Gabe Mardame do Au Dohot Bapakku

NGOLUKKU NA UJU I

Godang do turis na ro lao mangida air terjun na terkenal di jonok ni Kota Pagsanjan di Filipina. Di kota on ma bapakku dipagodang-godang. Goar ni bapakku si Nardo Leron, jala pogos do keluargana. Diida bapakku godang do halak na korupsi di pemerintahan, songon i do tong akka polisi dohot akka donganna di tempat karejo. Alani i, gabe halak na kasar do bapak jala mura-mura muruk.

Ualu ma hami na marhaha maranggi. Kerja keras do Bapak dohot Omak lao pagodang-godangkon hami. Jotjot do nasida lao tu ladangnami na adong di daerah pegunungan, alani i olo do nasida leleng asa mulak sian i. Gabe terbiasa ma au dohot abangku si Rodelio mangurus diri sandiri, jala jotjot do hami kelaparan. Tikki gelleng hami, jarang do hami marmeam. Mulai sian umur pitu taon, nungnga karejo hami mamboan akka kalapa sian ladang. Borat do akka kalapa i jala ikkon dilewati hami do dalan na curam di daerah pegunungan i. Molo paborattu siboanonnami, gabe disarat hami ma i.

Jotjot do hami dipukkuli Bapak, jala haccit do i. Alai umhaccit do dihilala hami tikki diida hami Omak dipukkuli. Berupaya do hami mangorai Bapak, alai dang boi. Hea do au dohot si Rodelio berencana asa sip-sip mambunu Bapak molo nungnga dewasa hami. Lomo hian do rohakku adong bapak na makkaholongi hami!

Marsak do au jala muruk mangida sikap ni Bapak. Alani i, tikki marumur 14 taon au, lari ma au sian jabu. Hea do au tinggal di jalanan, jala mulai ma au mamakke ganja. Ujungna, dapottu ma karejo mamboan akka turis mangida air terjun mamakke parau.

Piga-piga taon dukkon i, kuliah ma au di Manila. Alai ala ikkon lao do au tu Pagsanjan karejo tiap akhir pekan, gabe dang adong tikkikku lao marsiajar. Susa do huhilala ngolukku jala dang martujuan. Asa moru arsak ni rohakku, jotjot do au marganja, alai tetap dope marsak rohakku. Gabe hucoba ma jenis narkoba na asing, songon sabu-sabu, kokain, dohot heroin. Jala huulahon do muse seks na so patut. Manang didia pe, sai adong do huida halak na pogos, na susa, jala na mengalami ketidakadilan. Sogo do rohakku tu pamaretta. Menuruttu nasida do na mambahen gabe godang masalah. Hudok ma tu Debata, “Boasa gabe songon on ngolukku?” Huparsiajari do ajaran ni piga-piga agama, alai dang dapottu alusna. Jadi asa unang sai lungun rohakku, lam godang ma narkoba na hupakke.

Di taon 1972, dibahen akka mahasiswa di Filipina ma piga-piga demonstrasi lao mangalo pamaretta. Dohot do au di sada sian demonstrasi i, jala gabe gaor do ujungna. Godang do na ditakkup jala piga-piga bulan dukkon i, didok do naung darurat militer Filipina.

Mabiar do au ditakkup polisi ala na dohot i au demonstrasi. Gabe tinggal di jalanan ma au muse. Asa boi torus mamakke narkoba, manakko do au. Jala di pudian ni ari, gabe mangulahon seks do karejokku tu akka na mora dohot halak sian luar negeri. Dang parduli be au tu ngolukku, naeng mate manang mangolu.

Marsiajar Bibel ma Omak dohot adekku tu Saksi Jahowa. Muruk hian do Bapak jala ditutung ma akka bukku ni nasida. Alai dang menyerah Omak dohot adekki. Ujungna tardidi ma nasida gabe Saksi Jahowa.

Sada tikki, adong ma sahalak Saksi Jahowa paboahon tu Bapakku taringot janji na disurat di Bibel, molo di ari na naeng ro bahenon ni Debata ma na adil tu saluhut portibi on. (Psalmen 72:12-14) Lomo do roha ni Bapak mambege i, alani i dipareso ibana ma isi ni Bibel. Dang holan janji taringot pamarettaon na adil na diboto Bapak, alai dohot do taringot aha na dipangido Debata asa diulahon akka suami dohot ama. (Epesus 5:28; 6:4) Dang leleng dukkon i, gabe Saksi Jahowa ma ibana dohot sude haha anggikku. Ala dang rap tinggal au dohot nasida, dang huboto manang aha taringot on.

