Aha do Tondi i?

Na didok Bibel

Godang do terjemahan ni Bibel na mambahen hata Heber neʹfes dohot hata Junani psy·kheʹ gabe “tondi”. Alai sebenarna hata neʹfes lapatanna “makhluk na boi marhosa”, jala hata psy·kheʹ lapatanna “makhluk hidup”.a Jadi, tondi i manggombarhon jolma na mangolu, dang maksudna adong bagian sian daging ni jolma na toktong dope mangolu dung mate jolma i. Parrohahon ma songon dia Bibel paboahon molo “tondi” i sebenarna, i ma jolma na mangolu:

• Tikki ditoppa Debata Jahowa jolma na parjolo, i ma si Adam, didok do di Bibel molo jolma i “gabe martondi na mangolu”. (1 Musa 2:7, Lembaga Alkitab Indonesia) Dang dilehon Debata tu si Adam sada tondi, alai ibana do na gabe tondi manang gabe sahalak jolma na mangolu.

• Didok di Bibel molo tondi i boi do karejo, mangan, mangoloi paretta ni Debata, jala manjama bakke ni na mate. (3 Musa 5:2; 7:​20; 23:30; 5 Musa 12:20; Rom 13:1) Holan jolma na mangolu do na boi mangulahon sude ulaon i.

Boi do mate tondi i?

Boi do mate tondi. Godang do ayat ni Bibel na patuduhon molo tondi i boi mate. Parrohahon ma piga-piga ayat on:

• “Tondi ni manang ise na mardosa, ingkon i do mate.”​—Hesekiel 18:​4, 20, Lembaga Alkitab Indonesia.

• Didok di Bibel molo tondi i boi do mate.​—Hesekiel 13:18, 19, Lembaga Alkitab Indonesia.

• Godang do terjemahan ni Bibel na mamakke istilah “bakke ni halak na mate” manang “halak na mate” di akka ayat na di toru on. Alai molo di bahasa aslina, i ma di bahasa Heber, hata neʹfes manang “tondi” do na dipakke di akka ayat i.​—4 Musa 6:6, surat na di toru; Haggai 2:13, surat na di toru.

“Tondi” (neʹfes) boi do lapatanna “hosa”

Di Bibel diterjemahon do tong hata “neʹfes” manang “psy·kheʹ” gabe “hosa”. Misalna, di Job 33:22 hata Heber “neʹfes” diterjemahon gabe “hosa”. Songon na dipaboa di Bibel, boi do hosa manang hangoluan gabe terancam manang mago.​—2 Musa 4:​19; Panguhum 9:​17; Pilippi 2:​30.

Jadi hatorangan taringot “neʹfes” manang “psy·kheʹ” nakkin, boi mangurupi hita mangattusi akka ayat na mandok molo hosa i boi do “tos” manang mago. (1 Musa 35:18) Hata on manggombarhon, na boi do marujung ngolu ni sasahalak. Jala di Bibel siganup ari, hata “neʹfes” dohot “psy·kheʹ” na di 1 Musa 35:18 diterjemahon do gabe “mangullushon hosa parpudi”.

Sian dia do ajaran na mandok na so boi tondi i mate?

Dang sian Bibel ajaran taringot tondi na so boi mate na diajarhon godang halak Kristen, alai ajaran sian filsafat Junani kuno do i. Bukku Encyclopædia Britannica mandok, “Akka ayat ni Bibel na paboahon taringot tondi, sebenarna naeng paboahon taringot hosa manang hangoluan ni jolma. Dang naeng mandok na terpisah do tondi i sian daging ni jolma. Jadi molo adong na mangajarhon terpisah do tondi i sian daging, dang ajaran sian Bibel i alai ajaran sian Junani kuno do.”

Dang lomo roha ni Debata molo dicampur ajaran na sian Bibel tu filsafat ni jolma, termasuk ma ajaran taringot tondi na so boi mate. Alani i didok di Bibel, “Manat ma hamu tu akka halak na naeng mamparhatoban hamu marhite ajaran ni jolma. . . . Sian adat ni jolma dohot sian akka na mangarajai portibi on do i.”​—Kolosse 2:8.