ESRA

1 Di taon na parjolo Raja Sirus+ na sian Persia mamaretta, dipasaut Jahowa ma hatana na pinasahat ni si Jeremia.+ Alani i, dibahen Jahowa ma asa taronjar roha ni Raja Sirus na sian Persia mambahen boa-boa di saluhut harajaonna, jala disuratton do boa-boa i.+ Songon on ma isi ni boa-boa i,

2 “On ma na nidok ni Raja Sirus na sian Persia, ‘Nungnga dilehon Jahowa Debata na di surgo be tu au sude harajaon na di tano on.+ Jala disuru Ibana do au pajongjokkon sada jabu di Ibana di Jerusalem,+ na di Juda. 3 Manang ise sian hamu bangso ni Debata, borhat ma hamu tusi. Sai didongani Debatamuna ma hamu. Pajongjong hamu ma muse jabu ni Jahowa Debata ni Israel naung hea adong* di Jerusalem. Ai Ibana do Debata na sittong. 4 Manang ise halak Jahudi na manoppang+ manang na didia pe, ikkon diurupi tetanggana do nasida. Lehonon ni tetanggana i ma tu nasida perak, mas, akka barang na asing, akka binatang, dohot sumbangan na lao dipelehon di jabu ni Debata na sittong+ na di Jerusalem.’”

5 Dung i mangarade ma akka pamimpin ni halak Juda dohot halak Benjamin na sasaompu, akka malim, dohot halak Lepi. Lao ma nasida padenggatton jabu ni Jahowa na di Jerusalem. Debata do na mambahen asa taronjar roha ni nasida mangulahon i. 6 Sude do tetangga ni nasida mangalehon sumbangan na gabe pelean. Asing ni i dilehon do muse akka barang na sian perak, na sian mas, akka barang na asing, akka binatang, dohot akka barang na arga.

7 Dilehon Raja Sirus ma muse tu nasida akka barang na sian jabu ni Jahowa. Ai diboan si Nebukadnesar do najolo akka barang i sian Jerusalem jala dibahen ma i di jabu ni debatana.+ 8 Dietong jala disurat si Mistredat bendahara i ma akka barang na dipakaluar i. Ai ibana do na dipillit Raja Sirus na sian Persia lao martanggung jawab mangurus akka barang i. Dung i dipasahat si Mistredat ma i tu si Sesbasar*+ pamimpin ni halak Juda.

9 On ma akka barang na dietong jala na disurat i: 30 karanjang na sian mas, 1.000 karanjang na sian perak, dohot 29 parkakas na asing. 10 Adong do muse 30 makkuk na gelleng na sian mas, 410 makkuk na gelleng na sian perak, dohot 1.000 barang na asing. 11 Adong ma 5.400 godang ni akka barang na sian mas dohot na sian perak i. Diboan si Sesbasar do i sude tikki mulak akka tawanan i+ sian Babel tu Jerusalem.

2 On ma halak Jahudi na sian akka provinsi* na mulak+ tu huta ni nasida be+ di Jerusalem dohot di Juda. Ai ditawan Raja Nebukadnesar na sian Babel+ do nasida jala diboan tu Babel. 2 Akka halak na mulak rap dohot si Serubabel,+ i ma si Jesua,+ si Nehemia, si Seraya, si Reelaya, si Mordahai, si Bilsan, si Mispar, si Bigpai, si Rehum, dohot si Baana.

On ma godang ni halak Israel na mulak i:+ 3 Sian pinoppar ni si Paras 2.172 halak. 4 Sian pinoppar ni si Sepatia 372 halak. 5 Sian pinoppar ni si Arah+ 775 halak. 6 Sian pinoppar ni si Pahat-moab+ na sian si Jesua dohot na sian si Joab 2.812 halak. 7 Sian pinoppar ni si Elamit+ 1.254 halak. 8 Sian pinoppar ni si Jattu+ 945 halak. 9 Sian pinoppar ni si Sakai 760 halak. 10 Sian pinoppar ni si Bani 642 halak. 11 Sian pinoppar ni si Bebai 623 halak. 12 Sian pinoppar ni si Asgad 1.222 halak. 13 Sian pinoppar ni si Adonikam 666 halak. 14 Sian pinoppar ni si Bigpai 2.056 halak. 15 Sian pinoppar ni si Adin 454 halak. 16 Sian pinoppar ni si Ater na sian si Hiskia 98 halak. 17 Sian pinoppar ni si Bisia 323 halak. 18 Sian pinoppar ni si Jora 112 halak. 19 Sian pinoppar ni si Hasum+ 223 halak. 20 Sian pinoppar* ni si Gibar 95 halak. 21 Sian pinoppar ni si Betlehem 123 halak. 22 Halak Netopa 56 halak. 23 Halak Anatot+ 128 halak. 24 Sian pinoppar ni si Asmapet 42 halak. 25 Sian pinoppar ni si Kiriat-jearim, si Kepira, dohot si Beerot 743 halak. 26 Sian pinoppar ni si Rama+ dohot si Geba+ 621 halak. 27 Halak Mikhmas 122 halak. 28 Halak Betel dohot halak Ai+ 223 halak. 29 Sian pinoppar ni si Nebo+ 52 halak. 30 Sian pinoppar ni si Magbis 156 halak. 31 Sian pinoppar ni si Elamit na asing 1.254 halak. 32 Sian pinoppar ni si Harim 320 halak. 33 Sian pinoppar ni si Lod, si Hadid, dohot si Ono 725 halak. 34 Sian pinoppar ni si Jeriko 345 halak. 35 Sian pinoppar ni si Sena 3.630 halak.

36 Godang ni akka malim na mulak:+ Sian pinoppar ni si Jedaya+ na sian keluarga ni si Jesua+ 973 halak. 37 Sian pinoppar ni si Immer+ 1.052 halak. 38 Sian pinoppar ni si Pashur+ 1.247 halak. 39 Sian pinoppar ni si Harim+ 1.017 halak.

40 Godang ni halak Lepi na mulak:+ Sian pinoppar ni si Jesua dohot si Kadmiel+ na sian keluarga ni si Hodapia 74 halak. 41 Godang ni akka parende:+ Sian pinoppar ni si Asap+ 128 halak. 42 Godang ni akka panjaga pintu:*+ Sian pinoppar ni si Sallum, si Ater, si Talmon,+ si Akkub,+ si Hatita, dohot si Sobai 139 halak.

43 On ma akka halak na martugas* di bagas joro:+ pinoppar ni si Siha, si Hasupa, si Tabaot, 44 si Keros, si Siaha, si Padon, 45 si Lebana, si Hagaba, si Akkub, 46 si Hagab, si Salmai, si Hanan, 47 si Gidel, si Gohar, si Reaya, 48 si Resin, si Nekoda, si Gasam, 49 si Usa, si Pasea, si Bisia, 50 si Asna, si Meunim, si Nepusim, 51 si Bakbuk, si Hakupa, si Harhur, 52 si Baslut, si Mehida, si Harsa, 53 si Barkos, si Sisera, si Tama, 54 si Nesia, dohot pinoppar ni si Hatipa.

