2 KRONIKA
1 Lam hot ma harajaon ni si Salomo anak ni si Daud. Ai didongani Jahowa Debatana do ibana jala dibahen do ibana massai sangap.+
2 Disuru si Salomo ma marpungu sude halak Israel, akka pamimpin ni na sasaribu dohot na sasaratus, akka hakim, dohot sude pamimpin ni halak Israel, i ma akka pamimpin ni na sasaompu. 3 Dung i, lao ma si Salomo dohot sude halak Israel tu Dolok Gibeon.+ Ai disi do kemah parpunguan ni Debata na sittong. Si Musa naposo ni Jahowa i do na mambahen kemah i tikki di gurun. 4 Alai nungnga diboan si Daud hian poti parpadanan ni Debata na sittong i sian Kiriat-jearim+ tu inganan naung diparade ibana. Ai nungnga dipajongjong ibana sada kemah di Jerusalem inganan ni poti parpadanan i.+ 5 Alai anggo langgatan na sian tombaga+ dibahen do di jolo ni tabernakel ni Jahowa. Jala di jolo ni langgatan i do si Salomo dohot sude halak Israel martangiang.* Si Bezalel+ anak ni si Uri pahoppu ni si Hur do na mambahen langgatan i. 6 Dilehon si Salomo ma pelean disi di jolo ni Jahowa. Dibahen ibana ma 1.000 pelean situtungon di ginjang ni langgatan na sian tombaga+ na adong di kemah parpunguan i.
7 Dung borngin, dipataridahon Debata ma dirina tu si Salomo di bagasan nipi. Didok ma tu si Salomo, “Pangido ma sian Au manang aha lomo ni roham.”+ 8 Didok si Salomo ma, “Nungnga dipatuduhon Ho holong ni roham* na massai balga i tu bapakku si Daud.+ Jala nungnga dibahen Ho au gabe raja manggattihon ibana.+ 9 Saonari ale Debata Jahowa, sai pasaut ma janji naung binahenmu tu bapakku si Daud.+ Ai nungnga dibahen Ho au gabe raja ni bangso on, na dos songon orbuk godangna.+ 10 Lehon ma di au bisuk dohot parbinotoan+ lao mamimpin bangso on. Ai dang boi au mangadili bangso na bolon on molo dang diurupi Ho au.”+
11 Dung i didok Debata ma tu si Salomo, “Dang dipangido ho arta, hamoraon, dohot hasangapon. Dang dipangido ho asa ganjang umurmu jala asa mate akka halak na marsogo ni roha tu ho. Alai dipangido ho do bisuk dohot parbinotoan asa boi ho gabe hakim ni bangsokkon, ai ho do na hupillit gabe raja ni nasida.+ 12 Alani i, lehonokku ma bisuk dohot parbinotoan tu ho. Jala lehonokku ma muse arta, hamoraon, dohot hasangapon tu ho. Dang adong raja na songon ho, na mamaretta andorang so ho manang na mamaretta dukkon ho.”+
13 Dung i mulak ma si Salomo sian kemah parpunguan na di Dolok Gibeon+ tu Jerusalem. Jala mamaretta ma ibana di Israel. 14 Dietong si Salomo ma kareta hoda dohot akka hodana.* Adong ma 1.400 kareta hodana jala 12.000 hodana.*+ Disippan ibana ma i di kota panimpanan ni karetana+ dohot di inganan na jonok tu istanana di Jerusalem.+ 15 Songon godang ni batu do dibahen raja i godang ni perak dohot mas di Jerusalem.+ Jala godang ni hau ares dos songon godang ni hau ara na di Tombak Syefela.+ 16 Sian Mesir do dituhor si Salomo akka hodana.+ Akka partiga-tigana ma na manuhor akka hoda i.* Jala sarupa do torus arga ni hoda i.+ 17 Arga ni sada kareta sian Mesir, i ma 600 hepeng perak jala arga ni sada hoda, i ma 150 hepeng perak. Digadis nasida do i muse tu sude raja ni halak Het dohot tu akka raja ni Siria.
2 Dung i, disuru si Salomo ma asa dipajongjong sada jabu na pasangappon goar ni Jahowa,+ jala disuru ma asa dipajongjong istanana.+ 2 Dipillit si Salomo ma 70.000 parkarejo na mangangkat barang, 80.000 halak gabe panokkok batu di dolok,+ dohot 3.600 halak na gabe pengawas ni nasida.+ 3 Dung i disuru si Salomo ma asa didok songon on tu si Hiram+ raja ni Tirus, “Najolo, diurupi ho do bapakku si Daud paradehon hau ares lao pajongjokkon istanana.+ Saonari bahen ma songon i tu au. 4 Ai naeng pajongjongokku do sada jabu na pasangappon goar ni Jahowa Debatakku. Dung i pasahatonku ma jabu i tu Debata asa disi au manutung dupa+ jala asa boi toktong lehonon roti pelean+ disi. Lehonokku ma muse disi pelean situtungon ganup manogot dohot borngin,+ tikki ari Sabat,+ tikki pesta bulan baru,+ jala saleleng adong perayaan+ tu Jahowa Debatanami. On ma na ikkon ulahonon ni halak Israel saleleng ni lelengna. 5 Ikkon balga jala bagak do jabu na lao hupajongjong i. Ai ussangap do Debatanami sian akka debata na asing. 6 Ise ma na boi pajongjokkon jabu di Ibana? Haru sude pe langit i dang siat gabe ingananna.+ Ise ma haroa au? Dang boi au pajongjokkon jabu di Ibana. Holan inganan manutung pelean do na boi hupajongjong. Di inganan i ma au manutung pelean asa nakkok timusna tu Ibana. 7 Saonari suru ma ro tuson sahalak parkarejom na malo mambahen akka barang sian mas, perak, tombaga,+ bosi, abit wol na ungu, bonang na rara, bonang na balau, dohot na malo mambahen hiasan. Karejo ma ibana di Juda dohot di Jerusalem rap dohot akka parkarejokku na malo, naung dipillit bapakku si Daud.+ 8 Taruhon ma muse tuson akka hau ares, hau juniper,+ dohot hau cendana+ na sian Libanon. Ai takkas do huboto malo do akka parkarejom manaba akka hau na di Libanon.+ Husuru pe akka parkarejokku rap karejo dohot akka parkarejom+ 9 paradehon godang hau. Ai massai balga do jabu na lao pajongjongokku. 10 Huparade pe sipanganon tu akka parkarejom+ na manaba hau. Huparade pe 20.000 kor* gandum, 20.000 kor barli,* 20.000 bat* anggur, dohot 20.000 bat miak.”
11 Dikirim si Hiram raja ni Tirus ma surat tu si Salomo. Didok ma, “Ala na holong do roha ni Jahowa tu bangsona, umbahen na dibahen ho gabe raja ni nasida.” 12 Dung i didok si Hiram ma, “Sai dipuji ma Jahowa Debata ni Israel, na mambahen langit dohot tano on. Ai dilehon ibana do tu Raja Daud anak na marbisuk+ jala na malo manottuhon dia sipillitonna.+ Ibana do na lao pajongjokkon jabu ni Jahowa dohot sada istana di ibana. 13 Husuru pe tusi sahalak tukkang na malo, na margoar si Hiram-abi.+ 14 Sian pinoppar ni marga Dan do omakna jala halak Tirus do bapakna. Malo do ibana mambahen akka barang sian mas, perak, tombaga, bosi, akka batu, akka hau, abit wol na ungu, bonang na balau, kain na halus, dohot bonang na rara.+ Malo do muse ibana mambahen hiasan jala boi do diulahon ibana sude ulaon na dipasahat tu ibana.+ Karejo pe ibana rap dohot akka parkarejom na malo dohot parkarejo na malo na pinillit ni bapakmu si Daud. 15 Saonari taruhon ma tuson gandum, barli, miak, dohot anggur songon naung dijanjihon tuan tu akka naposomon.+ 16 Hutaba hami pe akka hau na sian Libanon+ manang na sadia godang pangidoanmu. Huboan hami pe i tu laut jala hubahen hami ma i gabe rakit asa boi diboan tu Joppe.+ Sian i, hamu ma na mamboan tu Jerusalem.”+
17 Dung i dietong si Salomo ma godang ni akka panoppang na adong di Israel,+ songon na hea dibahen si Daud bapakna.+ Adong 153.600 halak godang ni nasida. 18 Dipillit si Salomo ma 70.000 halak sian nasida gabe parkarejo na mangangkat barang, 80.000 halak gabe panokkok batu+ di dolok, jala 3.600 halak na gabe pengawas ni nasida.+
3 Dung i dipajongjong si Salomo ma jabu ni Jahowa+ di Dolok Moria+ na di Jerusalem. Hea do Jahowa pataridahon dirina tu si Daud disi,+ i ma di inganan pardegean ni si Ornan+ halak Jebus i. On do inganan ni bagas joro na diparade si Daud. 2 Mulai ma dipajongjong si Salomo bagas joro i di ari na paduahon, di bulan na paduahon, taon na paopatton ibana mamaretta. 3 Dibahen si Salomo ma fondasi ni jabu ni Debata na sittong i. Ganjangna 60 asta jala bidangna 20 asta,+ mangihutton ukkuran na leleng.* 4 Bidang ni terras na di jolo ni jabu i 20 asta, dos tu bidang ni jabu i, jala 20 asta* ma timbona. Dung i dilappis ma i sian bagasan mamakke mas murni.+ 5 Dibahen ibana ma hau juniper tu dinding ni ruangan* na balga, jala dilappis ibana ma i mamakke mas murni.+ Dung i diukir ma gambar ni akka hau palem+ dohot gambar ni akka ratte disi.+ 6 Sian Parwaim do mas+ na dipakke i jala dihias do jabu i mamakke akka batu na arga.+ 7 Dung i dilappis ibana ma mas tu jabu i, tu langit-langitna, tu kusen ni akka pintu, tu dindingna, dohot tu akka pintuna.+ Jala diukir ibana ma gambar ni akka kerubim* di dindingna.+
8 Dibahen si Salomo ma muse Inganan na Massai Badia.+ Ganjangna 20 asta jala bidangna 20 asta. Dos do ganjang ni inganan i tu bidang ni jabu i. Dung i, dilappis ma i mamakke mas murni na boratna 600 talenta.*+ 9 Borat ni mas na dipakke lao mambahen akka pakku 50 sekel.* Jala dilappis ma akka ruangan na di ginjang mamakke mas.
10 Dung i dibahen ma dua patung ni kerubim di Inganan na Massai Badia, jala dilappis ma i mamakke mas.+ 11 Habong ni kerubim+ na dua i, ganjangna 20 asta. Lima asta ma ganjang ni sada habong ni kerubim i, jala dais do i tu dinding ni jabu i. Lima asta ma ganjang ni habong na sada nai, jala dais do i tu habong ni kerubim na sada nai. 12 Habong ni kerubim na sada nai pe, ganjangna lima asta. Jala dais do i tu dinding ni jabu i. Lima asta ma muse ganjang ni habong na sada nai, jala dais do i tu habong ni kerubim na parjolo. 13 Hembang do habong ni akka kerubim i jala 20 asta ma ganjangna. Jongjong do akka kerubim i mangida tu bagasan.*
14 Dibahen ibana ma tire+ sian bonang na balau, sian abit wol na piolet, sian bonang na rara, dohot sian kain na halus. Jala dibahen ibana ma gambar ni akka kerubim disi.+
15 Dibahen ibana ma muse dua tiang+ di jolo ni jabu i, 35 asta ma ganjang ni tiang na dua i. Jala lima asta ma timbo ni ulu ni ganup tiang i.+ 16 Dibahen ibana ma akka ratte di ulu ni ganup tiang i. Jala dibentuk ma 100 hiasan buah delima makkaliangi akka ratte i. 17 Dipajongjong ibana ma akka tiang di jolo ni bagas joro i. Dibahen ma sada di sabola kanan* jala sada nai di sabola kiri.* Na di sabola kanan dibahen ma goarna Jakin,* jala na di sabola kiri dibahen ma goarna Boas.*
4 Dung i, dibahen si Salomo ma langgatan na sian tombaga,+ 20 asta ma ganjangna, 20 asta ma bidangna, jala 10 asta ma timbona.
2 Dibahen ibana ma muse inganan ni aek na balga jala na bulat, digoari ma i Laut Tombaga.+ Bidangna sian pinggir na sada tu pinggir na sada nai 10 asta, timbona 5 asta, jala kalilingna 30 asta.*+ 3 Di toru ni pinggir ni Laut Tombaga i adong do dua baris hiasan na songon labu.+ Sappulu labu ma di bagasan sada asta. Jala di bagasan sada cetakan do dibahen labu i dohot Laut Tombaga i. 4 Dibahen ma 12 patung lombu jantan.+ Tolu patung i mangida tu utara, tolu tu barat, tolu tu selatan, jala tolu tu timur. Masitundalan do sude patung lombu jantan i. Dung i dibahen ma Laut Tombaga i tu ginjang ni 12 patung lombu i. 5 Nasa bidang ni talapak ni tangan* ma hapal ni Laut Tombaga i. Pinggirna songon pinggir ni cakkir jala songon bunga lili na kabbang. Siat do 3.000 bat* aek disi.
6 Dung i dibahen ibana ma sappulu bak. Dibahen ma lima di sabola kanan jala lima di sabola kiri.+ Disi do nasida manussi akka pelean situtungon.+ Alai aek na sian Laut Tombaga i do na dipakke akka malim manussi tangan dohot pat ni nasida.+
7 Dibahen ma muse sappulu inganan ni lampu na sian mas.+ Nungnga ditottuhon hian songon dia bentukna.+ Dibahen ma i di bagas joro, lima di sabola kanan jala lima di sabola kiri.+
8 Dibahen ma muse sappulu meja di bagas joro i, lima di sabola kanan jala lima di sabola kiri.+ Jala dibahen ma muse 100 makkuk na sian mas.
9 Dibahen ma muse alaman+ ni akka malim,+ alaman na bolak,+ dohot akka pintu gerbang ni alaman. Dung i dilappis ma akka pintu i mamakke tombaga. 10 Dibahen ma muse Laut Tombaga di sabola kanan, i ma di sabola selatan.+
11 Dibahen si Hiram do muse akka bak na asing, sekop, dohot akka makkuk.+ Diulahon si Hiram do sude na nidok ni Raja Salomo. Akka on ma na dibahen ibana di jabu ni Debata na sittong:+ 12 Dibahen do dua tiang,+ dua ulu ni tiang na songon makkuk, dua jaring+ na dibahen tu ulu ni tiang i, 13 dohot 400 hiasan buah delima.+ Disusun do hiasan buah delima i tu jaring na dua i. Jala dibahen ma i dua baris di ganup jaring. Laos jaring i ma na dibahen tu ulu ni tiang na songon makkuk i.+ 14 Dibahen do sappulu kareta dohot sappulu bak na dipeakkon tu kareta i.+ 15 Dibahen do muse Laut Tombaga dohot 12 patung lombu jantan na di toru ni Laut Tombaga i.+ 16 Dibahen ibana do muse akka inganan ni sirabun, sekop, garpu,+ dohot akka barang na sian tombaga. Dibahen si Hiram-abiv+ do sudena i tu jabu ni Jahowa, songon na nidok ni Raja Salomo. 17 Disuru raja i do asa sian tano liat dibahen cetakan ni akka barang i. Jala dibahen do i di huta na di holang-kolang ni Sukot+ dohot Zereda na di Jordan. 18 Massai godang do dibahen si Salomo akka barang i. Alani i, dang taretong sadia borat ni tombaga na dipakke.+
19 On ma akka barang na dibahen si Salomo+ tu jabu ni Debata na sittong: langgatan na sian mas,+ akka meja+ inganan ni roti pelean,+ 20 akka inganan ni lampu, dohot akka lampuna na sian mas murni.+ Dipagalak do akka lampu i jala dibahen di jolo ni Inganan na Massai Badia songon naung ditottuhon hian. 21 Dibahen do muse akka hiasan bunga na kabbang, akka lampu, akka penjepit ni sumbu, sudena i dibahen sian mas murni. 22 Dibahen do muse alat pamatehon api, akka makkuk, akka cakkir, dohot inganan ni gara ni api. Sudena i dibahen sian mas murni. Dibahen do muse akka pintu ni Inganan na Massai Badia+ dohot pintu ni Inganan na Badia. Sudena i dibahen sian mas.+
5 Sae ma sude diulahon si Salomo akka na porlu tu jabu ni Jahowa.+ Dung i, dipamasuk ibana ma akka barang tu inganan panimpanan ni arta na adong di jabu ni Debata na sittong.+ Dipamasuk ibana do akka barang naung dipabadia si Daud bapakna,+ i ma akka perak, akka mas, dohot akka barang na asing. 2 Dipapungu si Salomo ma akka pangituai* ni halak Israel, i ma sude pamimpin ni ganup marga dohot pamimpin ni na sasaompu. Ro ma nasida tu Jerusalem. Diboan nasida do poti parpadanan ni Jahowa sian Kota ni si Daud,+ i ma kota Sion.+ 3 Marpungu ma sude halak Israel di jolo ni raja di perayaan* bulan na papituhon.+
4 Ro ma sude pangituai ni halak Israel jala diangkat halak Lepi ma poti parpadanan i.+ 5 Diboan akka malim dohot halak Lepi* ma poti parpadanan, kemah parpunguan,+ dohot sude barang na di bagasan ni kemah parpunguan i na dipakke lao manomba Debata. 6 Marpungu ma Raja Salomo dohot sude halak Israel na dijou i di jolo ni poti parpadanan. Massai godang do biru-biru dohot lombu na dipelehon nasida.+ Dang taretong godangna. 7 Dung i diboan akka malim ma poti parpadanan ni Jahowa i tu inganan naung ditottuhon. Diboan ma i tu Inganan na Massai Badia na adong di jabu i. Dipeakkon ma i di toru ni habong ni akka kerubim.*+ 8 Hembang do habong ni kerubim i tu atas ni poti parpadanan i. Gabe dilinggomi ma poti parpadanan i dohot hau pangusungna.+ 9 Ganjang do hau pangusungna i. Alani i, gabe tarida ma ujung ni hau pangusung i sian Inganan na Badia na di jolo ni Inganan na Massai Badia. Alai dang tarida i sian luar. Jala sahat tu sadari on disi dope i. 10 Holan batu panuratan na dua i do na adong di bagasan poti parpadanan i. Si Musa do na pamasukkon i tikki di Horeb.+ Disi do dibahen Jahowa parjanjian+ tu halak Israel dung kaluar nasida sian Mesir.+
11 Sude malim na ro tusi, sian punguan na dia pe nasida,+ nungnga pabadiahon diri ni nasida.+ Tikki kaluar akka malim sian jabu i, 12 jongjong ma halak Lepi na gabe parende+ di sabola timur ni langgatan i. Si Asap,+ si Heman,+ si Jedutun,+ akka anak ni nasida, dohot akka haha anggi ni nasida do pamimpin ni akka parende i. Dipakke nasida do abit na sian kain na halus. Jala ditiop nasida do simbal,* akka alat musik na martali, dohot harpa. Adong do muse disi 120 malim na martarompet.+ 13 Dung i, marsada ma akka parende dohot akka halak na martarompet mamuji Jahowa jala mandok mauliate tu Ibana. Tikki i, tarbege do soara ni tarompet, simbal, dohot soara ni alat musik na asing. Laos dipuji nasida ma Jahowa, jala didok ma, “Ai na burju do Ibana. Toktong do dipatudu Ibana holong ni rohana* sahat tu saleleng ni lelengna.”+ Tikki didok nasida songon i, ro ma ombun jala ditutupi ma jabu ni Jahowa i.+ 14 Gabe dang boi be marhobas akka malim alani ombun i. Ai nungnga digohi hamuliaon ni Jahowa jabu ni Debata na sittong i.+
6 Didok si Salomo ma, “Nungnga didok Jahowa na lao maringanan Ibana di inganan na massai holom.+ 2 Nungnga hupajongjong be sada jabu na balga di Ho lao gabe ingananmu saleleng ni lelengna.”+
3 Dung i, diida raja i ma doppak halak Israel na jongjong disi. Jala dipangido ma asa dipasu-pasu Debata nasida.+ 4 Didok ibana ma, “Pinuji ma Jahowa Debata ni Israel. Ai nungnga dipasaut Ibana janjina tu si Daud bapakku. Didok Ibana do, 5 ‘Mulai huboan bangso Israel kaluar sian Mesir, dang adong dope hupillit sada kota sian sude kota ni marga ni Israel, na gabe inganan lao pajongjokkon sada jabu na parohon sangap tu goarhu.+ Jala dang adong dope halak na hupillit gabe pamimpin ni bangsokku Israel. 6 Alai nungnga hupillit kota Jerusalem+ asa toktong dipasangap goarhu disi. Jala nungnga hupillit si Daud lao gabe raja ni bangsokku Israel.’+ 7 Lomo do roha ni bapakku si Daud lao pajongjokkon sada jabu na parohon sangap tu goar ni Jahowa Debata ni Israel.+ 8 Alai didok Jahowa do tu si Daud bapakku, ‘Las do rohakku mamboto na lao pajongjongonmu sada jabu lao pasangappon goarhu. 9 Nang pe songon i, dang ho na lao pajongjokkon jabu i. Anakmu* do na lao pajongjokkon jabu na parohon sangap tu goarhu.’+ 10 Saonari, nungnga saut be janji ni Jahowa. Nungnga hugattihon be bapakku si Daud gabe raja ni Israel+ songon janji ni Jahowa.+ Nungnga hupajongjong be sada jabu na parohon sangap tu goar ni Jahowa Debata ni Israel. 11 Jala huparade do disi inganan ni poti parpadanan, i ma inganan ni batu panuratan na marisi parjanjian+ na binahen ni Jahowa tu halak Israel.”
12 Jongjong ma sude halak* Israel di jolo ni langgatan ni Jahowa. Jala jongjong ma si Salomo di jolo ni langgatan i, huhut mangangkat tanganna.+ 13 Ai nungnga dibahen si Salomo sada panggung na sian tombaga di tonga-tonga ni alaman i.+ Ganjangna lima asta,* bidangna lima asta, jala timbona tolu asta. Nakkok ma ibana tusi jala marsinggang ma ibana di jolo ni sude halak Israel, huhut mangangkat tanganna doppak langit.+ 14 Didok ibana ma, “Ale Jahowa Debata ni Israel, dang adong Debata na songon Ho di surgo nang di tano on. Setia do Ho tu janjim jala dipatuduhon Ho do holong ni roham* tu akka na manomba Ho jala na mangihutton dalanmu sian nasa rohana.+ 15 Toktong do diingot Ho janji na binahenmu tu bapakku si Daud naposomi.+ Jala sadari on nungnga dipasaut Ho janjimi.+ 16 Saonari ale Jahowa Debata ni Israel, toktong ma ingot janji na binahenmu tu bapakku si Daud naposomi. Didok Ho do tu ibana, ‘Molo diparrohahon akka anakmu parange ni nasida, jala molo toktong nasida setia mangihutton akka dalanku+ songon na binahenmi, sian pinopparmu ma na toktong hundul di tahta ni harajaon ni Israel.’+ 17 Saonari, ale Jahowa Debata ni Israel, sai pasaut ma janji na binahenmu tu si Daud naposomi.
18 “Alai tutu do Debata naeng maringanan di tano on rap dohot jolma?+ Haru sude pe langit i dang siat gabe ingananmu.+ Lam jabu na hupajongjong on ma!+ 19 Ale Jahowa Debatakku, tangihon ma tangiang ni naposomon. Asi ma roham jala urupi ma naposomon. Tangihon ma pangidoan ni naposom na martangiang di jolom. 20 Sai tatap ma jabu on arian nang borngin lao manangihon naposom na martangiang doppak jabu on. Ai nungnga didok Ho naeng bahenonmu do goarmu disi.+ 21 Sai tangihon ma pangidoan ni naposomon dohot pangidoan ni bangsom Israel na martangiang doppak jabu on.+ Sai anggiat ma ditangihon Ho hami sian surgo ingananmi+ jala sai anggiat ma disesa Ho dosanami.+
22 “Molo adong halak na ditudu mangulahon na sala tu donganna jala disuru ibana marsumpa,* dung i ro ibana tu jolom tu langgatan na adong di jabu on,+ 23 tangihon ma ibana sian surgo jala adili ma naposomi. Balos ma ise na mangulahon na sala* jala bahen ma hukuman na pas tu ibana.+ Patudu ma ise na sittong* jala lehon ma upa na pas tu ibana.+
24 “Molo tung ditaluhon musuna bangso Israel ala nungnga mardosa nasida tu Ho,+ jala molo mulak nasida tu Ho, gabe dipasangap muse goarmu,+ jala martangiang+ nasida mangido asi ni roham di jabu on,+ 25 sai tangihon ma nasida sian surgo.+ Jala sesa ma dosa ni Israel bangsomi. Boan ma nasida mulak tu tano naung nilehonmu tu nasida dohot tu ompu ni nasida.+
26 “Molo tung mardosa halak Israel tu Ho,+ gabe ditutup Ho langit, jala dang diparo Ho udan,+ jala dibahen Ho nasida susa,* alai dukkon i martangiang nasida doppak jabu on, dipasangap nasida goarmu, jala dang diulahon nasida be dosa,+ 27 sai tangihon ma nasida sian surgo. Sesa ma dosa ni bangsom Israel naposomi. Paro ma udan+ tu tano na nilehonmu gabe parbagianan ni nasida. Jala ajari ma nasida mangihutton dalan na ikkon sidalanan ni nasida.+
28 “Molo tung masa haraparon di tano on,+ manang masa sahit di godang inganan,+ alogo na mohop na mambahen mosok suan-suanan, sahit ni* suan-suanan,+ manang molo ro akka sihapor* na mokkus,+ molo ro musu tu kota ni bangsomon* lao mangalo nasida,+ manang molo ro bala dohot sahit manang aha pe,+ 29 dung i diangkat nasida ma tangan ni nasida doppak jabu on+ jala martangiang,+ jala adong sasahalak manang sude bangso Israel i mangido asi ni roham+ (ai ganup nasida diboto be do sitaononna dohot hasusaanna),+ 30 sai tangihon ma nasida sian surgo ingananmi,+ jala sesa ma dosa ni nasida.+ Lehon ma upa na pas tu nasida. Ai diboto Ho do rohana jala holan Ho do na takkas mamboto roha ni jolma.+ 31 Alani i, ihuttonon ni nasida ma akka dalanmu saleleng mangolu nasida di tano na nilehonmu tu akka ompunami. Ai dihabiari nasida do Ho jala dipasangap nasida do Ho.
