Toktong ma Utamahon Jahowa di Ngolumuna

1-2. Aha do biasana na mambahen hita dang mangulahon na uppetting di ngolutta?

BAYAKKON ma hamu mamboan mobil jala adong ma na manelepon hamu. Ra didok rohamuna, penting do telepon i. Alai, diboto hamu do ikkon fokus hamu mamboan mobil i. Dos songon i ma, godang do situasi di ngolutta na mambahen hita ikkon mamutusson na dia na parjolo ikkon taulahon.

² Godang do na ikkon taulahon jala penting do i sude. Alai na uppetting di hita, i ma ulaon manomba Jahowa.a (Mat. 6:33) Alani i ma dos songon na mamboan mobil nakkin, ikkon manat do tapikkirhon dia na parjolo ikkon taulahon. Tautamahon ma Jahowa di ngolutta.—Poda 4:25; Mat. 6:22.

3. Aha do na lao tabahas di artikel on?

³ Pasti lomo do rohatta mangutamahon Jahowa di ngolutta. Alai alani situasi, dang sai mura mangulahon i. (Luk. 21:​34-36) Jadi asa toktong hita mangutamahon Jahowa, tabahas ma: (1) Akka aha do na boi mambahen hita dang fokus melayani Jahowa? (2) Aha do na diulahon Jesus asa toktong mangutamahon lomo ni roha ni Jahowa? (3) Songon dia do hita maniru Jesus?

NA BOI MAMBAHEN HITA DANG FOKUS

4-6. Akka aha do na boi mambahen hita dang fokus melayani Jahowa?

⁴ Ganup ari, godang do na ikkon tapikkirhon. Misalna, taringot kesehatanta, kebutuhan ni keluargatta, manang kebutuhanta sandiri. Memang penting do sudena i. Alai molo dang manat hita, boi do gabe habis tikki dohot gogotta tusi. Jala molo nungnga songon i, gabe dang tautamahon be Jahowa.

⁵ Asing ni i di inganatta tinggal, olo do ra masa kerusuhan, maol mangalului hepeng, jala godang sahit. (2 Tim. 3:1) Tikki masa songon i, olo do ra gabe khawatir hita jala holan i ma torus na tapikkirhon.

⁶ Adong do muse halak na mangadopi sitaonon na massai borat. On mambahen nasida gabe marsak situtu. Wajar do i, ala sian mulana dang na lao susa hita ditoppa Jahowa. Alani i ma piga-piga halak merasa songon i nama torus ngolu ni nasida, dang boi gabe lam denggan. Ujungna, gabe godang ma dipahabis nasida tikkina lao marsonang-sonang dohot rekreasi. Songon i do tong situasimuna? Saonari, tabahas ma aha do na diulahon Jesus asa toktong mangutamahon Jahowa di ngoluna.

NA DIULAHON JESUS ASA TOKTONG FOKUS

7. Akka aha do na boi mambahen dang fokus Jesus melayani Jahowa?

⁷ Sasittongna, godang do na boi mambahen Jesus dang fokus melayani Jahowa. Gaor do situasi di tikki i, godang do halak na pogos dohot na marsahit. (Mat. 14:14; Mrk. 14:7) Godang do tong halak na susa ala dang adil pambahenan ni halak Rom dohot halak Jahudi na asing tu nasida. Alani i, tikki diida nasida boi Jesus mambahen mukjizat, naeng dibahen nasida ma ibana gabe raja. (Joh. 6:​14, 15) Jala muse, hea do Jesus digoda Sibolis. Ditawarhon ma sude harajaon di portibi on tu ibana. (Mat. 4:​8, 9) Bahkan Apostel Petrus pe hea do mandok hata na so sesuai tu lomo ni roha ni Jahowa. Didok ibana tu Jesus, “Asi ma roham tu dirim Tuan.”—Mat. 16:​21, 22.

8. Aha do na diulahon Jesus asa toktong mangutamahon lomo ni roha ni Jahowa?

⁸ Aha do na diulahon Jesus asa toktong mangutamahon lomo ni roha ni Jahowa? Adong tolu. Na parjolo, ditiru ibana do cara marpikkir ni Jahowa. (Joh. 8:28; 14:9) Na paduahon, toktong do diulahon ibana ulaon manomba Jahowa. (Mat. 9:35) Jala na patoluhon, diboto ibana do aha na uppetting ulahononna. (Joh. 4:34) Tikki digoda Sibolis ibana, pittor ditolak ibana do i. Jala tikki didok si Petrus hatana i, diboto Jesus do dang sesuai i tu lomo ni roha ni Jahowa. (Mat. 4:10; 16:23) Jadi dang diloas Jesus cara marpikkir, hata, dohot tindakan ni akka halak mambahen ibana dang fokus melayani Jahowa. Memang saonari, olo do ra dang sarupa situasi na taadopi songon na diadopi Jesus. Alai, boi do tatiru na diulahon Jesus asa toktong fokus melayani Jahowa.

