SEPANIA
1 Tikki mamaretta si Josia+ anak ni si Amon+ raja ni Juda, dipasahat Jahowa ma hatana tu si Sepania.* Bapak ni si Sepania, i ma si Kusi. Bapak ni si Kusi, i ma si Gedalia. Bapak ni si Gedalia, i ma si Amaria. Jala bapak ni si Amaria, i ma si Hiskia.
2 Didok Jahowa ma, “Na lao hancurhonokku do sude na adong di tano on.”+
3 Didok Jahowa ma muse, “Pamateonku ma jolma dohot binatang.
Pamateonku ma pidong na di langit dohot dekke na di laut.+
Jala bahenokku ma hancur akka parjahat dohot akka na mambahen lilu.*+
Pamateonku ma akka jolma na di tano on.
4 Pakkeonku ma tanganku lao mangalo halak Juda
Jala alookku ma pangisi ni kota Jerusalem,
Bahenokku ma asa unang adong be na manomba Baal+ di inganan on.
Jala bahenokku ma asa unang diingot be goar ni akka malim ni debata na so sittong dohot goar ni akka malim na so sittong.+
5 Pamateonku do muse akka halak na nakkok tu atap ni jabuna lao marsomba tu sude na adong di langit.*+
Pamateonku do muse akka halak na marsomba tu Jahowa jala na marsumpa lao setia tu Au,+
Hape marsumpa do tong ibana lao setia tu debata Malkam.+
6 Pasudaokku do muse akka halak na so olo be mangihutton Jahowa.+
Jala pasudaokku do muse akka halak na so mangalului Jahowa jala na so olo manjalo poda sian Au.”+
7 Nungnga jonok be ari ni Jahowa,+ alani i hohom ma hamu di jolo ni Jahowa Tuan Natumimbul i.
Nungnga diparade Jahowa pelean jala nungnga dipabadia Ibana akka halak na digokkon lao ro.
8 “Tikki mangalehon pelean Au, Au Jahowa, hukumokku ma akka pamimpin,
Hukumokku ma akka anak ni raja+ dohot sude halak na mamakke pakkean songon pakkean ni bangso na asing.
9 Di ari i, hukumokku ma manang ise na ro tu labbung ni pintu,
Ai ro do nasida tu jabu ni tuanna lao mangoto-otoi jala mambahen gok hajahaton.”
10 Didok Jahowa ma muse, “Di ari i,
Tarbege ma soara ni akka halak na mangangguki di Gerbang Dekke.+
Tarbege ma soara ni halak na mangandungi di Bagian Paduahon ni kota i.+
Jala tarbege ma soara ni akka dolok na masursur.
11 Mangangguki ma hamu ale akka halak na tinggal di Maktes.*
Ai dang adong be* akka partiga-tigamuna,
Jala dang adong be akka halak na manimbang perak.
12 Di tikki i, boanokku ma lampu asa manat hupareso kota Jerusalem.
Dung i hukumokku ma akka halak na so parduli tu manang aha pe,* na mandok di bagasan rohana,
‘Dang bahenon ni Jahowa na denggan, jala dang bahenonna na jahat.’+
13 Na lao dirampok ma arta ni nasida, jala na lao diruppakkon ma jabu ni nasida.+
Pajongjongon ni nasida ma jabu, alai dang nasida na mangingani i.
Bahenon ni nasida ma ladang anggur, alai dang inumon ni nasida anggur sian i.+
14 Nungnga jonok be ari ni Jahowa,+ ari na balga i.
Nungnga jonok be i, jala massai hatop do i ro.+
Parohon biar do soara sian ari ni Jahowa i.+
Haru tentara na gogo pe mangangguki do disi.+
15 Ari rimas do i,+
Ari hasusaan jala gok sitaonon,+
Masa do badai di ari i jala hancur do sude,
Ari na holom do i jala massai holom,+
Makkolom do ombun di ari i.+
16 Pakkeon ni akka halak ma tarompet na sian tanduk di ari i,
Jala tarbege ma soara ni na marporang,+
Marporang mangalo akka kota na marbenteng dohot akka menara na timbo na di sudut ni tembok.+
17 Bahenokku ma susa jolma,
Jala bahenokku ma nasida mardalan dos songon halak na mapitung,+
Ai nungnga mardosa nasida tu Jahowa,+
Bahenokku ma use mudar ni nasida dos songon orbuk.
Jala bahenokku ma daging* ni nasida gabe dos songon kotoran.+
18 Dang boi mas manang perak ni nasida paluahon nasida sian ari rimas ni Jahowa,+
Ai bahenonna do hancur saluhut tano on ala nungnga marsigorgor rimasna songon api.+
Bahenonna do suda saluhut pangisi ni tano on,+ jala toppu do i masa.”