32 “Asing ni i, molo adong halak na sian bangso na asing na so sian bangso Israel ro sian na dao, ala dibege nasida taringot tu goarmu na massai sangap i+ dohot tanganmu na massai gogo i, molo ro ibana martangiang doppak jabu on,+ 33 sai tangihon ma ibana sian surgo ingananmi. Sai lehon ma sude pangidoan ni halak na sian bangso na asing i, asa sude halak na di tano on mamboto goarmu+ jala makkabiari Ho songon na binahen ni bangsom Israel. Jala sai anggiat ma diboto nasida, na parohon sangap tu goarmu do jabu na hupajongjong on.
34 “Molo disuru Ho bangsomon marporang mangalo musu ni nasida+ jala martangiang nasida+ tu Ho, doppak kota na pinillitmu dohot doppak jabu na hupajongjong lao pasangappon goarmu,+ 35 tangihon ma tangiang ni nasida sian surgo, asi ma roham tu nasida jala urupi ma nasida.+
36 “Molo muruk Ho tu bangsomon ala mardosa nasida (ai dang adong jolma na so mardosa),+ jala dipasombu Ho nasida ditaluhon musu, jala gabe diboan musu nasida tu huta na dao manang na jonok,+ 37 jala di huta ni musu i gabe manolsoli nasida, mulak roha ni nasida tu Ho, dipangido nasida asa asi roham, jala didok nasida, ‘Nungnga mardosa hami, nungnga mangulahon na sala hami, jala nungnga mangulahon na jahat,’+ 38 molo mulak nasida tu Ho sian nasa roha ni nasida+ dohot sian nasa ngolu* ni nasida, di huta ni musu na mamboan nasida,+ jala molo martangiang nasida doppak tano na nilehonmu tu ompu ni nasida, doppak kota na pinillitmu,+ dohot doppak jabu na hupajongjong lao parohon sangap tu goarmu, 39 tangihon ma nasida sian surgo ingananmi. Tangihon ma tangiang ni nasida, asi ma roham, jala urupi ma nasida.*+ Sesa ma dosa ni bangsom na mardosa tu Ho.
40 “Saonari ale Debatakku, sai tatap jala tangihon ma halak na martangiang di* inganan on.+ 41 Ale Debata Jahowa, ro ma Ho tu jabu ingananmon.+ Ro ma Ho rap dohot poti parpadanan na patuduhon na marhuaso do Ho. Ale Debata Jahowa, sai marabit haluaon* ma akka malimmu. Jala sai marlas ni roha ma akka naposom na setia alani haburjuonmu.+ 42 Ale Debata Jahowa unang ma tinggalhon* halak na pinillitmu.*+ Sai ingot ma holong* na pinatudum tu si Daud naposomi.”+
7 Dung sae si Salomo martangiang,+ turun ma api sian langit+ manutung pelean situtungon dohot akka pelean na asing. Jala digohi hamuliaon ni Jahowa ma jabu i.+ 2 Gabe dang boi be masuk akka malim tu jabu ni Jahowa. Ai nungnga digohi hamuliaon ni Jahowa jabu ni Jahowa i.+ 3 Sude do halak Israel mangida api na turun sian langit i. Jala diida nasida do jabu i digohi hamuliaon ni Jahowa. Gabe marsinggang ma nasida tu lante jala marsomba. Dipuji nasida ma Jahowa jala didok, “Ai na burju do Ibana. Toktong do dipatudu Ibana holong ni rohana* sahat tu saleleng ni lelengna.”
4 Dung i dilehon raja i dohot sude halak Israel ma akka pelean tu Jahowa.+ 5 Dipelehon Raja Salomo ma 22.000 lombu dohot 120.000 biru-biru. Songon i ma raja dohot bangso Israel mambahen pesta di jabu ni Debata na sittong paboa naung sae jabu i.+ 6 Jongjong ma akka malim di inganan ni nasida martugas. Jongjong do muse halak Lepi na maniop akka alat musik na dipakke lao mamuji Jahowa.+ Si Daud do na mambahen akka alat musik i na dipakke nasida* lao mandok mauliate tu Jahowa, “ai toktong do dipatudu Ibana holong ni rohana* sahat tu saleleng ni lelengna”. Jongjong do sude halak Israel disi. Jala martarompet do akka malim+ di jolo ni nasida.
7 Dung i, dipabadia si Salomo ma tonga-tonga ni alaman na di jolo ni jabu ni Jahowa. Ai disi do pelehononna pelean situtungon+ dohot tabo-tabo na sian pelean pardamean.* Alana pagellengku do langgatan na sian tombaga i+ lao gabe inganan pelean situtungon, pelean sipanganon,*+ dohot tabo-tabo na sian pelean pardamean.+ 8 Marpesta ma si Salomo saleleng pitu ari+ rap dohot sude halak Israel na ro sian Lebo-hamat* sahat tu Sunge* Mesir.+ 9 Andorang so dibahen nasida pesta saleleng pitu ari i, nungnga dibahen nasida pesta saleleng pitu ari lao patuduhon naung sae langgatan i. Alai di ari paualuhon,* marpungu ma nasida lao manomba Debata.+ 10 Di ari na paduapulu toluhon bulan na papituhon, disuru si Salomo ma mulak akka jolma i tu jabuna be.+ Dung i, mulak ma nasida tu jabuna. Massai las do roha ni nasida alani sude na denggan na binahen ni Jahowa tu si Daud, tu si Salomo, dohot tu sude halak Israel.+
11 Songon i ma dibahen si Salomo pajongjokkon jabu ni Jahowa dohot istanana.+ Marhasil do ibana mambahen sude na dihalomohon rohana lao pajongjokkon jabu ni Jahowa dohot istanana.+ 12 Tikki borngin, dipataridahon Jahowa ma dirina tu si Salomo.+ Jala didok ma, “Nungnga hubege be tangiangmi. Jala nungnga hupillit jabu on gabe inganan lao mangalehon pelean tu au.+ 13 Molo tung pe dang ro udan ala hututup langit, molo tung pe husuru akka sihapor* mangallang suan-suanan di luat on, jala molo tung pe hubahen sahit di tonga-tonga ni bangsokku, 14 alai dipatutoru+ bangso na mamakke goarhon ma diri ni nasida,+ martangiang nasida, dilului nasida Au, jala ditinggalhon nasida hajahaton ni nasida,+ tangihonokku ma tangiang ni nasida sian surgo. Sesaokku ma dosa ni nasida jala bahenokku ma muse subur tano ni nasida.+ 15 Saonari tangihonokku ma manang ise na martangiang dison jala parrohahonokku ma nasida.+ 16 Nungnga hupillit jala hupabadia jabu on, asa boi parohon sangap tu goarhu saleleng ni lelengna.+ Sai na parrohahonokku do i toktong.+
17 Jala taringot tu ho, molo diulahon ho sude parettakku jala dioloi ho aturanku dohot patikku songon na binahen ni bapakmu si Daud,+ 18 bahenokku ma hot harajaonmu,+ songon naung hujanjihon tu bapakmu si Daud.+ Ai nungnga hudok tu ibana, ‘Sian pinopparmu ma na toktong hundul di tahta ni harajaon ni Israel.’+ 19 Alai molo dang diihutton ho jala dang diulahon ho parettakku dohot aturanku, jala gabe disomba ho debata na asing jala dioloi ho i,+ 20 palaookku ma halak Israel sian tano naung hulehon tu nasida.+ Tinggalhonokku ma jabu naung hupabadia lao pasangappon goarhu. Jala bahenokku ma halak Israel gabe direhei* jala dileai di tonga-tonga ni sude bangso.+ 21 Jabu on pe gabe maruppak ma. Longang ma halak mangida i.+ Direhei nasida ma i jala didok ma, ‘Boasa songon on dibahen Jahowa tu luat on dohot tu jabu on?’+ 22 Dung i dohonon ni nasida ma, ‘Ala ditadikkon nasida do Jahowa+ Debata ni ompu ni nasida, i ma Debata na mamboan nasida kaluar sian Mesir.+ Diihutton, dioloi, jala disomba nasida do akka debata na asing.+ Alani i ma diparo Debata sude hasusaan on tu nasida.’”+
8 Saleleng 20 taon ma si Salomo pajongjokkon jabu ni Jahowa dohot istanana.+ 2 Dung sae i, dipajongjong si Salomo ma muse akka kota na dilehon si Hiram+ tu ibana. Jala dibahen ma halak Israel tinggal disi. 3 Dung i lao ma si Salomo tu kota Hamat-zoba jala ditaluhon ma kota i. 4 Dipajongjong si Salomo ma muse kota Tadmor na di gurun. Jala dipajongjong ibana ma sude kota panimpananna+ na adong di Hamat.+ 5 Dibahen ibana ma muse tembok ni Bet-horon na di ginjang+ dohot Bet-horon na di toru.+ Dibahen ibana do gerbang dohot palang ni kota i asa togu. 6 Dipajongjong ibana ma muse kota Baalat,+ sude kota panimpananna, akka kota panimpanan ni kareta hoda,+ akka kota inganan ni halak na mamboan hoda, jala sude na lao pajongjongonna di Jerusalem, di Libanon, dohot di sude luat na nirajaanna.
7 Taringot tu akka pinoppar ni halak Het, halak Amori, halak Perisi, halak Hevi, dohot halak Jebus+ na mangolu dope, i ma akka halak na so sian bangso Israel,+ 8 na so dipamate halak Israel,+ nasida ma na dibahen si Salomo gabe hatobanna sahat tu sadari on.+ 9 Alai dang adong halak Israel na dibahen si Salomo gabe hatoban.+ Dibahen do nasida gabe tentara, pamimpin ni akka ajudanna, pamimpin ni tentara na markareta hoda dohot tentara na marhoda.+ 10 Adong do 250 halak pejabat daerah na dipillit Raja Salomo lao mangatur bangso i.+
11 Dung i, dipapinda ma boru ni si Firaun+ sian Kota ni si Daud tu istana na dipajongjong si Salomo.+ Ai didok ibana do, “Nang pe istrikku ibana, dang boi ibana tinggal di istana ni si Daud raja ni Israel. Ai badia do akka inganan na hea gabe inganan ni poti parpadanan ni Jahowa.”+
12 Dung i, dilehon si Salomo ma pelean situtungon+ tu Jahowa. Dilehon ibana ma i di langgatan+ ni Jahowa na dipajongjong di jolo ni terras ni jabu i.+ 13 Mangihutton paretta ni si Musa, dilehon si Salomo do pelean ganup ari. Dilehon ibana do pelean ganup ari Sabat,+ ganup bulan baru,+ jala tikki adong perayaan tolu hali sataon,+ i ma Perayaan Roti na So Marragi,+ Perayaan Dung Pitu Minggu,+ dohot Perayaan Pondok Daun.*+ 14 Mangihutton paretta ni bapakna si Daud, dibahen si Salomo ma punguan ni akka malim.+ Dipillit ibana ma akka halak Lepi na martugas mamuji Debata+ jala na marhobas di jolo ni akka malim ganup ari. Dibahen ibana do muse punguan ni akka panjaga gerbang.+ Ai songon i do paretta ni si Daud naposo ni Debata na sittong i. 15 Diihutton akka malim dohot halak Lepi do paretta ni raja taringot akka gudang dohot taringot manang aha pe. 16 Mulai sian na dibahen fondasi ni jabu ni Jahowa+ sahat tu na sae jabu i dipajongjong, denggan do sude ulaon i diatur si Salomo. Jadi, sae ma dipajongjong jabu ni Jahowa.+
17 Dung i lao ma si Salomo tu Esion-geber+ dohot tu Elot+ di topi ni laut na adong di huta ni halak Edom.+ 18 Dikirim si Hiram+ do kapalna tu si Salomo. Jala disuru do akka parkarejona na malo markapal dohot akka parkarejona na asing mandapotton si Salomo. Lao ma nasida rap dohot parkarejo ni si Salomo tu Opir.+ Dibuat ma sian i 450 talenta* mas,+ jala diboan ma i tu Raja Salomo.+
9 Dung dibege Ratu Syeba+ taringot si Salomo, ro ma ibana mandapotton si Salomo. Ai tarbarita do ibana di tikki i. Dibahen Ratu Syeba ma akka sukkun-sukkun na maol* lao manguji si Salomo. Massai godang do na mandongani Ratu Syeba. Diboan ibana do miak balsam,* mas na massai godang,+ dohot akka batu na arga. Dibahen ibana do akka unta lao mamboan i. Ro ma ibana mandapotton si Salomo jala disukkun ibana ma sude sukkun-sukkun na adong di rohana.+ 2 Dialusi si Salomo ma sude sukkun-sukkun ni ratu i. Ai dang adong na maol sukkun-sukkunna i di si Salomo.
3 Dung diida Ratu Syeba na massai malo* Raja Salomo,+ jala dung diida ibana jabu na dipajongjongna i,+ 4 sipanganon na di mejana,+ didia akka pejabatna hundul, cara ni parkarejona paradehon sipanganon dohot siinumon, pakkean ni parkarejona i, dohot pelean situtungon na somal dipelehon di jabu ni Jahowa,+ gabe longang situtu ma rohana. 5 Dung i didok ibana ma tu raja i, “Tutu do hape sude na hubege di hutakki taringot tu sude na binahenmu.* Jala tutu do hape na massai malo do ho. 6 Dao do hape ummalo ho sian barita na hubege i.+ Ai dang porsea hian au. Dung pe ro au tuson, huida ma+ dang adong dope hape nanggo satongana na hubege i.+ 7 Marlas ni roha ma akka pejabat dohot akka parkarejom na toktong rap dohot ho ganup ari. Ai boi do begeon ni nasida akka podam! 8 Pinuji ma Jahowa Debatam. Holong do rohana tu ho jala dibahen Jahowa Debatam do ho gabe raja. Ai holong do roha ni Debatam tu Israel+ jala lomo rohana asa martahan bangso i saleleng ni lelengna. Dibahen Ibana do ho gabe raja, asa adil ho tikki mangadili jala asa diulahon ho na sittong* tikki mamaretta.”
9 Dung i dilehon Ratu Syeba ma 120 talenta* mas,+ miak balsam na massai godang, dohot akka batu na arga. Holan ibana do na hea mangalehon miak balsam na songon i godangna tu si Salomo.+
10 Diboan parkarejo ni si Hiram dohot parkarejo ni si Salomo do mas sian Opir.+ Asing ni i, diboan nasida do muse hau cendana dohot akka batu na arga.+ 11 Dipakke do akka hau cendana i mambahen tangga di jabu ni Jahowa+ dohot di istana ni raja i.+ Dipakke do i muse mambahen harpa dohot akka alat musik na martali na dipakke akka parende.+ Dang hea dope adong na songon i di Juda.
12 Dilehon si Salomo do sude pangidoan ni Ratu Syeba. Jala unggodang do i sian* na binoanna tu Raja Salomo. Dung i, mulak ma ratu i rap dohot akka parkarejona tu hutana.+
13 Ganup taon diboan do 666 talenta mas+ tu si Salomo. 14 Dang dietong dope disi na dapotna sian akka partiga-tiga, parbisnis, sian sude raja ni halak Arab, dohot sian akka gubernur na mamboan mas dohot perak tu si Salomo.+
15 Dibahen Raja Salomo do 200 perisai na balga na sian mas na dicampur.+ (Dibahen do 600 sekel* mas na dicampur tu ganup perisai.)+ 16 Dibahen Raja Salomo do muse 300 perisai na gelleng* na sian mas na dicampur. (Dibahen do tolu mina* mas tu ganup perisai.) Dibahen raja i ma sude perisai i tu Jabu Tombak Libanon.+
17 Balga do tahta ni raja i, sian gading do i dibahen, jala dilappis do i mamakke mas murni.+ 18 Di jolo ni tahta i adong do onom anak tangga. Adong sidege-degean ni pat na sian mas lokkot tu tahta i. Di sabola kanan dohot di sabola kiri ni tahta i, dibahen do inganan pangusandean ni tangan. Jala adong do patung singa+ dibahen di jonok ni ganup pangusandean ni tangan i. 19 Adong do dibahen 12 patung singa+ di tangga i, onom di sabola kanan, onom di sabola kiri. Dang adong harajaon na asing na mambahen songon i. 20 Sude makkuk ni Raja Salomo dibahen sian mas, jala sian mas murni do sude parkakas na adong di Jabu Tombak Libanon. Dang adong na dibahen sian perak. Ai dang mararga perak di tikki ni si Salomo.+ 21 Ai adong do akka kapal ni raja i na marlayar rap dohot akka parkarejo ni si Hiram+ tu Tarsis.+ Sahali tolu taon mulak do akka kapal i mamboan mas, perak, gading,+ bodat, dohot burung merak.
22 Raja Salomo ma na ummalo jala na ummora sian sude raja di tano on.+ 23 Sude do raja na di tano on naeng pajuppang dohot* si Salomo lao mambege akka poda* na dilehon Debata na sittong tu rohana.+ 24 Ganup taon diboan nasida do akka barang na sian perak, mas, akka pakkean,+ sinjata, miak balsam, akka hoda, dohot akka halode.* 25 Adong do 12.000 hoda*+ ni si Salomo. Jala adong do 4.000 kandang ni hodana, i ma hoda na dipakke manarik kareta porang. Disippan ibana ma i di kota panimpanan ni karetana dohot di inganan na jonok tu istanana di Jerusalem.+ 26 Mamaretta do si Salomo tu sude raja, mulai sian Sunge Euprat sahat tu luat ni halak Palistim jala sahat muse tu parbatasan ni Mesir.+ 27 Songon godang ni batu do dibahen raja i godang ni perak di Jerusalem. Jala godang ni hau ares dos songon godang ni hau ara na di Tombak Syefela.+ 28 Jala adong do diboan akka hoda na sian Mesir+ dohot na sian sude luat na asing tu si Salomo.
29 Disurat Panurirang* Natan,+ Panurirang Ahia+ halak Silo i, dohot si Iddo do sude na niulahon ni si Salomo+ mulai sian mulana sahat tu ujungna. Boi do si Iddo+ mandapot parnidaan jala ibana do na manurat taringot si Jerobeam+ anak ni si Nebat. 30 Saleleng 40 taon ma si Salomo mamaretta halak Israel di Jerusalem. 31 Mate ma si Salomo jala dikuburhon ma ibana rap dohot akka ompuna di Kota ni si Daud bapakna i.+ Dung i, si Rehabeam anakna i ma na manggattihon ibana gabe raja.+
10 Lao ma si Rehabeam tu Sikem.+ Ai nungnga pungu sude halak Israel di Sikem lao mambahen ibana gabe raja.+ 2 Dibege si Jerobeam+ anak ni si Nebat ma na masa i. Tikki i, di Mesir dope ibana. Ai lari do ibana tusi alani Raja Salomo.+ Dung i mulak ma si Jerobeam sian Mesir. 3 Disuru halak Israel ma halak mangalap si Jerobeam sian i. Ro ma si Jerobeam rap dohot sude halak Israel mandapotton si Rehabeam. Didok nasida ma, 4 “Massai borat do tanggung jawabnami* dohot ulaonnami dibahen bapakmu.+ Alani i, mangido ma hami tu ho ale tuan, orui ma i asa huoloi hami ho.”
5 Didok ibana ma, “Tolu ari nai ma hamu ro muse.” Gabe mulak ma nasida.+ 6 Disukkun Raja Rehabeam ma akka natua-tua,* i ma akka parkarejo ni si Salomo hian. Didok ibana ma, “Menurut hamu, aha ma alussu tu nasida?” 7 Dialusi nasida ma, “Molo burju ho tu nasida, las roha ni nasida dibahen ho, jala denggan dibahen ho mangalusi nasida, toktong ma oloan ni nasida ho.”
8 Alai dang ditangihon si Rehabeam poda ni akka natua-tua i. Disukkun ibana ma muse akka donganna na poso, i ma akka donganna magodang na gabe parkarejona.+ 9 Didok ibana ma tu nasida, “Ro do akka halak mandok tu au, ‘Orui ma poang tanggung jawab* na nilehon ni bapakmu tu hami.’ Menurut hamu, aha ma alussu tu nasida?” 10 Didok akka donganna magodang i ma, “Tu halak na mandok, ‘Orui ma poang tanggung jawab* na nilehon ni bapakmu tu hami’, songon on ma dokkon, ‘Unggodang dope pangidoakku sian pangidoan ni bapakku.* 11 Nungnga borat dibahen bapakku tanggung jawabmuna* kan, tambaakku dope i. Lissing-lissing do dibahen bapakku tu hamu, alai molo au lissing-lissing na marsuga do bahenokku.’”
12 Ro ma si Jerobeam rap dohot halak Israel mandapotton raja i di ari na patoluhon. Ai nungnga didok raja i, “Tolu ari nai ma hamu ro muse.”+ 13 Alai kasar do alus ni raja i tu nasida. Dang ditangihon Raja Rehabeam poda ni akka natua-tua i. 14 Diihutton si Rehabeam do hata ni akka donganna na poso i. Didok ibana ma, “Ubborat do bahenokku tanggung jawabmuna* jala tambaakku dope i. Lissing-lissing do dibahen bapakku tu hamu, alai molo au lissing-lissing na marsuga do bahenokku.” 15 Dang ditangihon raja i pangidoan ni bangso i. Alai dalan ni Debata na sittong do i,+ asa saut hata ni Jahowa tu si Jerobeam anak ni si Nebat, na dipasahat Panurirang* Ahia+ halak Silo i.
16 Ala dang dilehon raja i pangidoan ni halak Israel, didok nasida ma, “Dang adong urusannami tu si Daud. Dang adong hujalo hami parbagianan sian anak ni si Isai i. Mulak ma hamu ale halak Israel tu debatamuna be. Saonari, lok ma dibahen pinoppar ni si Daud i+ lomona!” Dung i, mulak ma sude halak Israel i tu jabuna* be.+
17 Holan halak Israel na maringanan di kota ni halak Juda+ nama na dirajai si Rehabeam.
18 Adong do parkarejo ni raja na margoar si Hadoram,+ na dipillit lao mangatur akka halak na disuru karejo tu raja. Disuru Raja Rehabeam ma ibana manjuppangi halak Israel. Alai, didangguri halak Israel do si Hadoram sappe mate. Jala lari do Raja Rehabeam tu Jerusalem mamakke kareta hoda.+ 19 Sahat tu sadari on, toktong do mangalo halak Israel tu pinoppar ni si Daud.
11 Dung sahat si Rehabeam di Jerusalem, pittor dipapungu ibana ma sude marga Juda dohot marga Benjamin.+ Adong ma 180.000 tentara na jago* na dipapungu ibana. Dipapungu do nasida lao mangalo sude halak Israel, asa si Rehabeam ma muse na marhuaso tu sude halak Israel.+ 2 Alai didok Jahowa ma tu si Semaya+ panurirang* ni Debata na sittong i, 3 “Paboa ma tu si Rehabeam anak ni si Salomo raja ni halak Juda i dohot tu sude halak Israel na di Juda dohot di Benjamin, 4 ‘Songon on do hata ni Jahowa, “Unang ma lao hamu mangalo halak Israel. Ai na marhaha maranggi do hamu. Mulak ma hamu tu jabumuna be, ai Au do na mambahen on masa.”’”+ Jadi dioloi nasida do hata ni Jahowa i. Mulak ma nasida jala dang dialo nasida be si Jerobeam.
5 Tinggal ma si Rehabeam di Jerusalem, jala dipajongjong ibana ma akka kota na marbenteng di Juda. 6 Dipajongjong ibana ma tembok ni kota Betlehem,+ kota Etam, kota Tekoa,+ 7 kota Bet-zur, kota Soko,+ kota Adullam,+ 8 kota Gat,+ kota Maresa, kota Sip,+ 9 kota Adoraim, kota Lakis,+ kota Azeka,+ 10 kota Zora, kota Ayalon,+ dohot kota Hebron.+ Akka i ma kota na marbenteng na adong di Juda dohot di Benjamin. 11 Dibahen si Rehabeam do akka komandan di akka kota na marbenteng. Jala diparade do sipanganon, miak, dohot anggur di akka kota i, asa lam denggan kota i. 12 Diparade si Rehabeam do muse akka perisai na balga dohot tombak* di sude kota. Gabe aman situtu ma kota i. Jala toktong do halak Juda dohot halak Benjamin marpihak tu ibana.
13 Sude malim dohot halak Lepi na adong di sude luat ni halak Israel, marpihak do tu si Rehabeam. Alani i, marroan ma nasida sian huta ni nasida be. 14 Ditinggalhon halak Lepi ma inganan parmahanan dohot arta ni nasida,+ jala ro ma nasida tu Juda dohot tu Jerusalem. Ai dang dibahen si Jerobeam dohot akka anakna be nasida gabe malim ni Jahowa.+ 15 Dipillit si Jerobeam ma akka malim na lao martugas di akka inganan panombaon,*+ na lao marhobas tu akka debata na so sittong na songon hambing,*+ dohot na lao marhobas tu akka patung ni lombu na binahenna.+ 16 Alai, adong dope akka halak na sian sude marga ni Israel na manomba Jahowa Debata ni Israel sian nasa rohana. Diihutton nasida ma halak Lepi tu Jerusalem, asa boi nasida mangalehon pelean tu Jahowa Debata ni akka ompu ni nasida.+ 17 Saleleng tolu taon, marpihak do nasida tu si Rehabeam anak ni si Salomo. Gabe lam togu ma harajaon na di Juda. Ai ditiru nasida do si Daud dohot si Salomo saleleng tolu taon.
