SURAT NA PARJOLO TU SI TIMOTEUS

1 Sian si Paulus na gabe apostel ni Kristus Jesus, mangihutton paretta ni Debata Sipalua hita dohot mangihutton Kristus Jesus na gabe fondasi ni janji ni Debata na tapaima-ima i.+ 2 Mandapotton si Timoteus*+ dongan sahaporseaon na songon anakku sandiri.+

Anggiat ma dipatuduhon tu ho haburjuon,* asi ni roha, dohot hadameon na sian Debata Ama i dohot sian Kristus Jesus Tuanta i.

3 Songon naung hea hudok tu ho di tikki naeng borhat au tu Makedonia, hupangido ma muse tu ho asa tinggal ho di Epesus. Pasingot ma disi akka halak na mangajarhon ajaran na sala, 4 nang halak na mangalehon rohana tu akka cerita na so tutu+ dohot tu akka tarombo. Holan parohon parsalisian do i jala dang marguna.+ Ai dang ro sian Debata akka i jala dang boi i patoguhon haporseaon. 5 Sasittongna, hubahen pe sipaingot* on asa adong do di hamu holong+ na sian roha na ias, sian panggora ni roha na denggan, dohot sian haporseaon+ na tarida marhite parniulaon. 6 Alai na deba, dang diulahon be akka i, gabe diihutton nasida ma pakkataion na so marguna.+ 7 Naeng do nasida gabe guru+ na mangajarhon patik, alai dang diattusi nasida na nidok ni nasida manang na diajarhon nasida i.

8 Alai taboto do, denggan do Patik i molo diulahon sude. 9 Ingot ma, dibahen pe patik i dang tu halak na mangulahon na sittong. Alai dibahen do i tu halak na so mangoloi+ dohot tu pangalo, tu halak na so pasangappon Debata dohot tu halak pardosa, tu halak na so setia dohot tu halak na so manjalo akka na badia, tu halak na mambunu bapakna, omakna, manang halak na asing. 10 Dibahen do i nang tu halak na mangulahon seks na so patut,* tu bawa na mangulahon seks dohot bawa, tu panakko, tu pargabus, tu na so pasautton sumpana,* dohot tu halak na mangulahon akka na maralo tu ajaran na sittong.+ 11 Ajaran na sittong i hombar do tu barita na uli na marmulia naung dipasahat tu au,+ i ma na sian Debata na marlas ni roha i.

12 Mandok mauliate do au tu Tuanta Kristus Jesus na mangalehon gogo tu au. Dipillit ibana do au gabe parhobasna,+ ai diboto do na setia au. 13 Hape ginjang do rohakku najolo, huleai do Debata jala hulelei naposona.+ Alai dipatuduhon do asi ni rohana tu au, ai huulahon pe i andorang so porsea do au jala ala na hurang do parbinotoakku. 14 Alai diusehon Tuhanta* do asi ni roha na massai balga i tu au. Dilehon do nang haporseaon dohot holong na di bagasan Kristus Jesus. 15 Sittong jala boi do tahaporseai saluhut hata on: Ro do Kristus Jesus tu portibi on lao paluahon akka pardosa.+ Sian akka pardosa i, dosakku ma na unggodang.+ 16 Alai nang pe songon i, asi do roha ni Kristus Jesus tu au. Asa marhite au, boi ma dipatudu ibana hasabaronna. Dibahen ibana do au gabe sitiruon tu akka halak na naeng porsea tu ibana lao mandapot hangoluan saleleng ni lelengna.+

17 Hasangapon dohot hamuliaon na saleleng ni lelengna ma di Raja na manoktong,+ na so boi mate,+ na so tarida,+ i ma Debata na sasada i!+ Amen.

18 Hupasahat do sipaingot* on tu ho Timoteus anakku mangihutton na dipaboa Debata* taringot tu ho. Marhite sipaingot i, boi ma toktong diulahon ho na denggan sian nasa gogom,+ 19 huhut mampartahatton haporseaon dohot panggora ni roha na denggan.+ Adong do deba na manadikkon akka i na mambahen sega haporseaon ni nasida. 20 Sian tonga-tonga ni nasida, i ma si Himeneus+ dohot si Aleksander naung hupasahat tu Sibolis,*+ asa unang dileai nasida be Debata.

