SURAT TU HURIA NA DI EPESUS

1 Sian si Paulus na gabe apostel ni Kristus Jesus mangihutton lomo ni roha ni Debata, mandapotton akka na badia na adong di Epesus+ dohot akka na marsihohot di bagasan Kristus Jesus:

2 Anggiat ma dipatuduhon tu hamu asi ni roha na massai balga i dohot hadameon na sian Debata Ama i dohot sian Tuanta Jesus Kristus.

3 Dipuji ma Debata, Ama ni Tuanta Jesus Kristus. Ai dipasu-pasu Ibana do hita marhite tondi parbadia na sian banua ginjang i, ala marsada hita dohot Kristus.+ 4 Ai nungnga dipillit Ibana hita asa marsada dohot Kristus andorang so dijadihon portibi on. Alani i, ikkon badia do hita, tapatudu ma holong, jala dang marcacat+ di jolona. 5 Nungnga ditottuhon+ Debata hian, na lao bahenonna do hita gabe akka anakna+ marhite Jesus Kristus. Sesuai do i tu sakkapna dohot tu lomo ni rohana,+ 6 asa tapuji Ibana alani asi ni rohana+ na massai balga i, na pinatuduna tu hita marhite anak haholonganna i.+ 7 Marhite anakna i, ditobus jala dipalua ma hita.+ Disesa do dosatta marhite mudarna.+ Ai balga situtu do asi ni roha ni Debata.

8 Alani asi ni rohana na massai balga i, dibahen do hita marbisuk jala mangattusi di saluhutna. 9 Dipaboa Ibana do tu hita rahasia na badia+ taringot tu lomo ni rohana. Hombar tu sakkapna, nungnga ditottuhon Ibana hian 10 asa dibahen pengaturan lao papunguhon saluhut na di banua ginjang dohot na di tano on+ di bagasan Kristus, dung salpu tikki na ditottuhon Ibana. Di bagasan Kristus do 11 hita marsada jala manjalo janji ni Debata. Nungnga dipillit Debata hian hita hombar tu sakkapna.+ Ibana do Debata na sai mangulahon saluhutna hombar tu lomo ni rohana. 12 Alani i gabe dipuji jala dipasangap ma Debata marhite hita, akka naung parjolo porsea tu Kristus. 13 Alai hamu pe nungnga porsea tu ibana dung dibege hamu hasittongan, i ma barita na uli taringot tu haluaonmuna. Dung porsea hamu, dimateraihon+ ibana do hamu marhite tondi parbadia naung dijanjihon i. 14 On ma jaminan na dohot do hita manjalo janji ni Debata.+ Ai naeng paluaonna+ do bangsona+ marhite tobusan lao parohon pujian dohot hasangapon tu Ibana.

15 Tikki hubege taringot tu haporseaonmuna tu Tuan Jesus dohot holongmuna tu akka na badia i, 16 sai toktong do au mandok mauliate alani hamu. Toktong do hutangiakkon hamu, 17 anggiat ma marbisuk hamu dibahen Debata jala mangattusi akka na dipapatar Ibana, asa dapotmuna parbinotoan na bagas taringot tu Ibana.+ Ibana do Ama na marmulia i, Debata ni Tuanta Jesus Kristus. 18 Nungnga dibukka Ibana rohamuna asa diboto hamu aha janji ni Debata na dipaima-ima hamu jala aha na lao lehononna tu hamu. Dung i diboto hamu ma balga ni hasangapon na lao lehononna tu akka na badia,+ 19 jala diboto hamu ma na massai balga do huaso na dipatudu Ibana tu hita akka na porsea.+ Tarida do huasona na massai balga i tikki dipakke Ibana gogona 20 lao pahehehon Kristus sian akka na mate jala mambahen ibana di siamunna+ di banua ginjang. 21 Untimbo do ibana sian sude pamaretta, parhuaso, akka pamimpin, akka raja, dohot sian sude akka goar.+ Dang holan di tikki* on, alai dohot do di tikki na naeng ro. 22 Dibahen Debata do muse tunduk saluhutna tu toru ni pat+ ni Kristus jala dibahen do ibana gabe ulu ni nasa na adong di huria.+ 23 Daging ni Kristus do huria i+ na gabe sun denggan marhite ibana, jala ibana do na mambahen sun denggan di saluhutna.