18 Dibuat si Rehabeam ma si Mahalat boru ni si Jerimot pahoppu ni si Daud gabe istrina. Si Abihail do omak ni si Mahalat, i ma boru ni si Eliab+ anak ni si Isai. 19 On ma akka anak na ditubuhon si Mahalat: si Jehus, si Semaria, dohot si Saham. 20 Asing ni i, dibuat ibana do muse si Maaka pahoppu ni si Absalom+ gabe istrina. Ditubuhon si Maaka ma si Abia,+ si Attai, si Sisa, dohot si Selomit. 21 Umholong do roha ni si Rehabeam tu si Maaka pahoppu ni si Absalom sian tu sude istrina dohot gundikna.+ Ai adong 18 istrina jala 60 gundikna. Jadi 28 ma anakna jala 60 ma boruna. 22 Lomo do roha ni si Rehabeam asa gabe raja si Abia. Alani i, dibahen ma si Abia anak ni si Maaka gabe pamimpin ni akka haha anggina. 23 Alai marbisuk do si Rehabeam. Disuru do deba anakna tinggal di akka kota na marbenteng+ na adong di sude luat ni halak Juda dohot Benjamin. Dilehon ma akka na porlu di nasida jala dilehon ma godang istri.
12 Lam leleng lam hot ma harajaon ni si Rehabeam+ jala lam marhuaso ma ibana. Alai dang diulahon ibana dohot sude halak Israel be Patik ni Jahowa.+ 2 Di taon na palimahon Raja Rehabeam mamaretta, ro ma si Sisak+ raja ni Mesir tu Jerusalem naeng mangalo nasida. Ai dang setia be nasida tu Jahowa. 3 Ro do Raja Sisak sian Mesir rap dohot 1.200 kareta porang, 60.000 tentara na marhoda, dohot tentara na massai godang. Halak Libia, halak Suki, dohot halak Etiopia+ do akka tentarana i. 4 Ditaluhon ibana ma akka kota na marbenteng di Juda. Dung i ro ma ibana tu Jerusalem.
5 Ala mabiar si Rehabeam dohot akka pejabat ni Juda tu si Sisak, marpungu ma nasida di Jerusalem. Ro ma Panurirang* Semaya+ mandapotton nasida jala didok ma, “On ma na nidok ni Jahowa, ‘Ala nungnga ditadikkon hamu Au,+ pasahatonku ma hamu tu tangan ni si Sisak.’” 6 Dung dibege raja i dohot akka pejabat ni Israel na nidok ni si Semaya, dipatutoru nasida ma diri ni nasida.+ Didok ma, “Sittong* do na binahen ni Jahowa on.” 7 Diida Jahowa ma naung dipatutoru nasida diri ni nasida. Gabe didok Jahowa ma tu si Semaya, “Nungnga dipatutoru nasida diri ni nasida. Alani i, dang pamateonku nasida.+ Paluaokku ma nasida satokkin nai. Dang muruk be Au tu Jerusalem, jala dang pasahatonku nasida tu tangan ni si Sisak. 8 Alai bahenokku ma nasida gabe hatobanna. Dung i botoon ni nasida ma, dumenggan do mangoloi Au sian na mangoloi akka raja* ni bangso na asing.”
9 Dung i ro ma Raja Sisak na sian Mesir marporang mangalo kota Jerusalem. Dibuat ibana do akka arta na adong di jabu ni Jahowa+ dohot na adong di istana ni raja. Dibuat ibana do muse akka na binahen ni si Salomo, dohot ma i sude perisai na sian mas.+ 10 Alani i, dibahen Raja Rehabeam ma akka perisai na sian tombaga lao manggattihon akka perisai na sian mas i. Dipasahat ibana ma akka perisai i tu kepala ni akka pengawal na manjaga pintu masuk ni istana ni raja. 11 Molo ro raja i tu jabu ni Jahowa, boanon ni akka pengawal i ma akka perisai i. Dung i paulakon ni nasida ma i tu inganan ni akka pengawal. 12 Ala dipatutoru raja i do dirina, gabe dang muruk be Jahowa tu ibana.+ Jala dang dipasombu Ibana mate nasida sude.+ Ai adong dope akka na denggan na niidana di Juda.+
13 Nungnga lam marhuaso Raja Rehabeam di Jerusalem. Jala toktong do ibana mamaretta disi. Si Naama do goar ni omakna, i ma halak Ammon i. Marumur 41 taon ma si Rehabeam tikki gabe raja. Jala saleleng 17 taon ma ibana mamaretta di Jerusalem, i ma kota na dipillit Jahowa sian sude kota ni marga ni Israel lao pasangappon goarna.+ 14 Alai diulahon ibana do na jahat. Ai dang sian nasa rohana ibana mangalului Jahowa.+
15 Disurat Panurirang Semaya+ dohot si Iddo+ do sude na masa di ngolu ni si Rehabeam mulai sian mulana sahat tu ujungna. Jala disurat nasida do tarombo ni raja i. Boi do si Iddo mandapot parnidaan. Sai toktong do marporang si Rehabeam dohot si Jerobeam.+ 16 Mate ma si Rehabeam jala dikuburhon ma ibana rap dohot akka ompuna di Kota ni si Daud.+ Dung i, anakna si Abia+ ma na manggattihon ibana gabe raja.
13 Di taon na pasappulu ualuhon Raja Jerobeam mamaretta, gabe raja ma si Abia di Juda.+ 2 Tolu taon ma ibana mamaretta di Jerusalem. Si Mikaya*+ boru ni si Uriel halak Gibea+ do omakna. Tikki i marporang do si Abia dohot si Jerobeam.+
3 Diboan si Abia ma 400.000 tentarana na jago+ jala naung dilatik* lao mangalo si Jerobeam. Jala diboan si Jerobeam ma 800.000 tentara naung dilatik,* i ma akka tentara na jago. 4 Lao ma si Abia tu inganan na mardolok-dolok di Epraim jala jongjong ma ibana di Dolok Semaraim. Didok ibana ma, “Ale Jerobeam dohot sude halak Israel, tangihon ma au. 5 Takkas do diboto hamu nungnga dibahen Jahowa Debata ni Israel parjanjian sira*+ tu si Daud dohot tu akka anakna.+ Jala nungnga ditottuhon Debata asa mamaretta nasida di Israel saleleng ni lelengna.+ 6 Alai dialo si Jerobeam+ anak ni si Nebat do tuanna, i ma si Salomo anak ni si Daud.+ 7 Marpungu do akka halak na so karejo dohot akka halak na so marguna mangurupi si Jerobeam. Dung i dialo nasida ma si Rehabeam anak ni si Salomo jala monang do nasida. Ai poso dope si Rehabeam tikki i, jala parbiar dope ibana.
8 “Saonari dialo hamu ma harajaon ni Jahowa naung dipasahat tu akka anak ni si Daud. Ai dirippu hamu do boi hamu monang ala godang tentaramuna, jala ala adong akka patung lombu na sian mas dibahen si Jerobeam gabe debatamuna.+ 9 Dipalao hamu do akka malim ni Jahowa,+ akka pinoppar ni si Aron, dohot halak Lepi. Jala lomomuna do mamillit malimmuna songon na binahen ni akka bangso na asing.+ Manang ise na mamboan anak ni lombu jantan dohot pitu biru-biru jantan, dibahen hamu do ibana gabe malim ni akka patung, hape dang debata akka patung i. 10 Alai anggo hami, Jahowa do Debatanami.+ Dang hutadikkon hami Ibana. Akka pinoppar ni si Aron do malimnami na marhobas tu Jahowa, jala halak Lepi do na mangurupi nasida. 11 Dilehon nasida do pelean situtungon tu Jahowa jala ditutung nasida do dupa+ ganup manogot dohot botari+ asa nakkok timusna. Dibahen nasida do roti pelean+ di meja na sian mas murni, jala dipagalak nasida do lampu na dibahen di inganan ni lampu na sian mas+ ganup botari.+ Diulahon hami do paretta ni Jahowa Debatanami. Alai anggo hamu, ditadikkon hamu do Ibana. 12 Ida ma! Didongani Debata na sittong do hami jala Ibana do pamimpinnami. Nungnga martarompet akka malim mambahen tanda lao marporang mangalo hamu. Ale halak Israel, unang ma alo Jahowa Debata ni akka ompumuna. Ai dang na lao monang hamu.”+
13 Alai nungnga disuru si Jerobeam deba tentarana mangalo halak Juda sian pudi ni nasida. Gabe dialo tentarana ma halak Juda sian jolo dohot sian pudi. 14 Dung diida halak Juda naung ro akka tentara sian jolo dohot sian pudi mangalo nasida, jou-jou ma nasida tu Jahowa.+ Jala martarompet do akka malim tikki i. 15 Dung i, gogo ma halak Juda marsurak mandok lao marporang. Tikki na marsurak i nasida, ditaluhon Debata na sittong ma si Jerobeam dohot sude halak Israel di jolo ni si Abia dohot halak Juda. 16 Lari ma halak Israel sian jolo ni halak Juda. Jala diurupi Debata do halak Juda manaluhon halak Israel. 17 Godang do halak Israel na dipamate si Abia dohot akka tentarana. Adong ma 500.000 tentara ni halak Israel naung dilatik* na dipamate ni halak Juda. 18 Talu ma halak Israel di tikki i. Alai monang do halak Juda. Ai diasahon nasida do Jahowa Debata ni akka ompu ni nasida.+ 19 Torus do si Abia mangalele si Jerobeam. Jala ditaluhon do akka kota na nirajaanna. Ditaluhon do kota Betel+ dohot akka kota di sakalilingna, kota Jesana dohot akka kota na di sakalilingna, kota Efrain+ dohot akka kota na di sakalilingna. 20 Saleleng mamaretta si Abia, lam moru ma huaso ni si Jerobeam. Dung i dipamate Jahowa ma si Jerobeam.+
21 Alai lam balga ma huaso ni si Abia. Adong do 14 istrina,+ 22 anakna, jala 16 ma boruna. 22 Disurat Panurirang* Iddo+ do sude na masa di ngolu ni si Abia. Disurat do muse disi sude na niulahon dohot na nidok ni si Abia.
14 Dung i mate ma si Abia jala dikubur ma ibana rap dohot akka ompuna di Kota ni si Daud.+ Jala anakna si Asa ma na gabe raja manggattihon ibana. Tikki mamaretta si Asa, dame do luat i saleleng sappulu taon.
2 Diulahon si Asa do na denggan dohot lomo ni roha ni Jahowa Debatana. 3 Diruppakkon ibana ma akka langgatan+ pamelean tu debata na asing, akka inganan panombaon,* akka tugu sisombaon,*+ dohot akka tiang sisombaon.*+ 4 Asing ni i, disuru ibana do halak Juda mangalului Jahowa Debata ni akka ompu ni nasida. Jala disuru ibana do nasida mangulahon Patik dohot paretta ni Debata. 5 Diruppakkon si Asa ma akka inganan panombaon* dohot akka inganan manutung dupa+ na adong di sude kota di Juda. Jala dang adong na ro mangalo nasida saleleng mamaretta ibana. 6 Dang hea adong parporangan saleleng sappulu taon i. Jala dang adong na ro mangalo nasida. Ai dibahen Jahowa do dame ngoluna.+ Alani i dipajongjong si Asa ma akka kota na marbenteng di Juda.+ 7 Didok si Asa ma tu halak Juda, “Beta ma tapajongjong tembok di sakaliling ni akka kota on. Tapajongjong ma akka menara,+ tabahen ma gerbang dohot akka palangna. Appunatta dope luat on, ai talului do Jahowa Debatanta. Alani i ma dang adong be musu di sakalilingta.” Dung i sae ma dipajongjong nasida akka kota i.+
8 Adong do 300.000 halak Juda na gabe tentara ni si Asa. Dipakke nasida do perisai na balga dohot tombak.* Jala adong do 280.000 tentarana na jago na sian halak Benjamin. Dipakke nasida do perisai na gelleng* dohot panah.+
9 Di pudian ni ari ro ma si Jara halak Etiopia naeng mangalo halak Juda. Diboan ibana ma sajuta tentarana dohot 300 kareta porangna.+ Dung sahat ibana di Maresa,+ 10 ro ma si Asa naeng mangalo nasida. Marbaris ma nasida lao marporang di Rura Zepata na di Maresa. 11 Dijou si Asa ma Jahowa Debatana.+ Didok ma, “Ale Jahowa, dang maol di Ho mangurupi na gogo* manang na so margogo.+ Urupi ma hami ale Jahowa Debatanami, ai Ho do na hupangasahon hami.+ Jala di bagasan goarmu do hami mangalo natorop on.+ Ale Jahowa, Ho do Debatanami. Unang ma pasombu monang jolma mangalo Ho.”+
12 Ditaluhon Jahowa ma halak Etiopia di jolo ni si Asa dohot di jolo ni halak Juda. Gabe lari ma halak Etiopia.+ 13 Dilele si Asa dohot halak Juda ma nasida sahat tu Gerar.+ Dipamate ma halak Etiopia sappe so adong be na mangolu. Ai Jahowa dohot akka tentarana do na mangalo nasida. Dung i dibuat halak Juda ma massai godang akka barang ni halak Etiopia. 14 Ditaluhon nasida ma muse sude kota na di sakaliling ni Gerar. Ai mabiar do akka pangisi ni kota i alani Jahowa. Dibuat halak Juda ma godang akka barang ni pangisi ni kota i. 15 Lao ma muse halak Juda tu perkemahan ni akka parmahan. Dibuat nasida ma godang biru-biru, hambing, dohot unta. Dung i, mulak ma nasida tu Jerusalem.
15 Songgop ma tondi parbadia ni Debata tu si Azaria anak ni si Oded. 2 Dung i lao ma ibana manjuppangi si Asa jala didok ma, “Ale Asa, halak Juda, dohot halak Benjamin, tangihon hamu ma au! Sai donganan ni Jahowa do hamu molo dang ditadikkon hamu Ibana.+ Molo dilului hamu Ibana, juppangmuna ma Ibana.+ Alai molo ditadikkon hamu Ibana, tadikkononna ma hamu.+ 3 Nungnga leleng dang disomba Israel Debata na sittong. Nungnga leleng nasida dang diajari malim jala dang diulahon nasida patik i.+ 4 Alai tikki susa nasida, mulak do nasida tu Jahowa Debata ni Israel. Jala dilului nasida do Ibana. Gabe diloas Debata ma juppang ni nasida Ibana.+ 5 Di tikki i, dang aman halak molo lao manang na tudia. Ai gaor do sude pangisi ni luat i ala marporang nasida sama nasida. 6 Bangso na sada manaluhon bangso na asing. Kota na sada manaluhon kota na asing. Ai dipasombu Debata do nasida gaor jala susa.+ 7 Alai hamu, togu ma hamu jala unang mabiar.+ Ai pasu-pasuonna do ulaonmuna.”
8 Dung dibege si Asa hata ni si Azaria dohot hata ni Debata* na dipaboa Panurirang* Oded, gabe barani ma ibana. Diruppakkon ibana ma akka patung na dihagigihon Debata sian sude luat ni halak Juda+ dohot halak Benjamin. Diruppakkon do muse akka patung i sian akka kota naung ditaluhon ibana na adong di inganan na mardolok-dolok di Epraim. Jala dipadenggan ibana ma langgatan ni Jahowa na di jolo ni terras ni jabu ni Jahowa.+ 9 Dipapungu ibana ma sude halak Juda dohot halak Benjamin. Jala dipapungu ibana ma akka panoppang na sian Epraim, Manasse, dohot Simeon.+ Ai marroan do nasida sian Israel lao marpihak tu si Asa, dung diida nasida na didongani Jahowa Debatana do ibana. 10 Di bulan na patoluhon, di taon na pasappulu limahon si Asa mamaretta, marpungu ma nasida sude di Jerusalem. 11 Di ari i, dipelehon nasida ma 700 lombu dohot 7.000 biru-biru tu Jahowa. Dibuat nasida do i sian akka bangso na ditaluhon nasida. 12 Dung i, dibahen nasida ma parjanjian lao manomba Jahowa Debata ni ompu ni nasida sian nasa roha dohot sian nasa ngolu ni nasida.+ 13 Jala ikkon dipamate do manang ise na so manomba Jahowa Debata ni Israel, na poso nang na matua, bawa nang borua.+ 14 Dung i gogo ma soara ni nasida marsumpa tu Jahowa. Marsuraki ma nasida alani las ni rohana jala martarompet.* 15 Marlas ni roha ma sude halak Juda ala nungnga marsumpa nasida tu Debata. Ai sian nasa roha do nasida marsumpa, jala sian nasa roha do nasida mangalului Debata. Gabe diloas Debata ma juppang ni nasida Ibana.+ Jala dibahen Jahowa ma asa unang adong musu di sakaliling ni nasida.+
16 Dipaturun Raja Asa ma si Maaka+ oppung boruna i sian pangkatna na timbo.* Ai dibahen si Maaka do akka patung na dihagigihon Debata lao manomba debata na so sittong.*+ Dung i diruppakkon si Asa ma patung i, dihancurhon, jala ditutung di Rura Kidron.+ 17 Alai, toktong dope adong akka inganan panombaon*+ di Israel.+ Nang pe songon i, dioloi ibana do Debata sian nasa rohana saleleng ni ngoluna.+ 18 Diboan si Asa ma tu jabu ni Debata na sittong akka barang naung dipabadia ibana dohot bapakna, i ma akka perak, mas, dohot akka barang na asing.+ 19 Sahat tu taon na patolupulu limahon si Asa mamaretta, dang adong porang na masa di luat i.+
16 Di taon patolupulu onomhon si Asa mamaretta, ro ma Raja Baesa+ na sian Israel mangalo halak Juda. Dipajongjong ibana ma* benteng di kota Rama+ asa unang adong na boi kaluar sian i lao mandapotton* Raja Asa na di Juda.+ 2 Dibuat si Asa ma perak dohot mas sian panimpanan ni arta na di jabu ni Jahowa+ dohot na di istana ni raja. Dung i, disuru Raja Asa ma akka parkarejona manaruhon i tu si Benhadad raja ni Siria+ na tinggal di Damaskus. Jala didok ma tu ibana, 3 “Adong do parjanjiakku dohot ho, jala adong do parjanjian ni bapakku dohot bapakmu. Saonari, sundati ma parjanjianmu dohot si Baesa raja ni Israel, asa disuru ibana mulak akka tentarana sian hutakku. Hulehon pe perak dohot mas on tu ho.”
4 Ditangihon si Benhadad do hata ni Raja Asa i. Disuru ibana ma akka pamimpin ni tentarana marporang mangalo akka kota na di Israel. Ditaluhon nasida do kota Iyon,+ kota Dan,+ kota Abel-bet-maaka, dohot sude inganan panimpanan na di huta ni halak Naptali.+ 5 Dung dibege si Baesa na masa i, pittor dipaso ibana ma pajongjokkon benteng di Rama. Jala ditadikkon ibana ma i. 6 Disuru Raja Asa ma sude halak Juda mamboan akka batu dohot hau na dipakke Raja Baesa lao pajongjokkon benteng ni kota Rama.+ Dung i dipakke Raja Asa ma i+ lao pajongjokkon benteng ni kota Geba+ dohot kota Mispa.+
7 Di sada tikki ro ma si Hanani+ na boi mandapot parnidaan manjuppangi si Asa raja ni Juda. Didok ibana ma, “Sasittongna boi hian do ditaluhon ho tentara ni Siria, hape gabe dipalua ho do nasida. Ai gabe raja ni Siria do na dipangasahon ho, dang Jahowa Debatam.+ 8 Najolo ro do tentara ni Etiopia dohot Libia mangalo ho. Godang do tentara, kareta porang, dohot akka tentara na marhoda diboan nasida. Alai boi do ditaluhon ho nasida, ala dipangasahon ho do Jahowa.+ 9 Ai diparrohahon Jahowa do saluhut na di tano on+ lao mangurupi akka halak na manomba Ibana sian nasa rohana.+ Alai na binahenmon, ulaon ni halak na oto do i. Alani i, sai adong nama na ro marporang mangalo ho mulai sian saonari.”+
10 Alai gabe haccit ma roha ni si Asa tu si Hanani na boi mandapot parnidaan i. Muruk ma ibana alani hatana i, gabe dipenjarahon* ibana ma si Hanani. Mulai sian i, jahat jala kasar ma ibana tu rakyatna. 11 Sude na masa di ngolu ni Raja Asa mulai sian mulana sahat tu ujungna, disurat do di bukku sejarah taringot akka raja ni Juda dohot akka raja ni Israel.+
12 Di taon na patolupulu siahon Raja Asa mamaretta, marsahit ma ibana ala haccit patna. Lam leleng lam posi do sahitna i. Nang pe songon i pangubati do na dilului ibana, dang Jahowa. 13 Dung i, mate ma si Asa di taon na paopatpulu sadahon ibana mamaretta. Jala dikubur ma ibana rap dohot akka ompuna.+ 14 Nungnga dibahen si Asa hian kuburan na bagak lao di ibana di Kota ni si Daud.+ Alani i, dikubur nasida ma ibana disi. Dipeakkon ma bakkena di sada podoman. Nungnga dibahen miak balsam* tu podoman i. Jala nungnga dibahen rempah-rempah na dicampur dohot miak na angur+ tu podoman i. Dung i dipagalak nasida ma api na massai balga lao pasangappon ibana.*
17 Dung i, si Jehosapat+ ma na gabe raja manggattihon bapakna si Asa. Jala lam marhuaso ma ibana di Israel. 2 Dibahen si Jehosapat ma akka tentara di sude kota na marbenteng di Juda. Dipajongjong ibana ma muse inganan ni akka tentara marjaga di Juda dohot di akka kota na di Epraim. Bapakna si Asa do najolo na manaluhon akka kota na di Epraim i.+ 3 Sai didongani Jahowa do si Jehosapat. Ai ditiru ibana do si Daud ompuna i+ jala dang disomba ibana Baal. 4 Disomba ibana do Debata ni bapakna.+ Diulahon ibana do paretta ni Debata jala dang diihutton ibana na binahen ni halak Israel.+ 5 Lam hot ma harajaon ni Juda dibahen Jahowa saleleng mamaretta si Jehosapat.+ Somal do ro sude halak Juda mamboan hadiah tu ibana. Gabe lam mamora jala lam sangap ma ibana.+ 6 Gabe dang mabiar be ibana mangulahon lomo ni roha ni Jahowa. Diruppakkon ibana ma akka inganan panombaon*+ dohot akka tiang sisombaon*+ di Juda.
7 Di taon na patoluhon si Jehosapat mamaretta, dijou ibana ma akka pejabatna, i ma si Ben-hail, si Obaja, si Sakaria, si Netaneel, dohot si Mikaya. Disuru ma nasida mangajari di akka kota na di Juda. 8 Dohot do muse akka halak Lepi, i ma si Semaya, si Netania, si Sebadia, si Asahel, si Semiramot, si Jehonatan, si Adonia, si Tobia, dohot si Tob-adonia. Jala dohot do akka malim, i ma si Elisama dohot si Jehoram.+ 9 Diboan nasida ma bukku na marisi Patik ni Jahowa+ jala diajarhon nasida ma i di Juda. Lao ma nasida tu sude kota na di Juda lao mangajari akka halak na disi.
10 Gabe mabiar ma sude harajaon na di sakaliling ni Juda alani Jahowa. Jala dang barani be nasida mangalo si Jehosapat. 11 Diboan halak Palistim do hadiah dohot hepeng tu si Jehosapat lao gabe pajak. Jala diboan halak Arab do 7.700 biru-biru jantan dohot 7.700 hambing jantan.
12 Lam marhuaso ma si Jehosapat.+ Dipajongjong ibana ma akka kota na marbenteng+ dohot akka kota inganan panimpanan+ di Juda. 13 Lam godang ma akka ulaon dibahen si Jehosapat di akka kota na di Juda. Jala adong do akka tentarana na jago di Jerusalem. 14 On ma punguan ni nasida na sasaompu: Pamimpin ni tentara na sasaribu sian halak Juda, i ma si Adna. Adong do 300.000 tentarana na jago.+ 15 Adong do muse pamimpin ni tentara na asing na margoar si Johohanan. Adong do 280.000 tentarana. Jala si Adna ma pengawasna. 16 Adong do muse pamimpin ni tentara na margoar si Amasia anak ni si Sikri. Sai rade do ibana marhobas tu Jahowa. Adong do 200.000 tentarana na jago. Jala si Adna ma pengawasna. 17 Pamimpin na sian halak Benjamin,+ i ma si Eliada. Sahalak tentara na jago do ibana. Jala adong do 200.000 tentarana na mamakke panah dohot perisai.+ 18 Adong do muse pamimpin ni tentara na asing na margoar si Jehosabad. Adong do 180.000 tentarana na marsinjata. Jala si Eliada ma pengawasna. 19 On ma akka halak na mangurupi raja rap dohot akka tentara na martugas di akka kota na marbenteng di Juda.+
18 Na mora jala na sangap situtu do si Jehosapat.+ Alai diatur ibana ma asa adong keluargana na marhasohotan tu keluarga ni si Ahab.+ 2 Dung piga-piga taon, lao ma si Jehosapat manjuppangi si Ahab di Samaria.+ Diseat* si Ahab ma godang biru-biru dohot lombu. Diparade ma i tu si Jehosapat dohot tu akka halak na rap dohot ibana. Jala ditogihon* si Ahab ma si Jehosapat marporang mangalo akka halak na adong di Ramot-gilead.+ 3 Didok si Ahab raja ni Israel ma tu si Jehosapat raja ni Juda, “Olo do ho mandongani au marporang tu Ramot-gilead?” Dialusi si Jehosapat ma, “Hudongani pe ho. Huboan pe bangsokku mangurupi ho marporang.”
