PANGUNGKAPON TU SI JOHANNES

1 On ma pangungkapon sian Jesus Kristus. Dilehon Debata do pangungkapon on tu Jesus+ lao patuduhon tu akka naposona+ akka na lao masa satokkin nai. Disuru Jesus do suru-suruanna paboahon i tu si Johannes naposo ni Debata marhite akka lambang.*+ 2 Dipaboa si Johannes ma sude na niidana. Dipaboa ibana do taringot tu hata na dipaboa Debata dohot taringot hata na dipaboa Jesus Kristus. 3 Marlas ni roha ma halak na manjaha surirang* on mamakke soara na gogo. Jala marlas ni roha ma halak na manangihon dohot na mangoloi akka na tarsurat di surirang on.+ Ai nungnga jonok tikki naung ditottuhon i.

4 Sian si Johannes tu pitu huria+ na adong di Provinsi Asia:

Sai anggiat ma hamu didongani asi ni roha na massai balga dohot dame ni roha na sian “Debata naung adong hian, na adong nuaeng, dohot na naeng ro”+ dohot na sian pitu tondi parbadia+ na adong di jolo ni tahtana, 5 dohot na sian Jesus Kristus, “Saksi na Boi Dihaporseai ”+ na parjolo hehe sian akka na mate+ jala “na marhuaso tu akka raja na di tano on”.+

Dihaholongi ibana do hita+ jala dipalua sian akka dosatta marhite mudarna.+ 6 Dibahen ibana do hita gabe raja+ dohot malim+ lao marhobas tu Amana, i ma Debatanta. Di ibana ma hasangapon dohot hagogoon saleleng ni lelengna. Amen.

7 Ida ma! Ro do ibana di bagasan ni ombun.+ Sude ma halak mangida ibana, dohot ma i akka na manullang ibana. Sude ma bangso na di tano on mangandungi alani ibana.+ I ma tutu. Amen.

8 “Au do Alpa dohot Omega,”*+ ninna Debata Jahowa,* “Au do Debata Pargogo na So Hatudosan,+ naung adong hian, na adong nuaeng, dohot na naeng ro.”

9 Au si Johannes, haha anggimuna, donganmuna rap mamaretta,+ donganmuna manaon hasusaan,+ jala donganmuna rap martahan+ ala mangihutton Jesus.+ Di Pulo Patmos do au nuaeng ala hubaritahon taringot tu Debata dohot taringot tu Jesus. 10 Marhite panogu-noguon ni tondi parbadia, diboan ma au tu ari ni Tuan i. Hubege ma di pudikku soara na gogo na songon soara ni tarompet, 11 na mandok, “Suratton ma di sada gulungan akka naung diida ho jala kirim ma i tu pitu huria, i ma huria na di Epesus,+ Smirna,+ Pergamos,+ Tiatira,+ Sardes,+ Piladelpia,+ dohot na di Laodikea.”+

12 Tikki huida tu pudi lao mamereng ise na makkatai tu au, huida ma pitu inganan ni lampu na sian mas.+ 13 Jala di tonga-tonga ni inganan ni lampu i adong ma na songon anak ni jolma.+ Dipakke ibana do baju na ganjang sahat tu patna jala lilit do di andorana ikat pinggang na sian mas. 14 Asing ni i, obukna massai bottar songon salju jala matana songon api na marsigorgor.+ 15 Patna songon tombaga na marhillong+ di bagasan api na marsigorgor jala soarana songon soara ni aek na marhasak.* 16 Di tanganna sabola kanan adong do pitu bintang+ jala sian pamanganna kaluar do podang sidua baba+ na ganjang jala na tajom. Bohina songon mataniari na marsinondang.+ 17 Dung huida ibana, tukkap ma au tu patna songon jolma na mate.

Diappehon ibana ma tanganna sabola kanan tu au, jala ninna ma, “Unang pola mabiar ho! Au do na Parjolo+ dohot na Parpudi,+ 18 jala au do ibana na mangolu i.+ Hea do au mate+ alai ida ma, mangolu do au nuaeng sahat tu saleleng ni lelengna.+ Di au do kucci ni hamatean dohot kucci ni Kuburan.*+ 19 Alani i suratton ma akka naung diida ho, akka na masa saonari, dohot akka na lao masa muse. 20 Pitu bintang na diida ho di tanganku sabola kanan dohot pitu inganan ni lampu na sian mas, rahasia na badia do i. Pitu bintang manggombarhon suru-suruan ni pitu huria, jala pitu inganan ni lampu manggombarhon pitu huria.+

2 “Songon on ma surat tu suru-suruan+ ni huria na di Epesus:+ Songon on ma didok na maniop pitu bintang di tangan kananna, jala na mardalan di tonga-tonga ni pitu inganan ni lampu na sian mas i.+ 2 ‘Huboto do akka na niulam, halojaonmu dohot hasabaronmu. Huboto do na so dipasombu ho halak na jahat tinggal di tonga-tongamuna. Diuji ho do halak na mandok dirina apostel,+ hape dang tutu nasida apostel jala diboto ho do nasida pargabus. 3 Godang do sitaonon na diadopi ho alani goarhu,+ alai toktong do ho togu, sabar, jala dang menyerah.+ 4 Nang pe songon i, hupasingot ma ho, ai dang dihaholongi ho be au songon na parjolo i.

5 “‘Alani i, ingot ma nungnga sadia bagas ho madabu. Muba ma ho+ jala ulahon ma ulaonmu songon na di mulana i. Molo dang muba ho,+ ro ma au tu ho jala bolokkonokku ma inganan ni lampumi.+ 6 Alai adong dope na huhalomohon sian ho, sogo do roham tu ulaon ni sekte Nikolaus,+ ai au pe sogo do rohakku mangida i. 7 Manang ise na marpinggol, ditangihon ma hata na didok tondi parbadia tu akka huria:+ Manang ise na monang,+ loasokku do ibana mangallang parbue ni hau hangoluan+ na di paradeiso ni Debata.’

8 “Songon on ma surat tu suru-suruan ni huria na di Smirna: Songon on ma hata ni ibana ‘na Parjolo dohot na Parpudi’,+ naung mate jala naung mulak mangolu muse:+ 9 ‘Huboto do hasusaanmu dohot hapogosonmu, alai sasittongna na mora+ do ho. Huboto do dileai halak na mangakku Jahudi ho. Hape sasittongna dang halak Jahudi nasida, alai sian sinagoga* ni Sibolis*+ do nasida. 10 Unang ma mabiar ho tu hasusaan na naeng sitaononmu.+ Pamasukon ni Sibolis ma deba sian hamu tu penjara asa diuji hamu. Marsitaonon ma hamu saleleng sappulu ari. Patudu ma na toktong ho setia sahat tu na mate jala lehonokku ma tu ho mahkota hangoluan.*+ 11 Manang ise na marpinggol,+ ditangihon ma hata na didok tondi parbadia tu akka huria: Manang ise na monang+ dang na lao dihilala ibana be hamatean na paduahon.’+

12 “Songon on ma surat tu suru-suruan ni huria na di Pergamos: Songon on ma hata ni ibana na marpodang sidua baba na ganjang jala na tajom i:+ 13 ‘Huboto do didia ho maringanan, i ma di inganan ni tahta ni Sibolis. Alai toktong do ho setia tu au.*+ Jala togu do haporseaonmu tu au+ nang pe tikki dibunu+ si Antipas, saksikku na setia i+ di jolom, di inganan ni Sibolis i.

14 “‘Nang pe songon i hupasingot ma ho, dipasombu ho do adong di tonga-tongamuna na mangihutton ajaran ni si Bileam.+ Diajari ibana do si Balas+ lao mambahen batu partuktukan tu halak Israel, asa mangallang sipanganon na dipelehon tu akka patung jala mangulahon seks na so patut.*+ 15 Adong do muse di tonga-tongamuna na mangihutton ajaran ni sekte Nikolaus.+ 16 Alani i muba ma ho. Molo dang muba ho, hatop ma au ro tu ho. Na lao ro ma au marporang mangalo nasida mamakke podang na ganjang na kaluar sian pamanganku.+

17 “‘Manang ise na marpinggol, ditangihon ma hata na didok tondi parbadia tu akka huria:+ Manang ise na monang,+ lehonokku ma tu ibana manna na buni i.+ Lehonokku ma tu ibana batu na gelleng na bottar jala surattonokku ma di batu i goar na imbaru na so diboto manang ise asing ni na manjalo i.’

18 “Songon on ma surat tu suru-suruan ni huria na di Tiatira:+ Songon on ma hata ni Anak ni Debata, na matana songon api na marsigorgor+ jala patna songon tombaga i:+ 19 ‘Huboto do akka na niulam, holong ni roham, haporseaonmu, na niulam tu Debata, dohot hasabaronmu. Huboto do unggodang na diulahon ho saonari sian na parjolo i.

20 “‘Nang pe songon i, adong do na ikkon hupasingot sian ho, dipasombu ho do boru-boru Izebel+ tinggal di tonga-tongamuna na mandok dirina panurirang. Diajari jala dililuhon ibana do naposokku asa mangulahon seks na so patut*+ dohot mangallang sipanganon na dipelehon tu akka patung. 21 Hulehon do tikki tu ibana asa muba, alai dang olo ibana muba sian ulaonna na mangulahon seks na so patut i.* 22 Ida ma! Bahenokku ma ibana marsahit na posi. Manang ise na mangalakkup dohot ibana, bahenokku ma masa hasusaan bolon tu nasida molo dang muba nasida sian ulaonna i. 23 Pamateonku ma akka anakkonna marhite sahit na posi. Sian i botoon ni sude huria ma na au do mamareso na di bagasan pikkiran* dohot na di roha ni halak. Balosokku ma hamu sesuai tu pambahenanmuna be.+

24 “‘Alai anggo tu akka na deba nai na di Tiatira, na so mangihutton ajaran ni Izebel, i ma akka halak na so mamboto “akka na buni di bagasan roha ni Sibolis”,+ hudok ma tu hamu: Dang tambaakku be boban na asing tu hamu. 25 Alai toktong ma hamu setia sahat tu na ro au.+ 26 Manang ise na monang jala na mangoloi parettakku sahat tu ujungna, lehonokku ma tu ibana huaso lao mangarajai akka bangso,+ 27 songon huaso na hujalo sian Damang i. Na lao diparmahan ibana ma akka bangso marhite tukkot bosi+ asa diropukkon ibana nasida songon gucci na sian tano liat. 28 Jala lehonokku ma tu ibana bintang manogot.*+ 29 Manang ise na marpinggol, ditangihon ma hata ni tondi parbadia tu akka huria.’

