SURAT NA PADUAHON TU HURIA NA DI KORINT

1 Sian au si Paulus, naung gabe apostel ni Kristus Jesus sesuai tu lomo ni roha ni Debata, hubahen do surat on rap dohot donganta si Timoteus+ mandapotton huria ni Debata na di Korint dohot akka na badia na di Akaya.+

2 Anggiat ma dipatuduhon tu hamu asi ni roha na massai balga i dohot dame ni roha na sian Debata Ama i dohot sian Tuanta Jesus Kristus.

3 Tapuji ma Debata, Ama ni Tuanta Jesus Kristus i,+ Ama parasi roha,+ na lambok, jala Debata Sipangapul na sumurung.+ 4 Diurupi* Ibana do hita asa margogo mangadopi sude sitaononta.*+ Marhite gogo na tadapot sian Ibana, gabe boi ma hita mangurupi halak na asing+ asa margogo manaon sitaonon manang aha pe.+ 5 Godang do hasusaan na tataon ala gabe siihutton Kristus,+ jala alani Kristus godang do na tadapot na mambahen hita gabe margogo. 6 Saonari molo marsitaonon* hami, marguna do i lao mangurupi hamu asa margogo jala asa malua hamu. Molo margogo hami, dohot ma hamu gabe margogo jala i ma na mangurupi hamu sabar manaon sitaonon songon sitaonon na hutaon hami. 7 Pos situtu do rohanami tu hamu. Ai diboto hami do, dohot do hamu manaon sitaononnami i. Alani i, dos songon na dihilala hami, pasti diurupi do hamu asa margogo.+

8 Ale akka dongan, didok rohanami naeng do diboto hamu sitaonon na masa tu hami di Provinsi Asia.+ Massai borat do sitaononnami i, lobi sian na tartaon ni sasahalak. Dang hurippu hami be boi hami mangolu.+ 9 Sasittongna, nungnga songon na dihukum mate huhilala hami. Alai masa pe songon i, asa mangasahon Debata do hami, dang mangasahon dirinami. Ai Ibana do na boi pahehehon halak na mate.+ 10 Dipalua Ibana do hami sian parmaraan na boi parohon hamatean, jala pos do rohanami paluaonna do hami muse.+ 11 Boi do hamu mangurupi hami marhite tangiangmuna.+ Ai dialusi Debata do tangiang ni godang halak.+ Alani i, godang ma halak mandok mauliate alani pangurupion na hujalo hami.

12 Bangga do rohanami alani akka on: Dipatudu panggora ni rohanami do na badia parngoluonnami, jala dang munafik hami tu akka halak na di portibi on tarlumobi di tonga-tongamuna. Jala dang mangasahon bisuk ni jolma hami,+ alai mangasahon asi ni roha ni Debata na massai balga i do hami. 13 Holan na boi dijaha hamu* dohot na boi diattusi hamu do na husuratton hami tu hamu. Jala dipangido rohakku do asa boi denggan diattusi hamu on sude.* 14 Nungnga diattusi piga-piga sian hamu naung dibahen hami hamu marbalga ni roha, dos songon hamu na lao mambahen hami marbalga ni roha di ari ni Tuanta Jesus i.

15 Alani pos ni roha i, didok rohakku naeng ro hian do au parjolo tu hamu asa boi dua hali hamu marlas ni roha.* 16 Di tikki i, naeng ro do au mandapotton hamu andorang so lao tu Makedonia. Jala naeng ro do au muse tu hamu dung mulak sian Makedonia, asa boi didongani hamu au satokkin di pardalanakku tu Judea.+ 17 Ai na marmeam-meam au tikki hupaboa rencanakki? Manang holan mangihutton lomo ni rohakku do tikki hubahen i, umbahen na hudok “olo” alai “daong”? 18 Alai songon Debata na boi tahaporseai, boi do hamu porsea tu hatanami. Dang dohononnami “olo” alai “daong”. 19 Asing ni i, Jesus Kristus Anak ni Debata na hubaritahon hami tu hamu rap dohot si Silwanus* dohot si Timoteus,+ dang hea mandok “olo” alai “daong”. Ai molo didok ibana “olo”, pasti “olo” do. 20 Ai sadia godang pe janji ni Debata, saut* do i sude marhite ibana.+ Alani i, marhite ibana do muse tadok “Amen” tu Debata asa tapasangap Debata.+ 21 Alai Debata do na patuduhon na tutu hamu dohot hami appuna ni Kristus, jala Ibana do na mamillit* hita.+ 22 Dibahen Debata do muse materaina tu hita+ jala dilehon do tondi parbadiana tu bagasan rohatta na patoguhon+ hita na dohot do hita manjalo pasu-pasu* di ari na naeng ro.

23 Alani hosakku sandiri, marsumpa ma au di jolo ni Debata, dang boi dope au ro tu Korint, ai dang lomo rohakku mambahen hamu gabe lam marsak. 24 Dang tuan na mangarajai haporseaonmuna hami,+ alai dongan sakarejomuna do hami na mambahen las rohamuna. Ai alani haporseaonmuna sandiri do umbahen na boi hamu togu.

2 Nungnga hudok di bagasan rohakku, na so bahenokku hamu marsak tikki ro au mandapotton hamu. 2 Molo hubahen hamu marsak, ise ma na mambahen las rohakku? Kan holan halak na huarsaki i do na mambahen las rohakku? 3 Alani i do hubahen surat on tu hamu. Asa tikki ro au mandapotton hamu, dang gabe marsak au alani hamu. Ai sasittongna hamu do na mambahen au marlas ni roha. Pos do rohakku, akka na mambahen au marlas ni roha laos i do na mambahen hamu marlas ni roha. 4 Tarilu-ilu do au mambahen surat on tu hamu, ai massai susa jala marsak do rohakku. Alai hubahen pe songon i, dang na lao mambahen hamu gabe marsak,+ alai asa diboto hamu do balga ni holong ni rohakku tu hamu sude.