2 Asing ni i, dipangolu Debata do hamu nang pe naung mate hamu alani hasalaan dohot dosamuna.+ 2 Diihutton hamu do najolo na diulahon portibi* on.+ Diihuthon hamu do parhuaso na mangarajai alogo,+ i ma pikkiran na mangarajai+ akka halak na so mangoloi Debata. 3 Sasittongna songon nasida do hita sude najolo, taihutton do giot-giot ni daging+ dohot pikkiran na mardosa.+ Sian mulai tubu do hita patut hona rimas+ ni Debata songon na asing. 4 Alai, alani asi ni roha+ dohot holong ni Debata na massai balga i tu hita,+ 5 dipangolu ma hita rap dohot Kristus nang pe naung mate hita alani dosatta.+ Sasittongna, marhite asi ni roha ni Debata na massai balga i do hamu dipalua. 6 Dung i, dipangolu Debata do hita rap dohot Kristus Jesus jala rap hundul ma hita dohot ibana di surgo ala taihutton do ibana.+ 7 Alani i di ari* na naeng ro, patuduhonon ni Debata ma asi ni rohana na massai balga i tikki diulahon ibana na denggan tu hita, akka na mangihutton Kristus Jesus.

8 Hamu akka na porsea, marhite asi ni roha ni Debata na massai balga i do hamu dipalua.+ Dang alani pambahenanmuna umbahen na malua hamu, alai silehon-lehon ni Debata do i. 9 Dang alani pambahenanmuna i,+ alani i unang ma ginjang rohamuna. 10 Ditoppa+ Debata do hita lao mangulahon akka na denggan ala taihutton Kristus Jesus.+ On ma naung ditottuhon Debata asa taulahon.

11 Ingot ma, akka halak sian bangso na asing do hamu najolo. Hea do akka halak na disunat jolma manjou hamu halak na so marsunat. 12 Dang ditanda hamu Kristus di tikki i. Pulik do hamu sian bangso Israel jala dang parsidohot hamu tu akka parjanjian na dibahen sesuai tu janji ni Debata.+ Dang ditanda hamu Debata jala dang adong janji ni Debata na lao paimaonmuna.+ 13 Alai nungnga diihutton hamu be saonari Kristus Jesus. Nang pe dang ditanda hamu najolo Debata, alai nungnga ditanda hamu Ibana alani mudar ni Kristus. 14 Ai Kristus do na mambahen hita mardame,+ na mambahen marsada+ halak Jahudi dohot na so Jahudi, jala ibana do na mangaruppakkon tembok na manirang nasida.+ 15 Dipaujung ibana do Patik na marisi akka paretta na mambahen nasida marmusu. Dibahen ibana songon i, lao mambahen akka na porsea tu ibana gabe bangso na imbaru*+ jala mardame tu ibana. 16 Nungnga dibahen ibana halak Jahudi dohot na so Jahudi mardame tu Debata marhite hau partinaonan*+ i. Ai dipaujung ibana do parmusuon i marhite hamateanna.+ 17 Ro do ibana jala dipaboa ibana do barita na uli taringot hadameon tu hamu akka na so mananda Debata dohot tu akka na mananda Debata. 18 Marhite ibana, boi ma hita akka halak Jahudi dohot na so Jahudi martangiang tu Ama na di surgo i, ai nungnga rap manjalo tondi parbadia hita.

19 Alani i, dang bangso na asing be hamu.+ Alai nungnga gabe sabangso hamu+ dohot akka na badia i jala nungnga gabe keluarga ni Debata+ hamu. 20 Nungnga dipajongjong be hamu di ginjang ni fondasi ni akka apostel dohot akka panurirang,*+ jala Kristus Jesus ma batu parsuhi-suhi na gabe fondasi i.+ 21 Saluhut bangunan na marsada dohot ibana jala na denggan marsada sude bagianna,+ gabe sada bagas joro na badia ma i di Jahowa.*+ 22 Ala marsada hamu dohot Kristus, dibahen Debata ma hamu gabe ingananna, ai disi do tondi parbadiana.+