3 “Songon on ma surat tu suru-suruan ni huria na di Sardes: Songon on ma hata ni nappuna pitu tondi parbadia+ dohot nappuna pitu bintang i:+ ‘Huboto do akka na niulam, mangolu do ho idaon, alai sasittongna mate do ho.+ 2 Jaga ma ho+ jala patogu ma roha ni akka na tinggal i dope, na naeng mate i. Ai huida dang diulahon ho sude* ulaon na dipangido Debata ulahononmu. 3 Alani i, toktong ma ingot naung dijalo ho dohot naung dibege ho. Toktong ma ulahon i jala muba ma ho.+ Molo dang dungo ho, na lao ro ma au songon panakko+ jala dang botoonmu sadihari au ro mandapotton ho.+

4 “‘Alai nang pe songon i, adong dope piga-piga halak* na di Sardes na so mambahen ramun* pakkeanna.+ Na lao mardalan ma nasida rap dohot au mamakke baju na bottar,+ ai tama do nasida mangulahon i. 5 Manang ise na monang,+ pakkeonna ma baju na bottar.+ Dang sesaokku goarna sian bukku hangoluan.+ Alai dohonokku do na hutanda ibana di jolo ni Damang dohot di jolo ni suru-suruanna.+ 6 Manang ise na marpinggol, ditangihon ma hata na didok tondi parbadia tu akka huria.’

7 “Songon on ma surat tu suru-suruan ni huria na di Piladelpia: Songon on ma hata sian ibana na badia i,+ na sittong i,+ na maniop kucci ni si Daud. Molo dung dibukka ibana pintu,+ dang adong be na boi manutup i, alai molo dung ditutup ibana pintu, dang adong be na boi mambukka i: 8 ‘Huboto do akka na niulam. Huboto do otik gogom, alai toktong do dioloi ho hatakku jala setia do ho tu au.* Ida ma! Nungnga hubukka pintu+ di ho jala dang adong na boi manutup i. 9 Ida ma! Adong do halak na sian sinagoga* ni Sibolis na mandok dirina halak Jahudi. Hape dang tutu nasida halak Jahudi,+ margabus do nasida. Alai bahenokku ma nasida ro jala marsinggang* di jolom. Dung i, botoon ni nasida ma na huhaholongi do ho. 10 Ala nungnga diihutton ho songon dia togu ni haporseaokku,+ jagaokku ma ho tikki diuji ho.+ Ai na lao masa do i tu saluhut tano on lao manguji sude jolma. 11 Hatop nama au ro,+ toktong ma tiop na di ho asa unang adong na mambuat mahkotami.*+

12 “‘Manang ise na monang, bahenokku ma ibana gabe tiang di bagas joro ni Debatakku jala dang adong na boi papindahon i sian i. Surattonokku ma disi goar ni Debatakku+ dohot goar ni kota ni Debatakku, i ma Jerusalem na Imbaru+ na turun sian banua ginjang sian Debatakku. Jala surattonokku do muse disi goarhu na imbaru.+ 13 Manang ise na marpinggol, ditangihon ma hata na didok tondi parbadia tu akka huria.’

14 “Songon on ma surat tu suru-suruan ni huria na di Laodikea:+ Songon on ma hata sian si Amen,+ saksi+ na boi dihaporseai jala na sittong,+ mula ni toppaan ni Debata:+ 15 ‘Huboto do akka na niulam. Huboto do na so haru ngali ho manang na so haru las. Lomo ni rohakku, ngali ma nian ho manang las. 16 Ala dang haru las+ manang dang haru ngali+ ho, utahonokku ma ho. 17 Ai didok ho do, “Na mora do au,+ godang do artakku jala dang porlu be di au manang aha.” Alai dang diboto ho, na susa do ho, na dangol, na pogos, na mapitung jala dang marpakkean. 18 Hujujui ma ho mangulahon on, tuhor ma sian au mas naung ias dibahen api asa gabe mamora ho, tuhor ma sian au baju na bottar asa unang diida halak ho dang marpakkean jala gabe maila,+ jala tuhor ma sian au ubat tu matam+ asa boi ho marnida.+

19 “‘Hupissang jala hupasingot do sude na huhaholongi.+ Alani i, muba ma ho jala somba ma Debata sian nasa roham.+ 20 Ida ma! Jongjong do au di jolo ni pintu jala manuktuki. Manang ise na mambege soarakku jala dibukka pintu i, masuk ma au tu jabuna jala rap mangan ma au dohot ibana. 21 Manang ise na monang,+ loasokku ma ibana rap hundul dohot au di tahtakku,+ songon au naung monang jala rap hundul+ dohot Damang i di tahtana. 22 Manang ise na marpinggol, ditangihon ma hata na didok tondi parbadia tu akka huria.’”

4 Dung salpu i, huida ma sada pintu na bukka di banua ginjang. Soara na parjolo makkatai tu au hubege songon soara ni tarompet. Didok ma tu au, “Nakkok ma ho tuson, asa hupatuduhon tu ho akka na lao masa.” 2 Dung i, pittor digohi tondi parbadia ma au. Huida ma adong tahta di banua ginjang jala adong na hundul di tahta i.+ 3 Jala marhillong do Ibana na hundul di tahta i, marhillong do Ibana songon batu yaspis+ dohot batu sardis.* Di sakaliling ni tahta i adong do pelangi na songon jamrud* idaon.+

4 Di sakaliling ni tahta i adong 24 tahta. Huida ma adong 24 sintua na hundul di tahta i+ marabit na bottar, jala di ulu ni nasida adong mahkota na sian mas. 5 Kaluar do sillam+ dohot ronggur sian tahta i, jala hubege do soara sian i.+ Adong do pitu api na marsigorgor* di jolo ni tahta i, jala i manggombarhon pitu tondi parbadia ni Debata.+ 6 Di jolo ni tahta i, adong ma muse na songon laut kaca+ na suman tu kristal.

Di tonga-tonga do tahta i jala di sakalilingna adong opat kerubim.*+ Gok do mata di daging ni kerubim i, di jolo nang di pudi. 7 Bohi ni kerubim na parjolo songon singa,+ bohi ni kerubim na paduahon songon lombu jantan,+ bohi ni kerubim na patoluhon+ songon jolma, jala bohi ni kerubim na paopatton+ songon lali na habang.+ 8 Ganup kerubim adong do onom habongna, jala gok do mata di sude habong ni nasida.+ Sai didok nasida do arian nang borngin, “Na badia, na badia, na badia do Debata Jahowa,*+ Pargogo na So Hatudosan, naung adong hian, na adong nuaeng, dohot na naeng ro.”+

9 Dipasahat akka kerubim i ma hasangapon, hamuliaon, dohot hamauliateon tu Ibana na hundul di tahta i, i ma Ibana na mangolu saleleng ni lelengna i.+ Ganup diulahon nasida i, 10 marsomba ma 24 sintua i+ tu jolo ni Ibana na hundul di tahta i. Disomba nasida ma Ibana na mangolu saleleng ni lelengna i, jala disappatton nasida ma mahkota ni nasida tu jolo ni tahta i huhut mandok, 11 “Ale Jahowa* Debatanami, na tama do ho manjalo hasangapon,+ hamuliaon,+ dohot huaso.+ Ai ho do manoppa saluhutna,+ jala alani lomo ni roham do umbahen na adong akka i jala tartoppa.”

5 Adong do huida sada gulungan di tangan ni Ibana na hundul di tahta i.+ Hona surat do gulungan i di luar dohot di bagasan jala disegel do i mamakke pitu segel. 2 Dung i huida ma sada suru-suruan na gogo jala gogo ma didok ibana, “Ise do na patut mambukka gulungan i dohot mambukka segelna i?” 3 Alai dang adong manang ise pe na di banua ginjang, manang na di tano on, manang na di toru ni tano, na boi mambukka gulungan i manang na mangida isina. 4 Gabe sai tangis ma au, ala dang adong na tama mambukka gulungan i manang na mangida isina. 5 Alai didok sahalak sian akka sintua i ma tu au, “Unang be sai tangis ho. Ida ma! Nungnga monang+ Singa na sian marga Juda,+ na sian keluarga+ ni si Daud i.+ Ibana ma na boi mambukka gulungan i dohot pitu segelna i.”

6 Dung i huida ma sada anak ni biru-biru+ jongjong jonok tu tahta i, di tonga-tonga ni opat kerubim* i dohot akka sintua i.+ Songon naung hona bunu+ do anak ni biru-biru i. Adong do pitu tandukna jala pitu matana. Pitu matana i manggombarhon pitu tondi parbadia ni Debata+ na disuru tu tano on. 7 Ro ma anak ni biru-biru i, dijalo ma gulungan i sian tangan kanan ni Ibana na hundul di tahta i.+ 8 Tikki dijalo Anak ni Biru-Biru i gulungan i, marsinggang ma kerubim na 4 i dohot 24 sintua i+ di jolona. Ganup akka sintua i maniop harpa dohot makkuk na sian mas na marisi gok dupa. (Dupa manggombarhon tangiang ni akka na badia.)+ 9 Jala diendehon nasida ma sada ende na imbaru.+ Ninna ma, “Tama do ho manjalo gulungan i dohot mambukka segelna. Ai nungnga hona bunu ho jala marhite mudarmu nungnga ditobus* ho akka jolma tu Debata+ sian saluhut marga, bahasa, dohot bangso.+ 10 Nungnga dibahen ho nasida gabe raja+ dohot malim tu Debatanta,+ jala mamaretta+ do nasida tu saluhut tano on.”

11 Dung i huida jala hubege ma soara ni godang suru-suruan di sakaliling ni tahta i, akka kerubim i, dohot akka sintua i. Godang ni nasida marpulu ribu hali marpulu ribu* jala marribu hali marribu.+ 12 Jala gogo ma didok nasida, “Tama do Anak ni Biru-Biru naung hea dibunu i+ manjalo huaso, hamoraon, bisuk, gogo, hasangapon, hamuliaon, dohot pasu-pasu.”+

13 Dung i hubege ma akka toppaan na adong di banua ginjang, di tano on,+ di toru ni tano, di laut dohot saluhut isina mandok, “Puji-pujian, hasangapon, hamuliaon,+ dohot hagogoon saleleng ni lelengna+ ma di Ibana na hundul di tahta i+ dohot di Anak ni Biru-Biru i.”+ 14 Didok opat kerubim i ma, “Amen!” Marsinggang ma akka sintua i jala marsomba.

