SURAT TU HURIA NA DI PILIPPI

1 Sian si Paulus dohot si Timoteus, naposo ni Kristus Jesus, mandapotton sude akka na badia, akka sintua, dohot akka parhobas+ na adong di Pilippi+ na marsada dohot Kristus Jesus.

2 Anggiat ma dijalo hamu asi ni roha na massai balga dohot hadameon na sian Debata Amangta dohot sian Tuan Jesus Kristus.

3 Sai mandok mauliate do au tu Debata molo huingot hamu. 4 Sai hutangiakkon do hamu di bagasan las ni roha.+ 5 Ai diurupi hamu do asa tarsar barita na uli i mulai sian dibege hamu i sahat tu tikki on. 6 Jala pos do rohakku tu Debata, urupanna do hamu pasaehon ulaon i+ sahat tu ari ni Kristus Jesus.+ Ai Ibana do naung mamukka ulaon na denggan i di tonga-tongamuna. 7 Dang sala molo songon i pandapottu taringot tu hamu sude, ai toktong do hamu di bagasan rohakku. Rap do hamu dohot au makkilala asi ni roha na massai balga i. Diurupi hamu do au tikki dipenjara+ jala tikki hupakke hukum ni pamaretta lao mambela barita na uli.+

8 Diboto Debata do sihol ni rohakku tu hamu sude, ai holong situtu do rohakku tu hamu songon holong ni Kristus Jesus tu hamu. 9 Sai hutangiakkon do asa lam martamba-tamba holongmuna,+ parbinotoanmuna,+ jala lam marbisuk hamu.+ 10 Hutangiakkon do asa diboto hamu dia na urrikkot.+ Ai molo diboto hamu i, dang marsala jala dang gabe tartuktuk na asing+ alani hamu sahat tu ari ni Kristus i. 11 Hutangiakkon do muse asa diurupi Jesus Kristus hamu mangulahon godang ulaon na denggan.*+ Dung i gabe dipasangap jala dipuji ma Debata.

12 Porlu do botoonmuna on akka dongan, gabe lam tarbarita do barita na uli alani na masa tu au. 13 Ai sude do pengawal ni istana dohot halak na asing mamboto+ alani Kristus do au dipenjarahon.+ 14 Jala ala na dipenjarahon i au, gabe lam togu do haporseaon ni godang donganta jala gabe lam barani do nasida paboahon hata ni Debata.

15 Adong do nian na paboahon taringot tu Kristus i alani late ni roha jala ala naeng marbada. Alai adong do deba na mangulahon i sian ias ni roha. 16 Na holong do roha ni nasida tu Kristus i umbahen diulahon nasida i sian ias ni roha. Ai diboto nasida do, lao mampartahatton barita na uli+ do au dison. 17 Alai halak na mangulahon i alani late ni roha, holan naeng marbada do nasida jala dang sian ias ni rohana mangulahon i. Dirippu nasida do gabe marsak au di bagasan penjara alani i. 18 Alai dang pola boha i. Sian ias ni roha manang na dang nasida mangulahon i, gabe tarbarita do Kristus alani i. Las do rohakku disi, gariada toktong do au marlas ni roha. 19 Ai huboto do, dapottu do haluaon alani tangiangmuna+ jala ala diurupi tondi parbadia na nilehon ni Jesus Kristus.+ 20 Pos do rohakku dang na lao maila au alani manang aha pe, jala i do pangidoan ni rohakku. Dang mabiar au paboahon barita na uli i. Alani i gabe hupasangap ma Kristus saonari songon di tikki naung salpu. Asa marhite au* dipasangap ma ibana, mangolu manang na mate pe au.+

21 Molo di au, lao tu Kristus+ do au mangolu jala molo mate pe au parohon laba do i di au.+ 22 Molo ulleleng au mangolu di tano on, godang ma na boi huulahon tu Kristus. Alai dang paboaokku manang na dia na hupillit. 23 Maol do au mamillit na dua i. Lomo do rohakku manadikkon hangoluan di tano on asa rap dohot Kristus,+ ai dumenggan do i.+ 24 Alai gumodang do labana di hamu molo toktong au mangolu di tano on. 25 Alani i huboto do na toktong au mangolu jala rap dohot hamu, asa boi lam denggan hamu marhobas tu Debata jala marlas ni roha di bagasan haporseaon. 26 Dung i tikki ro au mandapotton hamu, marlas ni roha situtu ma hamu ala diihutton hamu Kristus Jesus.