5 Ai molo adong halak na mambahen hamu marsak,+ dang holan au na dibahen ibana marsak, alai dohot do hamu sude. Alai dang pola godang be au makkatai taringot tusi. 6 Nungnga godang sian hamu na pasingotton halak na mardosa i. Alani i, nungnga sae be i. 7 Saonari, salpuhon hamu ma dosana i jala patogu hamu ma rohana,+ asa unang mandele ibana alani arsak ni rohana i.+ 8 Hupangido ma tu hamu, papos hamu ma rohana na holong do rohamuna tu ibana.+ 9 Alani i do hubahen surattu na parjolo i tu hamu, asa boi do huboto dioloi hamu do sude hatakki manang na dang. 10 Molo disalpuhon hamu do dosa ni sasahalak, salpuhonokku do dosana i. Sasittongna, alani hamu do umbahen na husalpuhon dosa ni sasahalak di jolo ni Kristus, 11 asa unang gabe i dipakke Sibolis*+ lao manaluhon hita.* Ai nungnga taboto aha na lao dibahen Sibolis.+

12 Dung sahat au di Troas+ lao paboahon barita na uli taringot tu Kristus, dilehon do tu au tikki na denggan* lao marhobas tu Tuan i. 13 Alai dang sonang rohakku, ala dang juppang dope au dohot si Titus+ donganki. Alani i, hupaboa ma tu nasida na lao borhat nama au tu Makedonia.+

14 Alai mauliate ma tadok tu Debata. Toktong do dipimpin Ibana hita songon na mamimpin tentara na monang na mulak sian parporangan rap dohot Kristus. Jala dipakke do hita mambahen tarbarita* parbinotoan taringot tu Ibana di sude inganan songon uap na angur! 15 Ai songon uap na angur do hita di Debata tikki tabaritahon taringot tu Kristus. Jala songon uap na tarsar do hita di tonga-tonga ni halak na lao dipalua dohot halak na lao diripasson. 16 Songon uap na parohon hamatean do hita tu halak na lao diripasson.+ Alai songon uap na parohon hangoluan do hita tu halak na lao diboan tu hangoluan. Alani i, ise do na tama mangulahon on? 17 Hami do na tama mangulahon i, ai dang hutiga-tigahon hami* hata ni Debata+ songon na dibahen godang halak. Alai huhatahon hami do na sittong di jolo ni Debata, songon siihutton Kristus na disuru Debata.

3 Ikkon hupatandahon hami dope dirinami tu hamu? Manang songon na asing, na porlu do surat sian hamu na patuduhon hami parhobas ni Debata? Manang na porlu do lehononnami surat tu hamu na patuduhon hami parhobas ni Debata? 2 Hamu do suratnami na tarsurat+ di bagasan rohanami, naung diboto, jala naung dijaha sude halak. 3 Ai hami do akka parhobas+ ni Debata jala hamu do surat ni Kristus na husurat hami. Husuratton hami do hamu marhite tondi parbadia ni Debata na mangolu i, dang marhite tinta. Jala dang tu batu i husuratton hami,+ alai tu bagasan roha do.+

4 Marhite Kristus, pos do rohanami tu Debata taringot tusi. 5 Dang hudok hami alani gogonami do umbahen na tama hami mangulahon i. Alai Debata do na mangurupi hami umbahen na tama hami mangulahon i.+ 6 Ibana do na mambahen hami tama gabe parhobas tu parjanjian na imbaru.+ Jala parhobas tu tondi parbadia ni Debata do hami, dang parhobas tu Patik na tarsurat i.+ Ai parohon hamatean do Patik na tarsurat i,+ alai parohon hangoluan do tondi parbadia ni Debata.+

7 Tu atas ni batu do disuratton Patik na parohon hamatean i.+ Nang pe songon i, mardongan hasangapon na balga do Patik i tikki dilehon, sappe dang tahan halak Israel mangida hasangapon na marsinondang sian bohi ni si Musa.+ Alai na lao salpu do hasangapon i. 8 Alani i, pasti mardongan hasangapon+ na umbalga do kan dilehon tondi parbadia i?+ 9 Molo mardongan hasangapon+ do Patik na parohon hamatean i,+ tottu dao do umbalga hasangapon ni ulaon na mangurupi halak asa gabe dihalomohon Debata.+ 10 Ai gabe so adong be hasangapon ni Patik i molo dipatudos tu hasangapon ni parjanjian na imbaru.+ 11 Molo mardongan hasangapon+ do dilehon Patik na lao salpu i, tottu umbalga do hasangapon na dilehon tu parjanjian na imbaru i!+

12 Ala songon i do pos ni rohatta,+ gabe barani ma hita makkatai.* 13 Jala unang ma hita songon si Musa. Ditutup ibana do bohina pakke kain,+ asa unang diida halak Israel na tinuju ni Patik na lao salpu i. 14 Ai tartutup do pikkiran ni nasida sian najolo.+ Sahat tu saonari ditutup kain i dope pikkiran ni nasida. Ujungna, gabe dang boi diattusi nasida parjanjian na leleng i.+ Ai ikkon jolo diurupi Kristus do asa boi bukka kain i.+ 15 Sahat tu saonari, ganup dijaha+ nasida Patik ni si Musa, toktong do tartutup roha ni nasida dibahen kain i.+ 16 Alai molo dipauba sasahalak rohana jala disomba Jahowa,* bukka ma kain i.+ 17 Dang boi taida Jahowa* jala di surgo* do Ibana. Manang didia adong tondi parbadia+ ni Jahowa,* disi do adong haluaon.+ 18 Ai sude hita, dang ditutupi kain i be bohitta. Jala marsinondang do hasangapon ni Jahowa* marhite hita. Dipauba do hita tudos tu Ibana sian sada hasangapon tu hasangapon na umbalga, songon na dihalomohon Jahowa,* Debata na so boi taida jala na di surgo i.*+

4 Asi ni roha ni Debata do na mambahen hami boi marhobas tu Ibana. Alani i, dang marnaloja hami mangulahon i. 2 Dang hujalo hami ulaon na buni na pailahon, dang manipu hami, jala dang dibahen hami muba hata ni Debata.+ Alai di jolo ni Debata, hupatuduhon hami do tu ganup halak* na sittong na huulahon hami.+ 3 Molo buni* barita na uli na hupaboa hami i, tu akka halak na lao diripasson do i buni, 4 i ma akka na so porsea. Ai dipapitung debata ni portibi* on do pikkiran ni nasida.+ Alani i ma dang boi diida nasida sinondang+ ni hasangapon ni barita na uli taringot tu Kristus,+ gombaran ni Debata i.+ 5 Ai taringot tu Jesus Kristus Tuan i do na hubaritahon hami, dang taringot tu dirinami. Jala hatobanmuna do hami alani Jesus. 6 Ai nungnga didok Debata hian, “Marsinondang ma na tiur sian na holom.”+ Jala marhite bohi ni Kristus, nungnga disondangi Debata+ rohatta marhite parbinotoan na mambahen longang rohatta taringot tu Ibana.

