SURAT TU HURIA NA DI GALATIA

1 Sian si Paulus, na gabe apostel dang ala dipillit jolma alai alani Jesus Kristus+ dohot alani Debata Ama i,+ na pahehehon Kristus sian na mate. 2 Mandapotton akka huria na adong di Provinsi Galatia. Sahat ma tu hamu tabe ni akka dongan na rap dohot au.

3 Anggiat ma dijalo hamu asi ni roha na massai balga dohot hadameon sian Debata Amangta dohot sian Tuan Jesus Kristus. 4 Dilehon Kristus i do dirina lao manesa dosatta,+ asa boi paluaonna hita sian portibi* na jahat on+ hombar tu lomo ni roha ni Debata Ama i.+ 5 Tu Debata ma hasangapon na saleleng ni lelengna. Amen.

6 Songgot situtu do rohakku ala hatop hamu maninggalhon Debata na manjou hamu marhite asi ni roha ni Kristus na massai balga i, jala diihutton hamu do barita na uli na asing.+ 7 Sasittongna dang adong barita na uli na asing. Alai adong do halak na naeng mangaliluhon hamu+ marhite pabalik-balikkon barita na uli taringot tu Kristus. 8 Molo adong sian hami manang sian suru-suruan na di surgo, na paboahon barita na uli asing sian na hupaboa hami tu hamu, lok ma dihukum ibana. 9 Songon naung hudok hami, hudok ma muse tu hamu, manang ise na paboahon barita na uli asing sian na dibege hamu, lok ma dihukum ibana.

10 Lomo ni roha ni Debata do na hulului, dang lomo ni roha ni jolma. Dang na lao mambuat roha ni jolma au. Molo jolma do na hupasonang, dang naposo ni Kristus i be au. 11 Takkas ma hupaboa tu hamu akka dongan, dang sian jolma barita na uli na hupaboa tu hamu.+ 12 Ai dang sian jolma i hujalo jala dang jolma na mangajarhon i tu au. Alai Jesus Kristus do na patuduhon i tu au marhite parnidaan.

13 Tottu dibege hamu do taringot na huulahon tikki maragama Jahudi dope au.+ Jotjot do hubahen na haccit tu huria ni Debata jala marjea do nasida hubahen.+ 14 Molo dibandingkon tu dongan satorbangku dohot dongan sabangsokku, au ma na dumenggan mangihutton aturan ni agama Jahudi. Jala ringgas do au mangihutton adat ni akka ompungku.+ 15 Alai dijou Debata do au marhite asi ni rohana na massai balga i. Ibana do na mambahen au tubu sian bortian* ni omakku.+ Lomo do rohana 16 asa hubaritahon barita na uli taringot Anakna tu akka bangso.+ Dang hupangido poda sian jolma tikki na dijou i au. 17 Dang lao au tu Jerusalem mandapotton akka naung parjolo gabe apostel. Alai lao do au tu Arab, dung i mulak ma au muse tu Damaskus.+

18 Dung tolu taon, lao ma au tu Jerusalem+ mandapotton si Kepas.*+ Jala disi ma au 15 ari. 19 Alai dang pajuppang au disi dohot akka apostel na asing, holan tu si Jakobus+ anggi ni Tuan i do au pajuppang. 20 Taringot na husurat on tu hamu, hudok ma di jolo ni Debata, dang margabus au.

21 Dung i lao ma au tu luat Siria dohot Kilikia.+ 22 Alai dang ditanda akka huria ni Kristus na di Judea au. 23 Holan on do na dibege nasida, “Bawa na mambahen na haccit tu hita+ najolo jala na mambahen marjea akka huria, nungnga gabe parbarita na uli be ibana.”+ 24 Gabe dipasangap nasida ma Debata alani au.

2 Dung 14 taon, lao ma au muse tu Jerusalem rap dohot si Barnabas.+ Huboan do nang si Titus.+ 2 Ala mandapot parnidaan do au umbahen na lao tusi. Hupaboa ma tu nasida taringot tu barita na uli na hubaritahon tu akka bangso na asing. Alai holan di jolo ni akka dongan na diparsangapi do au paboahon i, asa huboto dang marisuang na huulahon saleleng on tu Debata. 3 Nang pe halak Junani si Titus,+ dang adong na mamaksa ibana asa disunat.+ 4 Alai gabe tubu ma parbadaan alani i. Adong akka dongan na so tutu dongan+ sip-sip ro tu huria lao mamboto taringot haluaon,+ na tahilala ala taihutton Kristus Jesus. Dibahen nasida pe songon i, asa boi do bahenon ni nasida hita gabe hatoban ni Patik i muse.+ 5 Alai dang olo hami manangihon nasida+ nang pe holan satokkin,* asa toktong hot hasittongan na sian barita na uli i di hamu.

