“Dioloi Ibana do Jahowa sian Nasa Rohana Saleleng ni Ngoluna”

IKKON dipatudu Raja Asa do habaranion saleleng ni ngoluna. Tikki baru mamaretta ibana di Juda, ditiru ibana do habaranion songon na dipatudu Raja Daud. Songon si Daud, lomo do roha ni si Asa mambahen las roha ni Jahowa. Serep do roha ni si Asa. Ditangihon ibana do nasehat ni akka panurirang ni Jahowa, songon si Oded dohot si Azaria. Tikki dang setia be Raja Salomo tu Jahowa, godang do akka na jahat na diulahon bangso i. Alai dipatudu si Asa do habaranion. Misalna, dihancurhon ibana do akka patung na disomba bangso i, jala dipalao ibana do akka bawa na mangulahon seks dohot bawa di bagas joro.

Dang holan i, dipasae si Asa do tong masalah na dibahen keluargana. Aha ma i? Dibahen si Maaka oppung boruna do akka patung na dihagigihon Debata. Olo do ra tujuanna, lao manjujui bangso i asa dohot mangulahon seks na so patut. Alai, umholong do roha ni si Asa tu Jahowa sian apala tu keluargana. Dipaturun ibana do oppung boruna i sian pangkatna gabe ratu di Juda. Jala dihancurhon si Asa do akka patung na dibahen oppungna i. Ala songon i dibahen si Asa, gabe las ma roha ni Jahowa, jala dipasu-pasu ma bangso i. Saleleng sappulu taon dang hea masa porang di Juda. Alai di pudian ni ari, adong do muse situasi na mambahen si Asa ikkon barani.

Ro ma sajuta tentara ni Etiopia naeng menyerang Juda. Pasti tarsonggot do Raja Asa tikki mangida i. Sebelumna, nungnga jotjot naposo ni Jahowa marporang mangalo bangso na asing. Alai songon na disurat di Bibel, sian sude musu na hea dialo nasida, on ma jumlah ni musu na unggodang. Hape di tikki i, dang sappe 600.000 tentara ni si Asa. Aha do na diulahon ibana asa barani melindungi rakyatna?

Tikki diida si Asa naung marbaris akka tentara ni Etiopia i di lembah na di Juda, pittor martangiang ma ibana tu Jahowa. Didok ibana do, “Ale Jahowa, dang maol di Ho mangurupi na gogo manang na so margogo. Urupi ma hami ale Jahowa Debatanami, ai Ho do na hupangasahon hami. Jala di bagasan goarmu do hami mangalo natorop on. Ale Jahowa, Ho do Debatanami. Unang ma pasombu monang jolma mangalo Ho.” Bayakkon ma perasaan ni akka tentara ni si Asa tikki mambege tangiang i. Jala pasti las do roha ni Jahowa tu tangiang ni si Asa na dipasahat sian ias ni rohana. Barani do si Asa songon si Jonatan anak ni Raja Saul. Diboto nasida na dua do, molo diurupi Jahowa nasida dang porlu nasida mabiar tu akka musu, nang pe unggodang jumlah ni akka musu dibandingkon nasida. (1 Sam. 14:6) Takkas ma, molo diurupi Jahowa hita pasti boi do hita monang. Alana unggodang do na mandongani hita dibandingkon akka musu!

Dipimpin si Asa ma akka tentarana tu parporangan. Aha do na masa? Bibel mandok, ‘Jahowa dohot akka tentarana do na mangalo tentara ni Etiopia i.’ Dipamate ma nasida jala dang adong nanggo sada pe na selamat.

Dukkon i, ditogihon si Asa do sude bangsona asa mulak muse manomba Jahowa. Godang do halak na sian harajaon sappulu marga di Israel na pinda tu Juda asa boi muse manomba Jahowa di bagas joro na di Jerusalem. Dung i, dipapungu si Asa do akka halak na di Juda lao mambahen perjanjian. Marjanji do nasida asa toktong setia manomba Jahowa.

