SURAT NA PARJOLO SIAN SI JOHANNES

1 Husuratton hami do tu hamu taringot tu hata na parohon hangoluan i. Nungnga adong hian i sian mulana, nungnga hubege hami, nungnga huida hami dohot matanami, nungnga huparrohahon hami jala nungnga hujama hami i dohot tangannami.+ 2 (Nungnga takkas dipaboa tu hami hangoluan na saleleng ni lelengna i jala nungnga huida hami i.+ On do na hubaritahon jala na hupaboa hami tu hamu. Sian Ama i do hangoluan na saleleng ni lelengna+ i jala nungnga takkas i dipaboa tu hami.) 3 Hubaritahon hami do tu hamu na huida hami dohot na hubege hami,+ asa marsada hamu dohot hami songon hami na marsada tu Ama i dohot tu Anakna, i ma Jesus Kristus.+ 4 Husuratton hami do sudena on asa gok las ni rohatta.

5 On do barita naung hubege hami sian ibana jala na hupaboa hami tu hamu: Hatiuron+ do Debata jala dang adong haholomon di Ibana. 6 Molo tadok, “Marsada hita dohot Debata,” hape mardalan dope hita di haholomon, margabus do hita disi jala dang taulahon dope na sittong.+ 7 Alai molo mardalan hita di hatiuron songon Ibana na di bagasan hatiuron, marsada ma hita sude. Jala ias ma hita sian sude dosa+ dibahen mudar ni Jesus, Anakna i.

8 Molo tadok, “Dang mardosa hita,” na manipu diritta do hita disi+ jala dang adong hasittongan di bagasan diritta. 9 Molo taakkui akka dosatta, sesaon ni Debata do i jala paiasonna do hita sian sude ulaon na jahat. Ai boi do tahaporseai Debata jala adil do Ibana.+ 10 Molo tadok, “Dang mardosa hita,” gabe pargabus ma tabahen Debata, jala dang adong hatana di bagasan hita.

2 Hamu akka anakkokku, husurat do on tu hamu asa unang diulahon hamu dosa. Alai molo adong na mardosa, adong do na mangurupi* hita na rap dohot Damang i, i ma Jesus Kristus+ na mangulahon lomo ni roha ni Debata.+ 2 Ibana do pelean pardamean*+ tu akka dosatta,+ alai dang holan tu dosatta dohot do dosa ni saluhut portibi on.+ 3 Molo toktong taoloi akka parettana, on ma patuduhon na tatanda ibana. 4 Molo adong na mandok, “Hutanda do ibana,” alai dang dioloi akka parettana, pargabus do i jala dang adong hasittongan di bagasan dirina. 5 Alai manang ise na mangoloi hatana, nungnga tutu be ibana makkaholongi Debata.+ Sian i ma taboto na marsada hita dohot Jesus.+ 6 Manang ise na mandok marsada dohot ibana, ikkon diihutton do akka na diulahon ibana.*+

7 Hamu akka na hinaholongan, dang paretta na imbaru na husuratton tu hamu, alai paretta na leleng i do jala nungnga adong i di hamu sian mulana.+ Nungnga hea dibege hamu paretta na leleng on. 8 Nang pe songon i, paretta na imbaru do na husurat on tu hamu. Nungnga diulahon ibana paretta on jala hamu pe nungnga dohot mangulahon i. Ai saonari, na lao salpu nama na holom i jala nungnga marsinondang+ hatiuron na sittong i.

9 Manang ise na mandok di bagasan hatiuron ibana alai sogo rohana+ tu donganna, sasittongna di bagasan haholomon dope ibana.+ 10 Manang ise na makkaholongi donganna, toktong do ibana di bagasan hatiuron+ jala dang na lao madabu ibana tu bagasan dosa.* 11 Manang ise na marsogo ni roha tu donganna, di bagasan haholomon do ibana.+ Di haholomon do ibana mardalan jala dang diboto ibana tudia ibana lao,+ ai dipapitung haholomon i do matana.