7 Nang pe hami songon hudon+ na sian tano liat,+ alai dilehon do tu hami tugas na badia na songon arta i. Sian on tarida ma, gogo na hujalo hami lobi do sian gogo ni sahalak jolma. Alai sian Debata do i, dang sian dirinami sandiri.+ 8 Marragam do sitaonon na ro manosak hami, alai dang tarhapit hami. Marsak do hami, alai sai adong do dalan haluaon.*+ 9 Dibahen do na haccit tu hami, alai dang ditadikkon Debata hami.+ Didabuhon do hami, alai dang mate.+ 10 Tudia pe hami lao, sai masa do jea na parohon hamatean songon na masa tu Jesus.+ Gabe boi ma hupatudu hami tu akka halak, na huhilala hami do sitaonon songon na masa tu Jesus. 11 Nang pe mangolu hami, alai sai di bagasan parmaraan do ngolunami+ ala mangihutton Jesus. On patuduhon tu akka halak, na huhilala hami do sitaonon songon na masa tu Jesus. 12 Nang pe sai mangadopi hamatean hami, alai parohon hangoluan do i tu hamu.

13 Ai adong do tarsurat, “Ala na porsea do au umbahen na huhatahon i.”+ Songon i ma, ala na porsea do hami umbahen na makkatai hami. 14 Ai huboto hami do, Debata naung pahehehon Jesus, Ibana do na lao pahehehon hami asa rap dohot Jesus. Jala boanonna do hami rap dohot hamu tu jolo ni Jesus.+ 15 Alani hamu do umbahen na masa i sude. Ai molo lam godang halak pasangappon Debata marhite mandok mauliate tu Ibana, lam balga ma asi ni rohana na massai balga i.+

16 Alani i do dang marna loja hami. Nang pe lam gale dagingnami, alai lam dipaimbaru do roha nang pikkirannami ganup ari. 17 Ai sitaonon na masa tu hita, parsatokkinan do i jala dang borat,* parohon hasangapon na balga jala na martahan saleleng ni lelengna do i di hita.+ 18 Akka na so tarida ma taparrohahon, dang akka na tarida.+ Ai parsatokkinan do akka na tarida i, alai martahan sahat tu saleleng ni lelengna do na so tarida i.

5 Ai taboto do, na lao diruppakkon do jabutta na di tano on, i ma dagingta na songon kemah i.+ Jala lehonon ni Debata ma di hita jabu di banua ginjang,+ na so dibahen jolma jala na martahan sahat tu saleleng ni lelengna. 2 Ai massai susa do tahilala di jabutta sisaonari on. Lomo do rohatta naeng mamakke* na diparade tu hita di banua ginjang i.+ 3 Ai molo dung tapakke i, dang salang-salang be hita. 4 Sasittongna, massai susa do tahilala jala tataon do sitaonon na borat di kemahta sisaonari on. Dang lomo ni rohatta lao manadikkon kemahta on, alai na lomo do rohatta manjalo inganan na di banua ginjang i+ asa dipauba dagingta na boi mate i tu hangoluan na saleleng ni lelengna.+ 5 Saonari, nungnga diparade Debata+ tu hita hangoluan i. Jala dilehon do tu hita tondi parbadia, na patoguhon hita na dohot do hita manjalo pasu-pasu di ari na naeng ro.*+

6 Alani i, toktong do pos rohatta jala taboto do, saleleng mangolu mamakke dagingta* na di tano on dope hita, dao dope hita sian Tuan i.+ 7 Ai mangihutton haporseaon do hita mangolu, dang mangihutton akka na taida. 8 Alani i, pos do rohatta jala unlomo do rohatta tinggal rap dohot Tuan i,+ sian apala tinggal di dagingta on. 9 Alani i, nang pe rap hita dohot ibana manang dao sian ibana, tabahen ma sian nasa gogotta mangulahon lomo ni rohana. 10 Ai ikkon jongjong do hita sude di jolo ni kursi pengadilan* ni Kristus. Jaloon ni ganup halak ma upana sesuai tu parniulaon ni nasida, na denggan manang na roa tikki mardaging jolma nasida.+

11 Ala huboto hami do lapatan ni biar mida Tuan i, toktong do diurupi hami akka halak asa marpos ni roha tu akka na diajarhon hami. Ai diboto Debata do ise hami,* jala lomo do rohakku tandaonmuna* hami. 12 Dang na mamuji dirinami hami muse. Alai, hudok hami pe songon i, asa taronjar do rohamuna lao marbalga ni roha alani hami. Alani i, boi ma dialusi hamu akka halak na bangga tu akka na tarida,+ alai dang bangga tu akka na adong di roha. 13 Alai molo tung songon na so marroha hami diida hamu,+ lao tu Debata do i. Jala molo tung marroha hami diida hamu, lao tu hamu do i. 14 Ai holong ni Kristus i do na mangonjar rohanami lao mangulahon i. On do na huattusi hami: Mate do sahalak jolma humokkop sude jolma,+ ai sasittongna nungnga mate be sude jolma. 15 Mate do ibana humokkop sude jolma. Alani i dang mangolu tu dirina sandiri be sude jolma,+ alai mangolu tu Kristus naung mate jala naung dipahehe i do.

16 Mulai sian saonari, dang olo be hami manguhumi halak mangihutton pikkiran ni jolma.+ Nang pe najolo mangihutton pikkiran ni jolma hami mangida Kristus i, alai saonari dang songon i be hami.+ 17 Manang ise na marsada dohot Kristus i, nungnga gabe toppaan na imbaru ibana.+ Nungnga salpu na leleng i, jala akka na imbaru nama na ro saonari. 18 Alai sian Debata do i sudena. Jala marhite Kristus,+ dibahen Debata do hita mardame dohot Ibana songon na parjolo i. Debata do muse na mangalehon tu hita tugas lao mangurupi halak na asing asa mardame dohot Ibana.+ 19 Lapatanna, marhite Kristus bahenon ni Debata ma akka jolma mardame dohot Ibana,+ jala dang dietong-etong be akka hasalaan ni nasida.+ Jala dilehon do tu hita ulaon lao paboahon i tu akka jolma asa boi nasida mardame tu Debata.+

20 Akka utusan na manggattihon+ Kristus i do hami.+ Alani i marhite hami, songon na mangelek-elek ma Debata tu akka jolma. Ala manggattihon Kristus do hami, hupangido hami ma tu hamu, “Mardame ma hamu dohot Debata.” 21 Dang mardosa+ Kristus i, jala dibahen Debata do ibana gabe pelean hasesaan ni dosatta.* Alani i, marhite ibana boi ma didok Debata hita mangulahon na sittong.+

6 Ala dongan sakerejo ni Debata do hami,+ hupangido hami ma tu hamu, unang ma marisuang bahen hamu asi ni roha ni Debata na massai balga naung dijalo hamu.+ 2 Ai didok Debata do, “Hutangihon do ho di ari parasi rohaon i. Jala huurupi do ho di ari haluaon i.”+ Ida ma! Saonari ma ari parasi rohaon i. Jala saonari ma ari haluaon i.

