge na parohon pasu-pasu. Di Paradeiso haduan, massai godang do pasu-pasu na tajalo. Dang holan parale-aleotta na lam togu tu Debata, alai lam sehat do hita bahenonna. “Punguan bolon” na selamat sian “hasusaan bolon” mandapot gok pasu-pasu sian sunge i. (Pgk. 7:9, 14) Saleleng Pamarettaon Saribu Taon ni Kristus, tahilala ma sude manfaat tobusan ni Jesus. Bahenonna ma hita secara bertahap gabe sempurna. Dang adong be sahit, dokter, perawat, rumah sakit, manang asuransi kesehatan. Luar biasa do pasu-pasu na dilehon dukkon Armagedon. Taingot ma, songon na di parnidaan i lam leleng lam doras do mardalan aek i. Jadi pasu-pasu na tajalo dukkon Armagedon i dos songon sattetek aek do i molo dibandingkon tu godang ni pasu-pasu na lao lehonon ni Debata di Paradeiso.

18. Songon dia do sunge aek hangoluan i lam doras saleleng Pamarettaon Saribu Taon?

¹⁸ Aek na parohon hangoluan. Lam doras do “sunge aek hangoluan” i mardalan saleleng Pamarettaon Saribu Taon. (Pgk. 22:1) Marmilliar ma godang ni halak na dipahehe jala dilehon kesempatan boi mangolu di Paradeiso. Bahkan halak naung leleng mate saleleng marribu taon pe jala naung mulak gabe orbuk, boi mulak mangolu muse di Harajaon ni Debata. (Jes. 26:19) Alai sude do halak na dipahehe mangolu salelengna?

19. (a) Aha do na patuduhon lam doras aek hangoluan i mardalan di Paradeiso? (b) Songon dia do gambaran taringot inganan na dipasombu “assim aekna” saut di ari na naeng ro?

¹⁹ Saleleng Pamarettaon Saribu Taon, lam doras do aek hangoluan i mardalan. Dibukka Jahowa ma gulungan na baru. Dilehon ma hasittongan dohot tudu-tudu na baru. Pasti dang sabar be hita paimahon. Alai dang sude halak olo mangihutton tudu-tudu na baru i. Nang pe sude halak dilehon kesempatan lao mangolu salelengna, alai adong do halak na mamillit mangalo Jahowa. Tottu massai oto do keputusan na dibahen nasida ala dang olo manginum aek hangoluan. Dos ma nasida songon inganan na margambo na ‘dipasombu toktong assim aekna’. Dang pasombuon ni Jahowa nasida torus mangolu lao mambahen sega Paradeiso. (Jes. 65:20) Dung salpu Saribu Taon, dipamate ma sude halak na marpihak tu Sibolis! Ai dang dioloi nasida pamarettaon ni Debata na sittong. Dipamate ma nasida salelengna songon Sibolis.​—Pgk. 20:7-​12.

20. Aha do pengaturan na dibahen di Pamarettaon Saribu Taon na dipatudos songon akka hau na di parnidaan ni si Hesekiel?

²⁰ Parbue ni hauna boi diallang jala bulungna boi gabe ubat. Dang lomo roha ni Jahowa adong sian hita na gagal mandapot hangoluan na salelengna. Alani i, dibahen Jahowa do sada pengaturan na mangurupi hita boi mangolu salelengna. Pengaturan on dos ma songon akka hau na di parnidaan ni si Hesekiel. Di Paradeiso haduan, pasu-pasu ni Jahowa dang holan mambahen parale-aleotta togu tu Ibana, alai dagingta on pe bahenonna do gabe sempurna. Sian surgo, mamaretta ma Jesus rap dohot 144.000 saleleng 1.000 taon. Urupan ni 144.000 na gabe malim i ma halak na di tano on gabe sempurna. Marhite pengaturan i, boi ma dihilala akka halak sude manfaat tobusan ni Kristus. (Pgk. 20:6) Di parnidaan ni si Hesekiel taringot hau i, parbuena boi do diallang jala bulungna boi dibahen gabe ubat. Mirip do surirang i tu surirang na disurat Apostel Johannes. (Jaha Pangungkapon 22:1, 2.) Bulung ni akka hau na diida si Johannes pe boi “pamaluppon akka bangso”. Jadi dang taretong godang ni halak na setia di tano on na marlas ni roha ala diurupi 144.000 malim i.

