Boasa Dang Olo Saksi Jahowa Pittor Mangalusi Akka Hata na So Sittong Taringot Nasida?
Diihutton Saksi Jahowa do poda sian Bibel asa unang pittor mangalusi sude hata na so sittong dohot hata na paroa-roahon. Umpamana, poda sian Bibel mandok, “Manang ise na umpinsang pangarehe, mangalap haurahon tu ibana sandiri do.” (Poda 9:7, 8; 26:4) Rumikkot do di hami mangulahon lomo ni roha ni Debata sian apala na marsoal alani hata na so sittong.—Psalmen 119:69.
Tontu, “adong do tingki hohom, adong do tingki mangkatai”. (Parjamita 3:7, Bibel siganup ari.) Dialusi hami do akka halak na tutu mangalului hasittongan, alai dang olo hami mangalusi akka hata na so marlapatan. Diihutton hami do pangajarion dohot sitiruon sian Jesus dohot akka halak Kristen di abad na parjolo.
Dang olo Jesus mangalusi tikki didok akka hata na so sittong taringot ibana di adopan ni si Pilatus. (Mateus 27:11-14; 1 Petrus 2:21-23) Jala, dang olo Jesus mangalusi hata na so sittong taringot ibana na didok halak sisobur tuak dohot sipapangan mago. Dialusi ibana do nasida marhite parniulaonna, na hombar tu prinsip ni Bibel na mandok, “Gabe pintor do Hapistaran i dipintori angka pambahenanna i.” (Mateus 11:19) Alai, molo porlu do dialusi, barani do ibana mangalusi akka halak na makkatahon na so tutu taringot ibana.—Mateus 15:1-3; Markus 3:22-30.
Dipasingot Jesus do tu akka siseanna, asa unang pola marmet-met ni roha molo adong akka hata na so sittong taringot nasida. Didok ibana, “Martua ma hamu, molo diinsahi halak hamu manang dipaburuburu manang dipatubutubu ragam ni hata na roa, na so tutu, dompak hamu ala ni Ahu!” (Mateus 5:11, 12) Jesus pe mandok boi do akka hata na so sittong i, gabe dalan lao paboahon hasittongan. Nungnga dijanjihon ibana, “Ahu mangalehon tu hamu soara dohot habisuhon, na so bolas aloon nang alusan ni angka musumuna.”—Lukas 21:12-15.
Dilehon Apostel Paulus do poda tu halak Kristen asa unang dohot hita marsoal dohot akka na marsogo ni roha, na pakkataionna “so adong guna ni i sude”.—Titus 3:9, Bibel siganup ari; Rom 16:17, 18.
Dijujui Apostel Petrus do akka halak Kristen asa toktong makkatindakkon haporseaon ni nasida. (1 Petrus 3:15) Jala didok ibana, dumenggan do taalusi nasida marhite parniulaon, dang sian pakkataionta. Disurat ibana, “Naeng ma marhite sian ulaon na denggan pompomanmuna haotoon ni halak na hurang roha.”—1 Petrus 2:12-15.