TU HURIA NA DI ROM

1 Sian si Paulus, naposo ni Kristus Jesus. Dijou do au lao gabe apostel, jala dipillit* do au lao paboahon barita na uli na sian Debata.+ 2 Nungnga sian najolo dijanjihon Debata barita na uli on marhite akka panurirang* di Surat na Badia. 3 Barita na uli on paboahon taringot tu Anakna na tubu tu tano on, na ro sian pinoppar ni si Daud.+ 4 Marhite tondi parbadia, nungnga dipahehe ibana sian na mate,+ na patuduhon ibana do Anak ni Debata.+ Jala ibana do Jesus Kristus Tuanta i. 5 Marhite ibana do dipatudu Debata asi ni rohana na massai balga i tu hami. Jala dipillit Jesus do au gabe apostel,+ asa boi huurupi sude bangso gabe porsea,+ mangoloi Kristus, jala pasangappon goarna. 6 Sian tonga-tonga ni bangso i do hamu dijou asa gabe appuna ni Jesus Kristus. 7 Hubahen do surat on tu sude halak na dihaholongi Debata na adong di Rom, na tarjou gabe akka halak na badia:

Anggiat ma dipatuduhon tu hamu asi ni roha na massai balga i dohot hadameon na sian Debata Ama i dohot sian Tuanta Jesus Kristus.

8 Parjolo sahali, mandok mauliate ma au tu Debatakku marhite Jesus Kristus alani hamu sude. Ai nungnga tarbarita haporseaonmuna tu sude liat portibi on. 9 Hubahen do sian nasa rohakku lao marhobas tu Debata marhite paboahon barita na uli taringot tu Anakna i. Jala takkas do diboto Debata na toktong hutangiakkon hamu.+ 10 Hutangiakkon do anggiat ma boi au ro mandapotton hamu, jala anggiat ma i dihalomohon Debata. 11 Ai massai lomo do rohakku naeng pajuppang dohot hamu asa hupaboa akka na boi patoguhon parale-aleonmuna tu Debata. 12 Jala lomo do rohakku asa masipatoguan hita.+ Lam togu ma au alani haporseaonmuna, jala lam togu ma hamu alani haporseaokku.

13 Ale akka dongan, lomo do rohakku botoonmuna, jotjot do au naeng ro tu ingananmuna. Naeng ro do au mangajari akka halak na disi asa gabe sisean nasida, songon na huulahon tu bangso na asing. Alai sai adong do na mangabbati. 14 Ai marutang do au tu sude jolma: tu halak Junani dohot tu halak na asing,* tu halak na marsikkola na timbo, dohot tu halak na so marsikkola. 15 Songon i do nang tu hamu na di kota Rom,+ naeng marbarita na uli do au tu hamu. 16 Dang maila au pasahatton barita na uli i.+ Ai marhite barita na uli, dipatuduhon Debata ma huasona lao paluahon akka halak na porsea.+ Na parjolo halak Jahudi,+ dung i halak Junani.+ 17 Marhite barita na uli, idaon ni halak na porsea ma hatigoran ni Debata. Alani i, lam togu ma haporseaon ni nasida,+ songon na nidok ni na tarsurat i, “Toktong do mangolu akka halak na mangulahon na sittong ala porsea ibana.”+

18 Dipatudu Debata do rimasna+ sian banua ginjang tu akka halak na so mangoloi Ibana dohot tu halak na so mangulahon na sittong. Diulahon nasida do na so sittong lao mangabbati akka halak mamboto hasittongan.+ 19 Ikkon tandaon ni nasida do nian Debata, ai nungnga godang dipatudu Debata tu nasida.+ 20 Nang pe dang boi taida Debata, alai boi do taattusi akka pangalahona molo taparsiajari songon dia portibi on ditoppa. Boi do taboto aha na dihalomohon rohana molo taparsiajari akka na dibahen Ibana.+ Tarida do sian akka na tinoppana na tutu Ibana Debata+ jala martahan sahat tu saleleng ni lelengna do huasona.+ Alani i, dang adong be na boi mambahen jolma marsidalian. 21 Nang pe diboto nasida taringot tu Debata, alai dang mandok mauliate nasida jala dang dipasangap nasida Ibana. Ai nungnga maoto pikkiran nang roha ni nasida.+ 22 Dirippu nasida do na bisuk nasida, hape na oto do nasida. 23 Dang dipasangap nasida Debata na manoktong i. Alai dipasangap nasida do patung na songon jolma na marhamatean, na songon pidong, na songon binatang siopat pat, manang na songon binatang na mangissir.+

24 Alani i, dipasombu Debata ma nasida mangulahon akka ulaon na ramun,* mangihutton lomo ni roha ni nasida sandiri. Gabe dipakke nasida ma daging ni nasida lao mangulahon akka ulaon ni halak na so umboto ila. 25 Dipillit nasida do makkaporseai gabus sian apala makkaporseai hasittongan taringot tu Debata. Dipasangap jala disomba nasida do na tinoppa ni Debata. Hape holan Panoppa i do na tama pujion saleleng ni lelengna. Amen. 26 Alani i ma dipasombu Debata nasida dirajai hisap-hisap ni daging na ramun lao mangulahon seks.+ Dipakke akka borua do daging ni nasida asing sian naung ditottuhon Debata tikki ditoppa nasida.+ 27 Songon i ma nang akka bawa dang lomo be roha ni nasida mangulahon seks dohot borua.* Alai marsigorgor do hisap-hisap ni dagingna lao mangulahon seks tu donganna bawa, bawa tu bawa.+ Ala diulahon nasida na ramun, gabe dihukum ma nasida hombar tu pambahenan ni nasida i.+

28 Ai dang penting dihilala nasida lao mananda Debata,* gabe dipasombu Debata ma sega pikkiran ni nasida jala diulahon nasida ma akka ulaon na so patut.+ 29 Gok do akka na roa di pikkiran ni nasida.+ Diulahon nasida do na jahat, jala hisap do nasida tu sude.+ Marlate ni roha+ do nasida, mambunu,+ marbada, manipu,+ lomo do rohana mangida halak susa,+ jala dipahata-hata nasida do donganna, 30 diparoa-roa do donganna,+ sogo do rohana tu Debata, holan na mangaleai donganna, siginjang roha, parhata manggang, mambahen rencana na jahat, dang mangoloi natorasna,+ 31 dang marroha,+ dang mangingot janjina, jala dang marasi ni roha. 32 Diboto nasida do na ikkon dihukum mate+ halak na mangulahon sisongon i mangihutton patik ni Debata na tigor i. Alai toktong do diulahon nasida i jala lomo do roha ni nasida mangida halak mangulahon i.

2 Alani i, hamu ale akka dongan, manang ise pe hamu,+ dang adong na boi mambahen hamu manguhumi halak na asing. Molo diuhumi hamu halak na asing, na manguhumi dirimuna sandiri do hamu. Ai hamu pe diulahon hamu do songon na diulahon nasida.+ 2 Ai taboto do, hukumon ni Debata do halak na mangulahon sisongon i, jala adil do panguhumanna i.*

3 Ale akka dongan, diuhumi hamu do halak na asing na mangulahon sisongon i, hape hamu pe diulahon hamu do songon i. Na dirippu hamu do boi hamu malua sian panguhuman ni Debata? 4 Manang, na leas do rohamuna tu haburjuon+ dohot tu hasabaron+ ni Debata na massai balga i?+ Jala na so diboto hamu do na burju Debata mangurupi hamu asa muba+ hamu? 5 Alai, jogal do rohamuna jala dang olo hamu muba. Alani i pasti hukumon ni Debata ma hamu di ari rimasna i. Di ari i, patuduonna ma panguhumanna na tigor i.+ 6 Ai dibalos Debata do ganup halak hombar tu pambahenanna be.+ 7 Tu halak na marsitutu mangulahon na denggan, lehonon ni Debata ma hangoluan na saleleng ni lelengna. Ai dilului nasida do hasangapon, hamuliaon, dohot hangoluan na so ra suda.+ 8 Alai, tu halak na lomo rohana marbada dohot tu na so mangoloi hasittongan jala na mangulahon akka na jahat, hona hukum jala hona rimas ni Debata ma nasida.+ 9 Masa ma sitaonon dohot hasusaan tu ganup halak na mangulahon na jahat. Na parjolo tu halak Jahudi, dung i tu halak Junani. 10 Alai lehonon ni Debata ma hamuliaon, hasangapon, dohot hadameon tu ganup halak na mangulahon na denggan. Na parjolo tu halak Jahudi,+ dung i tu halak Junani.+ 11 Ai dang marimbar jolma di Debata.+

12 Manang ise na mangulahon dosa ala dang mananda Patik ni si Musa, mate do ibana nang pe dang ditanda patik i.+ Jala manang ise na mangulahon dosa, alai ditanda do patik, diuhumi ma ibana mangihutton patik i.+ 13 Ai dang halak na mambege patik i na sittong di jolo ni Debata, alai halak na mangulahon patik i do.+ 14 Molo diulahon akka halak na sian bangso na asing do Patik ni si Musa,+ on patuduhon adong do patik i di roha ni nasida, nang pe dang ditanda nasida patik i. 15 Dipatudu do naung tarsurat patik i di roha ni nasida. Panggora ni rohana ma na mangurupi nasida mamboto na sittong manang na sala ulaon ni nasida. Jala pikkiran ni nasida ma na manottuhon na sittong manang na sala nasida. 16 Di ari panguhuman i, marhite Kristus Jesus lao diuhumi Debata ma akka na ditabunihon jolma.+ Jala songon i do barita na uli na hubaritahon i.

