SURAT NA PADUAHON TU HURIA NA DI TESSALONIK

1 Sian si Paulus, si Silwanus,* dohot si Timoteus.+ Mandapotton huria na di Tessalonik na marsada dohot Debata Ama dohot Tuan Jesus Kristus.

2 Sai didongani dame ni roha dohot asi ni roha na massai balga i ma hamu, na sian Debata Ama dohot na sian Tuan Jesus Kristus.

3 Ale akka dongan, ikkon sai mandok mauliate do hami tu Debata alani hamu. Tama do hami mandok mauliate, ai lam togu do haporseaonmuna jala lam balga do holongmuna tu donganmuna na asing.+ 4 Alani i, las do rohanami paboahon taringot tu hamu+ tu akka huria ni Debata. Ai toktong do hamu sabar jala marhaporseaon tikki manaon godang hasusaan* alani haporseaonmuna.+ 5 On ma na patuduhon na sittong do keputusan na dibahen Debata. Alani i ma didok Debata hamu boi* masuk tu Harajaonna, ai nungnga marsitaonon hamu dibahen i.+

6 Ala adil do cara ni Debata manguhumi, hukumonna ma akka halak na parohon hasusaan tu hamu.+ 7 Alai anggo tu hamu na marsitaonon i, lehononna ma haluaon tu hamu dohot tu hami tikki dipataridahon Tuan Jesus i.+ Na lao ro ma ibana sian surgo rap dohot akka suru-suruanna na gogo i+ 8 di bagasan api na marsigorgor. Laos di tikki i, hukumonna ma akka halak na so mananda Debata dohot na so mangoloi barita na uli taringot tu Tuanta Jesus.+ 9 Hukumon ni Tuan i ma nasida. Mate ma nasida saleleng ni lelengna,+ jala padaoonna ma nasida sian jolo ni Tuan i dohot sian huasona na marmulia i. 10 Na lao masa ma i di tikki ro ibana manjalo hasangapon rap dohot akka halak na badiana. Pasangapon ni akka na porsea ma ibana tikki i. Jala dohot do hamu mangulahon i, ai porsea do hamu tu barita na dipaboa hami.

11 Alani i do sai hutangiakkon hami hamu, asa didok Debata na tutu hamu tama dijou Ibana.+ Jala asa anggiat marhite huasona, bahenonna ma sude akka na denggan sesuai tu lomo ni rohana jala pasu-pasuonna ma sude na diula hamu alani haporseaonmuna. 12 Alani i, pasangaponna ma goar ni Tuanta Jesus marhite hamu. Jala pasangaponna ma hamu ala marsada dohot ibana, sesuai tu asi ni roha na massai balga na sian Debata dohot na sian Tuan Jesus Kristus i.

2 Alai akka dongan, taringot tu haroro ni Tuanta Jesus Kristus+ dohot taringot tu andigan hita pungu rap dohot ibana,+ hupangido hami ma tu hamu, 2 unang ma pittor bingung hamu manang gabe ragu rohamuna ala adong na mandok naung ro ari ni Jahowa*+ i. Unang ma gabe ragu hamu, nang pe didok nasida barita i sian Debata,+ manang dibege hamu i sian sasahalak, manang dijaha hamu i marhite surat na didok sian hami.

3 Unang olo hamu dililuhon* marhite manang aha pe. Ai andorang so ro ari i, ikkon jolo adong do halak na marbalik mangalo hasittongan* i+ jala ikkon jolo tarida do ise halak na mangalo patik ni Debata,+ i ma akka halak naung ditottuhon tu hamagoan.+ 4 Pangalo do ibana, dibahen do dirina untimbo sian sude debata manang sian sude sisombaon. Ujungna, hundul ma ibana di joro ni Debata jala dipatuduhon ibana ma dirina di jolo ni godang halak na ibana do debata. 5 Na so diingot hamu do? Nungnga hupaboa sude akka i tu hamu tikki rap dope au dohot hamu.

6 Jala saonari nungnga diboto hamu ise na mangabbati asa unang tarida halak na jahat i. Alani i, ikkon jolo juppang nama tikki naung ditottuhon i asa tarida ise na jahat i. 7 Tutu, nungnga diulahon ibana hajahaton i.+ Alai torus dope buni ulaonna i sahat tu na mate sude na mangabbati i. 8 Dung pe i asa tarida halak na mangalo patik ni Debata i. Alai bunuon ni Jesus ma ibana marhite huaso na kaluar sian pamanganna*+ jala pasudaonna ma ibana dung patar haroro ni Tuan i.+ 9 Alai marhite huaso ni Sibolis,*+ ro ma halak na mangalo patik ni Debata i. Bahenonna ma tanda halongangan* na mangaliluhon akka halak,+ 10 dohot sude ragam ni hajahaton na paoto-otohon akka halak na lao tu hamagoan.+ Ai lao tu hamagoan do nasida, ala dang dijalo jala dang dihaholongi nasida hasittongan na parohon haluaon i. 11 Alani i do dipasombu Debata nasida dililuhon. Ujungna, porsea ma nasida tu akka hata na so tutu.+ 12 Hona hukum ma nasida sude. Ai lomo do roha ni nasida mangulahon na jahat jala dang dihaporseai nasida hasittongan.