TAUTAMAHON MA JAHOWA DI NGOLUTTA

9. Songon na dipaboa di Epesus 5:​17, aha do na ikkon taulahon?

⁹ Tiru ma cara marpikkir ni Jahowa. Molo berupaya hamu mangulahon i, gabe diboto hamu ma “lomo ni roha ni Jahowa”. (Jaha Epesus 5:17.) Asa diboto hamu lomo ni roha ni Jahowa, jaha ma Bibel jala rimangi ma i. Alai molo dang adong aturan na spesifik taringot situasimuna, aha do na porlu diulahon hamu? Toktong ma parsiajari Bibel asa lam diattusi hamu cara marpikkir ni Jahowa. Dung i, berupaya ma hamu mangulahon na diparsiajari hamu.

10. Aha do na porlu taulahon asa boi tatiru cara marpikkir ni Jahowa?

¹⁰ Asa boi tatiru cara marpikkir ni Jahowa, ikkon taparsiajari do Bibel. Jala tarimangi ma songon dia cara ni Jahowa maradoppon akka jolma. (Jer. 45:5) Tikki tajaha akka ayat ni Bibel, tapikkirhon ma akka sukkun-sukkun on: ‘Aha do na huparsiajari taringot Jahowa sian akka ayat na hujaha on? Aha do na porlu hupauba asa sesuai cara marpikkirhu tu cara marpikkir ni Jahowa?’ Memang, dao do untimbo pikkiran ni Jahowa sian pikkiranta. (Jes. 55:9) Alai, boi do tapangido tu Jahowa asa diurupi hita mangulahon lomo ni rohana. (Ps. 143:10) Asing ni i, tatangiakkon ma asa diurupi hita maniru cara marpikkirna.—1 Joh. 5:14.

11. Aha do na dipangido Jahowa sian hita?

¹¹ Lomo do roha ni Jahowa asa rade hita tikki ro arina. Jadi, dipaingot do hita asa unang lupa tu aha na uppetting di ngolutta. (Mat. 24:44) Dang lomo roha ni Jahowa molo pakhawatirhu hita taringot parngoluotta. Alana, boi do i mambahen hita gabe marsak. (Mat. 6:​31, 32) Alani i ma dilehon Jahowa do nasehat tu hita. Tujuanna, asa taboto aha na ikkon taulahon tikki khawatir hita mamikkiri kesehatanta, karejotta, jabutta, manang keluargatta. Molo tapangido bisuk dohot gogo sian Jahowa, pasti lehononna do i tu hita.—Ps. 55:22; Poda 3:​5-7.

12. Asa unang pakhawatirhu hita, aha do na porlu taulahon? (Mateus 5:3)

¹² Torus ma taulahon ulaon manomba Jahowa. Godang do situasi di portibi on na mambahen hita khawatir, jala dang boi takendalihon akka situasi i. Alani i, asa unang pakhawatirhu, toktong ma taulahon ulaon manomba Jahowa. Molo taulahon i, pasti las do rohatta ala mangulahon i do hita ditoppa Jahowa. (Jaha Mateus 5:3.) Misalna, taparsiajari ma Bibel jala berupaya ma hita mangulahon tugas sian Jahowa sian nasa gogotta. Pos ma rohatta, pasti las do roha ni Jahowa molo taulahon i. Alana, marbisuk do hita mamakke tikkitta.—Poda 23:15.

13. Boha do carana asa ‘denggan tapakke tikkitta’?

¹³ Sude do hita berupaya asa ‘denggan mamakke tikkitta’. (Eps. 5:​15, 16) Na dimaksud disi, dang holan taringot caratta mangatur tikki lao mangulahon ulaon siganup ari. Alai, dipaingot do hita asa denggan mamakke tikki andorang so ro ari ni Jahowa. Songon dia cara mangulahon i? Tabatasi ma tikkitta lao manonton, mambege, dohot manjaha akka barita na so denggan. Alana molo pagodangku habis tikkitta tusi, boi do gabe dang fokus hita melayani Jahowa, metmet rohatta, jala hurang semangat manomba Ibana. Tumagon do talehon godang tikkitta lao mangulahon ulaon manomba Jahowa. Tapikkirhon ma aha na boi taupayahon di ulaon marbarita. Misalna, tajuppangi ma muse akka halak na hea takabari. Talului ma kesempatan lao mangurupi akka halak ‘asa malua jala boi mandapot parbinotoan na bagas taringot tu hasittongan i’.—1 Tim. 2:4.

14. Aha do manfaatna molo torus taulahon ulaon manomba Jahowa? (Ida gambar.)

¹⁴ Saonari, godang do masa kerusuhan, kelaparan, dohot sahit. Taboto do sudena i menggenapi surirang ni Bibel. Alai, toktong ma taulahon ulaon manomba Jahowa. Molo taulahon i, dang pakhawatirhu be hita mamikkiri sudena i. Alana taboto, pasti dipaujung Jahowa do sude hasusaan na masa di portibi on. Jala pos ma rohatta, urupan ni Jahowa do hita asa martahan jala toktong tenang.—Ps. 16:8; 112:​1, 6-8.

