SURAT NA PARJOLO TU HURIA NA DI KORINT

1 Sian si Paulus, halak na dijou gabe apostel+ ni Kristus Jesus sesuai tu lomo ni roha ni Debata dohot sian donganta si Sostenes. 2 Dikirim hami do surat on tu huria ni Debata na di Korint,+ naung dipabadia asa marsada dohot Kristus Jesus+ jala naung tarjou gabe halak na badia. Dikirim hami do muse surat on tu sude halak na didia pe na manjou goar ni Tuanta Jesus Kristus,+ i ma Tuan ni nasida jala Tuanta.

3 Anggiat ma dipatuduhon tu hamu asi ni roha na massai balga i dohot dame ni roha na sian Debata Ama i dohot na sian Tuanta Jesus Kristus.

4 Toktong do mandok mauliate au tu Debatakku alani hamu. Ai nungnga dipatudu Ibana asi ni rohana na massai balga i tu hamu marhite Kristus Jesus. 5 Ala nungnga marsada hamu dohot Kristus i, nungnga dapotmuna be sudena. Alani i ma boi hamu denggan pasahatton hata ni Debata jala takkas mangattusi dia na sittong.+ 6 Ai nungnga togu marurat di rohamuna barita taringot tu Kristus i.+ 7 Alani i, dang adong be na hurang di hamu tikki dipaima-ima hamu Tuanta Jesus Kristus i+ patuduhon huasona. 8 Na lao diurupi Debata do hamu asa togu sahat ro di ujungna, asa unang adong na manudu hamu mangulahon na sala di ari ni Tuanta Jesus Kristus.+ 9 Toktong do dipasaut Debata sude hatana+ jala Ibana do na manjou hamu marsada dohot Anakna Jesus Kristus Tuanta i.

10 Hamu ale akka dongan, di bagasan goar ni Tuanta Jesus Kristus, hupangido ma tu hamu asa sada rohamuna di pakkataion. Unang ma tarbagi-bagi hamu+ alai marsada ma hamu sude.* Sapikkiran ma hamu jala sapandapot.+ 11 Hudok pe songon i ale akka dongan, na adong do sian keluarga ni si Kloe paboahon tu au taringot tu hamu. Dipaboa nasida do na adong parsalisian di tonga-tongamuna. 12 Maksudhu, adong do di tonga-tongamuna na mandok, “Sisean ni si Paulus do au.” Na deba mandok, “Sisean ni si Apollos do au.”+ Na deba nai mandok, “Sisean ni si Kepas* do au.” Jala na asing mandok, “Sisean ni Kristus do au.” 13 Ai tarbagi-bagi huroha huria ni Kristus i? Ai mate si Paulus di hau humokkop hamu? Manang, na tardidi do hamu di bagasan goar ni si Paulus? 14 Mandok mauliate do au tu Debata, ala dang adong sian hamu na tardidi hubahen asing ni si Krispus+ dohot si Gayus.+ 15 Alani i, dang adong na boi mandok na tardidi hamu di bagasan goarhu. 16 Alai dohot do tahe hubahen tardidi si Stepanas+ dohot donganna sajabu. Asing ni i, dang huingot be manang na adong dope na asing na hubahen tardidi. 17 Ai dang disuru Kristus au mandidi halak, marbarita na uli+ do au disuru. Jala dang hupasahat barita i mamakke bahasa ni parsikkola na timbo,* asa unang marisuang hau partinaonan* ni Kristus i.

18 Ai dang marguna barita taringot tu hau partinaonan* i di halak na lao diripasson.+ Alai di hita akka na lao diselamatton, patuduhon huaso ni Debata do i.+ 19 Ai adong do tarsurat, “Bahenokku ma mago habisukon ni akka halak na marbisuk, jala dang jalookku parbinotoan ni halak na pistar.”+ 20 Didia do akka na marbisuk? Didia do akka siboto surat?* Didia do halak na malo marsoal di portibi* on? Kan nungnga dibahen Debata habisukon ni portibi on gabe dang marguna? 21 Ala mangasahon bisukna sandiri akka halak na di portibi on, gabe dang ditanda nasida be Debata.+ Nang pe dang marguna+ barita na tabaritahon i didok roha ni nasida, alai marhite i do dipalua Debata akka halak na porsea. Jala sian i, takkas ma tarida songon dia bisuk ni Debata.+

22 Dipangido halak Jahudi do akka tanda halongangan*+ jala dilului halak Junani do habisukon. 23 Anggo hita, tabaritahon do taringot tu Kristus na dihukum mate di hau. Alai massai maol do barita i dijalo* halak Jahudi jala ulaon na so marguna+ do i di akka bangso na asing. 24 Alai anggo di akka halak na tarjou i, halak Jahudi manang halak Junani, patuduhon huaso dohot bisuk ni Debata+ do Kristus i. 25 Nang pe didok roha ni halak dang marguna na sian Debata, alai sasittongna umbisuk do i sian habisukon ni jolma. Jala nang pe didok roha ni halak gale do na sian Debata, alai sasittongna umgogo do i sian jolma.+

26 Ale akka dongan, diboto hamu do songon dia hamu tikki dijou Debata. Dang piga sian hamu na marbisuk di jolo ni jolma,+ dang godang sian hamu na timbo jabatanna, jala dang godang sian hamu na ro sian keluarga na sangap.+ 27 Alai na oto di portibi on, i do na dipillit Debata lao pailahon akka na marbisuk. Jala na gale di portibi on, i do na dipillit Debata lao pailahon na gogo.+ 28 Dipillit Debata do akka na so mararga, na lea, dohot na so marlapatan, asa gabe dang marguna akka na sangap di portibi on.+ 29 Alani i, dang adong na boi marginjang ni roha di jolo ni Debata. 30 Debata do na mambahen hamu marsada dohot Kristus Jesus. Ai marhite ibana do boi gabe takkas tarida songon dia bisuk ni Debata. Didok do hita mangulahon na sittong,+ badia,+ jala dipalua do hita marhite tobusan.+ 31 Alani i, gabe saut ma songon na tarsurat i, “Manang ise na naeng marbalga ni roha,* marbalga ni roha ma ibana alani Jahowa.”*+

2 Alani i akka dongan, tikki ro au mandapotton hamu lao paboahon rahasia na badia+ ni Debata, dang hupakke akka hata ni halak na pistar+ jala dang hupatudu-tudu habisukokku tu hamu. 2 Ai tikki rap au dohot hamu, nungnga hudok di bagasan rohakku na so hatahonokku tu hamu manang aha pe, asing ni barita taringot tu Jesus Kristus naung dihukum mate di hau.+ 3 Ai gale do au tikki ro mandapotton hamu, mabiar, jala hitir-hitir. 4 Tikki makkatai au tu hamu manang tikki huajari hamu, dang hupakke hata na tabo begeon songon na dipakke halak na pistar. Alai hupakke do hata na patuduhon huaso ni tondi parbadia,+ 5 asa unang mangihutton habisukon ni jolma haporseaonmuna, alai mangihutton panogu-noguon ni tondi parbadia ni Debata.

6 Saonari, di tonga-tonga ni halak na togu haporseaonna,+ tahatai ma taringot tu habisukon. Alai dang taringot tu habisukon ni portibi* on manang habisukon ni akka pamimpin na di portibi on na tahatai, ai na lao salpu do i sude.+ 7 Alai taringot tu bisuk ni Debata do na tahatai saonari, na buni di bagasan rahasia na badia.+ Nungnga ditottuhon Debata hian i andorang so adong dope portibi na jahat on, asa boi tajalo hasangapon. 8 Dang adong pamimpin na di portibi* on na mamboto habisukon i.+ Molo diboto nasida i, dang bunuon ni nasida Tuan na sangap i.* 9 Ai didok do di na tarsurat i, “Dang hea dope diida mata akka naung diparade Debata tu halak na makkaholongi Ibana. Dang hea dope i tarbege ni pinggol, jala dang hea dope i tubu di bagasan roha ni jolma.”+ 10 Alai marhite tondi parbadia,+ dipaboa Debata do i tu hita.+ Ai marhite tondi parbadia i, dipatuduhon do sudena dohot ma i bisuk ni Debata na massai bagas i.+

11 Ise ma na boi mamboto na di bagasan pikkiran ni jolma? Sasittongna, dang adong na mamboto i asing ni ibana sandiri. Dos songon i ma, dang adong na mamboto na di bagasan pikkiran ni Debata, molo dang jolo dipaboa i marhite tondi parbadia. 12 Dang pikkiran ni halak na di portibi on na tajalo, alai tondi parbadia ni Debata do.+ Tajalo do i, asa boi taattusi akka na dilehon Debata tu hita di bagasan holong. 13 Alani i, dang tapakke hata ni halak na pistar+ patorakkon i, alai tapakke do hata na diajarhon marhite tondi parbadia.+ Dibahen i, hata na ro sian tondi parbadia do na tapakke lao patorakkon taringot tu Debata.

14 Dang tarjalo ni na mangihutton lomo ni roha ni portibi on akka na dipaboa marhite tondi parbadia. Ai dang marguna i di roha ni nasida. Dang boi diattusi nasida i, ai ikkon adong do tondi parbadia di sasahalak lao mangurupi nasida mangattusi i. 15 Alai sasahalak na olo ditogu-togu tondi parbadia, manat do paresoonna sude+ jala dang adong na boi manguhumi ibana. 16 Ai songon na didok na tarsurat i, “Ise ma na boi mamboto pikkiran ni Jahowa* jala na boi mangajari Ibana?”+ Alai adong do di hita pikkiran ni Kristus.+

3 Ale akka dongan, najolo dang songon tu halak na ditogu-togu tondi parbadia+ carakku makkatai tu hamu, alai songon tu halak na mangihutton pikkiran ni jolma na di portibi on do. Ai dos songon poso-poso+ dope hamu mangihutton Kristus i. 2 Susu dope hulehon tu hamu, ai dang tarallang hamu dope sipanganon na karas. Sahat tu saonari pe dang tarallang hamu dope i.+ 3 Ai songon pikkiran ni jolma na di portibi on dope pikkiranmuna.+ Cemburu do hamu molo adong na denggan di tonga-tongamuna jala marsalisi do hamu. Kan i do tandana na diihutton hamu dope pikkiran dohot pangalaho ni jolma+ na di portibi on? 4 Molo adong sasahalak sian hamu na mandok, “Sisean ni si Paulus do au,” na asing muse mandok, “Sisean ni si Apollos do au,”+ kan gabe songon pangalaho ni jolma na di portibi on do pangalahomuna disi?

