Hôla nnigil Bibel i yi njee a yé Yéhôva

1. I ngéda u ntehe nnigil Bibel a nhol, u yé u ba laa?

I NGÉDA u ntehe nnigil Bibel a nlo i likoda ngélé yé bisu, a bôdôl timbhe, a bôdôl yak téé likalô, a kit le a nti nyemede nkikip yak Yéhôva, baa hala a ta a kônha bé we maséé? Ha boo bé. I ngéda nnigil Bibel a nhol, Yéhôva nyen a kôli ni lipém. Inyu hala nyen di yé di bégés nye i ngéda di ntehe nye a nhôla nnigil Bibel i hol i pes mbuu.​—1 Korintô 3:​5-9; 3 Yôhanes 3, 4.

2. Sômbôl i Yéhôva inyu bet ba nigil Bibel i yé le kii? (1 Timôtéô 2:​3, 4)

² Yéhôva a nsômbôl le “mintén mi bôt nwominsôna mi kôhna tohi, mi pam ki i bana bañga yi i maliga.” (Añ 1 Timôtéô 2:​3, 4.) A ngwés le bôt ba tibil yi njee a yé, ni kii i yé sômbôl yé; a ngwés le ba bana bañga yi. (Yérémia 9:24) Ndi bañga yi wee kii? Ntoñol Bibel wada a nkal le: “Bañga yi” i ta ndik bé le di yi ngandak mam ikété Bibel, ndi di nwas yak le i yi i, i “héñha bés bañga lihéñhaga.” Di yé di tehe hala i ngéda mut a nigil i yi Yéhôva, i mam a nigil ma ntinde nye i héñha liniñik jé. Hala a nti ki nye pôla i bana “niñ boga.”​—Yôhanes 17:3.

3. Mambe mambadga di ga timbhe munu yigil ini?

³ Yéhôva a nti bés nsima i hôla bôt i yi nye. Munu yigil ini, di ga timbhe i mambadga mana: Inyuki banigil Bibel ba nlama yi Yéhôva loñge loñge? Lelaa di nla niiga bo i yi umbe ntén Djob a yé? Lelaa di nla hôla bo i gwélél i yi inyu lona mahéñha mu niñ yap?

HÔLA NNIGIL BIBEL I YI YÉHÔVA LOÑGE LOÑGE

4. Kiki Markô 12:30 a ñunda, kii i yé njômbi yés bisu i ngéda niiga bôt Bibel?

⁴ Yésu a bi kal le mbén bisu i yé le: “U nlama . . . gwés Yéhôva Nyambe woñ ni ñem woñ wonsôna, ni niñ yoñ yosôna, ni mahoñol moñ momasôna, yak ni ngui yoñ yosôna. (Añ Markô 12:30.) Inyu boñ le nnigil Bibel a gwés Yéhôva, a nlama ndugi nigil i yi nye. I gwéha i yon i nlama tinde nye i sôblana. Di gwé bé ngôñ le a sôblana inyu lémél bés tole lôk kéé ipe. A nlama bé to sôblana inyule ngim mimbônga mi Bibel i nlémél nye. I ngéda di niiga bôt Bibel, njômbi yés bisu i yé le di hôla bo i nigil yi Yéhôva ni i gwés nye.

5. I ngéda nnigil Bibel a ngwés Yéhôva, hala ntinde nye i boñ kii?

⁵ Manôgla ma nkiha ni gwéha. I ngéda nnigil Bibel a mpam i yi Yéhôva, a gwés ki nye, ha nyen a mbôdôl nôgôl nye. Yésu a bi kal le: “Inyu boñ le nkoñ ’isi u yi le me ngwés Tata, me mboñ mam ndik kiki Tata a bi ti me oda le me boñ.” (Yôhanes 14:31) Iloo mana mam mape, gwéha yé inyu Yéhôva yon i ga tinde nnigil Bibel i nôgôl Yéhôva ni i téñbe ni nye.​—1 Yôhanes 5:3.