12 Husurat do on tu hamu akka anakkokku, ai nungnga disesa dosamuna alani goarna.+ 13 Hamu akka ama, husurat do on tu hamu ala nungnga ditanda hamu ibana naung adong sian mulana i. Hamu akka na poso, husurat do on tu hamu ala nungnga ditaluhon hamu Sibolis.*+ Hamu akka dakdanak, husurat do on tu hamu ala nungnga ditanda hamu Damang i.+ 14 Hamu akka ama, husurat do on tu hamu ala nungnga ditanda hamu ibana naung adong sian mulana i. Hamu akka na poso, husurat do on tu hamu ala togu do haporseaonmuna.+ Toktong do adong hata ni Debata di hamu,+ jala nungnga ditaluhon hamu Sibolis.*+

15 Unang ma haholongi hamu portibi on dohot akka na di bagasanna. Molo dihaholongi sasahalak portibi on,+ dang adong holong ni rohana tu Damang i.+ 16 Ai akka halak na di portibi on sai naeng mangihutton hisap-hisap ni dagingna,+ lomo ni roha ni matana,+ jala patudu-tuduhon na adong di ibana. Alai dang sian Damang i ro akka i, sian halak na di portibi on do. 17 Asing ni i, na lao salpu nama portibi on dohot akka hisap-hisapna,+ alai mangolu saleleng ni lelengna do halak na mangulahon lomo ni roha ni Debata.+

18 Hamu anakkokku, di tikki parpudi do hita saonari. Songon naung dibege hamu, na lao ro nama antikristus.+ Gariada saonari pe, nungnga godang tarida antikristus i.+ Sian i do taboto di tikki parpudi do hita nuaeng. 19 Ditadikkon nasida do hita, ala dang donganta nasida.+ Molo donganta do nasida, toktong do nasida rap dohot hita. Alai ditadikkon nasida do hita, alani i takkas ma dang sude jolma i gabe donganta.+ 20 Nungnga dipillit Nabadia i hamu+ jala sude do hamu nungnga mamboto hasittongan i. 21 Husurat pe on tu hamu, dang ala na so diboto hamu hasittongan.+ Alai ala diboto hamu do i jala ala dang adong gabus na ro sian hasittongan.+

22 Ise do sipargabus i? Ibana do kan halak na so mangakkui Jesus i Kristus?+ Ibana ma antikristus i,+ halak na so mangakkui Damang i dohot Anak i. 23 Manang ise na so mangakkui Anak i, dang marsada ibana dohot Damang i.+ Alai manang ise na mangakkui Anak i,+ marsada do ibana dohot Damang i.+ 24 Aha naung dibege hamu sian mulana, ikkon toktong do i adong di bagasan rohamuna.+ Molo toktong adong i di bagasan rohamuna, toktong ma hamu marsada dohot Anak i jala marsada dohot Damang i. 25 Asing ni i, dijanjihon ibana do hangoluan na saleleng ni lelengna+ tu hita.

26 Husurat do on tu hamu, ala adong na naeng mangaliluhon hamu. 27 Nungnga dipillit Debata hamu marhite tondi parbadiana jala toktong do adong tondi parbadiana i di hamu.+ Alani i, dang porlu be manang ise mangajari hamu, ai na lao diajarhon Debata do sudena tu hamu marhite tondi parbadiana i.+ Sittong do i jala dang adong gabus di bagasanna. Sesuai tu na diajarhon tondi i tu hamu, toktong ma hamu marsada dohot ibana.+ 28 Saonari pe akka anakkokku, toktong ma hamu marsada dohot ibana, asa unang mabiar hita makkatai+ tikki dipataridahon ibana dirina. Jala molo taulahon songon i, dang maila be hita jala dang gabe mandao hita sian ibana saleleng ari harorona i. 29 Molo diboto hamu do na mangulahon na sittong ibana, pasti diboto hamu do, manang ise na mangulahon na sittong anak ni Debata do.+

3 Ida hamu ma balga ni holong ni Ama i tu hita,+ digoari do hita anak ni Debata!+ Ai akka anak ni Debata do hita tutu. Alani i do dang ditanda portibi on hita,+ ai dang ditanda portibi on Ibana.+ 2 Hamu akka dongan na hinaholongan, anak ni Debata do hita saonari.+ Alai, dang takkas dope taboto manang na songon dia hita sogot.+ Na taboto, tikki dipataridahon Debata dirina, gabe songon Ibana ma hita. Ai idaotta ma manang na songon dia Ibana sasittongna. 3 Manang ise na porsea tu ibana, dipabadia ma dirina,+ ai badia do ibana.