6 Taringot tu akka dongan na diparsangapi i,+ dang adong dapottu akka na baru sian nasida. Manang ise pe nasida najolo dang penting i di au, ai dang dipaimbar-imbar Debata jolma. 7 Alai gabe diboto nasida ma naung disuru au paboahon barita na uli tu bangso na asing,*+ dos songon si Petrus na disuru marbarita tu halak Jahudi.* 8 Ai dilehon Debata do gogo tu si Petrus gabe apostel tu akka halak Jahudi. Jala dilehon Ibana do gogo nang tu au gabe apostel tu bangso na asing.+ 9 Diboto si Jakobus,+ si Kepas,* dohot si Johannes do naung dilehon asi ni roha na massai balga i tu au.+ Nasida ma akka pamimpin ni huria. Mardos ni roha do nasida asa au dohot si Barnabas+ na lao tu bangso na asing, alai nasida ma na lao tu halak Jahudi. Jala dijalang nasida do hami. 10 Dung i, dipangido nasida do tu hami asa toktong diingot hami akka dongan na pogos. Jala marsitutu do au mangulahon i.+

11 Alai tikki ro si Kepas*+ tu Antiokia,+ hupissang* ma ibana. Ai sala do ibana. 12 Andorang so ro akka dongan ni si Jakobus,+ jotjot do si Kepas rap mangan dohot akka dongan na sian bangso na asing.+ Alai dung ro nasida, dang olo be ibana rap mangan dohot akka dongan i. Jala dipadao ibana ma dirina ala mabiar ibana tu akka halak Jahudi.+ 13 Akka halak Jahudi na asing i pe, gabe dohot ma mangihutton* si Kepas, songon i nang si Barnabas. 14 Dung huida dang diihutton nasida hasittongan na sian barita na uli i,+ hudok ma tu si Kepas* di jolo ni godang halak, “Molo ho sandiri halak Jahudi, hape dang songon halak Jahudi ho marpangalaho, boasa ma paksaonmu halak na sian bangso na asing mangihutton hasomalan ni halak Jahudi?”+

15 Halak Jahudi asli do hita, dang pardosa na sian bangso na asing. 16 Taboto do, alani haporseaon tu Jesus Kristus do sasahalak didok mangulahon na sittong, dang ala mangihutton patik. Porsea+ do hita tu Kristus+ Jesus, alani i ma didok hita mangulahon na sittong ala nungnga porsea hita tu Kristus i, dang ala mangulahon patik i. Ai dang adong halak na didok mangulahon na sittong ala mangulahon patik i.+ 17 Alani i, molo didok dope hita pardosa hape nungnga didok hita mangulahon na sittong ala porsea tu Kristus, gabe parhobas ni dosa ma Kristus i. 18 Molo hupajongjong muse patik naung huruppakkon i, gabe hupatuduhon ma dirikku na mangalo patik i. 19 Nungnga mate au molo mangihutton patik i,+ asa boi au mangolu tu Debata. 20 Nungnga dipakkuhon au tu hau i rap dohot Kristus.+ Dang mangihutton lomo ni rohakku be parngoluokku,+ alai di bagasan Kristus i do au mangolu. Alani i, mangihutton haporseaokku tu Anak ni Debata i+ nama au mangolu, i ma na makkaholongi au jala na mangalehon ngoluna humokkop au.+ 21 Dang marisuang hubahen asi ni roha ni Debata na massai balga i.+ Ai molo alani patik do sasahalak didok mangulahon na sittong, dang marguna be hamamate ni Kristus i.+

