Kwélés man woñ jam li moog

“Ngélé bisu di bi kwélés ngond yés jam li moog, a bééna nwii minsamal. Di bi hel, inyule a bé yi ngandak mu jam li, iloo kiki bés di bé hoñlak.”​​—Alexander.

• Kii u nlama yi

• Kii u nla boñ

• Kii Bibel i nkal inyu maok

Kii u nlama yi

I kwélés man woñ jam li maok li yé nseñ kiyaga. U bem bañ le man woñ a yila njohok inyu kwélés nye mu jam li. Khamit, nu a niñ i loñ Ruslan, a nkal le: “Me ntam i len ini le, di bi hoo bé pôdôl lok yés jam li maok. Mis mem ma bi nahap ngéda i ma tagbe; me nkal hala inyule, me bi léba ndik le lok yem i bé nyo moog hiki ngéda, ki le a bééna ndik 13 nwii.”

Inyuki hala a yé nseñ i kwel jam li moog ni man woñ?

• Mawanda ma suklu ma man woñ, yak i mam a mbéñge i télé, bi nla héñha litehge jé li mam inyu maok.

• Minyiña mi ñunda le i loñ Pulasi, ngandak boñge ba suklu i ma hiôô moog i ndék yosôna ngélé yada mu niñ yap.

Inyu hala nyen bidokta bi nti bagwal makénd i hoo toñle bon bap bikuu ba ga bana ibale ba nyo maok. Lelaa u nla pam i boñ hala?

Kii u nla boñ

Kôôba mandimbhe i bisu bi ngéda. I ngéda boñge ba ngi yii disii, ba ngwés ba mbat mambadga ngandak. Mu kiki ba nañ, mambadga map ma nkôndba ki. Jo ni jon, u nlama ba bebee i timbhe mo. Kiki hihéga:

• Ibale man woñ a mbat we lelaa moog ma yé i nyo, u nla kal nye le: “Wai i yé kiki neene i i mbai, ki le biye gwo bi nlol ndék.”

• Ibale man woñ a nsômbôl noode moog, u nla kal nye le: “Moog ma ta bé malam inyu boñge. Ma gwé ngui ngandak inyu yoñ.” I mbus, u nla kônde le: Maok ma nla lona mut maséé. Ndi ibale a nyo mo ngandak, ño u kahal kiiña nye, a nla bôdôl boñ to kii, yak pot ngim mam a ga sôk tam.​​—Bingéngén 23:29-​35.

Boñ minyiña. Bibel i nkal le: “Mut yihe a mboñ mam lôñni yi.” (Bingéngén 13:16) Jon, boñ minyiña inyu yi mambe mambén ngomin i loñ yoñ a bi téé inyu jam li maok. Ha ni nyen u ga ba nkôôbaga i hôla man woñ mu jam li.

Yoñ ngéda i pôdôl mu jam li. Mark, nu a yé isañ mbai i loñ Ngisi, a nkal le: “Ngim mangéda, boñge ba nyi bé kii ba hoñol inyu jam li maok. Me bi bat lok yem nu a gwé nwii juem ibale inyu yé, hala a yé loñge tole heni i nyo moog. Me bi nwas le a yoñ ngéda yé ilole a ntimbhe me, inyu boñ le me tibil yi mahoñol mé mu jam li.”

Ibale u mbéna pôdôl man woñ jam li moog, u pôdlak nyen mu hiki ngéda pôla i nene, hala a ga lôôha tihba nye. Inoñnaga ni nwii nwé, mu minkwel minan inyu jam li moog, u kôndge minkwel mimpe, kiki bo, i yoñ yihe i nloñ matôa, tole jam li malal.

Ba ndémbél ilam. Boñge ba yé kiki sut, ba ñôt mam momasôna ma yé bo ipañ, i bak ki le, ngim minyiña i bi unda le ba nlôôha nigle i mam bagwal bap ba boñ. Hala a nsômbôl ndik kal le, ibale inyu yoñ, i ngéda u mboma ngim mandutu ndi u hoñlak le moog ma ga hôla we, yak man woñ a ga hoñol le ibale a nyo moog, wee mandutu mé ma ga mal. Jo ni jon i mbéda le u ba ndémbél ilam inyu yé. Yoñ yihe i nyo ndigi i nya i kôli.