3 Au si Paulus, dipenjarahon+ alani Kristus Jesus, humokkop hamu na sian bangso na asing. 2 Tottu nungnga dibege hamu naung hujalo tanggung jawab+ lao mangurupi hamu asa mandapot laba sian asi ni roha ni Debata na massai balga i. 3 Marhite parnidaan do dipaboa tu au rahasia na badia i, songon naung hutaringoti nakkin saotik. 4 Alani i molo dung dijaha hamu surat on, botoonmuna ma naung huattusi rahasia na badia+ taringot tu Kristus i. 5 Najolo, dang dipaboa rahasia i tu akka jolma. Alai saonari, nungnga dipaboa i marhite tondi parbadia tu akka apostelna na badia dohot tu akka panurirang.*+ 6 On ma rahasia i: Jaloon ni akka halak na so Jahudi ma songon naung dijalo Kristus Jesus i, ala marsada nasida dohot ibana jala gabe sada punguan* ma nasida.+ Jaloon ni nasida ma songon naung dijanjihon Debata tu hita alani barita na uli. 7 Au do na mangurupi hamu mangattusi rahasia na badia na hombar tu asi ni roha ni Debata na massai balga i. Dilehon Ibana do tu au silehon-lehon on lao patuduhon huasona.+

8 Au ma na ummetmet sian sude akka na badia.+ Alai tu au do dilehon asi ni roha na massai balga i.+ Alani i do hupaboa tu akka bangso barita na uli taringot tu pasu-pasu na massai balga na sian Kristus i. 9 Jala marhite au, sude ma jolma mamboto songon dia Debata na manoppa saluhutna pasautton rahasia na badia,+ naung leleng ditabunihon Ibana.* 10 Jala marhite huria,+ gabe diboto akka pamaretta dohot akka parhuaso na di banua ginjang i ma bisuk ni Debata na dipatuduhon sian marragam cara.+ 11 Hombar do on tu sakkap ni Debata na saleleng ni lelengna, na lao pasautonna marhite Kristus+ Jesus Tuanta i. 12 Ala porsea hita tu Jesus, gabe pos ma rohatta pajonokkon diri tu Debata jala dang mabiar hita paboahon+ taringot ibana tu akka halak. 13 Alani i, hupangido ma asa unang marmetmet ni roha hamu alani hasusaan na hutaon humokkop hamu. Ai gabe sangap do hamu dibahen i.+

14 Alani i do au marsomba tu Ama i. 15 Ai alani Ibana do umbahen na adong sude keluarga na di surgo dohot na di tano on. 16 Martangiang do au tu Debata na marmulia i asa anggiat dipatogu rohamuna+ marhite tondi parbadiana. 17 Jala marhite haporseaonmuna, anggiat ma maringanan Kristus i di rohamuna di bagasan holong.+ Anggiat ma togu+ jala marsihohot hamu di ginjang ni fondasi ni haporseaonmuna.+ 18 Marhite i boi ma hamu songon sude akka na badia i, takkas ma botoonmuna bidangna, ganjangna, timbona, dohot bagas ni parbinotoan taringot tu Debata. 19 Jala asa diboto hamu holong ni Kristus+ dao urrikkot sian sude parbinotoan. Dung i gabe adong ma di hamu sude parange ni Debata na tajalo sian Ibana.

20 Marhite huaso ni Debata na mangula di bagasan diritta,+ bahenonna do unggodang sian na tapangido dohot na tapikkiri.+ 21 Di Ibana ma hasangapon na saleleng ni lelengna marhite huria dohot Kristus Jesus. Amen.

4 Au na dipenjarahon+ alani Tuan i hupangido ma tu hamu, patuduhon ma sian parangemuna+ naung tarjou hamu. 2 Martoruk ni roha ma hamu,+ marlambok ni roha, sabar,+ jala marsihaholongan ma hamu asa boi sabar tu na asing.+ 3 Toktong ma hita rade ditogu-togu tondi parbadia asa torus hita marsada. Jala torus ma talului hadameon ala on do na mambahen hita marsada.*+ 4 Ai sada do daging i+ jala sada do nang tondi parbadia i.+ Sada do nang janji na tapaima-ima sian Debata+ na manjou hita. 5 Sada do Tuan,+ sada do haporseaon, sada do pandidion, 6 sada do Debata dohot Ama di saluhutna, na mangarajai saluhutna dohot na mangula marhite saluhutna jala di bagasan saluhutna.

7 Sude do hita manjalo asi ni roha na massai balga i hombar tu silehon-lehon+ ni Kristus i. 8 Ai didok do, “Tikki nakkok ibana tu ginjang, diboan ibana do akka jolma na ditawan jala nasida ma na gabe silehon-lehonna.”+ 9 Jala molo didok, “nakkok ibana”, dang na patuduhon naung turun ibana tu inganan na di toru, i ma tano on? 10 Ibana naung turun laos ibana do na nakkok+ tu inganan na dao untimbo sian saluhut langit,+ asa boi pasautonna saluhutna.

