Boi do Binatang Masuk tu Surgo?

Na didok Bibel

Bibel mandok sian sude toppaan na adong di portibi on, holan jolma do na lao mangolu tu surgo jala holan saotik do jumlahna. (Pangungkapon 14:1, 3) Lao mamaretta do nasida gabe raja dohot malim di surgo, rap dohot Jesus. (Lukas 22:28-30; Pangungkapon 5:9, 10) Alai godangan jolma dipahehe lao mangolu di Paradeiso, di tano on.—Psalmen 37:11, 29.

Dang hea didok di Bibel adong surgo na dibahen holan tu binatang na dipiaro manang tu biang. Boasa? Alana dang boi binatang mangulahon sude na dihaporluhon asa boi “dijou tu banua ginjang”. (Heber 3:1) Misalna, marsiajar taringot Debata, patuduhon haporseaon, dohot mangoloi akka paretta ni Debata. (Mateus 19:17; Johannes 3:16; 17:3) Holan jolma do na boi mangulahon i. Alani i, holan jolma do na boi mangolu salelengna.—1 Musa 2:16, 17; 3:22, 23.

Asing ni i, ikkon dipahehe do toppaan na adong di portibi on asa boi mangolu tu surgo. (1 Korint 15:42) Adong do piga-piga na dipahehe na disurat di Bibel. (1 Raja-Raja 17:17-24; 2 Raja-Raja 4:32-37; 13:20, 21; Lukas 7:11-15; 8:41, 42, 49-56; Johannes 11:38-44; Ulaon ni Apostel 9:36-42; 20:7-12) Alai holan jolma do na dipahehe i, dang adong binatang.

Aha do na masa tu binatang dukkon mate?

Bibel mandok, sarupa do jolma dohot binatang, toppaan na “mangolu” do nasida. Ditoppa do nasida mamakke “orbuk sian tano” jala dilehon do “hosa” tu nasida.—1 Musa 1:24; 2:7; 4 Musa 31:28.

Didok do muse di Bibel, boi do binatang dohot jolma mate. (2 Musa 19:13) Dung mate, mulak gabe orbuk sian tano do nasida. (Parjamita 3:19, 20) Jala dang adong be nasida manang didia pe.

Boi do binatang mangulahon dosa?

Daong. Didok do sasahalak mardosa molo mamikkirhon jala mangulahon na dihasogohon Debata. Jala ikkon boi do ibana mambahen keputusan mamakke kemampuan marpikkirna. Alai, insting do na dipakke binatang saleleng mangolu. (2 Petrus 2:12) Nang pe dang mangulahon dosa, tetap do binatang mate ala jeppek do ngoluna.

Boi do tasiksa binatang?

Daong. Nang pe dilehon Jahowa tu jolma huaso lao mangarajai akka binatang, alai dang dipaloas Jahowa jolma menyiksa binatang. (1 Musa 1:28; Psalmen 8:6-8) Parduli do Jahowa tu ganup binatang, bahkan tu akka amporik. (Jona 4:11; Mateus 10:29) Jala diparettahon Jahowa do sude naposona asa denggan mangurus binatang.—2 Musa 23:12; 5 Musa 25:4; Poda 12:10.

Na didok Bibel taringot binatang

1 Musa 1:28: “Dipasu-pasu Debata ma [jolma na parjolo] jala didok ma, ‘Marpinoppari ma hamu asa lam godang hamu. Gohi hamu ma tano on jala rajai ma i. Rajai hamu ma akka dekke na di laut, akka binatang na habang di langit, dohot akka binatang na di tano on.’”

Artina: Dilehon Jahowa do tu jolma huaso lao mangarajai akka binatang.

Parjamita 3:19, 20: “Ai songon ujung ni binatang do ujung ni jolma. Sarupa do ujung ni nasida. Mate jolma, mate do nang binatang. Marhosa jolma, marhosa do nang binatang. Dang dumenggan jolma sian binatang. Marisuang do sude. Sarupa do inganan na tinuju ni jolma dohot binatang. Sian tano do nasida, jala mulak tu tano.”

Artina: Dung mate, mulak do binatang gabe orbuk sian tano.

Poda 12:10: “Diparrohahon halak na tigor marroha do binatang na dipiaro ibana.”

Artina: Parduli do akka naposo ni Jahowa tu akka binatang, termasuk tu binatang na dipiaro nasida.

Mateus 10:29: “Holan salimper do kan digadis arga ni dua amporik? Alai, dang adong nanggo sada pe sian i na madabu tu tano na so diboto Amamuna.”

Artina: Diparate-atehon Debata do akka binatang, bahkan parduli do Ibana tu akka amporik.