Tikki Dang Setia be Pasanganta

“Tikki didok suamikku tinggalhononna nama au alani borua na upposo, naeng mate ma huhilala. Didok rohakku dang adil on, tarlumobi molo huingot pengorbananku tu ibana.”—Si Maria, Spanyol.

“Toppu ma au ditinggalhon istrikku, hira naeng mate ma huhilala. Hancur ma sude harapan dohot rencananami. Sipata boi do hulupahon na masa i, alai dang leleng dukkon i pasti lungun do muse rohakku.”—Si Bill, Spanyol.

PASTI marsak hian do hita molo dang setia be pasanganta. Memang adong do na mamillit dang manirakkon pasanganna na so setia, ala olo muba pasanganna i jala berupaya asa denggan muse hubungan ni nasida.a Alai pasti haccit do roha ni sasahalak molo dang setia pasanganna, dang soal gabe marsirang nasida manang na dang. Molo songon i na dihilala hamu, aha do na boi diulahon hamu?

AYAT NI BIBEL NA BOI MANGURUPI

Godang do halak na so setia pasanganna makkilala boi do akka ayat ni Bibel mangapuli roha ni nasida. Alana boi do i mangurupi nasida mamboto na diida Debata do ilu-ilu ni nasida jala diattusi Ibana do pakkilalaan ni nasida.—Maleaki 2:13-16.

“Tikki marsak situtu rohakku, diapuli Ho do au jala dibahen Ho do las rohakku.”—Psalmen 94:19.

Didok si Bill, “Tikki hujaha ayat on, hubayakkon ma Jahowa songon sahalak ama na parasi roha na mangubati rohakku.”

“Setia do Ho tu halak na setia.”—Psalmen 18:25.

Nungnga selingkuh suami ni si Carmen saleleng piga-piga bulan. Didok ibana, “Dang setia be suamikku. Alai pos do rohakku, setia do Jahowa tu au. Dang tinggalhononna au.”

“Unang ma holsohon hamu manang aha, alai pangido hamu ma saluhutna tu Debata marhite tangiang dohot elek-elek. . . . Asa marhite Kristus Jesus, lehonon ni Debata ma tu hamu hadameon na so boi diattusi jolma, na boi manjaga roha dohot pikkiranmuna.”—Pilippi 4:6, 7.

Didok si Sasha, “Sai mulak-ulak do hujaha ayat on. Jala sai torus do au martangiang. Gabe boi ma huhilala dilehon Debata do tu au dame ni roha.”

Akka halak na dipaboa pengalamanna dison, hea do makkilala hira na so marlapatan be ngoluna. Alai pos do roha ni nasida tu Jahowa jala boi do nasida togu muse ala manjaha Bibel. Didok si Bill, “Nang pe haccit huhilala, boi do gabe martujuan ngolukku alani haporseaokku. Nang pe hea au mardalan ‘di rura na massai golap’, didongani Debata do au.”—Psalmen 23:4.

a Lao mandapot hatorangan taringot mamillit marsirang manang na dang, ida ma di Sedarlah! 22 April 1999, “Bila Teman Hidup Berselingkuh.”

Na Boi Mangurupi Hamu Asa Unang Mandele

Mangarimangi akka ayat ni Bibel.

Didok si Bill, “Hujaha ma bukku Job dohot Psalmen. Hutandai ma bagian na cocok tu situasi na huadopi. Gabe huboto ma, akka halak na disurat di Bibel pe hea do makkilala lungun ni roha dohot arsak ni roha songon na huhilala.”

Mambege musik.

Didok si Carmen, “Molo dang boi au modom, hubege ma musik. Gabe tenang perasaakku mambege i.” Didok si Daniel, “Marsiajar margitar ma au. Gabe dame do pakkilalaakku tikki hubege soara ni gitar i.”

Paboa ma pakkilalaanmuna.

Didok si Daniel, “Sasittongna, dang somal au paboahon pakkilalaakku tu na asing. Alai adong do piga-piga donganku na burju, jala ganup ari do au makkatai dohot nasida. Hupaboa ma pakkilalaakku tu nasida marhite surat manang langsung makkatai tu nasida. Gabe lubbang ma pakkilalaakku.” Si Sasha mandok, “Keluargakku do na unggodang mangurupi au. Sai diparrohahon omakku do au. Molo adong naeng hupaboa, rade do ibana manangihon. Bapakku pe, sabar do mangurupi au jala huhilala do holong ni rohana tu au.”

Toktong ma martangiang.

Didok si Carmen, “Sai martangiang do au. Dang hea ditinggalhon Debata au. Ditangihon Ibana do au jala diurupi. Tikki mangadopi hasusaan, hupajonok do dirikku tu Debata.”