17 Digoari do hamu halak Jahudi,+ porsea do hamu tu patik, jala bangga do hamu ala bangso ni Debata hamu. 18 Diboto hamu do lomo ni roha ni Debata jala diboto hamu do dia na sittong. Ai diajari do hamu taringot tu Patik ni si Musa.+ 19 Jala pos do rohamuna mandok na boi hamu manogu-nogu na mapitung jala gabe panondang ni halak di na holom, 20 pangajari ni halak na oto, guru ni akka dakdanak, jala diboto hamu do ajaran na uppetting dohot na sittong sian Patik ni si Musa. 21 Diajari hamu do halak na asing, alai boasa ma dang diajari hamu dirimuna?+ Diajarhon hamu do, “Unang ho manakko,”+ alai boasa manakko hamu? 22 Didok hamu do, “Unang ho mangalakkup,”+ alai boasa mangalakkup hamu? Sogo do rohamuna* tu akka patung na disomba, alai boasa dirampok hamu inganan panombaon tu debata na so sittong? 23 Bangga do hamu ala diboto hamu patik i, alai boasa dileai hamu Debata marhite mangalanggar Patik ni si Musa? 24 Songon hata ni na tarsurat i, “Dileai akka bangso do goar ni Debata alani hamu.”+

25 Sasittongna, ikkon dioloi hamu do patik i asa marlaba sunat i.+ Alai molo dilanggar hamu do patik i,+ dos ma hamu songon halak na so marsunat. 26 Molo dioloi halak na so marsunat+ do paretta ni Debata na adong di Patik i, kan etongon ni Debata ma ibana songon halak na marsunat?+ 27 Nungnga marsunat hamu jala adong do patik na tarsurat i di hamu. Alai dilanggar hamu do Patik i. Alani i, diuhumi halak na so marsunat i ma hamu, ai dioloi nasida do Patik i. 28 Sasahalak didok halak Jahudi na sittong, dang holan alani na marsunat+ manang na mangakku halak Jahudi sabbing.+ 29 Alai akka na adong di bagasan rohana i do na patuduhon molo ibana halak Jahudi na sittong.+ Disunat do rohana+ marhite tondi parbadia, dang mangihutton patik na tarsurat i.+ Jaloonna ma pujian sian Debata, dang sian jolma.+

3 Alani i, aha ma labana gabe halak Jahudi manang gabe halak na marsunat? 2 Massai godang do labana. Na parjolo, tu nasida do dipasahat Debata hatana.+ 3 Alai songon dia ma molo adong sian halak Jahudi i na so porsea? Na gabe so boi be tahaporseai Debata? 4 Tottu daong! Tung sude pe jolma pargabus,+ alai anggo Debata toktong do sittong.+ Songon hata ni na tarsurat i, “Tarida ma na sittong do Ho sian hatami jala monang do Ho tikki diadili.”+ 5 Alai lam takkas ma tarida na sittong do Debata marhite pambahenatta na sala i. Alani i, na so adil do Debata molo dihukum Ibana hita? (Ai songon i do pandapot ni piga-piga halak.) 6 Daong! Molo dang adil Debata, dia ma boi Ibana manguhumi portibi on?+

7 Molo huhatahon pe na so sittong jala alani i gabe lam tarida na sittong Debata jala gabe dipasangap Ibana, boasa dope diuhumi au songon pardosa? 8 Boasa dang didok hami tu hamu, “Taulahon ma na jahat asa ro na denggan?” Ai adong do na manudu hami mandok songon i. Sasittongna, ikkon dihukum do nasida.+

9 Attong, na dumenggan do hita sian halak na asing? Daong! Songon naung hudok hami, rap dirajai dosa+ do halak Jahudi nang halak Junani. 10 Songon hata ni na tarsurat i, “Dang adong halak na sittong nanggo sahalak pe.+ 11 Dang adong nanggo sahalak pe na marbisuk. Jala dang adong nanggo sahalak pe na mangalului Debata. 12 Nungnga manimbil sude jolma, dang marguna be nasida sude, jala dang adong na burju nanggo sahalak pe.”+ 13 “Dos do pamangan ni nasida songon kuburan na bukka. Gabus do na kaluar sian dila ni nasida.”+ Jala “adong do bisa ni ulok di bibir ni nasida”.+ 14 “Gok do bura dohot hata na posi di pamangan ni nasida.”+ 15 “Hatop do pat ni nasida lao mambunu.”*+ 16 “Holan hasusaan dohot hamagoan do di akka dalan ni nasida. 17 Jala dang ditanda nasida dalan hadameon.”+ 18 “Dang dihabiari nasida Debata.”+

19 Taboto do, sude na tarsurat di Patik ni si Musa i, lao tu halak Jahudi do i. Alani i, dang adong be na boi marsidalian jala hukumon ni Debata do sude halak na di portibi on.+ 20 Alani i, dang adong halak na didok mangulahon na sittong di jolo ni Debata marhite mangulahon patik i.+ Alai marhite patik i, gabe takkas ma taboto aha do dosa i.+

21 Alai saonari taboto ma, songon na tarsurat di Patik ni si Musa dohot na Sinurat ni Akka Panurirang,*+ boi do sasahalak didok sittong di jolo ni Debata,+ nang pe dang diulahon patik i. 22 Tutu, sude halak na porsea tu Jesus Kristus boi didok sittong di jolo ni Debata. Ai dang marimbar jolma di Debata.+ 23 Nungnga mardosa sude jolma jala dang boi be nasida patuduhon hamuliaon ni pangalaho ni Debata.+ 24 Alai digarar Kristus Jesus do nasida marhite tobusan+ asa boi nasida malua jala boi didok sittong di jolo ni Debata. On ma silehon-lehon ni Debata+ alani asi ni rohana na massai balga i.+ 25 Dibahen Debata do Kristus gabe pelean, asa boi halak mardame tu Ibana+ marhite haporseaon ni nasida tu mudar ni Kristus i.+ Dibahen do songon i lao patuduhon hatigoranna.* Ai sabar* do Debata manesa dosa ni akka jolma di tikki naung salpu. 26 Jala dipatuduhon Debata do hatigoranna+ i sahat tu saonari, didok Ibana do sittong ganup halak na porsea tu Jesus.+

27 Alani i, adong do na boi mambahen sasahalak marbalga ni roha? Dang adong. Patik na dia do na mangorai sasahalak marbalga ni roha? Parniulaon ni sasahalak do na uppetting didok di patik i?+ Daong. Alai ikkon marhaporseaon do sasahalak didok di patik i. 28 Di hita, alani haporseaon do umbahen na didok sasahalak sittong, dang alani na mangulahon patik.+ 29 Ai holan Debata ni halak Jahudi do Ibana?+ Kan Ibana do tong Debata ni bangso na asing?+ Tutu, laos Ibana do Debata ni akka bangso na asing.+ 30 Ai sada do Debata.+ Alani i, didok Debata do sittong akka halak na marsunat+ dohot na so marsunat+ molo porsea nasida. 31 Attong, na so marlakku do Patik i ala porsea hita? Daong! Gariada na patoguhon* patik i do hita.+

4 Molo songon i, aha do dapot ni si Abraham omputta i? 2 Molo marhite parniulaonna si Abraham didok sittong, boi ma ibana marbalga ni roha. Alai dang adong na boi mambahen ibana marbalga ni roha di jolo ni Debata. 3 Ai didok na tarsurat i do, “Porsea do si Abraham tu Jahowa.* Alani haporseaonna i, didok do ibana mangulahon na sittong.”*+ 4 Molo dijalo parkarejo gajina, dang alani haburjuon ni tuanna i, alai ala marhak do ibana manjalo i.* 5 Molo adong halak na so mangasahon na niulana jala porsea tu Debata, na mangulahon na sittong do ibana didok disi. Nang pe mardosa ibana, boi do didok ibana mangulahon na sittong alani haporseaonna.+ 6 Dos ma i songon hata ni si Daud taringot tu halak na marlas ni roha ala didok Debata ibana mangulahon na sittong, nang pe dang sude ulaonna hombar tu patik. Didok ibana do, 7 “Marlas ni roha ma halak na disalpuhon hasalaanna jala disesa* dosana. 8 Marlas ni roha ma halak na so dipaingot-ingot* Jahowa* be akka dosana.”+

9 Holan halak na marsunat i do na marlas ni roha? Manang dohot do halak na so marsunat i?+ Ai nungnga didok, “Ala marhaporseaon do si Abraham umbahen na didok ibana mangulahon na sittong.”+ 10 Sadihari do si Abraham didok mangulahon na sittong? Andorang so marsunat do ibana manang dung marsunat? Sasittongna, nungnga didok ibana mangulahon na sittong andorang so marsunat dope. 11 Disuru Debata do si Abraham asa disunat. On ma na gabe tanda*+ molo ibana didok Debata mangulahon na sittong. Ai nungnga marhaporseaon ibana andorang so disunat. Alani i gabe ama ni sude halak na porsea+ ma ibana andorang so disunat, jala nasida sude pe gabe didok Debata do mangulahon na sittong. 12 Jala dang holan ama ni sude na marsunat si Abraham,+ alai dohot do ama ni sude halak na mangihutton haporseaonna, i ma haporseaonna andorang so marsunat dope ibana.

13 Marjanji do Debata lao mangalehon portibi on tu si Abraham manang tu pinopparna. Dang ala na diulahon si Abraham patik i umbahen na dijanjihon Debata songon i.+ Alai alani haporseaonna do jala ala didok Debata do ibana halak na mangulahon na sittong.+ 14 Molo halak na mangulahon patik i do na manjalo janji i, marisuang ma haporseaon i jala dang marlapatan be janji i. 15 Sasittongna, parohon rimas ni Debata do Patik i.+ Alai autsugari dang adong patik i, dang adong na mangalanggar patik i.+

16 Alani haporseaon do dijalo si Abraham janji i. Hombar do i tu asi ni roha ni Debata na massai balga i+ asa boi sude pinopparna mandapot janji i.+ Dang holan akka na mangulahon Patik ni si Musa na manjalo i, alai dohot do halak na mangihutton haporseaon ni si Abraham, i ma na gabe ama di hita sude.+ 17 Ai songon on do didok di na tarsurat i, “Hupillit do ho gabe ama ni godang bangso.”+ Pasti saut do janjina i. Ai porsea do si Abraham tu Debata na mambahen halak na mate mulak mangolu. Ibana do na paboahon akka na so masa dope songon naung tutu masa.* 18 Porsea jala pos do roha ni si Abraham na boi ibana gabe ama ni godang bangso, nang pe songon na so mungkin boi masa i tu ibana. Pos do rohana tu hata na mandok, “Songon i ma godang ni pinopparmu haduan.”+ 19 Di tikki i, nungnga marumur hira-hira 100 taon+ si Abraham jala mandul do si Sara.+ Nang pe didok roha ni si Abraham dang na lao adong be pinopparna, alai dang gabe gale haporseaonna. 20 Porsea do ibana tu janji ni Debata jala dang ganggu rohana. Gariada lam margogo do ibana alani haporseaonna jala dipasangap ibana do Debata. 21 Jala pos situtu do rohana pasauton ni Debata do sude janjina i.+ 22 Alani i, “didok do ibana mangulahon na sittong”.+

23 Sasittongna, dang holan tu ibana disurat+ hata na mandok, “Alani haporseaonna i didok do ibana mangulahon na sittong.” 24 Alai dohot do i disurat tu hita. Didok do hita sittong, ala porsea do hita tu Debata na pahehehon Jesus Tuanta i sian na mate.+ 25 Diloas Debata do Jesus dibunu asa disesa dosatta,+ jala dipahehe Debata do ibana asa boi hita didok mangulahon na sittong.+