21. (a) Songon dia do pakkilalaanmuna dung mangarimangi parnidaan ni si Hesekiel taringot sunge i? (Ida kotak “Aek na Gabe Sunge na Doras!”) (b) Aha do na lao tabahas di pasal na mangihut?

²¹ Tikki dirimangi hamu sunge na di parnidaan ni si Hesekiel, pasti dame do rohamuna jala tamba pos do rohamuna tu janji ni Debata. Taboto ma sian parnidaan i na massai denggan situtu ngolutta di ari na naeng ro. Pikkirhon ma, mulai sian najolo dibahen Jahowa do godang surirang asa boi takkas tabayakkon songon dia Paradeiso. Saleleng marribu taon, sabar do Debata tu godang halak. Ditogihon do nasida asa mangolu di Paradeiso na dijanjihon i. Dohot do hamu annon di Paradeiso i? Mungkin sukkun-sukkun do rohamuna taringot songon dia inganan dohot tugasmuna di Paradeiso. Lao paposson rohatta, tabahas ma bagian na parpudi sian surirang ni si Hesekiel i.

1, 2. (a) Aha do paretta ni Jahowa tu si Hesekiel? (b) Sukkun-sukkun aha do na lao tabahas?

TAON 593 SM, mandapot parnidaan ma si Hesekiel sian Jahowa. Pasti gabe dipikkirhon si Hesekiel do na masa di tikki ni si Musa dohot si Josua 900 taon naung salpu alani parnidaan i. Di tikki i, dipaboa Jahowa do tu si Musa akka batas ni luat na dijanjihon, jala di pudian ni ari dipaboa do tu si Josua songon dia carana mambagi tano na di luat i tu sude marga ni Israel. (4 Mus. 34:1-15; Jos. 13:7; 22:4, 9) Di parnidaan i, diparettahon Jahowa ma tu si Hesekiel dohot tu akka tawanan na asing asa dibagi luat na dijanjihon i tu ganup marga ni Israel!​—Hes. 45:1; 47:14; 48:29.

² Aha do na boi diparsiajari si Hesekiel dohot halak na ditawan sian parnidaan i? Songon dia do parnidaan on paposson roha ni naposo ni Debata saonari on? Na lao saut do muse parnidaan on tu godang halak di ari na naeng ro?

Parnidaan na Marisi Opat Jaminan

3, 4. (a) Aha do opat jaminan na boi diida halak Jahudi na ditawan sian parnidaan ni si Hesekiel na parpudi? (b) Aha do na lao tabahas di pasal on?

³ Parnidaan ni si Hesekiel na parpudi on disurat di sia bindu di bukkuna. (Hes. 40:1–48:35) Las do roha ni akka halak na ditawan i mamboto isi ni parnidaan on. Ai adong opat jaminan na paposson roha ni nasida na lao bahenon ni Debata lam denggan situasi ni bangso Israel. Na parjolo, lao dipadenggan ma ibadat na sittong di bagas joro. Na paduahon, na lao dipimpin akka malim dohot parmahan na burju ma halak Israel. Na patoluhon, na lao mandapot tano warisan do sude halak na mulak tu Israel. Na paopatton, na lao didongani Jahowa ma muse bangso Israel jala maringanan di tonga-tonga ni nasida.

⁴ Di Pasal 13 dohot 14 nungnga tabahas songon dia jaminan na parjolo dohot na paduahon i saut. Nungnga dipadenggan Debata ibadat na sittong, jala nungnga dipimpin parmahan na burju halak Israel. Di pasal on, lao tabahas ma jaminan na patoluhon, i ma janji taringot tano na dilehon gabe warisan tu bangso i. Di pasal na mangihut, tabahas ma janji taringot songon dia Jahowa maringanan di tonga-tonga ni nasida.​—Hes. 47:13-21; 48:1-7, 23-29.

“Hubagi ma Tano I tu Hamu Gabe Warisanmuna”

5, 6. (a) Di parnidaan ni si Hesekiel i, luat na dia do na ikkon dibagi? (Ida gambar di mula ni parsiajaran.) (b) Aha do tujuan ni Jahowa paboahon pembagian ni luat i?

⁵ Jaha Hesekiel 47:14. Diida si Hesekiel ma di parnidaan i luat na lao dibahen “songon Taman Eden”. (Hes. 36:35) Didok Jahowa ma tu ibana, “On ma luat na ikkon bagionmuna na gabe tano parbagianan ni 12 marga ni Israel.” (Hes. 47:13) “Luat” na dia do maksudna? Na nidokna, i ma luat ni halak Israel na dipadenggan lao gabe inganan ni halak Jahudi na mulak sian tawanan i. Songon na disurat di Hesekiel 47:15-21, takkas do dipaboa Jahowa akka parbatasan ni luat i.