13 Hamu akka dongan na dihaholongi Jahowa,* ikkon mandok mauliate do hami tu Debata alani hamu.+ Ai nungnga dipillit Debata hamu sian mulana lao gabe halak na lao diselamatton.+ Dipabadia do hamu marhite tondi parbadia ala porsea do hamu tu hasittongan i. 14 Dijou Debata do hamu marhite barita na uli na hubaritahon hami tu hamu. Marhite i, gabe dohot ma hamu mandapot hasangapon songon Tuanta Jesus Kristus.+ 15 Alani i ale akka dongan, togu+ ma hamu jala toktong ma ihutton hamu akka naung huajarhon hami+ tu hamu marhite na dibege hamu sian hami manang marhite suratnami. 16 Dihaholongi Debata Ama i do hita,+ toktong do dipatogu rohatta, jala dilehon do tu hita janji+ na massai denggan alani asi ni rohana na massai balga. Hutangiakkon hami do asa anggiat Tuanta Jesus Kristus dohot Debata Ama i, 17 mambahen dame rohamuna jala mambahen hamu togu, asa boi hamu toktong mangulahon jala makkatahon akka na denggan.

3 Ujungna akka dongan, sai tangiakkon hamu ma hami+ asa hatop sahat hata ni Jahowa* tu sude halak, jala asa dipasangap hata i+ di tonga-tonga ni jolma songon na masa di tonga-tongamuna. 2 Laos tangiakkon hamu ma asa malua hami sian halak na kejam dohot na jahat,+ ai dang sude olo gabe halak na porsea.+ 3 Alai boi do tahaporseai Tuan i, bahenonna do hamu margogo jala jagaonna do hamu sian Sibolis.* 4 Asing ni i ala siihutton Tuan i do hami, pos do rohanami tu hamu, na lao toktong do diihutton hamu tudu-tudunami i sahat tu ari na naeng ro. 5 Sai anggiat ma ditogu-togu Tuanta i rohamuna tu na sittong asa dihaholongi hamu Debata+ jala asa toktong hamu martahan+ mangoloi Kristus.

6 Saonari akka dongan, hupaboa hami ma tu hamu di bagasan goar ni Tuanta Jesus Kristus: Pasiding ma akka dongan na so taratur+ dohot akka dongan na so mangihutton ajaran* naung dijalo hamu* sian hami.+ 7 Hamu sandiri pe, diboto hamu do songon dia bahenonmuna lao maniru hami.+ Ai toktong do hami taratur tikki rap dohot hamu. 8 Hugarar hami do sipanganon na huallang hami.+ Loja do hami karejo arian nang borngin, asa unang adong sian hamu na susa lao manarihon hami.*+ 9 Sasittongna marhak do hami lao manjalo manang aha sian hamu.+ Alai dang hubahen hami songon i, asa diihutton hamu sitiruon+ na hubahen hami i. 10 Gariada, tikki rap dope hami dohot hamu, jotjot do dipaboa hami sipaingot on tu hamu, “Manang ise na so olo karejo, unang ma mangan ibana.”+ 11 Hubege hami do na adong di tonga-tongamuna halak na so taratur,+ na so olo karejo, jala na sai mangattoi urusan ni na asing.+ 12 Huparettahon jala hupodai hami do halak sisongon i di bagasan goar ni Tuan Jesus Kristus, asa karejo nasida lao mangalului siallangonna jala asa unang diattoi nasida urusan ni halak na asing.+

13 Alai hamu ale akka dongan, unang ma marnaloja hamu mangulahon akka na denggan. 14 Molo adong halak na so mangoloi tudu-tudu na hupaboa hami di surat on, tandai hamu ma ibana,+ jala unang be mardongan hamu dohot ibana asa maila ibana. 15 Alai unang ma bahen hamu ibana songon musu, toktong ma podai hamu ibana+ songon sahalak dongan.

16 Sai anggiat ma dilehon Tuan silehon dame i hadameon tu hamu di sasudena.+ Anggiat ma didongani Tuan i hamu sude.

17 Au si Paulus, au sandiri do na manuratton tabe on.+ Sai songon i do hubahen di sude surattu, asa diboto hamu au do na manurat surat i.

18 Sai didongani asi ni roha ni Tuanta Jesus Kristus na massai balga i ma hamu sude.