5 Alani haporseaotta,+ nungnga didok Debata be hita saonari mangulahon na sittong. Alani i, anggiat ma toktong hita mardame tu Debata marhite Jesus Kristus Tuanta i.+ 2 Ala porsea hita tu Kristus, boi ma tadapot asi ni roha ni Debata na massai balga i, songon na tahilala saonari.+ Alani i, marlas ni roha ma hita ala tapaima-ima do lao manjalo hasangapon sian Debata. 3 Dang holan i, marlas ni roha ma hita nang pe marsitaonon.+ Ai taboto do, sitaonon i mambahen hita gabe togu+ jala lam marpos ni roha tu janji ni Debata. 4 Molo togu hita jala pos rohatta tu janjina i, lomo ma roha ni Debata mangida hita.+ Molo lomo rohana tu hita, pos ma rohatta na lao jalootta do pasu-pasu na lao lehononna tu hita.+ 5 Pos situtu do rohatta tu akka na tapaima-ima i.+ Ai nungnga digohi holong ni Debata rohatta* marhite tondi parbadia na dilehon Ibana tu hita.+

6 Ai tikki mardosa* dope hita,+ disi do mate Kristus i. Mate do ibana di tikki naung ditottuhon Debata humokkop halak na mardosa. 7 Adong do ra na olo mate humokkop halak na burju. Alai jarang do adong na olo mate humokkop halak na sittong. 8 Hape mate do Kristus i humokkop hita tikki mardosa dope hita.+ Marhite i ma Debata patuduhon holongna tu hita. 9 Alani i, ala nungnga didok Debata hita mangulahon na sittong marhite mudar ni Kristus i,+ lam pos ma rohatta paluaonna do hita sian rimasna marhite ibana.+ 10 Tikki musuna dope hita, nungnga dibahen hita mardame dohot Debata marhite hamamate ni Anakna i.+ Saonari, nungnga mardame hita dohot Debata. Alani i, pos ma rohatta paluaonna do hita marhite hangoluan ni Anakna i. 11 Alai dang holan i, marlas ni roha do hita ala boi marale-ale tu Debata marhite Tuanta Jesus Kristus. Jala marhite ibana do hita dibahen mardame dohot Debata.+

12 Masuk do dosa i tu portibi on marhite sada jolma jala dosa i parohon hamatean.+ Nungnga rarat hamatean i tu sude jolma, ala nungnga mardosa sude jolma.+ 13 Nungnga adong dosa i di portibi on andorang so adong dope Patik i. Alai molo dang adong patik i, dang boi ditudu manang ise pe mangulahon dosa.+ 14 Nang pe songon i, nungnga marhuaso hamatean i sian tikki ni si Adam sahat tu tikki ni si Musa. Gariada marhuaso do hamatean i tu halak na so mangulahon dosa songon dosa na diulahon si Adam. Jala suman tu si Adam do halak na naeng ro i.+

15 Alai marimbar do silehon-lehon ni Debata tu dosa. Mate do godang halak alani dosa ni sahalak jolma. Alai, asi ni roha ni Debata na massai balga i dohot silehon-lehonna i parohon laba na massai balga tu godang halak.+ Dilehon Ibana do i marhite asi ni roha na massai balga i sian sahalak jolma,+ i ma Jesus Kristus! 16 Asing do hasil ni silehon-lehon ni Debata tu hasil na ro sian dosa ni sahalak jolma.+ Ai gabe mardosa do sude halak alani dosa ni na sahalak i.+ Alai godang do halak didok mangulahon na sittong+ alani silehon-lehon i. Ai ala na godang do jolma mardosa umbahen na dilehon Debata silehon-lehon i. 17 Molo marhuaso do hamatean i gabe raja alani sahalak jolma,+ pos ma rohatta, boi do mangolu akka jolma jala marhuaso gabe raja+ marhite sahalak jolma, i ma Jesus Kristus.+ Ai dapot ni nasida do gok asi ni roha ni Debata na massai balga i, jala dijalo nasida do gok silehon-lehon ni Debata na mambahen nasida didok mangulahon na sittong!+

18 Alani i, dosa ni sahalak jolma boi do mambahen sude halak gabe mardosa.+ Suang songon i ma, alani pambahenan ni sahalak na sittong, boi ma sude jolma+ didok mangulahon na sittong jala mandapot hangoluan.+ 19 Alani sahalak jolma na so mangoloi, gabe godang ma jolma mardosa.+ Suang songon i ma, ala mangoloi do sahalak jolma, boi ma godang halak didok mangulahon na sittong.+ 20 Dilehon do Patik ni si Musa lao pataridahon na godang dosa ni jolma.+ Alai dung lam godang dosa i, lam tamba ma asi ni roha ni Debata na massai balga i. 21 Aha do tujuanna? Songon dosa dohot hamatean na marhuaso gabe raja,+ asi ni roha ni Debata na massai balga i pe marhuaso do gabe raja. Marhite i, boi ma didok akka halak mangulahon na sittong jala mandapot hangoluan na saleleng ni lelengna marhite Jesus Kristus Tuanta i.+

6 Attong songon dia ma dohonotta? Torus ma taulahon dosa asa lam tamba asi ni roha ni Debata na massai balga i? 2 Daong! Nungnga dipalua hita sian dosa,+ alani i dang patut be hita sai mangulahon dosa.+ 3 Manang na so diboto hamu do, sude hita na tardidi di bagasan Kristus Jesus+ nungnga tardidi di bagasan hamateanna?+ 4 Ala nungnga tardidi hita di bagasan hamateanna,+ nungnga dikubur hita rap dohot ibana. Marhite songon i, mangolu ma hita di bagasan ngolu na imbaru, songon Kristus naung mangolu di bagasan ngolu na imbaru+ dung dipahehe sian na mate marhite huaso* ni Amana. 5 Molo nungnga mate hita songon ibana,+ paheheonna do hita songon ibana, jala i ma na mambahen hita marsada dohot ibana.+ 6 Nungnga takkas taboto naung dipakkuhon pangalahotta najolo i rap dohot ibana di hau.+ Alani i, dang marhuaso be+ dagingta na mardosa i jala dang diparhatoban dosa i be hita.+ 7 Ai molo nungnga mate sasahalak, nungnga malua be ibana sian* dosana.

8 Asing ni i, molo mate hita rap dohot Kristus, pos ma rohatta na lao mangolu do hita rap dohot ibana. 9 Taboto do, dung hehe Kristus sian na mate,+ dang na lao mate be ibana+ jala dang marhuaso be hamatean i tu ibana. 10 Ai mate pe ibana, sahali do i sahat tu saleleng ni lelengna lao manesa dosa.+ Alai mangolu do ibana asa boi mangulahon lomo ni roha ni Debata. 11 Songon i ma nang hamu, etong hamu ma naung mate hamu di bagasan dosa. Alai mangolu ma hamu lao mangulahon lomo ni roha ni Debata marhite Kristus Jesus.+

12 Alani i, unang ma loas hamu dosa i marhuaso gabe raja di ngolumuna.+ Unang ma oloi hamu be hisap-hisap ni dagingmuna na boi mate i. 13 Unang ma pasahat hamu dagingmuna* tu dosa. Unang ma pakke dagingmuna i lao mangulahon na sala. Alai pasahat hamu ma dirimuna tu Debata songon halak naung mate jala naung dipahehe sian na mate. Pasahat ma dagingmuna tu Debata jala pakke ma i mangulahon na sittong.+ 14 Unang be loas dosa i mangarajai hamu.* Ai dang di bagasan Patik ni si Musa hamu mangolu,+ alai mangolu do hamu di bagasan asi ni roha ni Debata na massai balga i.+

15 Attong aha ma dohonotta? Ala dang di bagasan Patik ni si Musa hita mangolu, alai mangolu di bagasan asi ni roha ni Debata na massai balga i,+ gabe taulahon ma dosa? Tottu daong! 16 Na so diboto hamu do? Gabe hatoban ni sasahalak do hamu molo dipasahat hamu dirimuna dioloi hamu ibana.+ Alani i, molo hatoban ni dosa do hamu,+ mate ma hamu.+ Alai molo hatoban ni Debata do hamu jala mangoloi Ibana, dohononna ma hamu mangulahon na sittong. 17 Mandok mauliate do au tu Debata. Ai nang pe hatoban ni dosa hian hamu, nungnga dioloi hamu be saonari sian nasa rohamuna akka na diajarhon Debata tu hamu. 18 Ala nungnga dipalua hamu sian dosa,+ gabe hatoban ni Debata ma hamu jala gabe mangulahon na sittong.+ 19 Ai gale do hamu alani dosa. Alani i, hupakke do hata na mura attusan tikki makkatai dohot hamu. Dipasahat hamu do najolo dirimuna gabe hatoban ni na ramun* dohot na jahat, gabe diulahon hamu ma akka na jahat. Alai saonari, pasahat hamu ma dirimuna gabe hatoban ni hasittongan asa badia hamu.+ 20 Ai tikki hatoban ni dosa hamu, dang dituntut hamu ikkon mangulahon na sittong.

21 Aha do laba na dapotmuna tikki hatoban ni dosa hamu? Dapotmuna ma akka na mambahen hamu maila saonari jala parohon hamatean do ujung ni i sude.+ 22 Alai saonari, nungnga dipalua hamu sian dosa jala gabe hatoban ni Debata. Dapotmuna ma hangoluan na badia+ na parohon hangoluan saleleng ni lelengna.+ 23 Ai upa ni dosa* do hamatean.+ Alai silehon-lehon ni Debata do hangoluan na saleleng ni lelengna+ marhite Kristus Jesus Tuanta.+

7 Ale akka dongan, hudok pe hatakkon, ala na huboto do diattusi hamu Patik ni si Musa i. Na so diboto hamu do? Saleleng mangolu do sasahalak dirajai Patik i. 2 Uppamana, didok do di Patik ni si Musa, ikkon rap do sahalak borua naung marhasohotan dohot suamina saleleng mangolu suamina i. Alai molo dung mate suamina i, malua ma ibana sian patik ni suamina i.+ 3 Alai molo muli do borua i tu bawa na asing tikki mangolu dope suamina, na mangalakkup do borua i disi.+ Alai molo dung mate suamina, malua ma ibana sian patik ni suamina i. Boi ma ibana muli tu bawa na asing jala dang mangalakkup ibana disi.+