3 Dang olo hami mambahen haccit roha ni* halak di sude ulaonnami, asa unang adong halak na mandok na so denggan taringot tu ulaonnami marhobas tu Debata.+ 4 Alai, di sasudena hupatuduhon hami do molo hami parhobas ni Debata.+ Sabar do hami manaon marragam sitaonon, tikki marhahurangan, dohot tikki susa.+ 5 Dipukkuli do hami, dipenjarahon,+ dipukkuli godang halak, loja mula-ulaon, jotjot dang modom, jala jotjot dang mangan.+ 6 Badia do parngoluonnami, huihutton hami do hata ni Debata, sabar do hami jala burju.+ Hupatudu hami do na dihaholongi+ hami akka halak sian ias ni rohanami+ jala na ditogu-togu tondi parbadia ni Debata hami. 7 Huhatahon hami do na sittong jala mangasahon huaso ni Debata do hami.+ Ditiop hami do sinjata di tangannami sabola kiri* dohot di tangannami sabola kanan* na boi mangurupi hami mangulahon na sittong.+ 8 Dipasangap do hami jala dileai. Diissaki do hami jala dipuji. Dibahen do hami songon panipu, hape sittong do na huhatahon hami. 9 Dibahen do hami songon halak na so ditanda, hape ditanda do hami. Songon halak na naeng mate* do hami, hape mangolu dope hami.+ Nang pe hona hukum, alai dang mate+ hami. 10 Nang pe hami songon halak na marsak, alai marlas ni roha do hami. Nang pe songon na pogos, alai godang do halak mamora hubahen hami. Songon na so adong do manang aha di hami, alai sude do adong di hami.+

11 Hamu ale akka dongan na di Korint, takkas do hami makkatai tu hamu jala massai holong do rohanami* tu hamu. 12 Hulehon hami do rohanami tu hamu,+ alai hamu do na hurang mangalehon rohamuna tu hami. 13 Songon na makkatai tu anakkokku do hubahen tu hamu. Alani i songon i ma bahen hamu tu hami, haholongi hamu ma hami.*+

14 Unang ma marsada* hamu dohot halak na so porsea.+ Ai aha ma pardomuan ni na sittong dohot na jahat?+ Jala aha ma pardomuan ni na tiur dohot na holom?+ 15 Ai aha ma pardomuan ni Kristus dohot Sibolis?*+ Jala aha ma pardomuan ni halak na porsea* dohot halak na so porsea?+ 16 Aha ma pardomuan ni bagas joro ni Debata dohot akka patung?+ Ai hita do bagas joro ni Debata na mangolu i.+ Ai didok Debata do, “Maringanan ma au rap dohot nasida,+ jala di tonga-tonga ni nasida ma au maringanan. Au ma gabe Debata ni nasida jala nasida ma na gabe bangsokku.”+ 17 “‘Alani i, kaluar ma hamu sian tonga-tonga ni nasida jala padao hamu ma dirimuna sian nasida,’ ninna Jahowa,* ‘unang be jama hamu na ramun’”,*+ “‘dung i jalookku ma hamu.’”+ 18 “‘Au ma gabe Amamuna jala hamu+ ma na gabe anak dohot borukku,’ ninna Jahowa* Debata Pargogo na So Hatudosan i.”+

7 Alani i akka dongan na dihaholongi, ala nungnga dilehon janji i tu hita,+ tapaias ma diritta sian akka na mambahen ramun* daging dohot pikkiranta.*+ Tahabiari ma Debata asa lam badia hita.

2 Jalo hamu ma hami di rohamuna.+ Dang hea huulahon hami na sala manang na tu ise pe, dang hea huliluhon hami manang ise pe, jala dang hea hubuat hami pangomoan sian manang ise pe.+ 3 Hudok pe songon i tu hamu, dang na lao manguhumi hamu au. Ai songon naung hea hudok, massai holong do rohanami tu hamu, jala rade do hami rap dohot hamu manang aha pe na masa. 4 Barani do au makkatai* tu hamu jala las do rohakku mangida hamu. Massai togu do rohakku dibahen hamu jala marlas ni roha do au,+ nang pe godang sitaonon na masa tu hami.

5 Sasittongna dung sahat hami di Makedonia,+ dang boi dope hami tenang. Ai godang dope sitaonon na masa tu hami, godang do halak na mangalo hami, jala marsak do hami alani na masa di huria. 6 Alai Debata na patoguhon* roha ni akka na marsak,+ dipatogu do rohanami marhite haroro ni si Titus. 7 Dang holan alani haroro ni si Titus umbahen na togu rohanami. Alai dohot do ala naung togu ibana dibahen hamu. Ai dipaboa ibana do tu hami na masihol situtu rohamuna naeng pajuppang dohot au. Jala dipaboa do muse taringot tu arsak ni rohamuna, dohot tulus ni rohamuna mamikkirhon au. Alani i, tamba ma las ni rohakku.

8 Nang pe marsak hamu alani surat na hubahen,+ alai dang manolsoli au disi. Ai marsak do hamu huida alani surat na hubahen i, alai holan satokkin do arsakmuna i. Alani i, nang pe mulana manolsoli au, 9 saonari las do rohakku. Dang ala na marsak hamu, alai ala na olo do hamu muba dibahen arsak ni rohamuna i. Ai na lao mangulahon lomo ni roha ni Debata do hamu umbahen na marsak, alani i dang adong manang aha pe na mago sian hamu alani hami. 10 Ai molo tung marsak pe hita ala naeng mangulahon lomo ni roha ni Debata, parohon na denggan do i. Arsak ni roha i mambahen sasahalak gabe muba jala gabe boi selamat.+ Alai parohon hamatean do arsak ni roha ala naeng mangulahon lomo ni roha ni portibi on. 11 Takkas ma, sesuai do arsak ni rohamuna i tu lomo ni roha ni Debata. Ai gabe marsitutu do hamu mangulahon na sittong. Dipatudu hamu do na so marsala hamu, sogo do rohamuna tu ulaon na sala, biar do rohamuna tu Debata, olo do hamu muba, disomba hamu do Debata sian nasa rohamuna, jala marsitutu do hamu padenggatton na sala.+ Sudena i patuduhon nungnga diulahon hamu na sittong.* 12 Hubahen pe surat i, dang tu halak na mangulahon na sala,+ manang tu halak na marsitaonon alani hasalaanna. Alai husurat do i lao mamboto na marsitutu do hamu manang na dang manangihon hami di jolo ni Debata. 13 Alani na binahenmuna i, gabe togu do rohanami.

