Yésu “a bi nigil manôgla”

Yésu a ma ndogbene bé Yéhôva. (Yôhanes 8:29) Inyuki Bibel i nkal ni le: “A bi nigil manôgla ni njel mandutu a bi kôhna”?​—Lôk Héber 5:8.

Mandutu Yésu a bi kôhna hana ’isi ma bé bé nyoo i ngii. Kiki hihéga, bagwal bé ba bé gwés yaga Yéhôva, ndi ba bé baboñbéba. (Lukas 2:51) A bi nok ndutu inyu maboñok mabe ma baéga base ni baane. (Matéô 26:59; Markô 15:15) Jam lipe li yé le: “A [bi] suhus nyemede, a yila manôgla letee ni i nyemb,” béba nyemb kiyaga!​—Filipi 2:8.

I mandutu mana momasôna ma bi boñ le Yésu a nigil manôgla i nya a bé ngi nigil. Hala a bi boñ le a yila toi bañga Ñane ni Prisi Keñi, nu a nla yaga nok bés. (Lôk Héber 4:15; 5:9) Yésu a bi kônde lémél Yéhôva i ngéda a bi nigil manôgla ni njel mandutu a bi kôhna. Yak bés di nkônde lémél Yéhôva, di nkônde ki bane nye nseñ i ngéda di nôgôl nye yak i ngéda di yé ikété ndutu.​—Yakôbô 1:4.