55 On ma pinoppar ni parkarejo ni si Salomo: pinoppar ni si Sotai, si Soperet, si Peruda,+ 56 si Jaalah, si Darkon, si Gidel, 57 si Sepatia, si Hatil, si Rokeret-hasebaim, dohot pinoppar ni si Ami.

58 Godang ni sude halak na martugas* di bagas joro dohot akka pinoppar ni parkarejo ni si Salomo, i ma 392 halak.

59 On ma akka halak na ro sian Tel-mela, Tel-harsa, Kerub, Addon, dohot sian Immer. Alai dang boi dipatudu nasida na tutu do nasida manang ompu ni nasida pinoppar ni halak Israel.+ 60 Sian pinoppar ni si Delaya, si Tobia, dohot si Nekoda 652 halak. 61 Na sian pinoppar ni akka malim: pinoppar ni si Habai, si Hakos,+ dohot pinoppar ni si Barsilai. Goar ni simatua dolina do na dipakke si Barsilai. Ai si Barsilai+ halak Gilead i do simatua dolina. 62 Alai dung dilului nasida goar ni nasida di tarombo ni akka malim, dang tarsurat goar ni nasida disi. Alani i, dang boi nasida didok malim.*+ 63 Jala diorai gubernur* do nasida mangallang bagian na massai badia+ paima adong malim na boi manukkun tu Debata mamakke Urim dohot Tumim.*+

64 Jadi 42.360 halak ma godang ni nasida sude.+ 65 Asing ni i, adong dope 7.337 halak hatoban bawa dohot borua. Jala adong dope 200 halak parende bawa dohot borua. 66 Adong do 736 godang ni hoda ni nasida, jala 245 ma godang ni halode ni nasida na balga.* 67 Adong do muse 435 godang ni unta ni nasida, jala 6.720 ma godang ni halode ni nasida na gelleng.

68 Dung sahat nasida di jabu ni Jahowa di Jerusalem, adong ma deba pamimpin ni nasida na sasaompu na mangalehon sumbangan sian na nionjar ni rohana.+ Dilehon nasida do i asa boi dipakke lao pajongjokkon jabu ni Debata na sittong di ingananna hian.+ 69 Dilehon nasida do sumbangan i sian nasa tolap ni nasida. Gabe pungu ma sumbangan i 61.000 drakhma* mas, 5.000 mina* perak,+ dohot 100 jubah ni akka malim. 70 Tinggal ma akka malim di akka kota ni nasida. Songon i nang halak Lepi, deba bangso i, akka parende, akka panjaga gerbang, dohot akka halak na martugas* di bagas joro. Jala tinggal ma akka halak Israel na asing* di akka kota ni nasida be.+

3 Nungnga tinggal be halak Israel di kota ni nasida be. Dung i, marpungu ma nasida di Jerusalem di bulan na papituhon.+ 2 Jala dipajongjong ma langgatan ni Debata ni Israel. Akka halak na pajongjokkon i, i ma si Jesua+ anak ni si Jehosadak, akka donganna malim, si Serubabel+ anak ni si Sealtiel,+ dohot akka haha anggina. Dipajongjong nasida do langgatan i asa boi nasida mangalehon pelean situtungon disi, songon na tarsurat di Patik ni si Musa+ naposo ni Debata na sittong i.

3 Nang pe mabiar nasida tu akka bangso na jonok tu luat i,+ alai toktong do dipajongjong nasida langgatan i di ingananna hian. Dipelehon nasida ma pelean situtungon tu Jahowa di langgatan i. Dipelehon nasida do i tikki manogot dohot tikki botari.+ 4 Dung i dibahen nasida ma Perayaan Pondok Daun* mangihutton na tarsurat i.+ Jala dilehon nasida ma pelean situtungon ganup ari. Ai nungnga ditottuhon hian godang ni pelean i ganup ari.+ 5 Asing ni pelean situtungon siganup ari,+ adong do muse pelean na dilehon ganup bulan baru+ dohot na dilehon saleleng adong perayaan na badia+ tu Jahowa. Jala adong dope pelean na dilehon akka halak tu Jahowa sian na nionjar ni roha ni nasida.+ 6 Mulai sian ari na parjolo di bulan na papituhon,+ dilehon nasida ma pelean situtungon tu Jahowa, nang pe dang dibahen dope fondasi ni bagas joro ni Jahowa.

7 Dilehon nasida ma hepeng tu akka panokkok batu+ dohot tu akka tukkang.+ Dilehon ma muse sipanganon, siinumon, dohot miak tu halak Sidon dohot halak Tirus gatti ni hau ares sian Libanon na diboan sian laut sahat tu Joppe.+ Diboan nasida do akka hau i songon paretta ni Raja Sirus na sian Persia.+

8 Dimulai nasida ma ulaon i di taon paduahon di bulan paduahon dung sahat nasida tu jabu ni Debata na sittong di Jerusalem. Akka halak na mangulahon i, i ma si Serubabel anak ni si Sealtiel, si Jesua anak ni si Jehosadak, haha anggi ni nasida, akka malim, halak Lepi, dohot sude tawanan na mulak tu Jerusalem.+ Dipillit nasida ma muse halak Lepi na marumur 20 taon tu ginjang gabe pengawas ni akka parkarejo di jabu ni Jahowa i. 9 Alani i, dibahen ma pinoppar ni si Juda dohot pinoppar ni si Henadad gabe pengawas ni akka parkarejo di jabu ni Debata na sittong. Akka pinoppar ni si Juda, i ma si Jesua, akka anak ni si Jesua dohot haha anggina, si Kadmiel dohot akka anakna. Akka pinoppar ni si Henadad,+ i ma akka anakna dohot haha anggina. Halak Lepi do nasida sude.

10 Dung dibahen fondasi ni bagas joro ni Jahowa,+ dipakke akka malim ma jubahna jala martarompet ma nasida.+ Dipakke halak Lepi dohot akka anak ni si Asap ma simbal.* Dung i jongjong ma nasida sude mamuji Jahowa songon paretta na binahen ni si Daud raja ni Israel.+ 11 Marende ma nasida marsialus-alusan+ lao mamuji Jahowa jala mandok mauliate tu Ibana. Didok nasida ma, “Ai na burju do Ibana. Toktong do dipatudu Ibana holong ni rohana* sahat tu saleleng ni lelengna.”+ Marsurak ma sude bangso i mamuji Jahowa, ai nungnga sae be dibahen fondasi ni jabu ni Jahowa. 12 Dung diida nasida dibahen fondasi ni jabu i, tangis jala mangangguki ma akka malim, halak Lepi, dohot akka pamimpin ni na sasaompu. Nungnga matua nasida jala nasida do najolo na hea mangida jabu i.+ Gogo do muse marsurak halak na asing di tikki i alani las ni rohana.+ 13 Tarbege do soara ni nasida sahat tu na dao alani gogona. Jala dang boi be dipaimbar soara ni na marsurak alani las ni roha dohot soara ni na mangangguki.