6 Dung i huida ma dibukka Anak ni Biru-Biru i+ sada sian pitu segel i.+ Hubege ma sada sian opat kerubim*+ i marsoara songon ronggur mandok, “Ro ma ho!” 2 Huida ma sada hoda na bottar.+ Na hundul di hoda i maniop sada panah jala dilehon do mahkota tu ibana.+ Lao ma ibana marporang mangalo musuna jala ditaluhon ma nasida.+

3 Tikki dibukka ibana segel na paduahon, hubege ma kerubim na paduahon+ mandok, “Ro ma ho!” 4 Huida ma ro hoda na asing, i ma hoda na merah songon api. Diloas do na hundul di hoda i mambuat hadameon sian tano on, alani i gabe marsibunuan ma akka jolma. Dung i dilehon ma tu ibana sada podang na balga.+

5 Tikki dibukka ibana segel na patoluhon,+ hubege ma kerubim na patoluhon+ mandok, “Ro ma ho!” Dung i huida ma ro sada hoda na birong jala maniop sada timbangan do na hundul di hoda i. 6 Hubege ma soara sian tonga-tonga ni opat kerubim i na mandok, “Saliter gandum argana sada dinar*+ jala tolu liter barli* argana sada dinar. Otik-otik ma pakke miak jetun dohot anggur i.”+

7 Tikki dibukka ibana segel na paopatton, hubege ma soara ni kerubim na paopatton+ mandok, “Ro ma ho!” 8 Dung i huida ma sada hoda na pucat warnana. Na hundul di hoda i margoar Hamatean jala mangihut do Kuburan* jonok di pudina. Dilehon do tu nasida huaso lao pamatehon saparopat ni portibi on marhite podang na ganjang, haraparon,+ sahit na parohon hamatean, dohot binatang buas.+

9 Tikki dibukka ibana segel na palimahon, huida ma di toru ni langgatan i+ mudar+ ni akka halak na hona bunu. Alani hata ni Debata dohot alani ulaon ni nasida marbarita do umbahen na dibunu nasida.+ 10 Dung i gogo ma didok nasida, “Ale Tuan Natumimbul, na badia jala na sittong,+ sadia leleng nai asa hukumonmu jala balosonmu mudarnami tu akka halak na maringanan di tano on?”+ 11 Jala dilehon ma tu nasida sude jubah na bottar.+ Didok ma tu nasida asa maradian satokkin, paima gok bilangan ni akka naposo dongan ni nasida dohot haha anggina na tarbunu songon nasida.+

12 Dung i huida ma dibukka ibana segel na paonomhon. Masa ma gempa na massai gogo, marbirong ma mataniari songon goni na birong* jala marrara ma bulan songon mudar.+ 13 Mardabuan ma akka bintang tu tano on songon parbue ni hau ara na tata na mardabuan alani alogo na gogo. 14 Mago ma langit i songon harotas na digulung+ jala pinda ma ganup dolok dohot pulo sian ingananna.+ 15 Martabuni ma akka raja ni tano on, akka parpangkat na timbo, akka komandan militer, na mora, na gogo, akka hatoban, dohot akka halak na merdeka. Martabuni ma nasida di akka liang* dohot di holang-kolang ni akka batu na di dolok.+ 16 Dung i sai didok nasida ma tu akka dolok dohot tu akka batu i, “Tipa ma hami+ jala tabunihon ma hami sian jolo ni Ibana na hundul di tahta i+ dohot sian rimas ni Anak ni Biru-Biru i.+ 17 Ai nungnga ro ari rimas ni nasida na massai balga i,+ ise ma na boi selamat sian i?”+

7 Dung salpu i, huida ma opat suru-suruan jongjong di opat suhi ni tano on. Ditiop nasida ma alogo na ro sian opat ujung ni tano on, asa unang mangullus alogo i tu tano, tu laut, manang tu akka hau na dia pe. 2 Dung i huida ma suru-suruan na asing nakkok sian timur mamboan materai ni Debata na mangolu i. Gogo ma didok ibana tu opat suru-suruan na diloas manegai tano on dohot laut, 3 ninna ma, “Unang segai tano on, songon i nang laut dohot akka hau, paima dibahen hami materai+ tu dahi+ ni akka naposo ni Debata.”

4 Jala hubege ma godang ni halak na hona materai i 144.000 halak.+ Nasida ro sian ganup marga ni halak Israel:+

9 Dung salpu i, huida ma sada punguan bolon na so taretong ni jolma godangna. Nasida ro sian sude bangso, suku, marga, dohot bahasa.+ Jongjong do nasida di jolo ni tahta i dohot di jolo ni Anak ni Biru-Biru i mamakke jubah na bottar,+ jala adong do di tangan ni nasida dakka ni hau palem.*+ 10 Sai didok nasida do gogo, “Sian Debatanta na hundul di tahta i+ dohot sian Anak ni Biru-Biru i+ do ro haluaon.”

11 Jongjong ma sude suru-suruan i di sakaliling ni tahta i, di sakaliling ni akka sittua,+ dohot di sakaliling ni opat kerubim* i. Marsinggang ma nasida di jolo ni tahta i manomba Debata. 12 Didok nasida do, “Amen! Puji-pujian, hamuliaon, habisukon, hamauliateon, hasangapon, huaso, dohot hagogoon ma di Debatanta saleleng ni lelengna.+ Amen.”

13 Disukkun sahalak sian akka sintua i ma au, “Ise do akka halak na mamakke jubah na bottar i?+ Sian dia do nasida ro?” 14 Hudok ma tu ibana, “Ale Tuanku, ho do na mamboto i.” Dung i didok ibana ma tu au, “Nasida do na malua sian hasusaan bolon.+ Nungnga disussi nasida jubah ni nasida jala bottar dibahen di bagasan mudar ni Anak ni Biru-Biru i.+ 15 Alani i do nasida di jolo ni tahta ni Debata jala marhobas tu Ibana arian nang borngin di bagas jorona. Jala Ibana na hundul di tahta i+ do na manjaga nasida.*+ 16 Dang male be nasida manang mauas, jala dang taonon ni nasida be las ni ari dohot na mohop.+ 17 Ai diparmahan+ Anak ni Biru-Biru+ na di tonga-tonga ni tahta i ma nasida. Boanonna ma nasida tu mata mual ni aek hangoluan,+ jala apusan ni Debata ma nasa ilu-ilu sian mata ni nasida.”+

8 Tikki dibukka Anak ni Biru-Biru i+ segel na papituhon,+ dang adong tarbege soara di banua ginjang hira-hira satonga jom. 2 Huida ma pitu suru-suruan+ jongjong di jolo ni Debata, jala dilehon ma pitu tarompet tu nasida.

3 Dung i ro ma suru-suruan na asing na maniop inganan panutungan ni dupa na sian mas. Jongjong ma ibana di jolo ni langgatan i.+ Dung i, dilehon ma tu ibana godang dupa,+ asa ditutung dupa i di atas ni langgatan na sian mas+ na di jolo ni tahta i tikki martangiang akka na badia i. 4 Rap nakkok ma timus ni dupa na di tangan ni suru-suruan i dohot tangiang+ ni akka na badia i tu jolo ni Debata. 5 Alai pittor dibuat suru-suruan i ma inganan ni dupa i, diisi ma tusi gara* na sian langgatan i, jala disappatton ma i tu tano on. Dung i ro ma ronggur, sillam,+ dohot gempa. Jala tarbege ma muse akka soara. 6 Siap-siap ma pitu suru-suruan na maniop pitu tarompet i+ mamakke tarompet ni nasida.

7 Martarompet ma suru-suruan na parjolo, gabe ro ma udan es, udan api na marcampur mudar turun tu tano on.+ Matutung ma sapartolu ni tano on, sapartolu ni akka hau, dohot sapartolu ni akka ramba.+

8 Dung i, martarompet ma muse suru-suruan na paduahon. Adong ma na songon dolok na balga na matutung disappatton tu laut,+ gabe mudar+ ma sapartolu ni laut, 9 mate ma sapartolu ni akka na mangolu di laut,+ jala hancur ma sapartolu sian akka kapal.

10 Dung i, martarompet ma muse suru-suruan na patoluhon. Gabe madabu ma bintang na balga na songon api na marsigorgor sian banua ginjang tu akka mata mual dohot tu sapartolu sian akka sunge.+ 11 Goar ni bintang i, i ma Suan-suanan na Paet. Gabe paet ma sapartolu ni aek jala godang ma jolma na mate alani aek naung paet i.+

12 Dung i, martarompet ma muse suru-suruan na paopatton. Gabe makkolom ma sapartolu ni mataniari,+ sapartolu ni bulan, dohot sapartolu ni bintang.+ Dang adong be hatiuron saleleng sapartolu ni arian dohot sapartolu ni borngin.

13 Dung i huida ma sada lali na habang di tonga-tonga ni langit jala hubege ma soarana gogo mandok, “Marjea, marjea, marjea+ ma halak na maringanan di tano on alani soara ni tarompet ni suru-suruan na tolu nai! Ai na lao ombuson ni nasida nama satokkin nai tarompet ni nasida!”+

9 Dung i, martarompet ma muse suru-suruan na palimahon.+ Huida ma sada bintang naung madabu sian banua ginjang tu tano on. Dilehon do tu ibana kucci ni lombang na massai bagas.*+ 2 Dibukka ibana ma lombang na massai bagas* i. Gabe kaluar ma timus sian lombang i songon timus ni api na marsigorgor. Makkolom ma mataniari+ dohot langit* alani timus i. 3 Kaluar ma akka sihapor* sian timus i jala turun tu tano on.+ Dilehon do huaso tu nasida songon huaso ni kalajengking na di tano on. 4 Diorai do nasida manegai akka duhut-duhut manang suan-suanan na asing manang akka hau. Alai dipaloas do nasida mambahen na haccit tu halak na so adong dope materai ni Debata di dahi ni nasida.+

5 Dang diloas akka sihapor i mambunu nasida, alai diloas do akka sihapor i mambahen na haccit tu nasida saleleng lima bulan. Na haccit na dibahen sihapor i, dos songon haccit ni pakkilalaan ni sasahalak na didoit kalajengking.+ 6 Di tikki i, dilului nasida do dalan asa mate nasida, alai dang adong dapot ni nasida. Sai naeng mate do nasida, alai dang boi.

7 Songon akka hoda na naeng marporang do akka sihapor i.+ Adong do di ulu ni nasida na songon mahkota na sian mas jala bohi ni nasida songon bohi ni jolma. 8 Obuk ni nasida songon obuk ni borua jala ngingi ni nasida songon ngingi ni singa.+ 9 Adong do di andora ni nasida na songon baju partahanan na sian bosi. Soara ni habong ni nasida songon soara ni akka kareta hoda na lao marporang.+ 10 Songon ihur ni kalajengking do ihur ni nasida na boi mandoit. Marhite ihur ni nasida i, marhuaso do nasida mambahen na haccit tu jolma saleleng lima bulan.+ 11 Raja ni nasida, i ma suru-suruan na manjaga lombang na massai bagas*+ i. Di bahasa Heber goarna Abdon* jala di bahasa Junani Apollion.*

12 Nungnga salpu jea na parjolo. Alai dukkon i, adong dope dua nai jea+ na lao ro.

13 Dung i, martarompet+ ma muse suru-suruan na paonomhon.+ Hubege ma adong soara sian suhi-suhi* ni langgatan na sian mas+ na di jolo ni Debata. 14 Didok soara i ma tu suru-suruan na paonomhon na maniop tarompet i, “Palua ma opat suru-suruan na tartali di Sunge Euprat na balga i.”+ 15 Dipalua ma opat suru-suruan i. Nungnga dibahen nasida rade lao mambunu sapartolu jolma jala nungnga ditottuhon jam, ari, bulan, dohot taonna.

