“Nungnga Huida Tuan!”

Diida si Maria Magdalena ma doppak langit huhut diapus iluna. Diida ibana ma Tuan na dihaholongi ibana digattung di sada hau. “Makkolom ma saluhut luat i”, hape jam 12 arian do di tikki i jala musim semi! (Lukas 23:44, 45) Didapotton si Maria ma akka borua na adong disi. Saleleng tolu jam ma golap sude luat i. Alai dang ala na adong gerhana matahari umbahen na golap. Molo gerhana matahari, biasana holan piga-piga menit do terjadi. Ra, mulai ma dibege si Maria dohot akka halak na jongjong di jonok di Jesus soara ni akka binatang na biasana kaluar di tikki borngin. Adong do piga-piga halak na mabiar jala didok, “Tutu do ibana Anak ni Debata”. (Mateus 27:54) Ra didok roha ni akka sisean ni Jesus dohot halak na asing do, molo tanda i patuduhon na lungun do roha ni Jahowa jala kecewa ala dibahen na jahat tu Anakna i.

Sebenarna, naeng lao do si Maria sian i. Alana dang tahan ibana mangida Jesus haccitan. (Johannes 19:25, 26) Alai porlu do omak ni Jesus didongani jala dipatogu. Alani i ma dang jadi si Maria lao sian i.

Najolo, susa do ngolu ni si Maria jala leas do roha ni halak mangida ibana. Alai ala diurupi Jesus, gabe adong ma tujuan ni ngoluna jala gabe mararga ma dihilala ngoluna. Saonari, nungnga togu be haporseaon ni si Maria. Aha ma buktina, jala aha na boi tatiru sian ibana?

“Dipakke Nasida do Arta ni Nasida lao Mangurupi”

Parjolo sahali dipaboa taringot kisah ni si Maria di Bibel, i ma tikki dipamalum Jesus ibana sian suru-suruan na jahat dohot sian sahit. Dang taboto aha na dibahen suru-suruan na jahat i tu si Maria. Alai di tikki i, balga hian do pengaruh ni suru-suruan na jahat. Godang do halak na disonggopi suru-suruan na jahat. Alai ala diurupi Jesus, nungnga malua be si Maria sian pengaruh ni suru-suruan na jahat!—Lukas 8:2.

Pasti las hian do roha ni si Maria ala nungnga malua ibana sian pengaruh ni suru-suruan na jahat. Nungnga muba be ngoluna saonari. Songon dia ma cara ni si Maria lao mambalos haburjuon ni Jesus? Gabe sisean ni Jesus do ibana. Alai dang holan i, diurupi ibana do tong Jesus dohot akka apostelna. Dilehon do akka kebutuhan ni nasida. Misalna, sipanganon, pakkean, dohot inganan ni nasida modom. Dang halak na mora Jesus dohot akka apostelna, jala di tikki i dang karejo nasida lao memenuhi kebutuhan ni nasida. Jadi asa boi fokus lao marbarita na uli, porlu do nasida diurupi.

Dipakke si Maria dohot godang borua na asing do “arta ni nasida lao mangurupi Jesus dohot akka apostelna”. (Lukas 8:1, 3) Ra, piga-piga sian akka borua on halak na mora do. Memang dang adong dipaboa di Bibel, alai nasida do ra na paradehon sipanganon, manucci baju, dohot mangatur penginapan di akka huta na dikunjungi Jesus. Las do roha ni nasida mangurupi Jesus dohot akka apostelna. Di tikki i adong do ra hira-hira 20 halak godang ni nasida. Alani bantuan ni akka borua on, gabe boi ma Jesus dohot akka apostelna i fokus lao marbarita na uli. Pasti diboto si Maria do, dang sadia dope na diulahon ibana molo dibandingkon tu sude naung dibahen Jesus tu ibana. Alai las do rohana, ala boi dibahen ibana sian nasa tolapna lao mangurupi Jesus.