2 Parjolo sahali, hujujui ma hamu asa mambahen elek-elek, tangiang, pangidoan taringot na porlu di na asing, dohot hamauliateon humokkop saluhut halak. 2 Dohot ma i muse humokkop akka raja dohot akka na marhuaso,+ asa dame ngolutta jala asa boi hita marsitutu mangulahon lomo ni roha ni Debata di saluhut parngoluotta.+ 3 Denggan do i jala hombar tu lomo ni roha ni Debata Sipalua hita.+ 4 Ai lomo do rohana asa malua saluhut jolma+ jala boi mandapot parbinotoan na bagas taringot tu hasittongan i. 5 Sada do Debata+ jala sada do parhitean*+ ni Debata tu jolma,+ i ma Kristus Jesus.+ Tikki jolma ibana, 6 dilehon do dirina gabe tobusan tu saluhut jolma.+ Taringot i ma na lao dipaboa di tikki naung ditottuhon. 7 Alani i do au dipillit+ gabe parbarita dohot apostel lao mangajari+ akka bangso+ asa marhaporseaon nasida jala mamboto hasittongan. Sittong do na hudok on, dang margabus au.

8 Alani i dipangido rohakku do tu akka bawa di ganup inganan, asa toktong nasida badia jala diangkat tanganna tikki martangiang,+ dang mardongan muruk+ dohot parbadaan.+ 9 Songon i ma nang akka borua, dipakke ma pakkean na tama mardongan toruk ni roha dohot bisuk. Unang ma dipabagak-bagak dirina marhite mandandani obuk, mamakke mas, mutiara, manang pakkean na massai arga.+ 10 Alai dipatuduhon ma i marhite akka ulaon na denggan, ai i do na tama tu akka borua na manomba Debata.+

11 Hohom ma akka borua mardongan unduk ni roha tikki marsiajar di huria.+ 12 Dang huloas borua mangajari manang mangarajai bawa. Alani i toktong ma ibana hohom.+ 13 Ai parjolo do si Adam ditoppa,* dung i pe asa si Hawa.+ 14 Jala dang si Adam na dioto-otoi,* alai borua i do na dioto-otoi+ jala gabe mardosa. 15 Alai molo marianakkon+ sahalak borua, dang ulahononna be na jahat molo toktong ibana* di bagasan haporseaon, holong, bisuk, jala badia.+

3 Tutu do hata on: Molo marsitutu sahalak bawa naeng gabe sintua,*+ na lomo do rohana mandapot ulaon na denggan. 2 Unang ma adong siissakan di sahalak sintua,* holan sada istrina, boi mangarajai dirina, marbisuk,+ taratur,* burju manjalo tamu,+ malo mangajari,+ 3 dang parmabuk,+ dang halak na kasar,* alai parroha na dame,+ dang parbada,+ dang holongan di hepeng,*+ 4 denggan mamimpin* keluargana, anakkonna pangoloi jala marpangalaho na denggan+ 5 (molo dang boi sahalak bawa mamimpin* keluargana, songon dia ma ibana boi mangaradoti huria ni Debata?), 6 dang halak na baru porsea+ asa unang ginjang rohana jala gabe diuhumi songon Sibolis. 7 Asing ni i, ikkon denggan do pandapot ni halak na di luar ni huria taringot tu ibana,+ asa unang diissaki* halak ibana jala gabe dijorat Sibolis.

8 Songon i ma nang akka parhobas, ikkon halak na martanggung jawab do nasida, dang pargabus, dang parmabuk,* dang holongan di hepeng manang holan mangalului uttung tu dirina sandiri,+ 9 alai halak na maniop rahasia na badia na hombar tu haporseaon* i, di bagasan panggora ni roha na denggan.+

10 Asing ni i, ikkon jolo diuji do nasida lao mamboto tama manang dang nasida gabe parhobas. Molo dang adong siissakan di nasida,+ boi ma nasida gabe parhobas.

11 Songon i ma nang akka borua, ikkon halak na martanggung jawab do nasida, dang olo paroa-roahon donganna,+ boi mangarajai dirina, jala setia di saluhutna.+

12 Ikkon sada do istri ni parhobas. Ikkon denggan do ibana mamimpin ianakkonna dohot keluargana. 13 Ai molo denggan bawa marhobas, denggan ma pandapot ni halak taringot tu ibana. Jala dang adong be na mangabbati ibana paboahon haporseaonna taringot tu Kristus Jesus.