15. Aha do na ikkon taulahon jala boasa? (1 Petrus 4:7)

¹⁵ Sai taingot ma aha na uppetting di ngolutta. Godang do halak saonari na pahabisson tikkina holan lao marsonang-sonang dohot rekreasi. Dang diparrohahon nasida akka bukti na patuduhon na lao marujung portibi on. Memang dang sala rekreasi. Alai, ikkon “marroha” do hita. (Jaha 1 Petrus 4:7.) Molo marroha hita, gabe denggan ma tapakke tikkitta. Dang olo hita pahabisson tikki dohot gogotta holan lao rekreasi. Molo denggan tapakke tikkitta, on patuduhon na tatiru do cara marpikkir ni Jahowa jala taboto aha na uppetting di ngolutta.—2 Tim. 1:7.

16. Aha do na sai diingot Jesus?

¹⁶ Sai diingot Jesus do aha na uppetting di ngoluna. Bahkan piga-piga jom andorang so mate ibana, diingot ibana do na uppetting, i ma toktong setia jala mangulahon lomo ni roha ni Jahowa. Alani i ma torus do Jesus martangiang tikki i. Alai molo akka siseanna, dang songon i. Tarpodom do nasida, “ai nungnga loja nasida alani marsakna”.—Luk. 22:​39-46; Joh. 19:30.

17. (a) Aha do na mambahen godang halak pahabisson tikkina mamakke media sosial? (b) Aha do na porlu taingot tikki tapakke media sosial? (Ida gambar.)

¹⁷ Dos songon akka sisean ni Jesus, olo do sipata marsak jala loja hian tahilala. Akka na masa di portibi on boi mambahen hita khawatir. Asa unang sai marsak, godang do halak na pahabisson tikkina mamakke media sosial. Dikirim nasida ma poto dohot akka barita tu akka donganna manang tu keluargana. Lomo do tong roha ni nasida manonton godang film dohot margame. Gabe habis ma tikki dohot gogona mangulahon i ganup ari. Asa unang sarupa hita songon nasida, tapikkirhon ma sukkun-sukkun on: ‘Tikki hupakke media sosial, gabe las do rohakku manang gabe lupa do au tu aha na uppetting?’

18. Boasa ikkon manat hita tikki naeng mamillit hiburan?

¹⁸ Dang sala molo tapakke tikkitta lao bersantai manang menikmati hiburan. Alai, ikkon manat do hita tikki mamillit game manang film na lao tatonton. Biasana dung sae hita manonton sada video pendek, muncul do video na asing. Jala gabe targoda do ra hita lao mangida akka video i. Hape bisa jadi, akka video i patuduhon kekerasan manang akka na so suman. I ma na masa tu sahalak donganta bawa na sian Asia. Mulana, holan akka video pendek do na ditonton ibana. Alai, muncul ma muse akka video na asing di layarna jala ditonton ibana ma i sude. Hape adong video na ditontonna i na patuduhon akka na so suman. Ujungna, gabe manonton pornografi do ibana. Alai, diurupi akka sintua dohot akka dongan di huria ma ibana. Gabe boi ma dipaso ibana hasomalan na so denggan i. Dihapus ibana ma piga-piga aplikasi sian handphonena, jala dibatasi ibana ma tikkina lao mamakke handphone. Sian pengalaman on, taboto ma ikkon manat do hita tikki naeng mamillit hiburan.

19. Aha do akibatna molo pagodangku habis tikkitta tu rekreasi?

¹⁹ Ikkon manat do tong hita tikki mambahen keputusan taringot rekreasi. Memang, sude do hita porlu bersantai jala istirahat sian sude ulaonta. Alana, on boi mangurupi hita asa toktong sehat. Alai, unang ma gabe habis tikkitta holan lao tu rekreasi. Alana, on boi mambahen hita gabe lupa tu na uppetting di ngolutta. (Plp. 1:10) Alani i, ikkon taputusson do aha na lao ulahononta jala sadia godang tikkitta lao mangulahon i. Alai, jolo pikkirhon ma sukkun-sukkun on: ‘Pagodangku do habis tikkikku lao rekreasi? Aha do na uppetting di ngolukku? Rade do au tikki ro ari ni Jahowa?’

20. Aha do manfaatna molo toktong fokus hita melayani Jahowa?

²⁰ Unang ma tapaloas manang aha pe mambahen hita dang fokus melayani Jahowa. (Jes. 48:17) Molo diurupi Jahowa hita, pasti boi do hita martahan mangadopi sitaononta. Jala dang pakhawatirhu be hita mangida na masa saonari on. Asing ni i, dang olo hita pahabisson godang tikki holan lao tu rekreasi. Jadi berupaya ma hita maniru cara marpikkir ni Jahowa, toktong ma taulahon ulaon manomba Jahowa, jala sai taingot ma aha na uppetting di ngolutta. Molo taulahon i, boi ma fokus hita melayani Ibana jala tadapot ma “hangoluan na saleleng ni lelengna di ari na naeng ro”.—1 Tim. 6:19.