11 Deba silehon-lehonna i gabe apostel,+ deba gabe panurirang,*+ deba gabe parbarita na uli,+ deba gabe parmahan, jala deba gabe guru.+ 12 Nasida ma na pature-turehon* akka na badia i, na marhobas tu na asing, jala na patoguhon daging ni Kristus.+ 13 Diulahon nasida do i sahat tu na marsada hita sude di bagasan haporseaon dohot parbinotoan na bagas taringot tu Anak ni Debata.+ Dung i gabe togu* ma hita songon Kristus i. 14 Alani i, unang be hamu songon dakdanak jala holan mangihutton ajaran+ ni akka halak na manipu marhite mangoto-otoi. Asa unang gabe songon kapal na diboan galumbang jala na niullus ni alogo hamu. 15 Alai hatahon ma na sittong, marsihaholongan ma, jala lam togu ma di saluhutna songon Kristus pamimpinta*+ i. 16 Ai ibana do na mambahen marsada saluhut daging i+ jala na mambahen ganup urat i masiurupan lao mangalehon na dihaporluhon. Molo denggan ganup bagian mangulahon ulaonna be, gabe lam magodang ma daging i di bagasan holong.+

17 Hudok ma tu hamu jala hujujui ma hamu di bagasan goar ni Tuan i, asa unang diihutton hamu be pangalaho ni akka bangso.+ Ai holan akka na so marguna do dipikkiri nasida.+ 18 Di haholomon do pikkiran ni nasida jala pulik do nasida sian hangoluan na nilehon ni Debata. Ai dang olo nasida mananda Debata jala jogal* do roha ni nasida. 19 Dang adong aturan di ngolu ni nasida, diulahon do ulaon ni halak na so umboto ila,*+ jala dang marna puas nasida mangulahon akka ulaon na ramun.*

20 Alai nungnga diparsiajari hamu, dang songon i Kristus i. 21 Ai nungnga diajarhon Jesus na sittong tu hamu. Molo ditangihon hamu ibana jala olo hamu marsiajar sian ibana, takkas ma botoonmuna akka on. 22 Nungnga diajarhon tu hamu asa unang dipakke hamu be pangalahomuna na leleng,+ i ma akka na niulahonmuna najolo. Ai nungnga sega be pangalahomuna dibahen giot-giot ni daging.+ 23 Naeng ma dipaimbaru roha dohot pikkiranmuna,+ 24 jala pakke hamu ma pangalaho na imbaru+ hombar tu lomo ni roha ni Debata, i ma pangalaho na sittong jala na setia.

25 Ala dang olo be hamu margabus, ganup ma halak makkatahon na sittong tu donganna,+ ai rap daging ni Kristus i do hita.+ 26 Molo muruk hamu, unang ma sappe mardosa.+ Unang ma muruk hamu sadari manipat.*+ 27 Unang ma lehon tikki* tu Sibolis.+ 28 Molo panakko ibana najolo, unang be manakko. Alai ringgas ma ibana mangulahon karejo na denggan,+ asa boi urupanna halak na porlu diurupi.+ 29 Unang ma kaluar akka hata na so denggan* sian pamanganmuna.+ Alai hatahon ma na denggan lao patoguhon na asing, asa marlaba tu akka na manangihon.+ 30 Unang ma gabe lungun roha ni Debata*+ dibahen hamu. Ai nungnga dimaterai+ Ibana hamu marhite tobusan+ di ari haluaon i.