Alai, dipaboa do tong di Bibel na hea do si Asa mambahen piga-piga kesalahan na balga. Misalna, tikki ro raja ni Israel naeng menyerang Juda, dang dipangido si Asa bantuan ni Jahowa. Gariada dilehon ibana do hepeng tu raja ni Siria asa menyerang Israel. Jala tikki disuru Jahowa Panurirang Hanani lao pasingotton si Asa, muruk do si Asa jala dipamasuk do panurirang i tu penjara. Dung matua, marsahit na parah do si Asa. Alai pangubati do na dilului ibana, dang Jahowa. Aha do na boi taboto sian on? Ra, dang dijaga si Asa haporseaonna tu Jahowa toktong togu.

Alai, Debata parasi roha do Jahowa. Dung mamaretta si Asa saleleng 41 taon, didok do di Bibel taringot ibana, “Dioloi [si Asa] do Jahowa sian nasa rohana saleleng ni ngoluna.” Sian kisah ni si Asa taboto ma, na massai holong do roha ni Jahowa tu akka halak na makkaholongi Ibana. Alai dipaingot do tong hita, asa unang lupa tu sude naung hea dibahen Jahowa lao mangurupi hita. Molo torus tasomba Jahowa jala taingot songon dia Jahowa nungnga mangurupi hita, gabe lam togu ma haporseaotta jala lam barani ma hita!

Jaha ma ceritana di:

• 1 Raja-Raja 15:​8-24

• 2 Kronika 14:1–16:14

Na lao dibahas:

Boha do cara ni si Asa patuduhon habaranion?

1. 2. Ise do hira-hira anak ni Panurirang Hanani, jala songon dia do anakna i patuduhon habaranion sarupa songon bapakna? (it “Si Hanani” No. 2-wcgr)

   Alusmuna

2. 3. Nang pe hea dibahen si Asa kesalahan, alai aha do na diulahon si Asa na patuduhon “dioloi ibana do Jahowa sian nasa rohana”? (1 Raj. 15:14; w17.03 16 ¶5-6)

   Alusmuna

3. 4. Diruppakkon si Asa do sude “inganan panombaon” di Israel? (2 Kron. 14:​2-5; 15:17; w05 1/12 20 ¶3-wcgr)

   Alusmuna

Pikkirhon ma Aha Parsiajaranna

• Ala dipatogu Panurirang Azaria, gabe taronjar ma roha ni si Asa lao mangurupi bangsona asa mulak muse manomba Jahowa. Songon si Azaria, boha do caramuna patoguhon halak na asing? B

  Alusmuna

  

• Diandalhon si Asa do Jahowa tikki naeng manaluhon tentara na massai godang. Alai di pudian ni ari, tikki mangalo tentara na ummotik jumlahna, jolma do na diandalhon si Asa. Sian kisah on, boasa massai penting asa toktong mangandalhon Jahowa di sude na taulahon? (Poda 3:​5, 6)

  Alusmuna

• Songon dia do caramuna maniru habaranion ni si Asa?

  Alusmuna

Rimangi ma

• Sian kisah on, aha do na boi huparsiajari taringot Jahowa?

  Alusmuna

• Aha do hubungan ni kisah on tu janji ni Jahowa taringot Paradeiso?

  Alusmuna

• Aha do na lao husukkun annon tu si Asa molo nungnga dipahehe ibana?

  Alusmuna

Ida ma Muse on

Molo di negaramuna bebas dope hamu manomba Jahowa, boha ma caramuna asa denggan mamakke tikki, songon na diulahon si Asa?

“Marbisuk Saleleng Masa Hadameon” (w20.09 14-19)

Ikkon berjuang do hita lao mangulahon lomo ni roha ni Jahowa. Asa boi toktong setia tikki menghadapi tantangan, aha do na boi tatiru sian si Asa?

“Pasu-pasuonna do Ulaonmuna” (w12 15/8 8-10-wcgr)