45 SI PETRUS
“Jolma Pardosa do Au”
SAHALAK pekerja keras do si Petrus. Manjala dekke do karejona rap dohot keluargana. Marhaha maranggi do ibana dohot si Andreas. Si Petrus on halak na barani, hatop bertindak, jala pittor paboahon aha na adong di bagas roha dohot pikkiranna. Contohna, di sada tikki ro ma si Andreas mandapotton ibana jala didok ma, “Nungnga juppangnami Messias i.” Dung dibege si Petrus hatana i, pittor lao ma ibana mandapotton Jesus jala mulai sian i, gabe sisean ni Jesus ma ibana.
Piga-piga bulan dukkon i, ro ma Jesus tu Kapernaum tu huta ni si Petrus. Di tikki i, diida Jesus ma nga loja hian si Petrus. Alana nungnga saborngin ibana manjala dekke alai dang adong dapotna manang aha. Alani i, didok Jesus ma tu si Petrus asa diboan parauna tu aek na bagas jala dipaturun jalana disi. Di mulana ragu do si Petrus. Alana molo nungnga torang ari biasana dang boi be dapot dekke. Didok si Petrus ma tu Jesus, “Nungnga loja hami saborngin on, alai dang adong manang aha dapotnami.” Nang pe songon i, dioloi si Petrus do hata ni Jesus i. Dukkon i, toppu ma gok dekke di jala ni nasida. Dijou nasida ma donganna sian parau na asing asa ro mangurupi. Sappe naeng lonong ma duassa parau i alani godang ni dekke i! Gabe longang ma si Petrus jala mabiar. Alani i pittor marsinggang ma ibana di jolo ni Jesus jala didok ma, “Lao ma ho sian labbungkon Tuan, ai jolma pardosa do au.” Didok roha ni si Petrus dang tama ibana rap dohot Jesus, alana Jesus i Anak ni Debata jala boi mambahen akka mukjizat. Alai dipapos Jesus do roha ni si Petrus, didok ma, “Unang pola mabiar ho. Mulai sian saonari, gabe sijala jolma nama ho.”
Godang do diida Jesus akka sifat na denggan sian si Petrus. Alani i ma di pudian ni ari, dipillit Jesus do ibana gabe sada sian akka apostelna. Jotjot do si Petrus patuduhon habaranion. Misalna, tikki adong hata ni Jesus na so diattusi akka siseanna, si Petrus do na jotjot mangido tu Jesus asa dipatorang tu nasida lapatan ni hatana i. Asing ni i, tikki mardalan Jesus di atas ni aek, holan si Petrus do na barani mardalan di atas ni aek i lao mandapotton Jesus.
Jotjot do asal dipandok si Petrus hatana. Alai olo do ibana manjalo sipasingot jala muba, nang pe dang mura mangulahon i
Dipatudu si Petrus do tong habaranion tikki dipasingot Jesus ibana. Dang songon godangan halak, dang maila si Petrus mangakkui kesalahanna jala olo muba. Di sada tikki didok Jesus do tu akka siseanna, na lao dibunu do ibana. Alai didok si Petrus do tu Jesus, “Asi ma roham tu dirim Tuan.” Dang sesuai hata ni si Petrus i tu lomo ni roha ni Jahowa. Alani i, didok Jesus ma tu si Petrus molo hatana i sarupa songon hata ni Sibolis. Dang holan di peristiwa i si Petrus dipasingot Jesus. Alai ala serep do roha ni si Petrus, olo do ibana manangihon sipasingot sian Jesus.
Di borngin sebelum mate Jesus, naeng diajari Jesus do akka apostelna rikkot ni patuduhon serep ni roha. Alani i, disussi ibana ma pat ni akka apostelna i songon na somal diulahon sahalak hatoban. Alai diorai si Petrus do Jesus mangulahon i, jala didok ibana do, “Dang loasokku sussionmu pattu, Tuan.” Gabe dipasingot Jesus do si Petrus, “Molo dang husussi patmi, dang boi ho rap dohot au.” Dung i didok si Petrus ma muse, “Tuan, unang ma holan pattu sussi dohot ma tanganku nang ulukku.” Gabe dipasingot Jesus ma muse ibana. Dukkon i, didok Jesus ma na lao tinggalhonon ni akka apostelna i do ibana. Didok si Petrus ma tu Jesus, “Nang pe sude nasida manadikkon ho, alai anggo au dang na lao tadikkonokku ho.” Alai didok Jesus do, di borngin i sappe tolu hali ma didok si Petrus dang ditanda ibana Jesus.