Di tikkitta saonari pe, godang do na leas rohana mangida halak na mangulahon karejo na rendahan. Alai molo Debata, dang leas rohana mangida halak sisongon i. Pasti las hian do roha ni Debata mangida si Maria na olo mangulahon aha pe lao mendukung Jesus dohot akka apostelna. Saonari pe, godang do naposo ni Debata na olo mangurupi na asing. Sipata, nang pe holan otik hata na tadok jala sederhana bantuan na talehon, boi do i patoguhon roha ni sasahalak. Jala massai arga do i di Jahowa.—Poda 19:17; Heber 13:16.

‘Jongjong di Labbung ni Hau Partinaonan i’

Taon 33 M lao do Jesus tu Jerusalem lao mangarayahon Paska. Di tikki i dohot do si Maria Magdalena mandongani Jesus. (Mateus 27:55, 56) Tikki dibege si Maria na ditakkup Jesus jala diadili, tarsonggot do ibana. Jala diboto ibana ma muse naung dibahen Gubernur Pontius Pilatus keputusan na ikkon digattung Jesus di sada tiang. Dibahen si Pilatus pe keputusan i, ala dipaksa akka pamimpin agama dohot akka halak disi do ibana. Ra, diida si Maria do na marmudari daging ni Jesus, jala mardalan lao tu ingananna dihukum mate huhut manuhuk hau partinaonanna.—Johannes 19:6, 12, 15-17.

Ujungna, dipakkuhon ma Jesus tu tiang. Di tikki i golap do sude luat i, hape arian do di tikki i. Jongjong do si Maria dohot akka borua na asing “di labbung ni hau partinaonan”. (Johannes 19:25) Dibege si Maria do tikki didok Jesus tu si Johannes, apostel na dihaholongi Jesus, asa dijaga si Johannes omak ni Jesus. Dibege si Maria do tong tikki gogo soara ni Jesus marsurak tu Jahowa. Jala tikki naeng mate Jesus, dibege si Maria do tikki didok Jesus, “Nungnga huulahon be sude na pinangidomi sian au”. Hancur hian do perasaan ni si Maria mangida i. Nungnga mate be Jesus, alai tetap dope disi si Maria. Dukkon i, adong ma sahalak bawa na mora sian Arimatea na margoar si Josep mambuat bakke ni Jesus. Jala dikuburhon ma Jesus di kuburan na baru. Dohot do si Maria tu kuburan i jala sai hundul do ibana di jolo ni kuburan i.—Johannes 19:30; Mateus 27:45, 46, 57-61.

Tikki adong donganta na susa, boi do tatiru si Maria Magdalena. Ra, dang boi hita pasidikkon asa unang masa sitaonon i, jala dang boi tabahen asa tarapul roha ni donganta i. Alai boi do tapatudu roha sapakkilalaan jala taurupi ma nasida nang pe dang mura mangulahon i. Holan tadongani pe nasida, boi do i mambahen nasida gabe tarapul. Molo toktong tadukung akka dongan na susa, on patuduhon na setia do hita jala boi do i patoguhon roha ni nasida.—Poda 17:17.

“Asa Hubuat Ibana sian i”

Dung dipeakkon bakke ni Jesus di sada kuburan, dituhor si Maria dohot piga-piga borua na asing ma akka rempah-rempah lao dibahen tu bakke ni Jesus. (Markus 16:1, 2; Lukas 23:54-56) Dung salpu ari Sabat, dungo ma si Maria, jala lao ma ibana dohot akka borua na asing tu kuburan ni Jesus, nang pe golap dope di tikki i. Alai tikki di pardalanan, didok nasida ma sama nasida, ise ma annon na lao manggulikkon batu na manutup kuburan i. (Mateus 28:1; Markus 16:1-3) Alai nang pe songon i, ditorusson nasida do pardalananna i. Diulahon nasida do aha na boi diulahon nasida. Jala pos do roha ni nasida na urupan ni Jahowa do nasida.

Ra, si Maria do na parjolo sahat di kuburan i. Dung sahat disi, tarsonggot ma ibana. Alana diida ibana nungnga guling be batu i jala dang disi be bakke ni Jesus. Alani i, pittor marlojong ma ibana paboahon tu si Petrus dohot si Johannes. Hosa-hosa dope si Maria tikki mandok tu nasida, “Nungnga dibuat halak be Tuan sian kuburan i jala dang huboto hami didia dipeakkon nasida ibana!” Pittor marlojong ma si Petrus dohot si Johannes lao tu kuburan i. Dung sahat disi, diida nasida ma naung kosong kuburan i. Dung i mulak ma nasida tu jabu ni nasida be.a—Johannes 20:1-10.