4 Manang ise na mangulahon dosa, na mangalanggar patik do i, ai mangalanggar patik do dosa i. 5 Diboto hamu do, na lao manesa dosatta+ do umbahen na ro* ibana. Ai dang adong dosa di ibana. 6 Manang ise na toktong marsada dohot ibana, dang diulahon i dosa.+ Manang ise na mangulahon dosa dang boi idaonna jala tandaonna ibana. 7 Hamu akka anakkokku, unang ma loas manang ise mangaliluhon hamu. Manang ise na mangulahon na sittong, na mangulahon lomo ni roha ni Debata do i, songon Jesus na mangulahon lomo ni roha ni Debata. 8 Manang ise na mangulahon dosa, sian Sibolis do ibana. Ai diulahon Sibolis do dosa sian mulana.+ Alani i do umbahen na ro Anak ni Debata, asa diripasson* do akka ulaon ni Sibolis.+

9 Sude anak ni Debata dang diulahon i dosa,+ ai di bagasan ni nasida do tondi parbadia.* Dang diulahon nasida dosa, ai anak ni Debata do nasida.+ 10 Tarida do anak ni Debata dohot anak ni Sibolis sian on: Manang ise na so mangulahon na sittong manang na so makkaholongi donganna, dang sian Debata ibana.+ 11 Alani i, ikkon marsihaholongan do hita,+ ai on do paretta na dibege hamu sian mulana. 12 Unang ma songon si Kain hita, ai sian Sibolis* do ibana jala dibunu do anggina.+ Boasa dibunu ibana anggina? Alani parniulaonna na jahat do umbahen diulahon ibana songon i,+ ai sittong do parniulaon ni anggina.+

13 Unang ma longang rohamuna akka dongan molo dihasogohon portibi on hamu.+ 14 Taboto do nungnga mate hian hita, alai mangolu+ do muse hita saonari ala tahaholongi do donganta.+ Manang ise na so makkaholongi akka donganna toktong ma ibana di hamatean.+ 15 Manang ise na marsogo ni roha tu donganna pambunu+ do i. Jala diboto hamu do, dang adong pambunu na mandapot hangoluan na saleleng ni lelengna.+ 16 Sian on do taboto holong i, ai dilehon Jesus Kristus do ngoluna humokkop hita.+ Alani i, ikkon talehon do ngolutta humokkop akka donganta.+ 17 Molo adong halak na mampu mangalului na porlu di ngoluna jala diida ibana adong donganna na hurangan, alai dang olo ibana patuduhon asi ni rohana, songon dia ma boi dohononna na dihaholongi ibana Debata?+ 18 Hamu akka anakkokku, molo tutu do holong rohamuna unang ma holan di hata manang holan di pamangan,+ alai ikkon tarida do i sian pambahenan+ jala patudu ma i sian ias ni roha.+

19 Marhite i, taboto ma na sian hasittongan i do hita jala pos ma rohatta na dihaholongi Debata do hita. 20 Nang pe diuhumi rohatta hita, taingot ma umbalga do Debata sian rohatta jala diboto Ibana do saluhutna.+ 21 Hamu akka dongan na hinaholongan, molo dang diuhumi rohatta hita, dang mabiar be hita martangiang tu Debata.+ 22 Ai molo taoloi sude parettana jala molo taulahon lomo ni rohana, jalootta do manang aha pe na tapangido sian Ibana.+ 23 Sasittongna on do parettana: Ikkon porsea do hita tu goar ni Anakna Jesus Kristus i,+ jala ikkon tapatudu do holong tu na asing+ songon parettana tu hita. 24 Asing ni i, manang ise na mangoloi parettana, toktong ma ibana marsada dohot Debata, jala Debata marsada dohot ibana.+ Marhite tondi parbadia na dilehon Ibana tu hita, taboto ma na toktong do Debata marsada dohot hita.+

