Tjél base i bitembee!

Satan ni mimbuu nwé mimbe ba ngwés bé le u sélél Djob. Ba nheñ i yumus hiki mut le a bagla ni Djob. Imbe njel ba ngwélél? Njel yada ini le base i bitembee. (2 Korintô 11:13-15) Base i yé bitembee ibale i niiga bé maliga ma nlôl i Bibel. Base i bitembee i yé kiki moni mimbe—mi nene we ngoñle bañga jam ndi ki mi gwé bé nseñ. Mi nla lona we ngandak mandutu.

Bitembee bi base bi nla bé lémél Yéhôva, Djob li maliga kel ki kel. Ngéda Yésu a ba hana isi, ntôñ base wada u bi yéñ le u nol nye. Ba ba hoñol le libéghene jab li yé lilam. Ba kal le: “Di gwé isañ wada le Djob.” Baa Yésu a neebe hala? Heni! A kal bo le: “Ni yé ba isoñ nan le Nsohop.” (Yôhanes 8:41, 44) I len ini ngandak i nhoñol le i mbégés Djob, ndi i maliga ba nsélél Satan ni mimbuu nwé mimbe!—1 Korintô 10:20.

Kiki e be i num matam mabe, hala ki nyen base i bitembee i nti bôt ba mboñ mam mabe. Nkoñ isi u nyon ni mandutu inyu mam mabe bôt ba mboñ, kiki bo: ndéñg, bisañ, wip, ndéñga, manola, nyégsa bôt i malal. Ngandak bôt i mboñ mam mabe mana ba yé i base, ndi base yap i ntinde bé bo le ba boñ mam malam. Ba ta bé le ba ba mawanda ma Djob letee ni le ba nwas boñ mam mabe.—Matéô 7:17, 18.

Base i bitembee i niiga bôt le ba soohe Djob ni njel bisat. Djob a nkal le di soohe bañ bisat. Hala a té. Baa ibale mut a ta a pôdhag bé we, ndik titii yoñ, hala a nla lémél we? Baa i nya mut i i nla ba bañga yoñ liwanda? Heni. Yéhôva a ngwés le bôt ba pôdôs nye, ha ôñgba to titii bé, inyule bi gwé bé niñ.—Manyodi 20:4, 5.

Base i bitembee i niiga le i yé loñge i nol bôt bape i ngéda gwét. Yésu a kal le mawanda ma Djob ma nlama gwéhna. Di nol bé bôt di ngwés. (Yôhanes 13:35) I ta bé to loñge le di nol bibéba bibôt. I ngéda baoo ba Yésu ba lo i gwel nye, a ume bé banigil bé le ba jo sañ inyu sôñ nye.—Matéô 26:51, 52.

Base i bitembee i niiga le bibéba bi bôt gw’a son njonog i bee hié. Ndi Bibel i niiga le béba i nkena i nyemb. (Rôma 6:23) Yéhôva a yé Djob li gwéha. Baa Djob li gwéha li nla sônôs bôt njonog boga ni boga? Heni! I Paradis base y’a ba ndik yada, i Yéhôva a ngwés. (Masoola 15:4) Bibase gwobisô bi bi umne i ngi bitembee bi Satan gw’a ba ha bé.