Boasa Massai Maol Mambahen Portibi on Gabe Dame?

Na didok Bibel

Gagal do upaya ni jolma lao mambahen dame portibi on jala dang na lao marhasil i manang sadihari pe. On ma piga-piga alasanna:

• “Dang marhuaso jolma lao manottuhon lao tudia ibana mangalakka.” (Jeremia 10:23) Dang ditoppa jolma lao mamaretta manang mangarajai halak na asing. Jadi, dang na lao boi nasida mambahen dame portibi on salelengna.

• “Unang ma porsea hamu tu akka pamimpin, manang tu anak ni jolma na so boi mangalehon haluaon. Molo dung tos hosana, mulak tu tano do ibana, laos di tikki i salpu ma sude pikkiranna.” (Psalmen 146:3, 4) Akka pamimpin di portibi on dang boi pasaehon masalah na mambahen masa parporangan, nang pe adong sian nasida na burju.

• ‘Na ro ma tikki hasusaan di ari parpudi. Ai gabe parmuruk-muruk, makkasogohon na denggan, mangulahon na jahat tu donganna, sijogal rukkung, jala sombong do akka jolma di portibi on.’ (2 Timoteus 3:1-4) Mangolu di “tikki hasusaan di ari parpudi” do hita saonari. Ala godang halak na jahat, gabe maol do mambahen dame portibi on.

• “Marjea ma tano i dohot laut i! Ai nungnga turun Sibolis i tu ho, jala muruk situtu do ibana, ai nungnga diboto ibana otik nama tikkina.” (Pangungkapon 12:12) Nungnga didabuhon Sibolis tu tano on, jala holan di tano on nama ibana boi mangulahon ulaonna. Alani i, berupaya do ibana mempengaruhi akka jolma asa mangulahon na jahat songon ibana. Dang na lao boi dame ngolutta saleleng ibana dope “na mangarajai portibi on”.—Johannes 12:31.

• “Lao dihancurhon jala diropukkon [Harajaon ni Debata] do sude harajaon na parjolo i [na mangalo Debata]. Jala hot do harajaon i saleleng ni lelengna.” (Daniel 2:44) Holan Harajaon ni Debata do na boi mangalehon sude na dihaporluhon akka jolma jala parohon hadameon na martahan saleleng ni lelengna. Dang boi pamarettaon ni jolma mangulahon i.—Psalmen 145:16.