5 Ai ise do huroa si Apollos? Jala ise do huroa si Paulus? Holan parhobas ni Debata+ do hami na mangulahon ulaon na dilehon Tuhan* i, jala na mangurupi hamu gabe halak na porsea. 6 Au do na manuan,+ si Apollos do na maniram,+ alai Debata do na mambahen i tubu. 7 Alani i, dang na manuan manang na maniram i na uppetting. Alai Debata do, ai Ibana do na mambahen i tubu.+ 8 Sarupa do tujuan ni halak na manuan dohot na maniram i. Alai na lao dijalo nasida do upana sesuai tu na diulahon nasida.+ 9 Ai dongan sakarejo ni Debata do hami. Hamu do ladang na niula ni Debata, jala bangunan na dipajongjong Ibana.+

10 Alani asi ni roha ni Debata na massai balga na dilehon tu au, gabe songon tukkang na malo do au. Nungnga hubahen be fondasi,+ alai halak na asing ma na pajongjokkon bangunan di ginjangna. Alai ikkon manat do diparrohahon ganup halak songon dia ibana pajongjokkon bangunan di ginjang ni fondasi i. 11 Dang adong na boi mambahen fondasi na asing lao manggattihon fondasi naung adong, i ma Jesus Kristus.+ 12 Adong do halak na mamakke mas, perak, akka batu na arga, hau, ramba na koring, manang durame lao pajongjokkon bangunan di ginjang ni fondasi i. 13 Alai molo dung juppang tikkina, tarida ma hasil ni ulaon ni ganup halak. Ai ujionna ma i mamakke api,+ jala api i ma na patuduhon songon dia hasil ni bangunan na binahen ni ganup halak. 14 Molo dang matutung bangunan na dibahen i, dapotan upa ma halak na pajongjokkon i. 15 Alai molo matutung do bangunan i, rugi ma na pajongjokkon i. Nang pe selamat ibana, alai songon na selamat sian api nama i.

16 Ai na so diboto hamu do? Hamu do bagas joro ni Debata+ jala maringanan do tondi parbadia di tonga-tongamuna.+ 17 Manang ise na manegai bagas joro ni Debata, pamateon ni Debata ma ibana. Ai badia do bagas joro ni Debata, jala hamu do bagas joro i.+

18 Unang ma adong na paoto-otohon dirina sandiri. Molo adong sian hamu na mandok dirina marbisuk di portibi* on, tumagon ma ibana oto, asa gabe marbisuk ibana di jolo ni Debata. 19 Ai haotoon do di Debata habisukon ni portibi on. Songon on do hata ni na tarsurat i, “Dijorat Debata do halak na bisuk di bagasan akkal ni nasida.”+ 20 Jala didok na tarsurat i do muse, “Diboto Jahowa* do na so marguna+ akka na dipikkirhon halak na bisuk.” 21 Unang ma adong na bangga tu na binahen ni jolma. Ai hamu do nappuna sasude. 22 Hamu do nappunasa si Paulus, si Apollos, si Kepas,*+ portibi on, hangoluan, hamatean, tikki sisaonari, dohot tikki na naeng ro. 23 Alai Kristus do nappuna hamu+ jala Debata do nappuna Kristus i.

4 Ikkon songon parhobas ni Kristus jala songon pangurus ni rahasia na badia+ ni Debata ma nian hami idaon ni jolma. 2 Ikkon na boi dihaporseai do sahalak pangurus. 3 Nang pe diuhumi hamu au manang diuhumi pengadilan ni jolma, dang parduli au disi. Sasittongna au pe, dang huuhumi dirikku. 4 Ai anggo na huboto, dang adong na sala huulahon. Alai dang na hudok naung sittong au, ai Jahowa* do na manottuhon* sittong manang na dang na huulahon i.+ 5 Alani i, unang ma uhumi+ manang ise andorang so dapot dope tikkina, i ma andorang so ro Tuan i. Ai patuduonna do akka na buni na adong di na holom jala takkas do patuduonna na adong di bagasan roha ni jolma. Dung i, jaloon ni ganup halak ma pujian sian Debata.+

6 Ale akka dongan, lao parohon laba tu hamu do umbahen na hupaboa sudena on tu hamu. Hubahen do dirikku dohot si Apollos+ gabe sitiruon di hamu, asa boi diattusi hamu aturan on, “Unang ma ulahon lobi sian na tarsurat i.” Marhite i, dang marginjang ni roha+ be hamu jala dang dohononmuna be na dumenggan sasahalak sian na asing. 7 Ai aha huroa na adong di hamu umbahen na didok hamu dumenggan hamu sian na asing? Kan sian Debata do sude na adong di hamu?+ Molo Debata do na mangalehon sude na adong di hamu, boasa ginjang rohamuna gabe hira sian gogomuna i sude?

8 Naung adong do sude di hamu? Ai naung mamora do hamu? Ai naung gabe raja do hamu?+ Denggan ma i, lomo do rohakku hamu gabe raja, asa boi hami gabe raja rap dohot hamu.+ 9 Ninna rohakku, dibahen Debata do hami akka apostel i songon halak na parpudi masuk tu sada stadion. Dibahen do hami songon halak naung ditottuhon lao dihukum mate.+ Nungnga gabe sitottonon hami di portibi on,+ sitottonon ni akka suru-suruan dohot jolma. 10 Gabe na oto+ do hami alani Kristus i, alai anggo hamu gabe marbisuk do ala mangihutton Kristus i. Gale do hami, alai gogo do hamu. Marlea do hami, alai sangap do hamu. 11 Sahat tu saonari, male+ jala mauas+ do hami, dipukkuli,+ dang godang abitnami,* dang adong jabunami, 12 jala loja do hami karejo.+ Tikki dileai halak hami, dipasu-pasu hami do nasida.+ Tikki dibahen na haccit tu hami, sabar do hami manaon i.+ 13 Tikki diparoa-roa goarnami, lambok do hualusi+ hami* nasida. Sahat tu saonari, songon sampah do hami di portibi on na dibolokkon akka halak.

14 Husuratton pe on tu hamu, dang na lao pailahon hamu. Alai na lao paingotton hamu do au, songon akka anakku na huhaholongi. 15 Nang pe adong 10.000 guru na mangajari* hamu carana mangihutton Kristus, otik do na gabe amamuna. Alai anggo au, gabe ama do di hamu. Ai hupasahat do tu hamu barita na uli jala huajari do hamu carana mangihutton Kristus Jesus.+ 16 Alani i, hujujui ma hamu asa maniru au.+ 17 Alani i do husuru si Timoteus mandapotton hamu. Ibana do anakku na huhaholongi jala setia do ibana marhobas tu Tuan i. Ibana ma na paingotton hamu manang na songon dia au marhobas tu Kristus Jesus,+ songon na huajarhon di ganup huria.

18 Alai adong do deba sian hamu na gabe marginjang ni roha, ala dirippu nasida dang na lao ro au mandapotton hamu. 19 Molo lomo do roha ni Jahowa,* tibu do au ro mandapotton hamu. Naeng do idaokku akka siginjang roha i. Dang na naeng mamboto pakkataion ni nasida, alai naeng do botookku tutu manang dang adong huaso ni Debata di nasida. 20 Ai dang holan hata-hata Harajaon ni Debata i, alai ikkon tarida do i sian parniulaon na patuduhon huaso ni Debata. 21 Attong na dia do pillitonmuna: Ro au tu hamu mamboan sipasingot*+ manang ro au di bagasan holong dohot hata na lambok?

5 Hubege adong na mangulahon seks na so patut*+ di tonga-tongamuna. Ai adong do sahalak bawa na mangulahon seks dohot* istri ni bapakna.+ Gari di tonga-tonga ni akka bangso, dang hea masa sisongon i. 2 Attong boasa dope ginjang rohamuna? Sasittongna, ikkon marsak+ ma nian hamu jala ikkon dipakaluar hamu do nian bawa i sian huria.+ 3 Nang pe dang disi au, alai sai tusi do rohakku.* Jala nang pe dang rap au dohot hamu, nungnga huboto na marsala bawa na mangulahon na jahat i. 4 Tikki marpungu hamu, diboto hamu do, molo rohakku dohot huaso ni Tuanta Jesus i rap do dohot hamu. Alani i, di bagasan goar ni Tuanta Jesus, 5 ikkon dipasahat hamu do bawa i tu Sibolis*+ asa bolong pengaruh ni pangalahona na roa i sian huria. Dung i, malua ma huria sian pangalaho sisongon i saleleng ari ni Tuan i.+

6 Dang denggan molo sai ginjang dope rohamuna. Ai na so diboto hamu do, otik pe ragi boi do mambahen kabbang sude adonan?+ 7 Bolokkon hamu ma ragi na leleng i, asa gabe adonan na imbaru hamu. Sasittongna dang marragi be hamu, ala nungnga dipelehon+ tu hita Kristus, i ma biru-biru+ Paska i. 8 Alani i, toktong ma tarayahon perayaan*+ i mamakke roti na so marragi, na manggombarhon haburjuon dohot hasittongan. Unang ma tapakke ragi naung leleng, na manggombarhon dosa dohot hajahaton.