⁶ Aha do tujuan ni Jahowa paboahon pembagian ni luat i? Nungnga ditottuhon be di parnidaan i sadia ganjang dibahen akka batas ni luat i. Alani parnidaan on, gabe pos ma roha ni si Hesekiel dohot halak na ditawan i na lao dipadenggan Jahowa luat ni nasida. Pasti las do roha ni nasida! Alai tutu do akka halak na ditawan na mulak i mandapot tano gabe warisan ni nasida? Tutu!

7. (a) Aha do na masa taon 537 SM jala na masa i paingotton hita taringot aha? (b) Aha do sukkun-sukkun na lao tabahas?

⁷ Saut ma janji ni Jahowa i hira-hira 56 taon dukkon mandapot parnidaan si Hesekiel. Taon 537 SM, marribu halak na ditawan i mulak tu luat ni nasida di Israel jala tinggal disi. Na masa tu bangso Israel najolo, paingotton hita tu situasi ni naposo ni Debata di tikkinta on. Dipatudos do nasida hira mandapot tano warisan. Aha do lapatanna? Dung dipalua Jahowa naposona kaluar sian Babel na Balga, dilehon do tu nasida kesempatan lao mangulahon ibadat na sittong. Dos songon na mandapot warisan ma nasida. Jadi sian Luat na Dijanjihon na dipadenggan i hita boi marsiajar taringot pengaturan na dibahen Debata tu ibadat na sittong saonari on. Alai andorang so tabahas i talului ma alus ni sukkun-sukkun on: Sian dia do taboto naung dipadenggan Debata ibadat na sittong saonari on?

8. (a) Tu bangso na dia do digatti Jahowa bangso Israel i? (b) Tu luat na songon dia do diboan Jahowa naposona saonari on? (c) Andigan do mulai dipadenggan ibadat na sittong i jala ise do na dilehon kesempatan lao mangulahon i?

⁸ Di parnidaan ni si Hesekiel na sebelumna, nungnga dipaboa Jahowa na lao saut muse surirang taringot luat ni halak Israel na dipadenggan i tu godang halak. Saut ma on taon 1914, dung mamaretta gabe Raja ‘si Daud naposona’ i ma Jesus. (Hes. 37:24) Di tikki i, dang halak Israel be naposo ni Debata. Nungnga digatti Debata be nasida gabe Israel ni Debata, i ma akka halak na dimiahi. (Jaha Mateus 21:43; 1 Petrus 2:9.) Asing ni i, luat ni halak Israel na dipadenggan i pe nungnga digatti Ibana. Seolah-olah, diboan Jahowa do naposona i tu sada luat na dumenggan. (Jes. 66:8) Songon na tabahas di Pasal 17, luat on i ma situasi na aman na mambahen akka halak boi marale-ale tu Debata. Mulai sian taon 1919, akka halak na dimiahi di tano on boi muse manomba Jahowa. (Ida kotak 9B, “Boasa Taon 1919?”) Di pudian ni ari, dohot ma muse akka “biru-biru na asing” na lao mangolu di tano on tinggal di luat i. Lapatanna, dilehon do tu nasida kesempatan lao marale-ale tu Debata. (Joh. 10:16) Di tikkinta on, dibahen Jahowa do cara asa boi lam godang halak marale-ale tu Ibana. Alai dung salpu Armagedon pe boi dihilala nasida sude pasu-pasu na sian Jahowa ala marale-ale tu Ibana.

Dibagi-bagi ma Luat I

9. Aha do tudu-tudu na dilehon Jahowa taringot pembagian ni luat i?

⁹ Jaha Hesekiel 48:1, 28. Dung ditottuhon akka batas ni luat i, dipaboa Jahowa ma carana mambagi tano na disi. Diparettahon Debata do asa sarupa dilehon ukkuran ni tano i tu setiap marga ni Israel na 12 i. Mulai ma i sian utara sahat tu selatan, mulai ma i sian marga Dan na di ujung sabola utara sahat tu marga Gad na di ujung sabola Selatan. Ditarik do garis lurus lao mambagi warisan ni ganup marga. Garis lurus i mulai sian parbatasan na di sabola timur sahat tu Laut na Balga manang Laut Tengah na di sabola barat.​—Hes. 47:20.