31 Bolokkon hamu ma sian dirimuna sogo ni roha,+ muruk, rimas, songgak-songgak, dohot akka hata na mangaleai+ na mambahen haccit roha ni na asing.+ 32 Alai burju ma hamu tu na asing, marasi ni roha,+ jala rade manalpuhon hasalaan ni donganmuna songon Debata na rade manalpuhon hasalaanmuna marhite Kristus i.+

5 Ala akka anak na dihaholongi Debata do hamu, tiru hamu ma Ibana.+ 2 Toktong ma patuduhon holong,+ songon Kristus na makkaholongi hita*+ jala mangalehon dirina humokkop hita gabe songon pelean na angur tu Debata.+

3 Unang ma hea dihatai hamu taringot tu seks na so patut,* akka ulaon na ramun,* dohot hahisapon.+ Ai dang patut i dihatai akka halak na badia.+ 4 Songon i nang akka pangalaho na so umboto ila, akka hata na so marguna, manang akka gait-gait taringot tu na so hasea.+ Ai pattang do dohonon akka sisongon i. Alai hata hamauliateon tu Debata ma hatahon hamu.+ 5 Ai takkas do diboto hamu, manang ise na mangulahon seks na so patut,*+ na mangulahon na ramun, manang na mangulahon hahisapon,+ dos songon halak na manomba akka patung do i. Akka halak na mangulahon sisongon i, dang parsidohot tu Harajaon ni Kristus dohot Debata.+

6 Unang ma olo hamu dioto-otoi halak marhite akka hata na so marguna, ai akka sisongon i do na mambahen muruk Debata tu akka halak na so mangoloi Ibana. 7 Alani i, unang ma tiru pangalaho ni nasida.* 8 Ai di haholomon do hamu najolo, alai nungnga di bagasan na tiur i+ hamu saonari ala nungnga marsada dohot Tuan i.+ Alani i, marpangalaho ma hamu songon akka anak ni na tiur i. 9 Ai akka na denggan, na hombar tu lomo ni roha ni Debata,* dohot na sittong do na ro sian na tiur i.+ 10 Pastihon hamu ma akka na dihalomohon+ Tuhan* i. 11 Unang be ihutton akka pangalaho ni halak na di haholomon.+ Alai pissang ma nasida. 12 Ai holan manaringoti akka na diulahon nasida di na buni pe, nungnga sada hailaon i. 13 Ai sude do tarida dibahen* na tiur i, alani i gabe tiur ma sude na dipataridahon i. 14 Alani i ma didok, “Dungo ma hamu akka na modom, jala hehe ma hamu akka na mate,+ asa dilehon Kristus i na tiur tu hamu.”+

15 Sai parrohahon hamu ma pangalahomuna. Unang ma songon halak na so marbisuk hamu, alai marbisuk ma hamu. 16 Denggan ma pakke tikkimuna,*+ ai mangolu di akka tikki na jahat do hita saonari on. 17 Alani i unang ma songon halak na so marroha hamu, alai sai lului ma lomo ni roha ni Jahowa.*+ 18 Jala unang ma mabuk hamu alani anggur,+ ai sursar do ngolumuna bahenon ni i. Alai sai digohi tondi parbadia ma hamu. 19 Masipatoguan ma hamu* marhite mangendehon psalmen, mamuji Debata, dohot mangendehon ende puji-pujian.+ Endehon hamu ma puji-pujian*+ tu Jahowa* sian bagasan rohamuna.+ 20 Jala toktong ma hamu mandok mauliate+ alani saluhutna tu Debatanta, i ma Ama i di bagasan goar ni Tuanta Jesus Kristus.+

21 Molo sangap hita tu Kristus i, unduk ma hita na sada tu na asing.+ 22 Unduk ma istri tu suamina+ songon tu Tuan i. 23 Ai suami do ulu ni istrina,+ dos songon Kristus ulu ni huria+ na gabe sipalua ni daging i. 24 Songon huria na unduk tu Kristus i, ikkon unduk do istri tu suami ni nasida di saluhutna. 25 Hamu akka suami, sai haholongi ma istrimuna+ songon Kristus na makkaholongi huria i jala na mangalehon dirina humokkop i.+ 26 Dibahen Kristus do songon i asa boi pabadiaonna huria i, paiasonna di bagasan aek, i ma hata ni Debata.+ 27 Dung i, boi ma sangap huria i jongjong di jolona.+ Ai lomo do rohana badia huria i jala dang marcacat.+

28 Suang songon i ma, ikkon haholongan ni suami do istrina songon makkaholongi diri ni nasida. Manang ise na makkaholongi istrina, na makkaholongi dirina do ibana. 29 Dang adong bawa na marsogo ni roha tu dirina.* Dilehon ibana do dirina mangan jala dihaholongi do i, dos songon na niulahon ni Kristus tu huria i. 30 Ai ruas ni daging ni Kristus do hita sude.+ 31 “Alani i, ikkon tadikkonon ni bawa ma omakna dohot bapakna asa toktong rap* dohot istrina, jala gabe sada daging ma nasida na dua.”+ 32 Massai rikkot do rahasia na badia on.+ Sasittongna taringot tu Kristus dohot taringot tu huria i do na huhatai saonari.+ 33 Alai, ikkon haholonganmuna do istrimuna+ songon makkaholongi dirimuna. Jala ikkon sangap do bahenon ni istri tu suamina.+