Dung i, lao ma muse sahalak ni si Maria tu kuburan i. Jongjong ma ibana di labbung ni kuburan i huhut tangis. Dang porsea ibana na so disi be bakke ni Jesus. Alani i, unduk ma ibana mangida tu bagasan kuburan i. Alai tarsonggot do ibana ala diida ibana adong dua suru-suruan na marabit na bottar hundul disi. Didok nasida ma tu si Maria, “Boasa sai tangis ho inang?” Alai didok ibana ma songon na didok tu akka apostel ni Jesus, “Nungnga dibuat halak Tuanki, jala dang huboto didia dipeakkon nasida ibana.”—Johannes 20:11-13.

Dung didok songon i, dibereng ibana ma tu pudi jala diida ma adong sahalak bawa jongjong di pudina. Alai dang ditanda ibana ise bawa i. Dirippu si Maria pangula ni ladang do bawa i. Alai lambok ma didok bawa i tu ibana, “Boasa sai tangis ho inang? Ise do na dilului ho?” Didok si Maria ma, “Amang, molo ho do na mambuat ibana, paboa ma tu au didia dipeakkon ho ibana, asa hubuat ibana sian i.” (Johannes 20:14, 15) Coba ma pikkirhon hata ni si Maria i. Hira-hira tolap do ibana mangangkat jala mamboan bakke ni Jesus sahalakna? Tikki mangolu Jesus, halak na gogo do ibana. Dang sahat tusi dipikkirhon si Maria. Alai na adong di pikkiranna, ikkon adong do na diulahon ibana tu Tuanna i.

Songon si Maria, hita pe olo do ra menghadapi tantangan na massai borat jala hira na so sanggup hita menghadapi i. Alai tikki masa sisongon i, ingot ma teladan ni si Maria Magdalena. Molo sai berfokus hita tu kelemahan dohot hahuranganta, boi do hita gabe mabiar jala dang boi be mangulahon manang aha pe. Alai molo taulahon aha na boi taulahon jala pos rohatta na urupan ni Jahowa hita, boi do taulahon lobi sian na so taharappon. (2 Korint 12:10; Pilippi 4:13) Alai na uppetting, tabahen ma las roha ni Jahowa. Songon i ma na diulahon si Maria. Las do roha ni Jahowa tu ibana jala dipasu-pasu do ibana.

“Nungnga Huida Tuan!”

Dang pangula ni ladang bawa na makkatai dohot si Maria i. Alai Jesus do i. Hea do Jesus gabe tukkang hau, gabe guru, dung i gabe Tuan jala sahabat ni si Maria. Alai dang ditanda si Maria Jesus di tikki i jala naeng ditadikkon ibana do Jesus. Dang dirippu si Maria naung dipahehe do Jesus gabe suru-suruan na gogo. Memang, mardaging jolma do Jesus tikki manjuppangi si Maria. Alai dang dagingna sebelum mate i be daging ni Jesus. Dung dipahehe Jesus, adong do piga-piga hali ibana manjuppangi akka siseanna. Alai di akka peristiwa i, dang pittor ditanda nasida Jesus. Bahkan akka halak na akrab dohot Jesus pe dang pittor mananda ibana.—Lukas 24:13-16; Johannes 21:4.

Alai ujungna diboto si Maria ma na Jesus do i. Sian dia diboto? Tikki didok Jesus “Maria!” Pittor dibereng si Maria ma tu pudi, jala didok ibana ma di bahasa Heber, “Rabboni!” Sian cara ni Jesus manjou ibana pittor diboto si Maria ma, Tuan na dihaholongi ibana do na jongjong di jolona i. Las hian do roha ni si Maria, jala sai ditiop ibana ma Jesus.—Johannes 20:16.

