Ngwañ mut ni Lasarô

Yésu a nti banigil bé maéba malam inyu ligwéélak li nkus. Ndi banigil bé ba ta bé botama i emble nye. Yak Farisai i yé ha, i nlama emble maéba ma Yésu. Inyuki? Inyule ba ‘ngwés moni.’ Ba nok bañ jam Yésu a nkal, ba ‘mbôdôl nol nye.’​—Lukas 15:2; 16:13, 14.

Hala a nyip bé Yésu nyo. A nkal bo le: “Bé bon ni nkadba i bisu bi bôt ba binam le ni yé bôt ba téé sép, ndi Nyambe a nyi miñem minan. Inyule i jam bôt ba nti lipém li yé jam li nyega i mis ma Nyambe.”​—Lukas 16:15.

Hala a yé ntandaa ngéda nano le bôt ba nti Farisai lipém, ndi ngéda i nkola le mam ma héñha. I bôt ba gwé bitel bikeñi inyule ba yé mingwañ, inyule ba ñénél bôt bape, tole inyule ba ñéga bôt mu bibase, ba nlama suhlana. Maselna ni hala, i bôt ba litén ba ba nyi le mam ma mbuu ma yéne bo nseñ ba ga bédhana. Yésu a ñunda le mahéñha makeñi ma yé bôña ngéda a nkal le:

“Mbén Môsi ni bapôdôl bi bi añlana ikepam i dilo di Yôhanes. Ibôdôl ha ngéda i, ñañ nlam u Ane won u ñañlana, yak mintén mi bôt nwominsôna mi mboñ biliya inyu jôp mu. Ni maliga, ngii ni isi bi nla tagbe, ndi to hisiina hi liton mu Mbén Môsi hi nla bé set le hi yon bé.” (Lukas 3:18; 16:16, 17) Lelaa bibuk bi Yésu bi ñéba le mahéñha ma yé bôña?

Baéga bibase ba yé maséé i kal le ba noñ mbén Môsi. Di mbigda le ngéda Yésu a bi mélés mut a bé ndim i Yérusalem, ni ngôk Farisai i bi kal le: “Bés di yé banigil ba Môsi.” (Yôhanes 9:13, 28, 29) Njômbi yada i Mbén Môsi i bé le i kena bôt ba suhulnyuu yak Mésia, hala wee Yésu. Yôhanes Nsôble a bi pôdôl Yésu kiki Man ntômba u Nyambe. (Yôhanes 1:29-34) Bôt ba suhulnyuu ba Lôk Yuda, téntén diyeyeba ba bi bôdôl emble mam ma mbéñge “Ane Djob” ibôdôl nson u Yôhanes Nsôble. Ñ, “ñañ nlam” u yé inyu ba bobasôna ba gwé ngôñ i yila titis i Ane Djob, ni i kôdôl bisai i ga lona.

Di nla bé kal le njômbi i Mbén Môsi i bi yon bé; i bi kena yak Mésia. Ndi bôt ba ta ha bé nyégsaga i ke ni bisu i noñ yo. Kiki hihéga, Mbén i bé ti kunde i bos inyu ngandak manjom, ndi Yésu a ntoñol le: “Nu a mbos ni nwaa ndi a bii muda numpe, wee a nke ndéñg; yak nu ni nu a mbii muda nu a bi bos ni nlôm, wee a nke i ndéñg.” (Lukas 16:18) I nya bibuk ini i nlôôha unbaha Farisai i i gwé lem i bot mambén inyu hiki jam!

Nano Yésu a nti hihéga hi hi ñunda le mahéñha ma yé njel ma gwé ngui ngandak. A mpôdôl bôt iba ba niñ yap i ga héñha i nya i nhélhana. Mu kii di ñemble hihéga hini, di bigda le ipôla bôt ba yé emble, Farisai i i nlôôha gwés moni ni lipém i yé ha.

Yésu a nkal le: “Ngwañ mut wada u bééna lem i haba mambot ma yé wedewede, ni ma loñge libadô, a tuguk niñ hiki kel ni lingwañ jé. Ndi ba bééna lem i yis mut njagi wada le Lasarô i nwemel wé, nyuu yé yosôna i bééna bipoo, a bééna ngôñ i je minluñ mi bé kwo isi téblé i ngwañ mut. Ñ, yak ngwo i bé lo inyu nyañal bipoo gwé.”​—Lukas 16:19-21.

Inyule Farisai i ngwés moni, baa pééna i yé inyu yi njee a yé “ngwañ mut,” mu hihéga hi Yésu? Baéga bibase bana ba ngwés ba nhaba mambot ma nhee diye. U héya nkus ba gwé, ba nene ngwañ inyu nsima ba gwé i pes mbuu. Yésu a nhégha bo ni mut a hééba mbot i yé wedewede inyu yigye tel yap keñi, ni libadô li mpôp inyu yigye telepsép i bomede ba nkal le ba gwé.​—Daniel 5:7.

Lelaa mingwañ mi bôt mini, bana baéga bibase ba ngôk ba ntehe diyeyeba, bôt ba litén? Ba nyan bo, ba nyoñ bo kiki bi ‛am ha·’aʹrets, bôt ba nkoñ, ba ba nyi bé Mbén, ni le ba kôli bé to le ba niiga bo yo. (Yôhanes 7:49) Hala a yé toi libak li “mut njagi wada le Lasarô,” nu a bééna ngôñ i je yak “minluñ mi bé kwo isi téblé i ngwañ mut.” Kiki Lasarô nu a gwé bipoo, ba mbéna nyan bôt ba nkoñ, ba boñok wengoñle ba nkon i pes mbuu.