3 Hamu halak Galatia na oto, ise do na mangaliluhon hamu?+ Hape nungnga takkas diboto hamu taringot tu Jesus Kristus na dipakkuhon tu hau.+ 2 Holan sada do sisukkunokku tu hamu: Ala mangulahon patik do umbahen na dijalo hamu tondi parbadia, manang ala porsea tu barita na uli?+ 3 Boasa gabe maoto hamu? Dung diihutton hamu panogu-noguon ni tondi parbadia, boasa gabe diihutton hamu pikkiran ni jolma na mardosa?+ 4 Tung so adong be labana di hamu na manaon hasusaan i? Pos do rohakku, marlaba do i. 5 Alani aha do umbahen dijalo hamu tondi parbadia dohot huaso lao mambahen tanda halongangan?*+ Ala diulahon hamu do patik i manang ala porsea tu barita na uli? 6 Songon si Abraham, “porsea do ibana tu Jahowa* jala alani i ma didok ibana mangulahon na sittong”.*+

7 Takkas do diboto hamu, halak na marhaporseaon do akka anak ni si Abraham.+ 8 Nungnga dipaboa Debata di surat na badia i, dohononna do akka halak na sian bangso na asing mangulahon na sittong alani haporseaon ni nasida. Sian mulana nungnga dipaboa Debata barita na uli on tu si Abraham na mandok, “Dapotan pasu-pasu ma saluhut bangso alani ho.”+ 9 Alani i, dapotan pasu-pasu ma saluhut halak na patuduhon haporseaon songon si Abraham na patuduhon haporseaon.+

10 Hona bura* do sude halak na mangasahon patik. Ai tarsurat do, “Hona bura do manang ise na so toktong mangulahon sude na tarsurat di bukku Patik on.”+ 11 Jala takkas do diboto hamu, dang adong halak na didok mangulahon na sittong di jolo ni Debata holan alani mangulahon patik i.+ Ai “toktong do mangolu halak na mangulahon na sittong ala porsea ibana”.+ 12 Alai dang sian haporseaon anggo patik. Ai tarsurat do, “Manang ise na mangulahon patik, mangolu ma ibana.”+ 13 Nungnga ditobus Kristus hita,+ nungnga dipalua hita+ sian bura ni Patik. Dilehon Kristus do dirina hona bura manggattihon hita. Ai tarsurat do, “Magigi situtu do Debata tu halak na digattung di hau.”*+ 14 Asa marhite Kristus Jesus,+ dapotan pasu-pasu ma akka bangso na asing, i ma pasu-pasu na dijanjihon tu si Abraham. Dung i tajalo ma tondi parbadia+ na dijanjihon alani haporseaotta.

15 Hamu akka dongan, hupaboa ma tu hamu sada tudosan: Molo nungnga hot sada parjanjian, nang pe holan sahalak na mambahen parjanjian i, dang adong na boi manundati manang manambai. 16 Suang songon i ma nungnga dibahen Debata sada parjanjian tu si Abraham dohot tu pinopparna.*+ Dang adong didok, “tu akka pinopparmu”, lapatanna dang tu torop halak. Alai didok do, “tu pinopparmu” lapatanna holan tu sada halak, i ma Kristus.+ 17 Jala dang gabe sundat manang disesa janji ni Debata alani Patik na dilehon 430 taon dukkon i.+ 18 Molo ala mangulahon patik do dilehon pasu-pasu, dang alani janji ni Debata be dilehon pasu-pasu i. Alai burju do Debata, dilehon Ibana do pasu-pasu i tu si Abraham alani janjina.+

19 Attong na lao tu aha do Patik i? Na lao papatarhon hasalaan+ do i sahat tu na ro pinoppar na lao manjalo janji i.+ Marhite suru-suruan+ dilehon do patik tu sada halak na gabe parhitean.*+ 20 Somalna, dang porlu parhitean molo holan sahalak na mambahen parjanjian. Dos songon i ma tu Debata, holan Ibana do na mambahen parjanjian i. 21 Na maralo do Patik tu janji ni Debata? Daong! Molo boi do Patik parohon hangoluan, gabe boi ma ganup halak didok mangulahon na sittong ala mangulahon patik. 22 Alai dibahen Surat na Badia i do saluhut halak gabe tawanan ni dosa. Alani i, tu akka halak na porsea tu Jesus Kristus do dilehon janji i.