Asing ni i, tamba do las ni rohanami alani las ni roha ni si Titus. Ai dibahen hamu do ibana marlas ni roha. 14 Bangga do au mangida hamu. Hupuji do hamu di jolo ni si Titus, jala dang maila au disi. Ai sittong do sude na hupaboa hami i tu ibana taringot tu hamu, jala sittong do sude na hupaboa hami tu hamu. 15 Asing ni i, lam balga do holong ni rohana tu hamu. Ai diingot ibana do songon dia hamu mangoloi ibana,+ manjalo ibana, jala mangargai ibana. 16 Las do rohakku ala boi do pos rohakku tu hamu di saluhutna.*

8 Ale akka dongan, lomo do rohanami asa diboto hamu taringot tu asi ni roha ni Debata na massai balga i na dipatuduhon tu akka huria na di Makedonia.+ 2 Tikki masa sitaonon na massai borat tu nasida, toktong do nasida boi marlas ni roha. Ai rade do nasida mangalehon sumbangan nang pe pogos nasida. 3 Dilehon nasida do sian nasa tolap ni nasida,+ gariada lobi dope tahe dilehon nasida sian na tolap ni nasida.+ Au sandiri ma saksina. 4 Sai dielek-elek nasida do hami asa boi nasida dohot mandapot hasangapon lao mangalehon sumbangan jala mangurupi akka na badia.+ 5 Dilehon nasida do lobi sian na dipangido rohanami. Sesuai tu lomo ni roha ni Debata, dilehon do diri ni nasida marhobas tu Tuan i jala diurupi do hami sian nasa roha ni nasida. 6 Alani i, hujujui hami do si Titus,+ asa dipasidung ulaon papunguhon sumbangan na sian hamu. Ai ibana do na mamukka ulaon i. 7 Nungnga denggan sude na diulahonmuna i: Togu do haporseaonmuna, denggan do hamu pasahatton hata ni Debata, godang do parbinotoanmuna, marsitutu do hamu di sude ulaonmuna, jala dihaholongi hamu do na asing songon hami makkaholongi hamu. Alani i, dipangido rohanami do asa rade hamu mangalehon sumbangan i.+

8 Hudok pe songon i, dang na lao mambahen paretta au tu hamu. Alai asa diboto hamu do naung dibahen halak na asing sian nasa gogona lao mangurupi. Jala hubahen pe songon i, ala na lomo do rohakku mamboto holong ni rohamuna na sasittongna. 9 Ai nungnga diboto hamu asi ni roha ni Tuanta Jesus Kristus na massai balga i. Nang pe na mora ibana, alai gabe pogos do alani hamu,+ asa mamora hamu alani hapogosonna.

10 Ninna rohakku,+ parohon na denggan do molo dipasidung hamu ulaon i. Ai nungnga sataon hamu mangulahon i. Jala marlas ni roha do hamu di ulaon i. 11 Alai saonari, pasidung hamu ma ulaon naung dimulai hamu. Bahen hamu ma sian nasa tolapmuna. Molo dibahen hamu songon i, on patuduhon na las do rohamuna mangulahon i. 12 Ai lomo do roha ni Debata tu halak na mangalehon sian ias ni rohana.+ Jala lomo do roha ni Debata tu halak na mangalehon sian na tolapna, dang sian na so tolapna. 13 Na hudok disi, dang na lao mangorui boban ni na asing au jala manambai bobanmuna. 14 Alai asa boi do na lobi di hamu, manutupi na hurang di nasida. Jala na lobi di nasida manutupi na hurang di hamu. Alani i, gabe dos ma bobanmuna. 15 Ai songon hata ni na tarsurat i, “Halak na papunguhon godang, dang marlobi-lobi, jala halak na papunguhon otik, dang hurangan.”+

16 Mandok mauliate do hami tu Debata ala marsitutu do si Titus+ mamparrohahon hamu, dos songon caranami mamparrohahon hamu. 17 Ai nungnga dioloi si Titus pangidoannami jala massai lomo do rohana mangulahon i. Jala rohana sandiri do na manjujui ibana ro manjuppangi hamu. 18 Alai, disuru hami do donganta na asing mandongani ibana. Dipuji sude huria do donganta i alani ulaonna paboahon barita na uli. 19 Asing ni i, dipillit akka huria do ibana mandongani hami lao pasahatton akka sumbangan naung pungu i. Diulahon hami do i lao pasangappon Tuan* jala lao patuduhon na rade hami mangurupi halak na asing. 20 Hubahen hami pe songon i, asa unang adong do na mandok na so tutu taringot tu hami, alani sumbangan na balga na diurus hami i.+ 21 Ai ‘jujur do hami mangulahon sude ulaonnami. Dang holan di jolo ni Jahowa,* alai dohot do di jolo ni jolma’.+

22 Asing ni i, husuru hami do sahalak nai donganta mandongani nasida. Nungnga jotjot diuji hami ibana jala tarida do na ringgas ibana. Jala lam ringgas do ibana, alani pos ni rohana tu hamu. 23 Molo adong na sukkun-sukkun rohana taringot tu si Titus, paboa hamu ma na donganku do ibana jala rap saulaon do hami lao mangurupi hamu. Jala molo adong na sukkun-sukkun rohana taringot tu akka donganta i, paboa hamu ma, akka na disuru* huria do nasida jala na parohon sangap tu Kristus i. 24 Alani i, patudu hamu ma na holong rohamuna tu nasida.+ Jala patuduhon hamu ma tu akka huria na tutu do akka na denggan na hudok hami i taringot tu hamu.

9 Sasittongna, dang porlu bahenokku surat tu hamu paboahon na porlu hamu mangurupi* akka na badia.+ 2 Ai huboto do na rade rohamuna mangurupi. Jala hupuji do hamu di jolo ni akka dongan na di Makedonia. Hudok do tu nasida, naung rade hamu akka na di Akaya sian taon naung salpu. Jala godang do na taronjar rohana ala rade hamu. 3 Alani i, saonari husuru ma akka dongan i asa tarida dang holan hata-hata sude akka na denggan na hudok taringot tu hamu. Alai asa rade do hamu mangurupi songon naung hupaboa tu nasida. 4 Molo ro akka dongan sian Makedonia rap dohot au, jala huida hami dang rade dope hamu, gabe maila ma hami songon i nang hamu, hape nungnga pos situtu hian rohanami tu hamu. 5 Alani i do didok rohakku, porlu hujujui asa parjolo akka dongan i ro mandapotton hamu, asa dipapungu nasida sumbangan songon janjimuna i. Molo dung pungu sumbangan i, tarida ma na sian ias ni rohamuna do hamu mangalehon sumbangan i, dang alani na tarpaksa.