14 Naeng do nian tibu au ro mandapotton ho. Alai husuratton do i sude tu ho 15 asa molo tung pe leleng au ro, nungnga diboto ho songon dia marpangalaho di keluarga ni Debata,+ i ma huria ni Debata na mangolu i, na gabe tiang dohot fondasi ni hasittongan i. 16 Sasittongna, balga situtu do rahasia na badia taringot tu ulaon manomba Debata: ‘Gabe jolma do ibana tikki di tano on.+ Didok Debata do ibana mangulahon na sittong,+ dung dipahehe ibana tu banua ginjang jala gabe rap ma ibana dohot akka suru-suruan.+ Dibaritahon do taringot tu ibana di tonga-tonga ni akka bangso,+ dihaporseai di saluhut portibi on,+ jala diangkat do ibana tu banua ginjang di bagasan hasangapon.’

4 Alai takkas do dipaboa marhite tondi parbadia, di tikki na naeng ro adong do manang na piga na manadikkon haporseaon ni nasida. Ditangihon nasida do akka hata na mangaliluhon+ dohot akka ajaran ni suru-suruan na jahat. 2 Dipasahat halak na munafik do i na jotjot margabus+ jala naung sega panggora ni rohana, songon na matutung binahen ni bosi na mohop. 3 Diorai nasida do halak mardongan saripe.+ Diorai do muse halak mangallang piga-piga sipanganon,+ hape Debata do na mambahen i sude. Dibahen do i lao allangon+ ni akka na porsea+ dohot halak na mananda hasittongan i dung ditangiakkon tu Debata. 4 Denggan do sude na ditoppa Debata.+ Alani i, sude do boi jaloon+ molo dijalo mardongan mauliate. 5 Ai nungnga dipabadia i marhite hata ni Debata dohot tangiang.

6 Pasahat ma poda on tu akka dongan, asa gabe parhobas ni Kristus Jesus na denggan ho. Ai nungnga diajarhon tu ho akka hata na mambahen hita porsea tu Debata. Jala nungnga diajarhon tu ho ajaran na denggan, i ma ajaran na niihuttonmi.+ 7 Unang ma tangihon akka cerita na so tutu+ na dipaboa akka halak,* na mambahen sasahalak dang pasangappon Debata. Alai, marsitutu ma ho* mangoloi paretta ni Debata. 8 Otik do guna ni mangalatik daging,* alai molo marsitutu mangoloi paretta ni Debata, marguna do i tu ngolutta saonari dohot tu ngolutta di ari na naeng ro.+ 9 Sittong jala boi do tahaporseai saluhut hata on. 10 Alani i ma hita marsitutu jala dang marnaloja mangulahon i.+ Ai tapaima-ima do janji ni Debata na mangolu i, Sipalua+ saluhut jolma,+ tarlumobi akka halak na setia.

11 Toktong ma parettahon jala ajarhon akka i. 12 Unang ma adong na leas rohana tu ho ala poso dope ho. Alai gabe sitiruon ma ho tu akka halak na setia. Gabe sitiruon ma ho di pakkataion, di parniulaon, di holong ni roha, di haporseaon, jala toktong ma ho badia. 13 Sahat tu na ro au, marsitutu ma ho manjahahon i di jolo ni natorop,+ mamodahon,* jala mangajarhon i. 14 So tung lupa ho tu silehon-lehon ni Debata na adong di ho. Dilehon do i tikki diappehon akka sintua tanganna tu ho, songon na dipaboa Debata* taringot tu ho.+ 15 Rimangi ma akka i. Ulahon ma i sian nasa gogom, asa diida sude halak na lam togu parale-aleonmu tu Debata. 16 Toktong ma parrohahon dirim dohot na diajarhonmi.+ Marsitutu ma ho mangulahon i, ai molo diulahon ho i na paluahon dirim do ho dohot na manangihon ho.+

5 Unang ma kasar makkatai tu bawa na matua,+ alai bahen ma nasida songon bapakmu tikki paingotton nasida. Tu akka bawa na poso bahen ma nasida songon haha anggim. 2 Tu akka borua na matua bahen ma nasida songon omakmu. Tu akka borua na poso bahen ma nasida songon ibotom, jala dang marsakkap na asing-asing.

