Mambadga ma basoñgol
Ngéda imbe Yésu a bi yila Prisi ikeñi? Baa maselna ma yé ipôla i ngéda ba bi boñ malômbla ma yondo, ni i ngéda ma bi bôdôl sal?
Ngandak mam i ñunda le Yésu a bi yila Prisi ikeñi i ngéda a bi sôblana i nwii 29 N.Y. Kii i nyis bés hala? I ngéda Yésu a bi sôblana, a bi ti nyemede sesema i juu li bisesema hala wee i boñ “sômbôl” i Nyambe. (Galatia 1:4; Lôk Héber 10:5-10) Ibôdôl nu juu li bisesema li li bi ôña, hala wee i ngeñ Yésu a bi sôblana, yak témpel i mbuu ikeñi i bi tééba. I témpel i i yé bitelbene gwobisôna Yéhôva a bi yoñ inyu bibégés bipubi ni njel binoñ. Kiki juu li bisesema li bé nseñ ngandak i témpel i Yérusalem, hala nyen sômbôl i Yéhôva i nlôôha ba nseñ mu i témpel i mbuu ikeñi.—Matéô 3:16, 17; Lôk Héber 5: 4-6.
Kiki témpel i mbuu ikeñi i bi tééba, prisi ikeñi i bé béda. Jon Yéhôva a bi hoo Yésu “ni mbuu mpubi lôñni lipémba.” (Minson mi baôma 10:37, 38; Markô 1:9-11) Ndi kii i nyis bés le Nyambe a bi hoo Yésu Prisi ikeñi ilole a nwo, a tuge ki? Ndémbél i Arôn ni biprisi bikeñi bi bi bi lo i mbus yé, yon i nyis bés hala.
Kiki mbén Môsi i bé kal, ndik prisi ikeñi yon i bé le i jôp i Homa a nlôôha mpubhaga i lap, yak i Homa a nlôôha mpubhaga i témpel i mbus ngéda. Libadô jon li bé kap Homa mpubhaga ni Homa a nlôôha mpubhaga. Prisi ikeñi i bé tagbe libadô li ndik i kel Bikwak. (Lôk Héber 9:1-3, 6, 7) Ndik kiki Arôn ni biprisi bi bi noñ nye, ba bi yila biprisi bikeñi ilole ba njubul i libadô li lap, hala nyen yak Yésu a bi yila ndugi Prisi ikeñi mu témpel i mbuu ikeñi i Yéhôva ilole a nwo, i mbus a bi ‘tagbene i libadô, hala wee minsôn nwé,’ inyu ke i ngii. (Lôk Héber 10:20) Inyu hala nyen ñôma Paul a kal le Yésu a bi lo “kiki prisi ikeñi,” i mbus a jôp “ikété lap i i yé bañga ni peles iloo lap bisu, i i ta bé ñoñok ni moo,” hala wee “ngii yomede.”—Lôk Héber 9:11, 24.
Maselna ma ta bé ipôla i ngéda ba bi boñ malômbla ma yondo ni i ngéda ma bi bôdôl sal. Inyuki? Ngéda Yésu a bi bet i ngii, a unda ki Isañ sesema a bi ti inyu yés, a bi tek hikuu inyu malômbla ma yondo. I nlélém ngéda malômbla ma, ma bi bôdôl sal. Lelaa Yésu a bi tek hikuu hi?
Pog, Yésu a bi ke i ngii, a telep bisu bi Yéhôva; iba, a unda Yéhôva sesema yé; aa, Yéhôva a neebe matjél Yésu a bi ti kiki sesema. I mbus mam mana momasôna nyen malômbla ma ma bi bôdôl sal.
Bibel i mpôdôl bé ngéda Yéhôva a bi neebe sesema i Yésu. Jon di ta bé le di yi i ngéda malômbla ma ma bi bôdôl sal. Ndi di nyi le Yésu a bi bet i ngii jôm li dilo i mbus Pentékôt. (Minson mi baôma 1:3) Mu ndék ngéda i, ipôla mabet mé i ngii ni Pentékôt, a bi unda Yéhôva sesema yé, Yéhôva a neebe ki yo. (Lôk Héber 9:12) I jam li bé unda le malômbla ma yondo ma mbôdôl sal li bi nene loñge loñge i Pentékôt. (Minson mi baôma 2:1-4, 32, 33) Ha nyen i bi nene i mbamba le malômbla ma yondo ma mbôña, ma mbôdôl ki sal.
I sem kwep, di ntehe le malômbla ma yondo ma bi bôña, ma bôdôl ki sal i ngéda Yéhôva a bi neebe matjél Yésu a bi ti kiki sesema, ni i ngéda a bi jubus ki minhook mu malômbla ma. Ha nyen malômbla ma yondo ma bi bôdôl sal ni Yésu kiki Prisi ikeñi, ni Ñat mo (Médiateur).—Lôk Héber 7:25; 8:1-3, 6; 9:13-15.