16 Na hubege, 200 juta* ma godang ni tentara na marhoda i. 17 On ma na hubereng di parnidaan i taringot tu hoda dohot na hundul di hoda i: Adong do baju partahanan ni nasida. Warna ni baju partahanan ni nasida merah songon api, adong na balau dohot na hunik. Ulu ni hoda i songon ulu ni singa+ jala kaluar do api, timus, dohot belerang sian baba ni akka hoda i. 18 Hona bunu ma sapartolu ni jolma alani tolu bala, i ma api, timus, dohot belerang na kaluar sian baba ni nasida. 19 Di baba dohot di ihur ni akka hoda i do gogona. Songon ulok na marulu do ihur ni hoda i jala dipakke do ihurna i mambahen na haccit tu jolma.

20 Alai akka jolma na so hona bala i, tong do dang muba nasida sian ulaon ni nasida. Sai disomba nasida do suru-suruan na jahat dohot akka patung na sian mas, perak, tombaga, batu, nang hau. Hape dang boi marnida, marbinege manang mardalan+ akka na disomba nasida i. 21 Alai dang muba nasida sian dosa ni nasida. Mambunu do nasida, mardatu, mangulahon seks na so patut,* jala manakko.

10 Huida ma suru-suruan na asing na gogo turun sian banua ginjang. Di bagasan ombun do ibana turun jala adong do pelangi di ginjang ni uluna. Bohina songon mataniari+ jala patna songon tiang na togu na marapi. 2 Ditiop ibana do sada gulungan na gelleng naung bukka. Jongjong do ibana, patna sabola kanan mandege laut jala patna sabola kiri mandege tano. 3 Gogo do soarana songon soara ni singa na marauang.+ Tikki marsoara ibana, tarbege ma soara ni pitu ronggur+ makkatai.

4 Tikki makkatai ronggur na pitu i, nungnga rade au naeng manurat hata ni nasida i. Alai hubege ma soara sian banua ginjang+ mandok, “Rahasiahon* ma akka na didok ronggur na pitu i, jala unang suratton akka i.” 5 Dung i, diangkat suru-suruan i ma tanganna sabola kanan doppak banua ginjang. 6 Marsumpa ma suru-suruan i marhite Ibana na mangolu saleleng ni lelengna,+ na manoppa langit dohot nasa isina, tano on dohot nasa isina, laut dohot nasa isina.+ Didok ma, “Dang paleleng-lelengon ni Debata be!” 7 Alai tikki naeng martarompet+ suru-suruan na papituhon,+ saut* ma akka rahasia na badia+ ni Debata. Rahasia na badia i do na dipaboa Debata gabe barita na uli tu akka naposona, akka panurirang*+ i.

8 Dung i hubege ma muse soara sian banua ginjang+ mandok tu au, “Lao ma ho, buat ma gulungan naung bukka i, na di tangan ni suru-suruan na jongjong di laut dohot na di tano i.”+ 9 Lao ma au mandapotton suru-suruan i jala hupangido ma gulungan na gelleng i tu ibana. Didok ibana ma tu au, “Buat jala allang ma sude.+ Gabe paet do i di butuham, alai tonggi do i songon madu di pamanganmu.” 10 Hubuat ma gulungan na gelleng i sian tangan ni suru-suruan i jala huallang ma i.+ Tonggi do i songon madu+ di pamanganku alai gabe paet ma i di butuhakku. 11 Didok nasida ma tu au, “Ikkon paboaonmu do muse aha na lao masa taringot tu akka halak, bangso, bahasa, dohot akka raja.”

11 Dung i dilehon ma tu au hau-hau na songon tukkot pangukkur+ jala didok ma tu au, “Hehe ma ho! Ukkur ma bagas joro* ni Debata dohot langgatanna jala etong ma sadia godang akka halak na manomba Ibana disi. 2 Alai unang ma ukkur alaman luarna, pasombu ma i. Ai nungnga dipasahat i tu akka bangso jala dege-degean ni nasida ma kota na badia i+ saleleng 42 bulan.+ 3 Suruokku ma dua saksikku manurirangi* saleleng 1.260 ari mamakke abit goni.” 4 Saksi na dua i do na digombarhon dua hau jetun+ dohot dua lampu i.+ Jongjong do nasida di jolo ni Tuan ni tano on.+

5 Molo adong musu na naeng mambahen na jahat, kaluar ma api sian pamangan ni nasida manutung musu ni nasida i. Molo adong mambahen na jahat tu nasida, songon i ma carana pamatehon na jahat i. 6 Dilehon do huaso tu nasida lao manutup langit*+ asa unang ro udan+ saleleng manurirangi nasida. Dilehon do huaso tu nasida lao mambahen aek gabe mudar+ jala parohon akka jea tu tano on sadihari pe lomo roha ni nasida.

7 Dung sae nasida manurirangi, kaluar ma binatang buas sian lombang na massai bagas* i. Marporang ma nasida dohot binatang buas i, ditaluhon ma nasida jala dibunu.+ 8 Peak ma bakke ni nasida di dalan ni kota na balga i, i ma inganan ni Tuan ni nasida na dihukum mate di hau. Kota i ma na digombarhon Sodom dohot Mesir. 9 Dipabereng-bereng akka jolma na sian marragam marga, bahasa, dohot bangso ma bakke i saleleng tolu satonga ari.+ Dang diloas akka bakke i dikuburhon. 10 Marlas ni roha ma sude jolma na maringanan di tano on, marpesta ma nasida jala marsileanan hadiah ala nungnga mate panurirang* na dua i. Ai dibahen nasida do na haccit tu akka jolma na di tano on marhite barita na dipaboa nasida.

11 Dung salpu tolu satonga ari, diombusson Debata ma hosa hangoluan tu panurirang na dua i.+ Mangolu ma nasida jala jongjong, gabe mabiar situtu ma akka halak na mangida i. 12 Dibege nasida ma soara na gogo sian banua ginjang na mandok, “Nakkok ma hamu tuson.” Dung i nakkok ma nasida tu banua ginjang di bagasan ombun jala diida akka musu ni nasida do i. 13 Di tikki i, masa ma gempa na gogo. Sega ma saparsappulu ni kota i jala mate ma 7.000 halak. Gabe mabiar ma akka na mangolu i dope jala dipasangap nasida ma Debata na marhuaso di banua ginjang.

14 Nungnga salpu jea na paduahon.+ Alai hatop nama ro jea na patoluhon.

15 Martarompet ma muse suru-suruan na papituhon.+ Dung i tarbege ma soara na gogo di banua ginjang mandok, “Harajaon ni tano on nungnga gabe Harajaon ni Tuhanta*+ dohot Kristusna+ jala mamaretta ma Ibana gabe raja saleleng ni lelengna.”+

16 Dung i marsinggang ma 24 sintua+ na hundul di tahta ni nasida na di jolo ni Debata jala disomba ma Debata. 17 Didok nasida ma, “Ale Debata Jahowa* Pargogo na So Hatudosan, na adong nuaeng+ jala naung adong hian, mandok mauliate do hami tu Ho ala dipakke Ho do huasom na balga i jala nungnga mamaretta Ho gabe raja.+ 18 Alai tarrimas ma sude bangso, gabe ro ma rimasmu. Dapot ma tikki naung ditottuhon Ho lao manguhumi halak naung mate. Dapot ma tikkina mangalehon upa+ tu akka naposom, i ma akka panurirang,+ akka na badia, akka na makkabiari goarmu, na lea dohot na sangap. Jala ripassononmu ma halak na manegai tano on.”+

19 Dung i tarbukka ma bagas joro* ni Debata na di banua ginjang, tarida ma poti parpadanan na di bagas joro i.+ Gabe tarbege ma akka soara, ro ma akka sillam, ronggur, gempa dohot udan es.

12 Dung i huida ma sada tanda na balga di langit. Adong ma sahalak borua+ na mamakke baju na bottar. Marsinondang do pakkeanna i songon mataniari jala adong do bulan di toru ni patna. Adong do muse sada mahkota na sian 12 bintang di atas ni uluna. 2 Hamil do borua i. Mangangguki ma ibana alani haccitna, ai nungnga dapot tikkina lao partus.

3 Huida ma muse tanda na asing di langit. Adong ma sada naga na balga, merah do naga i songon api,+ pitu uluna jala sappulu tandukna. Di ganup uluna i, adong sada mahkota. 4 Disarat ihur ni naga i ma sapartolu bintang+ na di langit jala didabu ma i tu tano on.+ Sai jongjong do naga i paimahon di jolo ni borua+ na lao partus i. Ai molo dung partus ibana, naeng bodduton ni naga i do poso-posona i.

5 Dung i ditubuhon borua i ma sada anak+ bawa na lao marmahani sude bangso marhite tukkot bosi.+ Alai pittor diboan ma anakna i tu Debata na hundul di tahtana. 6 Lari ma borua i tu padang gurun, tu inganan naung diparade Debata di ibana. Disi ma ibana dilehon mangan saleleng 1.260 ari.+

7 Dung i masa ma porang di banua ginjang. Marporang ma si Mikhael*+ rap dohot suru-suruanna mangalo naga i. Jala naga i rap dohot suru-suruanna mangalo nasida. 8 Alai talu ma naga i dohot suru-suruanna jala dang diloas be nasida maringanan di surgo. 9 Didabuhon ma naga na balga i+ tu tano on. Ibana do ulok na parjolo i,+ na laos margoar Sibolis+ dohot Setan.*+ Ibana do na mangaliluhon sude portibi on.+ Dohot do akka suru-suruanna i didabuhon+ rap dohot ibana. 10 Hubege ma soara na gogo sian banua ginjang mandok,

“Nungnga ro haluaon+ sian Debata tu jolma. Nungnga dipatuduhon huasona, nungnga dipajongjong Harajaonna+ jala nungnga marhuaso Kristusna i. Nungnga didabuhon be tu toru akka na manudu donganta i arian nang borngin di jolo ni Debata!+ 11 Nungnga ditaluhon nasida ibana+ marhite mudar ni Anak ni Biru-Biru i+ dohot marhite hata na dipaboa nasida.+ Rade do nasida mangalehon ngolu+ ni nasida jala mate. 12 Alani i marlas ni roha ma ho ale banua ginjang dohot sude hamu na maringanan disi! Alai marjea ma tano i dohot laut i!+ Ai nungnga turun Sibolis i tu ho, jala muruk situtu do ibana, ai nungnga diboto ibana otik nama tikkina.”+

13 Dung diboto naga i naung didabu ibana tu tano on,+ dibahen ibana ma na haccit tu borua+ na manubuhon anak bawa i. 14 Alai dilehon ma tu borua i dua habong ni lali na balga,+ asa boi ibana habang tu ingananna di padang gurun, dao sian ulok i.+ Disi ma ibana dilehon mangan saleleng sada masa, dua masa, dohot satonga masa.*+

15 Dung i diutahon ulok i ma aek na songon sunge di pudi ni borua i, asa diauppon sunge i borua i. 16 Alai diurupi tano i ma borua i. Dibukka tano i ma babana jala diboddut ma sunge na diutahon naga i. 17 Muruk situtu ma naga i tu borua i. Lao ma ibana marporang mangalo akka pinopparna* na tading dope,+ i ma akka na mangoloi paretta ni Debata dohot na paboahon taringot tu Jesus.+

13 Jongjong do naga i di topi ni laut.

Dung i huida ma kaluar sada binatang buas+ sian laut,+ pitu uluna jala sappulu tandukna. Di ganup tandukna i, adong sada mahkota jala di ganup uluna i adong akka goar na mangaleai Debata. 2 Songon macan tutul do huida binatang buas i. Patna songon pat ni beruang jala babana songon baba ni singa. Dilehon naga i+ do hagogoonna, tahtana, dohot huasona na balga+ tu binatang buas i.