3 Parrohahon* ma akka ina na mabalu na so adong be na mangurus.+ 4 Alai molo adong dope anakkonna manang pahoppuna, nasida ma na parjolo mangoloi paretta ni Debata taringot tu na mangurus keluarga.+ Jala ikkon baloson ni nasida do akka na denggan na dibahen natua-tua ni nasida dohot oppung ni nasida.+ Ai hombar do i tu lomo ni roha ni Debata.+ 5 Akka ina na mabalu na porlu diurupi jala na so adong be na mangurus, tu Debata ma ibana marhaposan+ jala sai martangiang ma ibana mambahen pangidoan arian nang borngin.+ 6 Alai anggo holan mangulahon hisap-hisap ni dagingna do sahalak ina na mabalu, naung mate do ibana nang pe mangolu dope. 7 Alani i toktong ma pasahat tudu-tudu* on tu nasida, asa unang adong na mangaleai nasida. 8 Alai manang ise na so mangurus na di ibana,* tarlumobi anggota keluargana, na so adong be haporseaon ni i jala nungnga unjahat ibana sian akka na so porsea.+

9 Sahalak ina na mabalu na boi dipillit lao diurupi, i ma na marumur lobi sian 60 taon,* sada suamina, 10 jala diboto halak do ibana siulahon na denggan.+ Uppamana denggan do ibana pagodang-godang ianakkonna,+ burju do ibana manjalo tamu,+ disussi* ibana do pat ni akka na badia,+ diurupi ibana do akka na susa,+ jala rade do ibana mangulahon sude ulaon na denggan.

11 Alai unang ma dipillit ina na mabalu na poso dope. Molo tubu hisap-hisap ni dagingna, gabe maol ma ibana marhobas tu Kristus, ai sai naeng muli ma ibana muse. 12 Jala gabe diuhumi ma nasida ala dang digohi janji ni nasida na parjolo i. 13 Ai dang olo be nasida karejo jala holan na martandangi nama ulaon ni nasida. Asing ni i, lomo do roha ni nasida pahata-hata halak, mangattoi na so urusanna,+ jala mangattoi na so ulaonna. 14 Alani i, didok rohakku denggan ma ina na mabalu na poso asa marhasohotan,+ marianakkon,+ mangurus keluargana asa unang adong dalan ni akka musutta lao mangissaki. 15 Sasittongna, adong do deba sian nasida naung manimbil jala mangihutton Sibolis. 16 Molo adong ina na mabalu di keluarga ni sahalak donganta borua, diurupi ma ina na mabalu i asa unang gabe tanggungan ibana di huria. Dung i, boi ma huria mangurupi akka ina na mabalu na so adong be na mangurus.+

17 Ikkon tapasangap do dua hali loppit+ akka sintua na denggan mangurus huria,+ tarlumobi akka sintua na paboahon jala na mangajarhon hata ni Debata sian nasa gogona.+ 18 Ai didok na tarsurat i do, “Unang ma tutup baba ni lombu tikki dibahen mardege gandum,”+ jala “Tama do sahalak parkarejo mandapot upa.”+ 19 Unang ma tangihon alu-alu ni halak taringot tu sahalak sintua,* molo so adong hatorangan sian dua manang tolu saksi.+ 20 Pissang+ ma halak na mangulahon dosa di jolo ni natorop,+ asa gabe sipasingot i tu* natorop i. 21 Di jolo ni Debata, di jolo ni Kristus Jesus, dohot di jolo ni suru-suruan na pinillit ni Debata, huparettahon ma tu ho asa diihutton ho tudu-tudu on jala unang paimbar-imbar jolma tikki mangulahon on.+

22 Unang ma pahatoppu mamillit sasahalak* lao mangulahon sada tanggung jawab.+ Unang ma parsidohot ho di dosa ni halak. Jaga ma dirim asa toktong ho badia.

23 Unang ma holan aek inum,* alai sipata inum ma saotik anggur. Ai jotjot do haccit butuham jala jotjot do ho marsahit.

24 Adong do deba halak na hatop tarboto dosana, na mambahen nasida pittor diuhumi. Alai na deba, di pudian ni ari pe dosana i tarboto.+ 25 Suang songon i ma akka ulaon na denggan, idaon ni halak do i.+ Molo dang tarida dope, dang torus i buni.+

6 Dipasangap akka parkarejo ma tuan ni nasida be,+ asa unang marlea goar ni Debata dohot ajaranna.+ 2 Tarlumobi molo sahalak na porsea do tuanna i, unang ma gabe moru sangap ni parkarejo i tu tuanna ala dongan sahaporseaonna i. Gariada, ikkon dumenggan ma nian bahenon ni parkarejo i, ai dongan sahaporseaon na dihaholongi ibana do na mandapot laba sian ulaonna i.

