Takkas do Ditanda Hamu Debata?

Godang do halak porsea na adong do Debata. Alai molo disukkun tu nasida takkas do ditanda hamu Debata, marasing-asing do alusna. Adong na mandok, panguhum na kejam do Debata i. Molo sala hita, pittor dihukum do. Na asing mandok, parholong do Debata. Molo taulahon pe na sala, sai disesa do dosanta. Adong muse na mandok, dang parduli Debata tu jolma. Ala marasing-asing do pandapot ni halak taringot Debata, godang do na mandok dang boi takkas tatanda Debata.

Rikkot do mananda Debata? I do. Molo takkas tatanda Debata, gabe lam martujuan ma ngolutta. (Ulaon ni Apostel 17:26-28) Molo tapajonok diritta tu Debata, lam holong ma rohana tu hita jala rade ma ibana mangurupi hita. (Jakobus 4:8) Jala na rumikkot, molo takkas tatanda Debata boi ma hita mangolu saleleng-lelengna.—Johannes 17:3.

Songon dia do carana mananda Debata? Adong do ra halak na kompak tu hamu. Boasa ma boi gabe kompak hamu tu ibana? Pasti ala nungnga diboto hamu ise goarna, songon dia sifatna, lomo ni rohana dohot na mambahen sogo rohana. Diboto hamu ma muse akka naung diulahon ibana dohot akka rencanana. Ala nungnga diboto hamu i sude, gabe lam kompak ma hamu tu ibana.

Dos songon i ma, molo naeng jonok hita tu Debata porlu do taboto:

• ISE DO GOAR NI DEBATA?

• SONGON DIA SIFATNA?

• AKKA AHA DO NAUNG DIULAHON IBANA?

• AKKA AHA DO NA LAO DIULAHON IBANA?

• AHA DO MANFAATNA MOLO TAKKAS TATANDA DEBATA?

Di majalah on, dipaboa do alus ni akka sukkun-sukkun i sian Bibel. Boi do alusni sukkun-sukkun i mangurupi hita lam mananda Debata. Jala gabe taboto ma aha do manfaatna molo jonok hita tu Debata.