Matéô
1 Kaat ñañ u niñ* i Yésu Kristô,* man David, man Abraham:
2 Abraham a yila isañ Isak;
Isak a yila isañ Yakôb;
Yakôb a yila isañ Yuda ni lôkisañ;
3 Yuda a yila isañ Péres bo Séra, nyañ wap le Tamar;
Péres a yila isañ Esrôm;
Esrôm a yila isañ Ram;
4 Ram a yila isañ Aminadab;
Aminadab a yila isañ Naasôn;
Naasôn a yila isañ Salmôn;
5 Salmôn a yila isañ Bôas, nyañ Bôas le Rahab;
Bôas a yila isañ Ôbed, nyañ Ôbed le Ruth;
Ôbed a yila isañ Yésé;
6 Yésé a yila isañ Kiñe David;
David bona muda nu a ba nwaa Uriya ba gwal Salômô;
7 Salômô a yila isañ Réhôbôam;
Réhôbôam a yila isañ Abiya;
Abiya a yila isañ Asa;
8 Asa a yila isañ Yéhôsafat;
Yéhôsafat a yila isañ Yéhôram;
Yéhôram a yila isañ Ôsiya;
9 Ôsiya a yila isañ Yôtam;
Yôtam a yila isañ Ahas;
Ahas a yila isañ Hézékia;
10 Hézékia a yila isañ Manasé;
Manasé a yila isañ Amôn;
Amôn a yila isañ Yôsia;
11 Yôsia a yila isañ Yékônia ni lôkisañ, i ngéda maké i minkôm i Babilôn.
12 I mbus maké i minkôm i Babilôn, Yékônia a yila isañ Salatiel;
Salatiel a yila isañ Sôrôbabel;
13 Sôrôbabel a yila isañ Abiud;
Abiud a yila isañ Éliakim;
Éliakim a yila isañ Asôr;
14 Asôr a yila isañ Sadok;
Sadok a yila isañ Akim;
Akim a yila isañ Éliud;
15 Éliud a yila isañ Éléazar;
Éléazar a yila isañ Matan;
Matan a yila isañ Yakôb;
16 Yakôb a yila isañ Yôsep, nlôm Maria. Maria a gwal Yésu, nu a nsébla le Kristô.
17 Tjai tjodisôna ibôdôl yak Abraham letee ni yak David di yé jôm ni dina; ibôdôl yak David letee ni ngéda maké i minkôm i Babilôn, tjai di yé jôm ni dina; ibôdôl i ngéda maké i minkôm i Babilôn letee ni yak Kristô, tjai di yé jôm ni dina.
18 Haana nyen ligwéé li Yésu Kristô li bi tagbe. I ngéda nyañ le Maria a bi yegna libii ni Yôsep, a yoñ jém ni njel mbuu mpubi,* bo ngi adba. 19 Ndi kiki nlôm* le Yôsep a bé mut telepsép, a gwés bé wéha nye nyuu i mbamba, a hek pék le a mbos* ni nye bisôsôli. 20 Ndi ngéda a bi mal hoñol i mam mana momasôna, nuna-ki! Añgel Yéhôva* i pémél nye i eem, i kal nye le: “A Yôsep, man David, u kon bañ woñi i yoñ nwaa woñ Maria i weeni, inyule i jém a nyoñ* li nlôl ni mbuu mpubi. 21 A’ gwal man munlôm, u nlama o nye jôl le Yésu* inyule a’ tohol bôt ni bibéba gwap.” 22 I mam mana momasôna ma bé tagbe inyu yônôs mam Yéhôva* a pot ni njel mpôdôl wé nu a kal le: 23 “Nuna-ki, ngond ngi yi munlôm* y’a nembee, i gwal man munlôm, b’a o nye jôl le Émanuel,” hala a nkobla le: “Nyambe a yé ni bés.”
24 Ha nyen Yôsep a bi tôde ’ilo, a boñ kiki añgel Yéhôva* i kal nye, a yoñ nwaa i nyeni. 25 Ndi a bi nañlana* bé nye letee a gwal man munlôm, Yôsep a o man nu jôl le Yésu.