4 Alai didok si Jehosapat ma tu raja ni Israel, “Jolo tasukkun ma tu Jahowa.”+ 5 Dipapungu raja ni Israel ma 400 panurirang. Disukkun ma tu nasida, “Denggan do molo lao hami marporang tu Ramot-gilead manang na dang?” Dialusi akka panurirang i ma, “Denggan do i. Pasahaton ni Debata na sittong do Ramot-gilead tu raja i.”
6 Dung i didok si Jehosapat ma, “Na so adong do panurirang* ni Jahowa dison?+ Ibana ma jo tasukkun.”+ 7 Didok raja ni Israel ma tu si Jehosapat, “Adong dope nian sada nai.+ Goarna si Mikaya anak ni si Jimla. Boi do tasukkun Jahowa marhite ibana. Alai sogo do rohakku tu ibana. Ai holan na so denggan do na sai dipaboa ibana taringot tu au.”+ Didok si Jehosapat ma tu ibana, “Unang ma dokkon songon i.”
8 Dijou raja ni Israel ma sahalak pejabat istana. Didok ma, “Hatop, alap jo si Mikaya anak ni si Jimla.”+ 9 Tikki i, di inganan pardegean na di jolo ni gerbang ni Samaria do raja ni Israel dohot si Jehosapat. Hundul do nasida di tahta ni nasida be mamakke baju harajaon. Jala sude ma panurirang manurirangi di jolo ni nasida. 10 Dung i dibahen si Sedekia anak ni si Kenaana ma akka tanduk sian bosi. Jala didok ibana ma, “On ma na nidok ni Jahowa, ‘Marhite akka tanduk on ma aloonmu* halak Siria sappe mate nasida sude.’” 11 Dohot ma sude akka panurirang i mandok songon i. Didok nasida ma, “Lao ma ho rajanami tu Ramot-gilead. Sai na monang do ho.+ Ai lehonon ni Jahowa do kota i tu ho.”
12 Dung i didok halak na sinuru ni raja i ma tu si Mikaya, “Sude do panurirang paboahon na denggan tu raja i.+ Jadi ho pe, songon i ma dokkon tu raja i.”+ 13 Alai didok si Mikaya ma, “Songon pastina Jahowa mangolu,* aha na nidok ni Debatakku ikkon i do pasahatonku.”+ 14 Dijuppangi si Mikaya ma raja i. Jala disukkun raja ma tu ibana, “Ale Mikaya, denggan do molo lao hami marporang tu Ramot-gilead manang na dang?” Dialusi si Mikaya ma, “Denggan do i. Talu do bahenonmuna Ramot-gilead i.” 15 Didok raja i ma, “Ikkon piga hali nai suruokku ho marsumpa, asa paboaonmu na sittong tu au di bagasan goar ni Jahowa?” 16 Gabe didok si Mikaya ma, “Huida do sude halak Israel marserak di akka dolok, songon biru-biru na so adong parmahanna.+ Jala songon on ma didok Jahowa, ‘Dang adong be tuan ni nasida. Lok ma mulak nasida tu jabu ni nasida be di bagasan dame.’”
17 Alani i didok raja ni Israel ma tu si Jehosapat, “Kan nungnga hudok tu ho, dang hea na denggan dipaboa ibana taringot tu au.”+
18 Didok si Mikaya ma muse, “Saonari, on ma na nidok ni Jahowa. Huida do Jahowa hundul di tahtana+ jala huida do sude tentara na di surgo+ jongjong di sabola kanan dohot di sabola kirina.+ 19 Dung i didok Jahowa ma, ‘Ise na olo mangoto-otoi si Ahab raja ni Israel asa lao ibana tu Ramot-gilead jala mate disi?’ Adong ma suru-suruan mandok songon on jala na deba mandok songon an. 20 Dung i ro ma sada suru-suruan+ tu jolo ni Jahowa. Didok ibana ma, ‘Au ma na lao mangoto-otoi raja ni Israel i.’ Disukkun Jahowa ma tu ibana, ‘Songon dia ma bahenonmu?’ 21 Didok suru-suruan i ma, ‘Lao ma au jala bahenokku ma margabus akka panurirangna i.’ Didok Debata ma, ‘Lao ma ho mangoto-otoi ibana, pasti marhasil do ho.’ 22 Songon i ma dalanna Jahowa paloasson suru-suruanna mambahen margabus akka panurirangmi.+ Alai nungnga ditottuhon Jahowa na lao masa hasusaan tu ho.”
23 Dipajonok si Sedekia+ anak ni si Kenaana ma tu si Mikaya jala dipastap ma bohi+ ni si Mikaya.+ Didok si Sedekia ma, “Maksudmu, na so ditogu-togu tondi parbadia ni Jahowa be au? Gabe marhite ho nama i makkatai?”+ 24 Dialusi si Mikaya ma, “Botoonmu do i haduan tikki martabuni ho di bagasan kamar.” 25 Dung i didok raja ni Israel ma, “Boan hamu ma si Mikaya on tu si Amon pamimpin ni kota dohot tu si Joas anak ni raja i. 26 Dokkon hamu ma muse tu nasida, ‘On ma na nidok ni raja, “Pamasuk hamu ma ibana tu penjara.+ Jala holan saotik ma lehon roti dohot aek tu ibana, sahat tu na mulak au di bagasan dame.”’” 27 Alai didok si Mikaya ma, “Molo mulak do ho di bagasan dame, dang tutu sian Jahowa na hudok i.”+ Didok ibana ma muse, “Hamu sude, ingot hamu ma na hudok i.”
28 Dung i, lao ma raja ni Israel dohot si Jehosapat raja ni Juda tu Ramot-gilead.+ 29 Didok raja ni Israel ma tu si Jehosapat, “Hugatti ma jo baju harajaokkon asa unang ditanda halak au. Dung i lao ma hita marporang. Alai pakke ma baju harajaonmi.” Digatti raja i ma bajuna asa unang ditanda halak ibana. Dung i lao ma nasida marporang. 30 Nungnga didok raja ni Siria hian tu akka pamimpin ni tentara na markareta porang, “Holan raja ni Israel ma alo hamu. Unang ma alo hamu akka tentara manang pamimpin ni tentara.” 31 Tikki diida akka pamimpin ni tentara na markareta porang i si Jehosapat, dirippu nasida ma i raja ni Israel. Gabe ro ma nasida mangalo ibana, alai marsurak ma si Jehosapat asa diurupi.+ Diurupi Jahowa do ibana jala dibahen Debata ma asa unang dilele be ibana. 32 Dung diboto nasida dang i hape raja ni Israel, dang dilele nasida be ibana.
33 Adong ma sahalak bawa na asal manembakkon panahna. Hape hona ma i tu pardomuan ni baju partahanan ni raja ni Israel. Gabe didok raja i ma tu na mamboan kareta porangna, “Boan ma au kaluar sian parporangan on, ai nungnga lukka au.”+ 34 Sadari manipat ma masa parporangan i. Ikkon ditiop nama raja i asa boi jongjong di kareta porangna huhut mangida halak Siria sahat tu botari. Dung botari, mate ma ibana.+
19 Dung i mulak ma Raja Jehosapat tu istanana di Jerusalem. Jala dang agia mahua ibana.+ 2 Ro ma si Jehu+ anak ni si Hanani+ na boi mandapot parnidaan i manjuppangi si Jehosapat. Didok ibana ma, “Denggan do di roham mangurupi halak na jahat+ jala makkaholongi halak na marsogo ni roha tu Jahowa?+ Alani i ma gabe muruk Jahowa tu ho. 3 Nang pe songon i, adong dope akka na denggan diida Ibana sian ho.+ Ai diruppakkon ho do akka tiang sisombaon* na adong di luat on. Jala disomba ho do Debata na sittong sian nasa roham.”+
4 Toktong do si Jehosapat tinggal di Jerusalem. Dung i lao ma ibana muse manjuppangi rakyatna, mulai sian Ber-seba sahat tu inganan na mardolok-dolok di Epraim.+ Dijujui ma nasida asa mulak muse manomba Jahowa Debata ni akka ompu ni nasida.+ 5 Dipillit ibana ma muse akka hakim di ganup kota+ na marbenteng di Juda. 6 Dung i didok ibana ma tu akka hakim i, “Manat ma hamu mangulahon tugasmuna. Ai di bagasan goar ni Jahowa do hamu mangadili, dang di bagasan goar ni jolma. Jala didongani Debata do hamu tikki mangadili.+ 7 Sai anggiat ma dihabiari hamu Jahowa.+ Ai sittong do Jahowa Debatanta. Dang dipaimbar-imbar Ibana jolma+ jala dang olo Ibana manjalo suap.+ Alani i, manat ma hamu mangulahon tugasmuna.”
8 Dipillit si Jehosapat ma muse deba halak Lepi, akka malim, dohot deba pamimpin ni halak Israel na sasaompu lao gabe hakim di Jerusalem. Di bagasan goar ni Jahowa do nasida mangadili. Nasida do muse na pasaehon parsoalan ni akka halak na tinggal di Jerusalem.+ 9 Didok si Jehosapat ma tu nasida, “Habiari hamu ma Jahowa, setia ma hamu mangulahon tugasmuna, jala ulahon ma i sian nasa rohamuna. Ai songon on ma na ikkon ulahononmuna: 10 Molo adong haha anggimuna na ro sian kota ni nasida lao paboahon parsoalan ala adong na mate dibunu,*+ manang adong na ro manukkun taringot patik, paretta, aturan, manang hukum, ikkon pasingotonmu do nasida asa unang mardosa nasida tu Jahowa. Molo dang, muruk ma Debata tu hamu dohot tu haha anggimuna. On ma na ikkon ulahononmuna asa unang mardosa hamu. 11 Malim Kepala* Amaria ma na gabe pengawasmuna. Ibana ma na mangurupi hamu mamboto lomo ni roha ni Jahowa taringot tu saluhutna.+ Si Sebadia anak ni si Ismael ma pengawas ni halak Juda. Ibana ma na mengawasi akka ulaon ni raja. Jala halak Lepi ma na gabe pengawasmuna. Togu ma hamu, jala ulahon hamu ma tugasmuna. Ai didongani Jahowa do akka halak na mangulahon na denggan.”+
20 Ro ma halak Moab,+ halak Ammon,+ dohot deba halak Ammonim* naeng marporang mangalo si Jehosapat. 2 Adong ma na mandok tu si Jehosapat, “Nungnga ro godang tentara sian akka huta na jonok tu laut* dohot na sian Edom+ naeng mangalo ho. Saonari nungnga di Hazezon-tamar nasida, i ma di En-gedi.”+ 3 Gabe mabiar ma si Jehosapat mambege i. Jala marsakkap ma ibana manukkun* Jahowa.+ Alani i, disuru ibana ma marpuasa sude halak Juda. 4 Marpungu ma halak Juda lao mangido asa diurupi Jahowa.+ Marroan ma nasida sian sude kota na di Juda lao manukkun tu Jahowa.
5 Marpungu ma halak Juda dohot halak Jerusalem di alaman na baru na adong di jabu ni Jahowa. Jala jongjong ma si Jehosapat di jolo ni nasida. 6 Didok ibana ma,
“Ale Jahowa Debata ni akka ompunami, holan Ho do Debata na di surgo.+ Marhuaso do Ho tu sude bangso.+ Jala dang adong na tolap mangalo Ho. Ai na gogo do Ho jala marhuaso.+ 7 Ale Debatanami, nungnga dipalao Ho pangisi ni luat on sian jolo ni bangsom Israel. Dilehon Ho do i tu pinoppar ni si Abraham ale-alem, asa gabe appuna ni nasida i saleleng ni lelengna.+ 8 Disi ma nasida tinggal, jala dipajongjong nasida ma disi sada inganan na badia lao pasangappon goarmu.+ Didok nasida do, 9 ‘Molo masa tu hami jea alani podang, hukuman, sahit, manang haraparon, dung i jongjong hami di jolo ni jabu on dohot di jolom (ai parohon sangap tu goarmu do jabu on)+ jala hupangido hami asa diurupi Ho hami sian hasusaannami, tangihon ma hami jala palua ma hami.’+ 10 Saonari ro do tuson halak Ammon, halak Moab, dohot akka halak na sian Dolok Seir.+ Najolo tikki kaluar sian Mesir, diorai Ho do halak Israel manaluhon nasida. Alani i ma ditinggalhon halak Israel nasida jala dang dipamate.+ 11 Hape saonari naeng dialo nasida do hami. Jala naeng dipalao nasida do hami sian tano na nilehonmu gabe warisannami.+ 12 Ale Debatanami, hukum ma nasida!+ Ai dang tolap hami mangalo tentara na godang on. Jala dang huboto hami aha na ikkon sibahenonnami.+ Holan Ho do na hupangasahon hami.”+
13 Tikki i, marpungu ma sude halak Juda di jolo ni Jahowa. Marpungu do nasida rap dohot istri ni nasida, anakkon* ni nasida, dohot anakkon ni nasida na gelleng dope.
14 Adong do di tonga-tonga ni nasida sahalak bawa na margoar si Jehasiel. Halak Lepi do ibana na sian pinoppar ni si Asap. Bapak ni si Jehasiel, i ma si Sakaria. Bapak ni si Sakaria, i ma si Benaya. Bapak ni si Benaya, i ma si Jeiel. Bapak ni si Jeiel, i ma si Matania. Dung i, songgop ma tondi parbadia ni Jahowa tu si Jehasiel. 15 Didok ibana ma, “Ale halak Juda, halak Jerusalem, dohot Raja Jehosapat, tangihon hamu ma au! On ma na nidok ni Jahowa tu hamu, ‘Unang ma mabiar hamu. Ai dang hamu na marporang alai Debata do.+ 16 Marsogot juppangi hamu ma nasida. Ai lewat do nasida marsogot sian Tanjakan Sis. Dung i pajuppang ma hamu di ujung ni rura* na di jolo ni gurun Jeruel. 17 Dang porlu hamu marporang. Marbaris ma hamu, jongjong,+ jala ida ma Jahowa paluahon hamu.+ Unang ma mabiar hamu ale halak Juda dohot halak Jerusalem.+ Juppangi hamu ma nasida marsogot. Ai didongani Jahowa do hamu.’”+
18 Pittor marsomba ma si Jehosapat. Jala sude ma halak Juda dohot halak Jerusalem marsomba tu jolo ni Jahowa lao manomba Jahowa. 19 Dung i jongjong ma halak Lepi pinoppar ni si Kohat+ dohot pinoppar ni si Kora. Gogo ma soara ni nasida mamuji Jahowa Debata ni Israel.+
20 Marsogotna i tikki manogot dope, borhat ma nasida tu Gurun Tekoa.+ Tikki na borhat i nasida, didok si Jehosapat ma, “Ale halak Juda dohot halak Jerusalem, tangihon ma au! Porsea ma hamu tu Jahowa Debatamuna asa barani* hamu. Porsea ma hamu tu akka panurirangna*+ asa monang hamu.”
21 Dung makkatai si Jehosapat tu bangso i, dipillit ibana ma akka halak na lao marende+ tu Jahowa. Mardalan ma nasida di jolo ni akka tentara i marbaju na badia huhut mamuji Debata. Didok nasida ma, “Mandok mauliate ma tu Jahowa, ai toktong do dipatudu Ibana holong ni rohana* sahat tu saleleng ni lelengna.”+
22 Tikki na marende i nasida mamuji Debata, dialo Jahowa ma halak Ammon, halak Moab, dohot akka halak na sian Dolok Seir na ro mangalo halak Juda. Gabe masipamatean ma nasida.+ 23 Dipamate halak Ammon dohot halak Moab ma akka halak na sian Dolok Seir.+ Dung mate sude halak na sian Dolok Seir i, masipamatean+ ma halak Ammon dohot halak Moab.
24 Tikki sahat halak Juda di menara na di padang belantara i,+ diida nasida ma nungnga marmatean be sude tentara i.+ Jala dang adong nanggo sada pe na mangolu. 25 Dung i dibuat si Jehosapat dohot akka tentarana ma akka barang ni tentara na marmatean i. Massai godang do dapot ni nasida akka barang, pakkean, dohot akka barang na arga. Sappe dang tolap nasida mamboan sude barang i alani godangna.+ Pola tolu ari lelengna nasida mamboan akka barang i. 26 Di ari na paopatton, marpungu ma nasida di Rura Beraka. Ai disi do nasida mamuji Jahowa. Alani i ma digoari nasida inganan i Rura Beraka*+ sahat tu sadari on.
27 Dung i, mulak ma sude halak Jerusalem dohot halak Juda tu Jerusalem. Mardalan ma si Jehosapat di jolo ni nasida. Marlas ni roha do nasida tikki na mulak i, ai nungnga talu akka musu ni nasida dibahen Jahowa.+ 28 Masuk ma nasida tu Jerusalem huhut marharpa,+ martarompet,+ jala mamakke alat musik na martali. Dung i masuk ma nasida tu jabu ni Jahowa.+ 29 Dibege sude harajaon ma naung ditaluhon Jahowa musu ni halak Israel.+ Gabe mabiar ma nasida dibahen Debata. 30 Alani i, aman ma harajaon ni si Jehosapat. Ai dibahen Debata do asa unang adong musu di sakaliling ni nasida.+
31 Toktong do si Jehosapat mamaretta di Juda. Marumur 35 taon ma ibana tikki gabe raja. Jala mamaretta ma ibana saleleng 25 taon di Jerusalem. Si Azuba boru ni si Silhi do omakna.+ 32 Sai toktong do diihutton si Jehosapat sude na niulahon ni si Asa+ bapakna. Dang hea manimbil ibana sian i, jala diulahon ibana do na sittong di jolo ni Jahowa.+ 33 Alai, toktong dope adong disi akka inganan panombaon.*+ Jala dang disomba bangso i Debata ni akka ompu ni nasida sian nasa roha ni nasida.+
34 Sude na niulahon ni si Jehosapat mulai sian mulana sahat tu ujungna, disurat si Jehu+ anak ni si Hanani+ do i di bukku sejarah taringot akka raja ni Israel. 35 Dukkon i, marale-ale ma si Jehosapat raja ni Juda tu si Ahasia raja ni Israel na jahat.+ 36 Rap mambahen kapal ma nasida di Esion-geber.+ Lao dipakke do akka kapal i marlayar tu Tarsis.+ 37 Alai dipaboa si Elieser anak ni si Dodawahu na sian Maressa ma na lao masa tu si Jehosapat. Didok ibana ma, “Ala marale-ale ho tu si Ahasia, sega ma bahenon ni Jahowa akka na binahenmi.”+ Gabe puttar ma akka kapal i+ jala dang boi be nasida marlayar tu Tarsis.
21 Mate ma si Jehosapat jala dikuburhon rap dohot akka ompuna di Kota ni si Daud. Dung i, anakna si Jehoram ma na gabe raja manggattihon ibana.+ 2 Akka anggi ni si Jehoram, i ma si Azaria, si Jehiel, si Sakaria, si Azaria, si Mikhael, dohot si Sepatia. Akka i ma anak ni si Jehosapat raja ni Israel. 3 Dilehon si Jehosapat do tu nasida godang perak, mas, akka barang na arga, dohot akka kota na marbenteng di Juda.+ Alai anggo harajaon i tu si Jehoram do dilehon,+ ai ibana do anak siakkanganna.
4 Dung gabe raja si Jehoram manggattihon bapakna, dipamate ibana ma sude anggina+ dohot deba pejabat ni Israel mamakke podang. Gabe lam marhuaso ma ibana. 5 Marumur 32 taon ma si Jehoram tikki gabe raja ibana. Jala mamaretta ma ibana saleleng ualu taon di Jerusalem.+ 6 Sai diulahon si Jehoram do na jahat di jolo ni Jahowa. Diihutton ibana do hajahaton ni akka raja na di Israel,+ songon na binahen ni keluarga ni si Ahab. Ai dibuat ibana do boru ni si Ahab gabe istrina.+ 7 Alai dang diloas Jahowa mate sude pinoppar ni si Daud. Ai nungnga marjanji Debata tu si Daud,+ na toktong do mamaretta* pinopparna di Jerusalem.+
8 Tikki mamaretta si Jehoram di Juda, mangalo ma halak Edom tu halak Juda.+ Jala halak Edom sandiri ma na mamillit ise rajana.+ 9 Dung i lao ma si Jehoram mangalo halak Edom tikki borngin. Diboan ibana do akka pamimpin ni tentara dohot akka tentarana na markareta porang. Hape nungnga dihaliangi halak Edom si Jehoram dohot akka pamimpin ni tentarana. Alai ditaluhon si Jehoram do nasida. 10 Nang pe songon i, torus do mangalo halak Edom tu halak Juda. Jala dohot do halak Libna+ mangalo tu halak Juda. Ai nungnga ditadikkon si Jehoram be Jahowa Debata ni akka ompuna.+ 11 Dipajongjong si Jehoram ma akka inganan panombaon*+ di akka dolok na di Juda. Gabe ditadikkon halak Juda ma Debata. Ai disomba halak Jerusalem do debata na so sittong.*
12 Dung i dilehon ma tu si Jehoram surat sian Panurirang* Elia.+ On ma isi ni surat i, “On ma na nidok ni Jahowa Debata ni si Daud ompumi, ‘Dang ditiru ho bapakmu si Jehosapat+ manang si Asa+ raja ni Juda. 13 Alai ditiru ho do akka raja ni Israel.+ Jala dibahen ho do halak Juda dohot halak Jerusalem gabe manomba debata na so sittong,*+ songon na binahen ni keluarga ni si Ahab.+ Dipamate ho do muse akka anggim,+ i ma akka anak ni bapakmu. Hape dumenggan do nasida sian ho. 14 Alani i, paroon ni Jahowa ma jea tu bangsom, tu akka anakmu, tu akka istrim, dohot tu sude na adong di ho. 15 Jala na lao godang ma sahitmu, dohot ma i marsahit butuha. Lam posi ma sahit butuhami ganup ari, sappe kaluar ma ususmu.’”
16 Dung i dibahen Jahowa ma ro+ halak Palistim+ dohot halak Arab+ na jonok tu Etiopia lao mangalo si Jehoram. 17 Masuk ma nasida tu luat ni halak Juda jala ditaluhon ma akka halak na disi. Dibuat nasida ma akka arta na di istana ni raja,+ akka anak ni raja, dohot akka istrina. Holan si Jehoahas*+ siappudan ni si Jehoram ma na tinggal. 18 Dukkon masa i sude, dibahen Jahowa ma marsahit butuha si Jehoram. Jala dang boi be dipamalum sahitna i.+ 19 Dung lewat dua taon, lam posi ma sahitna i, sappe kaluar ma ususna. Gabe mate ma ibana alani sahitna i. Alai dang dipagalak rakyatna api lao pasangappon ibana, songon na binahen ni nasida tu akka ompuna.+ 20 Marumur 32 taon ma si Jehoram tikki gabe raja. Jala mamaretta ma ibana saleleng ualu taon di Jerusalem. Dang adong na marlungun ni roha tikki na mate i ibana. Dung i, dikuburhon ma ibana di Kota ni si Daud,+ alai dang di kuburan ni akka raja.+
22 Dung i dibahen halak Jerusalem ma si Ahasia anak siappudan ni si Jehoram gabe raja manggattihon ibana. Ai tikki ro akka pangarampok tu perkemahan ni halak Juda rap dohot halak Arab, dipamate nasida do sude abang ni si Ahasia.+ Alani i ma gabe raja si Ahasia anak ni si Jehoram di Juda.+ 2 Marumur 22 taon ma si Ahasia tikki gabe raja. Jala holan sataon do ibana mamaretta di Jerusalem. Si Atalia+ do goar ni omakna, i ma pahoppu* ni si Omri.+
3 Sai diihutton si Ahasia do hajahaton ni keluarga ni si Ahab.+ Ai omakna do mangajari ibana mangulahon na jahat. 4 Sai diulahon ibana do na jahat di jolo ni Jahowa, songon na binahen ni keluarga ni si Ahab. Dung mate bapakna, keluarga ni si Ahab do na gabe penasehatna. Alani i, gabe marjea ma ibana. 5 Diihutton si Ahasia do hata ni nasida. Jala didongani ibana do si Jehoram anak ni si Ahab tu Ramot-gilead+ mangalo si Hasael+ raja ni Siria. Alai gabe lukka do si Jehoram tikki i ala hona panah. 6 Alani i, mulak ma si Jehoram tu kota Jisreel+ lao mangubati lukkana i. Ai tikki ro ibana mangalo si Hasael raja ni Siria,+ lukka do ibana dibahen halak Siria di Rama.
Dung i, ro ma si Ahasia* anak ni si Jehoram+ raja ni Juda tu Jisreel lao mangida si Jehoram+ anak ni si Ahab. Ai lukka* do tikki i si Jehoram raja ni Israel i.+ 7 Alai tikki na lao i si Ahasia manjuppangi si Jehoram, dibahen Debata ma i gabe dalan asa mate si Ahasia. Ai lao do ibana rap dohot si Jehoram manjuppangi si Jehu+ pahoppu* ni si Nimsi, i ma halak naung dipillit* Jahowa pamatehon keluarga ni si Ahab.+ 8 Dung i dipamate si Jehu ma keluarga ni si Ahab. Tikki i, pajuppang ma si Jehu dohot akka halak na karejo tu si Ahasia, i ma akka pejabat ni Juda dohot akka anak ni abang ni si Ahasia. Jala dipamate si Jehu ma nasida.+ 9 Dung i disuru si Jehu ma akka tentarana mangalului si Ahasia. Tikki i martabuni do si Ahasia di Samaria. Ditakkup nasida ma si Ahasia, diboan tu si Jehu, jala dipamate ma ibana. Alai dikuburhon nasida do ibana,+ ai didok nasida do, “Pahoppu ni si Jehosapat do ibana, halak na manomba Jahowa sian nasa rohana.”+ Tikki i dang adong sian keluarga ni si Ahasia na boi manggattihon ibana gabe raja.
