SURAT NI SI JAKOBUS

1 Sian si Jakobus,+ hatoban ni Debata jala naposo ni Tuan Jesus Kristus mandapotton 12 marga na marserak di godang inganan.

Horas!

2 Hamu akka donganku, las ma rohamuna* molo masa tu hamu akka sitaonon.+ 3 Ai diboto hamu do, boi do hamu togu molo nungnga taruji haporseaonmuna.+ 4 Molo toktong hamu togu, gabe sun denggan ma hamu di saluhutna jala dang hahurangan manang aha pe.+

5 Molo adong sian hamu na hurang bisuk, toktong ma i dipangido tu Debata.+ Lehononna+ do i tu ibana jala dang pailaonna ibana. Ai burju do Debata mangalehon tu sude halak.+ 6 Toktong ma i dipangido ibana di bagasan haporseaon+ jala unang ma ganggu rohana.+ Ai halak na ganggu rohana, dos do i songon galumbang ni laut na niullus ni alogo. 7 Unang ma dirippu halak sisongon i, lehonon ni Jahowa* manang aha tu ibana. 8 Ai halak na mardua roha+ do i jala dang boi ditottuhon i manang aha siulaonna.

9 Marlas ni roha ma hamu akka dongan na pogos, ai nungnga dipatimbo Debata hamu.+ 10 Marlas ni roha ma hamu akka dongan na mora,+ ala nungnga marsiajar hamu asa marserep ni roha. Ai lao salpu do halak na mora songon akka bunga na di ladang. 11 Tikki bissar mataniari, malos ma suan-suanan i alani mohopna. Marurus ma akka bungana jala mago ma haulionna. Songon i ma halak na mora, na lao salpu do ibana rap dohot akka usahana.+

12 Marlas ni roha ma halak na setia nang pe adong sitaonon.+ Ai molo tahan ibana diuji, jaloonna ma mahkota hangoluan*+ songon janji ni Jahowa* tu halak na toktong makkaholongi Ibana.+ 13 Molo masa sitaonon tu sasahalak, unang ma didok ibana, “Debata do na manguji au.” Ai dang boi ujion Debata marhite na jahat jala dang diuji Ibana manang ise pe. 14 Alai diuji do ganup halak ala ditarik jala dijorat sakkap-sakkapna sandiri.+ 15 Molo sai dipikkiri sakkap-sakkapna i, diulahon ma dosa.* Molo dung diulahon dosa, parohon hamatean ma i.+

16 Ale akka dongan na huhaholongi, unang ma lilu hamu. 17 Sude silehon-lehon* na denggan jala na sun denggan sian banua ginjang do i ro.+ Turun sian Sitoppa hatiuron+ i, na so olo muba songon parhusor ni bayangan.+ 18 Hombar tu sakkapna, dilehon Ibana do tu hita hangoluan marhite hatana na sittong+ i. Dibahen Ibana do songon i tu hita, asa hita na parjolo dipillit sian akka na ditoppa Ibana.+

19 Ale akka dongan na huhaholongi, boto hamu ma on: Ganup halak ikkon hatop manangihon, manat makkatai,+ lambat tarrimas.+ 20 Ai halak na tarrimas dang diulahon i na sittong* di jolo ni Debata.+ 21 Alani i, bolokkon hamu ma sude na ramun* dohot sude* pangalaho na jahat.+ Marhite serep ni roha, jalo hamu ma hata ni Debata na disuan Ibana tu bagasan rohamuna na boi paluahon hamu.