6. I ngéda nnigil Bibel a nyi Yéhôva loñge loñge, lelaa hala a nla hôla nye i ngéda a nyoñ makidik? Ti hihéga.

⁶ I ngéda nnigil Bibel a nyi Yéhôva loñge loñge, a nla yoñ makidik malam. Di yoñ hihéga: I mut a nsômbôl nigil luk tutus a mbéñge ndik bé lelaa bôt bape ba nluk, tole a ñañ ndik bé bikaat bi nluga. Ndi inyu pam i luk, nyemede a nlama bé kon woñi i noode luk letee a meya. Ha nyen a ga yi nluga, a keñgle yak mandutu a ga boma mu nloñ. I jam li jon li mpémél yak nnigil Bibel, yigil yé yotama bé yon i ga boñ le a pam i yi Yéhôva. Kiki a nke ni bisu i yi Yéhôva, a tehge lelaa Yéhôva a nsayap nye i ngéda a noñ matiñ ma Bibel, hala a nhôla nye i kônde lédés maada mé ni nye, hala a tinde yak nye i yoñ makidik malam to kii i mpémél nye.

7. Kiki Yôsep a bé yi Yéhôva loñge loñge, lelaa hala a bi hôla nye i yoñ makidik malam?

⁷ Kiki Yôsep a bé yi Yéhôva loñge loñge, hala a bi hôla nye i yoñ makidik malam i ngéda nwaa Pôtifar a bé béñge nye ni mis ma ndéñg. I ngéda a bé mañge, ba bi lama niiga nye miñañ mi Adam bo Éva, ni Abraham bo Sara. (Bibôdle 2:24; 20:​3, 6) I miñañ mi, mi bi hôla nye i tibil yi mahoñol ma Yéhôva inyu libii ni malal. A bi pam i yi Yéhôva loñge loñge kayéle hala a hôla nye i tjél ntjaga u nwaa Pôtifar ni i kal nye le: “Lelaa me nla boñ i béba ikeñi ini, me boñ ki béba i mis ma Nyambe?” (Bibôdle 39:​7-9) Yôsep a bé yi kii i nlémél Yéhôva, ni kii i mbébél nye. A bé tibil yi kii i nla unbaha Yéhôva, jon a bi yoñ makidik malam. Ibale di nhôla nnigil Bibel i yi Yéhôva loñge loñge, i yi umbe ntén Djob a yé, yak nye a ga yoñ makidik ma ma nlémél Yéhôva.

HÔLA NYE I YI UMBE NTÉN DJOB YÉHÔVA A YÉ

8. Lelaa di nla gwélél i kaat ini le Niñ ilam i boga ni boga! inyu hôla nnigil Bibel i yi Yéhôva?

⁸ Kii di nla boñ inyu hôla nnigil Bibel i yi umbe ntén Djob Yéhôva a yé? Hoñol i ngéda Yéhôva a bé kwel ni Hiôb, a bi hôla nye i kônde yi nye, jon a bi bat Hiôb iloo 50 ma mambadga! (Hiôb 38:​1–41:34) Yak bés, di bat banigil mambadga. I mambadga ma yé munu kaat ini le Niñ ilam i boga ni boga! ma nhôla nnigil Bibel i yi bilem bi Yéhôva ndék ni ndék. (Béñge minkéñék mi matila mini le “Mambadga inyu yi niiga.”) Jon, gwélél i mambadga ma, inyu hôla nnigil Bibel i yi nye.

9-10. (a) Kii i ga hôla banigil i tibil ôt nseñ ni éña yap Bibel? (Yakôbô 5:11) (b) Lelaa u nla gwélél ñañ u Bibel inyu yi i mam Yéhôva a ngwés ni ma a ñoo?

⁹ Ibôdôl i bibôdle bi yigil Bibel, bipes bi bisu bi nti nnigil makénd i bana lem i añ Bibel hiki kel.a Kii di nla boñ inyu hôla nye i ôt nseñ ni éña yé Bibel? Di nla kal nye le hiki ngéda a mal añ pes kaat tole bipes bi bikaat, a badba le: ‘Inyuki Yéhôva a bi tila bibañga bini mu Lipôdôl jé? Kii bi niiga me inyu yé? Bimbe bilem bi Yéhôva i ñañ unu u niiga me?’ Ibale a mboñ hala, a ga nigle nnigil Yakôbô. I ngéda a bi sima ñañ u Hiôb, Yakôbô a bi pôdôl ndik bé hônba i Hiôb, ndi a bi pôdôl yak bilem bi Yéhôva kiki bo ñem gwéha ni konangoo.​—Añ Yakôbô 5:11.