3 Adong do huida sada sian uluna i naung hea lukka parah, alai nungnga malum be i.+ Longang do sude jolma na di tano on mangida ibana jala diihutton ma ibana. 4 Disomba nasida ma naga i, ala dilehon naga i do huaso tu binatang buas i. Disomba nasida ma muse binatang buas i jala ninna ma, “Ise ma na songon binatang buas i? Jala ise ma na boi mangalo i?” 5 Dilehon do tu binatang buas i huaso lao marginjang ni roha dohot mangaleai Debata. Jala dilehon do huaso tu ibana mangulahon i saleleng 42 bulan.+ 6 Dileai binatang buas i+ ma Debata, goarna, surgo ingananna i, dohot akka na maringanan di banua ginjang.+ 7 Diloas do binatang buas i marporang mangalo akka na badia jala manaluhon nasida.+ Dilehon do muse huaso tu ibana lao mangarajai saluhut marga, suku, bahasa, dohot bangso. 8 Sude ma jolma na maringanan di tano on manomba ibana. Jala sian mulai ditoppa portibi on,* dang hea disurat goar ni nasida di bukku hangoluan+ ni Anak ni Biru-Biru naung hona bunu i.+

9 Manang ise na marpinggol, dibege ma i.+ 10 Manang ise na ikkon dipenjarahon, ikkon dipenjarahon do ibana. Jala manang ise na mambunu mamakke podang, ikkon dibunu do ibana mamakke podang.+ Alani i, ikkon togu,+ ikkon sabar, jala ikkon marhaporseaon+ do akka na badia i.+

11 Dung i huida ma binatang buas na asing kaluar sian tano on. Adong dua tandukna songon tanduk ni anak ni biru-biru, alai songon naga do ibana makkatai.+ 12 Di jolo ni binatang buas na parjolo i,+ dipakke ibana do huaso ni binatang buas na parjolo i. Dibahen ibana ma tano on dohot sude pangisina manomba binatang buas na parjolo i, naung malum sian lukkana na parah i.+ 13 Dibahen ibana do muse akka tanda halongangan,* jala dipaturun ibana do api sian langit tu tano on di jolo ni akka jolma.

14 Diloas do ibana mambahen akka tanda halongangan di jolo ni binatang buas na parjolo i, lao mangaliluhon akka jolma na di tano on. Disuru ibana do akka jolma na di tano on mambahen patung+ ni binatang buas na parjolo i, na lukka dibahen podang jala naung malum i.+ 15 Diloas do ibana mangalehon hosa tu patung ni binatang buas i. Gabe makkatai ma patung i jala disuru patung i ma asa dibunu akka jolma na so olo manomba ibana.

16 Dipaksa ibana ma sude halak, na lea dohot na sangap, na mora dohot na pogos, na merdeka dohot hatoban, asa mambahen tanda di tangan kanan ni nasida manang di dahi ni nasida.+ 17 Dang adong halak na boi manggadis dohot manuhor situhoron, molo dang adong tanda i di ibana, i ma goar+ ni binatang buas i manang nomor na patuduhon goarna i.+ 18 Manang ise na marbisuk dietong ma nomor ni binatang buas i, ai bilangan ni jolma do i, i ma 666.+ Holan halak na marbisuk do na mangattusi i.

14 Dung i huida ma Anak ni Biru-Biru i+ jongjong di Dolok Sion.+ Rap do ibana dohot 144.000 halak,+ jala tarsurat do goarna dohot goar ni Amana+ di dahi ni nasida. 2 Hubege ma soara sian banua ginjang. Soarana songon soara ni aek godang dohot soara ni ronggur na gogo. Jala soara na hubege i, songon soara ni akka parende na huhut mamakke harpa. 3 Marende ma nasida di jolo ni tahta i, di jolo ni opat kerubim i,+ dohot di jolo ni akka sintua i.+ Songon ende na imbaru+ do ende ni nasida i. Holan na 144.000 halak+ na dituhor sian tano on do na boi mangendehon ende i. 4 Dang hea nasida mangulahon seks na so patut* tu borua. Sasittongna, ias*+ do nasida. Sai diihutton nasida do Anak ni Biru-Biru i tudia pe ibana lao.+ Nungnga dituhor+ nasida sian tonga-tonga ni jolma. Nasida ma na gabe hasil panen na parjolo+ na dipelehon tu Debata dohot tu Anak ni Biru-Biru i. 5 Dang hea nasida margabus jala dang adong hahurangan* ni nasida.+

6 Dung i huida ma suru-suruan na asing habang di tonga-tonga ni langit. Dibaritahon ibana do barita na uli sisaleleng ni lelengna tu akka jolma na di tano on, tu saluhut bangso, suku, marga, dohot bahasa.+ 7 Gogo ma didok ibana, “Habiari hamu ma Debata jala pasangap ma Ibana, ai nungnga dapot tikkina lao manguhumi.+ Somba hamu ma Ibana na manoppa banua ginjang, tano on, laut+ dohot akka mata mual.”

8 Dung i mangihut ma muse suru-suruan na paduahon mandok, “Nungnga ruppak, nungnga maruppak+ Babel na Balga i!+ Dibahen ibana do sude bangso manginum anggurna, i ma giot-giot ni dagingna lao mangulahon seks na so patut.”*+

9 Dung i mangihut ma muse suru-suruan na patoluhon, gogo ma didok, “Manang ise na manomba binatang buas i+ dohot patungna jala na manjalo tanda di dahina manang di tanganna,+ 10 inumonna ma anggur ni Debata, i ma rimasna i. On ma anggur na so marcampur na diusehon Debata tu makkuk rimasna.+ Dihukum ma ibana marhite api dohot belerang+ di jolo ni akka suru-suruan na badia dohot di jolo ni Anak ni Biru-Biru i. 11 Jala nakkok ma timus ni api panguhuman ni nasida saleleng ni lelengna.+ Manang ise na manomba binatang buas i dohot patungna, jala manang ise na manjalo tanda ni goarna, dang na lao so hukuman na dibahen tu nasida arian nang borngin.+ 12 Alani i, ikkon martahan jala ikkon sabar do akka na badia i,+ i ma akka halak na toktong mangoloi paretta ni Debata jala na toktong marhaporseaon+ tu Jesus.”

13 Hubege ma sada soara sian banua ginjang na mandok, “Suratton ma on: Mulai saonari, marlas ni roha ma halak na mate jala na marsada di bagasan Tuan i.+ Ai marhite tondi parbadia didok do, loas ma nasida maradi sian akka ulaon ni nasida, ai dang lupa Debata tu ulaon ni nasida i.”

14 Huida ma ombun na bottar jala adong halak na hundul songon anak ni jolma di ginjang ni ombun i.+ Ibana mamakke mahkota na sian mas jala maniop sasabi na tajom.

15 Dung i kaluar ma suru-suruan na asing sian bagas joro* i. Gogo ma didok suru-suruan i tu ibana na hundul di ginjang ni ombun i, “Pakke ma sasabimi! Nungnga juppang tikkina panen, ai nungnga masak situtu sisabion na di tano on.”+ 16 Dung i dipakke na hundul i ma sasabina tu tano on jala disabi ma panenan na di tano on.

17 Kaluar ma muse suru-suruan na asing sian bagas joro na di banua ginjang jala ditiop ibana do muse sasabi na tajom.

18 Dung i kaluar ma suru-suruan na asing sian langgatan jala marhuaso do ibana tu api. Gogo ma didok ibana tu suru-suruan na maniop sasabi na tajom i, “Pakke ma sasabim na tajom i jala papungu ma anggur na di tano on, ai nungnga masak* parbuena.”+ 19 Dipakke suru-suruan i ma sasabina tu tano on jala dipapungu ma anggur na di tano on. Disappatton ma i tu inganan pamoroan ni anggur na balga na manggombarhon rimas ni Debata.+ 20 Didegei ma anggur i di luar ni kota. Kaluar ma mudar sian i sappe hira-hira 296 kilometer* daona jala timbona sahat tu baba ni hoda.

15 Dung i huida ma di banua ginjang sada nai tanda halongangan* na asing, na balga jala na mambahen longang. Adong pitu suru-suruan+ jala ditiop do pitu jea. On ma akka jea na parpudi, ai marhite i marujung ma rimas ni Debata.+

2 Adong do huida songon laut kaca+ na marcampur api. Huida ma muse adong akka halak+ na jongjong di topi ni laut kaca i huhut maniop harpa na sian Debata. Nasida ma na manaluhon+ binatang buas i dohot patung ni binatang i.+ Jala nasida ma na so ditandai mamakke nomor ni goar ni binatang buas i. 3 Diendehon nasida ma ende ni si Musa+ naposo ni Debata i dohot ende ni Anak ni Biru-Biru i,+ na mandok,

“Ale Jahowa* Debata Pargogo na So Hatudosan,+ na balga jala halongangan do akka ulaonmu.+ Ale Raja sisaleleng ni lelengna,+ na tigor jala na sittong do akka dalanmu.+ 4 Ise ma na so mabiar tu Ho ale Jahowa* jala na so pasangappon goarmu? Ai holan Ho do Debata na setia tu naposom!+ Ro do saluhut bangso tu jolom jala manomba Ho,+ ai nungnga takkas tarida akka parettam na tigor i.”