22 Unang paoto-oto hamu dirimuna marhite holan na manangihon hata i,+ alai ikkon ulahononmuna do hata i. 23 Ai halak na holan manangihon hata i alai dang mangulahon,+ dos ma i songon halak na mangida bohina di kaca. 24 Diida ibana do dirina, dung i lao ma ibana jala pittor lupa songon dia rupana. 25 Alai halak na mamareso patik na sun denggan+ na parohon haluaon i, jala na toktong mambahen songon i, ibana ma halak na manangihon, na mangulahon jala na so makkalupahon hata i. Marlas ni roha ma ibana ala diulahon i.+

26 Molo adong na mandok di bagasan rohana sisomba Debata ibana,* alai dang dirajai* dilana,+ na paoto-otohon dirina do ibana disi jala dang adong lapatanna ibana manomba Debata. 27 On do agama na so ramun jala na ias di jolo ni Debata Ama i: Mangurus na so marama na so marina+ dohot na mabalu+ tikki marsitaonon nasida.+ Jala na manjaga dirina asa unang ramun dibahen portibi on.+

2 Hamu akka donganku, molo dipaimbar-imbar hamu donganmuna, tutu do porsea hamu tu Tuanta Jesus Kristus na marmulia i?+ 2 Molo ro tu parpunguanmuna halak na marcincin mas di jari-jarina jala marabit na arga, alai ro ma muse halak na pogos marabit na buruk, 3 gabe ussangap do dibahen hamu tu halak na marpakkean na uli i jala dohononmu, “Hundul ma ho tu hundulan na denggan on!” Hape tu halak na pogos i didok hamu do, “Disan ma ho jongjong!” manang, “Di labbung ni patton ma ho hundul!”+ 4 Molo songon i do dibahen hamu, dang na paimbar-imbarhon halak hamu disi?+ Jala dang na manguhumi mangihutton pikkiran na jahat hamu?+

5 Tangihon hamu ma akka dongan na huhaholongi. Dang na dipillit Debata halak na pogos di portibi on gabe na mora di haporseaon?+ Halak na songon i do dipillit Debata lao manjalo Harajaon na dijanjihon Ibana tu akka halak na makkaholongi Ibana.+ 6 Alai dang sangap dibahen hamu tu akka na pogos. Dang na halak na mora na mambahen na haccit tu hamu+ jala na manarat hamu tu pengadilan? 7 Dang na nasida na mangaleai goar na denggan naung dilehon tu hamu? 8 Mangulahon na denggan do hamu molo diihutton hamu patik na umbalga* na adong di na tarsurat i, “Ikkon haholonganmu do donganmu jolma doshon dirim.”+ 9 Alai molo sai dipaimbar-imbar hamu donganmuna,+ nungnga mardosa hamu disi jala on ma na patuduhon na dialo hamu patik i.+

10 Molo dioloi sasahalak do sude Patik i, alai adong sada paretta sian i na dialo, gabe dohot do sude Patik i dialo ibana.+ 11 Ai didok Debata do, “Unang ho mangalakkup,”+ jala didok do muse, “Unang ho mambunu.”+ Nang pe dang mangalakkup ho alai molo mambunu ho, nungnga dilanggar ho patik i. 12 Ala naeng diuhumi do hamu mangihutton patik ni halak na merdeka,* toktong ma hamu makkatai jala marpangalaho hombar tu patik i.+ 13 Ai dang maralang-alang* Debata manguhumi halak na so marasi ni roha.+ Dumenggan do patuduhon asi ni roha sian na manguhumi.*

14 Akka donganku, aha ma labana molo didok sasahalak adong haporseaonna alai dang dipatuduhon marhite parniulaon?+ Boi ma haporseaon sisongon i paluahon ibana?+ 15 Molo adong akka donganmuna bawa manang borua na so adong pakkeanna* jala hurang sipanganonna siganup ari, 16 dung i didok hamu ma, “Lao ma hamu di bagasan dame, sai anggiat ma adong pakkeanmuna dohot sipanganonmuna siganup ari,” alai dang adong dilehon hamu na porlu di ibana, aha ma guna ni i?+ 17 Suang songon i ma, mate do haporseaon molo so adong parniulaon.+