9 Di surattu na hubahen tu hamu, nungnga hudok asa unang mardongan be hamu dohot halak na mangulahon seks na so patut.* 10 Na hudok disi, dang na gabe dang mardongan hamu tu sude halak na mangulahon seks na so patut* na adong di portibi on,+ tu halak na hisap, tu pangarampok, dohot tu akka halak na manomba patung. Ai molo songon i dibahen hamu, ikkon ditinggalhon hamu nama portibi on.+ 11 Alai hubahen pe surat on, asa unang mardongan+ be hamu tu dongan sahaporseaon na mangulahon seks na so patut,* na hisap,+ na manomba patung, pangaleai, parmabuk,+ dohot pangarampok.+ Gari mangan pe, dang boi rap hamu dohot halak sisongon i. 12 Ai dang marhak au manguhumi halak na di luar ni huria. Alai ikkon hamu do na manguhumi halak na adong di huria, 13 jala Debata do na manguhumi halak na di portibi on.+ Alani i, “pakaluar hamu ma halak na mangulahon na jahat sian huria”.+

6 Tikki adong na marsalisi di tonga-tongamuna,+ boasa barani hamu mamboan parsoalan i tu pengadilan? Boasa dang diboan hamu i tu jolo ni akka na badia? Boasa gabe halak na so mangulahon patik ni Debata na manguhumi hamu? 2 Ai na so diboto hamu do akka na badia i dipillit lao manguhumi portibi on?+ Ai molo hamu do na lao manguhumi portibi on, kan ikkon boi do hamu manguhumi parsoalan na gelleng sisongon i? 3 Ai na so diboto hamu do na hita dipillit lao manguhumi suru-suruan?+ Attong molo songon i, boasa dang boi hamu pasaehon parsoalan na somal masa di parngoluon on? 4 Molo adong parsoalan di parngoluonmuna sisaonari on na porlu dipasae,+ pillitonmuna do halak na so boi dihaporseai* di huria lao manguhumi parsoalanmuna i? 5 Hudok pe songon i asa maila do hamu. Ai na so adong do di tonga-tongamuna na marbisuk, na boi manguhumi parsoalan ni akka dongan sahaporseaon? 6 Hape, lao do hamu tu pengadilan mangalo dongan sahaporseaonmuna di jolo ni halak na so mangulahon patik ni Debata!

7 Sasittongna, nungnga talu hamu molo diboan hamu parsoalanmuna tu pengadilan. Boasa dang sabar hamu tikki adong donganmuna mambahen na jahat tu hamu?+ Kan dumenggan do dipasombu hamu ibana mambuat na adong di hamu? 8 On gabe hamu sandiri do na mambahen na jahat tu donganmuna jala na mambuat na adong di donganmuna i!

9 Na so diboto hamu do dang adong parbagianan ni halak na so mangulahon na sittong di Harajaon ni Debata?+ Unang hamu lilu. Halak na mangulahon seks na so patut,*+ na manomba patung,+ na mangalakkup,+ bawa na olo ditogihon mangulahon seks dohot bawa,+ bawa na mangulahon seks dohot bawa,+ 10 panakko, halak na hisap,*+ parmabuk,+ pangaleai, dohot pangarampok, dang adong parbagiananna di Harajaon ni Debata.+ 11 Adong do deba sian hamu na songon i pangalahona najolo. Alai nungnga dipaias be hamu saonari,+ dipabadia,+ jala didok mangulahon na sittong+ di bagasan goar ni Tuan Jesus Kristus dohot marhite tondi parbadia.

12 Bebas do au* mangulahon manang aha pe, alai dang sude i marguna di hamu.+ Nang pe boi sude huulahon, alai dang olo au gabe hatoban ni* manang aha pe. 13 Na porlu tu butuha do sipanganon jala butuha i pe porlu do tu sipanganon. Alai, paujungon ni Debata do na dua i.+ Dang tu ulaon seks na so patut* pakkeon daging i, alai lao mangulahon ulaon ni Tuan i+ do pakkeon daging i. Jala diparade Tuan i do akka na porlu tu daging i. 14 Alai dipahehe Debata do Tuan i+ sian na mate, jala pakkeonna do muse huasona i+ lao pahehehon hita sian na mate.+

15 Na so diboto hamu do dagingmuna i ruas ni daging ni Kristus?+ Ikkon buatokku ma ruas ni daging ni Kristus jala padomuokku i tu boru-boru na so hasea? Dang boi i! 16 Na so diboto hamu do? Ai manang ise na mangulahon seks dohot boru-boru na so hasea, nungnga gabe sada ibana dohot boru-boru i. Ai didok na tarsurat i do, “Gabe sada daging ma nasida na dua.”+ 17 Alai manang ise na marsada dohot Tuan i, gabe sapikkiran* ma ibana dohot Tuan i.+ 18 Padao hamu ma dirimuna* sian ulaon seks na so patut!*+ Molo akka dosa na asing i, di luar ni dagingna do i diulahon sasahalak. Alai anggo halak na mangulahon seks na so patut, mangulahon dosa tu dagingna sandiri do ibana.+ 19 Na so diboto hamu do? Dagingmuna i do joro+ ni tondi parbadia ni Debata. Ai nungnga dijalo hamu i sian Debata+ jala maringanan di hamu. Asing ni i, dang hamu sandiri nappuna hamu,+ alai Debata do. 20 Ai arga do hamu dituhor Debata.+ Alani i, pakke hamu ma dagingmuna+ pasangappon Debata.+

7 Saonari, on ma alus ni sukkun-sukkun na sinuratmuna i: Dumenggan ma sahalak bawa dang mangulahon seks tu* sahalak borua. 2 Alai alani godang ni halak na mangulahon seks na so patut,* ganup bawa ma maristri+ jala ganup borua ma marsuami.+ 3 Dilehon suami ma hak* ni istrina. Jala dilehon istri ma hak ni suamina.+ 4 Dang marhuaso sahalak istri tu dagingna sandiri, alai suamina do na marhuaso. Suang songon i ma, dang marhuaso sahalak suami tu dagingna sandiri, alai istrina do na marhuaso. 5 Unang ma ditahan suami hak* ni istrina jala unang ma ditahan istri hak ni suamina. Asing ma molo nungnga saroha hamu asa unang mangulahon i satokkin, lao mangalehon tikkimuna martangiang. Alai dukkon i ikkon marsada do hamu, asa unang gabe targoda hamu dibahen Sibolis ala dang boi dirajai hamu dirimuna. 6 Alai dang paretta na hudok on. Boi do i pillitonmuna, naeng diulahon hamu manang na dang. 7 Anggo didok rohakku sude jolma ma nian songon au. Alai ganup do halak mandapot silehon-lehon+ sian Debata. Alani i do adong na mamillit marhasohotan jala adong na mamillit dang marhasohotan.

8 Tu akka na so marhasohotan dohot tu akka ina na mabalu, hudok ma tu hamu, dumenggan ma hamu toktong dang mardongan saripe songon au.+ 9 Alai molo so boi dirajai hamu dirimuna, dumenggan ma hamu marhasohotan sian apala sai marsigorgor giot-giot ni dagingmuna.*+

10 Tu akka na mardongan saripe hupaboa ma paretta on, sian Tuan i do paretta on dang sian au. Dang boi sahalak istri maninggalhon suamina.+ 11 Alai molo ikkon ditinggalhon ibana suamina i, toktong ma ibana dang marhasohotan. Molo so i, ikkon mulak* do ibana muse tu suamina. Jala sahalak suami pe, dang boi ditinggalhon ibana istrina.+

12 Jala hudok ma muse tu akka na asing, alai dang sian Tuan i na hudok on,+ sian au do. Molo dang halak na porsea istri ni sahalak donganta bawa, jala olo do istrina i rap tinggal dohot ibana, unang ma ditinggalhon ibana istrina i. 13 Molo dang halak na porsea suami ni sahalak donganta borua, jala olo do suamina i rap tinggal dohot ibana, unang ma ditinggalhon ibana suamina i. 14 Ai nungnga gabe badia suami na so porsea i, alani istrina. Jala nungnga gabe badia istri na so porsea i, alani suamina. Molo dang songon i, ramun* ma akka anakkonmuna. Alai saonari, nungnga badia be nasida. 15 Alai molo ditinggalhon* suami manang istri na so porsea i do dongan saripena, loas ma ibana lao. Molo masa sisongon i, dang pola ikkon rap tinggal be donganta bawa manang donganta borua i dohot dongan saripena na so porsea. Ai nungnga dijou Debata hamu asa mangolu di bagasan dame.+ 16 Hamu akka istri, sian dia ma diboto hamu na so boi dibahen hamu selamat suamimuna?+ Hamu pe akka suami, sian dia ma diboto hamu na so boi dibahen hamu selamat istrimuna?

17 Nang pe songon i, ganup ma halak mangolu hombar tu silehon-lehon ni Jahowa,* i ma songon tikki na dijou Debata i ibana.+ Jala hupasahat do tudu-tudu on di sude huria. 18 Molo marsunat do sasahalak tikki dijou Debata,+ toktong ma ibana songon i. Jala molo dang marsunat ibana tikki dijou Debata, unang pola disunat ibana.+ 19 Marsunat manang na so marsunat pe sasahalak, dang i na porlu.+ Ai mangoloi paretta ni Debata do na upporlu.+ 20 Manang songon dia pe situasi ni sasahalak tikki dijou, lok ma toktong ibana songon i.+ 21 Hatoban do ho tikki dijou? Unang pola marsak ho alani i.+ Alai molo boi do ho malua, marsitutu ma ho asa malua. 22 Ai manang ise hatoban na tarjou gabe siihutton Tuan, halak na dimerdekahon+ do i jala appuna ni Tuan. Suang songon i ma, manang ise na merdeka jala na tarjou, gabe hatoban ni Kristus ma ibana. 23 Ai arga do hamu ditobus.*+ Alani i, unang be olo hamu gabe hatoban ni jolma. 24 Hamu ale akka dongan, manang songon dia pe situasi ni sasahalak tikki dijou, lok ma toktong ibana songon i di jolo ni Debata.

25 Saonari, taringot tu halak na so hea marhasohotan, dang adong hujalo paretta sian Tuan i taringot tu nasida. Alai ala dipatuduhon Tuan i do asi ni rohana tu au, boi do hamu porsea tu hatakku+ taringot tu nasida. 26 Ala tikki hasusaan do saonari, dumenggan ma sahalak bawa toktong songon situasina nuaeng. 27 Molo nungnga adong istrim, unang ma lului dalan lao maninggalhon ibana.+ Alai, molo dang adong dope istrim unang pola lului. 28 Molo marhasohotan ho, dang mardosa ho disi. Jala molo marhasohotan halak na so adong dope dongan saripena, dang mardosa ibana disi. Alai godang do hasusaan na lao masa tu halak na marhasohotan. Alani i, naeng hupadao do nian hamu sian i.