4 Nungnga mulak halak Juda dohot halak Benjamin+ sian inganan ni nasida ditawan,+ jala dipajongjong nasida ma bagas joro ni Jahowa Debata ni Israel. Dung dibege akka musu taringot i, 2 pittor lao ma nasida mandapotton si Serubabel dohot akka pamimpin ni na sasaompu. Didok nasida ma, “Paloas ma hami dohot padenggatton jabu i. Ai nungnga husomba hami Debatamuna+ jala nungnga hulehon hami pelean tu Ibana mulai sian tikki ni si Esar-haddon+ raja ni Asiria na mamboan hami tuson.”+ 3 Alai didok si Serubabel, si Jesua, dohot pamimpin ni na sasaompu i ma tu nasida, “Dang boi dohot hamu pajongjokkon jabu ni Debatanami.+ Holan hami do na boi pajongjokkon jabu ni Jahowa Debata ni Israel. Ai songon i do paretta ni si Sirus raja ni Persia tu hami.”+

4 Dung i dipabiar-biar halak na di luat i ma halak Juda jala dibahen ma metmet roha ni nasida asa unang dipajongjong be jabu i.+ 5 Disogok halak na di luat i ma akka penasehat ni raja. Disuru ma nasida mambahen asa sundat rencana ni halak Jahudi+ pajongjokkon jabu i. Dibahen nasida do songon i tikki mamaretta si Sirus raja ni Persia sahat tu na mamaretta si Darius+ raja ni Persia. 6 Tikki baru mamaretta si Ahasweros, dibahen nasida ma surat na paroa-roahon halak Juda dohot halak Jerusalem. 7 Jala tikki mamaretta si Artasasta raja ni Persia, dibahen si Bislam, si Mistredat, si Tabel, dohot akka donganna na asing ma surat tu raja i. Diterjemahon nasida ma surat i tu bahasa Aram+ jala disuratton ma i mamakke huruf Aram.*

8 * Dibahen si Rehum kepala ni pejabat dohot si Simsai juru tulis i ma surat tu Raja Artasasta lao paroa-roahon halak Jerusalem. Songon on ma isi ni surat i: 9 (Surat on sian si Rehum kepala ni pejabat, sian si Simsai juru tulis i, dohot sian akka donganna na asing, i ma akka hakim, gubernur, sekretaris, halak Erik,+ halak Babel, halak Elam+ na di Susa,+ 10 akka bangso na ditawan ni Raja Asenapar* na sangap jala na diboan tu akka kota na di Samaria,+ dohot akka halak na tinggal di luat na di Bariba ni Sunge.* 11 On ma isi ni surat ni nasida i.)

“Sian akka naposo ni raja na tinggal di Bariba ni Sunge, mandapotton Raja Artasasta: 12 Nungnga sahat be di Jerusalem halak Jahudi na ro sian luat ni tuan i. Nungnga dipajongjong nasida be kota on. Akka pangalo jala na jahat do nasida. Saonari, nungnga naeng sae dibahen nasida tembok+ ni kota on. Jala nungnga dipadenggan nasida fondasina. 13 Ale rajanami, molo sae annon dipajongjong nasida kota on dohot tembokna, dang gararon ni nasida be pajak+ ni manang aha* tu raja i. Gabe moru ma annon hepeng na ikkon lehonon tu harajaonmu.* 14 Hupaboa hami pe on tu raja i ala sian harajaonmu do hami mandapot gaji.* Jala dang olo hami gabe rugi raja i. 15 Alani i rajanami, suru ma halak mamareso bukku ni akka ompu+ ni raja i, asa diboto ho rajanami akka pangalo do pangisi ni kota on. Susa do dibahen nasida akka raja dohot akka halak na di provinsi. Ai sian najolo pangalo do nasida. Alani i ma umbahen na diruppakkon kota on najolo.+ 16 Hupaboa hami ma tu raja i, molo nungnga sae dipajongjong kota on dohot akka tembokna, dang na boi be raja i mamaretta akka luat na di Bariba ni Sunge on.”+

17 Dikirim raja i ma alus ni surat i. Jala disuru ma halak manaruhon i tu si Rehum kepala ni pejabat i, tu si Simsai juru tulis i, dohot tu akka dongan ni nasida na tinggal di Samaria dohot di akka luat na di Bariba ni Sunge:

“Horas! 18 Nungnga dijahahon* be tu au suratmuna i. 19 Nungnga husuru be halak mamareso bukku ni akka ompukki. Jala tutu do jotjot nasida mangalo tu akka raja sian najolo. Godang do disi akka pangalo dohot akka halak na mambahen gaor.+ 20 Najolo adong do akka raja na jago di Jerusalem na mamaretta akka luat na di Bariba ni Sunge i. Dilehon pangisi ni luat i do akka pajak tu akka raja i.* 21 Saonari suru ma asa dipaso nasida ulaon i. Dang boi nasida pajongjokkon kota i sahat tu na hubahen paretta na asing. 22 Denggan ma ulahon hamu paretta on asa unang rugi harajaon on.”+

23 Dijahahon ma surat na sian Raja Artasasta i tu si Rehum, tu si Simsai juru tulis i, dohot tu akka dongan ni nasida. Dung i pittor lao ma nasida mandapotton halak Jahudi na di Jerusalem jala dipaksa ma nasida pasohon ulaon i. 24 Ujungna dipaso ma ulaon pajongjokkon jabu ni Debata na di Jerusalem. Torus ma masa songon i sahat tu taon na paduahon Raja Darius na sian Persia mamaretta.+

5 Dung i ro ma hata ni Debata* tu Panurirang* Haggai+ dohot Panurirang Sakaria+ pahoppu ni si Iddo.+ Dipaboa ma i tu halak Jahudi na di Juda dohot di Jerusalem. Dipaboa nasida do i di bagasan goar ni Debata ni halak Israel na mandongani nasida. 2 Dipajongjong si Serubabel+ anak ni si Sealtiel dohot si Jesua+ anak ni si Jehosadak ma muse jabu ni Debata+ na di Jerusalem. Jala adong do akka panurirang ni Debata na mandongani dohot na mangurupi nasida.+ 3 Tikki i si Tatnai do gubernur ni akka luat na di Bariba ni Sunge.* Ro ma ibana, si Jetar-bosenai, dohot akka dongan ni nasida mandapotton halak Jahudi. Didok nasida ma, “Ise na manuru hamu pajongjokkon jabu on jala pasaehon rangkana?”* 4 Didok nasida ma muse, “Ise do goar ni akka halak na pajongjokkon jabu on?” 5 Alai didongani Debata do akka pangituai* ni halak Jahudi.+ Dang diorai si Tatnai dohot akka donganna be halak Jahudi pajongjokkon jabu i. Songon i ma na masa sahat tu na dibahen nasida surat tu Raja Darius lao paboahon taringot i jala sahat tu na dibalos raja i surat ni nasida.