18 Dung i dohonon ni sasahalak ma, “Di ho adong haporseaon, di au adong parniulaon. Patudu ma haporseaonmu na so marparniulaon i, asa hupatudu haporseaokku marhite parniulaokku.” 19 Dang na porsea hamu na holan sada do Debata? Denggan ma i. Alai suru-suruan na jahat pe porsea do disi jala mabiar.+ 20 Ale jolma na oto, porlu do patuduhonon tu ho na so marguna haporseaon molo so adong parniulaon? 21 Tikki dipelehon ompunta si Abraham anakna si Isak di langgatan,+ dang na marhite parniulaonna gabe didok ibana mangulahon na sittong?* 22 Nungnga diida hamu, hombar do parniulaonna tu haporseaonna jala gabe sun denggan do haporseaonna marhite parniulaonna.+ 23 Gabe saut ma na nidok ni na tarsurat i, “Porsea do si Abraham tu Jahowa.* Alani haporseaonna i didok do ibana mangulahon na sittong,”+ jala didok do ibana ale-ale ni Jahowa.*+

24 Sian on ma botoonmuna, marhite parniulaon do dohonon na sittong sasahalak dang holan sian haporseaonna. 25 Suang songon i do na masa tu si Rahab boru-boru na so hasea i. Didok do ibana sittong marhite parniulaonna. Ai dijalo ibana do mata-mata ni halak Israel jala diurupi ibana do nasida mulak sian dalan na asing.+ 26 Mate do daging molo so adong hosa,+ songon i ma mate do haporseaon molo so adong parniulaon.+

3 Hamu akka donganku, dang porlu godang sian hamu na ikkon gabe guru. Ai molo gabe guru hita, umbalga do tanggung jawabta tu Debata.+ 2 Sude do hita jotjot sala.+ Molo adong halak na so hea sala di pakkataion, halak na so mardosa* do i, na boi mangarajai saluhut dagingna. 3 Molo tabahen kokkang tu baba ni hoda asa dioloi hita, boi ma toguotta hoda i. 4 Parrohahon hamu ma akka kapal. Nang pe balga kapal i jala dionjar alogo na gogo, alai marhite amudi* na massai gelleng do i dipadalan mangihutton lomo ni roha ni halak na mamboan kapal i.

5 Songon i do nang dila i. Gelleng do i alai godang do hatana. Ida ma harangan na bidang, boi do i tartutung bahenon ni api na gelleng. 6 Songon api do dila i.+ Gok hajahaton do dila i ala boi do i mambahen ramun* saluhut daging.+ Bahenon ni i do ngolu ni sasahalak tu api jala sian Gehena* do api i. 7 Boi do jinak akka binatang liar, pidong, binatang na mangissir, dohot akka binatang na di laut. Jala nungnga jinak akka binatang i dibahen jolma. 8 Alai dang adong jolma na boi pajinakkon dila. Na jahat do i jala maol do mangarajai i, gok do disi raccun na pamatehon.+ 9 Dila do tapakke mamuji Jahowa* Ama i, jala laos dila do tapakke mamburai jolma na ditoppa “suman tu Debata”.+ 10 Sian pamangan do kaluar pasu-pasu dohot bura.

Hamu akka donganku, dang tama masa akka sisongon i.+ 11 Boi ma kaluar aek na tonggi dohot aek na paet sian sada mata mual? 12 Hamu akka donganku, tung boi ma hau ara marparbuehon jetun? Manang hau anggur marparbuehon ara?+ Songon i ma, dang boi kaluar aek na assim sian aek na tonggi.

13 Adong do na marbisuk di tonga-tongamuna? Molo adong, ikkon patuduhononna do i sian pambahenanna na denggan. Jala diulahon ma saluhutna i di bagasan lambok ni roha na ro sian bisuk i. 14 Molo adong di hamu late ni roha+ dohot roha na sai naeng marbada,*+ unang ma dietong hamu na umbisuk hamu+ jala gabe margabus hamu. 15 Dang bisuk na sian ginjang akka sisongon i, alai sian portibi on do. Nasida ma akka halak na mangihutton hisap-hisap ni daging+ dohot suru-suruan na jahat. 16 Molo adong di hamu late ni roha dohot roha na sai naeng marbada,* disi ma adong na gaor dohot sude hajahaton.+