4 Hamu akka dongan na hinaholongan, unang ma pittor porsea hamu molo didok ajaran* na diajarhon i sian Debata.+ Alai jolo uji* hamu ma ajaran i, tutu do i sian Debata+ manang na dang. Ai godang do saonari panurirang na so sittong di portibi on.+

2 Songon on ma caramuna mamboto molo ajaran i sian Debata: Molo dipaboa ajaran i do naung ro Jesus Kristus tu tano on gabe jolma, on patuduhon sian Debata do ajaran i.+ 3 Alai sude ajaran na so paboahon taringot tu Jesus, dang sian Debata i.+ Ajaran ni antikristus do i. Nungnga dibege hamu hian na naeng ro i,+ jala nungnga di portibi on i saonari.+

4 Hamu akka anakkokku, sian Debata do hamu jala nungnga ditaluhon hamu akka panurirang na so sittong.+ Ai umbalga do Ibana na marsada dohot hamu+ sian ibana na marsada dohot portibi on.+ 5 Sian portibi on+ do akka panurirang na so sittong i. Alani i, akka na di portibi on do dihatahon nasida jala ditangihon portibi on do nasida.+ 6 Sian Debata do hita. Manang ise na mananda Debata, tangihononna do hita.+ Alai manang ise na so sian Debata, dang tangihononna hita.+ Sian on ma taboto ajaran i sittong manang na sala.+

7 Hamu akka dongan na hinaholongan,+ toktong ma hita marsihaholongan. Ai sian Debata do holong i, jala ganup na marholong ni roha, anak ni Debata do i jala ditanda ibana do Debata.+ 8 Manang ise na so marholong ni roha, dang ditanda ibana Debata, ai holong do Debata.*+ 9 Marhite on do Debata patuduhon holongna tu hita: Disuru Ibana do Anakna na sasada+ i tu portibi on asa boi hita mandapot hangoluan marhite ibana.+ 10 On do holong i: Disuru Debata do Anakna i gabe pelean pardamean*+ tu akka dosatta,+ dang alani na tahaholongi Debata, alai alani holongna do tu hita.

11 Hamu akka dongan na hinaholongan, molo songon i do cara ni Debata makkaholongi hita, hita pe ikkon marsihaholongan ma dohot na asing.+ 12 Dang adong naung hea mangida Debata.+ Alai molo toktong hita marsihaholongan, toktong ma Debata di bagasan hita, jala gok ma holong ni rohana i di bagasan hita.+ 13 Marhite on do taboto na toktong hita marsada dohot Ibana jala Ibana marsada dohot hita, ai dilehon Ibana do tondi parbadiana tu hita. 14 Asing ni i, nungnga dilehon Ama i Anakna gabe Sipalua ni portibi on.+ Hami sandiri do naung mangida i jala saonari hupaboa hami do i tu akka halak. 15 Manang ise na mangakkui Jesus i Anak ni Debata,+ toktong ma Debata marsada dohot ibana jala ibana marsada dohot Debata.+ 16 Nungnga taboto be jala nungnga tahaporseai na holong do roha ni Debata tu hita.+

Holong do Debata.*+ Manang ise na toktong patuduhon holong ni roha, toktong ma ibana marsada dohot Debata, jala Debata toktong marsada dohot ibana.+ 17 Songon i ma carana gabe gok holong ni roha i di bagasan hita. Alani i, dang mabiar be hita makkatai+ di ari panguhuman. Ai songon ngolu ni Kristus i do ngolutta di portibi on. 18 Dang adong biar di bagasan holong.+ Ai dipadao holong ni roha na gok i do biar ni roha. Dirajai biar ni roha do hita. Alai sasittongna, dang gok dope holong ni roha ni halak parbiar.+ 19 Tahaholongi pe halak na asing, ala naung parjolo do Debata patuduhon holongna tu hita.+