Toktong ma ajarhon jala podahon sudena on. 3 Manang ise na mangajarhon ajaran na asing jala na so mangihutton tudu-tudu na sittong na sian Tuanta Jesus Kristus,+ manang na sian ajaran na hombar tu lomo ni roha ni Debata,+ 4 siginjang roha do i jala na so mangattusi manang aha.+ Nungnga sahitna* sai naeng marsoal jala marbada alani akka hata na so porlu.+ On ma na mambahen halak gabe marlate ni roha, marbada, mangaleai,* dang porsea tu na asing, 5 jala mambahen parsoalan na so marujung taringot tu akka na so porlu. On ma na diulahon akka naung sega pikkiranna+ dohot na so adong be hasittongan di rohana. Dirippu nasida do dalan mangalului uttung manomba Debata.+ 6 Sasittongna godang do labana manomba Debata,+ molo puas ibana tu na adong di ibana. 7 Ai dang adong na taboan tikki tubu hita tu portibi on jala dang adong na taboan molo dung mate hita.+ 8 Alani i molo adong sipanganon dohot pakkeatta,* las ma rohatta disi.+

9 Alai manang ise na marsakkap naeng mamora, tarjorat+ ma ibana jala ditarik akka sakkap haotoon dohot sakkap na parohon jea, na mambahen susa jala na mambahen hancur sasahalak.+ 10 Ai holong ni roha tu hepeng do urat ni nasa hajahaton. Alani i do adong deba na lilu sian haporseaon jala parohon na haccit tu dirina alani godang ni hasusaan.+

11 Alai anggo ho, ala naposo ni Debata do ho, padao ma dirim sian akka i. Marsitutu ma ho mangulahon na sittong,* mangulahon lomo ni roha ni Debata, patuduhon haporseaon, holong, hasabaron, dohot lambok ni roha.+ 12 Partahatton ma haporseaonmi sian nasa gogom. Marsitutu ma ho asa dapotmu hangoluan na saleleng ni lelengna i. Ai tusi do ho dijou Debata jala on ma na ikkon paboaonmu tu akka halak di jolo ni natorop.

13 Di jolo ni Debata na mangalehon hangoluan tu saluhutna dohot di jolo ni Kristus Jesus na takkas paboahon haporseaonna di jolo ni si Pontius Latus,+ hudok ma tu ho, 14 oloi ma paretta on asa unang adong na hurang di ho. Jala dang adong siissakan sian ho sahat tu na dipatuduhon Tuanta Jesus Kristus+ huasona.* 15 Di tikki naung ditottuhon, patuduhonon ni Parhuaso na sasada i jala na gok las ni roha i ma huasona. Ibana ma Raja ni akka raja jala Tuan ni akka tuan.+ 16 Holan ibana do na so boi mate.+ Maringanan do ibana di na tiur+ na so boi jonohan ni manang ise pe. Dang adong halak na hea mangida ibana jala dang boi berengon ni jolma ibana.+ Di ibana ma hasangapon dohot huaso ro di saleleng ni lelengna! Amen.

17 Podai* ma akka na mora di tikki* on asa unang ginjang roha ni nasida jala asa unang marhaposan nasida tu hamoraon na boi mago.+ Alai marhaposan tu Debata ma nasida, na burju paradehon sude na mambahen las rohatta.+ 18 Dok ma tu nasida asa mangulahon na denggan, mamora di akka ulaon na denggan, rade mangalehon sian las ni rohana, jala olo marbagi tu na asing.+ 19 Songon i ma dalanna nasida papunguhon hamoraon na sian Debata,+ asa boi dapot ni nasida hangoluan na saleleng ni lelengna di ari na naeng ro.+

20 Ale Timoteus, jaga ma naung dipasahat tu ho.+ Pasiding ma pakkataion na so marguna, na so pasangappon Debata, dohot parsoalan taringot tu parbinotoan na so sittong.+ 21 Ai adong do deba na lilu sian haporseaonna ala mangihutton parbinotoan na so sittong i.

Anggiat ma asi ni roha ni Debata na massai balga i na sai mandongani ho.