29 Ale akka dongan, parrohahon hamu ma on, otik nama tikkina.+ Mulai saonari, songon na so maristri ma halak naung maristri. 30 Jala songon na so tangis ma halak na tangis, songon halak na so marlas ni roha ma halak na marlas ni roha, songon halak na so marnappuna ma halak na manuhor, 31 jala songon halak na so mandapot gok laba sian portibi on ma halak na mandapot laba sian portibi on. Ai muba do sude na masa di portibi on. 32 Lomo do rohakku asa malua hamu sian arsak ni roha. Ai bawa na so mangoli, akka ulaon ni Tuan i do na toktong dipikkirhon,* ai naeng las do roha ni Tuan i bahenonna. 33 Alai halak na mangoli, akka na di portibi on do sai dipikkirhon ibana,+ ai naeng las do roha ni istrina bahenonna, 34 gabe tarbagi ma rohana. Borua na so muli jala namarbaju dope, akka ulaon ni Tuan i do na sai dipikkirhon*+ asa badia daging dohot pikkiranna. Alai, akka na di portibi on do na sai dipikkirhon halak naung muli, ai naeng dibahen ibana do las roha ni suamina. 35 Hudok pe songon i, lao mambahen na denggan do au tu hamu, dang na lao mangabbati* hamu. Alai na lomo do rohakku manjujui hamu asa diulahon hamu na denggan, asa toktong hamu marhobas tu Tuan i jala dang adong na mangabbati.

36 Alai molo so boi do dirajai halak na so marhasohotan giot-giot ni dagingna,* dumenggan ma ibana marhasohotan molo nungnga cukkup umurna. Ai dang mardosa ibana disi.+ 37 Alai molo didok roha ni sasahalak dang porlu ibana marhasohotan, boi dirajai ibana giot-giot ni dagingna,* jala nungnga ditottuhon di rohana na so marhasohotan ibana, na denggan do na binahenna i.+ 38 Alani i, denggan do molo marhasohotan sasahalak, alai dumenggan do molo dang marhasohotan sasahalak.+

39 Dang boi marhasohotan sahalak istri tu na asing saleleng mangolu dope suamina.+ Alai molo dung mate suamina, boi ma ibana muli tu manang ise pe lomo ni rohana, asal ma tu halak na mangihutton Tuan i.+ 40 Alai ninna rohakku, dumenggan ma asa unang marhasohotan be ibana, jala pos do rohakku adong do tondi parbadia di au.

8 Saonari, songon on ma alus ni sukkun-sukkunmuna taringot tu sipanganon naung dipelehon tu patung:+ Tutu, adong do di hita sude parbinotoan taringot i.+ Alai parbinotoan i boi do mambahen ginjang roha ni sasahalak. Anggo holong ni roha, boi do mambahen togu roha.+ 2 Nang pe didok sasahalak, “Nungnga huboto i,” sasittongna dang sude dope diboto ibana. 3 Alai molo holong do roha ni sasahalak tu Debata, tandaon ni Debata do ibana.

4 Saonari taringot tu mangallang sipanganon naung dipelehon tu akka patung i, taboto do molo akka patung i dang adong lapatan ni i,+ ai holan sada do Debata.+ 5 Nang pe adong na digoari akka debata, di banua ginjang manang di tano on,+ tutu do i, godang do akka “debata” jala godang do akka “tuan”. 6 Alai di hita, holan sada do Debata,+ i ma Ama i.+ Ibana do na manoppa saluhutna jala lao mangulahon lomo ni rohana do hita mangolu.+ Jala holan sada do Tuan, i ma Jesus Kristus. Marhite ibana do saluhutna ditoppa,+ jala marhite ibana do hita mangolu.

7 Alai dang di sude halak adong parbinotoan on.+ Ai manomba patung do deba sian nasida najolo. Didok roha ni nasida, sipanganon sisongon i nungnga dipelehon tu akka patung.+ Alani i, gabe ganggu+ ma panggora ni roha ni nasida na gale i. 8 Sasittongna, dang boi sipanganon mambahen hita lam jonok tu Debata.+ Molo dang taallang, dang rugi hita. Jala molo taallang pe, dang adong laba ni i di hita.+ 9 Tutu, hakmuna do lao mamillit manang aha pe. Alai manat ma hamu, asa unang gabe tartuktuk halak na gale+ panggora ni rohana alani keputusanmuna i. 10 Hamu akka na marparbinotoan i, molo mangan hamu di di inganan lao manomba* patung, hape adong halak na gale panggora ni rohana mangida hamu mangan disi, kan boi do gabe naeng dohot ibana mangallang sipanganon na dipelehon tu akka patung i? 11 Alani i, gabe sega ma haporseaon ni halak na gale i alani parbinotoanmuna. Hape dongan sahaporseaonmuna do ibana jala mate do Kristus humokkop ibana.+ 12 Molo mardosa do hamu tu donganmuna marhite pambahenan sisongon i, jala gabe guga panggora ni roha ni nasida na gale i,+ sasittongna tu Kristus do hamu mardosa. 13 Alani i, molo gabe tartuktuk do donganki dibahen sipanganon, dang allangokku be i* asa unang tartuktuk ibana hubahen.+

9 Kan boi do huulahon manang aha pe lomo ni rohakku? Apostel do au jala nungnga hea huida Jesus Tuanta i.+ Ai hamu do kan hasil ni ulaonku marhobas tu Tuan i? 2 Tung pe dang apostel au di halak na asing, alai apostel do au di hamu! Ai songon materai do hamu di au, na patuduhon na tutu au apostel ni Tuan i.

3 On ma alussu tu halak na mandok na roa taringot tu au: 4 Marhak do hami mangan dohot minum kan? 5 Marhak do hami kan marhasohotan tu sahalak borua dongan sahaporseaotta?+ Ai songon i do kan na diulahon akka apostel na asing, akka anggi ni Tuan i,+ dohot si Kepas?*+ 6 Ai holan au dohot si Barnabas+ do na so marhak maradi sian parkarejoan lao mangalului ngolu? 7 Ise ma tentara na mangulahon tugasna huhut mambalanjoi dirina sandiri? Ise ma halak na manuan anggur di ladangna alai dang diallang parbuena?+ Ise ma parmahan na so manginum susu na sian biru-biruna?

8 Dang holan sian pikkiran ni jolma na hudok i, alai di Patik ni si Musa pe didok do songon i. 9 Ai tarsurat do di Patik ni si Musa, “Unang ma tutup baba ni lombu tikki dibahen mardege gandum.”+ Attong, akka lombu i do na disarihon Debata? 10 Manang, tu hita do sasittongna na nidokna disi? Tutu, tu hita do na tarsurat i. Ai pos do roha ni halak na mambajak dohot na mardege* na lao adong dapotna gandum sian na niulana i.

11 Molo hami do na manuan tu hamu akka na sian Debata, sala do molo hujalo hami akka na porlu di hami sian hamu?+ 12 Molo marhak do akka halak na asing manjalo sisongon i sian hamu, pasti umbalga ma kan haknami?+ Alai dang hea hupakke hami haknami i. Sabar do hami manaon sasude, asa unang tarabbat barita na uli taringot tu Kristus i alani hami.+ 13 Ai na so diboto hamu do? Dapot ni halak na marhobas di bagas joro do sipanganon sian bagas joro i, jala na marhobas di langgatan mandapot parbagianan do sian langgatan i.+ 14 Laos songon i do, nungnga diparettahon Tuan i asa mangolu akka parbarita na uli sian barita na uli i.+

15 Alai dang adong hupakke sada pe sian pengaturan na adong i.+ Sasittongna, husurat pe akka i dang na lao manjalo manang aha pe au sian hamu. Tumagon ma au mate sian apala hubahen songon i. Ai bangga do rohakku mangulahon i di jolo ni sude jolma!+ 16 Alai nang pe hubaritahon barita na uli, dang boi i bahenokku gabe alasan lao bangga di jolo ni halak. Ai ikkon huulahon do i. Sasittongna, marjea ma au molo so hubaritahon barita na uli!+ 17 Molo rade au mangulahon i, dapottu ma upa. Alai nang pe terpaksa au mangulahon i, tong do pos roha ni Debata mangalehon tanggung jawab tu au.+ 18 Attong aha do upakku? On ma upakku, boi ma hubaritahon barita na uli nang pe dang digaji au. Alani i, dang gabe lomo-lomokku mangido manang aha pe, nang pe marhak au mangido i lao marbarita na uli.

19 Nang pe dang hatoban ni manang ise au, alai hubahen do au gabe hatoban ni sude jolma, asa boi huurupi halak sagodang ni godangna. 20 Molo rap au dohot halak Jahudi, songon halak Jahudi ma au, asa boi huurupi nasida.+ Nang pe dang huihutton Patik ni si Musa, alai molo rap au dohot halak na mangihutton patik i, gabe songon halak na mangihutton patik i ma au, asa boi huurupi nasida.+ 21 Alai molo rap au dohot halak na so mangihutton patik i, gabe songon halak na so mangihutton patik i ma au, asa boi huurupi nasida. Nang pe sasittongna patik ni Debata dohot patik ni Kristus+ do na huihutton. 22 Molo rap au dohot halak na gale, songon halak na gale ma au asa boi huurupi nasida.+ Hubahen do sian nasa gogokku lao mangurupi sude halak, asa boi hubahen selamat deba sian nasida. 23 Hubahen do sude cara alani barita na uli i, asa boi hubaritahon i tu halak na asing.+

24 Na so diboto hamu do? Marlojong do sude halak na dohot di pertandingan lumba lari. Alai holan sahalak do na mandapot hadiahna. Marlojong ma hamu sian nasa gogomuna asa boi hamu monang.+ 25 Sude halak na dohot tu pertandingan i, ikkon boi mangarajai dirina di saluhutna. Dibahen nasida pe songon i, asa boi do dapotna mahkota na boi sega.+ Alai anggo hita, asa mandapot mahkota na so olo sega do.+ 26 Alani i, dang olo au marlojong molo dang adong tujuanna.+ Jala dang olo au maninju, songon na maninju alogo. 27 Hulissingi do dagingku+ jala hubahen do au songon hatoban, asa molo dung hubaritahon barita na uli tu na asing, dang gabe dihasogohon* Debata au.

