SURAT NA PADUAHON SIAN SI PETRUS

1 Sian si Simon Petrus naposo ni Jesus Kristus jala apostelna, mandapotton akka halak naung mandapot haporseaon na arga songon hami. Dapotta do haporseaon i ala tigor* do Debata dohot Jesus Kristus Sipalua hita:

2 Anggiat ma lam tamba asi ni roha ni Debata na massai balga i dohot hadameon di hamu, ala nungnga takkas ditanda+ hamu Debata dohot Jesus Tuanta i. 3 Marhite huasona, dilehon Debata do sude na tahaporluhon asa boi tapakke ngolutta lao marsitutu manomba Ibana. Ai nungnga tatanda Ibana na manjou hita+ marhite hamuliaonna dohot haburjuonna. 4 Marhite akka i dilehon Debata do tu hita akka janjina+ na massai arga jala na palongang roha, asa parsidohot hita mandapot hasangapon na sian Debata.+ Dapotta do i molo dung malua hita sian portibi naung sega alani hisap-hisap na sala.

5 Alani i, asing ni haporseaon marsitutu ma hamu patuduhon haburjuon,+ tamba ni haburjuon+ parbinotoan.+ 6 Tamba ni parbinotoan mangorom diri.+ Tamba ni mangorom diri sabar. Tamba ni sabar, marsitutu manomba Debata.+ 7 Tamba ni marsitutu manomba Debata, holong tu dongan sahaporseaon. Tamba ni holong tu dongan sahaporseaon, holong tu sude jolma.+ 8 Molo adong akka parange i di hamu jala jotjot dipatuduhon hamu i, dang gabe marisuang manang dang marguna*+ parbinotoan na bagas taringot tu Tuan Jesus Kristus i di hamu.

9 Molo dang adong akka i di sasahalak, na mapitung do ibana. Ai ditutup ibana do matana sian na tiur*+ jala lupa do ibana naung ias dibahen Debata akka dosana+ najolo i. 10 Alani akka dongan, ala nungnga dijou+ jala dipillit Debata hamu, marsitutu ma hamu mampartahatton i. Molo diulahon hamu i, dang mago haporseaonmuna i.+ 11 Sasittongna, marhite i lehononna ma tu hamu hamuliaon masuk tu Harajaon na saleleng ni lelengna, i ma Harajaon+ ni Jesus Kristus Tuan jala Sipalua hita.+

12 Alani i, nang pe naung diboto hamu akka i jala naung togu hamu di hasittongan toktong do pasingotokku hamu taringot tu sudena i. 13 Ai didok rohakku, ikkon pasingotokku+ do hamu saleleng di pardagingon*+ dope au. 14 Dang sadia leleng nai, tadikkonokku nama dagingkon songon naung takkas dipaboa Tuanta Jesus Kristus.+ 15 Sai pasingotokku do hamu sian nasa gogokku, asa boi ingotonmuna* akka i dung lao au.

16 Dang hata na so tutu na hupaboa hami tu hamu taringot tu huaso dohot haroro ni Tuanta Jesus Kristus. Ai huida hami do hasangaponna i.+ 17 Dijalo ibana do hasangapon dohot hamuliaon sian Debata Ama i, tikki didok Debata hata on di bagasan hamuliaonna, “On do Anakku, haholongakki, las situtu do rohakku mangida ibana.”+ 18 Hubege hami do ro hata i sian banua ginjang tikki rap hami dohot ibana di dolok na badia i.

19 Alani i, lam pos ma rohanami tu akka na dipaboa Debata.* Denggan do molo diparrohahon hamu i. Ai dos do i songon lampu+ na marsinondang di inganan na holom di bagasan rohamuna, paima bissar+ mataniari jala tarida bintang manogot.* 20 Nungnga diboto hamu sian mulana, dang adong na dipaboa Debata* di Surat na Badia i na ro sian pikkiran ni jolma. 21 Ai dang hea na nidok ni Debata* ro sian lomo ni roha ni jolma.+ Alai sian Debata do ro na nidok ni nasida marhite panogu-noguon ni tondi parbadia.+