27 Denggan ma pangalahomuna, sadalan tu barita na uli taringot tu Kristus i.+ Asa molo ro au manang na dang, begeokku ma barita na denggan taringot tu hamu. Botookku ma na togu hamu jongjong, saroha, sapikkiran,+ jala masiurupan asa toktong porsea tu barita na uli. 28 Unang ma mabiar hamu tu musu. Molo dang mabiar hamu, on ma tanda na lao mate do nasida,+ alai na lao malua ma hamu.+ Jala Debata do na patuduhon on. 29 Nungnga dilehon hasangapon tu hamu, asa porsea hamu tu Kristus. Alai dang holan i, asa dohot do hamu marsitaonon alani ibana.+ 30 Nungnga dohot hamu saonari manaon hasusaakki.+ Jala dibege hamu do na marsitaonon au sahat tu saonari.

2 Ala marsada hamu dohot Kristus, marsitutu ma hamu patoguhon na asing, mangapuli di bagasan holong, mamparrohahon dongan sahaporseaon, makkaholongi nasida, jala sabar tu nasida. 2 Molo diulahon hamu songon i, las ma rohakku. Alani i, mardos ni roha ma hamu, marsihaholongan, saroha, jala sapikkiran.+ 3 Unang ma sai naeng marbada hamu+ manang holan mamikkiri diri sandiri.+ Alai toruk ma rohamuna, jala sangap ma bahen tu na asing.+ 4 Unang ma holan mamparrohahon na porlu di hamu,+ alai parrohahon ma na porlu di na asing.+

5 Sai songon Kristus Jesus ma pikkiran dohot pangalahomuna.+ 6 Nang pe songon Debata ibana,+ alai dang hea tarpikkir ibana lao mambahen asa sarupa ibana tu Debata.+ 7 Dang hea tarpikkir ibana songon i. Alai ditadikkon do sude na di ibana, gabe songon hatoban+ do ibana jala gabe jolma.*+ 8 Gariada, tikki gabe jolma ibana, dipatutoru do dirina jala mangoloi sahat tu na mate,+ mate di hau partinaonan.*+ 9 Alani i sangap do ibana dibahen Debata, dilehon do tu ibana inganan na untimbo sian ingananna hian.+ Jala dilehon do tu ibana goar na ussangap sian sude goar,+ 10 asa sude na di banua ginjang, na di tano on, dohot na di toru ni tano on pasangappon goar ni Jesus.+ 11 Jala sude ma nasida mangakkui Jesus Kristus do Tuan+ na parohon hasangapon tu Debata Amangta.

12 Akka dongan na huhaholongi, toktong ma hamu mangoloi, dang holan ala disi au alai tarlumobi saleleng dang disi au. Di bagasan biar ni roha dohot sangap, marsitutu ma hamu asa malua. 13 Ai Debata do na mangalehon gogo tu hamu lao mangulahon lomo ni rohana. Dibahen Ibana do hamu rade jala margogo mangulahon i. 14 Ulahon hamu ma i sude dang mardongan ungut-ungut+ jala marbada,+ 15 asa gabe akka anak ni Debata+ na so marsala jala na badia hamu. Marhite i, boi ma hamu marsinondang songon siboan na tiur di tonga-tonga ni sundut* naung sega+ jala na jahat.+ 16 Gomos ma tiop hata ni Debata na parohon hangoluan i.+ Dung i, marlas ni roha ma au di ari ni Kristus i, ai dang marisuang na marlojong i au jala dang marisuang halojaokki. 17 Nang pe songon pelean siinumon na diusehon tu peleanmuna+ au lao marhobas tu Debata,*+ alai rap marlas ni roha do au dohot hamu. Ai gabe diulahon hamu do songon i alani haporseaonmuna. 18 Suang songon i ma, ikkon dohot ma nian hamu marlas ni roha rap dohot au.

19 Molo lomo roha ni Tuan Jesus, hatop ma nian sahat si Timoteus+ mandapotton hamu, asa las rohakku mambege baritamuna. 20 Ai dang adong na songon ibana burjuna, na sian ias ni roha mamparrohahon hamu. 21 Molo na asing i, holan mamparrohahon na rikkot di dirina do nasida, dang na rikkot tu Jesus Kristus. 22 Alai diboto hamu do songon dia si Timoteus. Songon anak+ dohot ama, marsitutu* do ibana rap dohot au lao mambahen asa lam denggan ulaon marbarita na uli. 23 Alani i, dipangido rohakku do asa ibana na mandapotton hamu dung huboto aha na lao masa tu au. 24 Gariada pos do rohakku di Tuan i, na boi au hatop mandapotton hamu.+