10 Dung diboto si Atalia+ omak ni si Ahasia naung mate anakna i, dipamate ibana ma sude pinoppar ni raja ni Juda na marhak mamaretta.+ 11 Holan si Jehoas+ anak ni si Ahasia do na malua. Ai tikki naeng dibunu sude pinoppar ni raja, dipalua si Jehoseba do ibana. Boru ni si Jehoram+ do si Jehoseba, i ma iboto ni si Ahasia, istri ni Malim Jehoyada.+ Ditabunihon do si Jehoas rap dohot parorotna di sada kamar. Alani i ma dang dohot ibana dipamate si Atalia.+ 12 Onom taon ma lelengna si Jehoas rap tinggal dohot nasida. Toktong do ibana martabuni di jabu ni Debata na sittong saleleng mamaretta si Atalia di Juda.
23 Di taon na papituhon, dibahen si Jehoyada ma parjanjian tu akka pamimpin ni na sasaratus,+ i ma si Azaria anak ni si Jeroham, si Ismael anak ni si Johohanan, si Azaria anak ni si Obed, si Maaseya anak ni si Adaya, dohot si Elisapat anak ni si Sikri. Dang mabiar si Jehoyada mambahen parjanjian i. 2 Dung i lao ma nasida tu sude huta ni halak Juda. Dipapungu nasida ma akka halak Lepi+ na disi dohot akka pamimpin ni halak Israel na sasaompu. Dung sahat nasida sude tu Jerusalem, 3 mambahen parjanjian+ ma nasida dohot raja i di jabu ni Debata na sittong. Jala didok si Jehoyada ma tu nasida,
“Mamaretta nama anak ni raja, songon janji ni Jahowa tu pinoppar ni si Daud.+ 4 On ma na lao ulahononmuna: Ikkon manjaga pintu+ do sapartolu sian akka malim dohot halak Lepi na martugas+ di ari Sabat. 5 Sapartolu nai, marjaga ma di istana ni raja.+ Jala sapartolu nai marjaga di Gerbang Fondasi. Dung i, suru ma marpungu sude rakyat di alaman ni jabu ni Jahowa.+ 6 Dang boi manang ise masuk tu jabu ni Jahowa, holan akka malim dohot halak Lepi na martugas+ do na boi masuk. Ai punguan na badia do nasida. Alai anggo akka na asing i, di luar ma nasida songon paretta ni Jahowa. 7 Ikkon marjaga do halak Lepi di labbung ni raja i. Jala tiop hamu ma sinjatamuna. Molo adong na masuk tu jabu i, pamate hamu ma ibana. Jala dongani hamu ma raja i manang na tudia pe ibana lao.”*
8 Diulahon halak Lepi dohot sude halak Juda do na nidok ni Malim Jehoyada. Ro ma nasida manjuppangi Malim Jehoyada rap dohot akka tentara ni nasida na martugas di ari Sabat+ dohot tentara na so martugas di ari Sabat. Ai disuru Malim Jehoyada do akka tentara i martugas.+ 9 Dilehon Malim Jehoyada ma tombak dohot perisai na gelleng* tu akka pamimpin ni pengawal ni raja na sasaratus i.+ Appuna ni Raja Daud+ do tombak* dohot perisai i jala di jabu ni Debata na sittong+ do i disippan. 10 Disuru Malim Jehoyada ma nasida sude marjaga di ingananna be huhut maniop sinjatana. Marjaga ma nasida di sabola kanan ni jabu i, di sabola kiri ni jabu i, di labbung ni langgatan, dohot di labbung ni jabu i. Gabe sude ma nasida marjaga di sakaliling ni raja i. 11 Dung i diboan nasida ma kaluar anak ni raja i.+ Dibahen ma mahkota tu uluna. Dung i dibahen si Jehoyada dohot akka anakna ma Patik*+ tu atas ni ulu ni anak ni raja i patuduhon naung dilantik* jala dibahen ibana gabe raja. Didok nasida ma, “Sai ganjang ma umur ni raja i!”+
12 Dibege si Atalia ma soara ni akka halak na marikkati jala na mamuji raja i. Dung i lao ma ibana tu jabu ni Jahowa.+ 13 Diida si Atalia ma jongjong raja i di labbung ni tiang na jonok tu pintu. Rap jongjong do raja i, akka pejabat,+ dohot akka halak na martarompet. Marlas ni roha do jolma na torop i+ huhut martarompet. Jala marende do akka parende huhut mamakke alat musik. Laos parende i do na mamimpin akka halak na mamuji Debata. Gabe diribak si Atalia ma abitna jala marsurak ma ibana mandok, “Penghianat! Penghianat!” 14 Alai diboan Malim Jehoyada ma akka pamimpin ni tentara na sasaratus tu luar. Didok ibana ma tu nasida, “Boan hamu ma ibana kaluar sian on. Molo adong na mangihutton ibana, pamate ma mamakke podang!” Andorang so i, nungnga didok malim i hian, “Unang ma pamate si Atalia di jabu ni Jahowa.” 15 Ditakkup nasida ma ibana, jala diboan ma ibana tu Gerbang ni Hoda na di istana ni raja. Pittor dipamate nasida ma ibana disi.
16 Dung i, dibahen si Jehoyada ma parjanjian tu raja i dohot tu akka rakyat i, na toktong do nasida gabe naposo ni Jahowa.+ 17 Lao ma sude rakyat i tu inganan manomba Baal.+ Diruppakkon nasida ma akka langgatan dohot akka patung na adong disi.+ Jala dipamate nasida ma si Matan malim ni Baal+ di jolo ni akka langgatan i. 18 Dung i disuru si Jehoyada ma akka malim dohot halak Lepi martugas di jabu ni Jahowa. Najolo, nungnga dibahen si Daud nasida gabe piga-piga punguan. Nasida ma na martugas di jabu ni Jahowa jala na mangalehon pelean situtungon tu Jahowa,+ songon na tarsurat di Patik ni si Musa.+ Jala ikkon marlas ni roha do nasida marende songon paretta ni si Daud. 19 Dipillit si Jehoyada ma muse akka panjaga gerbang+ ni jabu ni Jahowa, asa unang masuk tusi manang ise pe na ramun.* 20 Disuru si Jehoyada ma akka pamimpin ni tentara na sasaratus,+ akka na sangap, akka pamimpin ni rakyat, dohot sude rakyat mandongani raja borhat sian jabu ni Jahowa. Masuk ma nasida sian gerbang parginjang tu istana ni raja. Jala hundul ma raja i di tahtana.+ 21 Marlas ni roha ma sude rakyat i jala dame ma kota i. Ai nungnga dipamate nasida si Atalia mamakke podang.
24 Marumur pitu taon ma si Jehoas tikki gabe raja.+ Saleleng 40 taon ma si Jehoas mamaretta Jerusalem. Goar ni omakna i ma si Zibia na sian Ber-seba.+ 2 Sai diulahon si Jehoas do na sittong di jolo ni Jahowa saleleng mangolu Malim Jehoyada.+ 3 Dipillit si Jehoyada ma dua borua gabe istri ni si Jehoas. Gabe adong ma akka anakna dohot boruna.
4 Di pudian ni ari, marsakkap ma si Jehoas lao padenggatton jabu ni Jahowa.+ 5 Alani i, dipapungu ibana ma akka malim dohot halak Lepi. Didok ibana ma tu nasida, “Lao ma hamu tu akka kota na di Juda. Papungu hamu ma hepeng sian sude halak Israel lao pakkeon padenggatton jabu ni Debatamuna+ ganup taon. Hatop ma ulahon hamu on.” Alai dang pittor diulahon halak Lepi i.+ 6 Gabe dijou raja ma Malim Kepala* Jehoyada. Didok ma tu ibana,+ “Boasa dang disuru ho halak Lepi papunguhon pajak na badia sian halak Juda dohot halak Jerusalem? Ai songon i do najolo paretta ni si Musa+ naposo ni Jahowa i. Ikkon dipapungu do pajak na badia sian sude halak Israel lao pakkeon tu kemah na badia.+ 7 Ai masuk do akka anak ni si Atalia+ boru-boru na jahat i tu jabu ni Debata na sittong.+ Jala dibuat nasida do sude akka barang na badia na adong di jabu ni Jahowa. Dipakke nasida do i lao manomba Baal.” 8 Dung i, disuru raja ma asa dibahen sada kotak.+ Jala dibahen ma i di labbung ni gerbang jabu ni Jahowa i.+ 9 Dipaboa ma tu sude luat Juda dohot Jerusalem asa mamboan pajak+ na badia tu Jahowa. Ai songon i do paretta ni si Musa naposo ni Debata na sittong i tu halak Israel tikki di gurun. 10 Marlas ni roha ma sude pejabat dohot bangso i.+ Diboan nasida ma akka sumbangan jala dipamasuk ma i tu kotak i, sappe gok kotak i.*
11 Molo dung godang hepeng di bagasan kotak i, diboan halak Lepi ma i tu raja. Dung i, ro ma sekretaris ni raja dohot sintua ni malim papunguhon jala mangetong hepeng na di kotak i.+ Jala dibahen ma muse kotak i tu ingananna. Songon i ma dibahen nasida ganup ari gabe godang ma hepeng na dipapungu. 12 Dung i lehonon ni raja dohot si Jehoyada ma hepeng i tu akka halak na dipillit lao mangurus jabu ni Jahowa. Nasida ma na mangalehon upa ni akka panokkok batu dohot akka tukkang na padenggatton jabu ni Jahowa.+ Jala nasida ma muse na mangalehon upa ni tukkang logam dohot tukkang tombaga na padenggatton jabu ni Jahowa. 13 Dimulai akka halak na dipillit i ma padenggatton jabu ni Debata na sittong i. Nasida do pengawas ni akka parkarejo disi. Dipature ma jabu i jala gabe denggan ma i songon na parjolo i. 14 Dung sae jabu i, diboan nasida ma hepeng na lobi tu raja dohot tu si Jehoyada. Dipakke nasida ma hepeng i lao mambahen akka barang di jabu ni Jahowa, mambahen akka barang na dipakke tikki marhobas tu Debata, dohot mambahen akka barang na dipakke tikki mangalehon pelean. Jala dipakke do muse hepeng i mambahen akka makkuk dohot akka barang na sian mas dohot perak.+ Saleleng mangolu si Jehoyada dilehon nasida do pelean situtungon+ di jabu ni Jahowa ganup ari.
15 Nungnga matua si Jehoyada jala sonang do dihilala ibana saleleng ngoluna. Dung i mate ma ibana tikki marumur 130 taon. 16 Diulahon ibana do akka na denggan tu halak Israel,+ tu Debata na sittong, dohot tu jabu ni Debata. Alani i, dikuburhon ma ibana di kuburan ni akka raja di Kota ni si Daud.+
17 Dung mate si Jehoyada, ro ma akka pejabat ni Juda marsomba tu raja i. Jala ditangihon raja i ma na nidok ni nasida. 18 Gabe ditadikkon bangso i ma jabu ni Jahowa Debata ni akka ompu ni nasida. Disomba nasida ma tiang sisombaon* dohot akka patung. Alani dosa ni nasida i, muruk ma Debata tu Juda dohot tu Jerusalem. 19 Sai disuru Jahowa do akka panurirang* pasingotton nasida asa mulak tu Ibana. Alai dang olo nasida manangihon.+
20 Dung i, songgop ma tondi parbadia ni Debata tu si Sakaria anak ni Malim Jehoyada.+ Jongjong ma ibana di sada inganan na timbo di tonga-tonga ni bangso i jala didok ma, “On ma na nidok ni Debata na sittong, ‘Boasa ma dialo hamu paretta ni Jahowa jala diparo hamu jea tu dirimuna? Ala nungnga ditadikkon hamu Jahowa, tadikkononna ma hamu.’”+ 21 Alai sahata ma nasida mangalo ibana.+ Disuru raja ma asa didangguri ibana sappe mate di alaman ni jabu ni Jahowa.+ 22 Dang diingot Raja Jehoas holong* na pinatudu ni si Jehoyada bapak ni si Sakaria tu ibana. Dipamate ibana do si Sakaria. Andorang so mate didok si Sakaria ma, “Sai diida Jahowa ma pambahenanmon, jala baloshononna do i tu ho.”+
23 Di mula ni taon na mangihut, ro ma tentara ni Siria mangalo si Jehoas. Ditaluhon nasida ma Juda dohot Jerusalem.+ Dipamate ma sude pejabat+ ni bangso i, dibuat ma akka barang ni nasida, jala dilehon ma i tu raja ni Damaskus. 24 Otik do tentara ni Siria alai godang do tentara ni Juda. Nang pe songon i dipasahat Jahowa do halak Juda tu halak Siria.+ Jala dihukum nasida* do si Jehoas. Ai ditadikkon halak Juda do Jahowa Debata ni akka ompu ni nasida. 25 Dung lao halak Siria (lukka parah* do si Jehoas tikki i) marsakkap ma akka parkarejona mangalo ibana jala dipamate ma ibana di podomanna.+ Ai dipamate ibana do* akka anak* ni Malim Jehoyada.+ Mate ma si Jehoas jala dikubur ma ibana di Kota ni si Daud.+ Alai dang di kuburan ni akka raja ibana dikubur.+
26 Akka halak na pamatehon+ si Jehoas, i ma si Sabad anak ni si Simeat halak Ammon i dohot si Jehosabad anak ni si Simrit halak Moab i. 27 Disurat do taringot akka anak ni si Jehoas di bukku sejarah taringot akka raja ni Israel. Disurat do muse disi taringot akka jea na lao masa tu ibana.+ Jala disurat do muse disi songon dia jabu ni Debata na sittong dipadenggan.+ Dung i, anakna si Amasia ma na gabe raja manggattihon ibana.
25 Marumur 25 taon ma si Amasia tikki gabe raja. Jala saleleng 29 taon ma ibana mamaretta di Jerusalem. Goar ni omakna, i ma si Joadan na sian Jerusalem.+ 2 Toktong do diulahon si Amasia na sittong di jolo ni Jahowa, alai dang sian nasa rohana ibana mangulahon i. 3 Dung lam hot huasona di harajaon i, dipamate ibana ma akka pejabatna na pamatehon bapakna.+ 4 Alai dang dipamate ibana akka anak ni halak na mambunu bapakna i. Diihutton ibana do paretta na adong di Patik ni si Musa. Didok Jahowa do disi, “Dang pamateon sahalak ama alani dosa ni akka anakna. Jala dang pamateon akka anak alani ni dosa ni bapak ni nasida. Manang ise na mardosa ikkon i do na mate.”+
5 Dung i dipapungu si Amasia ma halak Juda. Disuru ma halak Juda dohot halak Benjamin jongjong. Jala marpungu ma nasida na sasaompu. Akka pamimpin ni na sasaratus dohot pamimpin ni na sasaribu do na gabe pengawas ni nasida.+ Dietong si Amasia ma godang ni halak na marumur 20 taon tu ginjang.+ Adong ma sian nasida 300.000 tentara naung dilatik,* na boi mamakke tombak* dohot perisai na balga. 6 Digaji ibana ma muse 100.000 tentara ni halak Israel na jago. Jala dilehon ma 100 talenta* perak upa ni nasida. 7 Alai didok naposo ni Debata na sittong ma tu ibana, “Ale raja, unang ma lao ho rap dohot akka tentara ni Israel. Ai dang didongani Jahowa halak Israel.+ Jala dang didongani Ibana nanggo sahalak pe sian pinoppar ni si Epraim. 8 Holan hamu ma na lao marporang. Unang ma mabiar hamu. Molo dang, bahenon ni Debata na sittong ma hamu talu di jolo ni akka musu. Ai margogo do Debata mangurupi+ manang mambahen talu.” 9 Alai didok si Amasia ma tu naposo ni Debata na sittong i, “Boha nama 100 talenta perak naung hulehon tu tentara ni Israel i?” Didok naposo ni Debata na sittong i ma, “Boi do lehonon ni Jahowa tu ho lobi sian i.”+ 10 Alani i, disuru si Amasia ma mulak akka tentara na sian Epraim i. Gabe muruk ma nasida tu halak Juda, jala jut ma roha ni nasida tikki na mulak i nasida tu hutana.
11 Dung i dipapos si Amasia ma rohana jala lao ma ibana dohot akka tentarana tu Rura Sira.+ Dipamate ibana ma 10.000 halak Seir.+ 12 Jala ditakkup halak Juda ma muse 10.000 halak Seir na mangolu dope. Diboan ma nasida tu pussu ni dolok batu. Didabuhon ma nasida sian i, gabe marmatean ma nasida jala masarsar ma dagingna. 13 Alai ro ma akka tentara na dipaulak ni si Amasia i manaluhon+ akka kota na di Juda. Ditaluhon nasida ma mulai sian kota Samaria+ sahat tu Bet-horon.+ Dipamate akka tentara i ma 3.000 halak na disi jala dibuat ma akka barang ni nasida.
14 Dung ditaluhon si Amasia halak Edom, diboan ibana do mulak akka debata ni halak Seir. Dibahen ma i gabe debatana,+ marsomba ma ibana tusi, jala ditutung ibana ma pelean tu akka patung i.* 15 Gabe muruk situtu ma Jahowa tu si Amasia. Disuru ma sahalak panurirang* mandok tu ibana, “Boasa disomba ho akka debata ni halak Seir? Hape so tolap akka debata i paluahon nasida sian ho.”+ 16 Tikki makkatai dope panurirang i, didok raja i ma, “Ise na mamillit ho gabe penasehat ni raja?+ Sip ma ho!+ Sotung hupamate ho.” Gabe sip ma panurirang i. Alai didok panurirang i ma muse, “Nungnga ditottuhon Debata lao parohon jea tu ho. Ai disomba ho do akka debata i jala dang ditangihon ho hatakku.”+
17 Dung makkatai si Amasia raja ni Juda tu akka penasehatna, disuru ibana ma halak manjuppangi si Jehoas anak ni si Jehoahas pahoppu ni si Jehu raja ni Israel. Didok ma, “Beta, marporang ma hita.”+ 18 Disuru si Jehoas raja ni Israel ma halak mandok tu si Amasia raja ni Juda, “Adong ma ramba na marsuga di Libanon. Jala adong ma na disuru ramba i mandok tu hau ares na di Libanon, ‘Lehon ma borumi gabe istri ni anakku.’ Hape lewat ma binatang liar na sian Libanon, gabe didegei ma ramba na marsuga i. 19 Didok roham do, ‘Nungnga hutaluhon* halak Edom.’+ Alani i ma gabe ginjang roham. Marlas ni roha ma ho ala monang, alai di istanam ma ho tinggal. Boasa ma luluanmu jea na mambahen ho dohot halak Juda gabe susa?”
20 Alai dang olo si Amasia manangihon hata ni si Jehoas.+ Ai nungnga ditottuhon Debata na sittong asa ditaluhon nasida,+ ala disomba nasida do debata ni halak Edom.+ 21 Alani i, borhat ma si Jehoas raja ni Israel lao marporang mangalo si Amasia raja ni Juda. Marporang ma nasida di Bet-semes+ huta ni halak Juda. 22 Talu ma halak Juda dibahen halak Israel. Gabe lari ma tentara ni Juda tu huta ni nasida.* 23 Ditakkup si Jehoas ma si Amasia raja ni Juda anak ni si Jehoas pahoppu ni si Jehoahas* di Bet-semes. Dung i, diboan halak Israel ma ibana tu Jerusalem. Diruppakkon ma tembok ni Jerusalem mulai sian Gerbang Epraim+ sahat tu Gerbang Sudut,+ na ganjangna 400 asta.* 24 Dibuat si Jehoas ma sude mas, perak, dohot akka barang na adong di jabu ni Debata na sittong dohot na adong di istana ni raja.+ Si Obed-edom do na manjaga akka barang na di jabu ni Debata na sittong i. Jala diboan si Jehoas ma piga-piga halak na lao ditobus muse. Dung i mulak ma ibana tu Samaria.
25 Dung mate si Jehoas+ anak ni si Jehoahas raja ni Israel i,+ mangolu dope si Amasia+ anak ni si Jehoas raja ni Juda 15 taon nai. 26 Sude na niulahon ni si Amasia mulai sian mulana sahat tu ujungna, disurat do i di bukku sejarah taringot akka raja ni Juda dohot akka raja ni Israel. 27 Dung ditadikkon si Amasia Jahowa, adong ma piga-piga halak na marsakkap+ mangalo si Amasia di Jerusalem. Gabe lari ma si Amasia tu Lakis. Alai disuru nasida ma halak mangalele ibana sahat tu Lakis jala dipamate ma ibana disi. 28 Dung i, diboan ma bakke ni si Amasia mulak mamakke hoda. Jala dikuburhon ma ibana rap dohot akka ompuna di kota Juda.
26 Dibahen akka halak Juda ma si Usia+ gabe raja manggattihon bapakna si Amasia. Marumur 16 taon ma ibana tikki gabe raja.+ 2 Dung mate si Amasia, dipadenggan si Usia ma kota Elot+ jala gabe appuna ni halak Juda ma muse kota i.+ 3 Marumur 16 taon ma si Usia+ tikki gabe raja. Jala saleleng 52 taon ma ibana mamaretta di Jerusalem. Goar ni omakna, i ma si Jekolia na sian Jerusalem.+ 4 Sai diulahon ibana do na sittong di jolo ni Jahowa, songon na niulahon ni bapakna si Amasia.+ 5 Toktong do disomba ibana Debata saleleng mangolu si Sakaria. Ai diajari si Sakaria do ibana asa makkabiari Debata na sittong. Saleleng disomba ibana Jahowa, sai dipasu-pasu Debata na sittong do ibana.+
6 Dung i lao ma si Usia marporang mangalo halak Palistim.+ Diruppakkon ibana ma tembok ni Gat,+ tembok ni Jamnia,+ dohot tembok ni Asdod.+ Dipajongjong ibana ma muse akka kota di luat Asdod dohot di tonga-tonga ni halak Palistim. 7 Sai diurupi Debata na sittong do ibana mangalo halak Palistim, halak Arab+ na tinggal di Gurbal, dohot halak Meunim. 8 Dung i dilehon halak Ammon+ ma pajak tu si Usia. Gabe tarbarita ma ibana sahat tu Mesir, ai lam marhuaso do ibana. 9 Asing ni i, dipajongjong si Usia do akka menara+ di Jerusalem di labbung ni Gerbang Sudut,+ Gerbang Rura,+ dohot di labbung ni Tiang Panukkol. Jala dibahen ibana ma benteng makkaliangi akka menara i. 10 Dung i dipajongjong ibana ma akka menara+ di gurun, jala dihali* ibana ma godang sumur (ai godang do binatang na dipiaro ibana). Dibahen ibana ma muse songon i di Syefela dohot di rura. Adong do akka parkarejona na karejo di ladang dohot di porlak anggurna na di dolok-dolok dohot di Karmel. Ai lomo do rohana martani.
11 Adong do akka tentara ni si Usia na toktong rade marporang. Diatur do punguan ni akka tentara i tikki lao marporang. Sekretaris Jeiel+ dohot si Maaseya do na mangetong dohot mambagi+ akka tentara i gabe piga-piga punguan. Jala si Hanani pejabat ni raja i do pengawas ni si Jeiel dohot si Maaseya. 12 Adong do 2.600 pamimpin ni na sasaompu na gabe pamimpin ni akka tentara na jago i. 13 Godang ni tentara na dipimpin nasida i ma 307.500 halak. Akka tentara na jago do nasida. Nasida do na mangurupi raja mangalo musu.+ 14 Dilehon si Usia ma tu akka tentarana i perisai, tombak,*+ takkuluk bosi, baju partahanan,+ panah, dohot batu na dipakke tu ambalang.*+ 15 Disuru ibana ma akka halak na malo mambahen akka alat na jago di Jerusalem. Boi do akka alat i manembakkon anak ni panah manang batu na balga sian akka menara,+ dohot sian akka sudut ni tembok ni kota i. Gabe tarbarita ma ibana tu sude luat jala massai gogo do ibana. Ai diurupi Debata do ibana.
16 Dung lam marhuaso ibana, gabe ginjang ma rohana. Dang setia be ibana tu Jahowa Debatana. Ai masuk do ibana tu bagas joro ni Jahowa manutung dupa di langgatan inganan panutungan ni dupa.+ Gabe parohon jea ma on tu ibana. 17 Pittor ro ma Malim Azaria dohot 80 malim ni Jahowa na barani mandapotton si Usia. 18 Didok nasida ma, “Ale Usia, dang bagianmu manutung dupa tu Jahowa!+ Holan akka malim do na boi manutung dupa. Ai nasida do pinoppar ni si Aron+ naung dipabadia. Kaluar ho sian inganan na badia on! Ai dang setia be ho tu Debata. Jala dang na lao jaloonmu hasangapon sian Debata Jahowa alani pambahenanmon.”
19 Gabe muruk+ ma si Usia tu akka malim di labbung ni langgatan inganan manutung dupa na di jabu ni Jahowa. Tikki i, ditiop ibana do inganan ni dupa i. Pittor hona kusta*+ ma pardoppahanna. 20 Diida Malim Kepala* Azaria dohot sude malim i ma tu ibana. Diida nasida ma nungnga hona kusta be pardoppahanna. Dipaksa nasida ma si Usia kaluar sian i. Pittor kaluar ma ibana, ai nungnga dihukum Jahowa ibana.