6 Na mambahen surat i tu Raja Darius, i ma si Tatnai gubernur ni akka luat na di Bariba ni Sunge, si Jetar-bosenai, dohot akka donganna, i ma akka gubernur na asing di akka luat na di Bariba ni Sunge. 7 Dipaboa nasida ma na masa i tu raja i. Jala on ma isi ni surat i:

“Mandapotton Raja Darius:

“Sai di bagasan dame ma ho rajanami! 8 Lao do hami ale rajanami tu jabu ni Debata na sangap na di provinsi Juda. Huida hami do disi nungnga dibahen akka batu na balga tu jabu i, jala nungnga dipasang be akka hau tu akka tembokna. Ringgas do nasida pajongjokkon jabu i jala denggan do sude ulaon i dibahen nasida. 9 Dung i husukkun hami ma akka pangituai ni nasida, ‘Ise na manuru hamu pajongjokkon jabu on jala pasaehon rangkana?’*+ 10 Husukkun hami do muse goar ni nasida, asa boi husurat hami goar ni akka pamimpin ni nasida. Jala hupaboa hami ma i tu ho rajanami.

11 “On ma alus ni nasida, ‘Naposo ni Debata na marhuaso di surgo dohot di tano on do hami. Jala na padenggatton jabu na pinajongjong ni raja ni Israel na sangap i do hami. Dipajongjong ibana do i martaon-taon naung salpu.+ 12 Alai ala muruk Debata na di surgo+ tu akka ompunami, dipasahat ma nasida tu si Nebukadnesar+ raja ni Babel, halak Kasdim i. Diruppakkon ibana ma jabu on+ jala ditawan ma bangso on tu Babel.+ 13 Di taon na parjolo Raja Sirus na sian Babel mamaretta, disuru ibana ma asa dipajongjong jabu ni Debata on.+ 14 Asing ni i, dipaulak Raja Sirus ma akka barang na sian mas dohot perak na dibuat sian jabu ni Debatanami. Jala dipasahat ma i tu si Sesbasar,*+ halak na dipillit ibana gabe gubernur.+ Ai dibuat si Nebukadnesar do akka barang i najolo jala dibahen do i di inganan panombaon ni nasida na di Babel.+ 15 Didok si Sirus do tu si Sesbasar, “Buat ma akka barang on. Molo nungnga dipajongjong muse jabu ni Debata na di Jerusalem di ingananna hian, sippan ma akka barang i disi.”+ 16 Dung ro si Sesbasar tuson, dibahen ibana ma fondasi ni jabu ni Debata.+ Mulai sian i ma dipajongjong jabu ni Debata on, alai dang sae dope i sahat tu sadari on.’+

17 “Saonari, molo denggan di roha ni raja i, suru ma halak mamareso surat-surat na di inganan panimpanan ni arta na di Babel, asa taboto atik na tutu do hea disuru Raja Sirus nasida padenggatton jabu ni Debata na di Jerusalem.+ Dung i paboa ma tu hami aha keputusan ni raja taringot on.”

6 Jadi disuru Raja Darius ma asa dipareso surat-surat di inganan panimpanan ni arta na di Babel. 2 Dung i dapot ma sada gulungan di inganan na marbenteng di Akmeta na di provinsi Media. Songon on ma isi ni gulungan i:

3 Di taon na parjolo Raja Sirus mamaretta, dibahen ibana ma paretta taringot jabu ni Debata na di Jerusalem.+ On ma parettana: ‘Ikkon dipajongjong do muse jabu i asa boi dilehon pelean disi. Bahen ma fondasi ni jabu i, ikkon 60 asta* do timbo ni jabu i, jala 60 asta bidangna.+ 4 Bahen ma tembokna sian tolu lappis batu na balga dohot salappis hau.+ Harajaon pe na mananggung sude biaya na rikkot tusi.+ 5 Jala boan ma akka barang na sian mas dohot perak na binuat ni si Nebukadnesar sian jabu ni Debata di Jerusalem. Ai dibuat ibana do i najolo jala diboan tu Babel.+ Boan hamu ma i muse tu bagas joro na di Jerusalem, jala sippan ma akka barang i di jabu ni Debata i.’+

6 “Alani i hudok ma tu ho Tatnai gubernur ni akka luat na di Bariba ni Sunge,* tu ho Jetar-bosenai, dohot tu akka donganmuna, i ma akka gubernur na asing di luat na di Bariba ni Sunge,+ unang ma ganggu hamu nasida. 7 Unang ma orai hamu nasida pajongjokkon jabu ni Debata. Loas ma gubernur dohot akka pangituai* ni halak Jahudi pajongjokkon jabu ni Debata di ingananna hian. 8 Asing ni i, bahen hamu ma songon on tu akka pangituai ni halak Jahudi na pajongjokkon jabu ni Debata i: Buat hamu ma hepeng ni harajaon,+ i ma akka pajak na dipapungu sian akka luat na di Bariba ni Sunge. Jala lehon hamu ma i tu nasida asa unang sundat nasida pajongjokkon jabu i.+ 9 Lehon hamu ma sude na dihaporluhon nasida ganup ari, i ma lombu jantan,+ biru-biru jantan,+ dohot anak ni biru-biru+ na gabe pelean situtungon tu Debata na di surgo. Lehon hamu ma muse gandum,+ sira,+ anggur,+ dohot miak+ na pinangido ni akka malim di Jerusalem. 10 Lehon hamu ma i sude asa boi nasida torus mangalehon pelean na pasonakkon roha ni Debata na di surgo. Jala asa ditangiakkon nasida raja i dohot akka anak ni raja.+ 11 Molo adong halak na mangalo paretta on, buaton ma sada tiang sian jabuna. Dung i dipakkuhon ma ibana tu tiang i. Jala dibahen ma jabuna gabe inganan ni akka halak buang air.* 12 Sai dipamate Debata ma raja manang bangso na mangalo paretta on jala na mangaruppakkon jabu ni Debata na di Jerusalem. Ai nungnga dibahen Debata goarna di jabu i.+ Au si Darius do na mambahen paretta on. Hatop ma ulahon hamu i.”

13 Pittor diulahon si Tatnai gubernur ni akka luat na di Bariba ni Sunge, si Jetar-bosenai,+ dohot akka dongan ni nasida ma paretta ni Raja Darius i. 14 Ditorusson pangituai ni halak Jahudi ma pajongjokkon jabu i jala denggan do i diulahon nasida.+ Ai diingot nasida do hata ni Debata* na pinaboa ni si Haggai+ dohot si Sakaria+ pahoppu ni si Iddo. Ujungna sae ma dipajongjong nasida jabu i songon na diparettahon Debata ni Israel,+ Raja Sirus,+ Raja Darius,+ dohot Raja Artasasta+ na sian Persia. 15 Sae ma dipajongjong nasida jabu i di ari na patoluhon di bulan Adar,* di taon na paonomhon Raja Darius mamaretta.

