Ngwa jôn, 18 Matôp
Ibale mut a mboñ toi béba, di gwé nhôla.—1 Yôhanes 2:1.
Makidik ma nlôôha nseñ mut a nla yoñ, ma yé le a ti nyemede nkikip yak Yéhôva, a jôp ki ikété lihaa li bagwélél bé. Yéhôva a gwé ngôñ le hiki mut a boñ hala. Inyuki? A ngwés le ba ba mawanda mé, ba niñ ki i boga ni boga. (Ndiimba Mbén 30:19, 20 Galatia 6:7, 8) Ndi Yéhôva a nyégsa bé mut nye ki nye i gwélél nye. A nwas le hiki mut nyen a yoñ makidik mé. Ndi kii i ga bôña ibale nsôblege u kristen u mbôk mbén Nyambe, u mboñ béba ikeñi? Ibale a nhiel bé ñem ba nlama pémés nye i likoda. (1 Korintô 5:13) Ndi, to hala, Yéhôva a ngwés le mboñbéba a témb i nyeni. I maliga inyu i njom i yaga nyen a bi ti binoñ, le baboñbéba ba ba ntam béba yap ba kôhna nwéhél. Nyambe wés nu gwéha a nti baboñbéba makénd le ba hiel miñem.—Sakaria 1:3; Rôma 2:4; Yakôbô 4:8. w24.08 14 § 1-2
Kel sonde, 19 Matôp
Ibale u mbana ñem u pék, yak ñem wem w’a kon maséé.—Bingéngén 23:15.
I ngéda Yôhanes a tila kaat yé i nyônôs iaa, ngim bôt i bé tjam biniigana bi bitembee i lon-ga mbagla ikété likoda. Ndi to hala, bape ba bé ke ni bisu i “kil ikété maliga.” Ba bé nôgôl Yéhôva, ‘ba hiômôk inoñnaga ni mambén mé.’ (2 Yôhanes 4, 6) I lôk kéé ini i bi kônha ndik bé Yôhanes maséé, ndi i bi kônha yak Yéhôva maséé. (Bingéngén 27:11) Kii hala a niiga bés? Ndéñbe i nlona maséé. (1 Yôhanes 5:3) Kiki hihéga, di yé maséé i yi le di nkônha Yéhôva maséé. A yé maséé i tehe bés di nyémbél manoodana ma nkoñ ’isi, di nôglak mambén mé. Yak biañgel bi nkon maséé. (Lukas 15:10) Yak bés di yé maséé, téntén i ngéda di ntehe lôk kéé i téñbe ni Nyambe. (2 Tésalônika 1:4) I ngéda nkoñ ’isi u Satan u ga tjiba, di ga ba maséé le di bi téñbe ni Yéhôva. w24.11 12 § 17-18
Ngwa njañgumba, 20 Matôp
Hiki mut a kee ni bisu i yéñ, ha nseñ wé nyetama bé, ndi nseñ u bôt bape.—1 Korintô 10:24.
Ipam imbe ngéda u nla béñge mut iloole u nkal nye le a nlémél we? Ibale u mpala kwélés i nwet a nlémél we, i nla nene wee u nyoñ bé ngéda i ôt pék. (Bingéngén 29:20) Ndi ibale u nlôôha ki nom, i nla nene wee u nkon woñi i yoñ ngim makidik, téntén ibale i nwet u mbéñge a nyimbe le a nlémél we. (Ñañal 11:4) U hôya bañ le u gwé bé ngôñ i ba nkwoog nkaa le nyen u ga bii, inyu kwélés nye. Ndi u nlama ba nkwoog nkaa le wemede u yé nkôôbaga inyu libii, ni le i mut u mbéñge a nla ba loñge sobiina inyu yoñ. Nano, kii u nla boñ ibale u nôgda le ngim mut i mbéñge we? Ibale u nôgda bé nlélém jam inyu yé, yis nye hala ni maboñok moñ. I ta bé loñge le u nwas le ngim mut i hoñol le, we ni nye ni nla béñgna inyu libii ki le u ta bé bebee i neebe.— Éfésô 4:25. w24.05 22-23 § 9-10