Didok Jesus ma tu si Maria, “Unang ma sai tiop au.” Pasti lambok do Jesus mandokkon i tu ibana, ra huhut senyum. Jala nanget-nanget ma dipalua ibana tangan ni si Maria huhut didok, “Ai dang lao dope au tu Ama i.” Memang, dang tikkina dope nakkok Jesus tu surgo. Adong dope na ikkon diulahon Jesus di tano on, jadi dipangido ibana ma bantuan ni si Maria. Didok Jesus ma tu si Maria, “Lao ma ho manjuppangi akka haha anggikku, jala dokkon ma tu nasida, ‘Na lao ma au tu Damang i dohot Amamuna jala tu Debatakku dohot Debatamuna.’”—Johannes 20:17.

Tugas na istimewa do i di si Maria! Ibana ma sada sian akka sisean na parjolo sahali mangida Jesus dung dipahehe. Jala disuru Jesus ma ibana lao paboahon i tu akka sisean na asing. Bayakkon ma songon dia las ni roha ni si Maria tikki mangalului akka sisean na asing lao pasahatton barita i. Dung juppang ni si Maria nasida, las hian ma rohana mandok, “Nungnga huida Tuan!” Dung i, dipaboa ma tu nasida sude na didok Jesus tu ibana. (Johannes 20:18) Barita na dipasahat si Maria i gabe lam paposson roha ni nasida na tutu do na didok akka borua na lao tu kuburan ni Jesus.—Lukas 24:1-3, 10.

“Dang Porsea Nasida tu na Nidok ni Akka Borua i”

Alai songon dia do tanggapan ni akka apostel ni Jesus? Didok di Bibel, “Alai dang porsea nasida tu na nidok ni akka borua i, dirippu nasida do holan hata-hata i.” (Lukas 24:11) Sebenarna, burju do akka apostel i. Alai dang disadari nasida, sebenarna nungnga terpengaruh nasida tu hasomalan ni akka halak di sakaliling ni nasida. Alana tikki i, dang porsea akka halak tu hata ni borua. Diajarhon akka pamimpin agama do, dang boi borua gabe saksi di pengadilan. Alai dang songon pandangan ni akka pamimpin agama i pandangan ni Jesus dohot Jahowa taringot borua. Ala togu haporseaon ni si Maria, dilehon do tu ibana sada tugas na istimewa!

Nang pe songon i tanggapan ni akka bawa i tu si Maria, dang gabe metmet rohana. Na uppetting di ibana, asal ma porsea Tuanna i tu ibana. Saonari pe dilehon Jesus do tugas na istimewa tu akka siseanna lao pasahatton barita na uli. Di Bibel, didok do molo barita i “barita na uli taringot tu Harajaon ni Debata”. (Lukas 8:1) Dang hea didok Jesus na lao sude halak marlomo ni roha tu barita na dipasahat nasida. Gariada didok Jesus, na lao dianiaya do nasida. (Johannes 15:20, 21) Alani i, denggan do molo ditiru naposo ni Jahowa teladan ni si Maria Magdalena. Nang pe dang porsea akka sisean na asing tu si Maria, tetap do semangat ibana paboahon barita taringot haheheon ni Jesus tu nasida!

Ujungna, dipatuduhon Jesus do dirina tu akka apostelna sappe piga-piga hali. Di sada tikki, dipatuduhon Jesus do dirina tu lobi sian 500 halak siseanna na marpungu di sada inganan! (1 Korint 15:3-8) Tikki diboto si Maria na dijuppangi Jesus do akka siseanna, lam dipatogu do haporseaonna. Di ari Pentakosta, tikki marpungu akka sisean ni Jesus di Jerusalem jala mandapot tondi parbadia, ra dohot do si Maria disi. Alana didok di Bibel, adong do piga-piga borua na dohot disi.—Ulaon ni Apostel 1:14, 15; 2:1-4.

Sian on gabe taboto ma, toktong do setia si Maria Magdalena sahat tu ujung ni ngoluna. Alani i, tatiru ma ibana. Tapatudu ma sian tindakanta na mandok mauliate hita tu sude naung dibahen Jesus tu hita. Toktong ma serep rohatta lao mangurupi na asing. Molo taulahon i, pos ma rohatta urupan ni Jahowa do hita.