25 Alai saonari, rikkot do didok rohakku manuru si Epaproditus mandapotton hamu. Ibana ma ale-alekku, donganku saulaon, jala donganku sapartinaonan. Laos ibana do na dipangido hamu mangurupi au.+ 26 Ai masihol do ibana naeng pajuppang dohot hamu. Jala marsak do rohana ala diboto hamu na marsahit ibana. 27 Tutu do ibana marsahit jala naeng mate. Alai asi do roha ni Debata tu ibana, dang holan tu ibana dohot do tu au, asa unang gabe tamba lungun ni rohakku. 28 Alani i, husuru ma asa hatop ibana mandapotton hamu, asa marlas ni roha hamu muse dung mangida ibana, jala dang marsak be au. 29 Denggan ma jalo* hamu ibana di bagasan las ni roha, songon na somal diulahon hamu manjalo siihutton Tuan i. Songon i ma bahen hamu manjalo akka dongan na songon ibana.+ 30 Ai nungnga naeng mate ibana alani ulaon ni Kristus i.* Dilehon ibana do ngoluna manggattihon hamu lao mangurupi au.+

3 Alani i akka dongan, sai marlas ni roha ma hamu ala marsada dohot Tuhan i.*+ Dang pola boha di au manuratton on muse tu hamu, ai mambahen na denggan do on tu hamu.

2 Manat ma hamu tu akka halak na marpangalaho songon biang, manat ma hamu tu akka halak na mangulahon na jahat, jala manat ma hamu tu akka halak na mandok ikkon disunat do hamu.+ 3 Ai hita do na marsunat.+ Marhobas do hita tu Debata marhite panogu-noguon ni tondi parbadia, las do rohatta tu akka na diulahon Kristus Jesus,+ jala dang tu akka na tarida i hita marpos ni roha, 4 nang pe boi au marpos ni roha tu akka na tarida i.

Molo adong na mangasahon na tarida i, gumodang dope na boi hupangasahon: 5 Ai disunat do au di ari paualuhon,+ halak Israel do au sian marga Benjamin, jala halak Heber asli do au.+ Sahalak Parise+ na mangihutton Patik i do au, 6 huulahon do sian nasa gogokku lao mambahen na haccit tu huria i,+ jala dang adong sian patik i na so huulahon. 7 Alai alani Kristus i, gabe harugian do di au saonari* akka uttung najolo i.+ 8 Gariada, molo martimbakkon parbinotoan na massai arga, i ma parbinotoan taringot tu Kristus Jesus Tuan i, gabe harugian do i sude di au. Hutinggalhon jala gabe songon sampah do i di au alani Kristus, anggiat boi au marale-ale* 9 jala mangihutton ibana. Dang hudok nungnga huulahon na sittong ala mangulahon Patik i, alai ala porsea+ do au tu Kristus i.+ Ai di Debata, halak na porsea tu Kristus i do na mangulahon na sittong.*+ 10 On do na rikkot di au, i ma mananda ibana, mamboto huaso ni na pahehehon ibana,+ marsitaonon+ jala mate songon ibana,+ 11 asa boi au mandapot haheheon na parjolo sian akka na mate.+

12 Dang hudok naung hujalo i manang nungnga sun denggan au. Alai marsitutu do au+ asa boi dapottu i. Ai huboto do, nungnga dipillit Kristus Jesus au.+ 13 Hamu akka dongan, dang hudok naung dapottu i. Alai huulahon do on: Dang hupaingot-ingot be akka naung salpu+ jala marsitutu do au mangadu akka na lao ro.+ 14 Marlojong do au asa mandapot upa,+ i ma tikki dijou Debata marhite Kristus Jesus tu hangoluan na di surgo.+ 15 I ma nian na dipikkiri akka halak na togu haporseaonna.+ Alai molo na asing do na dipikkiri hamu, urupan ni Debata do hamu lao mamikkiri akka i. 16 Alai molo nungnga togu haporseaotta, toktong ma taulahon songon naung taulahon saleleng on.

