Mahôla inyu bidokta bi bi nôgda nduña ikeñi

Bryn nu a niñ i nômbok u Karôlina i Amérika a yé wada mu bilôk bikéé bi nhôla madokta i tibil bakokon. A nsal ni madokta ma ma ntibil bakokon ba ba yé Mbôgi Yéhôva.

Himala hi COVID-19 hi mboñ le ngandak madokta ma neebe bé le bôt ba yuuga bakokon. Bryn a nsébél i mut a nyoñ bitelbene ni bakokon inyu tehe lelaa a nla boñ inyu boñ le Mbôgi Yéhôva i i nkon i kôhna matibla.

Bryn a bi kwel ni nwet a nsal ni mut nu. Kiki ba nwan jam li, Bryn a bat ibale ba yé le ba ti bakokon ba ba yé Mbôgi Yéhôva nomba yé téléfôn inyu boñ le ba kwel ni nye. A neebe.

Bryn a bi hoñol bidokta. A bi kal i mut a bé kwel ni nye le i bôlô ba bé sal i bé ilam ni le a mbot ñem le bidokta bi yé mbôô. A bi kônde le a bi nok le bôt i bahoma bape, téntén bidokta, ba bé nôgda nduña ikeñi munu ngéda himala.

I mut nu a timbhe le himala hi COVID-19 hi bi lona ngandak nduña i dokta.

Bryn a kal le: “Site yés internet i gwé maéba ma ma nla hôla i bôt ba gwé nduña ikeñi. Ibale u nke i jw.org u bép ini buk le ‘stress’ i homa nyiña, u ga léba bikaat inyu bidokta bi nsal ni we.”

Kiki nkwel u bé ke ni bisu, i mut nu a jôp i site, a bép i buk ini le “stress” i homa nyiña, a tehe bikaat bi bi mpôdôl nduña. A kal le: “Wow!” “Me ga unda gwo isañ wem bôlô. Maéba mana ma ga ba nseñ inyu bidokta ni bôt bape. Me ga pémés mapep inyu kap mo.”

I mbus ndék sonde, Bryn a bi kwel ni isañ wé bôlô, nu a bi neebe le ba jôp i site internet, ba pémés bikaat bi bi mpôdôl nduña ikeñi ni mam mape. Ba bi kabna maéba ma ni bidokta.

Bryn a bi kal le: “Isañ wem bôlô a bi ti me mayéga inyu bôlô yés ilam ni maéba malam. Bi nhôla ngandak.”