Piga-piga jom dukkon i, ro ma akka tentara jala ditakkup ma Jesus. Barani do si Petrus mangihutton nasida sian na dao. Diboan nasida ma Jesus tu jabu ni sintua ni malim, jala disi dituduh akka halak do Jesus jala didok marsala. Di tikki i, di alaman ni jabu i do si Petrus. Adong ma piga-piga bawa dohot borua na disi mandok molo si Petrus i sisean ni Jesus. Alai sappe tolu hali do didok si Petrus na so ditanda ibana Jesus. Gabe saut ma hata ni Jesus i!
Dung kaluar Jesus sian jabu ni sintua ni malim i, diida ibana ma doppak si Petrus. Gabe lungun ma roha ni si Petrus. Alani i, gabe “lao ma ibana tu luar jala sai tangis ma ibana”. Piga-piga jom dukkon i, tamba lungun do roha ni si Petrus dung mate Jesus sahabatna i. Alai nang pe diulahon si Petrus kesalahan na balga, torus do ibana melayani Jahowa jala dijuppangi ibana do akka apostel na asing. Dung dipahehe Jesus, dijuppangi ibana do si Petrus. Memang, dang dipaboa di Bibel aha na didok Jesus tu si Petrus. Alai pasti dipatogu do roha ni si Petrus, jala las do rohana ala naung diampuni Jesus ibana.
Piga-piga minggu dukkon i, tikki pajuppang Jesus dohot akka apostelna di Laut Galilea, dipatudu Jesus do haburjuon tu si Petrus. Sebelumna, sappe tolu hali do didok si Petrus dang ditanda ibana Jesus. Alani i, dilehon Jesus ma tolu hali kesempatan tu ibana lao patuduhon holongna tu Jesus. Dukkon i, dilehon Jesus do tugas na massai penting tu si Petrus. Didok ibana, “Lehon ma mangan anak ni biru-birukki.” Di Pasal 49, lao taparsiajari ma songon dia si Petrus mangoloi Jesus jala songon dia ibana patuduhon habaranion sahat tu ujung ni ngoluna.
Jaha ma ceritana di:
Na lao dibahas:
Sian peristiwa on, boha do cara ni si Petrus patuduhon habaranion?
Bagas ma Parsiajari
1. Aha do na diulahon si Petrus tikki gabe panjala dekke? (it “Marburu Dohot Manakkup Dekke” ¶6-7-wcgr) A
Gambar A
2. Boasa dibahen Jesus goar ni si Simon gabe si Kepas (si Petrus)? (keterangan tambahan tu “si Simon do ho” di Johannes 1:42, nwtsty-wcgr)
3. Boasa dipakke Jesus hata “sijala jolma” tikki manogihon si Petrus dohot si Andreas asa mangihutton ibana? (Mat. 4:18-20; w16.05 10 ¶3-4) B
Gambar B
4. Sebelum naik Jesus tu surgo, disukkun ibana do tu si Petrus, “Umbalga do holong ni roham tu au sian apala akka on?” Aha do maksud ni sukkun-sukkun ni Jesus i? (keterangan tambahan tu “umbalga do holong ni roham tu au sian apala akka on?” di Johannes 21:15, nwtsty-wcgr)
Pikkirhon ma Aha Parsiajaranna
Molo berjuang dope hamu mangatasi kelemahanmuna, songon dia do teladan ni si Petrus boi mangurupi hamu asa toktong manomba Jahowa? C
Gambar C
Aha do manfaatna tu hamu, molo dirimangi hamu songon dia Jahowa dohot Jesus rade mengampuni si Petrus?
Songon dia do caramuna maniru habaranion na dipatudu si Petrus di kisah on?
Rimangi ma
Sian kisah on, aha do na boi huparsiajari taringot Jahowa?
Aha do hubungan ni kisah on tu janji ni Jahowa taringot Paradeiso?
Sian kisah on, aha do na mambahen las rohamuna ala dohot si Petrus dipillit gabe dongan ni Kristus mamaretta di surgo?
Ida ma Muse on
Songon dia do akka natua-tua mamakke contoh ni si Petrus lao mangajari akka ianakkon nasida taringot asi ni roha ni Jahowa?
Pikkirhon ma boasa toktong setia si Petrus nang pe akka sisean na asing maninggalhon Jesus.