Mambagda ma basoñgol
Imbe ngéda nson u ñañ nlam u ga telep?
Yésu a bi kal le: “Unu ñañ nlam u Ane w’a añlana ni nkoñ ’isi wonsôna, i ba biloñ gwobisôna mbôgi, ndi to le lisuk li nlo.” (Matéô 24:14) I buk Grikia ba nkobol le “lisuk” munu nlôñ 6 ni nlôñ 13, i yé teʹlos. I mpôdôl lisuk li nkoñ ’isi u Satan i Armagédôn. (Masoola 16:14, 16) Hala a nkobla le ndék ngéda, ilole gwét bi Armagédôn bi mbôdôl, d’a ke ni bisu i añal ñañ nlam. Hala bé nyen di bé niiga behee.
Di bé kal ndugi le nson u ñañ nlam u ga telep i ngéda njiiha ikeñi i ga bôdôl, ni tjiba i Babilôn Nunkeñi. (Masoola 17:3, 5, 15, 16) Di bé hoñol le njiiha ikeñi i ga ba lisuk li “nwii u loñgeñem i Yéhôva.” (Yésaya 61:2) Di bé hoñol yak le i bôt ba ga pei njiiha ikeñi, ba nlama gwélél Yéhôva ilole njiiha ikeñi i mbôdôl. Di bé hégha i bôt ba ni i bôt ba bi pei tjiba i Yérusalem i nwii 607 B.N.Y. Yéhôva a bi kit le i bôt ba, ba bé lama pei tjiba i Yérusalem inyule ba bé gwélél Yéhôva, ba ook béba. (Ézékiel 5:11; 9:4) Ndi i mahoñol ma, ma nkiha bé ni mahoñol ma Yésu di nléba i kaat Matéô 24:14, i het a nkal le ndék ngéda ilole Armagédôn a mbôdôl, bôt ba yé le ba nok ñañ nlam.
Kiki di ntibil nok kaat Matéô 24:14, hala a nhôla bés i nok kaat Masoola 16:21 i i mpôdôl nwin u u yé kiki matan-ga. I ngéda di ntibil wan, di ntehe le i minlôñ ima mi, mi nkiha. Inyuki di nkal hala? Di bigda lelaa bôt ba ntehe ñañ nlam. Ñôma Paul a bi kal le “inyu bôt ba nkôhna tohi,” ñañ nlam u yé nwin nlam, “njiñ niñ.” Ndi inyu i bet ba ñoo Nyambe, u yé béba nwin, “njiñ nyemb.” (2 Korintô 2:15, 16) Ba ñoo ñañ nlam inyule di nkal le nkoñ ’isi unu u yé béba, Satan nyen a ñane wo ni le ndék ngéda, u ga tjiba.—Yôhanes 7:7; 1 Yôhanes 2:17; 5:19.
Di yimbe ki le i nwin u, u ga ba kiki matan-ga, u ban-ga “ngui iloo hihéga.” Hala a nkobla le i ngéda njiiha ikeñi i ga bôdôl, nson u ñañ nlam u yé le u kônde bana ngui, hala wee bôt ba ga yi Yéhôva kiki ba bé ngi yi nye. (Ézékiel 39:7) Baa ha ngéda i, i mbus tjiba i Babilôn Nunkeñi, bôt ba ga gwés ñañ nlam kiki labinda i i numb loñge njiñ? I yé le i ba hala, ba yé le ba bigda le hala a yé ngandak nwii le Mbôgi Yéhôva i nkal le kwéha base i ga tjiba.
Di bigda i jam li bi tagbe i Égiptô i ngéda Yéhôva a bi kogse bo ni jôm li dimala. I ngéda Yéhôva “a bi pémhene i banyambe ba bobasôna mbagi],” “limut likeñi li mintén mi bôt nwominsôna” li bi noñ bon ba Israel. (Manyodi 12:12, 37, 38) I bakén ba bôt ba, ba bi lama noñ litén li Yéhôva i ngéda ba bi tehe le i jam Môsi a bi kal inyu jôm li dimala li bi yon.
I bôt ba ga bôdôl gwélél Yéhôva i mbus tjiba i Babilôn Nunkeñi, ba ga bana bisai i bôñôl lôk tata i Yésu, i i ga ba i ngi yii hana ’isi, loñge. (Matéô 25:34-36, 40) Ndi ba ga la ha bé boñ hala ndék ngéda ilole Armagédôn a mbôdôl. Inyule ha ngéda i, i ndék minhook i ga ba i yii hana ’isi y’a ke i ngii.
Kiki di ntibil nok minlôñ mi Bibel mini, hala a nkônde unda bés konangoo i Yéhôva ni gwéha yé. Ñ, Yéhôva a nsômbôl bé le “mut nye ki nye a tjiba, ndi a nsômbôl le bôt bobasôna ba pam i hiel miñem.”—2 Pétrô 3:9.