10 Lomo do rohakku botoonmuna akka dongan, songon dia na masa tu akka omputta najolo. Diondingi ombun+ do nasida tikki mardalan, jala selamat do nasida sude menyeberang sian Laut Merah.+ 2 Sude do nasida tardidi gabe siihutton si Musa, tikki mardalan nasida di toru ni ombun jala tikki menyeberang sian Laut Merah. 3 Sude do nasida mangallang sipanganon na dilehon Debata,+ 4 jala sude do nasida manginum aek na diparade Debata.+ Ai diinum nasida do aek na sian dolok batu na balga na jonok tu nasida. Sian Debata do dolok batu i jala manggombarhon Kristus do i.*+ 5 Alai godang do sian nasida na so dihalomohon Debata, gabe marmatean ma nasida di padang gurun i.+

6 Gabe sipasingot ma i tu hita, asa unang lomo rohatta tu akka ulaon na jahat songon na dihalomohon nasida.+ 7 Asing ni i, unang ma tasomba patung songon na diulahon deba sian nasida. Ai adong do tarsurat, “Hundul ma nasida, mangan minum jala marsonang-sonang.”+ 8 Unang ma taulahon seks na so patut* songon na diulahon nasida. Ai gabe mate do 23.000 halak di bagasan sadari alani i.+ 9 Unang ma tauji Jahowa*+ songon na dibahen deba sian nasida. Ai gabe mate do nasida diturbing ulok.+ 10 Unang ma hita marungut-ungut+ songon na diulahon deba sian nasida. Ai ujungna, gabe dibunu suru-suruan do nasida.+ 11 Sude na masa i gabe sipasingot do i tu hita. Jala disurat do i gabe parsiajaran tu hita+ akka na mangolu di panutup ni jaman* on.

12 Manang ise na mandok tu dirina sandiri, “Hot do au jongjong,” manat ma ibana asa unang madabu.+ 13 Sude sitaonon na masa tu hamu, sitaonon na somal masa do i tu akka jolma.+ Alai toktong do dipasaut Debata sude hatana. Dang pasombuonna hamu manaon sitaonon lobi sian na tolapmuna.+ Jala molo adong sitaononmuna, patuduonna do tu hamu dalan asa boi hamu sabar jala martahan manaon i.+

14 Alani i ale akka dongan na hinaholongan, pasiding hamu ma* ulaon manomba akka patung.+ 15 Songon tu halak na marbisuk do carakku paboahon i tu hamu. Alani i, hamu sandiri ma na manottuhon tutu manang na dang na hudok i. 16 Manggombarhon mudar ni Kristus do kan makkuk pasu-pasu i,+ na tapakke tikki hita mandok mauliate tu Debata? Manggombarhon daging ni Kristus do kan roti na tabagi-bagi i?+ 17 Holan sada do roti na taallang i. Alani i, nang pe godang hita, sada daging do hita sude.+

18 Parrohahon hamu ma halak Israel:* Kan songon na mangan rap dohot Debata do halak na mangallang pelean di langgatan i?+ 19 Aha do lapatan ni hatakki? Na adong do guna ni sipanganon na dipelehon tu akka patung i? Manang, na adong do lapatan ni akka patung i? 20 Daong. Alai na hudok, tu akka suru-suruan na jahat do dipelehon akka bangso peleanna i, dang tu Debata.+ Jala dang lomo rohakku rap mangan hamu dohot akka suru-suruan na jahat.+ 21 Dang boi hamu minum sian makkuk ni Jahowa* jala laos minum sian makkuk ni suru-suruan na jahat. Dang boi hamu rap mangan di “meja ni Jahowa”*+ jala laos rap mangan di meja ni suru-suruan na jahat. 22 Manang na naeng bahenotta do Jahowa* cemburu?+ Ai umgogo huroa hita sian Ibana?

23 Boi* do sude taulahon, alai dang sude i marguna. Sude do boi taulahon, alai dang sude patoguhon roha.+ 24 Ikkon dipikkirhon ganup halak do aha na penting di halak na asing, unang ma holan na penting di dirina sandiri na dipikkirhon.+

25 Boi do allangon sude jagal na digadis di pasar, jala dang pola porlu sukkun-sukkun rohamuna alani panggora ni rohamuna. 26 Ai “Jahowa* do nappuna tano on dohot sude na di bagasanna”.+ 27 Molo ditogihon halak na so porsea hamu mangan jala nungnga dioloi hamu i, allang hamu ma sipanganon na diparade i. Dang pola porlu sukkun-sukkun rohamuna alani panggora ni rohamuna. 28 Alai molo adong halak na mandok tu hamu, “Nungnga dipelehon sipanganon i tu akka patung,” unang ma allang sipanganon i alani halak na paboahon i dohot alani panggora ni roha.+ 29 Na hudok disi, dang panggora ni rohamuna, alai panggora ni roha ni halak na paboahon i do. Ai nang pe marhak au mangulahon manang aha pe, alai dang olo au gabe didok mangulahon na sala alani panggora ni roha ni halak na asing.+ 30 Molo diissaki halak do au mangallang sipanganon naung hudok mauliate tu Debata,+ sittong dope allangokku i?

31 Alani i, manang aha pe na diallang hamu, na diinum hamu, manang na diulahon hamu, ulahon hamu ma i sude lao pasangappon Debata.+ 32 Unang ma gabe tartuktuk halak Jahudi, halak Junani, dohot huria ni Debata alani hamu.+ 33 Alani i ulahon hamu ma songon na hubahen i. Marsitutu do au mambahen las roha ni halak di sude na huulahon. Dang holan na penting di au na hupikkiri,+ alai dohot do na penting di halak na asing asa boi nasida selamat.+

11 Tiru hamu ma au, songon au na maniru Kristus.+

2 Hupuji do hamu ala toktong do diingot hamu au, jala diihutton hamu do tudu-tudu na hupasahat* tu hamu. 3 Alai lomo do rohakku naeng diboto hamu, molo ulu ni ganup bawa i ma Kristus,+ ulu ni borua i ma bawa,+ jala ulu ni Kristus i ma Debata.+ 4 Manang ise bawa na martangiang manang na paboahon hata ni Debata huhut manutup uluna, na mangaleai uluna do ibana disi. 5 Alai manang ise borua na martangiang jala na paboahon hata ni Debata,+ alai dang ditutup uluna,* na mangaleai uluna do ibana disi. Jala dos ma ibana songon sahalak borua naung dicukkur obukna. 6 Molo so dipakke sahalak borua manang aha pe lao manutupi uluna, tumagon ma digusting obukna i. Alai molo maila do ibana digusting obukna i manang dicukkur, ikkon dipakke ibana do manang aha pe lao manutup uluna.*

7 Dang pola tutupon ni bawa uluna. Ai tudos songon Debata do bawa i ditoppa+ jala dipatuduhon bawa i do hasangapon ni Debata. Alai anggo borua, hasangapon ni bawa do na dipatudu ibana. 8 Ai dang ditoppa Debata bawa sian borua, alai borua do ditoppa Debata sian bawa.+ 9 Asing ni i, dang ditoppa Debata bawa alani borua, alai ditoppa do borua alani bawa.+ 10 Jala alani akka suru-suruan,+ ikkon pakkeon ni borua do manang aha pe lao manutupi uluna tanda na unduk ibana tu suamina.

11 Alai nang pe songon i, anggo di tonga-tonga ni siihutton Tuan i, dang adong borua i anggo so adong bawa jala dang adong bawa anggo so adong borua. 12 Ai ditoppa do borua sian bawa,+ songon i ma tubu do bawa sian borua. Alai Debata do na manoppa nasa na adong.+ 13 Hamu sandiri ma na manottuhon: Denggan do sahalak borua martangiang tu Debata hape dang dipakke manang aha manutupi uluna? 14 Na so diboto hamu do? Mulai sian na ditoppa jolma i, nungnga diajarhon molo ganjang obuk ni sahalak bawa, na parohon lea do i tu dirina. 15 Alai molo ganjang obuk ni borua, hamuliaon do i di ibana. Ai dilehon do obuk na ganjang tu borua gabe tutup ni uluna. 16 Alai molo adong na mangalo jala naeng mangihutton hasomalan na asing, paboa ma tu ibana na so adong hasomalan na asing di hita dohot di sude huria ni Debata.

17 Tikki hulehon tudu-tudu on tu hamu, dang adong hupuji hamu. Ai dang parohon na denggan parpunguanmuna i alai parohon na roa do. 18 Parjolo sahali na hubege, adong do parsalisian di tonga-tongamuna tikki marpungu hamu di huria. Sittong do ra na hubege i. 19 Pasti na lao adong ma di tonga-tongamuna akka sekte.+ Alani i, tarida ma ise sian tonga-tongamuna na dihalomohon Debata.

20 Jala marpungu do hamu di sada inganan lao mangan di ulaon Borngin Parningotan ni Tuan i.+ Alai sasittongna, dang tutu songon i na naeng diulahon hamu. 21 Ai tikki na mangan i hamu di ulaon i, adong do deba sian hamu naung mangan hian. Gabe adong ma sian hamu na male jala adong ma na mabuk. 22 Na so adong do jabumuna ingananmuna mangan dohot minum? Na naeng mangaleai huria ni Debata do hamu? Na naeng pailahon akka na pogos do hamu? Songon dia ma dohonokku tu hamu? Pujiokku do hamu disi? Dang pujiokku hamu disi.

23 Ai na hujalo sian Tuan i do na huajarhon tu hamu. Di borngin+ tikki dihianati Tuan Jesus, dibuat ibana do roti, 24 dung didok ibana mauliate tu Debata, diponggoli ma i jala ninna ma, “On ma na manggombarhon dagingku+ na dilehon humokkop hamu. Toktong ma ulahon on bahen parningotan di au.”+ 25 Songon i ma muse dibahen ibana tu makkuk panginuman i.+ Dung sae nasida mangan, ninna ma, “Makkuk panginuman on ma na manggombarhon parjanjian na imbaru i.+ Marhite mudarhi+ sah ma parjanjian i. Manang sadihari pe diinum hamu i, ulahon hamu ma i bahen parningotan di au.”+ 26 Ai ganup diallang hamu roti i, jala diinum hamu anggur sian panginuman i, na paboahon hamamate ni Tuan i do hamu disi jala torus ma i paboa hamu sahat tu na ro ibana.