16 Dung i, dibahen nasida ma pesta na patuduhon naung sae jabu ni Debata i. Marlas ni roha ma sude halak Israel tikki na marpesta i, i ma akka malim, halak Lepi,+ dohot sude halak na hea ditawan. 17 Dipelehon nasida ma 100 lombu jantan, 200 biru-biru jantan, dohot 400 anak ni biru-biru. Jala dipelehon nasida ma muse 12 hambing jantan dos songon godang ni marga ni halak Israel. Dipelehon ma i gabe pelean hasesaan ni dosa ni sude halak Israel.+ 18 Ditottuhon nasida ma tugas ni akka malim dohot halak Lepi lao marhobas tu Debata di Jerusalem.+ Marhobas do nasida mangihutton punguan ni nasida songon na tarsurat di bukku ni si Musa.+

19 Dibahen halak Israel na hea ditawan i ma Perayaan Paska di ari na pasappulu opatton di bulan na parjolo.+ 20 Sude malim dohot halak Lepi nungnga pabadiahon diri ni nasida.+ Alani i, nungnga badia be nasida sude. Dung i diseat nasida ma pelean Paska lao tu sude halak na hea ditawan i, tu donganna malim, dohot tu nasida sandiri. 21 Diallang halak Israel na mulak sian tawanan i ma pelean i. Dohot do muse akka halak na mangihutton halak Israel mangallang pelean i. Ai nungnga dipabadia nasida diri ni nasida sian akka ulaon na ramun* na diulahon bangso na asing. Dibahen nasida do songon i lao manomba* Jahowa Debata ni Israel.+ 22 Dibahen nasida do muse Perayaan Roti na So Marragi+ saleleng pitu ari. Marlas ni roha do nasida mangulahon i. Ai dibahen Jahowa do nasida marlas ni roha jala dibahen Ibana do lomo roha ni raja ni Asiria* tu nasida.+ Gabe diurupi raja i ma nasida pajongjokkon jabu ni Debata na sittong, i ma Debata ni Israel.

7 Dung salpu i sude, mulak ma si Esra.*+ Tikki i, si Artasasta+ do na gabe raja di Persia. Bapak ni si Esra, i ma si Seraya.+ Bapak ni si Seraya, i ma si Azaria. Bapak ni si Azaria, i ma si Hilkia.+ 2 Bapak ni si Hilkia, i ma si Sallum. Bapak ni si Sallum, i ma si Sadok. Bapak ni si Sadok, i ma si Ahitub. 3 Bapak ni si Ahitub, i ma si Amaria. Bapak ni si Amaria, i ma si Azaria. Bapak ni si Azaria,+ i ma si Merayot. 4 Bapak ni si Merayot, i ma si Serahia. Bapak ni si Serahia, i ma si Usi. Bapak ni si Usi, i ma si Bukki. 5 Bapak ni si Bukki, i ma si Abisua, Bapak ni si Abisua, i ma si Pinehas.+ Bapak ni si Pinehas, i ma si Eleasar.+ Bapak ni si Eleasar, i ma si Aron+ malim kepala* i. 6 Dung i ro ma si Esra sian Babel. Sahalak panalin* do ibana. Jala takkas do diattusi ibana Patik ni si Musa+ na nilehon ni Jahowa Debata ni Israel. Dilehon raja do manang aha pe pangidoanna, ai didongani Jahowa Debatana do ibana.

7 Di taon na papituhon Raja Artasasta mamaretta, adong ma deba halak Israel na lao tu Jerusalem. Dohot do muse lao akka malim, halak Lepi,+ akka parende,+ akka panjaga gerbang,+ dohot akka halak na martugas di bagas joro.*+ 8 Jala nungnga sahat si Esra di Jerusalem di bulan na palimahon di taon na papituhon raja i mamaretta. 9 Borhat ma ibana sian Babel di ari na parjolo di bulan na parjolo. Jala sahat ma ibana di Jerusalem di ari na parjolo di bulan na palimahon. Diurupi Debatana do ibana saleleng di pardalanan.+ 10 Nungnga diparade si Esra rohana* lao marsiajar taringot Patik ni Jahowa jala mangulahon i.+ Diparade ibana do muse rohana lao mangajarhon aturan dohot hukum na adong di patik i tu halak Israel.+

11 On ma isi ni surat ni Raja Artasasta tu si Esra, sahalak malim jala panalin* na takkas mamboto* paretta dohot aturan ni Jahowa tu halak Israel:

12 * “Sian si Artasasta+ raja ni saluhut raja, mandapotton Malim Esra panalin* na manurat Patik ni Debata na di surgo: Horas! 13 Nungnga hupaboa tu sude halak di harajaokkon, manang ise halak Israel, akka malim, dohot halak Lepi na naeng lao tu Jerusalem rap dohot ho, huloas do nasida lao.+ 14 Au dohot pitu penasehattu do na manuru ho manjuppangi akka halak na di Juda dohot di Jerusalem. Ai disuru do ho tusi lao mangida naung diulahon nasida do Patik ni Debata na pinasahatna tu ho* manang na dang. 15 Boan ma akka perak dohot mas na dilehon raja dohot akka penasehatna tu Debata ni Israel na tinggal di Jerusalem. Ai sian ias ni rohana do i dilehon nasida. 16 Boan ma muse sude perak dohot mas na dijalo ho* sian sude provinsi na di Babel. Jala boan ma sumbangan ni akka rakyat dohot akka malim na dilehon nasida sian ias ni rohana tu jabu ni Debata ni nasida na di Jerusalem.+ 17 Pittor pakke ma i manuhor lombu jantan,+ biru-biru jantan,+ anak ni biru-biru,+ pelean sipanganon,*+ dohot pelean siinumon.+ Jala pelehon ma i di langgatan na di jabu ni Debatamuna na di Jerusalem.

18 “Boi do pakkeonmu perak dohot mas na lobi i tu manang aha na denggan di roham dohot di roha ni haha anggim, songon lomo ni roha ni Debatamuna. 19 Ikkon boanonmu do tu jolo ni Debata sude barang na dilehon tu ho, asa dipakke i lao marhobas di jabu ni Debatam na di Jerusalem.+ 20 Molo adong dope na asing na ikkon lehononmu tu jabu ni Debatam, pakke ma hepeng ni harajaon.+

21 “Au, Raja Artasasta, nungnga mamarettahon sude bendahara na di luat na di Bariba ni Sunge* asa pittor mangalehon manang aha pe pangidoan ni Malim Esra,+ panalin* na manuratton Patik ni Debata na di surgo. 22 Boi do lehonon ni nasida perak sappe 100 talenta,* gandum sappe 100 kor,* anggur+ sappe 100 bat,* miak+ sappe 100 bat, dohot sadia godang pe sira.+ 23 Ikkon diulahon do paretta ni Debata na di surgo taringot tu jabuna i sian nasa roha, asa unang muruk Debata na di surgo i+ tu raja dohot tu akka anak ni raja.+ 24 Dang boi jaloon pajak+ ni manang aha pe* sian akka malim, halak Lepi, akka parmusik,+ akka panjaga pintu, akka halak na martugas di bagas joro,*+ dohot akka halak na asing na karejo di jabu ni Debata.