SONGON DIA BIBEL MAMBAHEN MUBA NGOLUKKU

Di taon 1978, pinda ma au tu Australia. Nang pe dang adong porang di negara on jala mura mandapot godang hepeng, alai tong do dang dame rohakku. Minum-minum dope au jala marnarkoba. Jala di taon i ma adong Saksi Jahowa na manjuppangi au. Las do rohakku ala dipaboa nasida do janji na disurat di Bibel taringot hadameon di saluhut tano on. Alai dang olo au taratur marsiajar Bibel dohot nasida.

Dang leleng dukkon i, mulak ma au tu Filipina saleleng piga-piga minggu. Diceritahon haha anggikku ma, na marsitutu do Bapak padenggatton pangalahona. Alai tetap dope muruk au tu Bapak, jala dang olo au makkatai tu ibana.

Dipaboa itokku siappudan ma sian Bibel boasa marsitaonon jolma jala dibahen na so adil tu nasida. Longang do rohakku mangida itokki. Nang pe remaja dope ibana jala otik dope pengalaman hidupna, alai boi do dialusi ibana akka sukkun-sukkunku. Sebelum lao au tu Australia, dilehon Bapak ma tu au bukku Saudara Dapat Hidup Kekal di Bumi.a Didok ibana, “Boi do bukku on mangurupi ho mandapot aha na dilului ho saleleng on. Unang be lului sian na asing.” Dijujui ibana do au asa mangalului Saksi Jahowa di Australia.

Huoloi do nasehat ni Bapak i. Lao ma au tu Bale Harajaon ni Saksi Jahowa di jonok ni jabukku di Brisbane. Jala taratur ma au marsiajar Bibel dohot Saksi. Huparsiajari ma taringot surirang na disurat di Daniel bindu 7 dohot Jesaya bindu 9 na mandok, molo dung mamaretta Harajaon ni Debata tu jolma, dang adong be korupsi. Huparsiajari do muse, lao bagak do sude na adong di tano on. Lomo do rohakku mambahen las roha ni Debata. Alai huboto do, ikkon boi do hukendalihon emosikku, dang kecanduan narkoba, jala dang mangulahon seks na so patut. Ujungna, putus ma au dohot hallettu na rap sajabu dohot au. Dang minum-minum be au jala dang marnarkoba. Gabe lam pos do rohakku tu Jahowa, jala martangiang do au asa diurupi mambahen akka perubahan na asing di ngolukku.

Lam leleng, gabe huboto ma tutu do boi muba sasahalak alani hasittongan na diajarhon di Bibel. Didok di Bibel, molo berupaya hita pasti boi do tapakke “pangalaho na imbaru”. (Kolosse 3:9, 10) Tikki huuba pangalahokku, gabe huingot ma Bapak. Gabe didok rohakku ma, atik na tutu do na hubege i, nga muba be Bapak. Dang muruk be au tu Bapak. Gariada, lomo rohakku naeng mardame dohot ibana. Ujungna, boi ma humaappon Bapak jala dang dendam be au tu ibana, songon na huhilala tikki gelleng.

MANFAAT NA HUDAPOT

Tikki poso au, jotjot do au mangihutton manang aha pe na didok halak, hape berbahaya do i jala mambahen au marsahit. Toho do hape na didok di Bibel, ‘Molo mardongan hita tu halak na so denggan, sega do pangalahotta na denggan i.’ (1 Korint 15:33) Alai saonari, dapottu ma akka dongan sahaporseaon na burju, jala diurupi nasida do au asa lam denggan pangalahokku. Dapottu do tong istri na massai burju, i ma si Loretta. Rap do hami mangajarhon tu akka halak aha do manfaatna marsiajar Bibel.

Najolo, dang hea hubayakkon boi do Bapak gabe suami na makkaholongi Omak, jala boi gabe halak Kristen na sabar jala marserep ni roha. Alai boi do masa i ala marsiajar Bibel ibana. Pajuppang do au dohot Bapak dung tardidi au gabe Saksi Jahowa taon 1987. Di tikki i ma parjolo sahali huhaol Bapak!

Lobi sian 35 taon ma lelengna Bapak rap dohot Omak mangajarhon janji na disurat di Bibel tu akka halak. Gabe halak na ringgas do Bapak, parholong, jala ditanda do ibana halak na rade mangurupi na asing. Gabe huargai do Bapak jala holong do rohakku tu ibana. Bangga do au gabe anakna! Boi do muba pangalahonami ala marsiajar Bibel. Tikki marujung ngolu Bapak di taon 2016, holan haburjuonna do na huingot. Dang sogo be rohakku tu Bapak nanggo saotik pe. Mandok mauliate do au ala boi hutanda Debata Jahowa, i ma Bapak na parholong. Lao salpuhononna do sude na mambahen susa akka keluarga.