4 Songon i ma na masa tu hamu akka dongan. Nungnga mate hamu di bagasan Patik i marhite daging ni Kristus. Alani i, boi ma hamu gabe appuna+ ni Kristus naung dipahehe sian na mate,+ jala boi ma hita pasangappon Debata.+ 5 Najolo tikki taihutton hisap-hisap ni dagingta, Patik i ma na patuduhon molo hisap-hisap na sala i mambahen dagingta* mardosa, jala dosa i parohon hamatean.+ 6 Alai nungnga mate be hita di bagasan Patik ni si Musa,+ alani i nungnga malua be hita saonari sian Patik i. Dang hatoban na mangihutton patik na tarsurat i be hita,+ alai gabe hatoban ni Debata ma hita na mangihutton tondi parbadia.+

7 Attong, aha ma dohonotta? Na so denggan* do Patik ni si Musa i? Daong! Sasittongna, dang huboto dosa molo dang adong Patik i.+ Uppamana molo dang diparettahon di patik i, “Unang ma tubu di roham lao mambuat appuna ni halak,”+ dang huboto na sala i. 8 Alai alani paretta na di patik i, gabe adong ma dalan ni dosa i lao mambahen tubu tu rohakku lao mambuat appuna ni halak na asing. Ai andorang so adong paretta i, mate do dosa i.+ 9 Sasittongna, nungnga mangolu au andorang so adong patik i. Alai dung adong paretta na di patik i gabe mangolu ma dosa i jala mate ma au.+ 10 Sasittongna manogu-nogu tu hangoluan do nian paretta i,+ alai gabe tu hamatean do i di au. 11 Alani patik i, gabe adong ma dalan ni dosa i lao manggoda au jala pamatehon au marhite paretta i. 12 Badia do Patik ni si Musa i, jala paretta i pe badia do, sittong, jala denggan.+

13 Molo songon i, na denggan i do na mambahen au mate? Daong! Alai dipakke dosa i do na denggan i+ lao pamatehon au. Alani i, takkas ma tarida songon dia dosa i. Paretta i patuduhon, jahat situtu do dosa i.+ 14 Taboto do na sian Debata Patik ni si Musa i. Alai anggo au, jolma na gabe hatoban ni* dosa do.+ 15 Sasittongna, dang huattusi aha na huulahon. Ai sogo ni rohakku do na huulahon, dang lomo ni rohakku. 16 Nang pe dang huulahon lomo ni rohakki, alai didok rohakku denggan do Patik ni si Musa i. 17 Alani i, dang au na mangulahon i, alai dosa na di bagasan dirikki do.+ 18 Huboto do dang adong na denggan di au manang di dagingkon. Naeng huulahon do nian na denggan, alai dang tarulahon au i.+ 19 Ai lomo do rohakku mangulahon na denggan, alai dang i na huulahon. Sogo do rohakku tu na jahat, alai i do na huulahon. 20 Alani i, molo huulahon do sogo ni rohakki, dang au na mangulahon i. Alai dosa na di bagasan dirikki do.

21 Alani i, on ma na huhilala: Tikki naeng huulahon na sittong, sai na jahat i do na adong di au.+ 22 Di bagasan rohakku, massai lomo do rohakku tu patik ni Debata.+ 23 Alai huida, adong do patik na asing na mangarajai* dagingku, i ma patik ni dosa.+ Maralo do patik i tu patik ni Debata na adong di rohakku.+ 24 Tung jolma na dangol do au. Ise ma na boi paluahon au sian daging na parohon hamatean on? 25 Mauliate ma tu Debata na paluahon au marhite Jesus Kristus Tuanta! Hatoban ni patik ni Debata do anggo rohakku, alai hatoban ni patik ni dosa do anggo dagingku.+

8 Alani i, dang hona hukum be halak na marsada dohot Kristus Jesus. 2 Sasittongna, patik ni tondi parbadia i do na mangalehon hangoluan tu hamu asa boi hamu marsada dohot Kristus Jesus.+ Patik i ma na paluahon hamu sian patik ni dosa dohot patik ni hamatean. 3 Dang marhuaso Patik ni si Musa paluahon hamu.+ Ai gale do jolma i+ jala gok dosa. Disuru Debata ma Anakna i+ gabe jolma lao manesa dosa.+ Marhite songon i, dihukum Debata ma dosa ni jolma. 4 Boi do hita mangulahon na sittong mangihutton patik i+ molo taihutton panogu-noguon ni tondi parbadia,+ dang mangihutton lomo ni roha ni dagingta. 5 Ai halak na mangihutton lomo ni roha ni dagingna, holan lomo ni roha ni dagingna do na dipikkiri.+ Alai halak na mangolu mangihutton panogu-noguon ni tondi parbadia, akka na hombar tu panogu-noguon ni tondi parbadia do dipikkiri i.+ 6 Molo holan lomo ni roha ni dagingna do na sai dipikkiri sasahalak, parohon hamatean do i.+ Alai molo na hombar tu panogu-noguon ni tondi parbadia do na dipikkiri sasahalak, parohon hangoluan do i dohot hadameon.+ 7 Gabe musu ni Debata+ do halak na sai mamikkirhon lomo ni roha ni daging. Ai dang dioloi ibana patik ni Debata, jala sasittongna dang tarulahon ibana i. 8 Alani i, halak na mangihutton lomo ni roha ni daging, dang boi mambahen las roha ni Debata.

9 Molo adong tondi parbadia ni Debata di bagasan dirimuna,+ pasti diihutton hamu do panogu-noguon ni tondi parbadia i. Jala dang olo hamu mangihutton lomo ni roha ni daging. Alai molo dang adong pikkiran ni Kristus di sasahalak, dang appuna ni Kristus ibana. 10 Mate do daging alani dosa. Alai molo marsada hamu dohot Kristus,+ lehonon ni tondi parbadia do tu hamu hangoluan, ala nungnga didok Debata hamu mangulahon na sittong. 11 Dipahehe Debata do Kristus Jesus sian hamatean+ marhite tondi parbadia. Molo adong tondi parbadia ni Debata di hamu, paheheonna do dagingmuna na boi mate i+ marhite tondi parbadia.

12 Alani i akka dongan, adong do na ikkon taulahon, alai dang mangihutton lomo ni roha ni daging na ikkon taulahon i.+ 13 Molo diihutton hamu do lomo ni roha ni daging, mate ma hamu. Alai mangolu+ ma hamu molo dipamate hamu pangalahomuna na mardosa i.+ Paloas hamu ma tondi parbadia mangurupi hamu mangulahon i. 14 Ai akka anak ni Debata+ do sude halak na ditogu-togu tondi parbadia. 15 Dang bahenon ni tondi parbadia hita gabe hatoban manang gabe mabiar. Alai marhite tondi parbadia, bahenonna do hita gabe anak ni Debata. Jala marhite tondi parbadia, taronjar ma rohatta mandok, “Abba,* ale Amang!”+ 16 Tondi parbadia i ma na paposson rohatta+ molo hita anak ni Debata.+ 17 Molo nungnga gabe anak ni Debata hita, dohot ma hita manjalo warisan sian Debata+ rap dohot Kristus. Jala molo marsitaonon do hita rap dohot Kristus,+ rap ma hita dipasangap dohot ibana.+

18 Ninna rohakku, dang sadia dope sitaononta saonari martimbakkon tu hasangapon na lao patuduon ni Debata marhite hita.+ 19 Sude do toppaan i marsitutu paimahon andigan Debata patuduhon naung dijalo akka anakna i upa na massai balga i.+ 20 Dibahen Debata do tunduk sude toppaan i tu hangoluan na so marguna.+ Dang alani lomo ni roha ni nasida sandiri mangulahon i, alai alani lomo ni roha ni Debata do. Nang pe songon i, dilehon Debata do janji on tu nasida: 21 Na lao dipalua do sude toppaan ni Debata+ asa unang gabe hatoban ni dosa dohot hamatean be nasida. Malua ma nasida jala mandapot hasangapon songon na dilehon tu akka anak ni Debata. 22 Ai taboto do, marhoi-hoi* jala manaon hasusaan do sude toppaan ni Debata sahat tu saonari. 23 Dang holan nasida na marhoi-hoi, alai dohot do hita, nang pe hita na parjolo manjalo tondi parbadia, i ma warisanta* i. Jala marhoi-hoi+ do hita huhut paimahon na lao bahenon ni Debata hita gabe anakna.+ Paluaonna ma hita sian dagingta na mardosa marhite tobusan. 24 Ala na adong do janji i umbahen na dipalua hita. Alai molo dung taida saut janji i, dang tapaima-ima be i. Ai molo dung saut janji i, ise be na paimahon i? 25 Molo dang saut+ dope na tapaima-ima i,+ tottu sabar+ do hita paimahon i.

26 Asing ni i, urupan ni tondi parbadia do hita tikki gale hita.+ Taboto do na porlu hita martangiang, alai olo do sipata dang taboto aha na lao tatangiakkon. Molo dang taboto sidohonotta, di tikki i ma tondi parbadia mangurupi hita paboahon na di bagasan rohatta tu Debata. 27 Jala botoon ni Debata do aha na dipangido tondi parbadia i. Ai Ibana do na mamboto roha ni sude jolma.+ Ala akka na badia do na ditangiakkon tondi parbadia i jala hombar do i tu lomo ni roha ni Debata.

28 Taboto do, taratur do dibahen Debata sude ulaonna asa boi parohon na denggan tu akka na makkaholongi Ibana, i ma akka na tarjou hombar tu lomo ni roha ni Debata.+ 29 Nasida do na parjolo diparrohahon Ibana jala nungnga ditottuhon sian mulana asa boi nasida sarupa dohot Anakna i.+ Alani i, gabe Anakna i ma siakkangan+ sian sude haha anggina.+ 30 Asing ni i, akka naung ditottuhon Ibana sian mulana i+ do akka na dijou Debata.+ Jala akka na dijou i, didok do mangulahon na sittong.+ Ujungna, dilehon Ibana ma hasangapon+ tu akka halak na didok mangulahon na sittong i.

31 Attong aha ma na boi dohonotta taringot tu sudena on? Molo Debata do donganta, ise ma na boi mangalo hita?+ 32 Dang diabbati Debata Anakna i manaon sitaonon, alai dipasahat Ibana do Anakna i lao dipamate humokkop hita.+ Molo songon i, pasti las do roha ni Debata dohot Anakna i kan mangalehon sude na asing i tu hita? 33 Ai ise ma na boi manudu akka na pinillit ni Debata?+ Dang adong na boi manudu nasida mangulahon na sala. Ai Debata do na mandok nasida mangulahon na sittong.+ 34 Ai ise ma na boi mandok nasida marsala? Dang adong! Ai nungnga mate Kristus Jesus jala nungnga dipahehe sian hamatean. Saonari, nungnga hundul ibana di sabola kanan ni Debata+ lao mambahen pangidoan tu Debata taringot tu hita.+

35 Ise ma na boi manirang hita sian holong ni Kristus i?+ Boi do hasusaan, arsak ni roha, sitaonon alani haporseaon, haraparon, hapogoson,* parmaraan, ancaman, dohot podang manirang hita sian holong ni Kristus?+ 36 Songon hata ni na tarsurat i, “Alani Ho, naeng dibunu do hami ganup tikki. Ai dibahen do hami songon biru-biru na lao diseat.”+ 37 Alai marhite pangurupion ni Kristus na makkaholongi hita, boi do hita monang mangadopi sudena i.+ 38 Ai pos do rohakku, hamatean, hangoluan, manang suru-suruan, manang pamaretta, akka na adong saonari manang na adong di ari na naeng ro, huaso,+ 39 akka na adong di ginjang manang akka na adong di toru, manang toppaan na dia pe, dang adong na boi manirang hita sian holong ni Debata, na takkas tarida marhite Kristus Jesus Tuanta.

