Malo ni Biwara Mambangun Bendungan

Hea do diida akka peneliti bendungan na dibangun biwara ganjangna 850 meter jala timbona 5,3 meter. Boha do cara ni biwara boi mambangun bendungan na songon i balgana?

Parjolo-jolo ditaba biwara ma hau na diameterna hurang sian 30 sentimeter jala diponggoli ma i. Dung i dionjar nasida ma akka hau na borat i tu dasar ni sunge lao gabe akka tiang ni bendungan. Dipamasuk nasida ma dakka ni hau dohot ramba-ramba tu holang-kolang ni akka tiang i. Diganjal nasida ma muse akka tiang i mamakke akka batu na balga jala dilokkotton nasida ma ujung ni bendungan i tu sada hau manang batu na balga. Asa unang mura maup bendungan i, ditambai nasida ma muse akka tiang hau lao mangganjal dinding ni bendungan i. Jala dipakke nasida ma ratting ni hau, ramba-ramba dohot gambo lao manutup dinding ni bendungan di bariba na sada nai. Dung i dibahen nasida ma dalan ni aek di ujung ni bendungan i. Jala tikki musim udan dipabalga nasida do dalan ni aek i.

Piga-piga peneliti mandok godang do manfaat ni bendungan na dibahen biwara. Misalna mangorui erosi tanah, mambahen lam ias aek ni sunge, jala gabe lam godang ma aek na masuk tu bagasan tano. Tikki logo ari biasana koring do akka sunge. Alai molo adong bendungan biwara di sada sunge, sai torus do adong aek ni sunge i. Jala boi do gabe adong rawa-rawa di jonok ni bendungan i. Tikki ro udan diserap rawa-rawa i ma aek udan asa unang sappe banjir sunge. Asing ni i molo masa kebakaran di hutan, boi do pittor mittop apina molo dung sahat di rawa-rawa. Jala dang mosok suan-suanan na di rawa-rawa i nang pe nga tartutung suan-suanan na di sekitarna. Asing ni i lomo do roha ni binatang liar marasar di rawa-rawa.

Sada penelitian mandok “mirip do bendungan na dibangun biwara tu bangunan na dirancang sahalak insinyur”. Bahkan dibahen akka peneliti na di Amerika Utara do godang bendungan na mirip tu bendungan na dibangun biwara. Alani i cocok do biwara digoari insinyur alam.

Boha do menurut hamu? Alani evolusi do makana malo biwara mambangun bendungan? Manang adong do na mambahen on?