2 Alai adong do najolo akka panurirang na makkatahon na so tutu di tonga-tonga ni bangso ni Debata. Suang songon i ma, na lao ro ma akka guru na makkatahon na so tutu di tonga-tongamuna.+ Sipsip ma diajarhon nasida ajaran na so sittong lao manegai haporseaonmuna. Jala disoadahon nasida do ibana* na manobus nasida.+ Alani i, toppu ma ro hamagoan tu nasida. 2 Asing ni i, godang do na mangihutton ulaon ni nasida na so umboto ila.*+ Ujungna, gabe marlea ma ajaran na sittong* i alani nasida.+ 3 Alani hisap ni nasida, margabus ma nasida lao mandapot uttung sian hamu. Alai nungnga ditottuhon sian najolo+ hukuman tu nasida, dang tarlambat i jala pasti hancur do nasida.+

4 Dihukum Debata do akka suru-suruan na mardosa,+ jala disappatton do nasida tu Tartarus.*+ Diratte do nasida di* haholomon paima diuhumi.+ 5 Jala dihukum Debata do najolo portibi on. Diparo Ibana do banjir* tu portibi on,+ tu akka halak na so pasangappon Debata.+ Alai dipalua do si Noak, sahalak parbarita na paboahon dalan ni Debata na sittong*+ i, rap dohot pitu halak nai.+ 6 Dihukum Debata do kota Sodom dohot Gumora, dibahen do kota i gabe abu.+ Sipasingot ma on tu halak na so pasangappon Debata taringot tu na lao masa tu nasida.+ 7 Dipalua Debata do si Lot,+ halak na mangulahon na sittong i jala na marsak situtu alani ulaon ni akka parjahat na so umboto ila.* 8 Ai tikki maringanan si Lot halak na mangulahon na sittong i di tonga-tonga ni nasida, marsak do ibana ganup ari alani hajahaton na diida dohot na dibege ibana. 9 Alani i, diboto Jahowa* do songon dia paluahon halak na marsitutu manomba Ibana sian akka hasusaan.+ Jala dihukum* Ibana do akka parjahat di ari panguhuman.+ 10 Tarlumobi ma lao mangalehon hukuman tu akka halak na mambahen ramun* daging ni na asing+ dohot akka halak na leas rohana tu akka na marhuaso.+

Garang do nasida jala lomo-lomona, dang mabiar nasida mangaleai akka na sangap. 11 Gari akka suru-suruan, nang pe umbalga gogo dohot huaso ni nasida, dang olo nasida mangaleai akka guru na makkatahon na so tutu i. Ai dipasangap nasida do Jahowa.*+ 12 Alai dos do akka guru na makkatahon na so tutu i songon binatang na so marroha na holan mangihutton naluri, na tubu lao ditakkup jala dibunu.+ Diissaki nasida do akka na so diattusi nasida, gabe suda ma nasida alani pambahenan ni nasida na jahat i, 13 jala marsitaonon ma nasida alani pambahenan ni nasida i.

Lomo do roha ni nasida marsonang-sonang+ nang pe tikki arian. Na kotor jala na cacat do nasida. Tikki rap mangan nasida dohot hamu,+ lomo do roha ni nasida paboa-boahon ajaran ni nasida na mangaliluhon i. 14 Sai naeng mangulahon seks na so patut do nasida tu na so dongan saripena+ jala dang hea loja nasida mambahen dosa. Dibahen nasida do tarjorat halak na gale. Nungnga tung somal nasida mangulahon hisap-hisap ni nasida. Ai akka halak na hona bura do nasida. 15 Ala nungnga ditadikkon nasida dalan na sittong i, gabe lilu ma nasida. Diihutton nasida do dalan ni si Bileam+ anak ni si Beor, na las rohana manjalo upa sian akka pambahenan na jahat.+ 16 Alai hona pissang do ibana alani hasalaanna.+ Halode na so boi makkatai pe gabe boi makkatai songon jolma lao mangabbati haotoon ni panurirang i.+

17 Songon mata mual na so maraek do nasida jala songon ombun na niullus ni alogo na gogo. Jala nungnga diparade haholomon tu nasida.+ 18 Ginjang do roha ni nasida makkatai, alai dang adong lapatanna. Dipakke nasida do hisap-hisap ni daging+ dohot ulaon ni halak na so umboto ila,* lao manjorat akka halak na baru malua sian tonga-tonga ni akka halak na lilu.+ 19 Dijanjihon nasida do haluaon tu akka halak na asing, hape hatoban ni hamagoan do nasida.+ Ai manang ise na dirajai sasahalak, hatobanna do ibana.+ 20 Nungnga ditadikkon nasida akka na ramun na adong di portibi on+ lao mangihutton Jesus Kristus, Tuan jala Sipalua i. Alai molo diulahon jala dirajai akka na ramun i muse nasida, gabe urroa ma pangalaho ni nasida sian na parjolo i.+ 21 Dumenggan hian ma dang pola diboto nasida dalan na sittong,* sian apala diboto alai gabe marbalik sian akka paretta na badia i naung dilehon tu nasida.+ 22 Tutu ma nasida songon hata ni uppama na mandok, “Biang mulak tu uta-utana jala babi naung maridi mulak margulu tu pargulu-guluanna.”+

