Baa ni gwé hémle?

Inyu lémél Yéhôva, di nlama bana hémle. Ndi, Bibel i nkal le “hémle i ta bé jam li bôt bobasôna.” (2 Tésalônika 3:2) Inyu pôdôl i bôt ba bé kolba nye, ñôma Paul a kal le, ‘bôt ba ñem mbe ni bibéba bi bôt,’ ba ba bé tééñga nye. Ndi i yom a bi kal inyu hémle i bé béñge yak bôt bape. Bôt bahogi ba ntjél neebe i mam ma ñunda le Nyambe nyen a yé Nhek. (Rôma 1:20) Bape ba yé le ba kal le ba nhémle yom tole ngim mut nu a nlôôha bana ngui. Ndi bañga hémle bé i.

Di nlama ba nkwoog nkaa le Yéhôva a niñ, ni le a yé “nu a mbom” i bôt ba gwé hémle i ngui. (Lôk Héber 11:6) Hémle i yé lem yada mu i litam li mbuu mpubi u Nyambe. Inyu bana mbuu mpubi, di nlama bat wo Yéhôva ikété masoohe. (Lukas 11:​9, 10, 13) Jam lipe li nlôôha ba nseñ inyu bana mbuu mpubi, i yé i añ Bibel. I mbus di nla ôt pék mu yom di ñañ, di boñ ki biliya i bii i yom di nigil i bisélél. Ibale di mboñ hala, di nwas le mbuu Yéhôva u hôla bés i niñ yés i nya i ñunda le di gwé hémle.