Kal bôt maliga ndi ni bibuk bilam

1. Kii di nlama boñ inyu ba mu lihaa li Yéhôva?

I NGÉDA di mboma mankéé wada ngélé bisu, di mbéna bat nye le: “Lelaa u bi yi maliga?” Bôt bahogi ba mbéna timbhe le ba bi néñél i maliga. Bape ba nla kal le ba ntip yi maliga. I mandimbhe ma, ma ñunda le maliga ma bi héñha niñ yés héñha yosôna. Inyuki? Inyule di nyi le di nla bé ba mu lihaa li Yéhôva ibale di ñunda bé le di ngwés maliga, di biak mo i bisélél. Hala a nkobla le di nlama ba maliga i bipôdôl gwés ni i maboñok més.​—Tjémbi 15:​1-3.

2. (a) Bôt ba bé yi le Yésu a bé umbe ntén mut? (b) Lelaa bôt ba bé yoñ maliga Yésu a bé niiga?

² Yésu a bé pot maliga ngéda yosôna. Yak baoo bé ba bé yi le a mpot ndik maliga, to ibale i jam a nkal li nlémél bé bôt bobasôna. (Matéô 22:16) Yésu a bi toñol lelaa bôt ba ga yoñ maliga a bé pot. A bi kal le: “Me bi lo inyu bagal bôt ba lihaa, kayéle man munlôm a kolba isañ; man muda ki a kolba nyañ; yak nkiya a kolba nyôgôl wé.” (Matéô 10:35) Yésu a bé tjél bé le bôt ba emble nwin nye ni banigil bé ba bé añal, ndi a bé yi le u ga lémél bé bôt bobasôna. (Matéô 23:37) A bé yi le nwin wé u ga bagal bôt: ba ba ngwés maliga, ni ba ba ñoo maliga.​—2 Tésalônika 2:​9-11.

3. Kii d’a pôdôl munu yigil ini?

³ Kiki Yésu, di mboñ biliya i kal bôt maliga ngéda yosôna, tolakii di nyi le ma nlémél bé bôt bobasôna. Di ñañle bôt maliga, di niigaga ki bo mo to ibale hala a mbébél bape. Ndi baa hala a nkobla ni le di podok ndik tolaa tolaa, to imbe ngéda? To jam. Munu yigil ini, di ga timbhe i mbadga ini le: Hee di nla lébna maliga? I mbus ngéda, di ga timbhe yak i mambadga mana le: Inyuki di nlama pot maliga, lelaa di nlama pot maliga, ni imbe ngéda di nlama pot mo? Mandimbhe ma ga hôla bés i hôlôs ngap yés i kal bôt maliga ndi ni bibuk bilam ni i kal bo mo i loñge ngéda.

HEE DI NLA LÉBNA MALIGA?

4. Inyuki di nkal le maliga ma nlôl yak Yéhôva?

⁴ Maliga ma nlôl yak Yéhôva. Hiki yom a mpot i yé maliga. Kiki hihéga, maliga mon a mpot i ngéda a nkal le lini jam li yé loñge tole lii lipe li yé béba. (Tjémbi 19:9; 119:​142, 151) Hiki jam a mbôn inyu dilo di nlo li ga yon. (Yésaya 55:​10, 11) Mbônga wé to wada u nset bé. (Ñañga bôt 23:19) Yéhôva a yé mbén i tembee! (Lôk Héber 6:18) Inyu hala nyen a nséblana le “Nyambe nu maliga.”​—Tjémbi 31:5.

5. Inyuki hala a ta bé ndutu i léba “Nyambe nu maliga”? Toñol. (Minson mi baôma 17:27)

⁵ Bôt bahogi ba nkal le hala a nlet i yi Yéhôva, “Nyambe nu maliga,” ndi maliga bé ma! I mam ma nkéña bés ma ñunda le Djob a yé toi. (Rôma 1:20) I ngéda a bé pôdôs bôt ba Grikia i Atén, ba ba bé bayimam, ñôma Paul a bi kal le Djob a ngwés le di “léba nye” ni le “a ta bé haa ni hiki wada wés” (Añ Minson mi baôma 17:27.) Bôt ba suhulnyuu ba ba nyéñ maliga bon Yéhôva a ñôt i nyeni.​—Yôhanes 6:44.