3 Akka dongan na huhaholongi, on ma surattu na paduahon na husuratton tu hamu. Songon di surattu na parjolo, hujujui do hamu asa marpikkiran na torang marhite akka sipasingot,+ 2 asa diingot hamu na dipaboa akka panurirang* na badia najolo, dohot akka paretta ni Tuan jala Sipalua hita na dipasahat akka apostelmuna. 3 On ma na ikkon botoonmuna: Na ro ma akka pangarehei di akka ari parpudi. Mangarehei do nasida mangihutton lomo-lomo ni nasida sandiri.+ 4 Didok nasida ma, “Didia do harorona na dijanjihon i?+ Sian tikki mangolu dope akka ompunami dos do sude songon na parjolo i tikki ditoppa portibi on.”+

5 Dang olo nasida mangakkui, marhite hata ni Debata+ do adong langit dohot tano on sian najolo. Na kaluar do tano i sian aek jala hot di tonga-tonga ni aek. 6 Jala hancur do tano on di tikki i alani banjir.*+ 7 Alai laos marhite hata ni Debata, disippan do langit dohot tano na adong saonari lao hukumonna marhite api. Dipasombu do i sahat tu ari panguhuman lao mangaripasson akka na so pasangappon Debata.+

8 Hamu akka dongan na huhaholongi, unang ma lupa hamu, sadari di Jahowa* dos songon saribu taon jala saribu taon dos songon sadari.+ 9 Dang na lambat Jahowa* pasautton janjina,+ songon na nidok ni na deba. Sabar do Ibana tu hamu, ala dang lomo rohana diripasson manang ise pe, alai naeng ma sude jolma marhamubaon.+ 10 Ai songon haroro ni panakko+ do ari ni Jahowa* i.+ Tikki i, mago ma langit mardongan soara ni ronggur na massai gogo.+ Malala ma akka na di langit dohot akka na di tano on alani mohopna. Jala gabe tarida ma tano on dohot sude ulaon na di bagasanna.+

11 Anggo malala do hape sude songon i, parrohahon hamu ma songon dia ngolumuna. Badia ma pangalahomuna jala marsitutu ma hamu manomba Debata, 12 huhut paima-imahon jala sai mangingot* haroro ni ari ni Jahowa.*+ Di tikki i, dihukum ma langit di bagasan api na marnala-nala+ jala malala ma akka na di bagasanna alani mohopna! 13 Alai tapaima-ima do langit na imbaru dohot tano na imbaru songon janji ni Debata.+ Jala akka na mangulahon paretta ni Debata ma na maringanan disi.+

14 Alani i akka dongan na huhaholongi, ala dipaima-ima hamu do akka i, marsitutu ma hamu asa ias idaon ni Debata, dang marcacat, jala di bagasan dame di ujungna.+ 15 Alani i bahen hamu ma hasabaron ni Tuhanta* gabe haluaon, songon na sinurat ni si Paulus donganta na tahaholongi i. Di bagasan bisuk na nilehon ni Debata do ibana manuratton i.+ 16 Dipaboa ibana do taringot i di sude suratna. Alai adong do deba di suratna i na maol attusan. Olo do adong akka halak na so mangattusi dohot na hurang parbinotoanna* gabe pabalik-balikkon lapatan ni suratna i, songon na binahen ni nasida tu deba sian Surat na Badia i. Alani i gabe parohon hamagoan ma i tu diri ni nasida.

17 Akka dongan na huhaholongi, nungnga diboto hamuna i. Alani i, jaga ma hamu asa unang dililuhon hamu rap dohot nasida marhite hasalaan ni akka halak na jahat i. Jala gabe madabu hamu sian haporseaonmuna na togu i.+ 18 Alai marsitutu ma hamu lao mandapot asi ni roha ni Debata na massai balga i. Jala marsitutu ma hamu lao mandapot parbinotoan taringot tu Jesus Kristus Tuan jala Sipalua hita. Di ibana ma hasangapon sian saonari sahat tu saleleng ni lelengna. Amen.