21 Marsahit kusta do si Usia sahat tu na mate. Pulik do jabuna dibahen jala toktong do ibana disi.+ Dang diloas be ibana masuk tu jabu ni Jahowa. Gabe anakna si Jotam ma na mangurus istana jala ibana do hakim ni bangso i.+
22 Sude na masa di ngolu ni si Usia, sian mulana sahat tu ujungna, disuratton si Jesaya+ anak ni si Amos do i. 23 Mate ma si Usia. Jala dikuburhon ma ibana rap dohot akka ompuna. Alai dang di kuburan ni akka raja ibana dikuburhon. Ai didok nasida do, “Hona kusta do ibana.” Dung i anakna si Jotam+ ma na gabe raja manggattihon ibana.
27 Marumur 25 taon ma si Jotam+ tikki gabe raja. Jala mamaretta ma ibana saleleng 16 taon di Jerusalem. Si Jerusah boru ni si Sadok+ ma omakna. 2 Toktong do diulahon si Jotam lomo ni roha ni Jahowa songon bapakna si Usia.+ Alai dang masuk ibana tu bagas joro ni Jahowa.+ Nang pe songon i, sai diulahon bangso i do na jahat. 3 Dipajongjong si Jotam do gerbang parginjang na di jabu ni Jahowa.+ Jala dipajongjong ibana do muse tembok na di Opel.+ 4 Dipajongjong ibana do akka kota+ di akka inganan na mardolok-dolok di Juda.+ Jala dipajongjong ibana do benteng+ dohot menara+ di harangan. 5 Marporang do ibana mangalo raja ni halak Ammon.+ Jala monang do ibana. Di taon i, gabe dilehon halak Ammon ma tu ibana perak 100 talenta,* gandum 10.000 kor,* dohot barli* 10.000 kor. Dilehon nasida do i muse di taon na paduahon dohot na patoluhon.+ 6 Lam marhuaso ma harajaon ni si Jotam. Ai dibahen ibana do sian nasa gogona lao mangihutton dalan ni Jahowa Debatana.
7 Sude na niulahon ni si Jotam, disurat do i di bukku sejarah taringot akka raja ni Israel dohot raja ni Juda.+ Disurat do muse disi taringot akka parporangan na diulahon ibana. 8 Marumur 25 taon ma ibana tikki gabe raja. Jala mamaretta ma ibana saleleng 16 taon di Jerusalem.+ 9 Dung i mate ma si Jotam. Dikuburhon ma ibana di Kota ni si Daud.+ Jala anakna si Ahas ma na gabe raja manggattihon ibana.+
28 Marumur 20 taon ma si Ahas+ tikki gabe raja. Jala saleleng 16 taon ma ibana mamaretta di Jerusalem. Alai dang diihutton ibana na binahen ni si Daud ompuna i. Ai dang diulahon ibana na sittong di jolo ni Jahowa.+ 2 Diihutton ibana do hajahaton ni akka raja ni Israel.+ Gariada, dibahen ibana do akka patung+ Baal. 3 Ditutung ibana do pelean* di Rura Anak ni Hinnom.* Diulahon ibana do sude ulaon na dihagigihon Debata, songon na diulahon akka bangso+ na dipalao Jahowa sian jolo ni bangso Israel. Ai ditutung ibana do anakna.+ 4 Sai dilehon ibana do pelean dohot pelean situtungon di akka inganan panombaon,*+ di akka dolok, dohot di toru ni hau na balga,+ asa nakkok timusna.
5 Dibahen Jahowa ma ro halak Siria+ manaluhon si Ahas. Gabe talu ma ibana jala godang ma rakyatna na diboan gabe tawanan tu Damaskus.+ Dibahen Debata ma muse ro raja ni Israel manaluhon ibana. Jala massai godang do rakyatna na dipamate. 6 Di bagasan sadari, dibunu si Peka+ anak ni si Remalia ma 120.000 halak na barani di Juda. Ai nungnga ditadikkon nasida Jahowa Debata ni akka ompu ni nasida.+ 7 Dipamate si Sikri tentara na sian marga Epraim do si Maaseya anak ni raja. Dipamate ibana do muse si Asrikam pengawas ni istana dohot si Elkana wakil ni raja. 8 Ditawan halak Israel do 200.000 borua dohot dakdanak sian Juda. Diboan nasida do muse akka barang ni halak Juda i tu Samaria.+
9 Alai adong do disi sahalak panurirang* ni Jahowa na margoar si Oded. Didapotton ibana ma akka tentara na ro tu Samaria i. Didok ibana ma, “Ala na muruk do Jahowa Debata ni akka ompumuna tu halak Juda, umbahen na dipasahat Debata nasida tu tanganmu.+ Alai pakejamhu do caramuna pamatehon nasida. Jala diida Debata do pambahenanmuna i. 10 Saonari, naeng dibahen hamu do halak Juda dohot halak Jerusalem gabe hatobanmuna.+ Hape, hamu pe marsala do di jolo ni Jahowa Debatamuna. 11 Alani i tangihon ma au. Paulak hamu ma akka tawanan na diboan hamu sian haha anggimuna i. Ai nungnga muruk situtu Jahowa tu hamu.”
12 Gabe ro ma piga-piga pamimpin ni halak Epraim mandapotton akka halak na ro sian parporangan i. Akka pamimpin ni halak Epraim i, i ma si Azaria anak ni si Johohanan, si Berekia anak ni si Mesilemot, si Jehiskia anak ni si Sallum, dohot si Amasa anak ni si Hadlai. 13 Didok nasida ma, “Unang ma boan tawanan i tuson asa unang marsala hita di jolo ni Jahowa. Ai na manambai dosatta do hamu molo diboan hamu nasida tuson. Hape nungnga godang dosatta jala nungnga muruk Debata tu halak Israel.” 14 Dipasahat akka tentara na mulak i ma akka tawanan i dohot akka barang na dibuat nasida+ tu akka pejabat dohot tu sude halak na marpungu i. 15 Dipillit ma akka halak na lao mangurupi akka tawanan i. Dibuat nasida ma pakkean sian akka barang na binoan ni nasida i, jala dilehon ma i tu akka tawanan na maribak-ribak bajuna.* Dilehon do tu tawanan i pakkean, solop, sipanganon, siinumon, dohot miak lao gabe ubat ni nasida. Dipanakkok ma akka na gale tu halode jala ditaruhon ma tawanan i tu haha anggi ni nasida na di Jeriko, i ma kota hau palem. Dung i mulak ma muse nasida tu Samaria.
16 Tikki i, dipangido Raja Ahas ma asa diurupi raja ni Asiria ibana.+ 17 Alai ro ma muse halak Edom manaluhon halak Juda jala diboan ma nasida gabe tawanan. 18 Ro ma muse halak Palistim+ manaluhon akka kota na di Syefela+ dohot kota Negeb na di Juda. Ditaluhon ma muse kota Bet-semes,+ kota Ayalon,+ kota Gederot, kota Soko dohot akka kota na di sakalilingna, kota Timna+ dohot akka kota na di sakalilingna, kota Gimzo dohot akka kota na di sakalilingna. Jala disi ma nasida tinggal. 19 Dipatutoru Jahowa do halak Juda alani si Ahas raja ni Israel. Ai dang hasea pangalaho ni halak Juda alani ibana. Alani i ma gabe dang setia be nasida tu Jahowa.
20 Ujungna, ro ma si Tiglat-pilnesar+ raja ni Asiria. Alai dang diurupi ibana si Ahas. Gariada dialo ibana do si Ahas jala gabe susa+ ma si Ahas dibahen ibana. 21 Dibuat si Ahas ma akka arta na sian jabu ni Jahowa, sian istana ni raja,+ dohot sian jabu ni akka pejabat. Dung i, dilehon ma i tu raja ni Asiria. Alai tong do dang diurupi raja ni Asiria ibana. 22 Nang pe nungnga susa ngolu ni Raja Ahas, alai lam godang do dosa na diulahon ibana, jala dang setia ibana tu Jahowa. 23 Dung i dilehon ibana ma pelean tu akka debata ni halak Damaskus+ na manaluhon ibana.+ Ai didok ibana do, “Diurupi akka debatana do raja ni Siria. Alani i, lehonokku ma pelean tu akka debata ni nasida asa dohot au diurupi.”+ Alai gabe marjea do ibana dohot sude halak Israel alani i. 24 Dipapungu si Ahas ma akka barang na sian jabu ni Debata na sittong+ jala diropukkon ibana ma i. Ditutup ibana ma akka pintu na di jabu ni Jahowa.+ Jala dibahen ibana ma langgatan tu akka debata na asing di akka sirpang ni dalan na di Jerusalem. 25 Dibahen ibana ma akka inganan panombaon* di sude kota na di Juda. Disi do nasida mangalehon pelean tu akka debata na asing asa nakkok timusna.+ Alani i, gabe haccit ma roha ni Jahowa Debata ni akka ompuna.
26 Sude na niulahon ni si Ahas sian mulana sahat tu ujungna, disurat do i di bukku sejarah taringot akka raja ni Juda dohot akka raja ni Israel.+ 27 Mate ma si Ahas jala dikuburhon ma ibana rap dohot akka ompuna di kota Jerusalem. Alai dang di kuburan ni akka raja ni Israel ibana dikuburhon.+ Dung i anakna si Hiskia ma na gabe raja manggattihon ibana.
29 Marumur 25 taon ma si Hiskia+ tikki gabe raja. Jala saleleng 29 taon ma ibana mamaretta di Jerusalem. Si Abia boru ni si Sakaria ma omakna.+ 2 Sai diulahon ibana do na sittong di jolo ni Jahowa,+ songon na binahen ni si Daud ompuna i.+ 3 Di taon na parjolo ibana mamaretta, i ma di bulan na parjolo, dibukka jala dipadenggan ibana ma akka pintu di jabu ni Jahowa.+ 4 Dung i dipapungu ibana ma akka malim dohot halak Lepi di tano lapang na di sabola timur. 5 Didok ibana ma tu nasida, “Hamu ale halak Lepi, tangihon hamu ma au.+ Pabadia hamu ma dirimuna dohot jabu ni Jahowa Debata ni akka ompumuna. Jala bolokkon hamu ma akka patung na dihagigihon Debata sian inganan na badia i.+ 6 Ai nungnga diulahon akka omputta na jahat di jolo ni Jahowa Debatanta jala dang setia nasida tu Debata.+ Ditadikkon nasida do Ibana, dang parduli nasida tu tabernakel ni Jahowa, jala ditolak nasida do Debata.+ 7 Ditutup nasida do akka pintu ni terras ni bagas joro,+ jala dipamate do akka lampuna.+ Dang ditutung nasida be dupa+ dohot pelean situtungon+ tu Debata ni halak Israel di inganan na badia. 8 Gabe muruk ma Jahowa tu halak Juda dohot tu halak Jerusalem+ jala diparo ma jea tu nasida. Alani i, tarsonggot ma manang ise na mangida jala na mambege na masa i. Longang do nasida jala direhei nasida do halak Juda dohot tu Jerusalem songon na niidamuna saonari.+ 9 Alani i gabe dipamate ma akka omputta mamakke podang.+ Jala gabe tawanan ma akka anakta, borutta, dohot istritta be.+ 10 Saonari, lomo do rohakku mambahen parjanjian tu Jahowa Debata ni halak Israel,+ asa unang muruk be Ibana tu hita. 11 Hamu ale akka rakyattu, unang be tinggalhon hamu* tugasmuna. Ai nungnga dipillit Jahowa hamu lao jongjong jala marhobas di jolona.+ Jala nungnga dipillit hamu lao manutung pelean tu Ibana asa nakkok timusna.”+
12 Dung i, jongjong ma halak Lepi. Sian pinoppar ni si Kohat,+ i ma si Mahat anak ni si Amasai dohot si Joel anak ni si Azaria. Sian pinoppar ni si Merari,+ i ma si Kis anak ni si Abdi dohot si Azaria anak ni si Jehaleleel. Sian pinoppar ni si Gerson,+ i ma si Joa anak ni si Zima dohot si Eden anak ni si Joa. 13 Sian akka anak ni si Elisapan, i ma si Simri dohot si Jeuel. Sian akka anak ni si Asap,+ i ma si Sakaria dohot si Matania. 14 Sian akka anak ni si Heman,+ i ma si Jehiel dohot si Simei. Sian akka anak ni si Jedutun,+ i ma si Semaya dohot si Usiel. 15 Dung i dipapungu halak Lepi ma akka haha anggi ni nasida. Dipabadia nasida ma diri ni nasida, jala ro ma nasida pabadiahon jabu ni Jahowa.+ Diulahon nasida do i songon na diparettahon Jahowa marhite raja i. 16 Masuk ma akka malim tu jabu ni Jahowa. Dipaias nasida ma bagas joro ni Jahowa, jala dipakaluar ma sian i sude na dipakke lao manomba debata na so sittong. Dibahen nasida ma i tu alaman+ ni jabu ni Jahowa, dibuat jala dibolokkon halak Lepi ma i tu Rura Kidron.+ 17 Di ari na parjolo di bulan na parjolo do nasida mulai pabadiahon jabu i. Jala nungnga sahat be nasida tu terras ni jabu ni Jahowa+ di ari na paualuhon di bulan i. Dung i ditambai nasida ma ualu ari nai lao pabadiahon jabu ni Jahowa. Di ari na pasappulu onomhon di bulan i sae ma dipabadia nasida jabu i.
18 Dung i dijuppangi nasida ma Raja Hiskia jala didok ma, “Nungnga dipabadia hami be jabu ni Jahowa, langgatan inganan manutung pelean,+ dohot sude peralatanna.+ Jala nungnga hupabadia hami be meja inganan ni roti pelean+ dohot sude peralatanna. 19 Hupabadia+ hami do muse akka peralatan na dibolokkon Raja Ahas na so setia i.+ Ai dibolokkon ibana do i tikki mamaretta ibana. Saonari nungnga diparade hami i di jolo ni langgatan ni Jahowa.”
20 Manogotna i tibu ma Raja Hiskia dungo. Dipapungu ibana ma akka pejabat na di kota i, jala rap lao ma nasida tu jabu ni Jahowa. 21 Diboan nasida ma pitu lombu jantan, pitu biru-biru jantan, pitu anak ni biru-biru jantan, dohot pitu hambing jantan. Dilehon ma i gabe pelean hasesaan ni dosa tu harajaon i, tu inganan na badia, dohot tu halak Juda.+ Disuru raja ma akka malim, i ma pinoppar ni si Aron mamelehon i di langgatan ni Jahowa. 22 Diseat nasida ma lombu i,+ dibuat akka malim ma mudarna jala dipispisson ma tu langgatan.+ Diseat ma muse biru-biru jantan jala dipispisson ma mudarna tu langgatan. Dung i diseat ma muse anak ni biru-biru jantan jala dipispisson ma mudarna tu langgatan. 23 Diboan nasida ma akka hambing jantan na gabe pelean hasesaan ni dosa tu jolo ni raja dohot tu jolo ni punguan i. Jala diappehon nasida ma tangan ni nasida tu akka hambing i. 24 Dung i diseat akka malim ma akka hambing i, jala dibahen ma i gabe pelean hasesaan ni dosa. Dibahen nasida ma mudarna di langgatan lao mambahen pardamean tu sude halak Israel. Ai didok raja do, ikkon dibahen do pelean situtungon dohot pelean hasesaan ni dosa tu sude halak Israel.
25 Disuru raja ma halak Lepi martugas di jabu ni Jahowa, disi ma nasida marmusik mamakke simbal,* alat musik na martali, dohot mamakke harpa.+ Songon i do na diparettahon si Daud,+ si Gad+ halak na pasahatton parnidaan tu raja, dohot Panurirang* Natan.+ Ai paretta ni Jahowa do i na dipasahat marhite akka panurirangna. 26 Jongjong ma halak Lepi maniop alat musik na dibahen si Daud. Jala jongjong ma akka malim maniop tarompetna be.+
27 Dung i disuru si Hiskia ma asa dipelehon pelean situtungon di langgatan.+ Tikki ditutung pelean i, diendehon ma ende tu Jahowa. Dung i martarompet ma nasida mangihutton soara ni alat musik na dibahen si Daud raja ni halak Israel. 28 Saleleng diendehon ende i jala tarbege soara ni tarompet, marsomba do saluhut punguan i. Torus ma dibahen nasida songon i sahat tu na sae dipelehon pelean situtungon i. 29 Dung sae dipelehon pelean i, marsomba ma raja dohot akka halak na rap dohot ibana. 30 Disuru Raja Hiskia dohot akka pejabat ma halak Lepi mangendehon ende ni si Daud+ dohot ende ni si Asap+ na boi mandapot parnidaan i. Diendehon nasida ma i lao mamuji Jahowa. Marlas ni roha do nasida mangendehon i, dung i marsomba ma nasida.
31 Didok si Hiskia ma, “Saonari nungnga dipapulik be hamu lao marhobas tu Jahowa. Boan hamu ma akka pelean dohot pelean hamauliateon tu jabu ni Jahowa.” Alani i, diboan punguan i ma akka pelean dohot pelean hamauliateon. Jala adong do na taronjar rohana mamboan pelean situtungon.+ 32 Dilehon punguan i ma 70 lombu, 100 biru-biru jantan, dohot 200 anak ni biru-biru jantan. Dilehon ma i sude gabe pelean situtungon tu Jahowa.+ 33 Jala dilehon ma muse 600 lombu dohot 3.000 biru-biru dohot hambing na gabe pelean na badia. 34 Alai ala saotik do akka malim i, gabe dang tolap be nasida makkuliti sude pelean situtungon i. Alani i, diurupi halak Lepi ma nasida+ sahat tu na sae ulaon i, jala sahat tu na sae akka malim na asing pabadiahon diri.+ Ai urringgas do halak Lepi pabadiahon diri sian akka malim. 35 Godang do muse pelean situtungon,+ tabo-tabo na sian pelean pardamean,*+ dohot pelean siinumon na dipelehon rap dohot pelean situtungon.+ Songon i ma dibahen asa marhobas nasida muse di jabu ni Jahowa. 36 Marlas ni roha ma si Hiskia dohot saluhut bangso i alani sude na binahen ni Debata na sittong tu nasida.+ Jala marlas ni roha do nasida ala massai hatop sae ulaon i.
30 Disuru si Hiskia ma asa ro sude halak Israel+ dohot halak Juda tu jabu ni Jahowa di Jerusalem, lao mangarayahon Paska tu Jahowa Debata ni halak Israel.+ Gariada dibahen ibana do surat tu halak Epraim dohot halak Manasse+ asa dohot nasida ro. 2 Alai sahata ma raja i, akka pejabatna, dohot sude halak na marpungu di Jerusalem asa di bulan na paduahon nasida mangarayahon Paska.+ 3 Ai holan saotik do malim naung pabadiahon dirina+ di tikki i jala dang marpungu dope sude halak di Jerusalem. Alani i, dang boi nasida mangarayahon i di tikki naung ditottuhon hian.+ 4 Jala denggan do i di roha ni raja i dohot di roha ni sude halak na marpungu i. 5 Jadi dipaboa ma i tu sude luat ni halak Israel, mulai sian Ber-seba sahat tu Dan.+ Disuru ma asa ro nasida tu Jerusalem mangarayahon Paska tu Jahowa Debata ni Israel. Ai dang hea be nasida rap mangulahon i songon naung tarsurat hian.+
6 Dung i disuru raja ma akka halak mamboan surat na sian raja dohot na sian akka pejabat. Lao ma nasida mamboan surat i tu sude huta ni halak Israel dohot tu sude huta ni halak Juda. Songon on ma isi ni surat i, “Hamu akka halak Israel, mulak ma hamu tu Jahowa Debata ni si Abraham, si Isak, dohot si Israel. Dung i mulak ma Ibana tu hamu akka na tading jala na malua sian raja ni Asiria.+ 7 Unang ma hamu songon akka ompumuna dohot akka haha anggimuna na so setia tu Jahowa Debata ni akka ompu ni nasida. Ala dang setia nasida, diparo Debata do jea tu nasida. Gabe tarsonggot ma manang ise na mangida jala na mambege i songon na niidamuna.+ 8 Unang ma jogal rukkungmuna songon akka ompumuna.+ Oloi hamu ma Jahowa, jala ro ma hamu tu ingananna na badia+ naung dipabadia Ibana saleleng ni lelengna. Somba hamu ma Jahowa Debatamuna, asa unang muruk be Ibana tu hamu.+ 9 Molo mulak hamu tu Jahowa, asi ma roha ni akka halak na mamboan haha anggimuna dohot anakmuna gabe tawanan.+ Jala dipaloas ma nasida mulak tu huta on.+ Ai na burju jala parasi roha+ do Jahowa Debatamuna. Molo mulak hamu tu Ibana, jaloonna ma hamu.”+
10 Dung i, lao ma akka halak na mamboan surat i tu akka kota na di huta ni halak Epraim, halak Manasse+ sahat tu huta ni halak Zebulon. Alai diparekkeli jala direhei akka halak do nasida.+ 11 Nang pe songon i adong do deba halak Aser, halak Manasse, dohot halak Zebulon na patutoru dirina. Dung i lao ma nasida tu Jerusalem.+ 12 Dipasu-pasu Debata na sittong do halak Juda. Gabe dos ma roha ni nasida lao mangulahon paretta ni Jahowa na pinaboa ni raja dohot akka pejabat.
13 Di bulan na paduahon,+ marpungu ma torop halak di Jerusalem lao mangarayahon Perayaan Roti na So Marragi.+ Massai godang do halak na ro. 14 Lao ma nasida mangaruppakkon akka langgatan tu debata na so sittong na adong di Jerusalem.+ Diruppakkon do muse sude langgatan inganan manutung dupa+ jala dibolokkon ma i tu Rura Kidron. 15 Dung i, diseat nasida ma pelean Paska di ari na pasappulu opatton di bulan na paduahon. Gabe maila ma akka malim dohot halak Lepi. Alani i, dipabadia nasida ma diri ni nasida jala diboan nasida ma pelean situtungon tu jabu ni Jahowa. 16 Jongjong ma nasida di inganan ni nasida martugas, songon na tarsurat di Patik ni si Musa naposo ni Debata na sittong i. Dung i dipispisson akka malim ma mudar+ na dijalo nasida sian halak Lepi. 17 Godang dope akka halak na ro i na so pabadiahon dirina. Alani i diseat halak Lepi ma pelean Paska tu nasida+ asa badia nasida di jolo ni Jahowa. 18 Ai godang do sian nasida na mangallang pelean Paska tarlumobi ma sian halak Epraim, Manasse,+ Isasar, dohot Zebulon. Hape maralo do i tu na tarsurat i. Alai ditangiakkon si Hiskia do nasida. Didok ma, “Ale Jahowa, na burju do Ho.+ Sai sesa ma dosa ni 19 ganup halak naung paradehon rohana lao mangalului Jahowa Debata na sittong,+ Debata ni akka ompu ni nasida, nang pe dang dipabadia nasida dope diri ni nasida mangihutton na tarsurat i.”+ 20 Ditangihon Jahowa do pangidoan ni si Hiskia, jala disesa ma dosa ni* bangso i.
21 Saleleng pitu ari, marlas ni roha do halak Israel+ na di Jerusalem mangarayahon Perayaan Roti na So Marragi.+ Jala dipuji halak Lepi dohot akka malim do Jahowa ganup ari. Dipakke nasida do akka alat musik lao mamuji Jahowa,+ jala marlas ni roha do nasida. 22 Asing ni i, dipatogu si Hiskia ma roha ni sude halak Lepi na marbisuk mangulahon tugas ni nasida tu Jahowa. Saleleng pitu ari, mangan do bangso i di perayaan i,+ dipelehon nasida do pelean pardamean,*+ jala didok nasida do mauliate tu Jahowa Debata ni akka ompu ni nasida.
23 Dung i sahata ma saluhut bangso i asa mangarayahon perayaan i pitu ari nai. Jala marlas ni roha do nasida mangarayahon i pitu ari nai.+ 24 Dilehon si Hiskia raja ni Juda ma 1.000 lombu jantan dohot 7.000 biru-biru tu bangso i. Dohot do akka pejabat mangalehon 1.000 lombu jantan dohot 10.000 biru-biru+ tu bangso i. Jala godang do malim na pabadiahon diri ni nasida di tikki i.+ 25 Marlas ni roha do sude halak Juda, akka malim, halak Lepi, sude na ro sian Israel,+ akka panoppang na sian Israel,+ dohot akka panoppang na tinggal di Juda. 26 Las situtu ma roha ni akka halak na marpungu di Jerusalem. Ai mulai mamaretta si Salomo anak ni si Daud raja ni Israel, dang hea dope masa songon i di Jerusalem.+ 27 Ujungna, jongjong ma akka malim na sian halak Lepi jala dipasu-pasu nasida ma bangso i.+ Ditangihon Debata do tangiang ni nasida, jala sahat do tangiang ni nasida i tu surgo, ingananna na badia i.
31 Dung sae perayaan i, lao ma sude halak Israel na ro tu perayaan i tu sude kota na di Juda. Diruppakkon nasida ma akka tugu sisombaon,*+ akka tiang sisombaon,*+ akka inganan panombaon,*+ dohot akka langgatan+ na adong di Juda dohot di huta ni halak Benjamin. Dibahen nasida ma muse songon i di huta ni halak Epraim dohot di huta ni halak Manasse.+ Dung diruppakkon nasida i sude, mulak ma nasida tu jabuna be di huta ni nasida.