6 Ingot hamu ma on: Molo otik disabur sasahalak, otik do panenonna. Alai molo godang disabur sasahalak, godang do panenonna.+ 7 Lok ma sian na taronjar ni rohana sasahalak mangalehon silehononna, unang ma marungut-ungut manang ala na tarpaksa.+ Ai dihaholongi Debata do halak na mangalehon sian las ni rohana.+

8 Ai sanggup do Debata mangalehon sude asi ni rohana na massai balga i tu hamu, asa unang adong na hurang di hamu lao mangulahon manang aha pe. Jala gok ma na boi pakkeonmuna lao mangulahon sude ulaon na denggan.+ 9 Songon hata ni na tarsurat i, “Las do rohana mangalehon na adong di ibana dohot mangurupi halak na pogos. Na lao martahan do akka ulaonna na sittong* i saleleng ni lelengna.”+ 10 Debata na paradehon boni tu panabur dohot roti na lao allangon, Ibana do na lao paradehon godang boni tu hamu jala marlipat ganda do i lehononna. Bahenonna do godang dapotmuna parbue sian ulaonmuna na denggan. 11 Pasu-pasuonna do hamu di sude ulaonmuna asa boi dipatudu hamu burju ni roha marhite marragam cara. Gabe godang ma na mandok mauliate tu Debata alani silehon-lehon na dipasahat hamu marhite hami. 12 Ai dang holan manggohi akka na porlu tu akka na badia silehon-lehonmuna on, alai gabe dohot do i parohon laba tu akka na asing.+ Alani i, gabe godang ma halak na mandok mauliate tu Debata. 13 Marhite silehon-lehonmuna on, tarida ma halak na songon dia hamu. Dipuji nasida ma Debata ala sesuai do pangalahomuna i tu barita na uli na dipaboa hamu taringot Kristus. Ai burju do hamu tu nasida dohot tu sude jolma.+ 14 Dihaholongi nasida ma hamu jala ditangiakkon. Ai massai godang do dilehon Debata tu hamu asi ni rohana na massai balga i.

15 Mandok mauliate ma hita tu Debata alani asi ni rohana na so tarhatahon i!

10 Au si Paulus, mangido tu hamu marhite lambok ni roha dohot marhite burju ni roha songon na pinatudu ni Kristus.+ Adong do sian hamu na mandok, halak na gale do au tikki rap dohot hamu,+ alai barani tikki dang rap dohot hamu.+ 2 Dipangido rohakku do, molo dung rap au dohot hamu, unang ma nian muruk au tu manang ise pe sian hamu. Ai adong do sian hamu na mandok molo hami mangihutton pikkiran ni akka jolma na di portibi on. 3 Nang pe mangolu hami di portibi on, alai dang mangihutton pikkiran ni akka jolma na di portibi on parporangannami. 4 Ai dang sian portibi on sinjatanami di parporangan i.+ Alai sian Debata na marhuaso+ i do, asa boi huruppakkon hami akka naung togu dipajongjong. 5 Ai huruppakkon hami do akka pikkiran na sala dohot akka na maralo tu parbinotoan taringot tu Debata.+ Hurajai hami do nasa pikkirannami asa mangoloi Kristus. 6 Molo dung dipatudu hamu na mangoloi do hamu di sasudena,+ rade ma hami manghukum sude akka na so mangoloi.

7 Ai mangihutton na tarida do hamu manguhumi. Molo pos roha ni sasahalak na appuna ni Kristus ibana, ikkon ingotonna do molo hami pe appuna ni Kristus do songon ibana. 8 Dilehon Tuan i do tanggung jawab tu hami lao patoguhon rohamuna, dang lao mambahen hamu gale.+ Molo tung pe malobihu balga ni rohakku alani tanggung jawab na dilehon ni Tuan i, dang maila au disi. 9 Alai dang olo au gabe songon na pabiar-biarhon hamu marhite akka surattu. 10 Ai adong do na mandok, “Karas jala posi do surat ni si Paulus i, hape tikki pajuppang dohot hita, gale do ibana idaon jala hatana pe dang marlapatan.” 11 Alai porlu do botoon ni halak na mandok i, molo na hupaboa hami di akka suratnami i, ulahononnami do i tikki rap dohot hamu.+ 12 Dang olo hami patudoshon dirinami manang gabe dos dohot akka siginjang roha.+ Ai mangihutton na denggan di rohana sandiri do nasida manguhumi. On patuduhon dang adong pangattusion ni nasida.+

13 Alani i, dang bangga hami tu akka ulaon na so diulahon hami. Alai bangga do rohanami tu ulaon na dipasahat* Debata tu hami jala dohot do hamu di ulaonnami i.+ 14 Sasittongna, dang huulahon hami lobi sian ulaon na dilehon Debata tu hami tikki ro hami mandapotton hamu. Ai hami do na parjolo sahali pasahatton barita na uli taringot Kristus tu hamu.+ 15 Dang bangga hami tu hasil ni ulaon ni halak na asing. Ai nungnga di luar batas ni ulaon na dilehon tu hami na binahenna i. Alai dipangido rohanami do asa lam togu haporseaonmuna jala asa torus tamba hasil na diulahon hami di tonga-tongamuna. Alani i lam godang ma inganan na boi dikarejohon hami. 16 Gabe boi ma dibaritahon hami barita na uli i di inganan na asing na dao sian ingananmuna, asa unang marbalga ni roha hami tu ulaon ni na asing di inganan ni nasida. 17 “Manang ise na naeng marbalga ni roha,* marbalga ni roha ma ibana alani Jahowa.”*+ 18 Ai dang lomo roha ni Debata mangida halak na mamuji dirina sandiri,+ alai Jahowa* sandiri do na manottuhon ise na dihalomohon rohana.+

11 Dipangido rohakku do asa sabar hamu tu au, nang pe songon halak na hurang roha au otik. Alai sasittongna, sabar do nian hamu tu au! 2 Ai parduli do au tu hamu, songon Debata na parduli tu hamu. Ai nungnga hubahen hamu gabe tunangan ni Kristus. Jala hulehon do hamu tu ibana songon sahalak borua perawan na badia.+ 3 Songon si Hawa na tartipu ala dioto-otoi ulok na akkal,+ mabiar do au so tung adong na manegai pikkiranmuna, na mambahen hamu gabe dang setia manang dang badia di jolo ni Kristus.+ Ai sasittongna, ikkon badia jala ikkon halak na setia do hamu. 4 Hudok pe songon i, ala na adong do sian hamu na manjalo halak na ro mambaritahon Jesus na asing, hape asing do i sian na hubaritahon hami. Dijalo hamu do muse huaso na asing na imbar sian huaso na manogu-nogu pikkiranmuna. Jala dijalo hamu do muse barita na uli na asing sian barita na uli naung dijalo hamu.+ 5 Didok rohakku, dang adong nanggo otik na patuduhon na hurang denggan au sian akka apostelmuna na jago i.+ 6 Tung pe hurang malo au makkatai,+ alai adong do parbinotoakku. Jala nungnga takkas hupatuduhon hami i tu hamu di sasudena.