9 Siihutton Kristus do au, jala ditogu-togu tondi parbadia do panggora ni rohakku. Alani i, huhatahon do na sittong jala dang margabus au tikki hudok, 2 marsak jala massai lungun do rohakku. 3 Rade do au disirang sian Kristus i songon halak na hona bura molo boi do i parohon na denggan tu akka haha anggikku, i ma dongan sabangsokku, 4 halak Israel. Dibahen Debata do nasida gabe anakna.+ Dilehon do tu nasida hasangapon, akka parjanjian,+ Patik ni si Musa,+ akka janji,+ jala boi manomba Debata di bagas joro.+ 5 Pinoppar ni akka ompu na tarbarita i do nasida+ jala sian pinoppar ni nasida do ro Kristus.+ Sai anggiat ma dipuji saleleng ni lelengna Debata na marhuaso di saluhut. Amen.

6 Alai dang na gabe so saut hata ni Debata. Ai dang sude sian pinoppar ni Israel i, halak Israel na sittong.+ 7 Nang pe sude nasida pinoppar ni si Abraham,+ alai dang sude nasida anak ni si Abraham. Adong do tarsurat, “Ai sian si Isak do pinoppar* na dijanjihon i tu ho.”+ 8 Alani i, dang sude anak ni si Abraham gabe anak ni Debata.+ Alai Debata do na mamillit nasida hombar tu janjina i,+ asa boi nasida didok gabe pinoppar ni si Abraham. 9 On ma isi ni janji i, “Di tikki sisongon on, ro dope Au muse jala tubuhonon ni si Sara ma sada anak.”+ 10 Dang holan i, alai marjanji do muse Debata tikki naeng ditubuhon si Rebekka anakna na kembar i, na sian si Isak, omputta.+ 11 Andorang so tubu dope anakna i, manang andorang so diulahon dope na denggan manang na jahat, nungnga didok Debata hian ise na lao pillitonna. Ai hombar tu lomo ni rohana do Debata mamillit, dang mangihutton na niulahon ni jolma. 12 Nungnga didok Debata tu si Rebekka, “Siakkangan ma na gabe hatoban ni sianggian.”+ 13 Songon na didok di na tarsurat i, “Si Jakkob do na huhaholongi, jala sogo do rohakku tu si Esau.”+

14 Attong aha ma sidohonotta? Na so adil do Debata? Dang songon i!+ 15 Didok Debata do tu si Musa, “Patuduhonokku do haburjuon dohot asi ni roha tu akka halak na hupillit. Jala patuduhonokku do holong ni rohakku tu halak na hupillit.”+ 16 Alani i, dang mangihutton lomo ni roha ni jolma manang ulaon ni jolma umbahen na tarpillit sasahalak. Alai Debata parasi roha i+ do na mamillit. 17 Ai didok na tarsurat i do tu si Firaun, “Hupasombu dope ho mangolu, asa hupatudu huasokku jala asa ditanda sude halak goarhu di sude liat portibi on.”+ 18 Alani i, patuduon ni Debata do asi ni rohana tu manang ise na dihalomohon rohana. Alai pasombuonna do jogal roha ni na asing i.+

19 Saonari dohononmuna ma tu au, “Boasa dope disalahon Debata jolma i? Ai adong huroa na boi mangalo lomo ni rohana?” 20 Ai ise ma huroa hamu, umbahen na barani hamu makkatai mangalo Debata?+ Ai boi huroa dohonon ni hudon tano tu na mambahen hudon i, “Boasa songon on au bahenonmu?”+ 21 Ai marhak do kan sitopa hudon mambahen sanggomak tano liat+ lao gabe barang na dipakke tu na sangap, jala mambahen na sada nai tu na hurang sangap? 22 Suang songon i ma Debata tu akka halak na jahat na dipatudos songon hudon tano na lao diropukkon i. Naeng patuduonna do rimasna dohot huasona tu akka halak na jahat i. Alai sabar do Ibana tu halak sisongon i nang pe naung ditottuhon nasida lao diripasson. 23 Dibahen Debata pe songon i, asa tarida do hasangaponna na balga i tu akka jolma na tama mandapot asi ni rohana.+ Jala dipatudos do halak sisongon i tu barang na diparade tu na sangap. 24 Hita ma akka barang i. Ai dipillit* Debata do hita sian tonga-tonga ni halak Jahudi dohot sian bangso na asing.+ 25 Songon hata ni Debata di bukku Hosea, “Dohonokku ma na so bangsokku+ gabe ‘bangsokku’. Jala borua na so huhaholongi, dohonokku ma ‘na huhaholongi’.+ 26 Najolo, hea do di sada inganan hudok tu nasida, ‘Dang bangsokku be hamu,’ laos disi ma nasida dijou ‘akka anak ni Debata na mangolu i’.”+

27 Didok si Jesaya do taringot tu halak Israel, “Nang pe songon godang ni pasir di topi ni laut godang ni halak Israel, alai holan saotik do nasida na selamat.+ 28 Ai na lao diuhumi Jahowa* do sude halak na di portibi on. Hatop do i bahenonna jala hatop do i sae.”+ 29 Didok si Jesaya do muse, “Molo dang ditadikkon Jahowa,* Pamimpin ni Akka Tentara* i pinoppar di hita, pasti nungnga songon Sodom hita jala pasti nungnga songon Gumora hita.”+

30 Attong aha ma na boi dohonotta? Nang pe dang marsitutu akka bangso na asing mangulahon na sittong,+ alai didok do nasida mangulahon na sittong alani haporseaon ni nasida.+ 31 Hape halak Israel, marsitutu do nasida mangulahon Patik i asa boi nasida didok mangulahon na sittong. Alai dang boi diulahon nasida sude na di patik i. 32 Boasa songon i? Ala marsitutu do nasida asa didok mangulahon na sittong marhite pambahenan ni nasida, dang marhite haporseaon. Alani i, tartuktuk ma nasida dibahen “batu na mambahen tartuktuk”.+ 33 Songon hata ni na tarsurat i, “Hupeakkon do di Sion batu+ na mambahen halak tartuktuk, jala na mambahen halak madabu. Alai manang ise na porsea tu ibana dang gabe maila.”+

10 Ale akka dongan, lomo do rohakku asa selamat halak Israel jala hutangiakkon do i tu Debata.+ 2 Boi ma hudok, marsitutu do nasida marhobas tu Debata,+ alai dang diihutton nasida parbinotoan na sittong taringot tu Debata. 3 Ai dang diboto nasida aha na mambahen sasahalak sittong di jolo ni Debata.+ Alai marsitutu do nasida patuduhon na sittong nasida mangihutton cara ni nasida sandiri.+ Alani i, dang diulahon nasida hukum ni Debata na tigor.+ 4 Dang marlakku be Patik i,+ ai nungnga digohi Kristus be Patik i. Alani i, sude halak na porsea boi ma didok mangulahon na sittong di jolo ni Debata.+

5 Hea do disurat si Musa taringot tu halak na didok mangulahon na sittong ala mangulahon Patik i, “Manang ise na mangulahon patik, mangolu ma ibana.”+ 6 Alai songon on do Hata ni Debata taringot tu halak na didok mangulahon na sittong alani haporseaon, “Unang ma didok hamu di bagasan rohamuna,+ ‘Ise do na ikkon nakkok tu banua ginjang?’+ lapatanna lao mamboan Kristus i turun, 7 manang, ‘Ise ma ikkon turun tu lombang na massai bagas?’*+ lapatanna lao mamboan Kristus sian tonga-tonga ni akka na mate.” 8 Aha do didok na tarsurat i? Na tarsurat i mandok, “Jonok do hata i tu hamu, di pamangan dohot di rohamuna sandiri do i”.+ Lapatanna, “hata” na dijalo marhite haporseaon jala na tabaritahon nuaeng. 9 Ai molo dibaritahon hamu marhite pamanganmuna, Jesus i Tuanmuna,+ jala molo marhaporseaon hamu naung dipahehe Debata Kristus i sian na mate, malua ma hamu. 10 Ai molo dipatudu hamu haporseaonmuna na sian roha i boi ma hamu didok mangulahon na sittong. Jala molo dipaboa hamu haporseaonmuna i tu na asing+ boi ma hamu selamat.

11 Ai didok do di na tarsurat i, “Manang ise na porsea tu ibana dang gabe maila.”+ 12 Ai dang adong imbar ni halak Jahudi dohot halak Junani.+ Sarupa do Tuan ni sude. Burju do Ibana mangurupi sude halak na manjou Ibana. 13 Ai “malua do ganup halak na manjou goar ni Debata, i ma Jahowa”.*+ 14 Alai songon dia ma nasida manjou goarna molo so porsea dope nasida tu Ibana? Jala songon dia ma nasida boi porsea molo so hea dope dibege nasida taringot tu Ibana? Jala songon dia ma nasida boi mambege molo so adong na mambaritahon? 15 Dung i, ise ma na lao marbarita molo so adong na manuru?+ Songon na didok di na tarsurat i, “Las situtu do roha mangida halak* na mardalan mamboan barita na uli!”+

16 Nang pe songon i, dang sude halak olo manjalo barita na uli. Ai hea do didok si Jesaya, “Ale Jahowa,* ise do na porsea tu barita na pinaboanami?”*+ 17 Alani i, ikkon jolo dibege sasahalak do barita i asa boi ibana porsea.+ Jala begeonna ma i molo dung adong na mambaritahon taringot tu Kristus. 18 Alai husukkun ma jo hamu: Tutu do dang dibege nasida hata i? Sasittongna, dibege do. Ai tarsurat do, “Sahat do barita ni nasida tu liat portibi on, jala sahat do hata ni nasida tu ujung ni portibi on.”+ 19 Husukkun ma hamu muse: Na so diboto halak Israel do i?+ Sasittongna, diboto do. Ai nungnga parjolo dipaboa si Musa hata ni Debata na mandok, “Bahenokku ma hamu cemburu tu akka jolma na sian bangso na asing. Jala bahenokku ma hamu muruk marhite sada bangso na oto.”+ 20 Alai barani do si Jesaya pasahatton hata ni Debata na mandok, “Akka halak na so mangalului Au juppangna do Au.+ Jala halak na so manukkun taringot tu Au tandaonna do Au.”+ 21 Jala didok do muse taringot tu halak Israel, “Ganup ari do hutogihon* bangso na mangalo jala na jogal roha i+ asa mulak tu Au.”