2 Andorang so ro dope panguhuman ni Debata,
Andorang so salpu dope ari i dos songon lapung ni eme* na diullusson alogo,
Andorang so marsigorgor dope rimas ni Jahowa tu hamu,+
Jala andorang so ro dope ari rimas ni Jahowa tu hamu,
3 Lului hamu ma Jahowa,+ ale hamu sude na lambok roha* di tano on,
Hamu sude na mangulahon parettana na sittong i.
Ulahon hamu ma na sittong jala patudu hamu ma lambok ni roha.*
Tabunihononna do ra hamu di ari rimas ni Jahowa i.+
4 Ai gabe tarulang ma kota Gasa.
Jala gabe hancur ma kota Askelon.+
Dipalao ma pangisi ni kota Asdod tikki arian.
Jala dipalao ma pangisi ni kota Ekron.+
5 “Marjea ma hamu ale halak Heret+ na tinggal di topi ni laut!
Nungnga didok Jahowa na lao hancur nama hamu bahenokku.
‘Ale Kanaan huta ni halak Palistim, na lao hancur nama ho bahenokku,
Asa unang adong be na tinggal disi.’
6 Dung i gabe inganan parmahanan ma huta na di topi ni laut i,
Adong ma disi sumur lao di akka parmahan jala adong ma disi kandang na sian batu lao di akka biru-biru.
7 Jala maringanan ma disi halak Juda na tading i dope.+
Disi ma nasida mangan.
Jala tikki borngin, modom ma nasida di akka jabu na di kota Askelon.
Ai parrohahonon ni Jahowa Debata ni nasida do muse nasida.
Dung i, boanonna ma muse nasida mulak sian inganan ni nasida ditawan.”+
8 “Nungnga hubege be rehe-rehe ni halak Moab+ jala nungnga hubege be songon dia halak Ammon mangaleai,+
Ai dileai nasida do bangsokki jala teal do nasida, didok do boi buatonna tano ni bangsokki.”+
9 Songon on ma muse didok Jahowa Pamimpin ni Akka Tentara i,* i ma Debata ni halak Israel, “Songon pastina Au Debata na mangolu,*
Ikkon songon Sodom ma kota Moab,+
Jala songon Gumora+ ma kota Ammon,
Gabe gok ma ramba di inganan i, gabe tano na marsira ma i, jala tarulang ma i saleleng ni lelengna.+
Dung i ro ma bangsokku na mangolu i dope lao mambuat arta ni nasida,
Jala buaton ni bangsokki ma appuna ni nasida.
10 Songon i ma na lao masa tu nasida alani ginjang ni roha ni nasida,+
Ai direhei nasida do bangsokku jala ginjang do roha ni nasida mangalo bangso ni Jahowa, Pamimpin ni Akka Tentara i.
11 Bahenon ni Jahowa ma gabe mabiar nasida.
Ai bahenokku do hancur* sude debata na adong di tano on,
Gabe sude ma bangso na adong di akka pulo marsomba tu Au,+
Marsomba ma nasida sian ingananna be.
12 Jala hamu pe halak Etiopia, pamateonku ma hamu mamakke podangku.”+
13 Bahenonna ma tanganna tu arah utara jala hancur ma bahenonna Asiria,
Dung i bahenonna ma tarulang kota Ninive,+ jala bahenonna ma i koring dos songon gurun.
14 Gabe maringanan ma disi akka binatang dohot sude binatang buas.
Marborngin ma burung pelikan dohot landak di akka tiangna naung marruppak
Terbege ma soara ni na mangandungi sian jandela.
Tarida ma akka tembok naung maruppak sian pintu masukna.
Ai bahenonna do hona udan jala didadang mataniari akka papanna na sian hau ares i.
15 Songon i ma na lao masa tu kota na ginjang roha on, na mandok dirina aman,
Ai didok do di bagas rohana, ‘Au do na unjago, dang adong na songon au.’
Alai gabe mabiar do akka halak annon mangida kota i,
Ai maringanan ma disi akka binatang buas!
Jala manang ise na lewat sian i gabe marsiul* jala mangupir ma mangida kota i.”+
3 Marjea ma ho ale kota na ramun,* kota ni akka pangalo, na mambahen na jahat tu pendudukna sandiri.+
2 Dang mangoloi kota i,+ dang olo manjalo pissang-pissang.+
Dang marpos ni roha tu Jahowa,+ jala dang olo manjonok tu Debatana.+
3 Dos songon singa na marauang do akka pamimpinna.+
Jala dos do akka hakimna songon serigala na marburu tikki borngin.
Dang adong nanggo sada pe holi-holi na ditinggalhon lao allangonna manogot.
4 Licik do akka panurirang na di kota i, lomo do rohana mangaleai.+
5 Sittong do Jahowa, jala tinggal do Ibana di kota i.+ Dang hea diulahon Ibana na sala,
Dos songon mataniari na sai bissar, songon i ma Ibana paboahon akka aturanna ganup manogot.+
Alai anggo parjahat i, tung so diboto do ila.+
6 “Nungnga suda hubahen akka bangso. Nungnga hancur hubahen akka menarana na di sudut ni tembok.