¹⁰ Di gwé ngôñ le miñañ mi Bibel mi hôla banigil i yi kii Yéhôva a ngwés, ni kii a ñoo. Kiki hihéga, ibale nnigil Bibel a mbéñge i homa nunu le “Bôdôl lisoñgol joñ li Bibel” munu kaa ini le Niñ ilam i boga ni boga!, ndi a kal we le a nsômbôl añ ñañ u Daniel ikété bee mbondo njéé, u yé le u hôla nye i ôt mahoñol munu mambadga mana: ‘Inyuki Yéhôva a bi sôñ Daniel? Lelaa i ñañ u, u nhôla me i yi i yom i nlémél Yéhôva?’ (Daniel 6:​10, 22) U nla ki hôla nye i badba le: ‘Kii i bi pémél i bet ba bi soman Daniel? Lelaa i ñañ u, u nhôla me i yi i yom Yéhôva a ñoo?’ (Daniel 6:​4, 5, 24) Sôk i nsôk, nyemede a ga bôdôl tehe bilem bipe bi Yéhôva bi bi nene mu ñañ u.​—Daniel 6:​26, 27.

11. Lelaa di nla hôla nnigil i tehe yigil yé Bibel kiki likébla li Yéhôva?

¹¹ I ngéda nnigil Bibel a ntehe le i mam a nigil ma yéne nye nseñ, hala a nkônha bés maséé. Ndi di nlama hôla nye i nok le Yéhôva nyen a yé Nniiga wés Nunkeñi. Nano ni, ibale nnigil Bibel a nti bés mayéga inyu mam a nigil, tole a mbégés bés inyu liniigaga jés lilam, d’a boñ laa? To ibale i mayéga ma, ma nlôl nye ñem, Yéhôva nyen di nlama ti lipém ni bibégés. (Yésaya 30:​20, 21)

HÔLA NYE I BII I MAM A NIGIL I BIBÔÑÔL

12-13. I ngéda nnigil Bibel a nok bé ngim ñañ u Bibel, lelaa i mam a nyi inyu Yéhôva ma yé le ma hôla nye? (Béñge yak titii.)

¹² Inyu tehe nseñ u biniigana di nkôs, di nlama bii gwo i bibôñôl. Lelaa ni u nla hôla nnigil Bibel i bii mam a nigil i bibôñôl? Pog, i ngéda a gwé ndutu i nok ngim ñañ u Bibel, hôla nye i bigda mam a nyi inyu Yéhôva. Di hégda le a yé i añ pes Bibel i i mpôdôl mbagi nôgôs, a nla badba inyuki Yéhôva a ntjé bôt bahogi, a nwahak bôt bape. Lelaa u yé le u hôla nye i bana litehge lilam mu jam li?

¹³ U nla gwélél i mambadga mana inyu tinde nnigil i ôt mahoñol mu mam a nyi inyu Yéhôva: Ipam limbe likala Yéhôva a ndiihe niñ? (2 Pétrô 3:9) Tolakii di yé baboñbéba, limbe jam li nlôôha lilam a bi boñ inyu tohol bés? (Éfésô 2:​4, 5) Baa i bôt a ntjé, ba kôli bé wo? Baa a mpéyés mut a kôli bé ni nyemb? (Manyodi 34:​6, 7) Ngim mangéda, Bibel i ntoñle bé bés inyuki Yéhôva a nyoñ ngim makidik. Ndi maliga ma yé le di gwé bé ngôñ ni i ndoñi i. Di nyi Nyambe wés loñge loñge, di nyi yak le nye a yé a yoñok ndik makidik malam inyule manjel mé ma téé sép.

14. Ibale i mut we ni nye ni nigil Bibel a nôgla bé ni mankéé wada, lelaa u nla hôla nye?

¹⁴ Di tehe jam li nyônôs iba u nla boñ inyu hôla nnigil i bii i mam a nigil i bibôñôl. Hégda le a mbôdôl lo i makoda ndi a nôgla bé ni mankéé wada inyule i mankéé nu, a bi babaa nye. Kii u yé le u boñ ha ngéda i? Hôla nye i tehe lôk kéé kiki Yéhôva a ntehe bo. Inyu boñ hala, u nla gwélél i mambadga mana: Kii Yéhôva a bi boñ inyu unda i lôk kéé i gwéha? (Yôhanes 3:16) Baa Yéhôva a ngwés le bagwélél bé ba bagla, tole ba niñ ikété nsañ ni adna? (Tjémbi 133:1) I ngéda hiki wada wés a mboñ biliya i tééda adna, Yéhôva a yé a ba lelaa? (2 Korintô 13:11) Hôla nnigil Bibel i nok ipam limbe likala Yéhôva a yé a ba maséé i ngéda di mbok mis mu bilem bi lôk kéé, ndi he bé i bilem gwap bibe.