6. Bimbe biniigana di nlama bôdôl ñem, inyuki u yé maséé i yi gwo?

⁶ Njel yada i i nhôla bés i léba Yéhôva i yé le di nigil Bibel. Mbuu u Yéhôva won u bi tinde bôt i tila Bibel. (2 Pétrô 1:​20, 21) Jon, i mam momasôna ma yé ntilga ikété Bibel ma yé maliga, di kôli ki bôdôl mo ñem. Kiki hihéga, i ngéda Bibel i ntoñle bés lelaa ngiinda i bi héga, ni lelaa niñ i bi bôdôl hana ’isi, di nhémle hala. (Bibôdle 1:​1, 26) I ngéda i ntoñle bés inyuki bésbobasôna di yé baboñbéba, ni inyuki mandutu ni nyemb bi nai, di nhémle yak hala. (Rôma 5:12; 6:23) I ngéda Bibel i nkal ki bés le Yéhôva a ga gwélél Man wé inyu mélés mandutu momasôna Satan “isañ bitembee” a bi lona, di mpééna bé hala to ndék. (Yôhanes 8:44; Rôma 16:20) Ñ, di nla yak hémle i mimbônga mi Bibel mini le Yésu a ga tjé bibéba bi bôt, a tugul bawoga, a yilha hisi Paradis, a hôla ki bés i yila peles. (Yôhanes 11:​25, 26; 1 Yôhanes 3:8) Kinje bisai Yéhôva a ñumbe bés! A bi niiga bés maliga, a nti ki bés pôla i niiga bôt bape i maliga ma.​—Matéô 28:​19, 20.

INYUKI DI NLAMA POT MALIGA?

7-8. Baa i manjom ma ntinde bés i pot maliga ma nlôôha ba nseñ inyu Yéhôva? Ti hihéga. (Markô 3:​11, 12) (Béñge yak bititii.)

⁷ Kiki di mbôk di tehe, di nlama pot maliga inyu boñ le di ba mu lihaa li Yéhôva. Ndi inyu lémél nye, di nlama ndik bé pot maliga, di nlama boñ iloo hala. Njom i i ntinde bés i pot maliga i yé nseñ ngandak inyu Yéhôva. Di béñge i yom i bi pémél Yésu i ngéda a bé gwel nson wé hana ’isi. (Añ Markô 3:​11, 12.) I ngéda Yésu a bé añal ñañ nlam bebee ni tuye Galiléa, mamut ma bôt ma bi kodba ipañ yé. Mukété yap, bôt bahogi ba ba bééna mimbuu mimbe ba bi lo, ba ôôp i bisu gwé, ba londok, ba kalak le: “U yé Man Nyambe.” Inyuki mimbuu mimbe mi bé pot hala? Njômbi yap i bé le mi yoña bôt ba bé emble nwo, mi tinde ki bo i kôm Yéhôva mbus. Mimbuu mimbe mi bé pot maliga, ndi mi bééna minsoñgi mimbe. Yésu a bi tehe mahoñol map mabe, hala a lémél bé nye to ndék. Jon, Yésu a bi kal mimbuu mimbe le mi pot ha bañ inyu yé.

⁸ Bimbe biniigana di nla ôt munu ñañ unu? Manjom ma ma ntinde bés i pot maliga ma yé nseñ ngandak inyu Yéhôva. I nlôôha ba nseñ le mahoñol malam mon ma tinde bés i niiga bôt maliga ni le di boñ biliya le Yéhôva nyen a kôs lipém, he bés bé!​—Matéô 5:16; béñge yak Minson mi baôma 14:​12-15.

9. Kii di nlama keñgle, inyuki?

⁹ Di yoñ hihéga hipe hi hi ñunda inyuki di nlama bé yéñ lipém jés bésbomede. Di hégda le mankéé nu a ñéga nson a nyeelene bés ngim jam di kôli bé kal bôt bape, ndi bés di ke di kal bo jo. Ibale i bôt di nkal i jam li, ba nsôk ba tehe le li yé maliga, ba yé le ba diihe bés iloo ’héga, ba tehge le bés di nyi ngandak mam bôt bape ba nyi bé. Bebek bo ba ga bégés bés, ndi hala a ga lémél bé Nyambe to ndék. (Bingéngén 11:13) Inyuki? Inyule to ibale i jam di mpot li yé maliga, di bak bé di kôli yelel jo, yak mahoñol ma ma ntinde bés i pot jo ma bak mabe.

LELAA DI NLAMA POT MALIGA?

10. Bibuk bilam wee kii? (Kôlôsé 4:6)

¹⁰ Añ Kôlôsé 4:6. Ñôma Paul a bi bigdaha bikristen bi Kôlôsé le bi bana ‘bibuk bilam ngéda yosôna.’ Kii hala a nkobla? I bibuk bi Grikia bi, bi nkobla le bibuk gwés bi nlama ti bôt makénd, di nlama pôdôs bo ni loñgeñem ibabé i babaa bo yañga.

11-12. Inyuki di nlama yoñ yihe i ngéda di niiga bôt maliga? Ti hihéga. (Béñge yak bititii.)

¹¹ Jon di nlama nôgôl bibañga bi Paul bini le di gwélél bibuk bilam i ngéda di niiga bôt maliga. Bibel yomede i ntoñol le maliga ma yé kiki pansoñ i i nhoo, i i nla bagal mut lôñni mahoñol mé. Hala a nkobla le maliga ma nla yelel i yom mut a nhoñol ikétékété yé. (Lôk Héber 4:12) Ndi ibale di nyi bé gwélél Bibel, di nla babaa mut tole di suu mindañ mi yañga. Lelaa hala a nla bôña?