10. Aha do na boi diparsiajari halak Jahudi na ditawan sian parnidaan ni si Hesekiel?

¹⁰ Aha do na boi diparsiajari halak Jahudi na ditawan sian pembagian ni tano i? Parnidaan i paposson roha ni nasida massai denggan do diatur pembagian ni luat i. Asing ni i, tano na dibagi tu 12 marga i patuduhon, sude halak na mulak tu luat ni Israel pasti mandapot tano warisan do. Dang adong sian halak na mulak i na dipasombu dang marjabu. Pasti adong do tanona.

11. Aha do parsiajaran na boi tadapot sian pembagian ni luat na dibagi i? (Ida muse kotak “Pembagian ni Luat na Dijanjihon”.)

¹¹ Aha do na boi taparsiajari sian parnidaan i? Dung dipadenggan Luat na Dijanjihon i, dang holan tu malim, tu halak Lepi, manang holan tu pamimpin dilehon tano i, alai tu sude 12 marga i do. (Hes. 45:4, 5, 7, 8) Dos songon i ma nang saonari, dang holan na dimiahi na di tano on, dohot halak na mamimpin naposo ni Debata na sian “punguan bolon” i na dilehon kesempatan lao marale-ale tu Jahowa. Alai sude do halak na gabe bagian ni punguan bolon i dilehon kesempatan marale-ale tu Debata.a (Pgk. 7:9) Dang soal aha tugasta di organisasi ni Jahowa, sude do hita mararga di Jahowa jala boi marale-ale tu Ibana. On pasti mambahen las rohatta!

Adong Dua Bedana​—Aha do Lapatanna tu Hita?

12, 13. Aha do tudu-tudu na dilehon Jahowa taringot pembagian ni luat i?

¹² Mungkin bingung do si Hesekiel mambege tudu-tudu ni Jahowa taringot pembagian ni tano i. Ai asing do pembagianna i tu tudu-tudu na dilehon Debata tu si Musa. Adong dua bedana, na parjolo berkaitan tu tanona jala na paduahon berkaitan tu pendudukna.

¹³ Tanona. Dipaboa Jahowa do tu si Musa asa dibagi tano i sesuai tu godang ni halak na tardaftar di sada marga. (4 Mus. 26:52-54) Alai anggo di parnidaan ni si Hesekiel takkas do dipaboa Jahowa asa “bagi dos” dilean tano i tu setiap marga ni Israel. (Hes. 47:14) On patuduhon sarupa do ganjang ni batas na di sabola utara sahat tu selatan di setiap tano ni 12 marga i. Jadi dang soal aha margana, jala dang soal di tano na dia diingani, sarupa do hasil ni tano ni sude halak Israel. Sude do subur luat i.

14. Aha do beda ni aturan na dilehon Jahowa tu si Hesekiel dohot aturan na di Patik ni si Musa taringot penduduk na sian bangso na asing?

¹⁴ Pendudukna. Di Patik ni si Musa, ikkon dijaga do halak na sian bangso na asing jala dipaloas manomba Jahowa. Alai dang dilehon tu nasida tano lao gabe warisan. (3 Mus. 19:33, 34) Anggo paretta na dilehon Jahowa tu si Hesekiel asing do tu aturan na di Patik ni si Musa. Didok Jahowa do, “Di luat ni marga na dia pe halak na sian bangso na asing i tinggal, disi ma lehon tano parbagiananna [warisanna].” Jadi nungnga dihapus Jahowa be sada peraturan sian Patik ni si Musa, dang beda be dibahen halak na sian bangso na asing tu “halak Israel”. (Hes. 47:22, 23) Jadi penduduk ni luat na dipadenggan na diida si Hesekiel i, sarupa do nasida sude di jolo ni Debata jala marsada manomba Ibana.​—3 Mus. 25:23.

15. Aha do na boi taboto taringot Jahowa sian pembagian ni tano dohot sian aturan taringot penduduk ni luat i?

¹⁵ Luar biasa do pengaturan na dibahen Jahowa tu si Hesekiel taringot pembagian ni tano dohot penduduk ni luat i. Sian on gabe pos ma roha ni akka halak na ditawan i molo tano i bagi dos do bahenonna tu sude, dang soal nasida halak Israel manang penduduk sian bangso na asing na manomba Jahowa. (Esra 8:20; Neh. 3:26; 7:6, 25; Jes. 56:3, 8) Jala pengaturan i pe paposson rohatta taringot Jahowa: Mararga do sude naposona di jolona jala toktong do Ibana songon i sahat tu salelengna. (Jaha Haggai 2:7.) Pasti las situtu do rohatta mamboto na dihaholongi Jahowa sude naposona, dang soal hita naeng mangolu di surgo manang di tano on.