2 Dung i dibahen si Hiskia ma akka malim dohot halak Lepi gabe piga-piga punguan.+ Dilehon ma tugas+ ni ganup punguan i.+ Nasida do na mangalehon pelean situtungon dohot pelean pardamean.* Martugas do muse nasida di jonok ni akka gerbang na di alaman ni jabu ni Jahowa.+ Jala disi do nasida mandok mauliate dohot mamuji Debata. 3 Dilehon raja do muse sumbangan sian ibana lao gabe pelean situtungon.+ Dipelehon ma i tikki manogot dohot tikki botari.+ Jala dipelehon ma i muse tikki ari Sabat,+ tikki bulan baru,+ dohot saleleng adong perayaan,+ songon na tarsurat di Patik ni Jahowa.
4 Asing ni i, disuru raja ma akka halak na di Jerusalem mangalehon bagian ni akka malim dohot halak Lepi,+ asa boi nasida mangulahon Patik ni Jahowa sian nasa roha ni nasida. 5 Dung dipaboa paretta ni raja i, pittor diboan halak Israel ma godang gandum* sian hasil panen na parjolo. Diboan nasida do muse anggur na baru, miak,+ madu, dohot akka hasil ni ladangna.+ Diboan nasida do saparsappulu sian sude na adong di nasida jala massai godang do i.+ 6 Diboan halak Israel dohot halak Juda na tinggal di akka kota na di Juda ma muse saparsappulu sian akka lombu dohot biru-biru ni nasida. Diboan do muse saparsappulu sian akka barang naung dipabadia+ tu Jahowa Debata ni nasida. Gabe massai godang ma akka na pinapungu ni nasida i. 7 Di bulan na patoluhon,+ dipapungu ma tu sada inganan sude sumbangan na diboan. Jala sae ma i di bulan na papituhon.+ 8 Tikki ro si Hiskia dohot akka pejabat, diida nasida ma na massai godang do sumbangan na dipapungu i. Gabe dipuji nasida ma Jahowa jala dipangido ma tu Debata asa dipasu-pasu halak Israel.
9 Dung i, disukkun si Hiskia ma tu akka malim dohot halak Lepi taringot akka sumbangan na dipapungu i. 10 Dialusi Malim Kepala* Azaria na sian keluarga ni si Sadok ma raja i. Didok ma, “Mulai sian na diboan akka sumbangan tu jabu ni Jahowa,+ dang hea hurang sipanganon ni akka halak. Alai godang dope lobina, ai dipasu-pasu Jahowa do bangsona. Ida ma, on ma lobina na godang i.”+
11 Gabe disuru si Hiskia ma asa dibahen nasida akka gudang*+ di jabu ni Jahowa i. Jala dibahen nasida ma songon i. 12 Alai sai diboan akka halak dope sumbangan, akka barang na badia, dohot saparsappulu+ naung ditottuhon lao boanon ni nasida. Si Konania halak Lepi i do na martanggung jawab lao mangurus i sude. Jala si Simei anggi* ni si Konania do na gabe wakilna. 13 Adong do akka halak na disuru Raja Hiskia mangurupi si Konania dohot si Simei anggina i, i ma si Jehiel, si Asasia, si Nahat, si Asahel, si Jerimot, si Josabad, si Eliel, si Ismakia, si Mahat, dohot si Benaya. Jala si Azaria ma pengawas ni jabu ni Debata na sittong. 14 Dung i si Kore anak ni si Innah ma na mangurus akka sumbangan+ na dilehon tu Debata na sittong. Halak Lepi do ibana, na manjaga gerbang di sabola timur.+ Ibana do muse na mambagihon akka sumbangan na dilehon tu Jahowa+ dohot akka barang na massai badia.+ 15 Si Kore do muse na gabe pengawas ni si Eden, si Minyamin, si Jesua, si Semaya, si Amaria, dohot si Sekania. Di kota ni akka malim+ do nasida martugas lao mambagi akka sumbangan tu haha anggi ni nasida di ganup punguanna be.+ Ai boi do nasida dihaporseai. Jala ikkon dos do i bagion ni nasida tu na matua nang tu na poso. 16 Dilehon do muse sumbangan i tu akka bawa na martugas di jabu ni Jahowa ganup ari mangihutton punguan ni nasida be. Jala dohot do muse anak ni nasida na marumur tolu taon tu ginjang mandapot sumbangan i. Tarsurat do goar ni nasida di tarombo.
17 Asing ni i, disuratton do tarombo ni akka malim na sasaompu.+ Jala disuratton do tarombo ni halak Lepi na marumur 20 taon tu ginjang+ mangihutton tugas ni punguan ni nasida be.+ 18 Akka na tarsurat di tarombo i, i ma sude gelleng ni nasida, istri ni nasida, anak ni nasida, boru ni nasida, dohot sude punguan i. Sai dipabadia nasida do diri ni nasida. Ai nasida do na mangurus akka na badia ala boi nasida dihaporseai. 19 Tarsurat do muse akka pinoppar ni si Aron di tarombo i. Nasida ma akka malim na tinggal di akka inganan parmahanan na di sakaliling ni kota ni nasida.+ Jala di akka kota i adong do akka bawa na dipillit mambagi sumbangan tu sude malim. Nasida do muse na mambagi sumbangan tu sude halak Lepi na tarsurat goarna di tarombo i.
20 Songon i ma na diulahon si Hiskia di sude luat ni halak Juda. Sai diulahon ibana do na denggan dohot na sittong. Jala setia do ibana tu Jahowa Debatana. 21 Diatur ibana do akka ulaon di jabu ni Debata na sittong.+ Jala dioloi ibana do Patik dohot paretta ni Debata. Diulahon ibana do i sude sian nasa rohana lao manomba Debatana. Jala marhasil do sude na niulahonna i.
32 Dung sae diulahon si Hiskia i sude,+ ro ma si Sanherib raja ni Asiria naeng marporang mangalo halak Juda. Dihaliangi ibana ma akka kota na marbenteng na adong disi. Ai naeng ruppakkononna do tembok ni kota i jala taluhononna.+
2 Dung diboto si Hiskia naung ro si Sanherib naeng marporang mangalo Jerusalem, 3 makkatai ma ibana tu akka pejabatna dohot akka tentarana. Marsakkap ma ibana naeng manutup akka mata mual na adong di luar ni kota.+ Jala olo do nasida mangurupi ibana. 4 Marpungu ma godang halak jala ditutup nasida ma akka mata mual dohot akka sunge na adong di luat i. Ai didok nasida do, “Unang ma tapasombu dapot ni raja ni Asiria godang aek tikki ro ibana tuson.”
5 Dibahen si Hiskia ma sian nasa gogona lao padenggatton akka tembok naung maruppak. Dipajongjong ibana ma muse akka menara di ginjang ni akka tembok i. Dung i dipajongjong ibana ma sada nai tembok na asing di luar ni akka tembok i. Dipadenggan ibana ma benteng na sian tano*+ na di Kota ni si Daud. Jala dibahen ibana ma godang sinjata dohot perisai. 6 Asing ni i, dipillit ibana ma akka pamimpin ni tentara na lao mamimpin akka rakyat. Dipapungu ma nasida sude di tano lapang na jonok tu gerbang ni kota. Dipatogu ma roha ni nasida, didok ma, 7 “Ikkon barani do hamu jala togu. Unang ma mabiar hamu tu raja ni Asiria,+ nang pe godang na ro rap dohot ibana. Ai gumodang do na mandongani hita sian na mandongani ibana.+ 8 Jolma do na dipangasahon ibana. Alai hita, Jahowa Debatanta do na mangurupi hita jala na marporang humokkop hita.”+ Gabe togu ma roha ni akka halak mambege hata ni si Hiskia raja ni Juda i.+
9 Tikki i di Lakis+ do si Sanherib raja ni Asiria rap dohot sude tentarana na jago jala na sangap. Disuru ibana ma akka pejabatna tu Jerusalem mandapotton si Hiskia raja ni Juda dohot sude halak Judea na di Jerusalem.+ Disuru ma nasida mandok,
10 “On ma na nidok ni si Sanherib raja ni Asiria, ‘Nungnga dihaliangi be kota Jerusalem. Alai boasa disi dope hamu tinggal? Ise huroha na dipangasahon hamu?+ 11 Nungnga dioto-otoi si Hiskia hamu. Didok ibana do, “Paluaon ni Jahowa Debatanta do hita sian raja ni Asiria.”+ Hape asa mate so mangan jala so minum do hamu. 12 Si Hiskia do na mangaruppakkon akka inganan panombaon*+ dohot langgatan+ ni Debatamuna. Hape didok ibana tu halak Juda dohot tu halak Jerusalem, “Ikkon marsomba do hamu di jolo ni sada langgatan jala ikkon disi do hamu mangalehon pelean situtungon asa nakkok timusna.”+ 13 Na so diboto hamu do aha naung binahen ni akka ompukku dohot naung hubahen tu akka bangso na asing?+ Adong huroha akka debata na boi paluahon akka bangso i sian tanganku?+ 14 Sian sude bangso naung ditaluhon akka ompukki, debata ni bangso na dia ma na tolap paluahon bangsona sian tanganku? Dia ma tolap Debatamuna paluahon hamu sian tanganku.+ 15 Unang ma olo hamu dioto-otoi si Hiskia!+ Unang ma porsea hamu tu ibana. Ai dang adong debata ni akka bangso manang harajaon na tolap paluahon bangsona sian tanganku manang sian tangan ni akka ompukku. Jadi dang mungkin paluaon ni Debatamuna hamu sian tanganku!’”+
16 Godang dope na nidok ni akka pejabat ni si Sanherib lao mangalo Jahowa Debata na sittong dohot mangalo si Hiskia naposo ni Debata i. 17 Dibahen si Sanherib ma muse surat+ lao mangaleai dohot mangalo Jahowa Debata ni halak Israel.+ Didok ma di surat i, “Songon debata ni akka bangso na so tolap paluahon bangsona sian tanganku,+ songon i ma Debata ni si Hiskia. Dang tolap Ibana paluahon bangsona sian tanganku.” 18 Sai gogo-gogo ma soara ni nasida makkatai tu akka halak na di ginjang ni tembok ni Jerusalem i mamakke bahasa ni halak Jahudi. Dibahen nasida pe songon i, asa mabiar do akka halak i jala boi ma taluhononna kota i.+ 19 Dileai nasida do Debata ni halak Jerusalem songon na mangaleai debata ni akka bangso na di tano on, i ma akka debata na binahen ni jolma. 20 Alai sai martangiang ma Raja Hiskia dohot Panurirang* Jesaya+ anak ni si Amos tu Debata na di surgo asa diurupi nasida.+
21 Dung i disuru Jahowa ma sada suru-suruan tu perkemahan ni raja ni Asiria. Dipamate ma akka tentara na jago+ dohot pamimpin ni tentara na disi. Gabe maila ma si Sanherib jala mulak ma ibana tu hutana. Di sada tikki, lao ma ibana tu jabu ni debatana. Laos dipamate akka anakna ma ibana disi mamakke podang.+ 22 Dipalua Jahowa do si Hiskia dohot pangisi ni huta Jerusalem sian si Sanherib raja ni Asiria dohot sian sude musu ni nasida. Gabe dang adong be musu di sakaliling ni nasida. 23 Godang ma na ro tu Jerusalem mamboan pelean tu Jahowa jala mangalehon akka barang na arga tu si Hiskia raja ni Juda.+ Mulai sian i, diparsangapi sude bangso ma si Hiskia.
24 Di sada tikki marsahit ma si Hiskia jala naeng mate ma ibana. Martangiang ma ibana tu Jahowa.+ Dialusi Debata ma tangiangna jala dipatudu ma tu ibana sada tanda.+ 25 Alai dang dibalos si Hiskia akka na denggan na binahen ni Debata tu ibana. Ai gabe ginjang do rohana. Alani i, muruk ma Debata tu ibana, tu halak Juda, dohot tu halak Jerusalem. 26 Alai dipatutoru si Hiskia do dirina jala dang ginjang be rohana,+ songon i ma nang halak Jerusalem. Ujungna dang muruk be Jahowa tu nasida saleleng mangolu si Hiskia.+
27 Dukkon i gabe sangap jala mamora ma si Hiskia.+ Dibahen ibana ma akka gudangna+ lao manippan perak, mas, akka batu na arga, miak balsam,* akka perisai, dohot sude barang na arga. 28 Dibahen ibana do muse akka gudang inganan panimpanan ni gandum,* anggur na baru, dohot miak. Dibahen do muse kandang ni biru-biru, hambing, dohot kandang ni sude binatang na dipiaro ibana. 29 Dipajongjong ibana ma akka kota lao di ibana. Jala dipapungu ibana ma godang hambing, biru-biru, lombu, dohot binatang na asing. Ai dibahen Debata do ibana mamora. 30 Si Hiskia do na manutup mata mual+ Gihon+ na di ginjang. Dung i dipadalan ma aek na sian mata mual i tu sabola barat ni Kota ni si Daud.+ Sai marhasil do si Hiskia mangulahon sude ulaonna. 31 Di sada tikki, ro ma akka halak na pasahatton hata ni akka pejabat ni Babel mandapotton si Hiskia. Disukkun nasida ma taringot tanda+ na masa di luat i.+ Dipasombu Debata na sittong do si Hiskia manottuhon dia na lao sibahenonna.+ Ai naeng ujion+ ni Debata do ibana lao mangida na di rohana.
32 Disurat Panurirang Jesaya+ anak ni si Amos do sude na niulahon ni si Hiskia di bukku sejarah taringot akka raja ni Juda dohot akka raja ni Israel.+ Disurat do muse disi taringot holong*+ na pinatudu ni si Hiskia. 33 Mate ma si Hiskia. Jala dikuburhon ma ibana di nakkok-nakkohan na jonok tu kuburan ni akka anak ni si Daud.+ Tikki mate si Hiskia, sude do halak Juda dohot halak Jerusalem pasangappon ibana. Dung i, anakna si Manasse ma na gabe raja manggattihon ibana.
33 Marumur 12 taon ma si Manasse+ tikki gabe raja. Jala saleleng 55 taon ma ibana mamaretta di Jerusalem.+
2 Diulahon si Manasse do akka na jahat di jolo ni Jahowa. Diulahon ibana do akka ulaon na dihagigihon Debata, songon na diulahon akka bangso na dipalao Jahowa sian jolo ni bangso Israel.+ 3 Dipajongjong si Manasse do muse akka inganan panombaon* na diruppakkon si Hiskia bapakna.+ Dibahen ibana do akka langgatan tu Baal dohot akka tiang sisombaon.* Jala disomba ibana do sude na di langit.*+ 4 Dipajongjong ibana ma muse akka langgatan tu debata na so sittong di jabu ni Jahowa.+ Hape nungnga didok Jahowa hian, “Jerusalem do inganan ni goarhu saleleng ni lelengna.”+ 5 Di dua alaman ni jabu ni Jahowa,+ dibahen ibana do muse akka langgatan tu sude na di langit. 6 Massai godang do hajahaton na dibahen si Manasse di jolo ni Jahowa na mambahen haccit rohana. Ditutung+ ibana do anakna di Rura Anak ni Hinnom,+ mardatu do ibana,+ mangaramal, jala dipillit ibana do akka datu dohot tukkang ramal.+
7 Diukir si Manasse ma akka patung jala dibahen ma i di jabu ni Debata na sittong.+ Hape nungnga didok Debata hian tu si Daud dohot tu anakna si Salomo, “Bahenokku do goarhu di jabu on dohot di Jerusalem saleleng ni lelengna,+ i ma kota na hupillit sian kota ni saluhut marga ni Israel. 8 Molo diihutton halak Israel sude parettakku, Patikku, aturan, dohot hukum na pinaboa ni si Musa, dang bahenokku be pinda nasida sian tano na hulehon tu akka ompu ni nasida.” 9 Gabe lilu do halak Juda dohot halak Jerusalem dibahen si Manasse. Ai gabe unjahat do nasida sian akka bangso na dipalao Jahowa sian jolo ni halak Israel.+
10 Sai dipasingot Jahowa do si Manasse dohot akka rakyatna, alai dang ditangihon nasida Ibana.+ 11 Dipasombu Jahowa ma pamimpin ni akka tentara ni raja ni Asiria manaluhon nasida. Ditakkup ma si Manasse mamakke hait-hait,* diikkat ma tanganna mamakke dua ratte na sian tombaga, jala diboan ma ibana tu Babel. 12 Gabe marsak ma si Manasse tikki i. Dung i mangelek-elek ma ibana tu Jahowa Debatana, asa asi roha ni Debata tu ibana.* Jala sai dipatutoru ibana ma dirina di jolo ni Debata ni akka ompuna. 13 Sai martangiang do si Manasse asa asi roha ni Debata tu ibana. Ditangihon Debata ma pangidoanna i. Dibahen ma muse ibana mamaretta di Jerusalem.+ Gabe diboto si Manasse ma Jahowa do Debata na sittong.+
14 Dukkon i dipajongjong si Manasse ma tembok na massai timbo di luar ni Kota ni si Daud.+ Dibahen ibana ma i mulai sian sabola barat ni Gihon+ na di rura* sahat tu Gerbang Dekke.+ Jala torus ma i dibahen sahat tu Opel.+ Asing ni i, dipillit ibana ma akka pamimpin ni tentara di sude kota na marbenteng di Juda. 15 Dipakaluar si Manasse ma akka debata na asing dohot akka patung sian jabu ni Jahowa.+ Diruppakkon ibana ma sude langgatan na binahenna di dolok inganan ni jabu ni Jahowa+ dohot sude langgatan na di Jerusalem. Dung i dibolokkon ibana ma i sude tu luar ni kota. 16 Dipajongjong ibana ma muse langgatan ni Jahowa.+ Dipelehon ibana ma disi pelean pardamean*+ dohot pelean hamauliateon.+ Jala disuru ibana ma halak Juda asa manomba Jahowa Debata ni halak Israel. 17 Nang pe songon i, di akka inganan panombaon* dope nasida mangalehon pelean. Alai holan tu Jahowa Debata ni nasida do i dipelehon.
18 Sude na niulahon ni si Manasse tarsurat do i di bukku sejarah taringot tu akka raja di Israel. Disurat do muse disi isi ni tangiangna tu Debata dohot hata ni Jahowa Debata ni Israel tu ibana na pinasahat ni halak na boi mandapot parnidaan. 19 Disurat akka halak na boi mandapot parnidaan do tangiang+ ni si Manasse dohot songon dia Debata mangalusi tangiangna i. Disurat do muse sude dosana dohot pambahenanna na so setia.+ Jala disurat nasida do didia dibahen si Manasse akka inganan panombaon,* akka tiang sisombaon,*+ dohot akka patung. Ai dibahen ibana do i sude andorang so dipatutoru ibana dirina. 20 Mate ma si Manasse, jala dikubur ma ibana di jonok ni jabuna. Dung i si Amon anakna ma na gabe raja manggattihon ibana.+
21 Marumur 22 taon ma si Amon+ tikki gabe raja. Jala saleleng dua taon ma ibana mamaretta di Jerusalem.+ 22 Sai diulahon si Amon do na jahat di jolo ni Jahowa, songon na binahen ni si Manasse bapakna.+ Dilehon ibana do pelean tu sude patung na binahen ni si Manasse bapakna.+ Jala torus do disomba ibana akka patung i. 23 Alai dang dipatutoru ibana dirina di jolo ni Jahowa+ songon na binahen ni si Manasse bapakna.+ Gariada, lam godang do na jahat diulahon ibana. 24 Di pudian ni ari, dialo+ akka pejabatna ma si Amon. Jala dipamate ma ibana di istanana. 25 Alai dipamate pangisi ni luat i ma sude halak na mangalo Raja Amon.+ Jala dibahen nasida ma anakna si Josia+ gabe raja manggattihon ibana.
34 Marumur ualu taon ma si Josia+ tikki gabe raja. Jala saleleng 31 taon ma ibana mamaretta di Jerusalem.+ 2 Diulahon ibana do na sittong di jolo ni Jahowa. Diihutton ibana do sude songon na binahen ni si Daud ompuna. Jala dang manimbil ibana tu kanan manang tu kiri.
3 Di taon na paualuhon si Josia mamaretta, mulai ma disomba ibana Debata ni si Daud ompuna i.+ Tikki i poso dope ibana. Di taon na pasappulu duahon ibana mamaretta, diropukkon ibana ma akka inganan panombaon,*+ akka tiang sisombaon,* akka patung logam, dohot akka patung+ na asing na adong di Juda dohot di Jerusalem.+ 4 Asing ni i, disuru ibana ma asa diruppakkon akka langgatan ni Baal dohot langgatan inganan manutung dupa na di ginjang ni langgatan ni Baal i. Diropukkon ibana ma muse akka tiang sisombaon,* akka patung logam, dohot akka patung na asing sappe gabe orbuk. Jala disaburhon ibana ma orbukna i di kuburan ni akka halak na hea mamele disi.+ 5 Ditutung ibana ma holi-holi ni akka malim di langgatan+ pamelean ni nasida. Songon i ma dibahen si Josia paiasson Juda dohot Jerusalem.
6 Di akka kota ni halak Manasse, halak Epraim,+ halak Simeon, halak Naptali, dohot di akka inganan naung maruppak na di sakaliling ni akka kota i, 7 diruppakkon ibana ma akka langgatan, akka tiang sisombaon,* dohot akka patung+ na adong disi. Jala diropukkon ibana ma i sappe gabe orbuk. Diruppakkon ibana ma muse sude langgatan inganan manutung dupa na adong di sude luat ni halak Israel.+ Dung i mulak ma ibana tu Jerusalem.
8 Di taon na pasappulu ualuhon Raja Josia mamaretta, nungnga dipaias ibana luat i dohot bagas joro. Dung i disuru ibana ma si Sapan+ anak ni si Azalia, si Maaseya pamimpin ni kota i, dohot si Joa anak ni si Joahas juru tulis i padenggatton jabu ni Jahowa Debatana.+ 9 Dijuppangi nasida ma Sintua Malim Hilkia. Dilehon ma tu ibana sude hepeng na diboan tu jabu ni Debata, i ma hepeng na dipapungu ni halak Lepi na martugas manjaga pintu. Ai dipapungu halak Lepi do hepeng i sian halak Manasse, halak Epraim, dohot sian halak Israel na asing.+ Dipapungu nasida do muse hepeng i sian halak Juda, Benjamin, dohot halak Jerusalem. 10 Dung i dilehon nasida ma hepeng i tu akka halak na dipillit lao mangurus jabu ni Jahowa. Jala akka halak na dipillit i ma na mangalehon hepeng i tu akka halak na padenggatton jabu ni Jahowa. 11 Dilehon ma muse hepeng i tu akka tukkang dohot tu tukkang bangunan lao manuhor batu naung ditokkok dohot manuhor hau na dipakke gabe tiang ni jabu i. Ai dipasombu akka raja ni Juda do sega akka tiang ni jabu i.+
12 Setia do nasida mangulahon tugas ni nasida.+ Jala adong do akka halak Lepi na dipillit gabe pengawas ni nasida, i ma si Jahat dohot si Obaja pinoppar ni si Merari.+ Dipillit do muse si Sakaria dohot si Mesulam pinoppar ni si Kohat+ gabe pengawas ni nasida. Jala sude halak Lepi na malo marmusik,+ 13 dibahen do gabe pengawas ni akka parkarejo na mangangkat barang dohot sude parkarejo na asing. Adong do muse halak Lepi na gabe sekretaris, pamimpin, dohot panjaga gerbang.+
14 Tikki dibuat nasida akka hepeng na diboan tu jabu ni Jahowa i,+ dapot ni Malim Hilkia ma bukku na marisi Patik ni Jahowa+ na dipasahat tu si Musa.+ 15 Didok si Hilkia ma tu si Sapan sekretaris i, “Adong dapottu bukku na marisi Patik di jabu ni Jahowa.” Dilehon si Hilkia ma bukku i tu si Sapan. 16 Dung i, dilehon si Sapan ma bukku i tu raja. Didok ibana ma, “Nungnga diulahon akka naposom be sude tugas na nilehonmu tu nasida. 17 Nungnga dibuat nasida hepeng na sian jabu ni Jahowa i, jala nungnga dilehon nasida i tu akka pengawas dohot tu akka parkarejo.” 18 Didok si Sapan ma muse tu raja, “Adong dilehon Malim Hilkia bukku tu au.”+ Dung i, dijahahon si Sapan ma bukku i di jolo ni raja.+
19 Dung dibege raja isi ni Patik i, gabe diribak raja i ma bajuna.+ 20 Dung i dijou raja ma si Hilkia, si Ahikam+ anak ni si Sapan, si Abdon anak ni si Mika, si Sapan sekretaris i, dohot si Asaya ajudan ni raja i. Didok ma tu nasida, 21 “Sukkun hamu ma tu Jahowa taringot tu isi ni bukku na dapotmuna i, asa taboto aha do sibahenokku, sibahenon ni akka halak na tinggal di Israel, dohot sibahenon ni halak na tinggal di Juda. Ai nungnga muruk situtu Jahowa tu hita, ala dang dioloi akka omputta hata ni Jahowa na tarsurat di bukku on.”+
22 Lao ma si Hilkia dohot akka halak na sinuru ni raja i manjuppangi si Hulda, sahalak panurirang* borua.+ Si Sallum anak ni si Tikwa pahoppu ni si Harhas do suamina. Jala si Sallum do na manjaga akka pakkean.* Di Bagian Paduahon kota Jerusalem do si Hulda maringanan. Disi ma nasida makkatai tu si Hulda.+ 23 Didok si Hulda ma tu nasida, “On ma na nidok ni Jahowa Debata ni Israel, ‘Dokkon ma tu halak na manuru hamu manjuppangi au, 24 “On ma na nidok ni Jahowa, ‘Parookku ma jea tu luat on dohot tu pangisina,+ i ma sude jea na tarsurat di bukku+ naung dijahahon di jolo ni raja ni Juda i. 25 Ai nungnga ditinggalhon nasida Au.+ Ditutung nasida do pelean tu debata na asing asa nakkok timusna. Jala haccit do rohakku+ alani sude pambahenan ni nasida. Alani i gabe muruk situtu ma Au tu luat on jala dang na lao surut be murukki.’”+ 26 Alai dokkon hamu ma tu raja ni Juda na marsuru hamu manukkun tu Jahowa, “On ma na nidok ni Jahowa Debata ni Israel taringot akka hata na binegemi,+ 27 ‘Nungnga dibege ho aha na lao bahenokku tu luat on dohot tu pangisina. Dung i disolsoli* jala dipatutoru ho do dirim di jolo ni Debata. Diribak ho do abitmu jala tumatangis do ho di jolokku. Alani i, hutangihon do ho,+ ninna Jahowa. 28 Papunguokku ma ho rap dohot akka ompum.* Dikuburhon ma ho di bagasan dame. Jala dang na lao idaonmu parookku jea tu luat on dohot tu pangisina.’”’”+
Dung i dipaboa nasida ma hata i tu raja i. 29 Disuru raja ma asa marpungu sude akka pangituai* ni halak Juda dohot Jerusalem.+ 30 Dukkon i lao ma raja i tu jabu ni Jahowa rap dohot sude halak Juda, pangisi ni kota Jerusalem, akka malim, akka halak Lepi, dohot sude bangso i mulai sian na metmet sahat tu na magodang. Dijahahon raja i ma sude na tarsurat di bukku parjanjian i, na dapot ni nasida sian jabu ni Jahowa.+ 31 Jongjong ma raja i di ingananna, jala dibahen ibana ma sada parjanjian+ di jolo ni Jahowa. Marjanji ma ibana lao mangihutton Jahowa, akka parettana, akka sipasingotna, dohot akka aturanna sian nasa rohana dohot sian nasa ngoluna.+ Jala marjanji do ibana lao mangulahon sude na tarsurat di bukku parjanjian i.+ 32 Disuru ibana ma sude halak Jerusalem dohot halak Benjamin mangulahon parjanjian i. Jadi diulahon halak Jerusalem ma parjanjian ni nasida tu Debata, i ma Debata ni akka ompu ni nasida.+ 33 Dung i, diropukkon si Josia ma sude patung na dihagigihon Debata sian sude luat ni halak Israel.+ Jala disuru ibana ma sude halak Israel manomba Jahowa Debata ni nasida. Saleleng mangolu si Josia, dang hea ditadikkon nasida Jahowa Debata ni akka ompu ni nasida.