27 Alani i, manang ise na mangallang roti dohot na minum anggur sian panginuman i, hape dang tama ibana mangulahon i, mardosa do ibana tu daging dohot tu mudar ni Tuan i. 28 Ikkon manat do dipareso sasahalak dirina+ andorang so diallang ibana roti manang andorang so diinum ibana anggur sian panginuman i, asa diboto ibana naung tama manang dang ibana mangulahon i. 29 Ai manang ise na mangallang roti manang na manginum anggur i, alai dang jolo diattusi ibana aha na digombarhon daging ni Tuan i, na parohon panguhuman do ibana tu dirina. 30 Alani i do gabe godang sian hamu na gale, na marsahit, dohot na mate.*+ 31 Alai molo nungnga manat tapareso diritta, dang hona uhum be hita. 32 Nang pe hona uhum hita, sipasingot sian Jahowa*+ do i, asa unang hona uhum hita rap dohot portibi on.+ 33 Alani i, hamu akka dongan, molo marpungu hamu lao mangan di Borngin Parningotan ni Tuan i, ikkon marsipaimaan do hamu. 34 Molo adong na male, mangan hian ma ibana sian jabu, asa unang hona hukum+ hamu tikki na marpungu i. Alai taringot tu akka na asing, jolo ro pe au asa hupareso i.

12 Saonari ale akka dongan, lomo do rohakku naeng botoonmuna taringot tu akka silehon-lehon ni Debata.+ 2 Diboto hamu do, tikki mangolu dope hamu songon bangso na asing,* disomba hamu do patung na so boi makkatai+ jala diulahon hamu do manang aha pe lomo ni rohana. 3 Saonari, lomo do rohakku naeng botoonmuna, dang adong halak na ditogu-togu tondi parbadia na olo mandok, “Hona bura ma Jesus!” Jala holan halak na ditogu-togu tondi parbadia+ do na olo mandok, “Jesus i do Tuan!”

4 Marragam do silehon-lehon ni Debata, alai tondi parbadia na sarupa+ do na mangalehon i. 5 Marragam do cara lao mangurupi halak na asing,+ alai holan tu sada Tuan do sude ulaon i diulahon. 6 Marragam do ulaon, alai sada do Debata na mambahen ganup halak boi mangulahon sudena i.+ 7 Alai takkas do tarida na diurupi tondi parbadia do ganup halak. Ai dilehon Debata do tondi parbadiana i asa parohon na denggan tu sude halak.+ 8 Adong do halak diurupi tondi parbadia asa marbisuk makkatai. Marhite tondi parbadia na sarupa, adong do muse na diurupi asa makkatai mardongan parbinotoan. 9 Marhite tondi parbadia na sarupa, adong do muse na diurupi asa porsea.+ Jala na asing, diurupi tondi parbadia na sarupa do muse asa boi pamaluppon.+ 10 Adong do muse na diurupi mambahen tanda halongangan,*+ na boi paboahon hata ni Debata, na boi manottuhon tutu manang na dang hata i sian Debata,+ na boi makkatai di bahasa na asing,+ jala na boi manerjemahon akka bahasa na asing.+ 11 Alai marhite tondi parbadia na sarupa do dilehon sude ulaon i. Dilehon do i tu ganup halak mangihutton lomo ni roha ni Debata.

12 Songon sada daging do Kristus i. Nang pe marragam jala godang bagian-bagianna, alai sada daging do sudena i.+ 13 Suang songon i do hita sude, halak Jahudi manang halak Junani, hatoban manang halak na merdeka, nungnga tardidi hita marhite tondi parbadia na sarupa asa boi hita gabe sada daging. Jala sude hita nungnga manjalo* tondi parbadia na sarupa.

14 Godang do bagian-bagian ni daging i, dang holan sada.+ 15 Autsura didok pat, “Ala dang tangan au, dang dohot au bagian ni daging i,” tutu do pat i dang dohot bagian ni daging? 16 Jala autsura didok pinggol, “Ala dang mata au, dang dohot au bagian ni daging i,” tutu do pinggol i dang dohot bagian ni daging? 17 Molo mata do sude dagingta on, boha ma hita boi mambege? Molo pinggol do sude dagingta on, boha ma hita boi manganggo? 18 Ai nungnga dibahen Debata marragam bagian-bagian ni daging i di ingananna be sesuai tu lomo ni rohana.

19 Dang dohonon i sada daging molo sarupa do sude bagian-bagian ni daging i. 20 Godang do nian bagian-bagian ni daging, alai sada do anggo daging i. 21 Alani i, dang boi dohonon ni mata tu tangan, “Dang porlu ho di au!” Jala dang boi dohonon ni ulu tu pat, “Dang porlu ho di au!” 22 Hape olo do bagian ni daging na gale idaon gabe bagian na massai porlu di daging. 23 Molo adong bagian ni dagingta na hurang uli idaon, marsitutu do hita mambahen i asa gabe uli.+ Alani i, gabe uli ma bagian ni dagingta na hurang uli i. 24 Alai dang porlu be bahenotta songon i tu bagian ni dagingta naung uli. Ai songon i do dibahen Debata daging i, dibahen Ibana do lam uli bagian ni daging na hurang uli. 25 Marhite songon i, dang masa be parsalisian di akka daging i jala gabe marsiurupan ma akka bagian ni daging i.+ 26 Molo haccitan sada sian bagian ni daging i, gabe sude do bagian ni daging i haccitan.+ Manang molo dipuji sada sian bagian ni daging i, gabe sude do bagian ni daging i marlas ni roha.+

27 Daging ni Kristus i+ do hamu sude jala bagian ni dagingna do hamu ganup marsada-sada.+ 28 Nungnga ditottuhon Debata asa adong di huria: Na parjolo, akka apostel.+ Na paduahon, akka panurirang.*+ Na patoluhon, akka guru.+ Dung i halak na mambahen tanda halongangan,+ halak na pamaluppon na marsahit,+ na boi mangurupi, na boi mamimpin,+ dohot na boi makkatai di bahasa na asing.+ 29 Ai sude do nasida akka apostel? Ai sude do nasida akka panurirang? Ai sude do nasida akka guru? Ai sude do nasida mangulahon tanda halongangan? 30 Ai sude do nasida boi pamaluppon? Ai sude do nasida makkatai di bahasa na asing?+ Ai sude do nasida boi manerjemahon? Dang sude nasida boi songon i.+ 31 Alai marsitutu ma hamu asa boi manjalo silehon-lehon na umbalga sian Debata.+ Jala patuduhonokku ma tu hamu dalan, na dao dumenggan sian na asing.+

13 Nang pe boi au mamakke bahasa ni jolma dohot bahasa ni suru-suruan, alai molo dang adong holong di au, dos ma au songon ogung* manang giring-giring na sai makkuling. 2 Nang pe dilehon Debata tu au silehon-lehon lao paboahon aha na lao masa di ari na naeng ro, mangattusi sude rahasia na badia dohot parbinotoan,+ jala adong di au haporseaon na togu na boi papindahon dolok, alai molo dang adong di au holong, dang marguna manang aha pe na huulahon i.+ 3 Nang pe hulehon nasa na adong di au lao mangurus halak na asing,+ jala nang pe hupelehon dagingku asa boi bangga au, alai molo dang adong di au holong,+ dang adong guna ni i di au.

4 Halak na marholong ni roha+ i sabar,+ burju,+ dang marlate ni roha,+ dang marhata manggang, dang marginjang ni roha,+ 5 sopan,*+ dang holan dirina sandiri na dipikkirhon,+ dang parmuruk,+ jala dang dipaingot-ingot holong i hasalaan ni halak.+ 6 Dang las rohana tu ulaon na so sittong,+ alai las do rohana tu akka ulaon na sittong. 7 Tahan manaon sude hasusaan,+ porsea di sasude,+ toktong paimahon akka na denggan di sasude,+ sabar jala togu do haporseaonna tikki mangadopi manang aha pe.+

8 Dang na olo salpu holong ni roha i. Alai silehon-lehon lao paboahon barita na sian Debata, makkatai di bahasa na asing, dohot mandapot parbinotoan, na lao salpu do i sude. 9 Ai dang sude dope taboto,+ jala dang lengkap dope sude barita na sian Debata i. 10 Alai molo dung ro na lengkap i, marujung ma na so lengkap i. 11 Tikki dakdanak au, songon dakdanak do pakkataiokku, pakkilalaakku, dohot pikkiranku. Alai molo dung magodang au, dang songon dakdanak be au. 12 Ai songon na markaca tu tombaga do hita saonari, dang takkas dope na taida i. Alai takkas ma i idaotta di ari na naeng ro, dos songon na pajuppang bohi. Dang sude dope huboto saonari, alai botookku ma i takkas di ari na naeng ro songon Debata na takkas mananda au. 13 Anggo saonari, toktong do adong haporseaon, toktong do tapaima-ima janji ni Debata, jala toktong do tapatudu holong. Alai sian na tolu i, holong ma na umbalga.+

14 Toktong ma patuduhon hamu holong jala marsitutu ma asa boi mandapot silehon-lehon ni Debata, tarlumobi lao mandapot silehon-lehon manurirangi.*+ 2 Ai halak na makkatai di bahasa na asing, tu Debata do ibana makkatai, dang tu jolma. Dang adong halak na mangattusi hatana i,+ nang pe marhite tondi parbadia ibana paboahon rahasia na badia i.+ 3 Alai halak na manurirangi, boi do i patoguhon, mangurupi, jala mangapuli roha ni halak marhite akka hatana. 4 Halak na makkatai di bahasa na asing patoguhon dirina sandiri. Alai anggo halak na manurirangi patoguhon akka halak na di huria. 5 Lomo do rohakku molo boi hamu makkatai di bahasa na asing.+ Alai unlomo do rohakku molo boi hamu manurirangi.+ Ai dumenggan do manurirangi sian na makkatai di bahasa na asing. Alana dang boi halak na makkatai di bahasa na asing patoguhon huria molo dang diterjemahon hatana i. 6 Hamu akka dongan, molo ro au mandapotton hamu jala makkatai marhite bahasa na asing, aha ma guna ni i di hamu? Kan ikkon marhite parbinotoan,+ barita na sian Debata, ajaran, manang marhite akka na dipatudu Debata+ do au makkatai asa marguna i tu hamu?