16, 17. (a) Aha do parsiajaran na boi taida sian pembagian ni tano dohot sian aturan taringot penduduk ni luat i? (b) Aha do na lao tabahas di pasal na mangihut?

¹⁶ Aha do parsiajaran na boi tadapot sian pembagian ni tano dohot sian penduduk ni luat i? Gabe sipasingot ma on di hita, na ikkon takkas do diida halak molo naposo ni Jahowa di liat portibi on dang mambeda-bedahon halak jala toktong marsada. Dang olo Jahowa mambeda-bedahon jolma. Porlu do tasukkun diritta, ‘Hutiru do sifat ni Jahowa on? Tulus do rohakku makkaholongi jala mangargai akka dongan na manomba Jahowa? Hubeda-bedahon do nasida alani suku, manang status sosialna?’ (Rom 12:10) Massai las situtu do rohatta ala dilehon Jahowa do tu hita kesempatan lao marale-ale tu Ibana, dang soal latar belakangta. Alani i, tasomba ma Jahowa sian nasa rohatta jala tahilala ma pasu-pasu sian Ibana.​—Gal. 3:26-29; Pgk. 7:9.

¹⁷ Na lao tabahas ma muse jaminan na paopatton sian parnidaan ni si Hesekiel na parpudi i. Marjanji do Jahowa lao toktong adong di tonga-tonga ni nasida. Aha do na boi taparsiajari sian i? Taida ma alusna di pasal na mangihut.

1, 2. (a) Aha do tujuan ni tano na dipapulik i? (Ida gambar di sampul ni bukku.) (b) Aha do jaminan na didapot akka tawanan sian parnidaan i?

DI PARNIDAAN ni si Hesekiel na parpudi i, dipaboa do tu ibana tano na ikkon dipapulik. Istimewa do tano i, alana tujuan ni tano i dipapulik dang na lao gabe warisan ni marga ni Israel, alai lao disumbangkon tu Jahowa do. Dipatudu do muse tu si Hesekiel sada kota, jala menarik do goar ni kota i. Parnidaan on paposson roha ni akka halak na ditawan na mulak i, na lao didongani Jahowa do nasida muse di luat ni nasida. On ma jaminan na uppetting na dilehon Jahowa tu nasida.

² Takkas do dipaboa di parnidaan ni i hatorangan taringot tano na disumbangkon. Massai godang do parsiajaran na boi dapot ni akka halak na mangulahon ibadat na sittong sian parnidaan on. Tabahas ma akka parsiajaran i.

‘Sumbangan na Badia dohot Kota’

3. Lima bagian na dia do na dipapulik Jahowa, jala aha do tujuan ni ganup bagian i? (Ida kotak “‘Ikkon Dipapulik’ do Tano na Disumbangkon I”.)

³ Di bagian tano na dipapulik i, adong do tano na bentukna persegi. Ganjang ni sian utara tu selatan, i ma 25.000 asta (13 kilometer), songon i do tong ganjangna sian timur tu barat. Tano on ma na digoari “sude tano na disumbangkon”, jala dibagi tolu ma on. Bagian na di ginjang manang na parjolo khusus do dilehon tu halak Lepi. Bagian na di tonga-tonga, tu bagas joro dohot tu akka malim. Duassa bagian on digoari “sumbangan na badia”. Dung i bagian na di toru, manang tano na tinggal saotik nai i, “dang badia tano i”, jala dohot do tano i “gabe appuna ni kota”.​—Hes. 48:15, 20.

4. Aha do parsiajaran na boi tadapot sian tano na disumbangkon tu Jahowa?

⁴ Aha do parsiajaran na boi tadapot sian catatan ni si Hesekiel taringot tano na disumbangkon tu Jahowa? Andorang so dibagi tano i tu akka marga ni Israel, parjolo do dipapulik tano na disumbangkon i. Dipatudu Jahowa do molo on bagian na uppetting, ala on do inganan na lao dipakke tu pusat ni ibadat na sittong. (Hes. 45:1) Sian carana mambagi tano i, boi ma akka tawanan i marsiajar na ikkon bahenon ni nasida ibadat tu Jahowa na uppetting di ngolu ni nasida. Saonari pe, ikkon tabahen do ulaon tu Debata na uppetting di ngolutta, songon marsiajar Bibel, marpungu, dohot marbarita na uli. Molo nungnga tabahen i na uppetting di ngolutta ganup ari, nungnga tatiru be Jahowa.