25 “Jala ho Esra, pakke ma bisuk na dilehon Debatam lao mamillit akka pejabat pengadilan dohot akka hakim. Nasida ma na mangadili sude halak na mamboto patik ni Debatam na tinggal di luat na di Bariba ni Sunge. Molo adong dope na so mamboto i, ajarhon ma i tu nasida.+ 26 Manang ise na so mangoloi Patik ni Debatam dohot patik ni raja, pittor dihukum ma ibana. Ikkon dipamate do ibana, manang diusir, manang didenda, manang dipenjarahon.”

27 Sai dipuji ma Jahowa Debata ni akka omputta, na mangonjar roha ni raja i mambahen asa denggan jabu ni Jahowa na di Jerusalem!+ 28 Nungnga dipatuduhon Ibana holongna* tu au di jolo ni raja,+ akka penasehatna,+ dohot di jolo ni sude pejabat ni raja na sangap i. Ai gabe barani do au* manogihon akka pamimpin ni halak Israel tu Jerusalem, ala didongani Jahowa Debatakku do au.

8 Adong do pamimpin ni na sasaompu na lao rap dohot au sian Babel tikki mamaretta Raja Artasasta. On ma daftar keluarga ni nasida:+ 2 Sian keluarga ni si Pinehas,+ i ma si Gersom. Sian keluarga ni si Itamar,+ i ma si Daniel. Sian keluarga ni si Daud, i ma si Hantus. 3 Sian keluarga ni si Sekania dohot sian keluarga ni si Paras, i ma si Sakaria rap dohot 150 bawa na asing naung didaftar goarna. 4 Sian keluarga ni si Pahat-moab,+ i ma si Eliho-enai anak ni si Serahia rap dohot 200 bawa na asing. 5 Sian keluarga ni si Jattu,+ i ma si Sekania anak ni si Jehasiel rap dohot 300 bawa na asing. 6 Sian keluarga ni si Adin,+ i ma si Ebed anak ni si Jonatan rap dohot 50 bawa na asing. 7 Sian keluarga ni si Elamit,+ i ma si Jesaya anak ni si Atalia rap dohot 70 bawa na asing. 8 Sian keluarga ni si Sepatia,+ i ma si Sebadia anak ni si Mikhael rap dohot 80 bawa na asing. 9 Sian keluarga ni si Joab, i ma si Obaja anak ni si Jehiel rap dohot 218 bawa na asing. 10 Sian keluarga ni si Bani, i ma si Selomit anak ni si Josipia rap dohot 160 bawa na asing. 11 Sian keluarga ni si Bebai,+ i ma si Sakaria anak ni si Bebai rap dohot 28 bawa na asing. 12 Sian keluarga ni si Asgad,+ i ma si Johanan anak ni si Hakkaban rap dohot 110 bawa na asing. 13 Sian keluarga ni si Adonikam+ adong tolu halak na parpudi mulak, i ma si Elipelet, si Jeiel, dohot si Semaya. Jala adong do 60 bawa na asing na rap dohot nasida. 14 Sian keluarga ni si Bigpai,+ i ma si Utai dohot si Sabut rap dohot 70 bawa na asing.

15 Hupapungu ma nasida di jonok ni sunge na mardalan tu Ahapa,+ jala disi ma hami markemah saleleng tolu ari. Alai tikki huparrohahon akka halak dohot akka malim na pungu i, dang adong huida halak Lepi disi. 16 Alani i, hujou ma akka pamimpin, i ma si Elieser, si Ariel, si Semaya, si Elnatan, si Jarib, si Elnatan, si Natan, si Sakaria, dohot si Mesulam. Hujou ma muse akka guru, i ma si Joyarib dohot si Elnatan. 17 Dung i husuru ma nasida manjuppangi si Iddo sahalak pamimpin na di Kaspia. Ai di Kaspia do si Iddo dohot akka haha anggina, i ma akka halak na martugas di bagas joro.* Husuru ma nasida mandok tu si Iddo dohot tu akka haha anggina asa disuru piga-piga halak na sian i marhobas di jabu ni Debatanami. 18 Ala diurupi Debatanami do hami, disuru nasida ma borhat sahalak bawa na marbisuk na sian pinoppar ni si Mahli+ na margoar si Serebia.+ Dohot do borhat akka anakna dohot haha anggina, na godangna 18 halak. (Pahoppu ni si Lepi do si Mahli, jala anak ni si Israel do si Lepi.) 19 Adong do muse sian keluarga ni si Merari,+ i ma si Hasabya dohot si Jesaya. Dohot do muse haha anggina dohot akka anakna, na godangna 20 halak. 20 Jala adong do 220 halak na martugas di bagas joro* na didaftar goarna. Si Daud dohot akka pejabatna do najolo na manuru akka halak na martugas di bagas joro mangurupi halak Lepi.

21 Di jonok ni Sunge Ahapa i, hudok ma asa marpuasa hami. Dipatutoru hami ma dirinami di jolo ni Debatanami. Hupangido hami ma tu Debata asa didongani hami di pardalanan. Jala hupangido hami ma asa dijaga hami, gellengnami, dohot sude barangnami. 22 Ai maila do au mangido akka tentara dohot akka tentara na marhoda tu raja i lao manjaga hami sian musu saleleng di pardalanan. Nungnga sanga hudok tu raja i, “Didongani Debatanami do sude na mangalului Ibana.+ Alai muruk situtu do Ibana tu halak na manadikkon Ibana.”+ 23 Alani i, marpuasa ma hami, hupangido hami ma tu Debata asa didongani hami saleleng di pardalanan, jala ditangihon Ibana do pangidoannami.+

24 Dung i hupillit ma 12 malim kepala,* i ma si Serebia, si Hasabya,+ dohot sappulu haha anggi ni nasida. 25 Hutimbang ma perak, mas, dohot akka barang na dilehon raja, akka penasehatna, akka pejabatna, dohot na dilehon sude halak Israel na tinggal disi. Ai dilehon nasida do i lao tu jabu ni Debatanami.+ Dung i, hulehon ma i tu akka malim kepala i. 26 On ma akka barang na hutimbang jala na hulehon tu nasida: perak na boratna 650 talenta,* 100 barang na sian perak na boratna 2 talenta, dohot 100 talenta mas. 27 Hulehon do muse 20 makkuk na gelleng na sian mas na boratna 1.000 darik,* dohot 2 barang na sian tombaga na denggan jala na marhillong songon mas.

28 Dung i hudok ma tu nasida, “Badia do hamu di Jahowa,+ jala badia do akka barang on. Nungnga dilehon perak dohot mas on sian ias ni roha gabe pelean tu Jahowa Debata ni akka ompumuna. 29 Alani i, manat ma jaga hamu akka barang i sahat tu na ditimbang hamu i di akka ruangan* na di jabu ni Jahowa di Jerusalem.+ Ai timbangonmuna do i di jolo ni akka malim kepala, halak Lepi, dohot di jolo ni pamimpin ni halak Israel na sasaompu.” 30 Dibuat akka malim dohot halak Lepi ma perak, mas, dohot akka barang naung ditimbang i. Jala diboan nasida ma i tu jabu ni Debatanami na di Jerusalem.