¹² Hégda le i jam lini: I likalô, di mboma mut a ngwés maliga, ndi a mbéna soohe bisat, a ban-ga lem i tégbaha ngand Kristak ni ngand Paska lôñni lihaa jé. Di nla gwélél Bibel inyu unda nye le bijôñ bipe bi nloo bé bini le mut a bégés bisat, di unda ki nye le Kristak ni Paska bi yé mangand ma bihaiden. (Yésaya 44:​14-20; 2 Korintô 6:​14-17) Ibale di nkal nye hala ngélé bisu di mboma nye, wee di nkal nga nye maliga? Ndi baa di ntibil ni gwélél Bañga i Nyambe? To jam.

13. Lelaa di nla nés bibuk gwés?

¹³ Paul a bi kal ki i bôt ba bé emble nye le ba nlama bana bibuk nnéhak ni bas. A bé sômbôl bé kal le di kôde maliga tole di sôô mo. Ndi a bé sômbôl kal le di bana bibuk nnéhak ni bas inyu boñ le bi nél i bet ba ñemble gwo. (Hiôb 12:11) I boñ hala i nla bane bés ndutu. I ngéda di nlamb bijek, di yé le di hoñol le kiki bi nél bés, hala nyen bi ga nél yak i bet ba ga je gwo. Nlélém, di nla hoñol le lipodok jés li ga lémél bôt bobasôna. Ndi maliga bé ma! I matén mahogi, bôt ba gwé lem i bahal bôt maliga to ibale ba yé i pôdôs i bet ba nloo bo bimañ; ki le i matén mape, ba neebe bé le u pôdôs mut i nya i. I ngéda u mpôdôs mut i nya i, ba ntehe hala kii diyana, hala a mbabaa yak bo. Paul a nkal le di nlama yi lelaa di “timbhe hiki mut.” Hala a nkobla le di nlama nés bibuk gwés, he bé i nya i nlémél bés, he bé to inoñnaga ni bilem gwés, ndi i nya i nlémél i bôt ba ñemble bés.

IMBE NGÉDA DI NLAMA POT MALIGA?

14. I ngéda Yésu a bé hana ’isi, baa a bi niiga banigil bé mam momasôna a bé yi? Toñol.

¹⁴ Hiki ngéda Yésu a bé pôdôs banigil bé, a bé gwélél bibuk bilam, a niigaga bo ibabé i babaa bo yañga. (Markô 6:34) Ndi ba bééna ki ngandak mam i nigil. Yésu a bé yéñ bé niiga bo hiki jam a bé yi. A bé yi le ba gwé minwaa, a yik ki le ngéda i bé ngi kola le ba yi ngim mam. A bi kal yak le ba bé bé le ba begee i mam ma momasôna ngélé yada. (Yôhanes 16:12) Kii hala a niiga bés?

15. Baa di nlama kal banigil Bibel mam momasôna di nyi ngélé yada? Toñol. (Bingéngén 25:11) (Béñge yak titii.)

¹⁵ Ndémbél i Yésu i ñunda le i yi maliga i nkobla bé le di nlama niiga mut mam momasôna di nyi ngélé yada. Lelaa di nla noñ ndémbél i Yésu? Di nlama unda le di ntôñ bôt. Di témb mu hihéga hi mut di bak di kal le a ngwés a ntégbaha ngand Paska ni ngand Kristak lôñni lihaa jé. Bés di nyi le i mangand ma, ma yé mangand ma bihaiden, ma nlémél bé to Yéhôva. Ndi hégda le u mbôdôl nigil Bibel ni mut sonde yada tole sonde iba ilole ngand Paska i mbôdôl. Ibale u nkal nye i yom Bibel i niiga inyu mangand ma, ndi u bemek le i bitéé bilôñi a lôôs ha bañ i mangand ma, baa wee u yé i yi niiga maliga? I yé maliga le banigil Bibel bahogi ba nla pala nôgôl i yom Bibel i niiga. Ndi bape ba gwé ngôñ ni ngéda inyu kodol mahoñol map ni maboñok map. Di nla hôla i bet ba nigil Bibel i hol i ngéda di nkal bo mam ba nlama yi i loñge ngéda, hala wee i ngéda ba nla toi boñ mo.​—Añ Bingéngén 25:11.

16. Lelaa di nla hôla banigil Bibel i “kil ikété maliga”?

¹⁶ I ngéda di nhôla bôt i yi maliga, maséé ma yé le ba nol bés. Di nla hôla bo i “kil ikété maliga” ibale di mboñ i mam mana: Di kee ni bisu i bane bo ndémbél ilam. (3 Yôhanes 3, 4) Di ba nkwoog nkaa le ndémbél yés i ñunda toi le di nhémle mimbônga mi yé ikété Bibel. Di pot maliga ni mahoñol malam. Di pot mo ni loñgeñem, di gwéélak bibuk bilam i loñge ngéda inyu niiga maliga. Di boñ le Yéhôva nyen a kôs lipém inyu hiki jam di mboñ. Ibale di mboñ hala, di ga unda le di yé bôt ba Yéhôva, Nyambe nu maliga.