7 Dos ma i songon akka alat musik, songon suling dohot harpa. Songon dia ma botoon ni halak ende na diendehon molo holan sada nada do na dibahen? 8 Ai molo dang takkas soara ni tarompet, ise ma na rade lao marporang? 9 Songon i ma, molo maol do diattusi halak akka hatamuna, songon dia ma halak boi mamboto aha na didok hamu? Sasittongna dang adong lapatan ni i. 10 Godang do bahasa di portibi on, jala adong be do lapatanna. 11 Molo so huattusi do aha didok sasahalak tu au, gabe halak na asing ma ibana di au, jala au pe gabe halak na asing ma di ibana. 12 Songon i ma nang hamu, ala lomo do rohamuna mandapot silehon-lehon ni Debata, marsitutu ma hamu lao mandapot unggodang silehon-lehon na boi patoguhon huria.+

13 Alani i, porlu do martangiang halak na makkatai di bahasa na asing, asa boi diterjemahon ibana hatana i.+ 14 Molo martangiang au di bahasa na asing, dang huattusi lapatan ni i. Ai boi pe hubahen songon i, alani silehon-lehon ni Debata do. 15 Attong songon dia ma bahenokku? Martangiang ma au marhite silehon-lehon ni Debata jala martangiang ma au mamakke hata na huattusi lapatanna. Endehonokku ma puji-pujian marhite silehon-lehon ni Debata jala endehonokku ma ende na huattusi lapatanna. 16 Molo marhite silehon-lehon ni Debata do hamu pasahatton puji-pujian, jala adong halak na asing na so mangattusi hatamuna i, songon dia ma bahenon ni nasida mandok “Amen” dung sae hamu mandok mauliate di tangiangmuna i? 17 Nang pe massai denggan tangiang na binahenmuna i tu Debata, alai dang adong guna ni i di halak na asing. 18 Mandok mauliate do au tu Debata, ala boi do au makkatai di bahasa na asing jala unggodang do bahasa na huboto sian hamu. 19 Alai anggo di huria, tumagon do holan lima hata na hudok, alai boi diattusi akka halak lapatanna, sian apala sappulu ribu hata alai dang boi diattusi akka halak lapatanna.+ Tumagon ma huulahon i asal ma boi huajari halak na asing.

20 Hamu akka dongan, unang ma songon pikkiran ni dakdanak pikkiranmuna,+ alai songon dakdanak ma hamu tu ulaon na roa.+ Jala songon pikkiran ni halak na magodang ma pikkiranmuna.+ 21 Ai tarsurat do di Patik i, “‘Marhite bahasa na asing dohot halak na asing do au makkatai tu bangso on, alai tong do dang ditangihon nasida Au,’ ninna Jahowa.”*+ 22 Ai lao mangajari halak na so porsea do dipakke silehon-lehon makkatai di bahasa na asing,+ dang na lao mangajari halak na porsea. Alai anggo silehon-lehon lao manurirangi, tu halak na porsea do i dilehon dang tu halak na so porsea. 23 Alani i, molo marpungu hamu sude na di huria i, jala makkatai di bahasa na asing, dung i ro ma tusi halak na asing manang halak na so porsea, kan dokkonon ni nasida ma hamu halak na rittik? 24 Alai molo sude hamu manurirangi, dung i ro ma tusi halak na asing manang halak na so porsea, gabe sipasingot ma hatamuna i tu nasida jala gabe taronjar ma roha ni nasida lao mamareso dirina. 25 Gabe tarida ma sude na buni di bagasan rohana. Marsinggang ma ibana manomba Debata, jala dohononna ma, “Tutu do Debata di tonga-tongamuna!”+

26 Attong, aha ma na lao bahenotta akka dongan? Tikki marpungu hamu, adong ma sahalak na mangendehon pujian tu Debata, na sahalak nai mangajari, na sahalak nai paboahon hata na dijalo ibana sian Debata, na sahalak nai makkatai di bahasa na asing, jala na sahalak nai manerjemahon jala patorakkon.+ Bahen hamu ma i sude lao patoguhon huria. 27 Molo adong na naeng makkatai di bahasa na asing, sae ma dua manang tolu halak na makkatai. Sada-sada ma nasida makkatai jala ikkon adong do sahalak na manerjemahon.+ 28 Alai molo so adong na boi manerjemahon hatana i, ikkon hohom ma ibana di huria. Di bagasan rohana sandiri ma ibana makkatai tu Debata. 29 Molo adong panurirang,+ denggan ma dua manang tolu halak na makkatai. Jala halak na asing ma na marsitutu lao mangattusi lapatanna. 30 Alai molo makkatai Debata tu sahalak sian na hundul i, ikkon hohom ma jolo halak na makkatai i. 31 Sude do hamu boi manurirangi, alai sada-sada ma hamu mangulahon i, asa sude hamu boi marsiajar jala dipatogu.+ 32 Ikkon boi do dirajai panurirang i dirina tikki mamakke silehon-lehon ni Debata, i ma silehon-lehon lao manurirangi. 33 Ai Debata hadameon do Debata, dang Debata na gaor.+

Songon di sude huria ni akka na badia, 34 ikkon hohom do akka borua. Ai dang diloas nasida makkatai di huria.+ Jala ikkon unduk+ do nasida songon na tarsurat di Patik i. 35 Molo adong na so diattusi nasida, lok ma disukkun nasida suamina di jabu. Ai dang tama borua makkatai di huria.

36 Ai sian hamu do ro hata ni Debata? Manang na holan tu hamu do ro hata i?

37 Molo didok roha ni sasahalak ibana panurirang, manang dapotna silehon-lehon ni Debata, ikkon diakkui ibana do molo na husurat on sada paretta sian Tuan* i. 38 Manang ise na so manangihon akka i, ibana pe dang tangihonon ni Debata.* 39 Alani i akka dongan, toktong ma marsitutu hamu manurirangi,+ jala unang ma orai hamu halak makkatai di bahasa na asing.+ 40 Alai ikkon denggan do sude mardalan jala taratur.+

15 Hamu akka dongan, saonari paingotokku ma hamu taringot tu barita na uli naung hupasahat tu hamu.+ Nungnga dijalo hamu barita i jala toktong do i diihutton hamu. 2 Molo toktong diihutton hamu barita na uli na hupasahat i, boi ma hamu selamat. Molo dang, dang adong be gunana hamu gabe siihutton Kristus.

3 Ai nungnga huajarhon tu hamu akka na hujalo i. Na uppetting sian akka na hujalo i, i ma taringot tu Kristus naung mate alani dosatta songon na tarsurat di Bukku na Badia.+ 4 Dung dikubur ibana,+ dipahehe+ do ibana di ari na patoluhon+ songon na tarsurat di Bukku na Badia i.+ 5 Dipatuduhon do dirina tu si Kepas,*+ dung i tu apostel na 12 i.+ 6 Dung i dipatuduhon do muse dirina tu akka dongan sahaporseaon na marpungu di sada inganan,+ godangna lobi sian 500 halak. Godang do sian nasida na rap dope dohot hita, alai na deba nai nungnga mate.* 7 Dung i dipatuduhon ma muse dirina tu si Jakobus,+ dung i tu sude akka apostel.+ 8 Jala na parpudi, dipatuduhon do dirina tu au,+ na songon poso-poso na tubu di na so tikkina.

9 Au do na ummetmet sian sude apostel, jala dang tama au didok apostel, ai hea do hubahen na haccit tu huria ni Debata.+ 10 Alai ala asi ni roha ni Debata na massai balga i do umbahen na boi au songon saonari on. Jala dang marisuang asi ni rohana na massai balga i, ai gumodang do na huulahon sian sude akka apostel. Jala dang alani gogokku umbahen na boi huulahon i, alai alani asi ni roha ni Debata na massai balga i do na mandongani au. 11 Alani i, dang soal ise na mamaritahon barita na uli i, au manang nasida, sarupa do barita na dipaboa hami, jala i do na dihaporseai hamu.

12 Molo nungnga tabaritahon naung dipahehe Kristus i sian na mate,+ boasa adong sian hamu na mandok na so adong haheheon tu halak na mate? 13 Molo dang adong haheheon tu halak na mate, Kristus i pe dang tutu dipahehe. 14 Alai molo dang tutu dipahehe Kristus i, dang adong be guna ni barita na uli na tabaritahon i dohot haporseaonmuna i. 15 Asing ni i, molo dang dipahehe Debata halak na mate, Kristus i pe dang dipahehe. Alani i, gabe dang tutu be barita na tapaboa taringot tu Debata,+ ai tabaritahon do naung dipahehe Debata Kristus i.+ 16 Molo dang dipahehe na mate, Kristus i pe dang dipahehe. 17 Dung i, molo dang dipahehe Kristus i, dang adong be guna ni haporseaonmuna i jala toktong ma hamu mardosa.+ 18 Jala laos mago ma sude halak naung mate*+ na mangihutton Kristus i. 19 Molo holan di parngoluon saonari on do tahilala marlaba haporseaotta taringot tu Kristus i, hita ma na undangol* sian sude jolma.