17 Alai na parjolo sian sudena i,+ bisuk na sian ginjang i mambahen sasahalak marroha na ias,+ dung i marroha na dame,+ lambok marroha,* mangoloi,+ gok asi ni roha dohot akka ulaon na denggan, dang paimbar-imbarhon jolma,+ jala dang munafik.+ 18 Asing ni i, parbue ni akka ulaon na denggan disuan di bagasan dame+ tu akka halak sibahen dame.*+

4 Sian dia do ro parmusuon dohot parbadaan na masa di tonga-tongamuna? Dang na sian hisap-hisap ni dagingmuna i na mangarajai hamu?+ 2 Adong do na dipangido rohamuna alai dang dapotmuna i. Gabe sogo ma rohamuna* jala late ma rohamuna, hape tong do dang dapotmuna i. Dung i gabe marbada ma hamu jala marmusu.+ Alai tong do dang dapotmuna i ala dang dipangido hamu tu Debata. 3 Tikki dipangido hamu pe i tu Debata, dang dapotmuna i. Ai sala do sakkap ni rohamuna. Dipangido hamu do i lao pasombu hisap-hisap ni dagingmuna.

4 Hamu akka na so setia,* na so diboto hamu do, na marmusu do hamu tu Debata molo marale-ale hamu tu portibi on? Manang ise na naeng marale-ale tu portibi on, na mambahen dirina do ibana gabe musu ni Debata.+ 5 Manang dirippu hamu do na so marlapatan ayat na mandok, “Late ni roha do na mambahen gabe naeng appunatta sude”?+ 6 Alai boi do asi ni roha ni Debata mangurupi hita manaluhon late ni roha i. Alani i ma didok, “Ai sogo do roha ni Debata tu siginjang roha,+ alai dipatuduhon Ibana do asi ni rohana na massai balga i tu halak na serep marroha.”+

7 Alani i, oloi hamu ma Debata.+ Alo hamu ma Sibolis,+ dung i lari ma ibana sian hamu.+ 8 Pajonok hamu ma tu Debata, dung i pajonokonna ma tu hamu.+ Paias ma tanganmuna, hamu akka pardosa.+ Pabadia ma rohamuna,+ hamu akka na mardua roha. 9 Marsak ma hamu, mangandungi, jala tumatangis.+ Bahen hamu ma ekkelmuna gabe andung-andung jala las ni rohamuna gabe arsak ni roha. 10 Patutoru hamu ma dirimuna di jolo ni Jahowa,*+ dung i patimboonna ma hamu.+

11 Hamu akka dongan, unang ma masiparoa-roaan hamu.+ Manang ise na paroa-roahon manang na manguhumi donganna, na mangalo jala na manguhumi patik do ibana disi. Molo diuhumi hamu patik, dang siula patik hamu alai gabe hakim do hamu. 12 Ai holan sada do Silehon Patik dohot Hakim.+ Jala holan Ibana do na boi paluahon dohot mangaripasson.+ Alai ise ma ho, umbahen diuhumi ho donganmu?+

13 Saonari tangihon hamu ma, hamu akka na mandok, “Sadari on manang marsogot lao ma hami tu sada kota. Disi ma hami sataon martiga-tiga lao mangalului uttung,”+ 14 hape dang diboto hamu songon dia ngolumuna sogot.+ Songon timus do hamu, na tarida satokkin dung i mago ma.+ 15 Sasittongna ikkon songon on do dohononmuna, “Molo lomo roha ni Jahowa,*+ mangolu ma hami jala bahenonnami ma songon on dohot songon an.” 16 Alai ginjang do rohamuna jala dipatimbo-timbo hamu do dirimuna. Ulaon na jahat do patimbo-timbohon diri. 17 Alani i, molo diboto sasahalak mangulahon na denggan hape dang diulahon, mardosa do ibana disi.+