5 Dung i huida ma tarbukka inganan na badia* na di tabernakel*+ na di banua ginjang.+ 6 Kaluar ma sian inganan na badia i pitu suru-suruan na maniop pitu jea.+ Marabit linen na ias jala na marhillong do nasida. Dialitton do ikat pinggang na sian mas di andora ni nasida. 7 Dilehon sada sian opat kerubim i ma tu pitu suru-suruan i makkuk na sian mas na marisi rimas ni Debata+ na mangolu saleleng ni lelengna. 8 Gok ma timus di inganan na badia i alani hasangapon ni Debata+ dohot huasona. Dang adong na boi masuk tu inganan na badia i sahat tu na marujung pitu jea+ na sian pitu suru-suruan i.

16 Hubege ma soara na gogo sian bagas joro*+ na mandok tu pitu suru-suruan i, “Lao ma hamu jala usehon hamu ma pitu makkuk rimas ni Debata tu tano on.”+

2 Lao ma suru-suruan na parjolo jala diusehon ma makkukna tu tano on.+ Gabe hona bisul na posi jala na so boi malum+ ma akka halak na manjalo tanda ni binatang buas i+ dohot akka na manomba patungna.+

3 Diusehon suru-suruan na paduahon ma makkukna tu laut.+ Gabe songon mudar+ ni halak na hona bunu ma laut i jala mate ma sude na mangolu di laut i.+

4 Diusehon suru-suruan na patoluhon ma makkukna tu akka sunge dohot tu akka mata mual.+ Gabe mudar ma sude aek i.+ 5 Hubege ma suru-suruan na marhuaso tu aek i mandok, “Debata na setia do Ho,+ na adong nuaeng+ jala naung adong hian. Adil do Ho ala diparo Ho panguhuman on.+ 6 Diusehon nasida do mudar ni akka na badia dohot akka panurirang.*+ Alani i, dibahen Ho ma nasida manginum mudar,+ ai patut do nasida manginum i.”+ 7 Jala hubege ma soara sian langgatan i mandok, “Ale Jahowa,* Debata Pargogo na So Hatudosan,+ sittong jala adil do akka panguhumanmi.”*+

8 Diusehon suru-suruan na paopatton ma makkukna tu mataniari,+ jala diloas ma mataniari i manutung akka jolma. 9 Gabe matutung ma jolma alani mohopna. Alai dang muba nasida jala dang dipasangap nasida Debata. Gariada dileai nasida do goar ni Debata, na marhuaso na parohon akka jea i.

10 Diusehon suru-suruan na palimahon ma makkukna tu tahta ni binatang buas i, gabe holom ma harajaonna.+ Diharat akka jolma ma dila ni nasida alani haccit ni pakkilalaan ni nasida. 11 Diburai nasida ma Debata na di banua ginjang alani haccit ni pakkilalaan ni nasida dohot alani bisul ni nasida i. Alai dang muba nasida sian akka ulaonna.

12 Diusehon suru-suruan na paonomhon ma makkukna tu Sunge Euprat na balga.+ Gabe mahiang ma aekna.+ Alani i, gabe boi ma mardalan akka raja+ na sian timur sian i.

13 Dung i, huida ma kaluar tolu hata na ramun na songon katak. Kaluar ma i sian baba ni naga i,+ sian baba ni binatang buas i, dohot sian pamangan ni panurirang na so sittong i. 14 Sian akka suru-suruan na jahat do ro hata i jala sude ma akka raja na di tano on mambege i. Dibahen ma akka tanda halongangan*+ lao papunguhon akka raja i tu porang+ di ari na balga, i ma ari ni Debata Pargogo na So Hatudosan i.+

15 “Ida ma! Na ro ma au songon panakko.+ Marlas ni roha ma halak na toktong jaga+ jala na mamakke abitna, asa unang salang-salang ibana mardalan jala maila diida halak.”+

16 Dipapungu ma akka raja i tu inganan na margoar Armagedon*+ di bahasa Heber.

17 Diusehon suru-suruan na papituhon ma makkukna tu langit.* Tarbege ma soara sian bagas joro,*+ sian tahta i na mandok, “Nungnga sae be!” 18 Dung i tarbege ma akka soara, ro ma akka sillam, dohot ronggur. Masa ma gempa na gogo jala na balga na so hea dope masa mulai sian na adong jolma di tano on.+ 19 Mabola ma kota na balga i+ gabe tolu bagian jala maruppak ma kota ni akka bangso. Diingot Debata ma Babel na Balga i,+ dilehon ma tu ibana makkuk ni anggur na marisi rimasna.+ 20 Gabe mago ma akka pulo jala dang adong be akka dolok.+ 21 Dung i ro ma udan es na balga sian banua ginjang manipa akka jolma.+ Borat ni sada es hira-hira 20 kilogram.* Gabe dileai nasida ma Debata alani udan es i,+ ai balga situtu do jea i.

17 Dung i ro ma sada sian pitu suru-suruan na maniop pitu makkuk i.+ Didok ma tu au, “Ro ma ho, asa hupatuduhon panguhuman na lao masa tu boru-boru na so hasea na hundul di atas ni aek na godang i.+ 2 Diulahon ibana do seks na so patut* tu akka raja na di tano on.+ Gabe mabuk do akka jolma na di tano on ala manginum anggurna, i ma seks na so patut* na diulahonna i.”+

3 Marhite panogu-noguon ni tondi parbadia, diboan suru-suruan i ma au tu padang gurun. Huida ma disi sahalak borua na hundul di atas ni binatang buas na merah songon api. Adong pitu ulu ni binatang buas i, sappulu tandukna jala gok do di dagingna akka goar na mangaleai Debata. 4 Dipakke borua i do abit na piolet+ dohot na merah songon api. Dipakke do muse akka perhiasan na sian mas, akka batu permata, dohot mutiara.+ Jala ditiop do sada makkuk na sian mas na marisi gok ulaon na dihagigihon dohot na ramun,* i ma seks na so patut* na niulahonna. 5 Di dahina tarsurat do sada goar rahasia, “Babel na Balga, ina ni akka boru-boru na so hasea+ dohot akka ulaon na dihagigihon di tano on.”+ 6 Huida ma mabuk borua i alani mudar ni akka na badia i dohot mudar ni akka saksi ni Jesus.+

Heran situtu ma au mangida ibana. 7 Didok suru-suruan i ma tu au, “Boasa heran ho? Paboaokku ma tu ho rahasia taringot tu borua i+ dohot taringot tu binatang buas na mamboan ibana, binatang na pitu i uluna dohot na martanduk sappulu i.+ 8 Binatang buas na diidami, hea do i adong alai dang adong be nuaeng. Na lao kaluar ma i muse sian lombang na massai bagas*+ jala na lao diripasson. Gabe longang ma akka jolma na di tano on mamereng binatang i. Nasida ma akka na so tarsurat goarna di bukku hangoluan i+ sian mulai adong portibi on.* Longang do nasida ala hea do adong binatang i, saonari dang adong be, alai na naeng ro do i muse.

9 “Porlu do bisuk lao mangattusi on: Pitu ulu ni binatang+ na dihunduli borua i manggombarhon pitu dolok. 10 Jala na pitu dolok i manggombarhon pitu raja: Lima nungnga salpu, sada adong dope, jala sada nai dang ro dope. Molo ro i, holan satokkin do ibana mangarajai. 11 Binatang buas na hea adong alai na so adong be nuaeng,+ i ma raja na paualuhon. Alai sian raja na pitu i do ibana ro jala na lao diripasson do ibana.

12 “Sappulu tanduk na diidami manggombarhon sappulu raja na so mangarajai dope. Alai jaloon ni nasida ma huaso lao mangarajai rap dohot binatang buas i sajom lelengna. 13 Saroha do na sappulu raja i, alani i dilehon nasida ma gogo dohot huaso ni nasida tu binatang buas i. 14 Marporang ma nasida mangalo Anak ni Biru-Biru i.+ Alai taluhonon ni Anak ni Biru-Biru i do nasida.+ Ai ibana do Tuan ni akka tuan jala Raja ni akka raja.+ Rap do Anak ni Biru-Biru i dohot akka halak na tarjou, na tarpillit, dohot akka halak na setia i manaluhon nasida.”+

15 Didok suru-suruan i ma tu au, “Aek na diidami inganan ni borua i hundul manggombarhon akka bangso, akka jolma, dohot bahasa.+ 16 Sogo ma roha ni na sappulu tanduk+ dohot binatang buas+ na niidami tu boru-boru na so hasea i.+ Buaton ni nasida ma sude artana jala bahenon ni nasida ma ibana dang marpakkean. Allangon ni nasida ma dagingna jala tutungon ni nasida ma ibana dohot api.+ 17 Ai Debata do na mangonjar roha ni nasida lao mangulahon lomo ni rohana.+ Alani i, gabe saroha ma nasida mangalehon harajaon ni nasida tu binatang buas i+ sahat tu na saut sude hata ni Debata. 18 Jala borua+ na niidami, manggombarhon kota na balga na mangarajai akka raja na di tano on.”

18 Dung salpu i, huida ma suru-suruan na asing turun sian banua ginjang. Balga do huasona jala tiur do tano on dibahen hamuliaonna. 2 Gogo ma didok ibana, “Nungnga ruppak, nungnga maruppak be Babel na Balga i!+ Nungnga gabe inganan ni suru-suruan na jahat ibana, jala nungnga gabe inganan partabunian ni akka suru-suruan na jahat,* inganan ni pidong na ramun* dohot inganan ni akka na dihagigihon.+ 3 Ai nungnga mabuk sude bangso+ dibahen anggurna, i ma hisap-hisap ni dagingna lao mangulahon seks na so patut.* Diulahon ibana do seks na so patut dohot akka raja na di tano on.+ Mamora do akka partiga-tiga na di tano on alani borua i, ai dang maila ibana papunguhon akka barang na arga.”

4 Dung i hubege ma soara na asing sian banua ginjang mandok, “Kaluar ma hamu sian ibana, hamu naposokku!+ Asa unang dohot hamu mangulahon akka dosana jala asa unang dohot hamu hona hukum.+ 5 Nungnga martimbun dosana sahat tu langit+ jala diingot Debata do sude hajahatonna.+ 6 Balosson ma tu ibana songon na binahenna tu na asing.+ Balos ma i dua hali loppit songon na binahenna i.+ Lehon ma dua hali loppit siinumon tu ibana di bagasan makkuk+ na dipakke ibana paradehon siinumon.+ 7 Songon godang ni hasangapon dohot hamoraonna ma bahen sitaonon dohot lungun ni rohana. Ai sai didok ibana do di rohana, ‘Ratu do au, dang ina na mabalu au jala dang hilalaokku lungun ni roha.’+ 8 Alani i, di bagasan sadari masa ma jea tu ibana. Masa ma tu ibana hamatean, lungun ni roha, dohot haraparon. Tutungon ma ibana di bagasan api,+ ai Debata Jahowa* na gogo i+ do na manguhumi ibana.