20 Alai, saonari nungnga dipahehe Kristus sian na mate jala ibana do na parjolo dipahehe* sian sude halak na mate.*+ 21 Ai songon hamatean i na ro sian sahalak jolma,+ suang songon i do haheheon ni halak na mate ro do i sian sahalak jolma.+ 22 Ai sude do jolma mate alani si Adam,+ suang songon i ma sude do jolma mulak mangolu alani Kristus.+ 23 Alai dipahehe do ganup halak mangihutton urutanna: Kristus ma na parjolo,*+ dung i dipahehe ma akka halak appuna ni Kristus i saleleng di ari harorona.+ 24 Dung i di ujungna, pasahatonna ma Harajaon i tu Debata Ama i. Ulahononna ma i dung diripasson sude pamarettaon, sude na marhuaso, dohot sude na marhagogoon.+ 25 Ai ikkon mamaretta do ibana gabe raja paima dibahen Debata sude musuna gabe sidege-degean ni patna.+ 26 Jala musu na parpudi na lao ditaluhon, i ma hamatean.+ 27 Ai dibahen Debata do “tunduk saluhutna tu toru ni patna”.+ Alai nang pe didok, ‘Dibahen Debata ibana mangarajai sudena,’+ dang na gabe dohot Debata dirajai ibana, alai Debata do na mambahen sudena i dirajai ibana.+ 28 Dung dibahen tunduk sude tu ibana, Anak i sandiri pe patundukonna do dirina tu Debata. Ai Debata do na mambahen sude tunduk tu ibana.+ Marhite songon i, gabe holan Debata ma na mangarajai sasudena.+

29 Molo dang dipahehe na mate, aha ma na masa tu halak na tardidi na gabe mate?+ Boasa ma dididi nasida asa gabe halak na mate? 30 Boasa ma ikkon dihilala hami na haccit ganup tikki?+ 31 Ale akka dongan, bangga do rohakku mangida hamu akka sisean ni Kristus Jesus Tuanta i. Marsumpa ma au mandok tu hamu, ganup ari do au mangadopi hamatean. 32 Aha ma gunana hualo akka binatang buas na di Epesus+ songon na binahen ni halak na asing i?* Molo dang dipahehe na mate, “Beta, mangan minum ma hita, ai mate do hita marsogot.”+ 33 Unang ma olo hamu dioto-otoi. Molo mardongan hamu tu halak na so denggan, sega do pangalahomuna* na denggan i.+ 34 Alani i sadar ma hamu, ulahon hamu ma na sittong, unang be sai mardosai hamu. Ai deba sian hamu dang adong parbinotoanna taringot tu Debata. Hudok pe songon i, asa maila do hamu.

35 Alai, olo do ra adong na manukkun, “Songon dia do halak na mate boi dipahehe? Daging na songon dia do lehononna tu nasida?”+ 36 E ho na so marroha! Molo disaburhon ho bibit ni suan-suanan tu tano, dang tubu i anggo so jolo busuk.* 37 Ai dang suan-suanan na tubu na disaburhonmi, alai bibit do i, dos songon bibit ni eme manang bibit ni suan-suanan na asing. 38 Alai Debata do na mambahen bibit ni suan-suanan tubu sesuai tu lomo ni rohana. Jala marasing-asing do dibahen ganup bibit na tubu i.* 39 Dang sarupa sude ragam ni daging. Asing do daging ni jolma, daging ni binatang, daging ni pidong, dohot daging ni dekke. 40 Asing do daging ni akka na di banua ginjang+ jala asing do daging ni akka na di tano on.+ Asing do hasangapon ni daging ni akka na di banua ginjang jala asing do hasangapon ni daging ni akka na di tano on. 41 Asing do hasangapon ni mataniari, asing do hasangapon ni bulan,+ jala asing do hasangapon ni akka bintang. Gariada, akka bintang i pe marasing-asing do hasangaponna.

42 Songon i ma na masa tu halak na mate. Busuk do dagingna na mate i. Alai dung dipahehe, dapotna ma daging na so olo busuk.+ 43 Lea do tikki dikuburhon,* alai sangap+ do dung dipahehe. Dang adong gogona tikki dikuburhon, alai gogo do dung dipahehe.+ 44 Dagingna na di tano on do na dikubur, alai dipahehe ma ibana tu hangoluan na di banua ginjang. Molo adong do hangoluan di tano on, tottu adong do hangoluan di banua ginjang. 45 Songon hata ni na tarsurat i, “Gabe mangolu ma jolma na parjolo i,+ i ma si Adam.” Alai si Adam na parpudi gabe suru-suruan na massai gogo na mangalehon hangoluan.+ 46 Alai hangoluan na parjolo i, dang songon hangoluan na di banua ginjang i. Ai hangoluan na di tano on do na parjolo i. Dung i pe asa ro hangoluan na di banua ginjang i. 47 Sian tano on do ro jolma na parjolo i jala ditoppa sian orbuk.+ Alai sian banua ginjang+ do ro jolma na paduahon i. 48 Sude na di tano on sarupa do tu jolma na ditoppa sian orbuk i, jala akka na sian banua ginjang i sarupa do i tu ibana na ro sian banua ginjang i.+ 49 Ala sarupa do hita songon jolma na ditoppa sian orbuk i,+ songon i ma nang hita haduan, sarupa ma hita songon ibana na ro sian banua ginjang i.+

50 On do na hudok disi ale akka dongan, dang adong parbagianan ni sibuk dohot mudar di Harajaon ni Debata. Jala sude na boi busuk dang mandapot parbagianan di na so boi busuk. 51 Parrohahon hamu ma rahasia na badia na hupaboa on: Dang sude hita mate,* alai na lao sude do hita bahenonna muba+ 52 di bagasan satokkin, holan sakkidop mata saleleng tarbege soara ni tarompet na parpudi. Ai di na tarbege soara ni tarompet i,+ paheheonna ma halak na mate jala mardaging na so boi busuk ma nasida. Laos di tikki i ma paubaonna hita sude. 53 Daging na boi busuk i, ikkon paubaonna do gabe daging na so boi busuk saleleng ni lelengna.+ Jala daging na boi mate i, ikkon paubaonna do tu daging na so boi mate saleleng ni lelengna.+ 54 Tikki dipauba daging na boi busuk i gabe daging na so boi busuk, jala daging na boi mate dipauba gabe daging na so boi mate, saut ma ayat na mandok, “Boddutonna ma hamatean saleleng ni lelengna.”+ 55 “Ale hamatean, dang na lao monang be ho. Ai dang adong be gogom lao mambahen halak susa.”*+ 56 Dosa i do huaso na parohon hamatean i.+ Jala Patik i do na mangalehon huaso tu dosa i.+ 57 Alai mauliate ma tu Debata, ai dibahen Ibana do hita monang marhite Tuanta Jesus Kristus!+

58 Alani i akka dongan na huhaholongi, ikkon togu+ ma hamu, jala dang muba-uba. Sai marsitutu+ ma hamu mangulahon godang ulaon ni Tuhan* i. Ai diboto hamu do, dang marisuang+ halojaonmuna marhobas tu Tuhan* i.

16 Saonari, taringot tu na papunguhon sumbangan tu akka halak na badia,+ ihutton hamu ma tudu-tudu na hulehon tu akka huria na di Galatia. 2 Di ari na parjolo di ganup minggu, sude ma hamu papulikkon hepeng sesuai tu na tarbahen hamu, asa unang di tikki ro au dipapungu hamu i. 3 Molo dung ro au tusi, suruokku ma akka bawa mamboan sumbangan na sian ias ni rohamuna i tu Jerusalem. Akka bawa na boi dihaporseai do nasida songon na dipaboa hamu di suratmuna.+ 4 Molo ikkon tusi do au, rap lao pe au dohot nasida tusi.

5 Ro pe au mandapotton hamu dung sian Makedonia. Ai naeng lao do au tu Makedonia.+ 6 Olo do ra tinggal au rap dohot hamu sahat tu na salpu musim dingin. Jala dukkon i, dongani hamu ma au satokkin di pardalanan tu inganan sitopotokku annon. 7 Ai dang lomo rohakku holan satokkin rap dohot hamu. Alai molo diloas Jahowa* do, lomo do rohakku naeng leleng rap dohot hamu.+ 8 Saonari, tinggal di Epesus+ do au sahat tu Perayaan Pentakosta. 9 Ai dibukkahon Tuan i do di au dalan*+ na balga lao mangulahon ulaonna, alai godang do na mangabbati au.

10 Molo dung sahat si Timoteus,+ manat ma parrohahon hamu asa unang adong manang aha pe na mambahen ibana holsoan. Ai na marhobas tu Jahowa*+ do ibana dos songon au. 11 Unang ma adong sian hamu na leas rohana mangida ibana. Paborhat hamu ma ibana di bagasan dame lao mandapotton au, ai nungnga hupaima ibana rap dohot akka dongan.

12 Taringot tu si Apollos,+ sai hujujui do ibana asa ro manjuppangi hamu rap dohot akka dongan na asing. Alai sahat tu saonari dang olo dope ibana ro. Dung adong pe tikki na denggan asa ro ibana manjuppangi hamu.

13 Toktong ma hamu sadar,+ togu di haporseaon,+ toktong barani,+ jala toktong ma hamu margogo.+ 14 Ulahon hamu ma sude ulaonmuna di bagasan holong.+

15 Hamu akka dongan, takkas do diboto hamu, si Stepanas dohot keluargana do na parjolo gabe halak na porsea di Akaya. Jala sai rade do nasida mangurupi akka na badia i. Alani i, hupangido ma tu hamu: 16 Toktong ma ihutton hamu tudu-tudu ni akka halak sisongon i dohot sude halak na loja di ulaon i.+ 17 Las do rohakku ala ro do si Stepanas,+ si Portunatus, dohot si Akaikus mangurupi au tikki dang dison hamu. 18 Ai dipatogu nasida do rohakku dohot rohamuna. Alani i, argai hamu ma halak sisongon i.

19 Sahat ma tu hamu tabe ni akka dongan na di huria na adong di Provinsi Asia. Songon i nang tabe ni si Akuila dohot si Priska rap dohot akka dongan sahuria na mangihutton Tuan i na marpungu di jabu ni nasida.+ 20 Sahat ma tabe ni sude dongan na adong dison tu hamu. Denggan* ma jalo hamu akka donganta sahaporseaon.

21 Au si Paulus, au sandiri do na manuratton tabe on.

22 Manang ise na so makkaholongi Tuan i, hona bura ma ibana. Ale Tuannami ro ma ho! 23 Sai didongani asi ni roha ni Tuan Jesus na massai balga i ma hamu. 24 Sai didongani holong ni rohakku ma hamu di bagasan Kristus Jesus.