11 Husukkun ma hamu muse, na so olo be Debata manjalo bangsona i?+ Dang songon i! Ai au pe, halak Israel do au, pinoppar ni si Abraham sian marga Benjamin. 2 Dang na so dijalo Debata bangsona i, i ma bangso na parjolo sahali dipillit Ibana.+ Na so diboto hamu do ayat na mandok taringot tu si Elia na mangalu-alu tu Debata taringot tu halak Israel? 3 Ai didok si Elia do, “Ale Jahowa,* nungnga dipamate nasida akka panurirangmi,* jala nungnga diruppakkon akka langgatanmi. Holan au nama na mangolu. Jala saonari, dilului nasida do au asa pamateonna.”+ 4 Alai aha ma didok Debata tu si Elia? “Adong dope di tonga-tonga ni bangsokki 7.000 halak nai na so olo marsomba tu patung ni Baal.”+ 5 Dos songon i ma, saonari pe adong dope halak Israel na tinggal,+ naung dipillit Debata alani asi ni rohana na massai balga i. 6 Alani i, dipillit do nasida alani asi ni roha ni Debata na massai balga i,+ dang alani parniulaon ni nasida.+ Molo alani parniulaon do nasida dipillit, dang tutu be i asi ni roha ni Debata na massai balga i.

7 Attong songon dia ma dohonotta? Dang dapot ni halak Israel be akka na massai dihalomohon roha ni nasida. Gabe halak na tarpillit i do na mandapot i.+ Jala na deba nai dipajogal do rohana.+ 8 Songon na didok di na tarsurat i, “Dibahen Debata do nasida renges modom.*+ Dilehon Debata do tu nasida mata na so boi marnida dohot pinggol na so boi mambege sahat tu sadari on.”+ 9 Didok si Daud do muse, “Sai gabe jorat ma pesta ni nasida i, gabe tartuktuk ma nasida bahenon ni i, tarjorat, jala gabe panguhuman ma i di nasida. 10 Bahen ma golap mata ni nasida asa unang boi nasida marnida. Jala bahen ma borat sitaonon* ni nasida.”+

11 Alani i, husukkun ma hamu muse, na tartuktuk do nasida? Manang na madabu do nasida jala dang boi jongjong? Dang songon i! Alai na mardosa do nasida. Ujungna, boi ma bangso na asing selamat, jala on ma na mambahen nasida gabe cemburu.+ 12 Saonari molo parohon pasu-pasu do dosa ni nasida tu portibi on, jala molo parohon pasu-pasu do tu bangso na asing bilangan ni nasida naung moru i, tottu dang binoto be godang ni pasu-pasu na lao dilehon molo parsidohot sude halak Jahudi i dohot bangso na asing i!+

13 Saonari, makkatai ma au tu hamu akka halak na ro sian bangso na asing. Ai disuru do au gabe apostel tu akka bangso na asing,+ jala arga do di au ulaonku marhobas tu Debata.+ 14 Marsitutu do au mambahen cemburu dongan sabangsokku mangida aha na dijalo hamu, asa boi selamat deba sian nasida. 15 Ai tikki dibolokkon+ Debata nasida, boi ma akka halak na di portibi on gabe mardame dohot Debata. Alai songon dia ma molo dijalo Debata muse halak Jahudi i? Tottu gabe songon halak na mate naung mulak mangolu ma i. 16 Molo badia do sabagian adonan ni topung na dipelehon songon hasil panen na parjolo i, tottu badia ma sude adonan i. Jala molo badia do urat ni sada hau, badia do nang dakkana.

17 Alai molo diponggol deba sian dakka ni hau jetun i, dicangkok ma dakka ni hau jetun tombak tusi. Hamu do dakka ni hau jetun tombak i. Alani i, molo dicangkok hamu tu hau jetun i, dohot ma hamu mandapot laba sian urat ni hau jetun i. 18 Unang ma dirippu hamu na dumenggan hamu sian* dakka ni hau na asing i. Molo songon i pikkiranmuna,+ ingot ma, dang hamu na mangalehon mangan urat ni hau i. Alai urat ni hau i do na mangalehon hamu mangan. 19 Dohononmuna ma, “Diponggol do dakka ni hau i asa adong inganakku.”+ 20 Tutu do i! Diponggol do nasida ala dang porsea.+ Alai anggo hamu, toktong do adong di hau i ala porsea do hamu.+ Alani i, unang ma ginjang rohamuna, alai manat ma hamu. 21 Ai haru dakka ni hau jetun i* diponggolhon Debata do. Lam hamu ma, ponggolonna do hamu molo dos pangalahomuna songon nasida. 22 Saonari, parrohahon ma songon dia burju ni Debata+ jala songon dia Ibana manghukum. Dihukum Ibana do akka halak na madabu i, ai dang porsea nasida.+ Alai burju do Ibana tu hamu, molo toktong dipatudu hamu na tama hamu manjalo haburjuonna i. Molo dang, dohot do hamu ponggolonna. 23 Alai nang pe songon i, molo porsea do nasida, paulakon ni Debata do nasida muse tu ingananna hian.+ Ai boi do Debata mangulahon i. 24 Diponggolhon do hamu sian hau jetun tombak jala dicangkok tu hau jetun na di ladang. Sasittongna dang somal songon i diulahon. Alai molo boi do dibahen Debata songon i, tottu boi do paulakon ni Debata dakka ni hau jetun i tu hauna hian!

25 Ale akka dongan, lomo do rohakku naeng botoonmu rahasia na badia+ on, asa unang didok rohamuna naung marbisuk hamu: Toktong do jogal roha ni deba sian halak Israel i sahat tu na pungu sude bilangan ni akka halak na sian bangso na asing. 26 Jala marhite i do sude halak Israel+ boi malua. Songon hata ni na tarsurat i, “Ro do Sipalua sian Sion+ jala bahenonna ma pinoppar ni si Jakkob muba sian hajahaton ni nasida. 27 Songon i ma parjanjian na lao bahenokku tu nasida+ molo dung husesa dosa ni nasida.”+ 28 Tutu, gabe musu ni Debata do nasida ala dang dijalo nasida barita na uli. Jala parohon laba do i tu hamu. Alai, alani janji ni Debata tu akka ompu ni nasida, dipillit do nasida gabe halak na dihaholongi Ibana.+ 29 Ai dang na lao muba roha ni Debata tu akka halak naung dijou i dohot tu silehon-lehon na lao lehononna tu nasida. 30 Najolo, dang dioloi hamu Debata.+ Alai saonari, ala mangalo+ halak Jahudi i gabe dipatuduhon Debata ma asi ni rohana+ tu hamu. 31 Alani i, gabe dipatuduhon Debata ma asi ni rohana tu hamu ala nungnga mangalo nasida. Dibahen Ibana pe songon i, asa boi do muse dipatuduhon Debata asi ni rohana tu nasida. 32 Ai nungnga dibahen Debata nasida songon tahanan ala dang mangoloi roha ni nasida.+ Marhite songon i, boi ma patuduon ni Debata asi ni rohana tu nasida sude.+

33 Tung godang situtu do pasu-pasu na sian Debata! Bagas situtu do bisukna dohot parbinotoanna! Dang adong na boi mangattusi cara ni Ibana manguhumi, jala dang adong na boi takkas patorakkon akka ulaonna! 34 Songon hata ni na tarsurat i, “Ise ma na mamboto pikkiran ni Jahowa?* Ise ma na boi mangalehon poda tu Ibana?”+ 35 Jala “Ise ma na hea parjolo mangalehon manang aha tu Debata umbahen na ikkon balosonna i?”+ 36 Ai sian Ibana do saluhutna, marhite Ibana do adong i, jala lao di Ibana do i. Sai anggiat ma dipasangap Ibana saleleng ni lelengna. Amen.

12 Alani i, hamu ale akka dongan, alani asi ni roha ni Debata, hupangido ma tu hamu: Pelehon hamu ma dirimuna+ gabe pelean na mangolu, na badia,+ jala na palasson roha ni Debata. Marhobas ma hamu tu Ibana sian nasa pikkiranmuna.+ 2 Jala unang be tiru hamu akka halak na di portibi* on. Alai muba ma hamu marhite paubahon pikkiranmuna,+ asa takkas diboto hamu+ lomo ni roha ni Debata na denggan, na sittong, jala na palasson rohana.

3 Alani asi ni roha ni Debata na massai balga na nilehonna tu au, hupaboa ma tu hamu sude: Unang ma didok rohamuna na massai penting dirimuna.+ Alai marbisuk ma hamu hombar tu haporseaon na dilehon Debata tu hamu ganup marsada-sada.+ 4 Songon dagingta on, godang do bagian-bagianna.+ Jala ganup bagian, marasing-asing do ulaonna. 5 Songon i ma nang hita, nang pe godang hita alai sada daging do hita. Ai marsada do hita di bagasan Kristus. Hita sude ma akka bagian-bagian ni daging i jala ikkon marsiurupan do hita.+ 6 Alani asi ni roha ni Debata na massai balga i, dilehon do tu hita marragam silehon-lehon.*+ Alani i, molo tadapot do silehon-lehon lao manurirangi, tapaboa ma i hombar tu haporseaon naung tajalo. 7 Molo dilehon tu hita gogo lao mangurupi, toktong ma hita mangurupi. Molo tadapot do silehon-lehon lao mangajari, toktong ma hita mangajari.+ 8 Molo silehon-lehon lao mamodai* do dilehon, toktong ma ibana mamodai.+ Molo lao mangalehon do dapotna, toktong ma ibana mangalehon sian las ni rohana.+ Molo silehon-lehon lao mamimpin do dapotna, ringgas ma ibana mangulahon i.+ Molo silehon-lehon lao marasi ni roha do dapotna, toktong ma ibana marlas ni roha mangulahon i.+