6 Hamu akka dakdanak, oloi hamu ma natua-tuamuna+ hombar tu lomo ni roha ni Tuhan,* ai sittong do i. 2 “Pasangap ma omakmu dohot bapakmu,”+ on do paretta na parjolo mardongan janji: 3 “Asa denggan ngolum jala ganjang umurmu di tano on.” 4 Jala hamu akka ama, unang ma bahen jut roha ni ianakkonmuna.+ Alai pagodang-godang ma nasida marhite mangajar-ajari+ jala mamodai nasida hombar tu lomo ni roha ni Jahowa.*+

5 Hamu akka hatoban, oloi hamu ma tuanmuna+ na di tano on mardongan biar dohot sangap na sian roha, songon tu Kristus i. 6 Dang holan tikki adong na mangida lao pasonakkon roha ni jolma.+ Alai songon hatoban ni Kristus ma hamu na mangulahon lomo ni roha ni Debata sian nasa roha.*+ 7 Gabe hatoban na burju ma hamu, songon hatoban ni Jahowa*+ dang hatoban ni jolma. 8 Ai diboto hamu do, sude do jolma mandapot upa na niula ni nasida sian Jahowa,*+ nang hatoban nang halak na merdeka. 9 Songon i ma nang akka tuan, denggan ma bahen hamu tu hatobanmuna. Unang ma ancam nasida. Ai diboto hamu do, sada Tuan do hamu dohot hatobanmi, i ma Debata na di surgo.+ Jala dang paimbar-imbarhon jolma Ibana.

10 Anggiat ma dilehon Tuhan* gogo tu hamu,+ ai massai balga do gogona. 11 Pakke hamu ma perlengkapan porang+ na sian Debata asa unang talu hamu alani jorat* ni Sibolis. 12 Ai dang na mangalo jolma parporangatta,*+ alai mangalo pamaretta, parhuaso, pamimpin ni haholomon, dohot suru-suruan na jahat+ na di surgo. 13 Alani i, pakke hamu ma sude perlengkapan porang na sian Debata,+ asa tolap hamu mangalo paraloan na sian musutta. Jala boi ma hamu togu dung monang mangalo saluhutna i.

14 Alani i togu ma hamu jongjong huhut mamakke ikat pinggang, i ma hasittongan.+ Mamakke baju partahanan, i ma mangulahon na sittong.*+ 15 Jala pakke ma sipatumuna, i ma rade paboahon barita na uli taringot tu hadameon.+ 16 Asing ni i, pakke hamu ma perisai, i ma haporseaon,+ asa boi hamu pamatehon api na sian panah* ni Sibolis.*+ 17 Jalo hamu ma muse takkuluk bosi, i ma mamikkirhon haluaon na sian Debata.+ Jala jalo hamu ma podang na sian tondi parbadia, i ma hata ni Debata,+ 18 huhut pasahatton marragam tangiang+ dohot pangidoan ganup tikki marhite panogu-noguon ni tondi parbadia.+ Jala sai jaga ma hamu sahat tu ujungna, sai tangiakkon ma akka na badia. 19 Tangiakkon hamu ma nang au, asa barani au paboahon hata na dipasahat tu au, i ma rahasia na badia taringot tu barita na uli.+ 20 Ai alani i do au gabe utusan+ jala tarratte. Tangiakkon hamu ma asa barani au paboahon barita na uli.

21 Si Tikikus,+ dongan na tahaholongi jala na toktong marhobas tu Tuan i, ibana ma na paboahon tu hamu taringot tu au dohot na huulahon.+ 22 Hupangido do ibana ro tu hamu lao paboahon taringot tu hami jala asa boi diapuli ibana rohamuna.

23 Sai dilehon Debata Ama i dohot Tuan Jesus Kristus ma tu hamu hadameon, holong, dohot haporseaon. 24 Anggiat ma sude na makkaholongi Tuan Jesus Kristus sahat tu saleleng ni lelengna manjalo asi ni roha na massai balga i.