Hala a yé ntandaa ngéda le mam ma yé hala, ndi Yésu a nyi le mahéñha makeñi ma yé njel; mahéñha inyu ba ba yé kiki ngwañ mut ni inyu ba ba yé kiki Lasarô.

MAHÉÑHA INYU NGWAÑ MUT NI INYU LASARÔ

Nano Yésu a nkal lelaa mahéñha mana ma mbôña. A nkal le: “Ndi mbus ngéda, mut njagi a wo, biañgel bi kena nye ipañ Abraham. Yak ngwañ mut u wo, ba jô wo. Ndi nyoo ikété Soñ, a pa mis, a bak ikété njiiha, a tehe Abraham nyoo haa lôñni Lasarô ipañ yé.”​—Lukas 16:22, 23.

I bôt ba yé emble Yésu ba nyi le Abraham a bi wo behee ni le a yé ikété Soñ. Bitilna bi ntibil toñol le i mut a yé ikété Soñ tole i Séôl a nla bé tehna, to pot a nla bé pot. Yak Abraham nu a bi wo behee a yé mu nsoñgi u. (Ñañal 9:5, 10) Nano, kii baéga bibase ba nok mu hihéga hi Yésu? Kii a nsômbôl kal inyu bôt ba nkoñ ni inyu baéga bibase ba ba ngwés moni?

Yésu a ntip unda le mahéñha ma yé bôña ngéda a nkal le ‘Mbén Môsi ni bapôdôl bi bi añlana ikepam i dilo di Yôhanes Nsôble, ndi ibôdôl ha ngéda i, ñañ nlam u Ane won u ñañlana.’ Jon i ngéda Yôhanes Nsôble ni Yésu Kristô ba bi bôdôl téé likalô, Lasarô ni ngwañ mut ba bi wo mu libak jap li bisu. Ibôdôl ha, ba bi bana libak li mondo bisu bi Djob.

Hala a yé ntandaa ngéda le bôt ba suhulnyuu tole diyeyeba ba yé njal i pes mbuu. Ndi ba bi kôhna mahôla, ba nleege ñañ u Ane Yôhanes Nsôble a bi bôk a añle bo, i mbus ba emble ki Yésu. I bisu bi ngéda ba bé heñ ni ndék bijek, “minluñ mi bé kwo isi téblé” i baéga bibase. Nano ba yé nuak ni maliga ma Bitilna, tôbôtôbô ni biniigana bi mbuma ñañ Yésu a yé ti bo. I yé ndik wengoñle ba nsôk kôhna nsima i mis ma Djob.

Maselna ni hala, baéga bibase ba ba yé mingwañ ni mintôô mi bôt, ba ntjél nwin Ane u Yôhanes Nsôble a bé añal ni u Yésu a yé añal mu nkoñ wonsôna. (Matéô 3:1, 2; 4:17) I pot maliga, i nwin unu u u ñunda le ngwa mbagi u Djob u yé bebee, u ñunbaha bo ngandak. (Matéô 3:7-12) Hala a bé lama hôgbaha bana baéga bibase ba ba ngwés moni i tehe le Yésu ni banigil bé ba nimis makénd map i añal nwin u Djob. Baéga bibase bana ba yé kiki ngwañ mut u hihéga hi Yésu nu a nkal le: “A ta Abraham, kon me ngoo, u ep Lasarô le a tjak hinoo hié i malép inyu sunus hilémb hiem, inyule me nok njôghe ikété hié hikeñi hini.”​—Lukas 16:24.

Ndi hala a ga bôña bé. Libim li baéga bibase li ga héñha bé. Ba ntjél emble “Mbén Môsi ni bapôdôl,” bi bi bé lama hôla bo i hémle le Yésu a yé Mésia, Kiñe Djob a mpohol. (Lukas 16:29, 31; Galatia 3:24) Ba neebe bé ki to i suhus bomede inyu emble nwin u Djob u bôt ba suhulnyuu ba yé añle bo. Ndi banigil ba Yésu ba nla bé suhus ngui i maliga ndik inyu kônha baéga bibase maséé tole inyu hôgbaha bo. Mu hihéga hié, Yésu a ñéba hala ni njel jam Abraham a nkal ngwañ mut:

“A man, u hôya bañ le u bi kôhna moñ mam malam ngéda u bé i niñ; ndi Lasarô nye a bi kôhna ndigi mam mabe. Nano, nye a yé kôhna hogbe, ndi we u yé ikété njôghe. Handugi mam mana momasôna, nsôsôgô nkeñi u bi tééba ipôla bés ni bé inyu boñ le i bôt ba ngwés nyodi hana inyu ke i bééni, ba nla bé boñ hala; bôt ba nla bé to nyodi nyoo i bééni inyu lo i béhni.”​—Lukas 16:25, 26.

I nya mahéñha i i kôli, i bak ki i téé. I ñunda mahéñha ipôla baéga bibase ba ba yé ngôk, ni bôt ba suhulnyuu ba ba neebe kop nson i Yésu, i mbus ba kôs ki hogbe ni bijek bi mbuu. (Matéô 11:28-30) Mahéñha mana ma ga tibil nene ndék sôñ i mbus, i ngéda malômbla ma yondo ma ga yiha malômbla ma Mbén Môsi. (Yérémia 31:31-33; Kôlôsé 2:14; Lôk Héber 8:7-13) Ngéda Djob a ga ti mbuu mpubi i kel Pentékôt i nwii 33 N.Y., pééna yo ki yo i ga ba ha bé, mam ma ga tibil unda le banigil ba Yésu bon ba nlémél Djob, he Farisai ni bet ba nit bo bé.