9 Patudu hamu ma holongmuna sian nasa roha.+ Ikkon sogo do rohamuna mangida na jahat,+ jala ikkon holong do rohamuna tu* na denggan. 10 Haholongi ma na asing songon makkaholongi haha anggim. Jala parjolo ma hamu pasangappon halak na asing.+ 11 Ringgas ma hamu, unang malas,+ loas ma tondi parbadia mambahen lam ringgas* hamu,+ jala gabe hatoban ni Jahowa* ma hamu.+ 12 Marlas ni roha ma hamu alani akka na lao jaloonmuna di ari na naeng ro. Sabar ma hamu jala togu tikki masa sitaonon.+ Toktong ma martangiang.+ 13 Lehon ma akka na porlu tu akka na badia.+ Lului hamu ma cara lao patuduhon burju ni roha.+ 14 Toktong ma pangido hamu asa dipasu-pasu Debata halak na mambahen na haccit tu hamu.+ Jala unang ma hatahon hamu akka na so denggan tu* nasida.+ 15 Marlas ni roha ma hamu dohot halak na marlas ni roha, jala tangis ma hamu dohot halak na tangis. 16 Sarihon hamu ma halak na asing dos songon hamu manarihon dirimuna. Unang ma ginjang rohamuna. Alai marserep ni roha ma hamu+ jala unang ma didok rohamuna na ummalo hamu sian na asing.+

17 Tikki dibahen sasahalak na jahat tu hamu,+ unang ma balosson na jahat tu ibana. Alai marsitutu ma hamu mambahen na denggan tu* sude jolma. 18 Molo boi dope, bahen hamu ma sian nasa tolapmuna lao mardame tu sude halak.+ 19 Ale akka dongan, unang ma balosson hamu sogo ni rohamuna. Alai pasombu ma Debata patuduhon rimasna tu halak na mangulahon na jahat.+ Ai tarsurat do “‘Au do na marhak mambalos. Balosokku do hajahaton ni nasida,’ ninna Jahowa.”*+ 20 Alai “molo male musum,* lehon ma ibana mangan, molo mauas, lehon ma ibana minum. Molo dibahen ho songon i, gabe salpu ma murukna jala lambok ma rohana”.*+ 21 Unang ma olo ho ditaluhon na jahat, alai toktong ma taluhon na jahat i marhite na denggan.+

13 Ikkon unduk do sude halak tu pamaretta,+ ai dang adong huaso na so ro sian Debata.+ Jala Debata do na mambahen pamaretta adong di ingananna be.+ 2 Manang ise na mangalo tu pamaretta na mangalo aturan ni Debata do i. Jala hona hukum do halak na mangalo aturan i. 3 Halak na mangulahon na jahat do na mabiar tu pamaretta, dang halak na mangulahon na denggan.+ Alani i, asa unang mabiar hamu tu pamaretta, toktong ma ulahon na denggan.+ Molo diulahon hamu i, pujion ni nasida ma hamu. 4 Ai parhobas ni Debata do pamaretta i jala parohon na denggan do ulaon ni nasida tu hamu. Alai molo diulahon hamu na jahat, mabiar ma hamu. Ai marhuaso* jala marhak do nasida lao manghukum halak na mangulahon na sala. Ai akka parhobas ni Debata do nasida lao manghukum akka parjahat.

5 Akka i ma alasanna umbahen na dioloi hamu pamaretta. Dang holan alani na mabiar hamu dihukum, alai dohot do alani panggora ni rohamuna.+ 6 Alani i do umbahen na ikkon digarar hamu pajak. Ai parhobas ni Debata do nasida na torus mangurupi godang jolma. 7 Lehon hamu ma tu pamaretta aha na gabe hak ni nasida. Garar ma pajak tu na manjalo pajak.+ Molo adong dipangido sigararonmuna, garar hamu ma i. Habiari ma halak na patut dihabiari.+ Pasangap ma halak na patut dipasangap.+

8 Unang ma marutang hamu tu manang ise pe, alai masihaholongan ma hamu.+ Ai molo dihaholongi sasahalak donganna nungnga diulahon ibana Patik.+ 9 Ai didok do di patik i, “Unang hamu mangalakkup,+ unang hamu mambunu,+ unang hamu manakko,+ unang halomohon appuna ni halak,”+ jala sude paretta na adong i nungnga dipasada di bagasan patik on, “Ikkon haholonganmu do donganmu jolma doshon dirim.”+ 10 Molo holong roha ni sasahalak tu donganna, dang ulahononna na jahat tu donganna i.+ Alani i molo dihaholongi sasahalak donganna, nungnga diulahon ibana patik i.+

11 Ulahon hamu ma i sude, ala diboto hamu do di tikki na songon dia hita nuaeng mangolu. Saonari ma tikkina dungo,+ ai nungnga unjonok be nuaeng haluaotta i sian tikki baru gabe siihutton Kristus hita. 12 Nungnga naeng salpu borngin, nungnga naeng tiur ari. Tatadikkon ma akka ulaon na diulahon di na holom,+ jala tapakke ma baju porang* na dipakke di na tiur.+ 13 Marpangalaho na denggan ma hita+ songon pangalaho ni halak di tikki arian. Unang ma mabuk, unang ma marpestai sahat tu na mabuk,* unang ma mangulahon seks na so patut* dohot ulaon ni na so umboto ila,*+ unang ma marbadai, jala unang ma marlate ni roha.+ 14 Alai tiru ma Tuan Jesus Kristus,+ jala unang ma marsakkap hamu lao mangulahon hisap-hisap ni daging na mardosa.+

14 Jalo hamu ma halak na gale haporseaonna,+ jala unang ma uhumi hamu ibana molo asing pandapotna sian hamu.* 2 Adong do halak na mangallang sude ragam ni sipanganon ala togu haporseaonna. Alai na asing holan mangallang sayur do ala gale haporseaonna. 3 Dang boi leas roha ni halak na boi mangallang sude ragam ni sipanganon i tu halak na so boi mangallang sipanganon i. Jala halak na so boi mangallang sude ragam ni sipanganon i, unang ma manguhumi halak na mangallang i.+ Ai dijalo Debata do nasida sude. 4 Ai ise ma hamu umbahen na diuhumi hamu hatoban ni halak na asing?+ Tuanna sandiri do na manottuhon na sittong hatoban i manang na sala.+ Gariada molo diurupi Jahowa* ibana, boi do ibana didok mangulahon na sittong.

5 Adong do na mandok, uppetting do ari na sada sian ari na asing.+ Alai adong do na mandok sarupa do sude ari i.+ Alani i, ikkon pos do roha ni ganup halak tu na pinillitna. 6 Manang ise na mandok uppetting ari na sada sian ari na asing, dipakke ma ari i lao pasangappon Jahowa.* Jala songon i ma halak na boi mangallang sude ragam ni sipanganon i, diulahon ma i lao pasangappon Jahowa.* Ai mandok mauliate do ibana tu Debata alani sipanganon i.+ Halak na so mangallang sude ragam ni sipanganon pe, diulahon ma i lao pasangappon Jahowa.* Ai ibana pe mandok mauliate do tu Debata.+ 7 Dang adong sian hita na mangolu holan tu diritta sandiri,+ jala dang adong sian hita na mate holan tu diritta sandiri. 8 Molo mangolu hita, mangolu ma lao pasangappon Jahowa.*+ Jala molo mate hita, mate lao pasangappon Jahowa.* Alani i, mate manang mangolu, appuna ni Jahowa* ma hita.+ 9 Ai mate pe Kristus i jala mulak mangolu muse, asa gabe ibana do Tuan ni akka na mangolu dohot naung mate.+

10 Alani i, boasa ma diuhumi hamu donganmuna?+ Manang boasa ma leas rohamuna tu donganmuna? Ai jongjong do hita sude sogot di jolo ni kursi pengadilan* ni Debata.+ 11 Ai didok na tarsurat i do, “‘Songon pastina Au mangolu,’*+ ninna Jahowa,* ‘na lao marsomba ma sude halak tu Au jala marsumpa ma sude halak mangakkui na Au do Debata.’”+ 12 Alani i, ganup do hita ikkon mampartanggung jawabhon parniulaotta di jolo ni Debata.+

13 Unang be masiuhuman hita.+ Alai marsitutu ma hita asa unang tabahen gale haporseaon ni donganta manang gabe manimbil nasida.*+ 14 Ala siihutton Tuan Jesus do au, pos do rohakku mandok dang adong sipanganon na ramun.*+ Alai molo didok sasahalak ramun sipanganon i, holan di ibana ma i ramun. 15 Molo haccit roha ni donganmuna alani sipanganon na diallang hamu, dang na marholong ni roha hamu disi.+ Unang ma alani sipanganon na diallang hamu gabe sega* haporseaon ni halak. Ai nungnga mate Kristus i humokkop ibana.+ 16 Alani i, unang ma ulahon sada ulaon na denggan molo gabe mambahen halak mandok na roa taringot tu hamu. 17 Ai dang sipanganon manang siinumon+ na manottuhon sasahalak masuk tu Harajaon ni Debata. Alai mangulahon na sittong, mardame dohot na asing, jala marlas ni roha alani tondi parbadia do na uppetting. 18 Ai manang ise na gabe hatoban ni Kristus marhite mangulahon songon i, palasson roha ni Debata do i dohot roha ni na asing.

19 Marsitutu ma hamu mangulahon akka na mambahen dame+ jala masipatoguan ma hamu.+ 20 Unang ma sega dibahen hamu ulaon ni Debata holan alani sipanganon.+ Tutu, sude do sipanganon boi diallang,* alai sala do i allangon molo gabe gale haporseaon ni halak.*+ 21 Tumagon ma unang mangallang jagal, manang unang manginum anggur, manang mangulahon manang aha pe na mambahen gale haporseaon ni donganmuna.*+ 22 Aha na dihaporseai hamu lok ma toktong i gabe urusanmuna tu Debata. Ai marlas ni roha do halak na so manguhumi dirina sandiri dung diulahon ibana na sittong di rohana. 23 Alai manang ise na ganggu rohana lao mangallang sipanganon alai toktong diallang, sala do ibana disi. Ai dang sesuai na diulahon i tu haporseaonna. Alani i manang aha pe na taulahon na so sesuai tu haporseaotta, dosa do i.

15 Halak na togu haporseaonna ikkon sabar do mangadopi halak na gale haporseaonna.+ Jala unang ma hasonangatta sandiri na talului.+ 2 Alai ganup ma hita mambahen las roha ni donganta, jala mambahen na denggan lao patoguhon nasida.+ 3 Ai Kristus i pe, dang hasonanganna sandiri na dilului.+ Songon hata ni na tarsurat i, “Nungnga hutaon rehe-rehe ni halak na mangarehei Ho.”+ 4 Nasa na tarsurat hian, disurat do i lao mangajari hita+ asa taboto aha na lao paboaon ni Debata tu hita. Ai diurupi na tarsurat i do hita asa pos rohatta tu janji ni Debata, asa margogo, jala togu+ manaon sitaonon.+ 5 Anggiat ma dibahen Debata hamu margogo, sabar, jala togu. Jala hutangiakkon do asa diurupi Ibana hamu sude marpangalaho na sarupa songon Kristus Jesus. 6 Marhite songon i, marsada* ma+ hamu sude lao mamuji Debata, Ama ni Tuanta Jesus Kristus i.