31 Ujungna, borhat ma hami sian Sunge Ahapa+ tu Jerusalem di ari na pasappulu duahon di bulan na parjolo.+ Didongani Debatanami do hami, jala dipalua do hami sian akka musu dohot sian akka pangarampok saleleng di pardalanan. 32 Dung i sahat ma hami di Jerusalem+ jala disi ma hami tinggal saleleng tolu ari. 33 Di ari na paopatton, hutimbang hami perak, mas, dohot akka barang i di jabu ni Debatanami.+ Jala dipasahat hami ma i tu si Meremot+ anak ni Malim Uria. Adong do muse disi si Eleasar anak ni si Pinehas dohot akka halak Lepi, i ma si Josabad+ anak ni si Jesua dohot si Noaja anak ni si Binnui.+ 34 Dietong jala ditimbang do sude barang i, dung i disuratton ma sadia boratna. 35 Sude ma halak na hea ditawan i mangalehon pelean situtungon tu Debata ni Israel. Dipelehon nasida ma 12 lombu jantan+ lao tu sude halak Israel. Dipelehon ma muse 96 biru-biru jantan,+ 77 anak ni biru-biru jantan, dohot 12 hambing jantan+ na gabe pelean hasesaan ni dosa. Dilehon ma i sude lao gabe pelean situtungon tu Jahowa.+

36 Dung i dilehon hami ma surat ni raja i+ tu akka kepala ni gubernur* dohot tu akka gubernur ni akka luat na di Bariba ni Sunge.*+ Gabe diurupi nasida ma bangso on, jala dilehon nasida ma akka na porlu tu jabu ni Debata na sittong.+

9 Dung sae i sude, ro ma akka pejabat mandapotton au. Didok nasida ma, “Sai diihutton halak Israel, akka malim, dohot halak Lepi do akka bangso na asing, i ma halak Kanaan, halak Het, halak Perisi, halak Jebus, halak Ammon, halak Moab, halak Mesir,+ dohot halak Amori.+ Jala diulahon nasida do akka ulaon na dihagigihon Debata+ songon na diulahon akka bangso i. 2 Dibuat nasida do boru ni akka bangso na asing i gabe istri dohot parumaen ni nasida.+ Saonari nungnga mardomu be bangso na badia+ on tu akka bangso i.+ Jala akka pejabat dohot akka pejabat daerah do na parjolo mangulahon hajahaton on.”

3 Dung hubege hata ni nasida i, huribak ma bajukku jala hucabut ma obuk dohot jangguttu. Dung i hundul ma au tarhatotong. 4 Ro ma sude halak na makkabiari hata ni Debata ni Israel tu labbungku. Ai dohot do nasida marsak alani hajahaton ni bangso na hea ditawan on. Hundul do au tarhatotong sahat tu borngin, sappe dapot tikkina mangalehon pelean sipanganon.*+

5 Dung dapot tikkina mangalehon pelean sipanganon,+ jongjong ma au. Hupakke dope abittu na maribak i. Dung i marsinggang ma au jala hupaherbang ma tanganku duassa tu Jahowa Debatakku. 6 Hudok ma, “Ale Debatakku, maila do au. Huhilala dang tama au martangiang tu Ho. Ai nungnga tung godang hasalaannami pola untimbo sian ulunami jala nungnga martimbun hajahatonnami sahat tu langit.+ 7 Nungnga tung godang hajahatonnami mulai sian tikki ni akka ompunami sahat tu sadari on.+ Alani i, gabe dipasahat ma hami, akka rajanami, dohot akka malimnami tu akka raja ni bangso na asing. Jala dipamate do hami mamakke podang,+ diboan do hami gabe tawanan,+ dirampok,+ jala dipaila songon na masa sahat tu sadari on.+ 8 Alai saonari, dipatudu Ho do asi ni roham tu hami ale Jahowa Debatanami. Dipalua Ho do deba sian hami, dilehon Ho do inganan na aman di ingananmu na badia on,+ dibahen Ho do hami marlas ni roha ale Debatanami, jala diloas Ho do hami maradi satokkin tikki gabe hatoban dope hami. 9 Ai nang pe hatoban hami,+ dang hea ditinggalhon Ho hami saleleng diparhatoban. Dipatuduhon Ho do holong ni roham* tu hami di jolo ni akka raja ni Persia.+ Dilehon Ho do tu hami gogo na imbaru asa boi hupajongjong hami jabum naung maruppak i.+ Jala dijaga Ho do* hami saleleng di Juda dohot di Jerusalem.

10 “Saonari ale Debatanami, aha ma na tardok hami dung salpu akka na masa i? Ai hulanggar hami do muse akka parettam. 11 Didok Ho do marhite akka panurirangmu,* ‘Ramun* do luat na lao gabe ingananmuna i. Ai ramun do akka halak na tinggal disi. Diulahon nasida do ulaon na dihagigihon Debata di saluhut luat i.+ 12 Alani i unang ma lehon borumuna gabe parumaen ni nasida, jala unang ma alap boru ni nasida gabe parumaenmuna.+ Unang ma urupi nasida, asa unang dame jala sonang ngolu ni nasida.+ Dung i lam marhuaso ma hamu jala boi ma allangonmuna akka hasil na denggan sian luat i. Jala boi ma lehonmuna luat i gabe parbagianan tu akka anakmuna saleleng ni lelengna.’ 13 Dung masa sudena on alani hajahaton dohot hasalaannami, huboto hami ma dang dihukum Ho hami songon godang ni hajahatonnami.+ Jala dipalua Ho do hami na adong dison.+ 14 Alani i, dang patut be aloonnami muse parettam jala marhasohotan tu akka halak na mangulahon ulaon na dihagigihon roham.+ Ai gabe muruk ma Ho annon tu hami jala pamateonmu ma hami sude, sappe dang adong be na mangolu. 15 Ale Jahowa Debatanami, sai sittong do pambahenanmu.+ Dipaloas Ho dope hami mangolu sahat tu sadari on. Saonari, huakkui hami ma hasalaannami tu Ho. Ai sasittongna dang patut hami jongjong di jolom alani hajahatonnami.”+

10 Martangiang+ dope si Esra jala mangakkui dosa ni bangsona. Tangis do ibana jala marsinggang di jolo ni jabu ni Debata na sittong. Tikki i, marroan ma halak Israel tu labbungna, bawa, borua, nang dakdanak. Jala mangangguki ma nasida. 2 Dung i ro ma si Sekania anak ni si Jehiel+ pinoppar ni si Elamit.+ Didok ibana ma tu si Esra, “Nungnga mardosa hami tu Debatanami. Ai hubuat hami do boru ni bangso na asing gabe istrinami.+ Nang pe songon i, boi dope marasi ni roha Debata tu halak Israel. 3 Saonari, taihutton ma poda ni Jahowa dohot poda ni akka halak na makkabiari paretta ni Debatanta.+ Marjanji ma hita tu Debatanta+ na lao tausir do akka istri na sian bangso na asing i dohot na ditubuhon nasida. Taihutton ma Patik i. 4 Hehe ma ho, tabahen ma na porlu taulahon. Ikkon barani do ho. Ai tanggung jawabmu do pasaehon parsoalan on. Diurupi hami pe ho.”