Nungnga hancur be hubahen akka dalanna, asa unang adong be na lewat sian i.
Nungnga hancur be kota i, dang adong be pangisina, dang adong be jolma disi.+
7 Ninna rohakku do, ‘Pasti habiaranmuna nama Au jala jaloonmuna nama pissang-pissangku.’+
Alani i dang bahenokku hancur inganan ni nasida.+
Ai ikkon hukumokku do nian nasida alani sudena on.
Alai lam jahat do nasida.+
8 Didok Jahowa ma muse, ‘Sabar ma hamu paimahon Au,+
Sahat tu na dapot tikkina ro Au lao manaluhon akka bangso jala buatokku ma arta ni nasida.*
Ai nungnga hutottuhon asa hupapungu akka bangso dohot akka harajaon,
Usehonokku ma rimashu tu nasida, usehonokku ma sude rimashi tu nasida.+
Jala bahenokku ma hancur saluhut tano on, ai nungnga marsigorgor rimashu songon api.+
9 Dung i ajarhonokku ma bahasa na murni tu akka bangso,
Asa sude nasida marsada lao manjou goar ni Jahowa,
Jala marsada lao manomba Ibana.’+
10 Sian inganan na jonok tu akka sunge na di Etiopia,
Ro do akka halak na mangelek-elek tu Au mamboan silehon–lehon,+ i ma bangsokku na marserak i.
11 Di ari i, dang pola maila be hamu,
Maila alani sude pambahenanmuna tikki na mangalo i hamu tu Au.+
Ai usirokku do sian tonga-tongamuna akka siginjang roha na teal makkatai.
Jala hamu pe, dang ginjang be rohamuna di dolokku na badia i.+
12 Paloasokku do tinggal di tonga-tongamuna akka halak na serep marroha dohot na lambok roha.+
Jala goar ni Jahowa ma na gabe parlinggoman ni nasida.
13 Dang bahenon ni halak Israel na tading i+ be na jahat,+
Dang olo nasida margabus jala dang pakkeon ni nasida be dila ni nasida lao mangoto-otoi.
Mangan jala modom ma nasida, ai dang adong be na mambahen nasida mabiar.+
14 Marsurak ma ho marlas ni roha, ale boru Sion!
Marsurak ma ho marlas ni roha, ale Israel!+
Marlas ni roha ma ho sian nasa roham, ale boru Jerusalem!+
15 Dang hukumon ni Jahowa be hamu,+
Nungnga dipalao Ibana be akka musumuna.+
Jahowa Raja ni Israel i do mandongani hamu.+
Dang na lao masa be jea tu hamu,+ alani i unang pola mabiar hamu.
16 Di ari i, tarbege ma soara na mandok songon on di Jerusalem,
“Unang ma mabiar ho, ale Sion.+
Unang ma pasombu gale-gale tanganmi.
17 Di tonga-tongamuna do Jahowa Debatamuna,+
Paluaonna ma hamu, ai gogo situtu do Ibana.
Marlas ni roha ma Ibana alani hamu.+
Las ma rohana* alani holong ni rohana tu hamu.
Marsurak ma Ibana marlas ni roha alani hamu.
18 Papunguokku ma akka halak na marlungun ni roha ala dang boi ro tu perayaanmuna.+
Dang boi nasida ro ala ditawan jala dileai.+
19 Di tikki i, hukumokku ma akka halak na mambahen na jahat tu hamu.+
Jala paluaokku ma akka halak na mekkat-ekkat,+
Papunguokku ma akka halak na marserak,+
Bahenokku ma tarbarita goar ni nasida,
Jala bahenokku ma nasida dipuji di inganan ni akka halak na hea mangaleai nasida.
20 Di tikki i, papunguokku ma hamu,
Jala boanokku ma hamu mulak,
Idaonmuna ma boanokku hamu mulak sian ingananmuna ditawan,
Ai bahenokku ma tarbarita goarmuna jala sude ma bangso na di tano on mamuji hamu,”+ ninna Jahowa.+
Lapatanna, “Nungnga Ditabunihon (Disippan) Jahowa”.
Manang “dohot batu partuktuhan”. Olo do ra on barang manang ulaon lao manomba patung.
As. “sude akka tentara na di langit”.
Olo do ra on inganan na jonok tu Gerbang Dekke na di Jerusalem.
As. “Ai gabe sip ma”.
Manang “akka na songon anggur na gabe kental di ingananna”.
As. “usus”.
As. “kulit ni eme”. Ida di Kamus.
Manang “na serep marroha”.
Manang “serep ni roha”.
Manang “Sebaot”, lapatanna pamimpin ni akka suru-suruan na di banua ginjang.
Sumpa on patuduhon pasti do ikkon saut janji on, songon pastina Debata mangolu.
Manang “bahenokku do dang margogo”.
Ra lao patuduhon na longang roha manang lao mangaleai.
Ida di Kamus.
Manang boi do “Au gabe saksi”.
As. “Hohom ma Ibana”.