5 Hamu akka na mora, tangihon hamu ma, tangis ma hamu jala mangandungi, ai naeng ro nama hasusaan tu hamu.+ 2 Nungnga busuk hamoraonmuna jala nungnga diallang ngitngit pakkeanmuna.+ 3 Nungnga tasikon mas dohot perakmuna. Tasik i ma na patuduhon hasalaanmuna dohot na mangallang dagingmuna. Dipapungu hamu do arta na gabe songon api di akka ari parpudi.+ 4 Ida ma! Mangangguki do akka parkarejo na mamanen ladangmuna ala dang dilehon hamu upa ni nasida. Nungnga sahat angguk-angguk ni akka parkarejo i tu pinggol ni Jahowa* Pamimpin ni Akka Tentara.*+ 5 Holan na mangalului hamoraon dohot hasonangan do hamu di tano on. Dipasombu hamu do rohamuna songon binatang na dipamokmok tu ari pamotongan.+ 6 Dihukum jala dibunu hamu do halak na mangulahon na sittong.* Dang na gabe sogo roha ni Debata tu hamu alani i?

7 Hamu akka dongan, sabar ma hamu sahat tu haroro ni Tuan i.+ Ida ma! Sabar do pangula paima-imahon parbue na denggan* sian tano on. Sabar do ibana paimahon mulai sian musim udan na parjolo* sahat tu na ro musim udan na parpudi.+ 8 Ikkon sabar do nang hamu.+ Patogu ma rohamuna, ai nungnga jonok haroro ni Tuan i.+

9 Hamu akka dongan, unang ma marungut-ungut* hamu sama hamu asa unang diuhumi hamu.+ Ida ma! Nungnga jongjong Hakim i di jolo ni pintu. 10 Hamu akka dongan, tiru hamu ma hasabaron+ ni akka panurirang* na manaon hasusaan+ ala makkatai di bagasan goar ni Jahowa.*+ 11 Ida ma! Hudok hami do marlas ni roha* halak na martahan+ manaon hasusaan. Nungnga dibege hamu, martahan do si Job+ manaon hasusaan jala nungnga diboto hamu songon dia Jahowa* mamasu-masu ibana.+ Sian i ma diboto hamu na parholong do Jahowa* jala parasi roha.+

12 Hamu akka donganku, di ginjang ni saluhutna unang be marsumpa hamu marhite banua ginjang manang marhite tano on manang marhite manang aha pe. Alai molo olo, dok ma “Olo”. Molo dang, dok ma “Dang”,+ asa unang diuhumi hamu.

13 Adong do na marsitaonon di tonga-tongamuna? Toktong ma ibana martangiang.+ Adong do na marlas ni roha di tonga-tongamuna? Diendehon ibana ma ende puji-pujian.*+ 14 Adong do na marsahit di tonga-tongamuna? Dijou ibana ma akka sintua+ di huria, asa ditangiakkon jala dibahen miak tu ibana+ di bagasan goar ni Jahowa.* 15 Tangiang na di bagasan haporseaon ma na pamalum na marsahit* i, jala pamalumon ni Jahowa* ma ibana. Molo mangulahon dosa do ibana, sesaon ni Debata ma dosana.

16 Alani i, masiakkuan dosa+ ma hamu sama hamu jala masitangiangan, asa malum hamu. Ai margogo do tangiang ni halak na mangulahon na sittong jala balga do pengaruh ni i tu na asing.+ 17 Rap jolma do hita dohot si Elia jala dos do pakkilalaatta tu pakkilalaanna. Tikki marsitutu ibana martangiang asa unang ro udan, dang ro udan saleleng tolu satonga taon.+ 18 Dung i martangiang ma ibana muse, ro ma udan jala ro ma hasil ni tano i.+

19 Hamu akka donganku, molo adong di tonga-tongamuna na lilu sian hasittongan i, jala adong na mamboan ibana mulak muse, 20 boto hamu ma on, manang ise na mamboan mulak sahalak pardosa sian dalanna na lilu i, na paluahon pardosa i+ do ibana sian hamatean jala disesa ma dosana na godang i.+