17 Hamu akka dongan, tiru hamu ma au.+ Jala parrohahon hamu ma akka halak na mangihutton sitiruon naung hupatuduhon hami tu hamu. 18 Ai godang do na leas rohana tu hamatean ni Kristus di hau partinaonan* i. Jotjot do hupaboa taringot nasida tu hamu, alai saonari hupaboa ma muse taringot tu nasida mardongan ilu-ilu. 19 Hamatean do ujung ni nasida, butuha ni nasida do debata ni nasida, dianggarhon nasida do pangalaho ni nasida na so umboto ila, jala holan akka na di tano on do dipikkiri nasida.+ 20 Akka halak na lao mangolu+ di surgo+ do hita.* Jala tapaima do sipalua na sian surgo, i ma Tuan Jesus Kristus.+ 21 Massai balga do huasona. Marhite huasona i, paubaonna ma pamatangta na gale on gabe songon pamatangna na sangap,+ jala bahenonna ma tunduk saluhutna tu ibana.+

4 Alani i akka dongan, togu ma hamu jongjong,+ ai siihutton Tuhan* do hamu. Hamu do las ni rohakku jala songon mahkota di au.+ Holong do rohakku tu hamu jala masihol do au tu hamu.

2 Hupangido ma tu si Euodia dohot tu si Sintike, asa marsada ni roha nasida marhobas tu Tuhan.*+ 3 Hupangido ma muse tu ho dongan saulaon* na setia, sai urupi ma ibototta na dua on. Nungnga loja nasida mangurupi au humokkop barita na uli. Urupi ma nang si Klemen dohot akka dongan na asing na tarsurat goarna di bukku hangoluan.+

4 Sai marlas ni roha ma hamu alani Tuhan.* Hudok ma muse: Marlas ni roha ma hamu!+ 5 Patuduhon ma tu saluhut halak na masuk akkal hamu.+ Nungnga jonok be Tuhan.* 6 Unang ma holsohon hamu manang aha,+ alai pangido hamu ma saluhutna tu Debata marhite tangiang dohot elek-elek mardongan hamauliateon.+ 7 Asa marhite Kristus Jesus, lehonon ni Debata ma tu hamu hadameon+ na so boi diattusi jolma, na boi manjaga roha+ dohot pikkiranmuna.

8 Alani i akka dongan, toktong ma pikkirhon* hamu akka na sittong, na rikkot, na hombar tu lomo ni roha ni Debata, na badia, na mambahen halak marholong ni roha, na patut sihataon, na denggan, dohot na patut sipujion.+ 9 Ulahon hamu ma na diparsiajari hamu,+ na dijalo hamu, na dibege hamu, dohot na diida hamu sian au. Dung i donganan ni Debata silehon dame i ma hamu.

10 Au naposo ni Tuhan,* las situtu do rohakku ala toktong do diingot hamu au sian najolo sahat tu saonari.+ Nang pe dipikkiri hamu au, alai dang tarbahen hamu dope mangurupi au. 11 Hudok pe songon i, dang alana hurangan au. Ai nungnga marsiajar au asa toktong marlas ni roha songon dia pe parngoluokku.+ 12 Huboto do songon dia na marhahurangan+ jala huboto do songon dia na marlobi-lobi. Manang aha pe na masa tu ngolukku, butong manang male, marlobi-lobi manang marhahurangan, nungnga huparsiajari be rahasiana asa boi makkalasson na adong. 13 Margogo do au di sude na masa, ala dilehon Debata do huaso tu au.+

14 Nang pe songon i, diurupi hamu do au di hasusaakki. 15 Hamu akka halak na di Pilippi, diboto hamu do mulai sian dibege hamu parjolo sahali barita na uli sahat tu na borhat i au sian Makedonia, holan huriamuna do na mangurupi au.+ 16 Tikki di Tessalonik au, dilehon hamu do na porlu di au, dang holan sahali alai dua hali. 17 Dang na lao mangido asa diurupi au, alai lomo do rohakku asa parohon laba tu hamu akka na denggan na dibahen hamu. 18 Adong do sude na porlu di au, gariada lobi. Dang hurangan be au saonari dung hujalo na dilehon hamu marhite si Epaproditus,+ i ma pelean na angur,+ na mambahen las roha ni Debata. 19 Alani i, lehonon ni Debata do sude na porlu di hamu+ marhite Kristus Jesus. Ai massai balga do hasangaponna. 20 Hasangapon ma di Debatanta Ama i saleleng ni lelengna. Amen.

21 Pasahat hamu ma tabekku tu akka na badia na marsada di bagasan Kristus Jesus. Sahat ma tu hamu tabe ni akka dongan na rap dohot au. 22 Sahat ma tu hamu tabe ni akka na badia, tarlumobi na adong di istana ni Kesar.+

23 Sai didongani asi ni roha ni Tuan Jesus Kristus na massai balga i ma hamu, ala dipatudu hamu pikkiran na denggan.