7 Las do rohakku paboahon barita na uli taringot Debata tu hamu. Jala dang adong hepeng hujalo sian hamu. Hupatutoru do dirikku asa sangap hamu. Boha, sala do au disi?+ 8 Akka huria na asing do na mambalanjoi* au. Boi dohonon songon na mangarampok do au sian nasida asa boi au marhobas tu hamu.+ 9 Tikki rap au dohot hamu, dang adong hususai manang ise pe sian hamu lao mangalehon na porlu di au. Ai akka dongan sian Makedonia do na mangalehon sude na porlu di au.+ Di sasudena, hujaga do dirikku asa unang gabe boban au di hamu. Jala toktong do bahenokku songon i.+ 10 Saleleng adong dope hasittongan taringot Kristus di bagasan dirikku, dang adong na boi mangabbati au marbalga ni roha+ taringot tusi di sude luat Akaya. 11 Boasa dang hubahen songon i tu hamu? Na so holong do rohakku tu hamu? Diboto Debata do na holong rohakku tu hamu.

12 Adong do sian tonga-tongamuna na mambanggahon dirina.*+ Didok do dirina apostel songon hami. Alani i, toktong do ulahonokku songon naung huulahon saleleng on, asa unang adong be alasan ni nasida lao mambanggahon dirina. 13 Akka apostel na so tutu do halak sisongon i. Pargabus do nasida, jala dipasuman-suman do dirina songon akka apostel ni Kristus.+ 14 Sasittongna, dang pola heran hita disi. Ai Sibolis* pe dipasuman-suman do dirina songon suru-suruan na burju.*+ 15 Alani i, dang pola heran be hita molo akka na mangihutton ibana pe, dipasuman-suman do diri ni nasida songon halak na mangulahon na sittong. Alai ujungna, jaloon ni nasida do upana sesuai tu na dibahen nasida.+

16 Hudok ma sahali nai tu hamu: Unang ma adong sian hamu na mandok na hurang roha au. Alai molo adong pe na mandok songon i, jalo hamu ma au songon na manjalo halak na hurang roha, asa boi au marbalga ni roha saotik. 17 Saonari, dang huihutton be sitiruon ni Tuan i tikki makkatai. Ai songon halak na hurang roha nama au makkatai na mamuji dirina sandiri. 18 Ai godang do halak na mambanggahon dirina alani akka na di portibi on. Au pe, songon i nama bahenokku. 19 Ala didok hamu do halak “na marroha” situtu hamu, attong las ma rohamuna manjalo halak na hurang roha. 20 Sasittongna, sabar do hamu tu halak na mambahen hamu gabe hatoban, na mambuat pangomoan sian hamu, na mangarampas na adong di hamu, na patimbohon dirina di tonga-tongamuna, dohot tu halak na mamastap hamu.

21 Maila do nian hami mandok i, ai gabe halak na gale do hami didok rohamuna.

Alai molo barani do halak na asing, au pe ikkon barani do, nang pe makkatai au songon halak na hurang roha. 22 Halak Heber do nasida? Au pe halak Heber do.+ Halak Israel do nasida? Au pe halak Israel do. Pinoppar ni si Abraham do nasida? Au pe pinoppar ni si Abraham do.+ 23 Parhobas ni Kristus do nasida? Hualusi ma nasida songon alus ni na rittik. Dumenggan dope au sian nasida. Unggodang do na huulahon sian nasida,+ unjotjot do au dipenjarahon,+ dang taretong be manang na piga hali au dipukkuli, jala jotjot do au nungnga naeng mate.+ 24 Lima hali ma au dilissingi halak Jahudi, 39 hali* ma sahali mangalissing. + 25 Tolu hali ma au dipukkuli dohot tukkot,+ sahali didangguri dohot batu,+ tolu hali ma lonong kapal na hutoppang,+ jala sadari saborngin ma au mumbang-umbang di laut. 26 Di pardalanan, jotjot do au mangadopi parmaraan. Adong do i alani sunge, alani pangarampok, alani dongan sabangsokku,+ dohot alani bangso na asing.+ Masa do parmaraan tu au di kota,+ di padang gurun, di laut, dohot di tonga-tonga ni dongan na so tutu dongan. 27 Massai godang do ulaonku na borat jala loja do au, jotjot do au dang modom,+ jotjot do au male jala mauas,+ jotjot do au hurang mangan,+ ngalian, jala dang adong pakkeanku.*

28 Asing ni i, ganup ari do au holsoan alani sude huria.+ 29 Molo adong halak na gale, dohot do au gale. Molo adong na maninggalhon haporseaonna, gabe marsak do au.

30 Molo ikkon marbalga ni roha au, hagaleokki ma na mambahen au marbalga ni roha. 31 Diboto Debata do na so margabus au. Ai Ibana do Ama ni Tuanta Jesus na tama pujion saleleng ni lelengna. 32 Tikki di Damaskus, disuru gubernur ni Raja Aretas do akka panjaga tu gerbang ni kota lao manakkup au. 33 Alai dipaturun do au di bagasan karanjang na balga* sian tembok ni kota,+ gabe selamat ma au.

12 Ikkon marbalga ni roha do au nang pe dang adong gunana. Saonari paboaokku ma taringot tu parnidaan+ dohot taringot tu pangungkapon na dilehon Tuan i tu au.+ 2 Adong do huboto sahalak bawa siihutton Kristus, 14 taon naung salpu toppu do ibana diangkat tu surgo na patoluhon. Alai dang huboto dohot do dagingna i diangkat manang na dang. Debata do na mamboto i. 3 Tutu, hutanda do bawa i. Alai dang huboto dohot do dagingna i diangkat manang dang. Debata do na mamboto i. 4 Diboan do ibana toppu tu paradeiso. Dibege ibana ma disi akka hata na so boi dihatahon manang na so diloas dihatahon jolma. 5 Bangga do au mangida bawa i. Alai anggo au dang bangga tu dirikku sandiri, holan hagaleokki do na hubanggahon. 6 Autsugari pe lomo rohakku mambanggahon dirikku, dang na gabe hurang roha au, ai tutu do na huhatahon i. Alai dang olo au mambanggahon dirikku holan asa dipuji-puji halak alani akka na diida dohot na dibege hamu sian au. 7 Jala unang ma holan ala na dapottu pangungkapon sian Tuan i gabe dipuji-puji hamu au.