20 Molo adong na mandok, “Huhaholongi do Debata,” hape sogo rohana tu donganna, pargabus do ibana disi.+ Ai molo dang dihaholongi sasahalak dongan na niidana,+ dang boi ibana makkaholongi Debata na so niidana.+ 21 On do paretta na tajalo sian Ibana: Manang ise na makkaholongi Debata, ikkon haholonganna do donganna.+

5 Manang ise na porsea Jesus i do Kristus, anak ni Debata do ibana.+ Manang ise na makkaholongi Debata, haholonganna do nang akka anak ni Debata. 2 Sian on do taboto na tahaholongi akka anak ni Debata,+ i ma molo tahaholongi Debata jala taoloi parettana. 3 Ai on do holong ni roha tu Debata, i ma molo taoloi akka parettana+ jala dang maol mangulahon akka parettana i.+ 4 Ai sude anak ni Debata boi do manaluhon portibi on.+ Haporseaotta i+ do na manaluhon portibi on.

5 Ise do na boi monang manaluhon portibi on?+ Manang ise na porsea Jesus i Anak ni Debata,+ ibana do na boi monang manaluhon portibi on. 6 Jesus Kristus do na ro marhite aek dohot mudar, dang holan marhite aek,+ alai marhite aek dohot mudar do.+ Tondi parbadia do na paboahon i,+ ai hasittongan do na dipaboa tondi parbadia i. 7 Na tolu on ma na patuduhon hasittongan taringot Jesus i: 8 tondi parbadia,+ aek,+ dohot mudar.+ Dos do na dipatudu na tolu i.

9 Gari na pinaboa ni jolma tahaporseai do, lam ma na pinaboa ni Debata. Pasti umbalga do na pinaboa ni Debata. Ai Ibana sandiri do na gabe saksi paboahon ise Anakna i. 10 Molo porsea sasahalak tu Anak ni Debata, on patuduhon adong do di bagasan rohana na diajarhon Debata. Alai manang ise na so porsea tu Debata, dibahen ibana do Debata pargabus.+ Ai dang porsea ibana tu na diajarhon Debata taringot tu Anakna. 11 On do na dipaboa Debata: Dilehon Ibana do hangoluan na saleleng ni lelengna tu hita+ jala marhite Anakna i+ do tajalo hangoluan i. 12 Manang ise na manjalo Anak i, dapotna do hangoluan. Alai manang ise na so manjalo Anak ni Debata, dang dapotna hangoluan.+

13 Hamu akka na porsea tu goar ni Anak ni Debata,+ husurat pe on tu hamu asa diboto hamu do naung dapotmuna hangoluan na saleleng ni lelengna i.+ 14 On do pos ni rohatta* tu Debata:+ Manang aha na tapangido sesuai tu lomo ni rohana, tangihononna do hita.+ 15 Jala molo taboto na ditangihon manang aha na tapangido tu Ibana, pos ma rohatta na lao jalootta do pangidoatta i. Ai nungnga tapangido i tu Ibana.+

16 Molo diida sasahalak diulahon donganna dosa, alai dang parohon hamatean dosana i, ikkon ditangiakkon do donganna i. Dung i, dilehon Debata ma tu ibana hangoluan.+ Ai lehonon ni Debata do hangoluan tu halak na mangulahon dosa na so parohon hamatean.+ Alai adong do dosa na parohon hamatean, jala dang hudok tama ditangiakkon halak na mangulahon dosa sisongon i. 17 Dosa+ do sude ulaon na jahat, alai adong do dosa na so parohon hamatean.

18 Taboto do, dang ulahonon ni akka anak ni Debata dosa, ai jagaon ni Anak ni Debata* do nasida. Jala dang boi jamaon ni Sibolis* nasida.+ 19 Taboto do, na sian Debata hita. Alai di bagasan huaso ni Sibolis*+ do saluhut portibi on. 20 Nang pe songon i, taboto do naung ro Anak ni Debata jala nungnga dilehon+ tu hita pangattusion, asa taboto taringot tu Debata na sittong. Jala marsada do hita dohot Debata na sittong i+ marhite Anakna, Jesus Kristus. Ibana do Debata na sittong jala haroroan ni hangoluan na saleleng ni lelengna.+ 21 Hamu akka anakkokku, padao hamu ma dirimuna sian akka patung.+