“Di Tonga-Tonga do Anggo Kota I”

5, 6. (a) Ise do nappuna kota i? (b) Aha do na so digombarhon kota i, jala boasa?

⁵ Jaha Hesekiel 48:15. Aha do lapatan ni “kota” dohot tano na di sakalilingna i? (Hes. 48:16-18) Dipaboa Jahowa do tu si Hesekiel, “Appuna ni sude halak Israel” do tano na “dibahen gabe kota” i. (Hes. 45:6, 7) Jadi kota dohot inganan na di sakalilingna i dang termasuk tu “sumbangan na badia” na ikkon “dipapulik” gabe appuna ni Jahowa. (Hes. 48:9) Huhut taingot on, tabahas ma aha parsiajaran na boi tadapot sian pengaturan ni kota on.

⁶ Porlu do taboto, kota on dang manggombarhon Jerusalem dohot bagas jorona naung dipadenggan i. Boasa? Alana dang adong bagas joro di bagasan ni kota na diida si Hesekiel i. Asing ni i muse, kota on dang manggombarhon kota na adong di luat ni halak Israel naung dipadenggan i. Boasa? Ai dang hea dibangun halak Jahudi naung mulak i, manang pinoppar ni nasida, kota na sarupa songon kota on. Jala kota on dang adong di surgo. Boasa? Alana kota on dibangun di “inganan na so badia” jala dang di inganan na khusus dibahen lao mangulahon ibadat na badia.​—Hes. 42:20.

7. Aha do kota na diida si Hesekiel i, jala manggombarhon aha do kota i? (Ida gambar ni mula ni parsiajaran.)

⁷ Attong kota aha do na diida si Hesekiel? Porlu do taingot tikki mandapot parnidaan on si Hesekiel, adong do diida ibana sada luat. (Hes. 40:2; 45:1, 6) Bibel patuduhon molo luat na diida i, dang sada luat na adong di tano on. Dos songon i ma nang kota na diida si Hesekiel i, holan gambaran do i. Molo didok hata “kota”, aha do na ro tu pikkiranta? Biasana pittor tabayakkon do godang halak na tinggal di inganan i, jala adong dibahen peraturan asa taratur halak na disi. Di parnidaan ni si Hesekiel, kota i didok bentukna persegi, on manggombarhon na taratur do kota i. Jadi boi ma tasimpulhon, kota i manggombarhon pengaturan ni sada pamarettaon na mambahen denggan jala taratur.

8. Aha do pengaruh ni pengaturan i tu naposo ni Debata, jala boasa boi tadok songon i?

⁸ Tu ise do marlakku pengaturan ni pamarettaon i? Parnidaan ni si Hesekiel i patuduhon molo kota i adong di bagasan ni luat na diida ibana. Jadi pengaturan ni pamarettaon i dibahen lao mangurus sude ulaon ni naposo ni Debata saonari on. Asing ni i, di inganan na so badia do dibahen kota on, dang di inganan na badia. Jadi pengaturan ni pamarettaon i marlakku tu halak na di tano on do, dang tu surgo. Jala sude do halak na mangulahon ibadat na sittong torus mandapot manfaat sian pengaturan i.

9. (a) Ise do na parsidohot mangurus akka na di tano on saonari? (b) Aha do na lao diulahon Jesus di Pamarettaon Saribu Taon?

⁹ Ise do na parsidohot mangurus akka na di tano on saonari? Di parnidaan ni si Hesekiel i adong do “pamimpin” di kota i. (Hes. 45:7) Ibana ma na gabe pengawas di tonga-tonga ni naposo ni Debata. Alai ibana dang sahalak malim manang halak Lepi. Pamimpin on paingotton hita tu akka sintua na so dimiahi tondi parbadia na adong di huria saonari on. Serep do roha ni akka parmahan na sian “biru-biru na asing” on. Diihutton nasida do pengaturan sian pamarettaon ni Kristus na adong di surgo. (Joh. 10:16) Saleleng Pamarettaon Saribu Taon, na lao dipillit Jesus ma akka sintua i lao “gabe pamimpin di saluhut tano on”. (Ps. 45:16) Saleleng pamarettaon i, nasida ma na lao mangihutton tudu-tudu sian Harajaon i lao mangurus naposo ni Debata.