Ai dipamasuk do suga tu bagasan dagingku+ asa unang ginjang rohakku. Songon suru-suruan ni Sibolis do i na sai mamukkuli* au. 8 Nungnga tolu hali hupangido tu Tuhan* i asa dibolokkon i sian au. 9 Alai songon on do didok tu au, “Nungnga sae be asi ni rohakku na massai balga i di ho. Ai lam balga do huasokku alani hagaleonmi.”+ Alani i, bangga do au alani hagaleokki, asa huaso ni Kristus i na torus mangalinggomi au songon kemah. 10 Alani i, las do rohakku tikki gale au, tikki dileai, tikki marhahurangan, tikki manaon na haccit, manang tikki manaon hasusaan alani Kristus. Ai tikki gale au, gabe margogo do au.+

11 Nungnga songon halak na hurang roha au makkatai. Sasittongna hamu do na mambahen au songon i. Ai dang dihatahon hamu akka na denggan taringot na huulahon. Nang pe so manang na ise au di hamu, alai dang dumenggan akka apostelmuna na jago i sian au.+ 12 Jala nungnga diida hamu tanda na patuduhon sahalak apostel au. Ai toktong do au setia jala sabar.+ Hupatudu do muse tu hamu mukjizat dohot akka tanda halongangan.+ 13 Aha ma hurangmuna martimbakkon huria na asing? Holan on do: Dang dohot hamu hubahen mambalanjoi au.+ Nang pe songon i, sala ma au disi.

14 Sasittongna, on ma na patoluhalihon au rade naeng manjuppangi hamu. Jala dang olo au gabe boban di hamu. Dang artamuna i na hulului, alai hamu do.+ Ai dang anakkon+ na papunguhon arta tu natua-tuana. Alai natua-tua do na papunguhon arta lao tu anakkonna. 15 Molo au, las do rohakku mangalehon ngolukku dohot sude na adong di au tu hamu.+ Holong situtu do rohakku tu hamu. Alani i, ikkon haholonganmuna do au nian. 16 Nang pe songon i, dang olo au gabe boban di hamu.+ Alai didok hamu do au na “akkal” jala manjorat hamu marhite “gabus”. 17 Jala dang hea kan hubuat pangomoan sian hamu marhite akka halak na husuru? 18 Tikki hupangido si Titus ro mandapotton hamu rap dohot donganta na asing, dang adong kan dibuat nasida pangomoan sian hamu?+ Dos do kan na dibahen hami?

19 Na dirippu hamu do na mambela dirinami hami di jolomuna? Daong. Sittong do na hupaboa hami tu hamu. Ai siihutton Kristus i do hami jala di jolo ni Debata do hami makkatai tu hamu. Sasittongna akka dongan na huhaholongi, lao patoguhon hamu do umbahen na huulahon hami sudena on. 20 Mabiar do au, tikki ro au annon mandapotton hamu, dang sesuai tu pangidoan ni rohakki hamu. Jala au pe dang songon pangidoan ni rohamuna. Marsak do au molo adong na marbadai, na marlate ni roha, na muruk, na marsalisi, na paroa-roahon donganna, na pahata-hatahon donganna, na marginjang ni roha, jala na gaor. 21 Ra molo ro au muse, pasombuon ni Debata ma au maila di tonga-tongamuna. Olo do ra marsak situtu au molo huida godang halak dang muba dope sian dosa ni nasida di tikki naung salpu i. Marsak do au molo huida nasida dang muba sian akka ulaon na ramun,* sian seks na so patut,* dohot sian ulaon ni halak na so umboto ila.*

13 On ma na patoluhalihon au rade naeng manjuppangi hamu. Adong do tarsurat, “Molo adong do hatorangan sian dua manang tolu saksi, boi ma didok na tutu do hatorangan i.”*+ 2 Nang pe dang disi au rap dohot hamu, alai huhilala songon na disi do au. Alani i do hupodai hian hamu sude dohot akka na mangulahon dosa, asa molo ro au dang pasombuonku be nasida. 3 Molo huulahon songon i, hupatudu ma tu hamu na makkatai do Kristus i marhite au. Jala dang na gale Kristus i di tonga-tongamuna, alai dipatudu ibana do huasona na balga i. 4 Tutu, di bagasan hagaleon* do ibana dihukum mate di sada hau. Alai saonari, mangolu do ibana alani huaso ni Debata.+ Saonari pe, gale do hami songon ibana, alai na lao mangolu do hami rap dohot ibana+ alani huaso ni Debata. Ai tarida do huaso ni Debata di ngolumuna.+

5 Toktong ma uji jala pareso hamu dirimuna, asa botoonmuna na diihutton hamu dope haporseaon ni halak Kristen manang na dang.+ Ai na so diboto hamu do na marsada hamu dohot Jesus Kristus i? Molo dang marsada hamu dohot Kristus, berarti dang lomo roha ni Debata tu hamu. 6 Dipangido rohakku do asa diboto hamu na lomo roha ni Debata mangida hami.

7 Hutangiakkon hami do hamu tu Debata asa unang diulahon hamu na sala. Dang asa songon na lomo roha ni halak tu hami, alai asa diulahon hamu do na denggan, nang pe songon na so lomo roha ni halak tu hami. 8 Dang tarulahon hami manang aha pe lao mangalo hasittongan. Ai holan na sesuai tu hasittongan i do na boi diulahon hami. 9 Las do rohanami molo togu hamu, nang pe di tikki i gale hami. Jala hutangiakkon hami do hamu asa olo mambahen hamubaon tu na denggan. 10 Alani i do hubahen surat on tu hamu, asa unang pola posi do hatakku tikki rap au dohot hamu. Ai dilehon Tuan i do tanggung jawab tu au lao patoguhon rohamuna,+ dang lao mambahen hamu gale.

11 Ujungna akka dongan, toktong ma hamu marlas ni roha, marhamubaon tu na denggan,+ rade dipatogu,+ saroha sapikkiran, jala toktong ma hamu mardame di parngoluonmuna.+ Sai anggiat ma hamu didongani Debata parholong jala na mangalehon dame i.+ 12 Denggan* ma jalo hamu akka donganta sahaporseaon. 13 Sahat ma tabe ni akka na badia i tu hamu.

14 Sai anggiat ma asi ni roha ni Tuanta Jesus Kristus na massai balga i, holong ni Debata, dohot tondi parbadia mandongani hamu.