Aha do Poti Parpadanan i?

Alus ni Bibel

Poti parpadanan, i ma poti na badia na dibahen halak Israel najolo ssmangihutton paretta ni Debata. Jala Debata do na manottuhon ikkon songon dia poti parpadanan i dibahen. Di poti parpadanan i ma disippan dua batu panuratan ni “patik”, i ma Patik na Sappulu i.—2 Musa 25:8-10, 16; 31:18.

• Ukkuran dohot bahanna. Ganjang ni poti i dua satonga asta, bidangna sada satonga asta, jala timbona sada satonga asta (111 x 67 x 67 cm.). Sian hau akasia do dibahen poti i, jala dilappis ma i sian bagasan dohot sian luar mamakke mas. Adong do bingkai di sakaliling ni poti i di bagian parginjangna. Sian mas murni do panutup ni poti i, jala adong do di ginjangna dua patung kerubim na sian mas. Marsiadop-adopan do patung kerubim i jala herbang do habongna tu ginjang manghukkupi panutup ni poti i. Adong do opat golang na sian mas di ginjang ni pat ni poti i. Jala adong do hau pangusung ni poti i sian hau akasia na dilappis mamakke mas. Dipamasuk ma hau pangusung i tu golang-golang na di sapping ni poti i, asa boi diangkat poti i.—2 Musa 25:10-21; 37:6-9.

• Ingananna. Mulana di Inganan na Massai Badia na di tabernakel do disippan poti i. Tabernakel, i ma kemah na boi diboan marpinda-pinda na gabe inganan ni halak Israel lao manomba Debata. Rap dibahen do tabernakel dohot poti i. Dibahen do muse tire pembatas lao manutupi Inganan na Massai Badia asa dang boi i diida akka malim dohot halak na asing. (2 Musa 40:3, 21) Holan sintua ni malim do na boi masuk tu Inganan na Massai Badia jala mangida poti parpadanan i sahali sataon, i ma di Ari Pardamean. (3 Musa 16:2; Heber 9:7) Di pudian ni ari, dipapinda ma poti parpadanan i tu Inganan na Massai Badia di bagas joro na dipajongjong ni si Salomo.—1 Raja-Raja 6:14, 19.

  

• Tujuanna. Inganan panippanan ni akka barang na badia do poti i. Boi do i paingotton halak Israel tu parjanjian na dibahen Debata tu nasida di Dolok Sinai. Jala penting hian do poti parpadanan i di Ari Pardamean.—3 Musa 16:3, 13-17.

• Isina. Dua batu panuratan ni patik do na parjolo dipamasuk tu poti parpadanan i. (2 Musa 40:20) Di pudian ni ari dipamasuk ma baskom na sian mas na marisi manna dohot “tukkot ni si Aron na hea martumbur”. (Heber 9:4; 2 Musa 16:33, 34; 4 Musa 17:10) Alai di pudian ni ari olo do ra dipakaluar baskom dohot tukkot ni si Aron sian poti i. Alana dung dipapinda poti i tu bagas joro, holan batu panuratan na dua i nama na adong disi.—1 Raja-Raja 8:9.

• Cara mamboan. Holan halak Lepi do na diloas lao mamboan poti parpadanan. Carana ikkon diangkat nasida ma hau pangusung ni poti na sian hau akasia i di pundak ni nasida. (4 Musa 7:9; 1 Kronika 15:15) Lokkot do torus hau pangusung i tu poti parpadanan i, jadi dang hea ditiop halak Lepi poti i. (2 Musa 25:12-16) Tikki diboan poti parpadanan i, ditutup ma i mamakke “tire pembatas” ni Inganan na Badia dohot Inganan na Massai Badia.—4 Musa 4:5, 6.a

• Lapatanna. Adong do hubungan ni poti parpadanan i tu haroro ni Debata. Misalna molo adong ombun di ginjang ni tutup poti parpadanan dohot di ginjang ni Tabernakel, on patuduhon na didongani jala dipasu-pasu Jahowa do nasida. Tikki adong ombun di ginjang ni Tabernakel, boi do i diida sian sude perkemahan ni halak Israel. (3 Musa 16:2; 4 Musa 10:33-36) Didok Bibel do muse Jahowa “martahta di ginjang ni akka kerubim”. Kerubim na didok di ayat on maksudna patung kerubim na di tutup poti i. (1 Samuel 4:4; Psalmen 80:1) Jadi “manggombarhon kareta ni Debata” do akka kerubim i. (1 Kronika 28:18) Alani i dung dipapinda poti parpadanan tu Jerusalem, didok Raja Daud hira na “tinggal di Sion” do Jahowa.—Psalmen 9:11.

• Fungsina. Adong do piga-piga istilah na dipakke Bibel lao mandokkon poti i. Misalna “poti inganan ni Patik”, “poti parpadanan”, “poti parpadanan ni Jahowa”, dohot “poti parpadanan na patuduhon na marhuaso do [Jahowa].”—4 Musa 7:89; Josua 3:6, 13; 2 Kronika 6:41.

  Tutup ni poti i digoari do “inganan pardamean”, manang “inganan hasesaan ni dosa”. (1 Kronika 28:11; Bibel siganup ari) Istilah on patuduhon adong do fungsi na asing tutup ni poti i di Ari Pardamean. Di ari i dipispisson sintua ni malim do mudar ni binatang na dipelehon di jolo ni tutup ni poti i. Diulahon sintua ni malim do i lao mangido asa “disesa dosana, dosa ni keluargana, dohot dosa ni bangso i.”—3 Musa 16:14-17.

Adong dope poti parpadanan i saonari?

Dang adong be poti i saonari. Ala dipakke tu parjanjian na leleng do poti parpadanan i, dang dihaporluhon be i. Alana didok Bibel na lao digatti do parjanjian na leleng tu “parjanjian na imbaru”, jala pelean tobusan ni Jesus ma na gabe fondasi ni parjanjian i. (Jeremia 31:31-33; Heber 8:13; 12:24) Sadalan do on tu surirang ni Bibel na mandok dang na lao adong be poti parpadanan i jala dang na lao masihol be naposo ni Debata tusi.—Jeremia 3:16.

Di sada parnidaan, diida Apostel Johannes ma poti parpadanan i di surgo. Di tikki i nungnga marlakku perjanjian na imbaru. (Pangungkapon 11:15, 19) Poti parpadanan na di parnidaan i, manggombarhon haroro ni Debata jala na dipasu-pasu Ibana do parjanjian na imbaru i.

Boi do gabe jimat poti parpadanan i?

Daong. Dang boi poti parpadanan padaohon sasahalak manang sada bangso sian akka masalah. Misalna tikki marporang halak Israel mangalo halak Ai, diboan nasida do poti parpadanan i. Alai talu do nasida ala adong halak Israel na so mangoloi hata ni Jahowa. (Josua 7:1-6) Di pudian ni ari, talu do tong nasida mangalo halak Palistim nang pe diboan nasida poti parpadanan i tu inganan ni nasida marporang. Ala mangulahon na jahat do malim ni halak Israel, i ma si Hopni dohot Pinehas umbahen na talu nasida. (1 Samuel 2:12; 4:1-11) Dibuat halak Palistim ma poti parpadanan i. Alai dibahen Debata ma nasida marsahit. Alani i dipaulak halak Palistim ma poti parpadanan i tu halak Israel.—1 Samuel 5:11–6:5.