9 “Tikki diida akka raja na di tano on timus ni api na manutung borua i, tangis ma nasida jala dipukkuli nasida ma diri ni nasida alani lungunna. Ai diulahon akka raja i do seks na so patut* tu borua i jala rap mamora dohot ibana. 10 Mandao-dao ma nasida jongjong ala mabiar do nasida dihukum songon borua i. Ninna ma, ‘Ago ngeri nai, ago ngeri nai kota Babel na balga+ jala na togu i. Ai di bagasan sajom do masa panguhuman i tu ho.’

11 “Dohot do akka partiga-tiga na di tano on tangis jala marlungun ni roha alani ibana. Ai dang adong be na manuhor sude tiga-tiga ni nasida. 12 Dang adong be na manuhor mas, perak, akka batu na arga, mutiara, abit linen na arga, abit na piolet, kain sutra, abit na merah songon api, dohot akka barang na sian hau na angur, gading, hau na arga, tombaga, bosi, dohot marmer. 13 Adong do muse kulit manis, rempah-rempah, dupa, miak na angur, haminjon,* anggur, miak jetun, topung, gandum, lombu, biru-biru, akka hoda, akka kareta, akka hatoban, dohot akka jolma. 14 Dang adong be di ho akka parbue ni hau na malamun na dihalomohon roham. Dang adong be di ho akka sipanganon na tabo dohot akka barang na arga jala dang juppangmu be i.

15 “Mandao-dao ma jongjong akka partiga-tiga na manggadis akka tiga-tigana i, i ma akka halak na mamora sian borua i. Ai mabiar do nasida dihukum songon borua i. Gabe tangis ma nasida jala marlungun ni roha. 16 Ninna nasida ma, ‘Ago ngeri nai, ago ngeri nai kota na balga i, na marabit linen na arga, na piolet, na merah songon api, dohot na mamakke godang perhiasan na sian mas, akka batu na arga, dohot mutiara.+ 17 Ai di bagasan sajom do mago hamoraonmu na godang i!’

“Mandao-dao do jongjong sude kapten ni kapal, akka panoppang, anak buah ni kapal, dohot sude na karejo di laut. 18 Dung diida nasida timus ni api na manutung borua i, gogo ma didok nasida, ‘Adong ma kota na asing na songon kota na balga i?’ 19 Dibahen nasida ma orbuk tu ulu ni nasida. Huhut sai tangis jala marlungun ni roha, gogo ma didok nasida, ‘Ago ngeri nai, ago ngeri nai kota na balga i. Ai mamora do sude akka parkapal alani ibana, hape di bagasan sajom nungnga mago ibana!’+

20 “Marlas ni roha ma ho banua ginjang+ dohot hamu akka na badia,+ akka apostel, dohot akka panurirang.* Ai nungnga dihukum Debata borua i alani hamu!”+

21 Dung i diangkat sada suru-suruan na gogo ma sada batu na songon batu gilingan na balga jala didabuhon ma i tu laut. Ninna ma, “Songon i ma hatop ni Babel, kota na balga i disappatton. Jala dang idaon be ibana.+ 22 Dang tarbege be sian ho soara ni parende na marharpa, soara ni parmusik, parsuling, dohot partarompet. Dang adong be di ho akka tukkang jala dang tarbege be sian ho soara ni gilingan batu. 23 Dang marcahaya be lampum. Dang tarbege be sian ho soara ni pengantin bawa dohot pengantin borua. Ai akka na sangap di tano on do akka partiga-tigam. Jala marhite ilmu gaib+ dililuhon ho do sude bangso. 24 Ai adong do disi mudar ni akka panurirang, akka na badia,+ dohot akka na tarbunu di tano on.”+

19 Dung salpu i, hubege ma soara na gogo sian banua ginjang songon soara ni suru-suruan na godang. Ninna ma, “Puji ma Jahowa!*+ Debata nappuna haluaon, hamuliaon, dohot huaso. 2 Sittong jala adil do carana manguhumi.+ Ai nungnga dihukum Debata boru-boru na so hasea i, na jorbut i, na manegai tano on marhite seks na so patut.* Nungnga dibalosson Debata be mudar ni akka naposona naung dipamate borua i.”+ 3 Satokkin i, didok nasida ma paduahalihon, “Puji ma Jahowa!*+ Jala nakkok ma timus ni na manutung borua i saleleng ni lelengna.”+

4 Dung i marsinggang ma 24 sintua+ dohot 4 kerubim*+ i, disomba nasida ma Debata na hundul di tahta i. Ninna ma, “Amen! Puji ma Jahowa!”*+

5 Tarbege do muse soara sian tahta i mandok, “Puji ma Debatanta, hamu sude akka naposona,+ na lea nang na sangap na makkabiari Ibana.”+

6 Dung i hubege ma soara na songon soara ni suru-suruan na godang dohot songon soara ni aek na godang dohot songon soara ni ronggur na gogo. Didok nasida ma, “Puji ma Jahowa,*+ ai nungnga gabe raja Jahowa*+ Debatanta Pargogo na So Hatudosan i!+ 7 Marlas ni roha ma hita jala tapuji ma Ibana. Ai nungnga juppang tikki pesta parbogason ni Anak ni Biru-Biru i jala nungnga rade be na lao gabe istrina i. 8 Ai nungnga dilehon tu ibana abit linen na arga, na bottar, jala na ias. Abit linen na arga i manggombarhon ulaon na tigor na niulahon ni akka na badia i.”+

9 Dung i didok suru-suruan i ma tu au, “Suratton ma on: Marlas ni roha ma akka na digokkon tu pesta parbogason ni Anak ni Biru-Biru i.”+ Didok ma muse tu au, “On do akka hata na sittong na sian Debata.” 10 Marsinggang ma au tu patna lao manomba ibana. Alai didok ibana ma tu au, “Unang! Unang bahen songon i!+ Ai hatoban do au songon ho dohot songon akka donganmu na paboahon taringot tu Jesus i.+ Somba ma Debata!+ Ai taringot tu Jesus do na dipaboa akka panurirang.”*+

11 Dung i huida ma tarbukka langit jala adong ma sada hoda na bottar.+ Na hundul di hoda i, didok do Haposan*+ jala na Sittong.+ Adil do ibana tikki manguhumi, jala marporang do ibana lao patuduhon na tigor.+ 12 Songon api na marsigorgor do matana+ jala godang do mahkota di uluna. Adong do tarsurat goarna, alai dang adong na mamboto i, holan ibana do. 13 Dipakke ibana do abit na hona* mudar jala goarna, i ma Hata+ ni Debata. 14 Mangihut do sian pudina akka tentara ni banua ginjang na hundul di hoda na bottar. Nasida marabit linen na arga, na bottar, jala na ias. 15 Kaluar ma sian pamanganna podang na ganjang+ jala na tajom lao mambunu akka bangso. Na lao diparmahan ma nasida mamakke tukkot bosi.+ Asing ni i, dege-degeonna ma inganan pamoroan ni anggur na manggombarhon rimas ni Debata Pargogo na So Hatudosan i.+ 16 Di abit luarna, di bagian hae-haena adong do tarsurat sada goar, Raja ni akka raja dohot Tuan ni akka tuan.+

17 Dung i huida ma muse sada suru-suruan jongjong di jolo ni mataniari. Gogo ma soarana manjou sude pidong na martonga-tonga langit, ninna ma, “Ro ma hamu marpungu tu pesta na balga naung diparade Debata.+ 18 Allang hamu ma daging ni akka raja, akka komandan militer, akka bawa na gogo,+ akka hoda dohot akka na hundul di ginjangna.+ Songon i nang daging ni sude jolma, halak na merdeka manang hatoban, na lea manang na sangap.”

19 Dung i huida ma binatang buas i, akka raja na di tano on, dohot akka tentara ni nasida marpungu lao marporang mangalo ibana na hundul di hoda i dohot mangalo tentarana.+ 20 Ditakkup ma binatang buas i dohot panurirang na makkatahon na so tutu+ na mambahen akka tanda halongangan* di jolona. Panurirang i ma na mangaliluhon akka halak na manjalo tanda ni binatang buas i+ dohot akka na manomba patungna.+ Mangolu do na dua i disappatton tu laut api belerang na marsigorgor.+ 21 Alai na asing, dibunu ma mamakke podang na ganjang na kaluar sian pamangan ni na hundul di hoda i.+ Sude ma pidong butong mangallang bakke ni nasida.+

20 Dung i huida ma sada suru-suruan turun sian banua ginjang. Ditiop ibana do kucci ni lombang na massai bagas*+ dohot sada ratte na balga. 2 Ditakkup ibana ma naga i,+ ulok na parjolo i,+ i ma Sibolis+ dohot Setan*+ jala diratte saleleng 1.000 taon. 3 Dung i disappatton ibana ma naga i tu lombang na massai bagas*+ i. Ditutup ma i jala disegel, asa unang dililuhon akka bangso saleleng so marujung 1.000 taon i. Dung salpu i, dipalua ma ibana satokkin.+

4 Dung i huida ma disi godang tahta, jala dilehon do huaso tu akka halak na hundul disi lao manguhumi. Laos huida ma akka jolma na hona bunu* ala paboahon taringot tu Jesus dohot taringot tu Debata, akka halak na so manomba binatang buas i manang patungna, dohot akka halak na so manjalo tanda di dahi dohot di tangan ni nasida.+ Mulak mangolu ma nasida jala mamaretta gabe raja rap dohot Kristus+ saleleng 1.000 taon. 5 On ma haheheon na parjolo.+ (Akka na mate na asing,+ dang dipahehe sahat tu na marujung 1.000 taon i.) 6 Marlas ni roha jala gabe badia ma akka halak na dohot tu haheheon na parjolo.+ Dang marhuaso+ be hamatean na paduahon+ tu nasida. Alai gabe akka malim+ ni Debata dohot akka malim ni Kristus ma nasida. Mamaretta ma nasida gabe raja rap dohot Kristus saleleng 1.000 taon.+

7 Dung salpu 1.000 taon i, dipalua ma Sibolis* sian penjara. 8 Dung i lao ma ibana mangaliluhon akka bangso na di opat ujung ni tano on, i ma Gog dohot Magog. Dipapungu ma nasida lao marporang jala songon pasir na di laut do godang ni nasida. 9 Lao ma nasida tu sude liat portibi on jala dihaliangi nasida ma kemah ni akka na badia i dohot kota na dihaholongi i. Alai turun ma api sian banua ginjang manutung nasida.+ 10 Jala disappatton ma Sibolis na mangaliluhon nasida tu laut api na mardongan belerang. Disi do binatang buas+ dohot panurirang na makkatahon na so tutu i.+ Hukumonna* ma nasida disi arian nang borngin saleleng ni lelengna.

