Aha do na Didok Bibel Taringot Muruk?

Na didok Bibel

Bibel paboahon molo muruk sasahalak jala dang boi diorom ibana i, boi do i parohon jea tu dirina sandiri dohot halak na asing. (Poda 29:22) Nang pe sittong alasanta muruk, alai Bibel mandok molo sai “muruk-muruk” hita dang boi hita parsidohot tu Harajaon ni Debata. (Galatia 5:​19-​21) Adong do piga-piga prinsip di Bibel na boi mangurupi sasahalak asa boi mangorom dirina tikki muruk.

• Sala do muruk?

• Muruk na songon dia do na sala?

• Boha do carana asa boi hamu mangorom dirimuna?

• Akka ayat ni Bibel na mambahas taringot muruk

Sala do muruk?

Daong. Sipata adong do alasan na sittong na mambahen gabe muruk sasahalak. Misalna hea do si Nehemia “muruk situtu” ala diboto ibana susa akka donganna dibahen halak na asing.​—Nehemia 5:6.

Debata pe hea do muruk. Misalna, ‘muruk do Jahowa tu halak Israel’ najolo ala disomba nasida akka debata na asing. Hape nungnga marjanji nasida, holan Jahowa do na lao disomba nasida. (Panguhum 2:​13, 14) Nang pe songon i dang parmuruk Jahowa. Molo muruk pe Ibana, pasti adong do alasanna jala boi do Ibana mangorom dirina.​—2 Musa 34:6; Jesaya 48:9.

Muruk na songon dia do na sala?

Molo dang boi taorom diritta tikki muruk jala dang sittong alasanta muruk, sala do i. Ala dang sempurna, jotjot do hita songon i. Misalna:

• Gabe “muruk situtu” ma si Kain ala dang dijalo Debata peleanna. Alani murukna, gabe dipamate ibana ma anggina.​—1 Musa 4:​3-8.

• Ala marasi ni roha Debata tu halak Ninive, gabe “massai muruk” ma Panurirang Jona tu Debata. Alani i didok Debata ma, “Boasa ma gabe muruk ho tu Au?” jala dipasingot Debata ma ibana asa marasi ni roha tu halak naung bertobat.​—Jona 3:⁠10–​4:​1, 4, 11.a

Sian akka contoh on boi ma taida toho do hata ni Bibel na mandok, “Halak na tarrimas dang diulahon i na sittong di jolo ni Debata.”​—Jakobus 1:​20.

Boha do carana asa boi hamu mangorom dirimuna?

• Ingot ma hagaleon do molo dang boi mangorom diri. Dirippu piga-piga halak, patuduhon na gogo manang na barani do hita molo boi mangamuk tikki muruk. Hape sasittongna sada hagaleon do molo dang boi sasahalak mangorom dirina tikki muruk. Bibel pe mandok, “Dos songon kota naung maruppak tembokna, songon i ma halak na mura-mura muruk.” (Poda 25:28; 29:11) Gariada molo boi hita mangorom diri tikki muruk on patuduhon halak na gogo jala na marbisuk do hita. (Poda 14:29) Bibel mandok, “Dumenggan do halak na so parmuruk sian sahalak bawa na gogo.”​—Poda 16:32.

• Manat ma asa unang sappe mangulahon na sala tikki muruk. Psalmen 37:8 mandok, “Unang ma muruk ho jala unang tarrimas. Unang ma jut roham, jala unang ma gabe diulahon ho na jahat.” Tikki muruk hita boi do tapillit asa unang sappe tarrimas jala ujungna gabe ‘mangulahon na jahat’. Songon na didok di Epesus 4:​26, “Molo muruk hamu, unang ma sappe mardosa.”

• Sebelum tarrimas hamu, lao ma sian i. Bibel mandok, “Molo dipukka parbadaan dos do i songon na mambukka bendungan, andorang so balga parbadaan, lao ma ho sian i.” (Poda 17:14) Memang ikkon hatop do tapasae parsoalatta dohot halak na asing. Alai asa boi denggan hita pasaehon i, tumagon do tapaima jolo tenang situasina.

• Lului ma hatorangan na sittong. Poda 19:11 mandok, “Molo marbisuk halak, dang mura ibana muruk.” Sebelum tabahen kesimpulan jolo talului ma hatorangan na sittong. Lam godang hatorangan na taboto taringot sada parsoalan, lam boi ma hita mangorom diritta.​—Jakobus 1:​19.

• Pangido ma dame ni roha sian Debata. Molo martangiang hamu, boi do ‘lehonon ni Debata tu hamu hadameon na so boi diattusi jolma’. (Pilippi 4:7) Tikki martangiang hita, tapangido ma asa dilehon Debata tondi parbadiana tu hita. Boi do tondi parbadia i mangurupi hita asa dame rohatta, sabar, jala boi mangarajai diri.​—Lukas 11:13; Galatia 5:​22, 23.

• Manat ma hamu mamillit dongan. Biasana mura do hita terpengaruh tu akka donganta. (Poda 13:20; 1 Korint 15:33) Alani i ma didok Bibel, “Unang ma marale-ale ho tu halak na mura-mura muruk, jala unang ma mardongan ho tu parmuruk-muruk.” Boasa? “Asa unang diihutton ho dalanna jala gabe tarjorat ho.”​—Poda 22:24, 25.