“Disi do Jahowa”

10. Aha do goar ni kota i, jala on paposson roha ni halak na ditawan i taringot aha?

¹⁰ Jaha Hesekiel 48:35. Digoari do kota i “Disi do Jahowa”. Goar i paposson roha ni akka halak na ditawan i na lao maringanan do Jahowa di tonga-tonga ni nasida. Dipatuduhon Jahowa do tu si Hesekiel molo kota i adong di tonga-tonga ni luat i. Seolah-olah didok Jahowa ma songon on tu akka halak na ditawan i, ‘Na lao donganakku do hamu muse!’ Pasti las situtu do roha ni nasida mambege hata on!

11. Aha do parsiajaran na boi tadapot sian kota dohot goar ni kota i?

¹¹ Aha do parsiajaran na boi tadapot sian surirang ni si Hesekiel on? Goar ni kota on paposson rohatta, didongani Jahowa do akka naposona na setia saonari, torus sahat tu saleleng ni lelengna. Jala sian goar ni kota on, taboto ma tujuan ni kota i dibangun dang asa marhuaso jolma manang mambahen aturan mangihutton lomo ni rohana sandiri, alai ikkon diihutton nasida do aturan ni Jahowa. Ikkon adil do nasida jala patuduhon holong songon Jahowa. Umpamana, dang boi akka pamimpin i mambagi-bagi luat i sesuai tu lomo ni rohana, alai ikkon diihutton nasida do aha naung ditottuhon Jahowa. Saonari on pe, dilehon Jahowa do tu sude naposona kesempatan lao mangulahon tugas di organisasina, termasuk ma i tu akka halak na lea diida jolma. Jadi ikkon diargai akka parmahan na di huria do sude na diulahon naposo ni Jahowa.​—Poda 19:17; Hes. 46:18; 48:29.

12. (a) Aha do muse na boi taparsiajari sian goar ni kota i, jala patuduhon aha do i? (b) Aha do sipasingot na boi didapot akka pengawas sian i?

¹² Aha do na boi taparsiajari muse sian goar ni kota i? Najolo dibahen do tembok lao manjaga kota, jala holan saotik do dibahen gerbang. Alai anggo kota on, tolu gerbangna di ganup sisi ni tembok. Jadi adong 12 gerbangna! (Hes. 48:30-34) Akka gerbang i patuduhon, mura do juppangan ni sude naposo ni Debata pamimpin na di kota i. Asing ni i, 12 gerbang ni kota i patuduhon boi do “sude halak Israel” ro tu kota i. (Hes. 45:6) Sipasingot na massai penting do on tu akka pengawas na di huria. Lomo do roha ni Jahowa asa mura nasida dijonoki, jala rade mangurupi sude halak na di organisasina.

Ro do Akka Halak “Manomba Jahowa” jala “Karejo di Kota”

13. Aha do na dipaboa Jahowa taringot tugas na diulahon naposona?

¹³ Taida ma muse na masa di tikki ni si Hesekiel, jala aha na disurat ibana taringot parnidaan on. Nungnga dipaboa Jahowa, marragam do tugas na diulahon akka naposona. Umpamana, adong do akka malim dohot halak Lepi na marhobas di bagas joro. Tugas ni akka malim, i ma mangalehon pelean jala marhobas di jolo ni Jahowa. Dung i halak Lepi “mangulahon sude tugas jala martanggung jawab tu sude ulaon na diulahon disi”. (Hes. 44:14-16; 45:4, 5) Adong do muse halak na asing na karejo di labbung ni kota i. Akka ise do nasida?

14. Pengaturan taringot akka parkarejo na di kota i paingotton hita tu aha?

¹⁴ Akka halak na karejo di labbung ni kota i ro sian “sude marga ni Israel”. Mangula do karejo ni nasida, asa adong hasil ni tano i lao “allangon ni halak na karejo di kota” i. (Hes. 48:18, 19) Pengaturan on paingotton hita tu kesempatan na dilehon Jahowa tu sude naposona lao mangurupi organisasina. Saonari, dilantik Jahowa do akka halak na dimiahi dohot akka pengawas na sian “punguan bolon” lao mamimpin naposona. (Pgk. 7:9, 10) Sude na marale-ale tu Jahowa dilehon do kesempatan lao mangurupi ulaon ni nasida. Sada cara patuduhon na taurupi nasida, i ma molo rade hita mangihutton sude tudu-tudu sian naposo haposan.