23 Alai andorang so porsea hita tu Kristus,* patik do na manogu-nogu hita jala i do na mangarajai hita sahat tu na dipatudu na lao tahaporseai i.+ 24 Alani i, Patik do na manogu-nogu hita tu Kristus,+ asa boi hita didok naung mangulahon na sittong marhite haporseaon.+ 25 Alai dung ro na tahaporseai i,+ dang porlu be hita ditogu-togu Patik.+

26 Anak ni Debata+ do hamu sude ala nungnga porsea hamu tu Kristus Jesus.+ 27 Ai nungnga songon Kristus be hamu ala nungnga tardidi di bagasan Kristus.+ 28 Alani i, dang marimbar be halak Junani+ dohot halak Jahudi, hatoban dohot halak na merdeka,+ borua dohot bawa.+ Ai nungnga marsada be hamu sude di bagasan Kristus Jesus.+ 29 Alani i, molo sisean ni Kristus do hamu, tutu ma hamu pinoppar+ ni si Abraham na lao manjalo pasu-pasu+ na dijanjihon i.+

4 Saonari hudok ma tu hamu, saleleng metmet dope ahli waris* i, sarupa do ibana tu hatoban nang pe ibana nappuna saluhutna. 2 Ai diparorot jala disarihon dope ibana sahat tu na dapot tikki naung ditottuhon bapakna. 3 Songon i ma nang hita, diparhatoban portibi on+ do hita saleleng metmet dope. 4 Alai dung dapot tikki na ditottuhon i, disuru Debata ma Anakna. Ditubuhon sahalak borua+ do ibana jala diihutton ibana do patik+ i saleleng ngoluna. 5 Marhite i boi ma paluaonna akka halak na diparhatoban patik+ i jala boi ma hita gabe akka anak ni Debata.+

6 Ala nungnga gabe akka anak ni Debata hita, dibahen Debata ma tondi parbadia+ na adong di Anakna tu bagasan rohatta+ jala marhite i ma hita mandok, “Abba,* Amang!”+ 7 Alani i dang hatoban be hamu, alai nungnga gabe anak ni Debata jala bahenonna ma hamu gabe ahli waris.+

8 Andorang so ditanda hamu dope Debata, diparhatoban debata na so tutu do hamu. 9 Alai saonari nungnga ditanda hamu Debata jala nungnga ditanda Debata hamu. Alani i, boasa mulak hamu muse mangihutton+ akka na so marguna na di portibi on jala olo hamu diparhatoban akka i?+ 10 Dirayahon hamu do akka ari, akka bulan,+ akka musim, dohot akka taon. 11 Mabiar do au sotung marisuang halojaokki tu hamu.

12 Songon hamu do au najolo. Alani i, mangido ma au tu hamu akka dongan, tiru hamu ma au.+ Dang adong salamuna tu au. 13 Alai diboto hamu do, ala na marsahit i do au umbahen na boi paboahon barita na uli tu hamu. 14 Nang pe songon boban na borat au di hamu tikki na marsahit i, alai dang magigi hamu mangida* au. Dijalo hamu do au songon na manjalo suru-suruan ni Debata, jala songon na manjalo Kristus Jesus. 15 Las do rohamuna di tikki i, alai saonari didia do las ni rohamuna i? Pos do rohakku, molo boi, olo do hamu mamulsikkon matamuna jala mangalehon i tu au tikki i.+ 16 Molo songon i, boasa ma gabe musumuna au saonari ala hupaboa na sittong? 17 Adong halak na massai burju idaon tu hamu, alai jahat do pikkiran ni nasida. Marsitutu do nasida padaohon hamu sian au asa diihutton hamu nasida. 18 Dang sala molo burju nasida tu hamu, alai asal ma tu na denggan jala dang holan tikki rap au dohot hamu. 19 Hamu akka anakokku,+ gabe haccit do muse huhilala alani hamu, songon pakkilalaan ni sahalak ina na lao partus. Jala toktong do i huhilala sahat tu na boi hamu patuduhon parange ni Kristus. 20 Didok rohakku naeng rap do au dohot hamu saonari, asa boi au ullambok makkatai tu hamu. Ai marsak do au mangida hamu.