35 Di ari na pasappulu opatton di bulan na parjolo,+ dibahen si Josia ma Paska+ tu Jahowa di Jerusalem, jala diseat nasida ma pelean Paska.+ 2 Ditottuhon ibana ma tugas ni akka malim, jala disuru ma nasida mangulahon tugas ni nasida di jabu ni Jahowa.+ 3 Dung i makkatai ma si Josia tu halak Lepi, i ma akka halak naung dipabadia tu Jahowa lao mangajari sude halak Israel.+ Didok ma tu nasida, “Bahen hamu ma poti parpadanan na badia i tu jabu naung pinajongjong ni si Salomo anak ni si Daud raja ni Israel i.+ Dang porlu be hamu mangusung i.+ Saonari, marhobas ma hamu tu Jahowa Debatamuna dohot tu bangsona Israel. 4 Parade hamu ma dirimuna lao mangulahon tugas na dilehon tu hamu na sasaompu dohot na sasapunguan. Ulahon hamu ma i songon na sinurat ni si Daud+ raja ni Israel dohot na sinurat ni anakna si Salomo.+ 5 Jongjong ma hamu di inganan na badia mangihutton punguan ni bangso i na sasaompu, i ma akka haha anggimuna. Ai ikkon adong do sada punguan ni halak Lepi na sasaompu di ganup punguan ni nasida be. 6 Seat hamu ma pelean Paska,+ pabadia hamu ma dirimuna, jala parade hamu ma dirimuna asa boi haha anggimuna mangulahon paretta ni Jahowa na dipaboa marhite si Musa.”
7 Dilehon si Josia ma akka binatang na dipiaro ibana tu sude halak na ro. Dilehon do 30.000 anak ni biru-biru jantan dohot anak ni hambing jantan. Jala dilehon do muse 3.000 lombu.+ 8 Dilehon akka pejabatna do pelean sian na nionjar ni roha ni nasida tu bangso i, tu akka malim, dohot tu halak Lepi. Dohot do si Hilkia,+ si Sakaria, dohot si Jehiel mangalehon 2.600 pelean Paska dohot 300 lombu tu akka malim. Akka pamimpin ni jabu ni Debata na sittong do nasida. 9 Dohot do muse si Konania, akka anggina, i ma si Semaya dohot si Netaneel, rap dohot si Hasabya, si Jeiel, dohot si Josabad mangalehon 5.000 pelean Paska dohot 500 lombu tu halak Lepi. Akka pamimpin ni halak Lepi do nasida sude.
10 Nungnga diparade be sude na porlu tu perayaan i. Jongjong ma akka malim di inganan ni nasida, jala jongjong ma halak Lepi mangihutton punguan ni nasida+ songon paretta ni raja. 11 Diseat nasida ma akka pelean Paska i.+ Dung i dijalo akka malim ma mudar ni pelean i sian na asing, jala dipispisson ma i tu langgatan.+ Halak Lepi ma na makkuliti akka binatang i.+ 12 Dukkon i diparade nasida ma pelean situtungon asa boi dibagihon tu bangso i. Ai nungnga marpungu bangso i mangihutton punguan ni nasida na sasaompu. Dipelehon nasida ma i tu Jahowa songon na tarsurat di bukku ni si Musa. Songon i ma muse dibahen nasida tu akka lombu i. 13 Songon na somal, diloppa* nasida ma pelean Paska di ginjang ni api.+ Jala diloppa nasida ma akka pelean na badia di akka hudon, di akka balanga na balga, dohot di akka panci. Dung i pittor dilehon ma i tu sude bangso i. 14 Diparade halak Lepi ma muse pelean Paska lao di nasida dohot di akka malim. Ai manutung pelean dohot tabo-tabo ni binatang do akka malim pinoppar ni si Aron sahat tu borngin. Alani i diparade halak Lepi ma pelean Paska di nasida dohot di akka malim, pinoppar ni si Aron.
15 Jongjong ma akka parende pinoppar ni si Asap+ di inganan naung ditottuhon ni si Daud,+ si Asap,+ si Heman, dohot si Jedutun+ na pasahatton parnidaan tu raja. Jongjong ma nang akka panjaga gerbang di gerbang inganan ni nasida martugas.+ Dang porlu nasida maninggalhon tugas ni nasida. Ai halak Lepi haha anggi ni nasida do na paradehon pelean Paska di nasida. 16 Di ari i, sae ma diparade nasida sude na pinangido ni Jahowa lao mangarayahon Paska+ dohot mangalehon pelean situtungon di langgatan ni Jahowa. Diulahon nasida do i sude songon paretta ni Raja Josia.+
17 Jadi dirayahon halak Israel na ro tusi ma Paska di tikki i. Jala dirayahon nasida ma muse Perayaan Roti na So Marragi saleleng pitu ari.+ 18 Dang hea dope adong Perayaan Paska na songon i di Israel mulai sian tikki ni Panurirang* Samuel. Jala dang adong dope raja ni Israel na hea mambahen Perayaan Paska songon na binahen ni si Josia,+ akka malim i, halak Lepi, sude halak Juda, halak Israel na ro tusi, dohot pangisi ni Jerusalem. 19 Dibahen nasida ma Perayaan Paska i di taon na pasappulu ualuhon si Josia mamaretta.
20 Dung sae i sude jala dung dipadenggan si Josia bagas joro, ro ma si Neko+ raja ni Mesir naeng marporang tu Karkemis na jonok tu Sunge Euprat. Jadi ro ma si Josia naeng mangalo ibana.+ 21 Disuru si Neko ma halak mandok tu si Josia, “Dang urusanmu on raja ni Juda! Dang na lao mangalo ho au sadari on, alai mangalo bangso na asing do. Jala ikkon hatop do au disuru Debata. Jadi asa unang manang na mahua ho, unang ma alo Debata na mandongani au. Molo dang, marjea ma ho bahenonna.” 22 Alai dang olo si Josia manangihon hata ni si Neko. Hape hata ni Debata do na pinaboa ni si Neko i. Gariada digatti si Josia do abitna asa unang ditanda halak ibana.+ Jala lao ma ibana tu Rura Megiddo+ lao marporang mangalo si Neko.
23 Dung i hona panah ma Raja Josia. Didok ibana ma tu akka tentarana, “Boan ma au lao sian on, ai nungnga lukka parah au.” 24 Dipapinda akka tentarana ma si Josia sian kareta porangna tu kareta porang na asing. Jala diboan nasida ma ibana tu Jerusalem. Ujungna mate ma si Josia jala dikubur ma ibana rap dohot akka ompuna.+ Sude ma halak Juda dohot halak Jerusalem mangandungi si Josia. 25 Diandungi si Jeremia+ ma si Josia. Jala diendehon akka parende bawa dohot borua+ do ende andung-andung tu si Josia sahat tu sadari on. Ditottuhon ma muse asa diendehon ende andung-andung i di Israel. Jala disuratton ma i di akka ende andung-andung ni nasida.
26 Disurat do sude na niulahon ni si Josia, holong* na pinatuduna, sude na binahenna lao mangoloi Patik ni Jahowa, 27 dohot sude na masa di ngoluna sian mulana sahat tu ujungna. Disurat do i di bukku sejarah taringot akka raja ni Israel dohot raja ni Juda.+
36 Dung i, dibahen bangso i ma si Jehoahas+ anak ni si Josia gabe raja di Jerusalem manggattihon bapakna.+ 2 Marumur 23 taon ma si Jehoahas tikki gabe raja. Jala saleleng tolu bulan ma ibana mamaretta di Jerusalem. 3 Alai dibahen raja ni Mesir ma asa unang boi be ibana mamaretta di Jerusalem. Jala dipangido raja ni Mesir ma tu pangisi ni luat i 100 talenta* perak dohot sada talenta mas.+ 4 Dung i, dibahen raja ni Mesir ma si Eliakim adek ni si Jehoahas gabe raja ni Juda dohot Jerusalem. Jala digatti ma goarna gabe si Jehoyakim. Alai diboan si Neko+ ma abangna si Jehoahas tu Mesir.+
5 Marumur 25 taon ma si Jehoyakim+ tikki gabe raja. Jala saleleng 11 taon ma ibana mamaretta di Jerusalem. Sai diulahon ibana do na jahat di jolo ni Jahowa Debatana.+ 6 Alai ro ma si Nebukadnesar+ raja ni Babel mangalo ibana. Diikkat ma ibana mamakke dua ratte na sian tombaga, jala diboan ma ibana tu Babel.+ 7 Dibuat si Nebukadnesar do deba akka barang na sian jabu ni Jahowa, jala diboan ma i tu Babel. Dibahen ibana ma i sude di istanana di Babel.+ 8 Sude na niulahon ni si Jehoyakim, disurat do i di bukku taringot akka raja di Israel dohot di Juda. Disurat do muse disi akka ulaon na dihagigihon Debata na diulahon ibana dohot hajahaton na binahenna. Dung i anakna si Jehoyakin ma na gabe raja manggattihon ibana.+
9 Marumur 18 taon ma si Jehoyakin+ tikki gabe raja, jala holan tolu bulan sappulu ari do ibana mamaretta di Jerusalem. Sai diulahon ibana do na jahat di jolo ni Jahowa.+ 10 Di mula ni taon,* disuru Raja Nebukadnesar ma asa diboan si Jehoyakin tu Babel.+ Dohot do diboan akka barang na arga na adong di jabu ni Jahowa.+ Jala dibahen ma bapa udana si Sedekia gabe raja ni Juda dohot Jerusalem.+
11 Marumur 21 taon ma si Sedekia+ tikki gabe raja, jala saleleng 11 taon ma ibana mamaretta di Jerusalem.+ 12 Sai diulahon ibana do na jahat di jolo ni Jahowa Debatana. Dang dipatutoru ibana dirina di jolo ni Panurirang* Jeremia,+ na pasahatton paretta ni Jahowa. 13 Dialo ibana do muse Raja Nebukadnesar.+ Hape nungnga disuru Raja Nebukadnesar asa marsumpa si Sedekia di bagasan goar ni Debata na lao setia si Sedekia tu ibana. Sijogal rukkung do ibana, takkang do rohana, jala dang dioloi ibana Jahowa Debata ni Israel. 14 Dang setia be sude pamimpin ni akka malim dohot bangso i. Diulahon nasida do ulaon na dihagigihon Debata songon na diulahon bangso na asing. Jala gabe ramun* do dibahen nasida jabu ni Jahowa+ na di Jerusalem. Hape nungnga dipabadia Debata jabu i.
15 Sai torus do nasida dipasingot Jahowa Debata ni akka ompu ni nasida. Disuru do akka halak pasingotton nasida. Ai asi do roha ni Debata tu bangsona dohot tu ingananna i. 16 Alai sai direhe-rehei nasida do halak na sinuru ni Debata na sittong.+ Leas do roha ni nasida tu hatana+ jala dileai nasida do akka panurirangna.+ Gabe muruk ma Jahowa tu bangsona+ jala dang tarpamalum be nasida.
17 Dibahen Debata ma ro raja ni halak Kasdim+ mangalo nasida. Dipamate raja i ma akka doli-doli di inganan ni nasida na badia+ mamakke podang.+ Dang asi rohana tu doli-doli nang tu anak boru, tu na matua nang tu halak naung suda gogona.+ Ai nungnga dipasahat Debata tu ibana sude na adong disi.+ 18 Diboan ibana do tu Babel sude barang na sian jabu ni Debata na sittong, na balga dohot na gelleng. Diboan do muse akka arta na sian jabu ni Jahowa, arta ni raja dohot arta ni akka pejabat.+ 19 Ditutung ibana ma jabu ni Debata na sittong,+ jala diruppakkon ma tembok ni Jerusalem.+ Ditutung ibana ma sude menara na adong disi, jala diropukkon ma sude barang na arga.+ 20 Akka halak na so dipamate mamakke podang,+ diboan ibana ma gabe tawanan tu Babel. Jala dibahen ma nasida gabe hatobanna+ dohot hatoban ni anakna, sahat tu na mamaretta harajaon ni Persia.+ 21 Tarulang ma tano i saleleng 70 taon+ lao manggarar akka Sabat+ na so diulahon nasida. Marhite songon i saut ma hata ni Jahowa na pinasahat ni si Jeremia.+
22 Di taon na parjolo Raja Sirus+ na sian Persia mamaretta, dipasaut Jahowa ma hatana na pinasahat ni si Jeremia.+ Alani i, dibahen Jahowa ma asa taronjar roha ni Raja Sirus na sian Persia mambahen boa-boa di saluhut harajaonna, jala disuratton do boa-boa i.+ Songon on ma isi ni boa-boa i, 23 “On ma na nidok ni Raja Sirus na sian Persia, ‘Nungnga dilehon Jahowa Debata na di surgo be tu au sude harajaon na di tano on.+ Jala disuru Ibana do au pajongjokkon sada jabu di Ibana di Jerusalem, na di Juda.+ Manang ise sian hamu bangso ni Debata, borhat ma hamu tusi. Sai didongani Jahowa Debatamuna ma hamu.’”+
Manang “manukkun tu Debata”.
Manang “holong na manoktong”. Ida di Kamus.
Manang “bawa na mamboan hoda”.
Manang “bawa na mamboan hoda”.
Manang boi do “Sian Mesir dohot sian kota Kue do akka hodana. Sian kota Kue do dituhor akka partiga-tiga i akka hoda i”. Ra na nidokna dison, i ma kota Silisia.
1 kor = 220 liter. Ida Lampiran B14.
Suan-suanan na songon eme.
1 bat = 22 liter. Ida Lampiran B14.
1 asta na biasa = 44,5 cm. Alai adong deba na mandok “ukkuran asta na dipakke di tikki i” ukkuran asta na ganjang, i ma 51,8 cm. Ida Lampiran B14.
Piga-piga manuskrip kuno mandok “120”, alai adong do piga-piga manuskrip dohot terjemahan na mandok “20 asta”.
As. “jabu”.
Ida di Kamus.
1 talenta = 34,2 kilogram. Ida Lampiran B14.
1 sekel = 11,4 gram. Ida Lampiran B14.
Mangida tu Inganan na Badia.
Manang “sabola selatan”.
Manang “sabola utara”.
Lapatanna, “Sai Anggiat ma Toktong Hot Dibahen Ibana (na nidokna, i ma Jahowa)”.
Ra lapatanna, “Marhite Gogo”.
Manang “jala porlu do tali na ganjangna 30 asta lao makkaliangi i”.
Hira-hira 7,4 cm. Ida Lampiran B14.
1 bat = 22 liter. Ida Lampiran B14.
Ida di Kamus.
I ma Perayaan Pondok Daun.
Manang “halak Lepi na gabe malim”.
Ida di Kamus.
Alat musik na sian logam jala bulat.
Manang “holong na manoktong”. Ida di Kamus.
As. “Na kaluar sian pinggangmu”.
Manang “huria”. Ida di Kamus.
1 asta = 44,5 cm. Ida Lampiran B14.
Manang “holong na manoktong”. Ida di Kamus.
Na nidokna dison, hona bura ma ibana molo dilanggar sumpana i.
As. “na jahat”.
Manang “na so marsala”.
Manang “jala dipatutoru Ho nasida”.
Manang “jamur na pamatehon”.
Manang “belalang”.
Manang “tu akka gerbang ni nasida”.
As. “nefes”. Ida di Kamus.
As. “jala pasittong ma hukum tu nasida”.
Manang “na manangiakkon”.
Olo do ra on patuduhon tanggung jawab ni akka malim lao paboahon taringot haluaon na sian Jahowa tu bangso i.
As. “unang padao bohim sian”.
As. “dimiahi”. Ida di Kamus.
Manang “holong na manoktong”. Ida di Kamus.
Manang “holong na manoktong”. Ida di Kamus.
Olo do ra on halak Lepi.
Manang “holong na manoktong”. Ida di Kamus.
Ida di Kamus.
Ida di Kamus.
Manang “mulai sian dalan na tu Hamat”.
Manang “Wadi”. Ida di Kamus.
I ma, ari na paualuhon dukkon pesta saleleng pitu ari, manang ari na pasappulu limahon.
Manang “belalang”.
As. “gabe tudos-tudos”.
Ida di Kamus.
1 talenta = 34,2 kilogram. Ida Lampiran B14.
Manang “teka-teki”.
Miak na angur na sian suan-suanan dohot hau.
Manang “na marbisuk”.
Manang “sude hatam”.
As. “hatigoran”. Ida di Kamus.
1 talenta = 34,2 kilogram. Ida Lampiran B14.
Manang boi do “Jala ditambai do muse akka hadiah na dos argana tu”.
1 sekel = 11,4 gram. Ida Lampiran B14.
Perisai na somal dipakke akka pemanah.
Di Akka Bukku Heber, 1 mina = 570 gram. Ida Lampiran B14.
As. “naeng mangida bohi ni”.
Manang “bisukna”.
Di bahasa Heber, binatang on i ma hasil perkawinan ni halode jantan dohot hoda boru-boru.
Manang “bawa na mamboan hoda”.
Ida di Kamus.
As. “auganami”. Ida “Auga” di Kamus.
Manang “pangituai”. Ida di Kamus.
As. “auga”.
As. “auga”.
As. “Umbalga do anak ni jari-jarikku sian gotting ni bapakku”.
As. “augamuna”.
As. “augamuna”.
Ida di Kamus.
As. “tu kemahna”.
As. “na tarpillit”.
Ida di Kamus.
Manang “hujur”.
As. “inganan na timbo”. Ida di Kamus.
As. “tu akka hambing”.
Ida di Kamus.
As. “Hatigoran”. Ida di Kamus.
As. “harajaon”.
Digoari do muse ibana si Maaka di 2Kron 11:20-22 dohot di 1Raj 15:2.
As. “tarpillit”.
As. “tarpillit”.
Na nidokna dison, i ma parjanjian na so boi muba jala na marlakku saleleng ni lelengna.
As. “tarpillit”.
Ida di Kamus.
As. “inganan na timbo”. Ida di Kamus.
Ida di Kamus.
Ida di Kamus.
As. “inganan na timbo”. Ida di Kamus.
Manang “hujur”.
Perisai na somal dipakke akka pemanah.
As. “na godang”.
Manang “surirang”. Ida di Kamus.
Ida di Kamus.
As. “jala dipakke nasida ma tarompet dohot tarompet na sian tanduk”. Ida “Tanduk” di Kamus.
As. “pangkatna gabe ratu”.
Manang “manomba tiang sisombaon”. Ida di Kamus.
As. “inganan na timbo”. Ida di Kamus.
Manang “Dipajongjong ibana ma muse”.
Manang “na boi manadikkon kota i jala lao tu huta ni”.
Manang “dipasung”.
Miak na angur na sian suan-suanan dohot hau.
Olo do ra rempah-rempah na ditutung, dang bakke ni si Asa.
As. “inganan na timbo”. Ida di Kamus.
Ida di Kamus.
Manang “Dipelehon”.
Manang “dijujui”.
Ida di Kamus.
Manang “Tandukonmu ma”.
Sumpa on patuduhon pasti do ikkon saut janji on, songon pastina Debata mangolu.
Ida di Kamus.
As. “na diusehon mudarna”.
Ida di Kamus.
Manang boi do “halak Meunim”.
Olo do ra Laut Mati na nidokna dison.
As. “mangalului”.
As. “anak”.
Manang “wadi”. Ida di Kamus.
Manang “asa martahan”.
Ida di Kamus.
Manang “holong na manoktong”. Ida di Kamus.
Lapatanna, “Mamuji”.
As. “inganan na timbo”. Ida di Kamus.
As. “na toktong do dilehon lampu tu”.
As. “inganan na timbo”. Ida di Kamus.
Manang “Ai dang setia halak Jerusalem tu Debata songon boru-boru na so hasea”.
Ida di Kamus.
Manang “gabe dang setia tu Debata songon boru-boru na so hasea”.
Digoari do muse ibana si Ahasia.
As. “boru”.
Di piga-piga manuskrip bahasa Heber, digoari do ibana “si Azaria”.
Manang “marsahit”.
As. “anak”.
As. “dimiahi”. Ida di Kamus.
As. “tikki kaluar manang na tikki masuk”.
Perisai na somal dipakke akka pemanah.
Manang “hujur”.
Olo do ra sada gulungan na marisi Patik ni Debata.
Manang “dimiahi”. Ida di Kamus.
Ida di Kamus.
Ida di Kamus.
Manang boi do “sappe sude mangalean”.
Ida di Kamus.
Ida di Kamus.
Manang “holong na manoktong”. Ida di Kamus.
Na nidokna dison, i ma halak Siria.
Manang “marsahit”.
As. “Ai diusehon ibana do mudar ni”.
Manang “anak”. Dipakke pe hata “akka anak” di ayat on, lao patuduhon na mararga situtu do si Sakaria.
As. “tarpillit”.
Manang “hujur”.
1 talenta = 34,2 kilogram. Ida Lampiran B14.
Manang “pelean tu akka patung i asa nakkok timusna”.
Ida di Kamus.
As. “Nungnga ditaluhon ho”.
As. “tu kemah ni nasida”.
Digoari do muse ibana si Ahasia.
Hira-hira 178 meter. Ida Lampiran B14.
Di inganan na marbatu-batu do ra akka sumur i dihali.
Manang “hujur”.
Ida di Kamus.
Ida di Kamus.
Ida di Kamus.
1 talenta = 34,2 kilogram. Ida Lampiran B14.
1 kor = 220 liter. Ida Lampiran B14.
Suan-suanan na songon eme.
Manang “Ditutung ibana do pelean asa nakkok timusna”.
Ida “Gehena” di Kamus.
As. “inganan na timbo”. Ida di Kamus.
Ida di Kamus.
As. “na salang-salang”.
As. “inganan na timbo”. Ida di Kamus.
Manang “unang be maradi hamu sian”.
Alat musik na sian logam jala bulat.
Ida di Kamus.
Ida di Kamus.
As. “dipamalum”.
Ida di Kamus.
Ida di Kamus.
Ida di Kamus.
As. “inganan na timbo”. Ida di Kamus.
Ida di Kamus.
Manang na nidokna dison boi do “barli”.
Ida di Kamus.
Manang “akka ruang makan”.
Dang pasti ibana abangna manang anggina.
Di bahasa Heber, milloh, lapatanna “dolok-dolok”.
As. “inganan na timbo”. Ida di Kamus.
Ida di Kamus.
Miak na angur na sian suan-suanan dohot hau.
Manang na nidokna dison boi do “barli”.
Manang “holong na manoktong”. Ida di Kamus.
As. “inganan na timbo”. Ida di Kamus.
Ida di Kamus.
As. “sude akka tentara na di langit”.
Manang boi do “Ditakkup ma si Manasse sian lubang”.
Manang “asa dipalambok ibana bohi ni Debata”.
Manang “wadi”. Ida di Kamus.
Ida di Kamus.
As. “inganan na timbo”. Ida di Kamus.
As. “inganan na timbo”. Ida di Kamus.
Ida di Kamus.
As. “inganan na timbo”. Ida di Kamus.
Ida di Kamus.
Ida di Kamus.
Ida di Kamus.
Ida di Kamus.
Olo do ra pakkean ni akka malim manang pakkean ni raja.
As. “Dung i lambok do roham”.
Puisi lao manggombarhon hamatean.
Ida di Kamus.
Manang boi do “dipanggang”.
Ida di Kamus.
Manang “holong na manoktong”. Ida di Kamus.
1 talenta = 34,2 kilogram. Ida Lampiran B14.
Hira-hira di bulan April, tikki mulai musim panas. Ida Lampiran B15.
Ida di Kamus.
Ida di Kamus.