SUKKUN-SUKKUN NI AKKA NA POSO
Aha do Manfaatna Mamparsiajari Bahasa na Asing?
Molo diparsiajari hamu bahasa na asing, gabe boi ma diboto hamu halak na serep roha do hamu manang na dang jala dang mura menyerah. Memang dang mura mamparsiajari bahasa na asing, alai godang do na poso naung mandapot manfaat sian i. Di artikel on, dipaboa do boasa olo nasida marsiajar bahasa na asing.
Aha do alasanna?
Godang do na poso gabe marsiajar bahasa na asing, ala mata pelajaran wajib do i di sikkolana. Alai adong do muse alasan na asing. Contohna:
Si Anna, sahalak borua na poso na tinggal di Australia marsiajar bahasa Latvia. Didok ibana, “Naeng lao au dohot keluargakku tu Latvia. Jala lomo rohakku asa boi makkata-hatai tu keluargakku na adong disi.”
Sahalak Saksi Jahowa di Amerika Serikat na margoar si Gina, marsiajar Bahasa Isyarat Amerika (ASL) jala pinda tu Belize lao marbarita na uli. Didok ibana, “Biasana, holan otik do na boi marbahasa isyarat. Jadi tikki hudokkon na marsiajar ASL au asa boi mangajarhon taringot Bibel tu akka tunarungu, massai diargai akka halak do i.”
Diboto hamu do? Didok di Bibel, lao dipasahat ma barita na uli taringot Harajaon ni Debata tu akka halak sian saluhut “bangso, suku, marga, dohot bahasa”. (Pangungkapon 14:6) Saut do hata on di jamanta saonari. Godang do Saksi Jahowa na poso dope olo marsiajar bahasa na asing asa boi marbarita di negara ni nasida sandiri manang di negara na asing.
Aha do tantanganna?
Didok si Corrina, “Dang mura mamparsiajari bahasa na asing. Hurippu holan hata do na porlu huparsiajari. Hape ikkon huparsiajari do tong budaya ni halak na mamakke bahasa i dohot cara marpikkir ni nasida. Porlu do tikki lao marsiajar bahasa na asing.”
Asing ni i, ikkon serep do rohamuna. Si James na marsiajar bahasa Spanyol mandok, “Tikki mamparsiajari bahasa na asing, pasti godang do kesalahan na lao tabahen. Molo sala hamu, mekkel ma. Wajar do molo sala hita, goarna pe marsiajar.”
Intina: Asa malo ho marbahasa na asing, unang ma mura-mura menyerah jala unang maila.
Tips: Tikki marsiajar bahasa na asing, unang ma lungun roham molo ukkatop halak na asing ummalo sian ho. Didok di Bibel, “Ganup ma halak mamparrohahon ulaonna be. Dung i boi ma ibana marlas ni roha alani ulaonna i, dang ala paimbar-imbarhon tu ulaon ni halak.”—Galatia 6:4.
Aha do manfaatna?
Godang do manfaatna molo diparsiajari ho bahasa na asing. Misalna sahalak anak boru na margoar si Olivia mandok, “Molo marsiajar bahasa na asing ho, gabe luas ma pergaulanmu jala lam tamba ma donganmu.”
Menurut sahalak anak boru na margoar si Mary, gabe lam percaya diri do ibana ala marsiajar bahasa na asing. Didok ibana, “Molo najolo, huhilala dang adong na boi hubanggahon sian dirikku. Alai dung marsiajar bahasa na asing, bangga do au tu dirikku. Las hian do rohakku tikki marhasil au mangingot sada kata. Gabe lam percaya diri ma au.”
Si Gina naung dipaboa nakkin mandok, gabe tamba do las ni rohana melayani Jahowa ala marsiajar bahasa isyarat. Didok ibana, “Tikki marbahasa isyarat au tu akka tunarungu, huida ma las hian roha ni nasida. Pengalaman na luar biasa do on di au!”
Intina: Molo marsiajar bahasa na asing ho, gabe tamba ma donganmu, lam percaya diri, jala gabe tamba ma las ni roham melayani Jahowa. Gabe boi ma dipaboa ho barita na uli tu ‘sude bangso, suku, dohot bahasa’.—Pangungkapon 7:9.