21 Hamu akka na naeng mangihutton patik, paboa hamu ma tu au, na so diboto hamu do na tarsurat di patik i? 22 Uppamana, tarsurat do adong dua anak ni si Abraham. Sada sian borua hatoban,+ sada nai sian borua na merdeka.+ 23 Anak na tubu sian borua hatoban i, tubu alani giot-giot ni daging.+ Alai anak na tubu sian borua na merdeka, tubu alani janji ni Debata.+ 24 Songon sada gombaran do i sude. Dua borua i manggombarhon dua parjanjian. Sada sian parjanjian i dibahen di Dolok Sinai+ jala gabe hatoban do saluhut na mangihutton parjanjian i. Dos songon si Hagar do parjanjian i. 25 Si Hagar ma na manggombarhon Dolok Sinai,+ i ma dolok na di tano Arab. Dos do ibana tu Jerusalem saonari. Ai gabe hatoban do ibana rap dohot ianakkonna. 26 Alai merdeka do anggo Jerusalem na di banua ginjang. Ibana ma omakta.

27 Ai tarsurat do, “Marlas ni roha ma ho borua na mandul, na so hea manubuhon anak. Marsurak jala marlas ni roha ma ho, ale borua na so hea makkilala haccit ni manubuhon anak. Ai unggodang do ianakkon ni borua na ditadikkon suamina sian ianakkon ni borua na adong suamina.”+ 28 Hamu akka dongan, akka anak na tubu alani janji ni Debata do hamu dos songon si Isak.+ 29 Dibahen anak na tubu alani giot-giot ni daging i do na haccit tu anak na tubu marhite tondi parbadia ni Debata.+ Songon i do nang saonari.+ 30 Alai didok surat na badia i do, “Palao ma hatoban borua i rap dohot anakna. Ai dang na lao rap gabe ahli waris anak ni hatoban i dohot anak ni borua na merdeka i.”+ 31 Alani i akka dongan, anak ni borua na merdeka i do hita, dang anak ni borua hatoban i.

5 Nungnga malua hita, ai nungnga dipalua Kristus i hita. Alani i, hot ma hamu jongjong+ unang be olo hamu dipatunduk songon hatoban.+

2 Au si Paulus mandok tu hamu, molo naeng disunat hamu, dang marlapatan be Kristus i di hamu.+ 3 Sahali nai hupaingot ma sude halak na naeng disunat, ikkon ulahononna do saluhut Patik i.+ 4 Molo naeng mangulahon na sittong do hamu marhite patik i,+ nungnga dao hamu sian Kristus jala nungnga mandao hamu sian asi ni rohana na massai balga i. 5 Alai anggo hita, maima-ima do hita didok mangulahon na sittong marhite tondi parbadia alani haporseaotta. 6 Di akka halak na marsada dohot Kristus Jesus, dang rikkot disunat manang na dang.+ Alai haporseaon na dipatudu marhite holong i do na urrikkot.

7 Nungnga denggan naung diulahon hamu saleleng on.*+ Attong ise do na mangabbati hamu mangihutton hasittongan i? 8 Dang sian Debata na manjou hamu ajaran sisongon i. 9 Saotik pe ragi boi do mambahen kabbang adonan.+ 10 Pos do rohakku tu hamu na marsada dohot Tuan i,+ dos do na taattusi. Alai manang ise pe na manggugai hamu,+ jaloonna do hukuman na patut di ibana. 11 Songon au ma akka dongan, molo hubaritahon dope taringot tu sunat, boasa ma sai ro paraloan tu au? Ai molo hubaritahon dope taringot tu sunat, dang adong be na tartuktuk alani hau partinaonan* i.+ 12 Tu halak na manggugai hamu, tumagon ma dikasing nasida dirina be.*

13 Hamu akka dongan, nungnga tarjou hamu asa malua. Unang ma bahen hamu haluaonmuna i gabe sidalianmuna mangulahon hisap-hisap ni daging.+ Alai marhobas jala masiurupan ma hamu alani holong.+ 14 Ai nungnga digohi* sude Patik i di sada paretta na mandok, “Ikkon haholonganmu do donganmu jolma doshon dirim.”+ 15 Molo masiharatan jala masiallangan hamu,+ jaga ma hamu, so tung masipasudaan hamu.+

16 Alai hudok ma tu hamu, toktong ma ihutton hamu tondi parbadia+ asa unang diulahon hamu hisap-hisap ni daging i.+ 17 Maralo do hisap-hisap ni daging tu na dihalomohon tondi parbadia, jala maralo do tondi parbadia tu daging. Alani i, dang boi be diulahon hamu lomo ni rohamuna, ai maralo do na dua i.+ 18 Asing ni i, molo tondi parbadia do na manogu-nogu hamu, dang patik i be na mangatur hamu.