15-16. (a) Lelaa nnigil Bibel a nla nigle Yésu i ngéda a nsômbôl yoñ makidik ma ngui? (Yôhanes 8:29) (b) Lelaa Marianne a bi hôla nnigil Bibel i yoñ makidik malam? (Béñge yak titii.)

¹⁵ U nla ki hôla nnigil Bibel i bii i mam a nigil i bibôñôl i ngéda a nlama yoñ makidik. U nla ti nye makénd i wan pes 35 i kaat ini le Niñ ilam i boga ni boga! ni ño le: “Lelaa di nla yoñ makidik malam.” Ndi i nla ki pam le nnigil a soohe, a boñ minyiña ndi to hala, a pam bé i yoñ makidik. Kii u nla boñ? Bebek, a ntehe ngandak matiñ ma Bibel kayéle hala a ntômbôl bé nye i pohol ma ma nkiha ni ndutu yé. U nla kal nye le a ôt pék mu ndémbél i Yésu. Kii i bé i hôla Yésu i yoñ makidik? A bi kal le: “Me mboñ i mam ma nlémél [Tata] ngéda yosôna.” (Añ Yôhanes 8:29.) Hôla nnigil i badba le: ‘I ngéda me ñôt pék mu minyiña me mboñ ni mu mam me nyi inyu Yéhôva, mambe makidik ma yé le ma lémél Yéhôva?’ I makidik momasôna ma nlémél nlémél Yéhôva ma yé makidik malam.

¹⁶ Muda wada nu a bé nigil Bibel i Chili a bé lama yoñ makidik. Lihaa jé li bé tinde nye i neebe bôlô i i nyilha nye ngwañ. Ndi i bôlô i, i bé ti bé nye pôla i ke i makoda momasôna. Marianne nu a bé nigil Bibel ni nye a nkal le: “Me bi ti nye makénd i ôt pék mu makidik mé inyu yi lelaa Yéhôva a ntehe mo. Baa ma ga lémél nye tole ma ga bébél nye? Me ti nye maéba le a yible Yéhôva ñem wé mu jam li, a tehe ki lelaa Yéhôva a ga kena mam. A bi tjél i bôlô i, ndi ndék dilo i mbus, a léba bôlô ipe i i nti nye pôla i ke i makoda momasôna.” Yimbe le sita Marianne a bi kal bé nnigil Bibel i yom nye nnigil a nlama boñ, ndi a bi ti nye makénd i ôt pék mu mam a bé yi inyu Yéhôva. Mam ma bi sôk laa? Nnigil Bibel bo Marianne ba bi yila mawanda ndi iloo mam momasôna, i nnigil nu a bi yila liwanda li bas bas li Yéhôva. Marianne a nkônde le: “Bisai a bi kôs bi bi unda nye le Yéhôva a ntjôô bé bés i ngéda di mbii nsômbôl yé bisu.”

BISAI BI BI MBEM BA BA NYI YÉHÔVA LOÑGE LOÑGE

17. Ikété mam di niiga mut, limbe li nlôôha nseñ i niiga nye?

¹⁷ Yigil Bibel i nhôla banigil i yi biniigana bi mahee. Kiki hihéga, ba nigil i yi kii i yé binoñ, kii i ntagbe i ngéda mut a nwo, ni kii i yé Ane Djob. Ba nigil ki i yi lelaa mam ma yé ntjegek ikété ntôñ u Yéhôva, kiki bo lelaa makoda ma ntagbe, mimbe minson mimañ mi ngwel ni umbe nson juu li bakena ntôñ u mboñ. Di gwé ndik bé ngôñ le banigil Bibel ba yi i mam ma, ndi di gwé yak ngôñ le ba pam i yi Yéhôva téntén.

18. Bimbe bisai bi mbem ba ba nigil yi Yéhôva?

¹⁸ Kinje nsima di gwé i niiga bôt ni i hôla bo i yi Yéhôva! I bet ba nigil yi nye, ba béghak nye, ba yé bokimasoda i len ini! Kinje bisai bi mbuma ñañ! (Tjémbi 25:​12-15) Ndi bisai bipe bi mbem bo. Ba bobasôna ba ga “bana yi i nu a yé maliga” le Yéhôva, ba ga niñ i boga ni boga. (1 Yôhanes 5:20) Ndi baa hala a mal? To! Bibel i nkal le ba ba nliya i yi Yéhôva, ba gwéhék nye, yak Yéhôva “a nyi [bo].” (1 Korintô 8:3) Hodo, Nyambe Nu ngui yosôna a ntehe bés, a neebe ki le di ba mawanda mé. Kinje bisai di gwé i yi bañga Djob!