NA BOI MANGURUPI KELUARGA
Paboahon Taringot Minuman Beralkohol tu Gellengmuna
“Pitu taon ma umur ni borunami tikki parjolo hupaboa hami bahaya ni minuman beralkohol. Tarsonggot do hami mambege cerita ni ibana, ala dang hurippu hami naung godang diboto ibana taringot i.”—Si Alexander.
Na porlu diboto hamu
Penting paboahon bahaya ni minuman beralkohol tu gellengmuna. Unang sappe dung balga gellengmuna asa dipaboa hamu bahaya ni minuman beralkohol tu nasida. Si Khamit sian Rusia mandok, “Sian na gelleng dope ikkon hatop do paboaon ni natua-tua bahaya ni minuman beralkohol tu dakdanak. Parsiajaran na arga do on di au apalagi dung huboto nungnga jotjot minum minuman beralkohol anakku sian umur 13 taon.”
Boasa ikkon diparrohahon hamu on?
Boi do dongan sikkola, iklan, dohot TV mempengaruhi gellengmuna taringot minum minuman beralkohol.
Songon na didok Pusat Pencegahan dan Pengendalian Penyakit AS, sian godang ni parminum di Amerika Serikat, 11 persen ma akka dakdanak.
Alani i petugas kesehatan manjujui natua-tua asa paingotton gelleng ni nasida taringot bahaya ni minum minuman beralkohol. Songon dia ma bahenon ni natua-tua?
Na porlu diulahon hamu
Parade hamu ma dirimuna lao mangalusi sukkun-sukkun ni anakkonmuna. Biasana godang do sukkun-sukkun ni akka dakdanak. Jala lam tamba umurna, lam tamba ma muse sukkun-sukkunna. Alani i, porlu do natua-tua sai rade mangalusi sukkun-sukkun ni anakkon ni nasida. Contohna:
Molo lomo roha ni nasida mamboto songon dia dai ni minuman beralkohol, paboa hamu ma molo dai ni minuman anggur, songon jus buah adong asom-asomna, molo minuman bir adong paet-paetna.
Molo naeng diinum dakdanak alkohol, paboa hamu ma molo minuman i, dang denggan tu dakdanak. Paboa ma muse aha pengaruhna molo manginum i. Nang pe mulana songon na tabo alai molo pagodangku boi mambahen mirdong, ujungna mangulahon na so denggan jala marhata na roa ala nungnga mabuk.—Poda 23:29-35.
Porlu botoonmuna. Dipaboa Bibel, “Dipakke halak na marbisuk do parbinotoanna lao mangulahon ulaonna.” (Poda 13:16) Ikkon diboto hamu do pengaruh ni minuman beralkohol jala sian umur sadia i boi diinum di negaramuna. Molo dibahen hamu songon i, gabe lam diattusi hamu ma carana mangalusi gellengmuna.
Hamu ma parjolo manaringoti. Si Mark sahalak bapak di Inggris mandok, “Topik taringot minuman beralkohol dang mura diattusi dakdanak. Tikki husukkun anakku na marumur ualu taon taringot sala manang dang molo minum minuman beralkohol, rade do ibana paboahon na di rohana taringot i, ala denggan do carakku manukkun ibana.”
Lam jotjot dihatai hamu taringot minuman beralkohol, lam mura ma i diingot gellengmuna. Alani i jotjot ma hatai hamu i. Molo cocok situasina, boi do dihatai hamu taringot minuman beralkohol tikki hamu mangulas topik na asing na rikkot, uppamana taringot mamboan kendaraan manang taringot seks.
Gabe sitiruon ma hamu. Songon busa, mura do akka dakdanak manakkup na niidana. Penelitian mandok, sian natua-tua do unggodang pengaruh na ditakkup dakdanak. Alani i molo diida anakkonmuna hamu jotjot minum tikki stres manang tikki ponjot pikkiranmuna, dirippu nasida ma minuman beralkohol do ubat ni stres dohot akka masalah. Jadi gabe sitiruon ma hamu tu anakkonmuna. Unang ma pagodangku hamu minum minuman beralkohol.
Sian caramuna minum minuman beralkohol ma boi gellengmuna marsiajar taringot i