19 Alai takkas do tarida parniulaon ni daging, i ma seks na so patut,*+ ulaon na ramun,* ulaon ni halak na so umboto ila,*+ 20 manomba akka patung, mardatu,*+ marmusu, marbada, mangiburu, muruk-muruk, marsalisi, mamola-mola, sekte-sekte, 21 late ni roha, mabuk,+ marpestai sahat tu na mabuk,* dohot akka ulaon na songon i.+ Songon naung hupasingot tu hamu, pasingotokku ma hamu muse, dang parsidohot tu Harajaon ni Debata+ halak na mangulahon sisongon i.

22 Alai parbue ni tondi parbadia, i ma holong, las ni roha, dame, sabar,* haburjuon,+ pangalaho na denggan, haporseaon, 23 lambok ni roha, dohot mangarajai diri.+ Dang adong patik na maralo tusi. 24 Manang ise na gabe sisean ni Kristus Jesus, dipamate nasida do* sude giot-giot dohot hisap-hisap ni dagingna.+

25 Molo taihutton do panogu-noguon ni tondi parbadia di parngoluotta, taulahon ma na hombar tu panogu-noguon ni tondi parbadia i.+ 26 Tapasiding ma ginjang ni roha,+ dang olo talu,+ dohot masilatean.

6 Hamu akka dongan, molo adong donganmuna na mangulahon na sala jala dang marhamubaon, hamu akka na ditogu-togu tondi parbadia,+ lambok ma hamu mangurupi ibana asa muba. Alai manat ma hamu,+ so tung hamu sandiri na targoda mangulahon na sala.+ 2 Toktong ma hamu masiurupan tikki masa hasusaan.+ Ai marhite mangulahon i do hamu mangoloi patik ni Kristus.+ 3 Molo adong na mandok dirina penting, hape dang songon i,+ na manggabusi dirina do ibana disi. 4 Alai ganup ma halak mamparrohahon ulaonna be.+ Dung i boi ma ibana marlas ni roha alani ulaonna i, dang ala paimbar-imbarhon tu ulaon ni halak.+ 5 Ai ganup do halak martanggung jawab tu na diulahon ibana.+

6 Naeng ma nian akka halak naung marsiajar taringot tu hata ni Debata olo mangalehon akka na denggan tu na mangajari ibana.+

7 Unang ma hamu lilu, dang boi gabusan Debata. Manang aha na disuan sasahalak, i do panenonna.+ 8 Manang ise na manuan mangihuthon giot-giot ni dagingna na mardosa, panenonna do hamatean sian dagingna na mardosa i. Alai manang ise na manuan hombar tu panogu-noguon ni tondi parbadia, panenonna do hangoluan na saleleng ni lelengna sian i.+ 9 Unang ma hita marnaloja mangulahon akka na denggan. Ai molo dang marnaloja* hita mangulahon i, panenotta do i haduan di tikkina.+ 10 Alani i bissan adong dope tikki,* taulahon ma na denggan tu saluhut halak, tarlumobi ma tu dongan sahaporseaon.

11 Ida hamu ma balga ni huruf na husuratton on tu hamu.

12 Akka halak na mamaksa hamu asa disunat, holan naeng pasonakkon roha ni jolma do i. Diulahon pe songon i, asa unang dibahen do na haccit tu nasida alani Kristus.* 13 Haru akka halak na disunat i pe dang mangulahon Patik i.+ Dijujui nasida pe hamu disunat, asa boi do nasida marginjang ni roha ala diihutton hamu nasida. 14 Alai dang olo au marginjang ni roha. Holan Jesus Kristus+ na mate di hau partinaonan* i do hubanggahon. Molo di au, nungnga mate be portibi on marhite ibana. Alai molo di portibi on, nungnga mate be au* marhite ibana. 15 Disunat manang na so disunat,+ dang i na urrikkot. Alai molo nungnga dibahen Debata sasahalak gabe toppaan na imbaru, i do na urrikkot.+ 16 Anggiat ma dilehon Debata hadameon dohot asi ni roha tu Israel ni Debata,+ i ma saluhut halak na mangihutton aturan on.

17 Mulai saonari, unang ma adong na manusai au. Ai nungnga adong tanda di dagingku na patuduhon hatoban ni Jesus do au.+

18 Sai didongani asi ni roha ni Tuan Jesus Kristus na massai balga ma haburjuonmuna. Amen.