15, 16. (a) Aha do muse na dipaboa di parnidaan ni si Hesekiel? (b) Songon dia do hita boi dohot mangulahon ulaon na sarupa?

¹⁵ Adong dope na dipaboa di parnidaan ni si Hesekiel i, jala sian i boi do hita marsiajar taringot ulaonta manomba Jahowa. Aha ma i? Jahowa paboahon akka halak na ro sian 12 marga ni Israel i, na so termasuk pinoppar ni si Lepi, diulahon nasida do tugasna di dua inganan: di alaman ni bagas joro dohot di inganan panjappalan ni kota i. Aha do na diulahon nasida? Ro do sude halak sian sude marga tu alaman ni bagas joro i lao “manomba Jahowa” jala mangalehon pelean tu Jahowa. (Hes. 46:9, 24) Ro do muse halak sian sude marga lao mangurupi kota i. Mangula do nasida di inganan panjappalan appuna ni kota i. Aha do na boi taparsiajari sian nasida?

¹⁶ Saonari on pe, dilehon do kesempatan tu punguan bolon lao mangulahon tugas na sarupa songon na di parnidaan ni si Hesekiel. Disomba nasida do Jahowa “di bagas jorona”, jala dilehon nasida do pujian tu Jahowa dos songon pelean. (Heb. 13:15; Pgk. 7:9-15) Marbarita na uli do nasida, mangalehon komentar na patoguhon haporseaon, jala marende di parpunguan. Ulaon na massai penting do di nasida manomba Jahowa. (1 Kron. 16:29) Godang do sian naposo ni Debata mangulahon marragam cara lao mangurupi organisasina. Adong do na dohot mambangun jala mangurus Bale Harajaon, fasilitas ni kantor cabang, karejo di proyek na asing, jala dohot mangalehon sumbangan. Seolah-olah mangula do nasida sude “lao pasangappon Debata”. (1 Kor. 10:31) Semangat jala marlas ni roha do nasida mangulahon i, ai diboto nasida do “lomo do roha ni Debata tu akka pelean sisongon i”. (Heb. 13:16) Marsitutu do hamu mangurupi organisasi ni Jahowa saonari on?

“Tapaima-ima do Langit na Imbaru dohot Tano na Imbaru”

17. (a) Songon dia do parnidaan ni si Hesekiel i saut tu godang halak? (b) Saleleng Pamarettaon Saribu Taon, akka ise do na diurus halak na dilantik i?

¹⁷ Na lao saut do muse parnidaan ni si Hesekiel taringot tano na disumbangkon on tu godang halak di ari na naeng ro? Ido! Taingot ma di parnidaan ni si Hesekiel i, bagian ni tano na gabe “sumbangan na badia” adong di tonga-tonga ni luat i. Jala di tonga-tonga ni tano i do “inganan na badia ni Jahowa”. (Hes. 48:10) Dung sae Armagedon, manang didia pe hita tinggal di tano on, toktong do didongani Jahowa hita. (Pgk. 21:3) Saleleng Pamarettaon Saribu Taon, dilantik do akka halak mandalatton pengaturan sian Debata lao mangurus naposona di liat portibi on. Dipatuduhon nasida do holong jala diurupi do sude halak asa mangulahon lomo ni roha ni Debata na dipatudos songon “tano na imbaru”.​—2 Ptr. 3:13.

18. (a) Boasa pos rohatta molo akka halak na dipillit lao mangurus naposona i torus mangihutton pengaturan sian pamarettaon ni Debata? (b) Goar ni kota i paposson rohatta taringot aha?

¹⁸ Boasa pos rohatta molo halak na dipillit lao mangurus naposona i torus mangihutton pengaturan na sian pamarettaon ni Debata? Dipaboa di Bibel, sarupa do gerbang ni kota na di tano on dohot gerbang ni kota na di surgo, adong 12 gerbangna. Kota on ma Jerusalem na Imbaru i, i ma si 144.000 dongan ni Jesus gabe Raja. (Pgk. 21:2, 12, 21-27) On patuduhon pengaturan na didalatton di tano on pasti sesuai do tu pengaturan ni Harajaon ni Debata na adong di surgo. Jala sude halak na dipillit lao mangurus naposona i pe pasti mangulahon sude keputusan na dibahen Harajaon ni Debata. Jala goar ni kota “Disi do Jahowa” paposson rohatta molo ibadat na sittong na lao torus do adong salelengna di Paradeiso. Massai denggan situtu do na lao masa di ari na naeng ro!