7 Alani i, songon Kristus na burju manjalo hamu,+ ikkon burju do hamu manjalo donganmuna na asing,+ asa dipasangap Debata. 8 Hudok ma tu hamu, gabe parhobas do Kristus i tu halak Jahudi*+ lao patuduhon sittong do hata ni Debata, jala patuduhon na tutu do saut janji ni Debata tu akka ompu ni nasida.+ 9 Dibahen ibana do muse songon i, asa dipasangap bangso na asing Debata alani asi ni rohana.+ Songon hata ni na tarsurat i, “Alani i do umbahen na hupuji Ho di tonga-tonga ni akka bangso, jala marende do au lao mamuji goarmu.”+ 10 Jala didok do muse, “Ale akka bangso, marlas ni roha ma hamu rap dohot bangso ni Debata.”+ 11 Tarsurat do muse, “Puji ma Jahowa,* ale hamu sude bangso. Anggiat ma sude jolma mamuji Ibana.”+ 12 Didok si Jesaya do muse, “Na lao ro do sasahalak sian pinoppar ni si Isai*+ lao mamaretta akka bangso.+ Jala pos situtu do roha ni nasida na lao bahenonna akka na denggan.”+ 13 Anggiat ma Debata na manjanjihon na denggan tu hamu, mambahen hamu marlas ni roha situtu jala makkilala dame ni roha. Ai porsea do hamu tu Ibana. Alani i marhite tondi parbadiana,+ marpos ni roha ma hamu tu janjina i sian nasa rohamuna.

14 Ale akka dongan, pos do rohakku, gok do akka na denggan di hamu, gok do parbinotoanmuna, jala boi do hamu masipaingotan* dohot na asing. 15 Alai, nungnga husurat akka na porlu hupaboa tu hamu jala ikkon takkas do i paingotokku tu hamu muse. Hubahen pe songon i, ala dipatuduhon Debata do asi ni rohana na massai balga i tu au. 16 Alani asi ni rohana i, boi ma au gabe naposo ni Kristus Jesus jala boi pasahatton barita na uli na sian Debata tu akka bangso.+ Alani i, marsitutu do au mangulahon i asa boi akka bangso dijalo Debata+ songon pelean naung dipabadia marhite tondi parbadia.

17 Las situtu do rohakku ala nungnga gabe siihutton Kristus Jesus au jala nungnga huulahon ulaon na sian Debata. 18 Dang huhatahon manang aha, asing ni na diulahon Kristus marhite au. Marhite hatakku dohot ulaonku, diurupi ibana do akka bangso asa mangoloi ibana. 19 Marhite tanda halongangan*+ dohot huaso ni tondi parbadia, hubaritahon do barita na uli taringot tu Kristus+ di sude inganan na hudalani. Marbarita do au mulai sian Jerusalem sahat tu luat na di sakaliling ni Provinsi Ilirikum. 20 Ai dang ulaon na dimulai halak na asing na hutorusson. Alai marsitutu do au sian nasa gogokku lao marbarita na uli di akka inganan na so mamboto goar ni Kristus dope. 21 Ai songon i do didok di na tarsurat i, “Tandaon ni akka halak ma ibana, nang pe dang hea dope diboto nasida barita taringot ibana. Jala attusan ni nasida ma taringot ibana, nang pe dang hea dope dibege nasida taringot tu ibana.”+

22 Alani i do au jotjot sundat ro mandapotton hamu. 23 Alai saonari, dang adong be inganan na so hea hudalani di luat on. Jala nungnga martaon-taon* au naeng ro mandapotton hamu. 24 Sai anggiat ma boi hita juppang tikki naeng lao au tu Spanyol. Jala lomo do rohakku molo dung makkata-hatai hita, didongani hamu au satokkin di pardalanan. 25 Alai saonari, naeng lao ma au tu Jerusalem lao mangurupi akka halak na badia.+ 26 Ai las do roha ni akka donganta di Makedonia dohot di Akaya mangalehon sumbangan tu akka halak na badia na pogos di Jerusalem.+ 27 Las do roha ni nasida mangulahon i. Jala sasittongna, didok roha ni nasida ikkon ulahononna do i.* Ai nungnga dilehon akka halak na badia tu nasida akka hata na patoguhon parale-aleon ni nasida tu Debata. Alani i, ikkon dilehon nasida do na porlu tu akka halak na badia i.+ 28 Molo dung huboan sumbangan i, jala hupasahat tu akka na badia i, ro ma au mandapotton hamu di pardalanakku tu Spanyol. 29 Pos do rohakku, molo ro au annon mandapotton hamu, gok do pasu-pasu boanokku sian Kristus.

30 Ale akka dongan, ala nungnga porsea hita tu Tuanta Jesus Kristus i, jala ala nungnga dibahen tondi parbadia hita marsihaholongan dohot na asing, hujujui ma hamu asa marsitutu martangiang rap dohot au lao mangido akka na porlu di au.+ 31 Tangiakkon hamu ma au asa malua+ sian halak na so porsea na di Judea, jala asa las roha ni akka na badia na di Jerusalem manjalo sumbangan na huboan i tu nasida.+ 32 Alani i, molo lomo roha ni Debata, ro do au mandapotton hamu di bagasan las ni roha, asa rap marlas ni roha hita. 33 Sai anggiat ma dame na sian Debata mandongani hamu sude.+ Amen.

16 Naeng hupatandahon do tu hamu donganta borua, si Poibe na mangurupi* huria na di Kenkrea.+ 2 Jalo hamu ma ibana songon na manjalo dongan sahaporseaon, jala songon na manjalo akka na badia. Lehon hamu ma akka na porlu di ibana.+ Ai nungnga godang akka dongan diurupi ibana, dohot ma au sandiri.

3 Pasahat ma tabekku tu si Priska dohot tu si Akuila+ donganku saulaon marhobas tu Kristus Jesus i. 4 Rade do nasida mate alani au.+ Jala dang holan au na mandok mauliate tu nasida, alai dohot do sude huria na sian bangso na asing. 5 Sahat ma tabe tu huria na marpungu di jabu ni nasida.+ Sahat ma tabe tu si Epenetus dongan na huhaholongi. Ibana do sahalak sian akka na parjolo gabe sisean ni Kristus di Asia. 6 Sahat ma tabe tu si Maria naung marsitutu mangurupi hamu. 7 Sahat ma tabe tu si Andronikus dohot tu si Junias keluargakku.+ Hea do nasida rap dipenjarahon dohot au. Dipuji akka apostel do nasida jala parjolo do nasida gabe siihutton Kristus sian au.

8 Sahat ma tabekku tu si Ampliatus, dongan na huhaholongi di bagasan Tuan i. 9 Sahat ma tabe tu si Urbanus, donganta saulaon marhobas tu Kristus dohot tu si Stakis na huhaholongi. 10 Sahat ma tabe tu si Apelles, na setia tu Kristus i. Sahat ma tabe tu sude na adong di jabu ni si Aristobulus. 11 Sahat ma tabe tu si Herodion, keluargakku. Sahat ma tabe tu sude na adong di jabu ni si Narkissus, na mangihutton Tuan i. 12 Sahat ma tabe tu si Tripena dohot tu si Triposa, i ma akka donganta borua na marhobas tu Tuan i. Sahat ma tabe tu si Persis donganta borua na tahaholongi, naung marsitutu marhobas tu Tuan i. 13 Sahat ma tabe tu si Rupus naung dipillit Tuan i dohot tu omakna naung huanggap songon omakku sandiri. 14 Sahat ma tabe tu si Asinkritus, tu si Plegon, tu si Hermes, tu si Patrobas, tu si Hermas, dohot tu akka dongan na rap dohot nasida. 15 Sahat ma tabe tu si Polologus dohot tu si Julia, tu si Nerius dohot tu ibotona, tu si Olimpas, dohot tu sude akka na badia na rap dohot nasida. 16 Las ma rohamuna manjalo* akka donganta sahaporseaon. Sude do akka dongan na di huria ni Kristus pasahatton tabe tu hamu.

17 Hupangido ma tu hamu ale akka dongan, manat ma hamu tu akka halak na mamola-mola dohot tu halak na mambahen tartuktuk. Ai maralo do i tu ajaran naung diboto hamu. Alani i, padao ma dirimuna sian nasida.+ 18 Ai hatoban ni hisap-hisap ni dagingna* do halak sisongon i, dang hatoban ni Tuanta Kristus i. Dipakke nasida do hata na lambok begeon dohot pujian lao mangoto-otoi halak na tobok marroha.* 19 Diboto sude halak do na setia hamu tu Debata. Jala las do rohakku alani i. Alai lomo do rohakku asa marbisuk hamu jala mangulahon na denggan jala ias sian na jahat.+ 20 Dang sadia leleng nai, lehonon ni Debata Silehon dame i ma tu hamu huaso lao mangaripasson Sibolis.*+ Anggiat ma asi ni roha ni Tuanta Jesus na massai balga i mandongani hamu.

21 Sahat ma tu hamu tabe ni si Timoteus donganku saulaon, tabe ni si Lucius, si Jason, dohot si Sosipater akka keluargakku.+

22 Sahat ma tabekku dohot tabe ni donganta sahaporseaon, si Tertius na manurat surat on.

23 Sahat ma tabe ni si Gayus+ tu hamu. Ibana do na mangalehon jabu inganakku dohot inganan parpunguan di huria. Sahat ma tabe ni si Erastus bendahara* ni luat i dohot tabe ni si Kuartus anggina. 24 *—

25 Boi do bahenon ni Debata hamu margogo marhite barita na uli na hubaritahon dohot marhite barita taringot tu Jesus Kristus. Adong do hubungan ni barita na uli i tu rahasia na badia+ naung takkas dipaboa Debata. Rahasia i nungnga leleng buni. 26 Alai saonari nungnga takkas be dipaboa rahasia i. Jala nungnga dibaritahon i tu sude bangso marhite akka Surat na Badia na sinurat ni akka panurirang.* Ai songon i do paretta ni Debata na manoktong i, na makkalomohon asa sude bangso porsea jala mangoloi Ibana. 27 Anggiat ma Debata na umbisuk sian sasude+ dipasangap saleleng ni lelengna marhite Jesus Kristus. Amen.