5 Jongjong ma si Esra, jala disuru ibana ma akka malim kepala,* halak Lepi, dohot sude halak Israel marsumpa lao mangulahon na nidok ni nasida.+ Dung i marsumpa ma nasida. 6 Lao ma si Esra sian jolo ni jabu ni Debata na sittong i, jala masuk ma ibana tu ruangan* ni si Johohanan anak ni si Eliasib na di bagas joro. Alai dang mangan jala dang minum ibana disi. Ai lungun dope rohana ala dang setia bangso na hea ditawan i.+

7 Dung i, dipaboa nasida ma tu sude luat na di Juda dohot na di Jerusalem asa marpungu sude halak na hea ditawan i di Jerusalem. 8 Jala nungnga ditottuhon akka pejabat dohot akka pangituai,* manang ise na so ro di bagasan tolu ari ikkon buaton do sude artana. Jala ikkon diusir do ibana sian punguan ni akka halak na hea ditawan i.+ 9 Jadi dung tolu ari, marpungu ma sude halak Juda dohot halak Benjamin di Jerusalem di ari na paduapuluhon bulan na pasiahon. Hundul ma nasida sude di alaman ni jabu ni Debata na sittong. Hitir-hitir do nasida ala diboto nasida naung marsala nasida jala ala dobar udan tikki i.

10 Dung i jongjong ma Malim Esra jala didok ibana ma tu nasida, “Nungnga mardosa hamu tu Debata. Ai dibuat hamu do boru ni bangso na asing gabe istrimuna.+ Gabe ditambai hamu dosa ni halak Israel. 11 Saonari akkui hamu ma dosamuna tu Jahowa Debata ni akka ompumuna, jala ulahon hamu ma lomo ni rohana. Pasiding hamu ma dirimuna sian akka bangso na asing dohot sian istrimuna na sian bangso na asing i.”+ 12 Gogo ma soara ni sude halak na marpungu i mandok, “Huulahon hami pe manang aha na nidokmu. 13 Alai dang mungkin sai jongjong hami di luar on. Ai torop do halak na marpungu on jala musim udan do saonari. Asing ni i, dang boi holan sadari manang dua ari pasaehon parsoalan on. Ai nungnga balga dosanami ala dialo hami Debata. 14 Alani i lok ma tinggal akka pejabatnami dison lao pasaehon parsoalan on.+ Dung i ro pe tuson akka halak sian ganup kota naung mangoli tu akka borua sian bangso na asing. Ro pe nasida rap dohot akka pangituai dohot akka hakim di kota ni nasida be di tikki naung ditottuhon, asa unang muruk be Debata tu hami alani parsoalan on.”

15 Alai dang olo si Jonatan anak ni si Asahel dohot si Jehseya anak ni si Tikwa mangoloi hata i. Jala sapandapot do si Mesulam dohot si Sabetai+ halak Lepi i tu nasida na dua. 16 Nang pe songon i, dioloi halak Jahudi na asing na hea ditawan i do hata i. Dung i marpungu ma Malim Esra dohot akka pamimpin na sasaompu naung didaftar goarna di ari na parjolo di bulan na pasappuluhon lao pasaehon parsoalan i. 17 Jala dipasae nasida ma parsoalan taringot akka halak na mangoli tu akka borua sian bangso na asing i di ari na parjolo bulan na parjolo. 18 Dung dipareso, adong do hape deba anak ni akka malim na mangoli tu akka borua sian bangso na asing,+ i ma si Maaseya, si Elieser, si Jarib, dohot si Gedalia. Akka anak ni si Jesua+ do nasida dohot akka haha anggina. Jala anak ni si Jehosadak do si Jesua. 19 Marjanji ma nasida mangusir akka istri ni nasida na sian bangso na asing i. Jala ikkon dipelehon nasida do sada biru-biru jantan ni nasida be ala nungnga marsala nasida.+

20 On ma akka malim na asing na mangulahon sisongon i: Sian pinoppar ni si Immer,+ i ma si Hanani dohot si Sebadia. 21 Sian pinoppar ni si Harim,+ i ma si Maaseya, si Elia, si Semaya, si Jehiel, dohot si Usia. 22 Sian pinoppar ni si Pashur,+ i ma si Eleonai, si Maaseya, si Ismael, si Netaneel, si Josabad, dohot si Eleasa. 23 Sian halak Lepi, i ma si Josabad, si Simei, si Kelaya (manang si Kelita), si Petahia, si Juda, dohot si Elieser. 24 Sian akka parende, i ma si Eliasib. Jala sian akka panjaga ni gerbang, i ma si Sallum, si Telem, dohot si Uri.

25 On ma halak Israel na asing na mangulahon sisongon i: Sian pinoppar ni si Paras,+ i ma si Ramia, si Jesia, si Malkia, si Mijamin, si Eleasar, si Malkia, dohot si Benaya. 26 Sian pinoppar ni si Elamit,+ i ma si Matania, si Sakaria, si Jehiel,+ si Abdi, si Jeremot, dohot si Elia. 27 Sian pinoppar ni si Jattu,+ i ma si Eleonai, si Eliasib, si Matania, si Jeremot, si Sabad, dohot si Asisa. 28 Sian pinoppar ni si Bebai,+ i ma si Johohanan, si Hanania, si Sabai, dohot si Atlai. 29 Sian pinoppar ni si Bani, i ma si Mesulam, si Malluk, si Adaya, si Jashub, si Seal, dohot si Jeremot. 30 Sian pinoppar ni si Pahat-moab,+ i ma si Adna, si Kelal, si Benaya, si Maaseya, si Matania, si Bezalel, si Binnui, dohot si Manasse. 31 Sian pinoppar ni si Harim,+ i ma si Elieser, si Isija, si Malkia,+ si Semaya, si Simeon, 32 si Benjamin, si Malluk, dohot si Semaria. 33 Sian pinoppar ni si Hasum,+ i ma si Matenai, si Matatta, si Sabad, si Elipelet, si Jeremai, si Manasse, dohot si Simei. 34 Sian pinoppar ni si Bani, i ma si Maadai, si Amram, si Uel, 35 si Benaya, si Bedaya, si Keluhi, 36 si Pania, si Meremot, si Eliasib, 37 si Matania, si Matenai, dohot si Jasu. 38 Sian pinoppar ni si Binnui, i ma si Simei, 39 si Selemia, si Natan, si Adaya, 40 si Maknadeboi, si Sasai, si Sarai, 41 si Azarel, si Selemia, si Semaria, 42 si Sallum, si Amaria, dohot si Josep. 43 Sian pinoppar ni si Nebo, i ma si Jeiel, si Matitia, si Sabad, si Sebina, si Jahdai, si Joel, dohot si Benaya. 44 Akka on ma sude halak na mangoli tu borua na sian bangso na asing.+ Dipalao nasida ma istri dohot gelleng ni nasida i.+