11 Dung i huida ma sada tahta na bottar jala na balga. Debata do na hundul disi.+ Salpu do sian jolona langit dohot tano on+ jala dang adong be akka i. 12 Huida ma akka na mate, na sangap dohot na lea jongjong di jolo ni tahta i jala dibukka ma akka gulungan i. Alai dibukka ma gulungan na asing, i ma bukku hangoluan.+ Mangihutton akka na tarsurat di bukku i, diuhumi ma akka na mate i sesuai tu parniulaon ni nasida.+ 13 Dilehon laut ma akka na mate na adong di bagasanna. Dilehon hamatean dohot Kuburan* ma akka na mate na adong di bagasanna. Jala diuhumi ma nasida ganup marsada-sada sesuai tu parniulaon ni nasida.+ 14 Disappatton ma hamatean dohot Kuburan* i tu laut api.+ Laut api+ i, manggombarhon hamatean na paduahon.+ 15 Asing ni i, manang ise na so tarsurat goarna di bukku hangoluan i,+ disappatton ma ibana tu laut api i.+

21 Dung i huida ma langit na imbaru dohot tano na imbaru.+ Ai nungnga salpu langit dohot tano na parjolo i+ jala laut+ dang adong be. 2 Huida ma muse kota na badia, i ma Jerusalem na Imbaru turun sian banua ginjang, sian Debata.+ Nungnga diparade be kota i songon pengantin borua naung bagak didandan na lao mandapotton suamina.+ 3 Hubege ma soara na gogo sian tahta i na mandok, “Ida ma! Joro ni Debata adong di tonga-tonga ni jolma. Maringanan ma Ibana rap dohot nasida jala gabe bangsona ma nasida. Jala Debata sandiri rap dohot nasida.+ 4 Apusan ni Debata ma nasa ilu-ilu sian mata ni nasida.+ Dang adong be hamatean+ nang arsak ni roha, nang angguk-angguk, nang na haccit, dang disi be.+ Ai nungnga salpu na parjolo i.”

5 Dung i didok Ibana na hundul di tahta i+ ma, “Ida ma! Hupaimbaru do saluhutna.”+ Didok Ibana muse, “Suratton ma on, ai sittong jala boi do dihaporseai akka hata on.” 6 Didok Ibana ma tu au, “Nungnga saut be akka i! Au do Alpa dohot Omega,* mulana dohot ujungna.+ Lehonokku ma minum akka na mauas sian mata mual hangoluan dang pola martuhor.+ 7 Manang ise na monang, lehonokku ma akka on tu ibana. Au ma gabe Debatana, jala ibana gabe anakku. 8 Alai akka halak parbiar, akka na so porsea,+ akka na mangulahon ulaon na dihagigihon, pambunu,+ na mangulahon seks na so patut,*+ na mardatu, na manomba akka patung, dohot akka pargabus,+ disappatton ma nasida tu laut api belerang na marsigorgor+ na manggombarhon hamatean na paduahon.”+

9 Dung i ro ma sada sian pitu suru-suruan na mamboan pitu makkuk na marisi pitu jea i.+ Ninna ma tu au, “Ro ma ho, asa hupatuduhon pengantin borua i na lao gabe istri ni Anak ni Biru-Biru i.”+ 10 Marhite panogu-noguon ni tondi parbadia, diboan ma au tu sada dolok na balga jala na timbo. Dipatuduhon ibana ma tu au Jerusalem kota na badia na turun sian banua ginjang, sian Debata.+ 11 Hasangapon ni kota i songon hasangapon ni Debata.+ Sinondangna songon batu na massai arga, songon batu yaspis na marhillong songon kristal.+ 12 Balga jala timbo do tembok ni kota i. Adong 12 gerbangna jala adong sada suru-suruan di ganup gerbang i. Tarsurat do sada sian marga ni Israel na 12 i di ganup gerbang i. 13 Di sabola timur adong tolu gerbang. Di sabola utara adong tolu gerbang. Di sabola selatan adong tolu gerbang. Jala di sabola barat adong tolu gerbang.+ 14 Fondasi ni tembok ni kota i dibahen sian 12 batu. Tarsurat do sada sian goar ni 12 apostel+ ni Anak ni Biru-Biru i di ganup batu i.

15 Ditiop suru-suruan na makkatai tu au i do tukkot pangukkur na sian mas lao mangukkur kota i, akka gerbangna, dohot tembokna.+ 16 Maropat suhi do kota i, dos do ganjangna dohot bidangna. Diukkur ibana ma kota i mamakke tukkot i, hira-hira 2.220 kilometer* ma ukkuranna. Sarupa do ganjangna, bidangna dohot timbona. 17 Diukkur ibana ma tembok ni kota i hira-hira 64 meter* ma ukkuranna. Dos do ukkuran na dipakke suru-suruan i tu ukkuran na dipakke jolma. 18 Tembok ni kota i dibahen sian batu yaspis+ jala kota i dibahen sian mas murni na songon kristal. 19 Fondasi ni tembok ni kota i dibahen sian akka batu na arga: Na parjolo sian batu yaspis, na paduahon sian batu safir, na patoluhon sian batu kalkedon, na paopatton sian batu jamrud, 20 na palimahon sian batu sardonik, na paonomhon sian batu sardis, na papituhon sian batu krisolit, na paualuhon sian batu beril, na pasiahon sian batu topas, na pasappuluhon sian batu krisopras, na pasappulu sadahon sian batu lajuardi, jala na pasappulu duahon sian batu ametistos. 21 Asing ni i, 12 gerbangna dibahen sian 12 mutiara. Ganup gerbang i dibahen sian sada mutiara. Dalan di kota i dibahen sian mas murni na songon kristal.

22 Dang adong huida bagas joro di kota i. Ai Debata Jahowa* Pargogo na So Hatudosan+ dohot Anak ni Biru-Biru i do bagas jorona. 23 Dang porlu mataniari manang bulan manondangi kota i. Ai hamuliaon ni Debata do na manondangi+ jala Anak ni Biru-Biru i do lampuna.+ 24 Di bagasan sinondang ni kota i do mardalan akka bangso,+ jala boanon ni akka raja na di tano on ma hamuliaon ni nasida tu kota i. 25 Dang hea tutup gerbang ni kota i, ai dang adong borngin disi, arian do torus.+ 26 Boanon ni akka raja ma hamuliaon dohot hasangapon ni akka bangso tu kota i.+ 27 Dang adong na ramun* na boi masuk tu kota i. Songon i nang akka na mangulahon ulaon na dihagigihon dohot panipu.+ Holan akka halak na tarsurat goarna di bukku hangoluan ni Anak ni Biru-Biru i do na boi masuk tusi.+

22 Dung i dipatuduhon suru-suruan i ma tu au sunge aek hangoluan+ na ias songon kristal. Kaluar ma i sian tahta ni Debata dohot sian tahta ni Anak ni Biru-Biru i+ 2 tu tonga-tonga ni dalan na di kota i. Di sabola kiri dohot di sabola kanan ni sunge i adong akka hau hangoluan na marparbue 12 hali sataon, sahali ganup bulan. Jala akka bulung ni hau i boi pamaluppon akka bangso.+

3 Dang adong be di kota i na hona bura. Alai tahta ni Debata dohot tahta ni Anak ni Biru-Biru i+ ma na adong disi. Jala marhobas ma akka naposona tu Ibana. 4 Idaon ni nasida ma bohina+ jala tarsurat do goarna di dahi ni nasida.+ 5 Dang adong be borngin di kota i+ jala dang porlu be lampu manang mataniari. Ai Debata Jahowa* do na manondangi nasida,+ jala mamaretta ma nasida gabe raja saleleng ni lelengna.+

6 Didok suru-suruan i ma tu au, “Sittong do akka hata on jala boi dihaporseai.+ Debata Jahowa* na makkatai marhite akka panurirang,*+ Ibana do na manuru suru-suruanna patuduhon tu akka naposona akka na lao masa satokkin nai. 7 Ida ma! Tibu nama au ro.+ Marlas ni roha ma manang ise na mangoloi akka surirang* na di bagasan gulungan on.”+

8 Au si Johannes, au do na mambege jala na mangida akka i. Dung hubege jala huida akka i, marsinggang ma au lao marsomba tu suru-suruan na patuduhon akka i tu au. 9 Alai didok ibana ma tu au, “Unang! Unang bahen songon i! Ai hatoban do au songon ho dohot songon akka donganmu panurirang dohot songon akka halak na mangoloi akka hata na di gulungan on. Somba ma Debata.”+

10 Didok ibana ma muse tu au, “Unang ma rahasiahon* akka surirang na di gulungan on, ai nungnga jonok tikki naung ditottuhon i. 11 Sai diulahon halak na jahat ma ulaonna na jahat jala sai diulahon halak na ramun* ma ulaonna na ramun. Alai sai diulahon halak na mangulahon na sittong ma ulaonna na sittong jala diulahon halak na badia ma ulaonna na badia.

12 “‘Ida ma! Tibu nama au ro, boanokku ma upa silehonokku tu ganup halak hombar tu na niulana be.+ 13 Au do Alpa dohot Omega,*+ na parjolo dohot na parpudi, mulana dohot ujungna. 14 Marlas ni roha ma halak na manussi jubah ni nasida,+ ai marhite i gabe marhak ma nasida mangallang parbue ni akka hau hangoluan i.+ Jala boi ma nasida masuk tu kota i sian akka gerbangna.+ 15 Alai di luar ma akka biang,* akka halak na mangulahon ilmu gaib, na mangulahon seks na so patut,* akka pambunu, na manomba akka patung, akka halak na lomo rohana margabus, dohot akka halak na jotjot margabus.’+

16 “‘Au Jesus, au do na manuru suru-suruanku paboahon akka on tu akka huria. Urat dohot pinoppar ni si Daud+ do au. Jala au do bintang manogot* na marsinondang i.’”+

17 Marhite tondi parbadiana, sai didok Debata dohot pengantin borua i+ ma, “Ro ma!” Manang ise na mambege didok ma, “Ro ma!” Jala ro ma manang ise na mauas.+ Manang ise na olo, dibuat ma aek hangoluan i dang pola martuhor.+

18 “Hupaboa ma tu ganup na mambege akka surirang na di gulungan on: Manang ise na manambai akka hata on,+ tambaan ni Debata ma tu ibana akka jea na tarsurat di gulungan on.+ 19 Manang ise na mangorui manang aha pe sian akka surirang na di gulungan on, dang paloason ni Debata ibana mangallang parbue ni hau hangoluan i+ jala dang paloasonna ibana masuk tu kota na badia i.+

20 “Didok ibana na paboahon akka on ma, ‘Tibu nama au ro.’”+

“Amen! Ro ma ho, ale Tuan Jesus.”

21 Sai didongani asi ni roha ni Tuan Jesus na massai balga i ma akka na badia i.